MBADGA 3
Lelaa me nla kwel ni bagwal bem?
KII U GA BOÑ?
Hégda le jam lini: Di yé i Ngwa ngé, Géôf a mal bibôlô gwé bi kel i. Nano, a nyéñ tégbaha loñge ngéda. Jon a nkwiye nkuu biliñgeliñge, a beha i yééne yé i tôbôtôbô.
I nlélém ngéda, Isañ a njubul i nwemel, ni nkañak su.
Isañ a kal nye le: “A Géôf, kii u yé lep ngéda ha i bisu bi nkuu biliñgeliñge, ki le me hoñlak le u yé i hôla manyuñ i boñ minsoñgi malét a nti nye i suklu? U ta u boñok bé yom ba nkal we!”
Ha nyen Géôf a nhuñbe kayéle isañ a nla nok, a kalak le: “Ñ, u ntémb u bôdôl ki.”
Isañ a nsedep pes yada, ndi a kal le: “Baa we kii a mañge?”
Géôf a ntjamla, a hielek mis, ndi a timbhe nye le: “To yom, a pua.”
Ha ni nyen isañ a ntibil toi unup, ndi a kal nye le: “U gwéélak bañ i kiñ i, ngéda u mpôdôs me.”
Ibale u bak Géôf, ki u mboñ lelaa inyu keñgle ndañ unu?
YOÑ NDÉK NGÉDA I HEK PÉK!
I kwel ni bagwal boñ i yé kiki i luk litôa. Ibale u nkoba ngok i nkwo mu njel yoñ, u nla yoñ njel ipe.
KII HÉGA:
Hingonda ba nsébél le Léa a nkal le: “I yé me ndutu i kwélés pua yem. Ngim mangéda, ngéda me mal pôdôs nye, ha nyen a nkal me le: ‘Nwéhél me, baa u pôdlak me?’”
LÉA A NLA GWÉLÉL I NDÉK YOSÔNA MANJEL MAA.
A nyéyé isañ.
Léa a nyai, a kal le: “Ngo me yé pot jam li yé mahee, emble me!”
A ntjél pôdôs isañ.
Léa a nla kit kunda yada le a nkal ha bé isañ jam li ntééñga nye.
A mbem loñge ngéda, inyu témb pôdôl mu jam li.
Léa a nyik boma isañ i mbus ngéda inyu kwélés nye, tole a tilna nye kaat, inyu toñol jam li ntééñga nye.
Imbe njel u nla kal Léa le a gwélél?
WAN KI: Isañ Léa a yé boñ jam lipe—inyu hala nyen a nyimbe bé le man a yé ñunbak. Jon, ibale Léa a ngwélél njel 1, nyayak wé u ga hélés isañ kiyaga. Ini njel i nla yaga bé tinde isañ i ba bebee i emble nye. I ga unda bé le a ndiihe tole a nti isañ lipém. (Efésô 6:2) Jon i pot maliga, ini njel i nlona bé mut to wada maséé.
Ndik kiki u nlama bé neebe le ngok i i nkwo mu njel, i sôñga we i pam i homa u nke, hala nyen u nla gwélél njel ipe inyu kwélés bagwal boñ
To hala kii njel 2 i nla nene njel i nlôôha tomb, ndi i ta bé njel i mut pék. Inyuki? Inyule ibale a nyéñ jôs jam li ntééñga nye, Léa a nlama kwélés isañ—ndi inyu boñ le isañ a hôla nye, a nlama yi mandutu a mboma i niñ yé. I tjél pot i nhôla bé to jam.
Ndi ibale a ngwélél njel 3, Léa a ñunda le a ngwés bé le ndutu i kéñ nye njel i pôdôs isañ. Ndi, a noode kwélés nye mu jam li i mbus ngéda. Ni le, ibale a mpohol i tilna isañ wé kaat, Léa a nla nôgda loñge i nlélém ngéda.
I tila kaat i nla ki hôla nye i tibil toñol jam a ngwés toi kal. Ngéda isañ Léa a nyik añ kaat i, a ga nok jam Léa a nyéñ kal nye, hala a ga hôla ki nye i tibil nok njôghe yé. Jon njel 3, i nlona Léa ni isañ maséé. To ibale ba mbomna inyu kwel, tole a tilna isañ kaat, ini njel i nkiha ni mana maéba ma Bibel le: “Di ligip i boñ mam ma nlona nsañ.”—Rôma 14:19.
Mambe manjel mape Léa a nla gwélél?
Noode wan ibale u nla hoñol njel ipe. I mbus u hoñol kii nla ba lisuk li mut nu a mpohol njel i.
U BOÑ BAÑ LE BA HOÑOL NTÉN UMPE
U hôiga bañ le jam u mpot i mbéna bé kiha ni jam bagwal boñ ba nhoñol.
KII HÉGA:
Ibale bagwal boñ ba mbat we inyuki u nene bé maséé, ndi u timbhe le: “Me ngwés bé pôdôl mu.”
Bagwal boñ ba nla hoñol le u nyéñ kal le : “Me mbôdôl bé me bé ñem, inyu hala nyen me nyible bé me bé ñem wem. M’a toñle mawanda mem jam lini, ndi m’a kal bé me bé jo.”
Hégda le u yé boma soso ndutu, ndi isoñ tole nyuñ ba nyéñ hôla we. Ibale u nkal le: “U tôñ bañ. Me gwé mam i moo.”
Kii bagwal boñ ba nla hoñol le u nyéñ kal?
Imbe loñge ndimbhe u yé le u ti?