MASOOLA YÔHANES A BI KÔHNA

1 Masoola* ni njel Yésu Kristô, ma Nyambe a bi ti nye le a unda minkol nwé i mam ma nlama bôña ndék ngéda. A bi om añgel yé, a gwélél ki yo inyu unda mo nkol wé Yôhanes ni njel biyimbne, 2 nyen a bi bok mbôgi inyu bañga i Nyambe ni inyu mbôgi Yésu Kristô a bi ti, ñ, inyu mam momasôna a bi tehe. 3 Maséé ni nu a ñañ ni kiñ keñi, yak ba ba ñemble bibañga bi mbañ ini, ba nôglak i mam ma yé ntilga mukété, inyule ntéak ngéda u yé bebee.

4 Me Yôhanes, me ntilna makoda masaambok ma yé i pes mbok Asia:

Konangoo i mbuma ñañ lôñni nsañ bi ba ni bé, bi bi nlôl yak “Nu a yé, nu a bé, ni nu a yé i lo,” bi lôlak ki yak mimbuu misaambok mi mi yé i bisu bi yééne yé ane, 5 yak ni Yésu Kristô, “Mbokmbôgi nu maliga,” “mbôkgwéé ikété bawoga,” ni “Ñane bikiñe bi nkoñ ’isi.”

Nu a ngwés bés, a bi kobol ki bés ni bibéba gwés ni njel matjél mé nyemede, 6 a boñ le di ba ngim ane, biprisi bi Nyambe wé ni Tata, ñ, lipém ni lipémba bi ba ni nye i boga ni boga. Amen.

7 Nuna-ki! A yé i lo lôñni ond, hiki jis li ga tehe nye, Yak i bôt ba bi ôm nye likoñ; bôt ba matén momasôna ma nkoñ ’isi b’a bép manyuu map ikété ndutu inyu yé. Ñ, Amen.

8 Yéhôva* Nyambe a nkal le: “Me yé Alfa ni Ôméga,* Nu a yé, ni nu a bé, ni nu a yé i lo, Nu ngui yosôna.”

9 Me Yôhanes, maasoñ nan, ni mut nu a nyoñ ngaba lôñni bé i njiiha, i ane ni i hônba ikété adna lôñni Yésu, me bé i ôn ba nsébél le Patmôs inyule me bé pot inyu Nyambe, me bogok mbôgi inyu Yésu. 10 Ni ngui i mbuu mpubi, me léba le me yé i hilo hi Nwet, ha nyen me bi nok kiñ keñi i mbus yem wengoñle sép, 11 i kalak le: “I mam u ntehe, tila mo ikété nhôdôk kaat, u ômle ki yo makoda masaambok le: Éfésô, Smirna, Pergamô, Tiatira, Sardé, Filadelfia ni Laôdikéa.”

12 Me bi hielba le me tehe njee a bé pôdôs me; kiki me nhielba, me tehe bitééne bi bilambe bi gôl bisaambok, 13 mut a bé i ñemkété u bitééne bi bilambe, a pôn-ga man mut, a bak a hééba mbot i i mpam letee ni makôô, a bak ki a hééba ngôli gôl i tôl yé. 14 Handugi hala, ño wé ni tjôñ tjé bi bé pôp kiki bipuba bi mahuu ma ntômba, kiki libu li lisuni, mis mé ma bak wengoñle lindômbôô li hié, 15 yak makôô mé ma bé pôna bañga mamuna ngéda ma mbai ikété hié hi hi gwé mbimba, yak kiñ yé i bé wengoñle liyôgbe li ngandak malép. 16 Ndi a bé a gwé tjôdôt disaambok i woo wé walôm; yak mbôñgô pansoñ u malo ima u u nhoo u pémlak i nyo wé, su wé* u bak ki wengoñle hiañgaa ngéda hi mbai ni ngui. 17 I ngéda me bi tehe nye, me kwo i makôô mé kiki mim.

A kéhi woo wé walôm i ngii yem, a kal le: “U kon bañ woñi, me yé Nu bisu ni Nu sôk, 18 me yé ki nu a niñ, me bi wo, ndi nun-ki, me niñ i boga ni boga, me gwé ki diliba di nyemb ni di Soñ.* 19 Jon tila i mam u mal tehe, ni i mam ma yé, lôñni mam ma ga bôña i mbus mana. 20 Inyu jimb lipubi li tjôdôt disaambok di u mal tehe i woo wem walôm ni li bitééne bi bilambe bi gôl bisaambok: Tjôdôt disaambok di yé biañgel bi makoda masaambok, yak bitééne bi bilambe bisaambok bi yé makoda masaambok.

2 “Tilna añgel i likoda li Éfésô le, nu a gwé tjôdôt disaambok i woo wé walôm, a kilak ki ipôla bitééne bi bilambe bi gôl bisaambok, nyen a nkal i mam mana le: 2 ‘Me nyi maboñok moñ, ni ndumbba yoñ, ni hônba yoñ, ni le u nla bé nihbe bibéba bi bôt; u bi wan ki ba ba nkalba le ba yé baôma ndi ki le ba ta bé baôma, u léba le ba yé bôt ba bitembee. 3 U ñunda le u gwé hônba, u bi téñbe ki inyu jôl jem, to waa u bi waa bé. 4 Ndi to hala, me gwé i jam lini ikolba we le, u bi nwas gwéha u bééna i bibôdle.

5 “‘Jon hoñol homa u bi nyodne ndi u kwo, u hiel ki ñem, u boñ yak minson u bé boñ i bibôdle; Ibale u mboñ bé hala, m’a lo i weeni, me héya ki tééne yoñ lambe i homa wé, handugi le u hiel ñem. 6 Ndi u gwé jam lilam lini le, u ñoo maboñok ma ntôñ mbagla u Nikôlaô, u yak me me ñoo. 7 Nu a gwé maôô, a emble i jam mbuu u nkal makoda: I mut a nyémbél, m’a ti nye kunde i je mu e niñ i i yé ikété paradis i Nyambe.’

