Inyuki banigil ba Yésu ba ntjél yén njal?

Yôhanes Nsôble a bi ke mok ndék ngéda i mbus le Yésu a bi tégbaha Pasa i nwii 30 N.Y. Yôhanes a bééna ngôñ le banigil bé ba noñ Yésu, ndi mbus le a bi ke mok bobasôna ba bi boñ bé hala.

Pasa i nwii 31 N.Y. i yé tiige, ha nyen banigil ba Yôhanes ba nlo bat Yésu le: “Inyuki bés ni Farisai di gwé lem i sôga je, ndi banigil boñ ba nsôga bé je?” (Matéô 9:14) Farisai i nyén njal inoñnaga ni lem i base yap. I mbus, Yésu a ngwélél ngim hihéga het Farisai yada nu a nhoñol le a nlôôha ba a téé sép, a nsoohe le: “A Nyambe, me nti we mayéga inyule me ta bé kiki bôt bape . . . Hiki sonde, me nsôga je ngélé iba.” (Lukas 18:11, 12) Bebek inyu hala nyen yak banigil ba Yôhanes ba gwé lem i yén njal. Tole ba mboñ hala inyu ee Yôhanes nu a yé mok. Yak bôt bape ba mbadba inyuki banigil ba Yésu ba nyén bé njal, inyu unda ndutu yap mu kii ba ngwel Yôhanes.

Yésu a ntimbhe ni hihéga: “Mawanda ma mbiimuda ma gwé bé njom yo ki yo i modop ngéda yosôna mbiimuda a yé ni bo, hala bé? Ndi dilo d’a lo, ngéda mbiimuda a’ yôña, a ba ha bé ni bo, ha nyen b’a sôga je.”​—Matéô 9:15.

Yôhanes nyemede a bi pôdôl Yésu kiki mbii. (Yôhanes 3:28, 29) Jon, ntel nu a ngi yii i niñ, banigil ba Yésu ba nyén bé njal. I mbus nyemb Yésu, banigil bé b’a ee, ba bana ki ngôñ i yén njal. Kinje mahéñha m’a ba ngéda a ga tuge! Inyule ba bana ha bé njom yo kiki yo inyu yén njal.

I mbus, Yésu a nti dihéga tini tjo diba: “Mut nye ki nye a nkôñôl bé pes libadô i mondo mu nlômbi mbot, inyule libadô li mondo li nimbil mbot ni ngui, kayéle lituba li nkônde ndik keñep. Bôt ba nha bé to wai mondo ikété minlômbi mi dibôi di wai. Ibale ba mboñ hala, ki dibôi di mbôô, wai i sôbi, yak dibôi di wai di ôbi. Ndi bôt ba nha wai mondo ikété dibôi di wai di mondo.” (Matéô 9:16, 17) Kii Yésu a nsômbôl kal?

Yésu a nsômbôl hôla banigil ba Yôhanes i nok le mut nye ki nye a nlama bé bem le banigil ba Yésu ba niñ inoñnaga ni minlômbi mi bilem mi Lôk Yuda kiki bo i yén njal. A bi lo bé i boñ le minlômbi mi bilem mi mi bé lama mal mi kee ni bisu. Bibégés Yésu a mbat bi ta bé bi bi bé bôña i base i Lôk Yuda. A noode bé to at mabadô ma mondo ni minlômbi mi mabadô tole i ha maok ma mondo ikété minlômbi mi dibôi di nlet.