Inyu boñ le u tééda liwanda, u nlama ba liwanda

Liwanda li umne i ngi gwéha. Kii w’a ba u nkônde nigil inyu Yéhôva, hala nyen gwéha yoñ inyu yé y’a ba i nhol. Kii gwéha yoñ inyu Djob y’a ba i nhol, yak ngôñ yoñ i sélél nye y’a ba i mbet. Hala a’ tinde we i yila ñnigil Yésu Kristô. (Matéô 28:19) Ibale u ñadba ni likoda li masé li Mbôgi Yéhôva, w’a yi ki i yé i ba liwanda ni Yéhôva i boga ni boga. Ki u nlama boñ?

Inyu unda le u ngwés Djob u nlama nôgôl mambén mé. “Gwéha Djob ini le, di tééda matiñ mé, ndi matiñ mé ma ta bé nledek.”​—1 Yôhanes 5:3.

Bôñôl mam u nigil. Yésu a ti yimbne i ntoñol jam lini. Mut pék a ôñôl ndap yé i ngi ngok. Ndi jôñ mut i ôñôl ndap yé i ngi lisege. Ngéda mbuk mbebi a loo, ndap i ôña i ngi ngok i kwo bé, ndi ndap i ôña i ngi lisege i kwo béba likwok. Yésu a kal le i bet ba nok bibañga gwé ndi ba bôñlak ki gwo, ba yé kiki mut pék nu a ôñôl ndap yé i ngi ngok. Ndi bet ba nok bibañga gwé ndi ba bôñôl bé gwo, ba yé kiki jôñ mut i i ôñôl ndap yé i ngi lisege. Numbe mut ikété bôt bana u ngwés pôna?​—Matéô 7:24-27.

Ti wemede nkikip. Hala a nkobla le u nkal Yéhôva i masoohe le u gwé ngôñ i boñ sômbôl yé i boga ni boga. Ngéda u mboñ sômbôl Djob u ñunda le u yé ñnigil Yésu Kristô.​—Matéô 11:29.

Sôble. “Telep, u sôblana, u soo bibéba gwoñ, u kahal sébél jôl jé.”​—Minson mi Baôma 22:16.

Ti wensôna i bôñôl Djob. “To kinje jam ni ngwel, gwela jo ni ñem wonsôna wengoñle Yéhôva nyen ni ngwélél, ndi ha bôt bé.”​—Kôlôsé 3:23.