8 “Tilna ki añgel i likoda li Smirna le: ‘Nu bisu ni Nu sôk,’ nu a bé nwok, ndi a témb i niñ, nyen a nkal i mam mana le: 9 ‘Me nyi njiiha yoñ ni liyep joñ (ndi u yé ngwañ), me nyi yak bôt ba ñôbôs we jôl, ba kalbaga le ba yé Lôk Yuda, ndi ki le ba ta yaga bé yo; ba yé ndik ndap bibégés i Satan. 10 U kon bañ woñi inyu mandutu ma yé bebee ni kwél we. Nun-ki! Nsohop a’ ke ni bisu i leñ bahogi ikété nan i ndap mok kayéle ni noodana i nya i yôni, ni kôhna ki njiiha jôm li dilo. Tééda ndéñbe yoñ letee ni nyemb, ha nyen m’a ti we ntut niñ. 11 Nu a gwé maôô, a emble i jam mbuu u nkal makoda: I mut a nyémbél, nyemb i nyônôs iba i yé mbén i boñ nye béba.’

12 “Tilna añgel i likoda li Pergamô le: Nu a gwé mbôñgô pansoñ u malo ima u u nhoo, nyen a nkal i mam mana le: 13 ‘Me nyi i homa u nyééne, i het yééne ane i Satan i yé; ndi to hala, u ngi téñbege ni jôl jem, ni le u bi tañba bé le u nhémle me, to i dilo di Antipas, mbokmbôgi wem nu maliga, nu ba bi nol ipañ nan i het Satan a nyééne.

14 “‘Ndi to hala, me gwé ndék mam ikolba we le, u gwé bôt nyoo ba ba noñ biniigana bi Balam, nu a bi niiga Balak i bii ngok baagene i bisu bi bon ba Israel, le ba je gwom ba nsémél bisat, ba boñ ki malal ma nyega.* 15 Hala nyen yak we u gwé i bôt ba noñ biniigana bi ntôñ mbagla u Nikôlaô. 16 Jon hiel ñem. Ibale hala bé, me mpala lo i weeni, m’a jôs bo gwét lôñni mbôñgô pansoñ u mpémél i nyo wem.

17 “‘Nu a gwé maôô, a emble i jam mbuu u nkal makoda: I mut a nyémbél, m’a ti nye ndék mana ma sôli, m’a ti ki nye puba hibaña, jôl li mondo li bak ntilga mu, li mut to wada a nyi bé, ndigi nu a nkôhna jo.’

18 “Tilna añgel i likoda li Tiatira le: Man Nyambe nu a gwé mis ma yé wengoñle lindômbôô li hié, makôô mé ma bak wengoñle bañga mamuna, nyen a nkal i mam mana le: 19 ‘Me nyi maboñok, ni gwéha yoñ, ni hémle yoñ, ni nson woñ, ni hônba yoñ, ni le minson nwoñ mi nsôk mi yé ngandak iloo mi u bi boñ i bibôdle.

20 “‘Ndi to hala, me gwé jam ikolba we le, u nihbe i muda nunu le Yézabel, nu a nkalba le a yé mpôdôl, nu a niiga minkol nwem, a yumhak ki nwo le mi boñ malal ma nyega,* ni le mi je mam ba nsémél bisat. 21 Me bi ti nye ngéda le a hiel ñem, ndi a ntop bé tam malal mé ma nyega.* 22 Nun-ki! Me yé bebee i leñ nye i nañi kon, Yak i bôt ba nke ndéñg lôñni nye me nleñ bo ikété njiiha keñi, handugi le ba tam minson a bi tinde bo i boñ. 23 M’a nol bon bé lôñni himala hi nyemb, le makoda momasôna m’a yi le men me yé nu a nwan mahoñol ma kétékété* lôñni miñem, m’a timbhe ki hiki mut inoñnaga ni maboñok mé.

24 “‘Ndi me nkal i bôt ba nyégle ikété nan, bé ba ni yé i Tiatira, i bôt bobasôna ba noñ bé biniigana bini, i bôt ba mpam bé i yi i mam ba nsébél le “ndip mam i Satan,” le: Me nkônde bé me bé mbegee ipe. 25 Ndik le ni téñbe ni mam ni gwé letee me lo. 26 I mut a nyémbél, a gwelek minson nwem letee ni lisuk, m’a ti nye kunde i ngii biloñ, 27 a’ ane bôt ni ntoñgo kei kayéle a nyugut bo wengoñle biébél bi ték lima, ndik kiki me bi kôhna kunde yak Tata. 28 M’a ti ki nye hiôdôt hi maye ma kel. 29 Nu a gwé maôô, a emble i jam mbuu u nkal makoda.’

3 “Tilna añgel i likoda li Sardé le: Nu a gwé mimbuu mi Nyambe minsaambok ni tjôdôt disaambok, nyen a nkal i mam mana le: ‘Me nyi maboñok moñ, ni le u gwé jôl* le u yé i niñ, ndi ki le u yé nwok. 2 Yén péé, u lédés ki mam ma nyégle, ma ma bak bebee ni wo; inyule me nkoba bé le u ngwel minson nwoñ i nya yôni* i bisu bi Nyambe wem. 3 Jon ke ni bisu i hoñol* i mam u bi kôhna ni mam u bi nok, ke ni bisu i tééda mo, u hiel ki ñem. Ibabé pééna, ibale u ntôde bé, m’a lo kiki mut wip, kekikel w’a yi bé to imbe ngeñ m’a lôl we.

4 “‘Ndi to hala, u gwé ndék bôt* i Sardé, i i bi hindis bé mambot map; b’a hiôm lôñni me, ba bak ba hééba bipuba bi mambot inyule ba kôli. 5 I mut a nyémbél, b’a ha nye bipuba bi mambot; kekikel m’a héya* bé jôl jé ikété kaat niñ, ndi m’a neebe le me nyi jôl jé i bisu bi Tata, ni i bisu bi biañgel gwé. 6 Nu a gwé maôô, a emble i jam mbuu u nkal makoda.’

7 “Tilna añgel i likoda li Filadelfia le: Nu a yé mpubi, nu a yé maliga, nu a gwé hiliba hi David, nu a nyibil kayéle mut to wada a’ yip bé, a yibak ki kayéle mut to wada a’ yibil bé, nyen a nkal i mam mana le: 8 ‘Me nyi maboñok moñ⁠—​Nun-ki! Me mal téé nyiblak likôga i bisu gwoñ, mut to wada a nla bé yip jo. Me nyi le u gwé ndék ngui, u bi tééda bañga yem, u tañba bé to jôl jem. 9 Nun-ki! I bôt ba nlôl i ndap bibégés i Satan, ba ba nkal le ba yé Lôk Yuda ndi ki le ba ta bé yo, ngo ba yé i tembee⁠—​nun-ki! M’a boñ le ba lo, ba ôôp* i makôô moñ, m’a boñ ki bo le ba yi le me bi gwés we. 10 Ndi hala kiki u bi tééda bañga inyu hônba yem,* yak me m’a tééda we i ngeñ manoodana, i i yé bebee ni lo i nkoñ ’isi wonsôna, inyu noode i bôt ba nyééne hana ’isi. 11 Me mpala lo. Kônde téñbe ni mam u gwé, kayéle mut to wada a yoñ bañ ntut woñ.

