Niñ Yoñ I Nke Hee?

• Ngandak bôt i pégi ni mam ma niñ i hiki kel nya yé le ba nti bé bomede to ndék ngéda i hoñol le hee ba nke.

• Bibel i ñañle bés le bihélha bi mam bi nlo mu njel. I mbéhe ki le matéak ma mam ma mut binam ma nke héñha, héñha yosô ikété nkoñ isi wonsô. Inyu boñ le di bumbul mam Bibel i nkal bés ni le di keñgle bikuu, di nlama pala yoñ bikidil bilam.

• Ngim bôt i nyi yom Bibel i nkal, ba noode ki gwélél yo, ndi ba nwas le nduña mam ma niñ i héya bo i njel ba nlama kil.

• Ba u yé masé ni njel niñ yoñ i nyoñ? Ngéda u ntjek mam u nlama boñ, ba u nhoñol yom m’a la lona we mbus ngéda?

[Nkéñég matila i si lipep 9]

Ki i nlôôha bane we nseñ?

Lelaa u yé le u tjek mam mana ma noñ? Neembe le tjek mo kii ngéda nseñ ma gwééne we i bôdôl 1 i pam 10.

Ngandak yap i yé nseñ ikété niñ, ndi ibale u nlama pohol, ki i mbôk? ki i noñ? I ke ni bisu.

․․․ Mintuk/masé

․․․ Nson wem

․․․ Mbôô wem

․․․ Masé mem

․․․ So mbiina wem

․․․ Bagwal bem

․․․ Bon bem

․․․ Ndap lam, bieñg bilam

․․․ I ba nu bisu i mam momasôna me mboñ

․․․ Libégés Djob

[Nkéñég matila i si lipep 10]

Ba mam u mpohol ma nkena toi we i homa u nsômbôl

ÔT MAHOÑOL MUNU MAMBADGA MANA

MINTUK/MASÉ: Ba mintuk me mpohol mi nhôla me i témbna ngui ni mbôô? Ba mi ñubul me ñem nya i nkônôs me to kwés me bôk inyu niñ yem yosô? Ba mi yé nya mintuk i nom bé ndi i i nla ti kon ñem mbus ngéda? To ibale mintuk me mpohol mi ta bé mimbe, ba me nlôhene ngéda yem mu nya yé le me nla ha bé boñ bañga mam?

NSON WEM: Ba u yé me yom me niñil, tole u nyilha me nkol? Ba u mbat me ngandak ngui ni ngéda nya i yé le me nla kwo kon? Ba me ntehe nseñ i kônde ngeñ i nson iloo i tégbaha ngéda yem ni so mbiina wem ni bon bem? Ibale ñane wem nson a mbat le me sal ngim bôlô i i ntéñga kiñ ñem yem, tole i nti bé me ngéda hiki kel inyu gwéñe bi mbuu, ba m’a boñ bôlô i ndik inyule me nyéñ tééda homa nson wem?

MBÔÔ WEM: Ba me nyoñ wo kii yañga jam, tole me ntat wo nya yé le me kon bañ? Ba wo ndik won me mpôdôl i minkwel nwem? Ba me ntat mbôô wem nya i ñéba le me ntôñ lihaa jem?

MASÉ MEM: Ba mon ma yé jam li bisu i niñ yem? Ba me mbugus mo i bisu bi masé ma so mbiina wem tole ma lihaa jem? Ba nyiña wem u masé u nkiha ni libak li mut a mbégés Djob li maliga?

SO MBIINA WEM: Ba me ntehe so mbiina wem kii kiha yem ndik ngéda hala a nlémél me? Ba me nti nye lipém kii mut a kôli ni jo? Ba niñ yem me niñ ni so mbiina wem i ñunda le me nhémle Djob?

BAGWAL BEM: Ibale me ngi yi mañge, ba me nôgôl bagwal bem—me timbhege bo ni suhul nyu, me kenek manwin, me huak i mbai i ngeñ ba mbat, me keñglege bilôñ ba mbéhe me le me jôb bañ ni boñ mam ba ngwés bé? Ibale me yé nhôôlak mut, ba me nti bagwal bem lipém, ba me nhôla bo kikii i nsômbla? Ba me mbôñôl bo kii hala a nlémél me tole me mboñ kii Bañga i Djob i nkal?

