Banigil ba nkôs mbuu mpubi

Jôm li dilo i mbus mabet ma Yésu i ngii, banigil bé ba kôhna mbuu mpubi. Hala a bi bôña i ngwa Pentékôt i nwii 33 N.Y. Bôt ba bi lôl bahoma bahoma inyu tégbaha ngand i Yérusalem. Bebee le 120 i banigil ba Yésu i bé i kôdi i tuñ ngii i ndap yada. Kunda yada, hélha jam i bôña. Ngim yom kiki lindômbôô li hié li bi pam i ngii ño u hiki nnigil, ni bo ba kahal pot ngandak mintén mi dilémb. Soso mbimba, kiki mbuk mbebi nunkeñi, i yônôs ndap yosôna.

Bakén ba bi lo i Yérusalem inyu ngand, ba ba bi nok i mbimba i, ba lo ngwéé i ndap inyu béñge kii i nke bé. Ngéda ba bi nok banigil ba mpot dilémb ti tjodisôna, ba hel. Ba kal le: ‘Ndi bôt bana ba yé bôt ba Galiléa. Lelaa ba mboñ inyu pot dilémb tjés?’

Ha nyen Pétrô ni baôma bape ba bi telep bisu bi limut. Pétrô a añle bôt lelaa Yésu a bi wo, ni kiki Yéhôva a bi tugul nye ikété bawoga. Pétrô a kal le: ‘Hanano, Yésu a yé i ngii, i woo walôm u Djob, nyen a nkôp mbuu mpubi a bi bôn. Inyu hala nyen ni nok, ni ntehge ki mana manyaga.’

Biniigana bi Pétrô bi bi tihba bôt ngandak, ba bat le: “A lôktata, di boñ laa?” A timbhe bo le: ‘Ni tam bibéba binan, ni sôblana ki i jôl li Yésu. Yak bé ni ga kôhna likébla li mbuu mpubi.’ Yokel, 3 000 di bôt di bi kôs sôble. Ibôdôl ha, nsoñgi banigil i Yérusalem u bôdôl bet, bet ni bet. Ni mahôla ma mbuu mpubi, baôma ba téé makoda mape, kayéle ba bi la niiga banigil mam momasôna Yésu a bi ti bo oda i boñ.