12 “‘I mut a nyémbél, m’a yilha nye jél ikété témpel i Nyambe wem, a ga nyodi ha bé mu kekikel, m’a tila jôl li Nyambe wem i ngii yé lôñni jôl li tison i Nyambe wem, Yérusalem yondo, i i nlôl yak Nyambe wem i ngii ndi i sôhôk; me tila yak jôl jem li mondo jomede i ngii yé. 13 Nu a gwé maôô, a emble i jam mbuu u nkal makoda.’

14 “Tilna añgel i likoda li Laôdikéa le: Nu a yé Amen, bañga mbokmbôgi nu maliga, bibôdle bi mam Nyambe a bi hek, nyen a nkal i mam mana le: 15 ‘Me nyi maboñok moñ, le u nsune bé, to lék u nlék bé. Me gwé ngôñ le u sune tole u lék. 16 Jon hala kiki u mbiibe, ndi u nlék bé, to sune u nsune bé, m’a lo we i nyo wem. 17 Inyule u nkal le: “Me yé ngwañ, me bi kot ki lingwañ, me gwé bé to ngôñ ni yom yo ki yo,” ndi u nyi bé le u yé ngoo, u nkônha ki ngoo, u bak hiyeyeba ni ndim ni nso, 18 me nti we maéba le u somb gôl i meeni i i mpubhana ni hié le ndi u yila ngwañ; u somb ki bipuba bi mambot le ndi u haba mo, ni le hison hi nso woñ hi yeli bañ; u somb ki bee bi mis, u hoo mu mis moñ le ndi u tehna.

19 “‘I bôt bobasôna me ngwés, me nkodol bo, me niigaga ki bo. Jon, bana makénd, u hiel ki ñem. 20 Nun-ki! Me téé i nwemel, me koodege. Ibale mut a nok kiñ yem, ndi a yibil nwemel, m’a jôp i ndap yé, me je bijek bi kôkôa* lôñni nye, yak nye lôñni me. 21 I mut a nyémbél, m’a ti nye kunde i yén lôñni me i yééne yem ane, nlélém kiki me bi yémbél, me yén ni Tata i yééne yé ane. 22 Nu a gwé maôô, a emble i jam mbuu u nkal makoda.’”

4 I mbus ha, me tehe, ndi nuna-ki! Nyiblak nwemel i ngii, ni kiñ i bisu me bi nok i mpôdôs me i bé kiki sép, i kalak le: “Bet nyono, m’a unda we i mam ma nlama bôña.” 2 I mbus mam mana, kunda yada ngui i mbuu mpubi i ba i ngii yem; ndi nuna-ki! Yééne ane i bé i homa wé nyoo ngii, mut wada a bak a yii mu yééne ane. 3 Ndi Nu a bé a yii mu a bé nene wengoñle ngok i yaspi ni ngok i sardi;* nyum u u bé wengoñle ngok émérôd u bé kéña yééne ane bipes gwobisôna.

4 Môm ima ma biyééne bi ane ni bina bi bé kéña yééne ane bipes gwobisôna, me tehe môm ima ma mimañ ni mina mi yii mu biyééne bi ane bini, mi bak mi hééba bipuba bi mambot, mi ban-ga ki mintut mi gôl i miño nwap. 5 Nwegnwek ni makiñ ni mbambat bi bé pémél i yééne ane; bilambe bi hié bisaambok bi bé loñ i bisu bi yééne ane, gwon bi yé mimbuu mi Nyambe minsaambok. 6 Yom i bé i bisu bi yééne ane wengoñle tuye nu a yé kiki léman, a pôn-ga kristal.

Bihégél bi niñ bina bi bi yé nyonok ni mis i bisu ni i mbus, bi bé i ñemkété u yééne ane,* bi kéña ki yo. 7 Hégél niñ i bisu i bé kiki mbondo njéé, hégél niñ i nyônôs iba i bé kiki man nlôm nyaga, hégél niñ i nyônôs aa i bééna su kiki u mut binam, hégél niñ i nyônôs ina i bé kiki nyôgôl u mpuue. 8 Ndi inyu bihégél bi niñ bina, hiki yada mu i bééna bipapai bisamal; bi bak ki nyonok ni mis homa nyensôna, Yak isi bipapai. Ndi juu ni njamuha, bi nkal ibabé waa le: “Yéhôva* Nyambe Nu ngui yôsôna a yé mpubi, mpubi, mpubi, nyen a bé, nyen a yé, nye ki nyen a yé i lo.”

9 Hiki ngéda bihégél bi niñ bi nti Nu a yii i yééne ane lipém ni bibégés ni mayéga, Nu a niñ i boga ni boga, 10 môm ima ma mimañ ni mina mi nkwo i bisu bi Nu a yii i yééne ane, mi béghak Nu a niñ i boga ni boga, mi leñek ki mintut nwap i bisu bi yééne ane, mi kalak le: 11 “A Yéhôva* Nyambe wés, wen u kôli kôhna lipém ni bibégés ni lipémba, inyule u bi hek mam momasôna, inyu sômbôl yoñ ki nyen ma bi lo i niñ, ma héga ki.”

5 Ndi me tehe nhôdôk kaat u u yé ntilga bipes gwo biba* i woo walôm u Nu a yii i yééne ane, u bak mbandak loñge ni bibéndél bisaambok. 2 Me tehe ki mpémba añgel u nlegel ni kiñ keñi le: “Njee a kôli yibil nhôdôk kaat ni bandal bibéndél gwé?” 3 Ndi mut to wada i ngii, to hana ’isi, to ikété hisi, a bi la bé yibil nhôdôk kaat, to béñge mukété. 4 Me bi ee ngandak inyule mut to wada a bi nene bé le a kôli yibil nhôdôk kaat, to béñge mukété. 5 Ndi wada ikété mimañ a kal me le: “U ee ha bañ. Nun-ki! Mbondo njéé i litén li Yuda, nkañ u David, nyen a mal yémbel kayéle a nla yibil nhôdôk kaat ni bibéndél gwé bisaambok.”

