Nkoñ Isi Unu Unke Hee?

Manjelel ma keñi ni mam ma hélha ma nyila gwañga bi mam ni nkoñ isi wonsô! Hala a nkobla le laa?

NWEE: Bakindim ba nlôs i bibôm. Balét ni baudu ba nôla ni ngaa i suglu. Ba nip boñge bagwal bo ngi kôm mbus. Ba nibil bôda ni mimañ mi bôt njamuha i mbai nkam.

LIBAG LI BIBASE: Bibase bi ntémb bôt i pes ngéda gwét. Ba nsoman baéga ba bibase le ba ntinde bôt i tjé ngim matén. Bipada bi nlaana boñge; base i nkam bo. Ngandak bôt i nke ha bé i mitin; mandap ma base ma nuñlana.

HOMA DI NIÑIL: Ba mal mapan inyu njômbi nkus. Nyiña tjé u yeba hi mut u mal bie. Malép ma yé mahindi nya i yé le ma nla bé nyôba. Nsômbi u tjobi u nkahal sôs inyu ngandak mahindi bôt ba nkôp ikété balom ni batuye ni inyu bakén ba manjel ba nsômbi. Mbebi i nyon ni mahindi nya i yé le i nkida nhébék.

NSON: I nwel mbok u Afrika, nsaa u mut wada i ngim nwii u yé bebee le 280 000 ma frank. Hébék i nkus i baénél nson i yé i kwés mandap ma bôlô, nya i yé le dikôô di bôt di nyégle ngi bôlô. Wip u mboñ le betnson ba nimis moni ba ntééda niñ yab yosô.

NJAL: Bebee le 800 000 000 di bôt ni nkoñ isi wonsô di nlal njal hiki ngéda.

GWÉT: Iloo 100 000 000 di bôt di bi wo gwét mu hiai hi ntip  tagbe. Bakindim ba nyégi, ba nla tjé bôt bobasô ngandak ngélé. Gwét i pôla bôt ba nlélém loñ. Maboñog ma mintonba ma nyaaba, ma nke yon ni nkoñ isi wonsô.

MAKON MA NLÔÔA NI MAKON MAPE KI: Ngoñkele i bi nol 21 000 000 ma bôt i nwii 1918. SIDA i nyila “kon u u nlôha nol bôt.” Cancer ni kon ñem ba ntééñga bôt ni nkoñ isi wonsô.

U béñge ndig bañ miñañ mini mi nlébna i bakégikel. Ba mam mana ma mbôña ndig homa wada? Tole ma mbôña homa nyensô ma banga ki bañga ngobol?

[Nkéñég matila i si lipep 5]

Ba Djob a ntôñ toi bés?

Kikii ba nok njôghe ngéda ba ntehe mam mabe tole ngéda ba nwél mut, ngandak bôt i nhel inyuki Djob a mboñ bé to yom inyu sôña nya mam ini.

Djob a ntôñ toi bés. A nti biégna bilam, maéba ma ma nset bé ni bañga hogbe hanano. (Matéô 11:28-30; 2 Timôtéô 3:16, 17) A bi yoñ bitelbene i mélés béba, makon, ni nyemb. Bitelbene gwé bi ñéba le a ntôñ ndig bé bôt ba loñ yada, ndi bôt ba biloñ gwobisôna, ba matén momasôna, ni dilémb tjodisôna.—Minson mi baôma 10:34, 35.

Umbe nseñ bitééne bi Djob bi gwéne bés? Ba u nyi nje a yé Nheg ngii ni hisi? Jôl jé le nje? Ki i yé bitééne gwé? A nti ndimbhe i mambadga mana ikété Bibel. Mu nyen a nkal bés bitelbene a nyoñ i mélés béba, makon, ni nyemb. Inyu kôhna bibom bini, ki di nlama boñ i yés pes? Di nlama nigil i yi nye ni bitelbene gwé. Lelaa di nla bem bibom gwé ibale di nhémle bé gwo? (Yôhanes 3:16; Lôk Héber 11:6) I yé ki nseñ i nôgôl mambén mé. (1 Yôhanes 5:3) Ba u ntehe nseñ i boñ hala?

I yi inyuki Djob a ñume mam ma mbôña i len ini, di nlama nog ngim pééna i ntihba niñ yés. Bibel i ntoñol yo i lipep 15 li man kaat nunu.