Mambadga ma basoñgol

Ni imbe njel ñôma Paul “a yôña letee a pam ngii i nyônôs iaa” tole “i paradis”?​—2 Korintô 12:2-4.

I kaat 2 Korintô 12:2, 3, Paul a mpôdôl ngim mut i bi “yôña letee a pam ngii i nyônôs iaa.” Njee a bé mut nu? Mu kaat a bi tilna likoda li Korintô, Paul a yigye le Djob a bé gwélél nye kiki ñôma. (2 Korintô 11:5, 23) Jon a bi pôdôl “bindéé (biyiinda) ni masoola ma Nwet.” Mu nkwel wé Paul a bi sima bé bilôk bikéé bipe. Di kôli hoñol le a bé pôdôl nyemede, kiki nu a bi kôs biyiinda ni masoola.​—2 Korintô 12:1, 5.

Paul nyemede nyen “a yôña letee a pam ngii i nyônôs iaa” ñ, “a yôña letee a pam i paradis.” (2 Korintô 12:2-4) A bi gwélél i buk ini le “masoola,” inyu unda le ba soolene nye ngim jam i i bé lama bôña dilo di nlo.

Kii i bé “ngii i nyônôs iaa” Paul a bi tehe?

Ikété Bibel, i buk ini le “ngii” i nla ba ngii i nene i mis. (Bibôdle 11:4; 27:28; Matéô 6:26) Ndi buk i le “ngii” i nla ki gwélana nya ipe. Bibel i mbéna gwélél yo inyu pôdôl énél i bôt ba binam. (Daniel 4:20-22) Tole i nla bana maada ni énél i Djob, ni njel Ane yé​—Masoola 21:1.

Paul a bi tehe “ngii i nyônôs iaa.” Kii a bé sômbôl kal? Ngim mangéda Bibel i yé i tiimba ngim jam ngélé iaa inyu yigye yo, inyu kéñbaha yo tole inyu unda le jam li li gwé ngui. (Yésaya 6:3; Ezékiel 21:27; Masoola 4:8) I nene le ngéda a bé pôdôl “ngii i nyônôs iaa,” Paul a bé yigye ngim énél i mpôôna bé ipe, ni i a bé bégés​—hala wee Ane i Mésia i het Yésu Kristô a’ ane ntôñ ni 144 000. (Béñge i kaat ini ni hop Pulasi le Études Perspicaces Écritures, Vol. 1, mapep 473, 479.) Kiki ñôma Pétrô a tila, di mbem “ngii yondo” kingéda likak li Nyambe.​—2 Pétrô 3:13.

Kii di nla ni kal inyu “paradis” Paul a mpôdôl?

I buk ini le “paradis” i nla bana ngandak ndoñi: (1) I nla ba nlômbi homa liyééne li mut binam, “paradis” i nla ki ba Paradis i het bôt ba binam ba ga niñ hana isi. (2) I nla ba “libak li mbuu” litén li Djob li ga bana i mbok yondo. (3) U héya hala, i nla ki hoñlaha bés niñ i nsañ bagwélél ba Djob ba gwé nyoo i ngii, “paradis i Nyambe” i di nléba i kaat Masoola 2:7.​—Béñge Nkum Ntat ni hop Pulasi nu hilo 15, i sôñ Njéba 2015, lipep 8, liben 8.

I nla ba le Paul a bé pôdôl i mam ma mo maa i kaat 2 Korintô 12:4 ngéda a bé toñlak i jam li bi pémél nye.

I sem nkwep:

“Ngii i nyônôs iaa” i ba mpôdôl i kaat 2 Korintô 12:2 i nla ba Ane i Mésia i het Yésu Kristô ni 144 000 bôt ba mba baéga, bon ba yé “ngii yondo.”​—2 Pétrô 3:13.

Ba nsébél i Ane i le “ngii i nyônôs iaa” inyule énél i i mpôôna bé ipe, i kéhi ki i ngii biane gwobisôna.

“Paradis” i het Paul “a yôña,” i yiinda, i nla ba (1) Paradis i minsôn i i ga ba hana isi, (2) paradis i mbuu i i ga ba ha ngéda i, i ga lôôha ba keñi iloo paradis i mbuu di gwé i len ini, ni (3) “paradis i Nyambe” i i ga ba ngii, ki hisi hi mal yila mbok yondo.

Jon, ngii yondo ni hisi hi yondo gwon bi ga ba mbok yondo. I ga ba bitelbene bi mondo Yéhôva a’ yoñ, bi bi mbéñge Ane Djob i i yé ngii, ni i bet b’a niñ hana ’isi, mbus hi ga yila paradis.