BIBUK BI MAJUBUL

BIBEL i bi tilba ni mahôla ma mbuu Nyambe ikété hop Lôk Héber, hop Araméa ni hop Grikia. Inyu boñ le bôt ba “biloñ gwobisôna” ba kôhna bisai bi nlôl i soñgol Bañga i Nyambe, Bitilna bi nlama koblana ikété ngandak dilémb. (Matéô 24:14) Bikaat bi yé môm ima ni bisaambok ibôdôl i Matéô ipam i Masoola, bini bikaat bi nséblana le “Bitilna bipubi ni hop Grikia” inyule i bikristen Nyambe a bi tinde i tila, ba bi tila gwo ni hop Grikia i hiai hi bisu i ngéda yés (N.Y.).

Bitilna bipubi—Ngobol mbok yondo bi bi bôk bi pam ni hop Ngisi i nwii 1950. Bi umne tôbôtôbô i Bitilna ni hop Grikia bi Westcott ni Hort bi bi nyiba ngandak, bi kihga ni Bitilna ni hop Grikia bi bi nlôôha minlômbi. Ngobol mbok yondo i nliya toi i tibil pémés mahoñol ma Bitilna ni hop Grikia. Inyu pémés ini ngobol Bibel ni hop Basaa, di ngwélél ngobol Bibel ni hop Ngisi i i bi pam i nwii 2013, yak yo i nliya toi i tibil pémés mahoñol ma Bitilna ni hop Grikia.

Mpom jôl li Nyambe le Yéhôva, li nene 237 ngélé ikété Bitilna bipubi—Ngobol mbok yondo. Kiki i yé nseñ le jôl li Nyambe li tééba lipubi, ni le bôt bobasôna ba lôndôl i jôl lini inyu kôhna tohi, i ngobol ini i ntimbis jôl li Yéhôva hiki homa li nlama ba ikété Bibel.—Matéô 6:9; Rôma 10:13.

I jôl lini le Ngobol mbok yondo, li nlôl munu mbônga u Nyam­be le a’ lona nkoñ ’isi u telepsép inyu loñge i bôt ba binam bobasôna. (2 Pétrô 3:13) I bôt ba nsal ini bôlô ngobol, ba ngwés Nyambe nu a yé Nwet matila Bibel, ba nyi le ba nsal inyu yé, ni le ba bééga mbegee i tôbôtôbô i i mbat le ba boñ kii yosôna ba nla inyu kobol mahoñol mé ni bipôdôl gwé kiki i mbéda. Masoohe més ma yé le i ngobol Bibel ini i hôla ngandak basoñgol i i gwé ñem maliga le i pam i “bana bañga yi i maliga.”—1 Timôtéô 2:4.