Yigil 12

Di diihe niñ ni matjél

Lelaa di nlama tehe niñ? (1) Lisôh mém? (1)

Lelaa bikristen bi ñéba le bi nyi yoñ yihe ni matat? (2)

Ba i yé béba i nol binuga? (3)

Mambe maboñog ma ñéba le di nyoñ bé niñ kii tik jam? (4)

Mbén Djob inyu matjél i yé lelaa? (5)

Ba mbén i i mbéñge yag litina matjél? (6)

1. Yéhôva nyen a yé lingen li niñ. Djob nyen a nti hi yom i nyiñgha niñ. (Tjémbi 36:9) Niñ i yé jam lipubi i mis ma Djob. To niñ i man nu a ngi yii ikété libum li nyañ i yéne Yéhôva tik jam. I nol ntén man u ni ngôôba i yé béba i mis ma Djob.—Manyodi 21:22, 23; Tjémbi 127:3.

2. Bikristen bi maliga bi nyoñ yihe ni matat. Bi nyoñ yihe le matôa map ni mandap map ma ba bañ nya i nla boñ mut béba. (Ndiimba Mbén 22:8) Babôñôl ba Djob ba nlek bé niñ yab inyu gwañga bimam, inyu kônha bomede masé tole i nyéñgi bo miñem. Jon ba nyoñ bé ngaba i mintug mimbe mi mi nkôôba nôgha bôt bape njôghe. Ba nkeñgle mintug mi mi ntinde bôt i mindañ.—Tjémbi 11:5; Yôhanes 13:35.

3. Yag niñ i binuga i yé yom i pubi i mis ma Nheg. Kristen i nla nol binuga inyu bana bijek, mbot, tole inyu kéñ nye makon ni i sôñ nyemede. (Bibôdle 3:21; 9:3; Manyodi 21:28) Ndi i yé béba i tééñga binuga to i nol gwo inyu mintuk to masé.—Bingéngén 12:10.

4. Ôt siga, nyambal siba, ôt ibañga bi ta bé inyu bikristen. Ma maboñok ma yé mabe inyule (1) ma yilha bés minkol nwap, (2) ma nkônôs manyu més, ni (3) ma yé nyega. (Rôma 6:19; 12:1; 2 Korintô 7:1) I nla ba ndutu ngandag i nwas bilem bi, ndi di nlama nwas gwo inyu lémél Yéhôva.

5. Yag matjél ma yé yom i pubi i mis ma Djob. Djob a nkal le mbuu, tole niñ, i yéne matjél. Jon i ta bé loñge i je matjél. I ta bé to loñge i je nuga i ba ntibil bé nol. Ibale ba nkép nuga joo tole i ngwéya i hiandi ndi i wo nidik, i nlama bé jéba. Ibale ba ñôm yo likoñ to ngaa, ba nlama pala kit yo joo inyu héya matjél le ndi i jéba.—Bibôdle 9:3, 4; Lôk Lévi 17:13, 14; Minson mi baôma 15:28, 29.

6. Ba I yé béba i neebe le ba ha we matjél ma mut numpe? U hôya bañ le Yéhôva a mbat le di tjél matjél. Hala a nkobla le di nlama bé yoñ matjél ma mut numpe i nyu yés, to matjél més bés bomede ma ba bi bôk tééda. (Minson mi baôma 21:25) Inyu hala nyen bañga bikristen bi neebe bé le ba ha bo matjél. Ba neebe mintén mi matibla mi dokta mimpe, kii bo yoñ minkum mi bee bipe bi bi gwéé bé matjél. Ba gwé ngôñ i niñ, ndi ba nla bé bôg mbén Djob inyu noode sôñ niñ yab.—Matéô 16:25.

[Bititii i mapep 25]

Inyu lémél Djob, di nlama bé neebe i yoñ matjél, di keñgle bilem bi nyega, ni lek niñ yés inyu gwañga bi mam