6 Ndi i ñemkété* u yééne ane ni u bihégél bi niñ bina, ni i ñemkété u mimañ, me tehe man ntômba a téé, a nen-ge wengoñle ba bi nol nye, a ban-ga bitoñ bisaambok ni mis masaambok; mis ma yé mimbuu mi Nyambe minsaambok mi mi bi ôma i hisi hiosôna. 7 Kunda yada a lo, a yoñ wo i woo walôm u Nu a bé a yii i yééne ane. 8 I ngéda a bi yoñ nhôdôk kaat, bihégél bi niñ bina ni môm ima ma mimañ ni mina ba ôôp i bisu bi Man ntômba, hiki mañ u ban-ga hiluñ, mi ban-ga ki biséya bi gôl bi bi bé nyonok ni binjinjiñ. (Binjinjiñ bi yé masoohe ma bapubhaga.) 9 Ndi ba ntôp hiémbi hi mondo, ba kalak le: “U kôli yoñ nhôdôk kaat ni yibil bibéndél gwé, inyule ba bi nol we, ndi u sômbôl ki Nyambe bôt lôñni matjél moñ ikété hiki lihaa, hiki hilémb,* hiki litén, hiki loñ, 10 u boñ ki bo le ba ba ngim ane ni biprisi inyu Nyambe wés, b’a ane ki hisi.”

11 Me tehe, me nok ki kiñ i ngandak biañgel i i nkéña yééne ane ni bihégél bi niñ lôñni mimañ, nsoñgi wap u bé didun di didun* ni dikôô di dikôô, 12 ba kalak ni kiñ keñi le: “Man ntômba ba bi nol a kôli kôhna lipémba, ni lingwañ, ni pék, ni ngui, ni lipém, ni bikeñi, ni bisai.”

13 Me nok ki hiki hégél nyoo i ngii, ni hana ’isi, ni ikété hisi, lôñni ikété tuye, yak ni gwom gwobisôna ikété yap bi nkal le: “Bisai, ni lipém, ni bikeñi, ni ngui i boga ni boga, bi ba ni Nu a yii i yééne ane, bi ba ki ni Man ntômba.” 14 Bihégél bi niñ bina bi bé kal le: “Amen!” Yak mimañ mi ôôp, mi bégés Nyambe.

6 Me tehe ngéda Man ntômba a bi yibil béndél yada ikété bibéndél bisaambok, me nok ki hégél yada ikété bihégél bi niñ bina i nkal ni kiñ wengoñle mbambat le: “Lo!” 2 Me tehe, ndi nuna-ki! Puba hosi; nu a bé a yii yo i ngii a bééna mpihlôñgô, a kôhna ki ntut, a kenek a yémblak letee a mélés yémbél yé.

3 I ngéda a bi yibil béndél i nyônôs iba, me nok hégél niñ i nyônôs iba i nkal le: “Lo!” 4 Hosi ipe i pam, i kôibak kiki hié, nu a bé a yii yo i ngii a bi kôhna kunde i héya nsañ hana ’isi, le ndi bôt ba nolna bo ni bo, a kôhna ki pansoñ keñi.

5 Ndi ngéda a bi yibil béndél i nyônôs aa, me nok hégél niñ i nyônôs aa i nkal le: “Lo!” Me tehe, ndi nuna-ki! Hinda hosi; nu a bé a yii yo i ngii a bééna hégél kilô i woo wé. 6 Me nok yom wengoñle kiñ i mpémél i ñemkété bihégél bi niñ bina, i kalak le: “Hihéga hi blé hiada inyu dinariô* yada, ni dihéga daa di kôn* inyu dinariô yada; ndi u boñ bañ môô ma ôlivé to wai béba.”

7 I ngéda a bi yibil béndél i nyônôs ina, me nok kiñ hégél niñ i nyônôs ina i nkal le: “Lo!” 8 Me tehe, ndi nuna-ki! Siba siba hosi; nu a bé a yii yo i ngii a bééna jôl le Nyemb; yak Soñ* i bé noñ nye bebee. Ba bi kôhna ane i ngii jôga jada ikété môga ma-na ma hisi le ba nol bôt ni pansoñ, ni njal keñi, ni himala hi nyemb, ni binuga bi bikai bi hisi.

9 I ngéda a bi yibil béndél i nyônôs itan, me tehe isi juu li bisesema biniñ* bi bôt ba ba bi nôla inyu bañga i Nyambe ni inyu mbôgi ba bé bok. 10 Ba lond ni kiñ keñi, ba kal le: “A Nwet Bayemlikok, we nu u yé mpubi ni maliga, w’a gwelba letee ni ngéda imbe, le u kéés bé i bôt ba nyééne hana ’isi, to pun matjél més?” 11 Hiki wada wap a bi kôhna puba mbot, i kéla ki bo le ba noi ndék ngéda, letee nsoñgi u baso minkol bap ni lôk kéé yap i i bé bebee ni nôla kiki bo u yon.

12 I ngéda a bi yibil béndél i nyônôs isamal, me tehe hisi hi nyeñg ni ngui, hiañgaa hi hénd wengoñle nsugut u mahuu,* yak sôñ yosôna i yila kiki matjél, 13 tjôdôt di ngii di kwo hana ’isi kiki ngéda mbebi keñi i nsugde e faigé, ndi bisuwa gwé bi matam bi kwok. 14 Yak ngii i ke kiki nhôdôk kaat le ba yé i hôt, hiki hikôa ni hiki ôn bi nyodi i bahoma bap. 15 Ha nyen bikiñe bi nkoñ ’isi, ni bangomin bakeñi, ni baane ba hikôô hi bisônda, ni mingwañ mi bôt, ni mimpémba mi bôt, ni hiki nkol lôñni hiki mut a ta bé nkol, ba solop ikété bihôk ni ipôla maaa ma dikôa. 16 Ba kenek ni bisu i kal dikôa lôñni maaa le: “Kwona i ngii yés, ni sôô ki bés le di tehe bañ su u Nu a yii i yééne ane, to hiun hi Man ntômba, 17 inyule hilo hikeñi hi hiun hiap hi nkola, ndi njee a nla nihbe hio?”

7 I mbus ha, me tehe biañgel bina bi téé i makas mo ma-na ma hisi, bi gwelek mbebi yo ina i nkoñ ’isi ni ngui, kayéle mbebi yo ki yo i hôñ bañ i nkoñ ’isi, to i tuye, to i e yo ki yo. 2 Me tehe ki añgel ipe i mbet, i lôlak i het hiañgaa hi mpémél,* i ban-ga béndél i Nyambe nu a niñ, i sébél biañgel bina ni kiñ keñi, gwon bi bi kôhna kunde i boñ hisi ni tuye béba, 3 i kal le: “Ni boñ bañ hisi béba, to tuye, to bie, letee di mal band minkol mi Nyambe wés i mbom yap.”