BON BEM: Ba me nyi le me béga mbegel i niiga bon bem bilem bilam, tole me mbem le sukulu yon i boñ hala? Ba me tégbaha ngéda ni bon bem, tole me mbem le gwom bi mintuk, nku bititii, tole nku matila gwon ba tégbahana ngéda? Ba me nkodol bon bem kii i nsômbla hiki ngéda ba noñ bé mabéhna ma Djob, tole me mboñ hala ndik ngéda ba ñunbaha me?

NDAP LAM, BIEÑG BILAM: Ki i ntinde me i ti eñg yem ni nkus wem mahee—ba hala a yé inyu nene i mis ma bôt ba libôk jem? Inyu boñ le lihaa jem li niñ loñge? Tole inyule me yé ngwélél Djob?

I BA NU BISU I MAM MOMASÔNA ME MBOÑ: Ba me nhoñol le i yé nseñ i boñ mam i nya i yé lam? Ba me ntumbba le me ba ndik mut bisu? Ba hala a ntééñga me ibale mut numpe a mboñ jam loñge iloo me?

LIBÉGÉS DJOB: Inyu yem, ba lémél Djob li nloo lémél so mbiina, to bon bem, to bagwal bem, to nwet nson wem? Ba me ntimbis nson Djob ni mbus inyule me nsômbôl tééda niñ lam?

Imbe tel Djob a gwé i niñ yoñ?

Ñañal 12:13: “Kon Djob li maliga woñi, u tééda ki mambén mé. Inyule ndak i mut yosôna i.”

BATBA LE: Ba niñ yem i ñéba le me ntehe mam kii pes kaat ini i nkal? Ba mbén Djob i me nôgôl yon i ñuda me ki me nlama boñ ikété ndap yem lihaa, i homa nson, ni i sukulu? Tole mam ma niñ mape ma me ntôñ mon ma ñéga me i yi le too me nyigle Djob hiki ngéda?

Umbe ntén maada u gwé ni Djob?

Bingéngén 3:5, 6: “Bôdôl Yéhôva ñem ni ñem woñ wonsôna, u nigbene bañ yi yoñ wemede. Ikété manjel moñ momasô hoñol nye, ndi a’ téé dinjela tjoñ.”

Matéô 4:10: “Yéhôva Djob joñ nyen u nlama bégés, nyetama ki nyen u nlama gwélél.”

BATBA LE: Ba hala nyen me nhoñol inyu Djob? Ba me ñéba i niñ yem i hiki kel, tétén i ngéda ndutu, le me gwééne Djob nya botñem ini ni le me bi ti nye memede nkikip?

Mambe mahee u nti añ ni yigil Bibel?

Yôhanes 17:3: “Niñ boga ini le, ba nigil yi we, mpom Djob li maliga, ni nu u om, le Yésu Kristô.”

BATBA LE: Ba mahee me nti añ bañga Djob ni mahoñol me ñôt mu ma ñunda le me nhémle toi hala?

Mambe mahee u nti i ke i makoda ma ntôñ u bikristen?

Lôk Héber 10:24, 25: “Di béñgna bés ni bés le di nyégha bés bomede i gwéha ni minson minlam, di hôya bañ makoda més, . . . hala téntén kikii ni ntehe le hilo hi ntiige bebe.”

Tjémbi 122:1: “Me bi kon maséé ngéda ba bi kal me le: ‘Lok di kenek i ndap Yéhôva. ’”

BATBA LE: Ba niñ yem i ñéba le me nti mayéga ngandak inyu njel ini Bañga i Djob i ñéba me? I sôñ ini i ntagbe, ba me bi tôl likoda li bikristen to jada inyule me bi nwas le jam lipe li pégés me?

Ba u nyoñ ngaba ni makénd i añle bôt bape mam inyu Djob ni matéak mé?

Matéô 24:14: “Ñañ nlam u ane unu w’a añlana ni nkoñ isi wonsôna i ba mbôgi . . . , ndi tole lisuk li nlo.”

Matéô 28:19, 20: “Bé kena, ni yilha bôt banigil i biloñ gwobisôna, . . . ni niigaga bo i tééda matiñ momasôna me bi ti bé.”

Tjémbi 96:2: “Tublana Yéhôva hiémbi, béghana jôl jé. Hiki kel ni kel añlana ñañ nlam u tohi yé.”

BATBA LE: Ba me nti nson unu mahee ma ma kôli ikété niñ yem? Ba ngaba me nyoñ mu i ñéba le me yé nkwook nkaa le dilo di niñil di yé dibe?