“Ane yoñ i loo”

Yéhôva a bi bôn le: ‘Nlondok, njôghe, makon, to nyemb, bi ga ba ha bé.’ A kal ki le: ‘Me ga sas gwiiha gwobisôna i mis map. Ba ga hôya mam mabe momasôna ma bé behee.’

Yéhôva a bi bii Adam bo Éva ikété wom Éden, le ba niñ ikété nsañ ni maséé. Ba bé lama bégés Isañ wap nu ngii, ni yônôs hisi ni bon bap. Adam bo Éva ba bi ndogbene Yéhôva, ndi to hala sômbôl yé i bi héñha bé. Ikété kaat ini, di ntehe le mam momasôna Djob a mbôn ma nyon. Ane yé i ga lona bisai bi mbuma ñañ hana isi, kiki a bi bôn Abraham.

Ndék ngéda, Satan, mimbuu nwé mimbe, lôñni bibéba bi bôt gwobisôna, ba ga tjiba. Hiki wada, nu a mba i niñ, a ga bégés Yéhôva. Di ga kon ha bé, di ga wo ha bé. Hiki kel, di ga tôdna mbôô, ni ngui i nya i yôni, di konok maséé le di yé niñ. Hisi hi ga yila paradis. Hiki mut a ga bana biloñge bi bijek ni loñge ndap. Bôt b’a ba minyaô; bôt ba bisañ ni ba ba nyai b’a ba ha bé. Binuga bi bikai bi ga kon ha bé bés woñi, ndi to bés di ga kon ha bé gwo woñi.

Maséé ma ga yon miñem nwés i ngéda Yéhôva a ga bôdôl tugul bôt. Di ga leege bôt kiki bo Abel, Nôa, Abraham, Sara, Môsé, Ruth, Ester ni David. Ba ga sal lôñni bés i yilha hisi hiosô paradis. Hiki kel, d’a bana ngandak bibôlô bilam i sal.

Yéhôva a gwé ngôñ le u ba ha. U ga pam i yi nye i nya u bé bé le u hégda kekikel. Jon di kôôge Yéhôva bebee, kôôge ni kôôge, hiki kel, nano ni i boga ni boga!