4 Me bi nok nsoñgi u bôt ba bé mbandak: Mbôgôl dikôô ni môm ma-na ma dikôô ni dina,* ba lôlak ikété hiki litén li bon ba Israel:

9 I mbus ha, me tehe, ndi nuna-ki! Limut likeñi le mut to wada a bé bé le a soñgol, li lôlak ikété biloñ gwobisôna, ni matén momasôna, ni mahaa momasôna, ni dilémb* tjodisôna, ba téé i bisu bi yééne ane ni i bisu bi Man ntômba, ba hééba mimbôñgô mi bipuba bi mambot, ba ban-ga masee i moo map. 10 Ba londok ni kiñ keñi ibabé waa, ba kalak le: “Tohi i nlôl bés yak Nyambe wés nu a yii i yééne ane, ni yak Man ntômba.”

11 Biañgel gwobisôna bi bé bi téé, bi ma kéña yééne ane, ni mimañ, ni bihégél bi niñ bina; bi ôm mbom ’isi i bisu bi yééne ane, bi bégés ki Nyambe, 12 bi kal le: “Amen! Bibégés, ni bikeñi, ni pék, ni mayéga, ni lipém, ni lipémba, ni ngui, bi ba ni Nyambe wés i boga ni boga. Amen.”

13 Ndi wada ikété mimañ a timbhe, a kal me le: “Bana ba hééba mimbôñgô mi bipuba bi mambot, ba yé bonjee? Hee ba bi lôl?” 14 Kunda yada me kal nye le: “A nwet wem, wen u nyi.” Ha nyen a bi kal me le: “Bana bon ba nlôl i njiiha keñi, ba bi jôwa ki mimbôñgô nwap mi mambot, ba yilha ki nwo puba ikété matjél ma Man Ntômba. 15 Inyu hala nyen ba yé i bisu bi yééne ane i Nyambe, ba gwelek ki nson mpubhaga inyu yé juu ni njamuha ikété témpel yé; yak Nu a yii i yééne ane a ga sambal ndap yé libadô i ngii yap. 16 Njal y’a gwel ha bé bo, to nyus y’a gwel ha bé bo, to hiañgaa hi ga tééñga ha bé bo, to ngandak lék yo ki yo, 17 inyule Man ntômba nu a yé i ñemkété* u yééne ane a’ tééda bo kiki ntééda bémba, a éga ki bo i mangen* ma malép ma niñ. Nyambe a’ sas ki gwiiha gwobisôna i mis map.”

8 I ngéda a bi yibil béndél i nyônôs isaambok, ngii i mom nwee inyu jam kiki bo pes ngeñ. 2 Ha nyen me bi tehe biañgel bisaambok bi bi téé i bisu bi Nyambe, ba ti ki gwo sép isaambok.

3 Añgel ipe i bé i gwé beglene* i binjinjiñ i gôl, i lo, i telep ipañ juu li bisesema; ba ti ki yo ngandak binjinjiñ le i sem gwo lôñni masoohe ma bapubhaga bobasôna i ngii juu li gôl li li yé i bisu bi yééne ane. 4 Hida hi binjinjiñ, hi hi bé lôl i woo u añgel, hi bi bet ni masoohe ma bapubhaga i bisu bi Nyambe. 5 Ndi kunda yada, añgel i yoñ beglene i binjinjiñ, i yônôs yo ni ndék hié* hi juu li bisesema, i kôp hio hana ’isi. Ha nyen mbambat i bi bam, yak makiñ ma nôga, lôñni nwegnwek, hisi hi nyeñg ki. 6 Yak biañgel bisaambok bi bi bééna sép isaambok bi kôôba i hem yo.

7 Añgel bisu i hem sép yé. Ha nyen matan-ga lôñni hié mpôdnaga ni matjél bi kuba hana ’isi; jôga jada ikété môga maa ma nkoñ ’isi li bi lék; jôga jada ikété môga maa ma bie li bi lék; yak bikai gwobisôna bi hisi bi lék.

8 Añgel i nyônôs iba i hem sép yé. Ngim yom kiki soso hikôa le hié hi nligis i léña ikété tuye. Jôga jada ikété môga maa ma tuye li yila matjél; 9 jôga jada ikété môga maa ma bihégél bi niñ* ikété tuye li wo, yak jôga jada ikété môga maa li bisitima li yin.

10 Añgel i nyônôs aa i hem sép yé. Ha nyen soso hiôdôt hi hi nloñ kiki lambe hi nyodi i ngii, hi kwo i ngii jôga jada ikété môga maa ma balom, ni i ngii jôga jada ikété môga maa ma mañgen* ma malép. 11 Jôl li hiôdôt hi li yé le Lilôli. Jôga jada ikété môga maa ma malép li yila lilôli; yak ngandak bôt i wo inyu malép, inyule ma bi kahal lol.

12 Añgel i nyônôs ina i hem sép yé. Jôga jada ikété môga maa ma hiañgaa li ôbi, jôga jada ikété môga maa ma sôñ li ôbi, yak jôga jada ikété môga maa ma tjôdôt li ôbi, inyu boñ le jôga jada ikété môga maa ma gwom bini li kôp jiibe, ni le jôga jada ikété môga maa ma njamuha li bana bañ mapubi, nlélém jam ni u.

13 Me tehe, me nok ki nyôgôl u mpuue i ñemkété ngii, u kalak ni kiñ keñi le: “Ndutu, ndutu, ndutu inyu bôt ba nyééne nyoo ’isi, inyu jam l’a bôña ngéda biañgel baa bi nhem sép ndék ngéda, bi boñ ki le i nôga!”

9 Añgel i nyônôs itan i hem sép yé. Ha nyen me tehe hiôdôt hi nyodi i ngii, hi kwo hana ’isi; ba ti ki hiôdôt* hiliba hi lijubul* li soñkum. 2 Hi yibil lijubul* li soñkum, hida hi pémél mukété lijubul* kiki hida hi soso hié, hiañgaa lôñni mbebi bi kôp jiibe inyu hida hi lijubul.* 3 Bitandi bi bi pémél mu hida, bi kôba hana ’isi; ba ti ki gwo ngui, nlélém ngui diéé di mala di nkoñ ’isi di gwé. 4 I kéla bitandi le bi boñ bañ bikai bi hisi béba, to bebela yo ki yo, to bie gwo ki gwo, ndik i bôt ba gwé bé béndél i Nyambe mu mbom yap.

