U kon bañ lisuk li nkoñ isi unu woñi

Ndék ngéda, Yéhôva a ga éba ha bé nkoñ ’isi unu wongut. Kwéha base i ga tjiba. Adna i matén i ga leñ litén li Djob gwét, ndi Yéhôva a ga tjé bibéba bi bôt i Armagédôn. Bikristen bi mbem i mam ma ni maséé.

I yé maliga le di nyi bé i mam momasôna ma ga boña i njiiha keñi. Kiki ’héga, di nyi bé imbe ngéda njiiha keñi i ga bôdôl, di nyi bé manjom ma ga tinde bôt ba m’bô i kolba kwéha base, biloñ bi ga leñ litén li Djob gwét, ndi di nyi bé libim li ngéda hala a ga yoñ. Ni kii ba ga gwélél. Di nyi bé to kii Yéhôva a ga gwélél inyu tjé bibéba bi bôt.

Ndi Bibel i nti bés biniigana bi bi ga hôla bés i bem lisuk li nkoñ ’isi unu ni botñem ni makénd. Kiki ’héga, di nyi le di niñ i “dilo di nsôk.” (2 Timôtéô 3:1) Inyu boñ le base i maliga i tjiba bañ, Yéhôva a ga “hubus” dilo di tjiba i kwéha base. (Matéô 24:22) Di nyi le Yéhôva a ga soñ litén jé. (2 Pétrô 2:9) Di nyi ki le i mut Yéhôva a mpohol inyu tjé bibéba bi bôt ni inyu péyés limut li bôt likeñi i Armagédôn a téé sép, a gwé ki ngui.​—Masoola 19:11, 15, 16.

I mam makeñi di mbem ma ga boñ le bôt ba “kwo lihiô inyu woñi,” maselna ni hala, i ngéda di ñañ miñañ mi mi ñéba lelaa Yéhôva a bi péyés bagwélél bé i ngéda kôba, ni i mam a mbôn bés inyu dilo di nlo, di ôdôk pék mu, hala a mboñ le “di telep bitétéé, di paa miño,” di bak nkwoog nkaa le kobla yés i yé bebee.​—Lukas 21:26, 28.