Inyuki di nlama wan Bibel?
BAA u ntibil nok Bibel? Kaat ipe i éña bé kikii Bibel. Bibel i nti bôt ba biloñ gwobisôna hogbe ni botñem. I nhôla ki bo i ñin yap i hiki kel. Ndi ngandak bôt i len ini i nyi bé bañga jam ikété Bibel. To u yé to u ta bé mut base, bebeg u gwé ngôñ i nok Bibel. Man kaat nunu a ntilna i ti we dinyo malép di yom Bibel i nkal.
LOLE u mbôdôl añ Bibel, i yé loñge i yi ndég man ma mbéñge kaat ini. Bibel i ba nsébél ki le Bitilna Bipubi, i gwé bikaat 66. Kaat bisu i yé Bibôdle, kaat i nsôk i nsébla le Masoola.
Njee a yé nwet matila Bibel? Ini mbadga i nhélés ngandak bôt. I yé ntiig le 40 ma bôt ba bi yoñ 1 600 ñwii inyu tila Bibel. Hélha jam a yé le to wada ikété yap a bi kal bé le nyen a yé nwet matila Bibel. Ndi mahéñha, wada wap a kal le: “Tilna yosôna i nlôl ni Nyambe.” (2 Timôtéô 3:16) Numpe a kal ki le: ‘Mbuu Yéhôva u bi pot ni nyo wem, bañga yé i yé hilémp hiem.’ (2 Samuel 23:2) Batila Bibel ba bi unda bés le Yéhôva Djob, Ñane Ngiinda yosô, nyen a yé Nwet matila. Ba unda ki le Djob a ngwés le di kôôge nye bebe.
Yom ipe i yé nseñ le mut a yi inyu nok Bibel i yé le Bitilna bi gwé ndik ño buk wada le: Kunde i Djob a gwé i ba Ñane mut binam ni njel Ane ngii. Ikété mapep ma noñ lini, u ga tehe kiki ño buk unu u nene ikété Bibel yosô i bôdôl i kaat Bibôdle i pam Masoola.
Di béñge ni nano kii i yé ikété kaat bôt bobasô ba nyi le Bibel, ibabé bés i hôya mam di ntip pôdôl.
a Manjel ma yé ngandak inyu pôdôl dilo. Munu man kaat nunu, N.Y. a nkobla le “i Ngéda Yés,” ndi B.N.Y. a nkobla le “i Bisu bi Ngéda Yés.” U ga tehe ntende u gwé mana matila i mamélél ma mapep. U ñunda we ngéda mam u ñañ ma bi bôña.