Yésu a mbôdôl yilha bôt banigil

I mbus 40 ma dilo i ñoñ, ilole a ntémb i Galiléa, Yésu a ntiimba ke yak Yôhanes nu a bi sôble nye. Mu kiki Yésu a yé kôôge, Yôhanes a nand nye woo a kalak bôt ba yé ni nye le: “Nuna-ki, Man ntômba nu Nyambe nu a nhéya béba ikété nkoñ isi! Inyu yé nyen me bi kal le: ‘I mut a nlo me i mbus a bi bôk me i bisu, inyule a bi niñ ilole me ngwéé.’” (Yôhanes 1:29, 30) To hala kiki Yôhanes a yé Yésu mañ, a nyi le ilole nye Yôhanes a ngwéé, Yésu a bé niñ i ngii behee kiki hégél i mbuu.

Ndék sonde bisu, i ngéda Yésu a bi lo i kôs sôble, Yôhanes a bé bé nkwoog nkaa le Yésu nyen a bé Mésia. Inyu hala nyen a nkal le: “To memede me bé yi bé nye, ndi i njom i bi tinde me i sôble bôt ikété malép i bé le bôt ba yi nye i mbamba ikété Israel.”​—Yôhanes 1:31.

Yôhanes a nke ni bisu i añle bôt mam ma bi tagbe i kel sôble i Yésu: “Me bi tehe mbuu mpubi u nsôs kiki hibeñ, u lôlak i ngii, u yén i ngii yé. To memede me bé yi bé nye, ndi Nu a bi ep me i sôble bôt ikété malép a bi kal me le: ‘Nu ni nu u ntehe mbuu mpubi u nsôs, u yén i ngii yé, nyen a nsôble ni mbuu mpubi.’ Me bi tehe i jam li, jon me bi bok mbôgi le nyen a yé Man Nyambe.”​—Yôhanes 1:32-34.

I kel i bé noñ ha, Yôhanes a yé ni banigil bé iba ngéda Yésu a nkôôge bo bebee. Yôhanes a nkal le: “Nuna-ki, Man ntômba nu Nyambe!” (Yôhanes 1:36) Mu kiki ba nok hala, bana banigil ba Yôhanes bo iba ba nkahal noñ Yésu. Wada wap a yé Andréa. I nene le nuu numpe nyen a tila ñañ unu, jôl jé le Yôhanes. A nlama ba manyañ Yésu, inyule a yé lok Salômé, nu a nlama ba manyañ Maria. Jôl li nlôm Salômé li yé le Sébédéô.

Kiki a nhielba, a ntehe Andréa bo Yôhanes ba noñ nye, Yésu a mbat bo le: “Ni nyéñ kii?”

Ni bo ba mbat Yésu le: “A Rabi, u nyééne hee?”

Yésu a ntimbhe bo le: “Lona, n’a tehe.”​—Yôhanes 1:37-39.

Hala a yé bebee le ngeñ ina i kôkôa, Andréa bo Yôhanes ba nyén ni Yésu kel i yosôna. Andréa a yé maséé ngandak kayéle a nke tehe manyañ le Simôn, nu ba nsébél le Pétrô, a nkal nye le: “Di nléba Mésia.” (Yôhanes 1:41) Andréa a nkena Pétrô yak Yésu. I mam ma mbôña mbus ngéda ma ñunda le Yôhanes a nke yoñ manyañ Yakôbô, a kena nye yak Yésu. Ndi Yôhanes a ntila bé jam li mu ñañ wé.

Hilo hi noñ, Yésu a mboma Filipô nu a nlôl i Bétsaida, tison yada i ñombok i ngwañ tuye Galiléa. Mu tison i nyen Andréa bo Pétrô ba néñél. Yésu a naña Filipô, a nkal nye le: “Noñ me.”​—Yôhanes 1:43.

I mbus, Filipô a nke tehe Natanael, nu ba nsébél ki le Bartôlôméô, a kal nye le: “Di nléba nu bitilna bi Môsi, mbén Môsi ni bitilna bi Bapôdôl bi mpôdôl: Yésu, mut Nasaret, man Yôsep.” Natanael a mpééna, a nkal Filipô le: “Baa loñge jam i nla pémél i Nasaret?”

Filipô a nkal nye le: “Lo béñge.” Yésu a ntehe le Natanael a yé lo, a nkal le: “Nuna-ki, bañga man Israel nu a gwé bé mandon.”

Natanael a mbat le: “U nyil hee me.”

Yésu a ntimbhe le: “Ilole Filipô a nsébél we ngéda u bak isi e faigé, me ntehe we.”

Nhelek, Natanael a ntimbhe le: “A Rabi, u yé Man Nyambe, u yé Kiñe Israel.”

Yésu a mbat le: “Baa u nhémle inyule me nkal we le me ntehe we isi e faigé? W’a tehe mam makeñi iloo mana.” I mbus Yésu a mbôn le: “Me nkal yaga bé maliga le: N’a tehe ngii i nyibla, biañgel bi bedek, bi sôhôk yak Man mut.”​—Yôhanes 1:45-51.

Ndék ngéda i mbus hala, Yésu ni banigil bé ba mondo, ba nyodi nsôsôgô u Yordan ba ke i Galiléa.