5 Ndi ba bi ti bé bitandi kunde le bi nol bo, ndik le bi nôgha bo njôghe sôñ itan, njôghe yap i bé kiki njôghe i hiéé jala ngéda hi nsulul mut. 6 Mu dilo di nyen bôt ba ga yéñ nyemb, ndi ba ga tehe bé yo; ba ga bana yaga ngôñ i wo, ndi nyemb y’a ke bo ngwéé.

7 Ndi bitandi bi bé pôna bihosi bi bi yé nkôôbaga inyu gwét, bi ban-ga gwom i ngii miño bi bi bé pôna mintut mi gôl, yak masu map ma bé kiki masu ma bôt ba binam, 8 ndi bi bééna tjôñ kiki tjôñ di bôda. Yak masoñ map ma bé kiki masoñ ma mbondo njéé, 9 bi bééna biben bi tôl wengoñle biben bi tôl bi kei. Liyôgbe li bipaipai gwap li bé kiki liyôgbe li bikak le bihosi bi ñôt inyu gwét. 10 Bi gwé ki nwel ni bisulene kiki diéé di mala, mu nwel nwap nyen bi gwééne ngui i boñ bôt béba sôñ itan. 11 Bi gwé kiñe i ñane gwo, añgel i soñkum. Ni hop Lôk Héber jôl jé le Abadôn,* ndi ni hop Grikia jôl jé le Apôliôn.*

12 Ndutu bisu i mal tagbe. Nun-ki! Mandutu ima ma nlo i mbus mam mana.

13 Añgel i nyônôs isamal i hem sép yé. Ha nyen me bi nok kiñ yada i nlôl i bitoñ bi juu li gôl li li yé i bisu bi Nyambe, 14 i kal añgel i nyônôs isamal i i bééna sép le: “Hohol biañgel bina bi bi yé nkañak bebee ni lom nkeñi le Ufraté.” 15 Ha nyen i bi hohol biañgel bina bi bi bé nkôôbaga inyu ngeñ, ni kel, ni sôñ, ni nwii, le bi nol jôga jada ikété môga maa ma bôt ba binam.

16 Nsoñgi u mintôñ mi gwét mi bakilhosi u bé didun di didun diba;* me bi nok nsoñgi wap. 17 Haana nyen me bi tehe bihosi ikété yiinda, Yak i bôt ba bé ba yii mu ngii: Ba bééna biben bi tôl bi bi nkôyôp kiki hié, bi bak mangoñ mangoñ, bi bak ki maô maô kiki solfa; yak miño mi bihosi mi bé kiki miño mi mbondo njéé, hié ni hida lôñni solfa bi bé pémél mu manyo map. 18 I dimala dini tjo daa di bi nol jôga jada ikété môga maa ma bôt ni njel hié, ni hida, lôñni solfa bi bé pémél mu manyo map. 19 Inyule ngui i bihosi i yéne mu manyo map, ni mu nwel nwap. Inyule nwel nwap mi yé kiki nyoo, mi ban-ga miño; ni nwo nyen bi mbôñôl bôt béba.

20 Ndi i bôt ba bi yégle, ba dimala di bi nol bé, ba bi tam bé minson mi moo map; ba bi waa bé to bégés mimbuu mimbe, to bisat bi gôl, to bi silba, to bi mamuna, to bi ngok, to bi kék, bi bi nla bé tehna, to noga, to ke. 21 Ba bi tam bé to manola map, to maada map ni mimbuu mimbe, to malal map ma nyega,* to ngandak yap wip.

10 Me tehe mpémba añgel umpe u nsôs, u lôlak i ngii, u bak u hééba ond;* u ban-ga ki nyum i ngii ño wé, su wé u bak kiki hiañgaa, yak makôô* mé ma bak kiki mél ma hié, 2 u bééna ki nhudlak u man nhôdôk kaat i woo wé. U téé kôô wé walôm i tuye, ndi u téé kôô wé waé i nkoñngii, 3 u lond ni kiñ keñi kiki ngéda mbondo njéé i nkônd. I ngéda u bi lond hala, makiñ ma mbambat isaambok ma pot.

4 Ndi ngéda mbambat isaambok i bi pot, me bé bebee ni tila, ndi me nok kiñ i nlôl i ngii i nkal le: “Band i mam mbambat isaambok i mpot, u tila bañ mo.” 5 I añgel me bi tehe i téé i tuye ni i nkoñngii i pa woo wé walôm i ngii, 6 i kum soñ ni Nu a niñ i boga ni boga, nu a bi hek ngii ni gwom bi yé mukété, lôñni hisi ni gwom bi yé mukété, yak ni tuye ni gwom bi yé mukété, i kal le: “Ngéda i bem i mal tagbe. 7 Ndi mu dilo di, ngéda añgel i nyônôs isaambok y’a ba bebee ni hem sép yé, wee jimb lipubi li mal yaga yon, li li yé ñañ nlam Nyambe a bi añle minkol nwé le bapôdôl.”

8 Ndi kiñ me bi nok i nlôl i ngii i bi témb i pôdôs me, i kal le: “Ke yoñ nhudlak nhôdôk kaat u u yé i woo u añgel i i téé i tuye ni i nkoñngii.” 9 Me ke yak añgel, me kal yo le i ti me man nhôdôk kaat. I kal me le: “Yoñ nye, u je nye, a ga boñ le libum joñ li lol, ndi a ga nél we i nyo kiki wéi.” 10 Me yoñ man nhôdôk kaat i woo u añgel, me je nye; a bé nél me i nyo kiki wéi; ndi ngéda me bi mal je nye, libum jem li kahal lol. 11 Ha nyen ba bi kal me le: “U nlama kônde pôt mbañ i mpôdôl ngandak matén, ni biloñ, ni dilémb,* ni ngandak bikiñe.”

11 Ndi likai* li li bé pôna ntoñgo li bi tina me ngéda a bi kal le: “Telep, hek homa mpubhaga nu témpel i Nyambe, ni juu li bisesema, ni bôt ba mbégés mukété. 2 Ndi inyu mbégdé i i ta bé ikété homa mpubhaga nu témpel, nwas yo, u hek bañ yo, inyule ba bi ti yo matén, ma ga tidbe tison pubhaga môm ma-na ma sôñ ni iba. 3 M’a boñ le bôt bem ba mbôgi bo iba ba pot mbañ hikôô hi dilo ni mbôgôl iba ni môm masamal,* ba bak ba hééba minsugut.” 4 Bana bon ba yé bie bi ôlivé biba ni bitééne bi bilambe biba; ba téé bisu bi Nwet hisi.

