Yésu a gwé kunde i ngii mimbuu mimbe

I mbus le banigil ba nok ndutu inyu lela tuye, ba mbol i ngwañ, ndi jam lipe li mbem bo. Bôt iba ba ba nyai ngandak, ba ban-ga mimbuu mimbe, ba mpam i kotoo soñ, ba ôdôk ngwéé i boma Yésu! Ndi wada wap nyen ba nke pôdôl, bebek inyule nyen a nlôôha nyai ngandak, ni le mimbuu mimbe mi ntééñga nye hala a yé ntandaa ngéda.

I mut nu a bé kônha ngoo, a hiômôk nso. Juu ni njamuha, “a bé waa bé lond i kotoo soñ ni i dikôa, a kegbaga ni ngok.” (Markô 5:5) A bé lôôha nyai kayéle bôt ba bé kon woñi i tagbe mu njel i yé bebee ni kotoo soñ. Ngandak bôt i bi noode kañ nye, ndi hiki ngéda a bé a pat minsañ, a bôgôk bikei bi bé makôô mé. Mut to wada a bééna bé ngui i yémbél nye.

Kiki mut nu a yé kôôge bebee ni Yésu, a nkwo makôô mé. Mimbuu mimbe mi yé nye ikété mi mboñ le a lond le: “Me gwééna kii ni we, a Yésu, Man Nyambe Nungingii? Kum soñ i bisu bi Nyambe le w’a tééñga bé me.” Yésu a ñunda le a gwé kunde i ngii mimbuu mimbe, a nkal le: “Nyodi ikété mut nunu, a mbuu mbe unu.”​—Markô 5:7, 8.

I pot maliga, ngandak mimbuu mimbe i yé ikété mut nu. I ngéda Yésu a mbat le: “Jôl joñ le njee?” Ndimbhe a nkôhna i yé le: “Jôl jem le Ntôñ, inyule di yé ngandak.” (Markô 5:9) Ntôn bisônda u Rôma u gwé dikôô di bisônda; di nok ni le ngandak mimbuu mimbe i ntééñga mut nunu, i konok ki maséé i nôgha nye njôghe. Mi nsoohe Yésu le “a ti bañ nwo oda le mi jôp ikété soñkum.” I nene le ba nyi ntiik yom i mbem bo ni nkena wap Satan.​—Lukas 8:31.

Bémba i 2 000 di ngôi i bé je ha beebe, binuga bi bi bé nyega innoñaga ni Mbén, bon ba Lôk Yuda ba bé lama bé to bana nya nuga i. Mimbuu mimbe mi nkal nye le: “Ep bés mu ngôi, le di jôp ikété yap.” (Markô 5:12) Yésu a nkal bo le ba kee, ni bo ba nke ba njôp ikété ngôi. Ha nyen, 2 000 di ngôi di nyodi i ngii hikôa inyu leñba i tuye.

I ngéda batééda bémba ba ntehe hala, ba ñôt ngwéé i ke kal bôt ba tison ni bôt ba mambai i jam li mbôña. Bôt ba mpam inyu tehe jo. Kiki ba mbol, ba tehe le i mut ba nhéya mimbuu mimbe a yé mbôô, a ban-ga maboñok malam. Jon ba nha nye mbot, a nyén ki i si makôô ma Yésu!

I bôt ba nok jam li, tole ba ntehe mut nu, ba nkon woñi, ba badbaga ki kii ipe Yésu a nla boñ. Jon ba nyégsa Yésu le a nyodi mu nkoñ wap. Ha nyen, kiki Yésu a mbet môñgô, i mut ba nhéya mimbuu mimbe a nsoohe nye le ba ke ntôñ. Ndi, Yésu a nkal mut nu le: “Témp i mbai yoñ ni i lihaa joñ, añle bo mam momasôna Yéhôva a mboñ inyu yoñ lôñni konangoo a ñunda we.”​—Markô 5:19.

Yésu a mbéna kal bôt a mbuubaha le ba kal bañ mut nye ki nye jam a mboñ inyule a ngwés bé le bôt ba nhémle nye ni njel miñañ mi mam ma nhélha ba nok le a mboñ. Lisañ lini, i mut nu ba nhéya mimbuu mimbe a yé ndémbél i ngui Yésu, jon a nla añle bet Yésu a nla bé pôdôs ñañ nlam. Mbôgi yé i nla ki kolba ñañ mbe wonsôna u bé le u pam inyu ngôi i i bi nimil. Jon mut nu a nke, a kahal añal i Dékapôli yosôna mam Yésu a mbôñôl nye.