Hana a nsoohe inyu bana man

Man Israel wada le Elkana, a bééna baa iba, Hana bo Pénina, ndi a bé gwés Hana ngandak. Pénina a bé nol Hana hiki ngéda inyule a bééna bé bon, ndi ki le Pénina a bééna ngandak bon. Hiki nwii, Elkana a bé kena ndap yé lihaa inyu bégés Yéhôva i Lap, i Silô. I ngéda ba bé nyoo, a yimbe le Hana nwaa wé nugwéha a bé bé maséé. Elkana a kal nye le: ‘Soho a Hana, ee ha bañ. Me yé woñ. Me ngwés we.’

I mbus ngéda, Hana a bagba inyu soohe. A bé ee, a badak Yéhôva mahôla. A bôn le: ‘A Yéhôva, ibale u nti me man munlôm, m’a ti we nye, a ga gwélél we niñ yé yosôna.’

I ngéda Prisi Keñi le Éli, a bi tehe Hana a ñee, ngandak, a hoñol le Hana a nhiôô. Ndi Hana a timbhe nye le: ‘Heni a nwet wem, me nhiôô bé. Me gwé ndutu keñi, me yé i pahlene yo Yéhôva.’ Kiki Éli a ntehe le a nyoba, a kal Hana le: ‘Nyambe a ti we yom u mbat nye.’ Hana a kôhna hogbe, a huu. Ilole nwii wada u bé kola, Hana a gwal man munlôm, a o nye le Samuel. Baa u nla hégda maséé Hana a bééna?

Hana a bi hôya bé likak a bi ti Yéhôva. Kiki a ntjilis Samuel méé, a bedna nye i lap, i Silô, inyu gwélél Yéhôva. A kal Éli le: ‘Inyu man nunu nyen me bé soohe. Ntel wonsôna a’ ba i niñ, me mpôôs nye Yéhôva.’ Hiki nwii Elkana bo Hana ba bé ke i yuuga Samuel, ba lon-ga ki nye kôti ngi binam. Yéhôva a bi sayap Hana, a kônde ti nye bon bôlôm baa bape ni bon bôda iba.