5 Ibale mut a nsômbôl boñ bo béba, hié hi mpémél i manyo map, hi ligis baoo bap. Ibale mut a nsômbôl boñ bo béba, hala nyen a nlama nôla. 6 Ba gwé ngui i yip ngii* kayéle nop a no bañ mu dilo ba mpôdôl mbañ, ba gwé ki ngui i ngii malép, i yilha mo matjél, ni i ôbôs hisi ni mintén mi dimala nwominsôna to imbe ngéda ba ngwés.

7 I ngéda b’a mal bok mbôgi yap, nuga bikai i i nlôl i soñkum i ga jôs bo gwét, i yémbél bo, i nol ki bo. 8 Mim nwap mi ga ba i nlôm njel nu tison keñi, i i nsébla i pes mbuu le Sôdôm ni Égiptô, i homa yak Nwet wap a bi nôla i ngii kék. 9 Ndi bôt ikété mahaa, ni matén, ni dilémb,* ni biloñ, b’a béñge mim nwap dilo daa ni pes, ba ga nwas bé to le mim nwap mi juba ikété soñ. 10 Yak i bôt ba nyééne hana ’isi b’a kon maséé, ba boñ ki ngand inyu nyemb yap, ba tin-ga ki makébla bo ni bo, inyule i bapôdôl bana bo iba ba bé kép i bôt ba nyééne hana ’isi mbai.

11 I mbus dilo daa ni pes, mbuu niñ u u nlôl yak Nyambe u bi jôp ikété yap, ha nyen ba bi telep ni makôô map, Yak i bôt ba bi tehe bo ba kon woñi ngandak. 12 Ba nok ki kiñ keñi i nlôl i ngii i nkal bo le: “Beda nyono.” Ha nyen ba bi bet i ngii ikété ond, baoo bap ba tehge bo.* 13 Ha ngeñ i, hisi hi bi nyeñg ngandak, yak jôga jada li tison ikété jôm li tjiba, yak dikôô di bôt disaambok di wo mu nyeñg hisi; i bôt ba bi yégle ba kon woñi, ba ti ki Nyambe nu ngii lipém.

14 Ndutu i nyônôs iba i mal tagbe. Nun-ki! Ndutu i nyônôs aa i mpala lo.

15 Añgel i nyônôs isaambok i hem sép yé. Ha nyen makiñ makeñi ma bi nôga i ngii, ma kalak le: “Ane nkoñ ’isi i mal yila Ane Nwet wés ni i Kristô wé, a ga ane ki i boga ni boga.”

16 Môm ima ma mimañ ni mina mi mi bé mi yii i biyééne gwap bi ane i bisu bi Nyambe, mi ôm mbom yap ’isi, mi bégés ki Nyambe, 17 mi kalak le: “A Yéhôva* Nyambe Nu ngui yosôna, wen u yé, wen u bé ki, di nti we mayéga inyule u mal yoñ lipémba joñ likeñi, u bôdôl ki ane. 18 Ndi biloñ bi unup, yak we hiun hioñ hi lo, yak ntéak ngéda inyu kéés bawoga u lo, ni inyu bom minkol nwoñ le bapôdôl, ni bapubhaga, ni i bôt ba nkon jôl joñ woñi, batitigi ni bakeñi, ni inyu lona tjiba i ngii bôt ba ba ntjé hisi.”*

19 Ha nyen homa mpubhaga nu témpel i Nyambe nyoo i ngii a bi yibla, nkuu u malômbla mé u nene ikété homa mpubhaga nu témpel yé. Nwegnwek a bé nwek, yak makiñ ni mbambat bi bamak, hisi hi nyeñgek, yak nop matan-ga makeñi a kwok.

12 I mbus hala, yimbne keñi i nene i ngii: Muda wada a bé a hééba* hiañgaa, sôñ i bé isi makôô mé, a bééna ntut u jôm li tjôdôt ni diba i ño wé, 2 a bé jém. A bé lond inyu nkôôga wé ni inyu njôghe i gwal.

3 Yimbne ipe i nene i ngii. Nun-ki! Soso kômnyoo i nkôyôp kiki hié, i ban-ga miño minsaambok, ni jôm li bitoñ, lôñni mintut mi ane* minsaambok i miño nwé; 4 nwel wé u ñôt jôga jada ikété môga maa ma tjôdôt di ngii, i leñ ki tjo hana ’isi. Kômnyoo i yégle i téé i bisu bi muda nu a bé bebee ni gwal, inyu boñ le ngéda a ngwal ndigi, i je man wé.

5 Muda a gwal man munlôm, nu a nlama ane biloñ gwobisôna lôñni ntoñgo kei. Ha nyen man wé a bi pala yôña* nyoo ngii yak Nyambe, ni i yééne yé ane. 6 Muda a ke ngwéé i ñoñ, i het Nyambe a bi kôôbana nye homa, ni het ba ga jés nye hikôô hi dilo ni mbôgôl iba ni môm masamal.*

7 Ndi gwét bi bôô nyoo i ngii: Mikael* lôñni biañgel gwé ba jôs kômnyoo, yak kômnyoo lôñni biañgel gwé ba jôs bo, 8 ndi ba bi yémbél* bé, to homa a nene ha bé inyu yap nyoo i ngii. 9 Jon soso kômnyoo i bi léña hana ’isi, nlômbi nyoo, yon ba nsébél le Nsohop ni Satan, nyen a nyumus nkoñ ’isi wonsôna; a bi léña i nkoñ ’isi, yak biañgel gwé bi léña lôñni nye. 10 Me nok kiñ keñi i nlôl i ngii, i kalak le:

“Nano tohi i mal lo, ni lipémba, ni Ane Nyambe wés, ni énél i Kristô wé, inyule nu a ñôm lôk kéé yés nsohi a bi léña hana ’isi, nyen a ñôm bo nsohi juu ni njamuha i bisu bi Nyambe wés! 11 Ndi ba bi yémbél nye inyu matjél ma Man ntômba ni inyu bañga i mbôgi yap, ndi ba bi gwés bé biniñ* gwap to i bisu bi nyemb. 12 Inyu hala nyen kona maséé, a ngii ni bé ba ni nyééne nyoo! Ngoo ni hisi lôñni tuye, inyule Nsohop a nsôs i bééni, a ban-ga hiun hikeñi, a yik le a gwé ndik ndék ngéda.”

13 I ngéda kômnyoo i bi tehe le i nléña hana ’isi, i tééñga muda a bi gwal man munlôm. 14 Ndi ba bi ti muda bipapai biba bi soso nyôgôl inyu boñ le a puue inyu ke i ñoñ i homa wé, i het ba ga jés nye inyu ngim ngéda, ni mangéda, ni pes ngéda,* haa ni nyoo.

15 Ha nyen nyoo i pémhene* malép kiki lom mu nyo wé i mbus muda, inyu boñ le muda a yin ikété lom. 16 Ndi hisi hi lo i hôla muda, hisi hi yibil nyo wé, hi mil lom kômnyoo i bi pémés mu nyo wé. 17 Ha nyen kômnyoo i unbene muda ngandak, i ke i jôs i bôt ba nyégle ikété mbôda* muda gwét, ba ba nôgôl mambén ma Nyambe, ba ban-ga nson i bok mbôgi inyu Yésu.

13 Ni yo* i telep i ngii lisege li tuye.

Ha nyen me bi tehe nuga bikai i mpémél i tuye, i ban-ga jôm li bitoñ ni miño minsaambok, jôm li mintut mi ane* mi bé i ngii bitoñ, ndi miño nwé mi bééna môl ma ñôbôs Nyambe jôl.* 2 I nuga bikai me bi tehe i bé wengoñle njéé, ndi makôô mé ma bé kiki ma ours, yak nyo wé u bé kiki u mbondo njéé. Kômnyoo i ti nuga bikai ngui yé ni yééne yé ane lôñni kunde keñi.

3 Me bi tehe le ño wé wada u bééna kwéé i i nkena nyemb, ndi kwéé yé i i nkena nyemb i bi mbôôp; bôt ba hisi hiosôna ba noñ nuga bikai, ba memlege yo. 4 Bôt ba bi bégés kômnyoo inyule i bi ti nuga bikai ngui, ba béghak ki nuga bikai lôñni bibañga le: “Njee a yé kiki nuga bikai? Njee a nla toi jôs yo gwét?” 5 Ba bi ti yo nyo u u mpot mam makeñi ni mam ma ñôbôs Nyambe jôl, ba bi ti ki yo ngui i boñ mam inyu môm ma-na ma sôñ ni iba. 6 I nahal nyo wé inyu ôbôs Nyambe jôl ni pot mam ikolba jôl li Nyambe ni liyééne jé, Yak ikolba bôt ba nyééne i ngii. 7 Ba bi ti yo kunde i jôs bapubhaga gwét ni i yémbél bo, ba ti ki yo ngui i ngii hiki litén, hiki lihaa, hiki hilémb* ni hiki loñ. 8 Yak i bôt bobasôna ba nyééne hana ’isi ba ga bégés yo. Ibôdôl i bibôdle bi nkoñ ’isi,* jôl to jada ikété môl map li ta bé ntilga ikété nhôdôk kaat niñ u Man ntômba nu a bi nôla.

9 Ibale mut a gwé maôô, a emble. 10 Ibale mut a nlama ke i minkôm, a ga ke i minkôm. Ibale mut a nol ni pansoñ,* a nlama nôla ni pansoñ. Hana nyen i mbéda bapubhaga hônba ni hémle.

11 I mbus hala, me tehe nuga bikai ipe i mpémél ikété ’isi, i ban-ga bitoñ biba kiki man ntômba, ndi i bôdôl pot kiki kômnyoo. 12 I ngwélél kunde yosôna i nuga bikai bisu, nuga bikai bisu i béñgege. I mboñ ki le hisi lôñni bôt ba nyééne mu ba bégés nuga bikai bisu, yon kwéé yé i i nkena nyemb i mbôôp. 13 I mboñ biyimbne bikeñi, i boñok yak le hié hi lôl i ngii, hi kwo hana ’isi, bôt ba binam ba béñgege.

14 I nyumus i bôt ba nyééne hana ’isi ni njel biyimbne ba bi ti yo kunde i boñ i bisu bi nuga bikai, i kalak i bôt ba nyééne hana ’isi le ba boñ ôñgba i nuga bikai* i pansoñ i bi kek, ndi to hala i témb i niñ. 15 Ba ti ki yo kunde i ti ôñgba i nuga bikai nhébék,* inyu boñ le ôñbga i nuga bikai i pot; i boñ ki le i bôt bobasôna ba ntjél bégés ôñgba i nuga bikai ba nôla.

16 I nyégsa bôt bobasôna: Bôt batitigi ni bakeñi, mingwañ mi bôt ni diyeyeba, bôt ba ta bé minkol ni bôt ba yé minkol; le ba neebe yimbne i woo wap walôm tole i mbom yap, 17 ni le mut nye ki nye a nla bé somb to nuñul, handugi i mut a gwé yimbne, hala wee jôl li nuga bikai tole nsoñgi u jôl jé. 18 Hana nyen i mbéda pék: Nu a nyi jam a ôt nsoñgi u nuga bikai, inyule u yé nsoñgi u mut binam;* nsoñgi wé u yé mbôgôl isamal ni môm masamal ni isamal.*

14 I mbus hala, me tehe, ndi nuna-ki! Man ntômba a téé i Hikôa Siôn, nye ni mbôgôl dikôô di bôt ni môm ma-na ma dikôô ni dina* ba ba gwé jôl jé ni jôl li Isañ ntilga i mbom yap. 2 Me nok kiñ i nlôl i ngii kiki liyôgbe li ngandak malép ni kiki mbimba i mbambat keñi; i kiñ me bi nok i bé pôna kiñ i bôt ba ntôp tjémbi, ba kôdôk diluñ tjap. 3 Ba ntôp hiémbi hi hi yé wengoñle hiémbi hi mondo i bisu bi yééne ane, ni i bisu bi bihégél bi niñ bina, ni i bisu bi mimañ; ndi mut to wada a bi la bé tibil yi hiémbi hi, handugi mbôgôl dikôô di bôt ni môm ma-na ma dikôô ni dina, ba ba bi sômba hana ’isi. 4 Bana bon ba bi hindis bé bomede ni bôda, ni maliga ba yé konji. Bon ba ntéñbe i noñ Man ntômba to hee a nke. Bon ba bi sômba ikété bôt ba binam kiki matam ma bisu inyu Nyambe ni inyu Man ntômba, 5 malôga mo ki mo ma bi lébna bé mu manyo map; ba yé ngi liton li mahindi.

6 Me tehe añgel ipe i mpuue i ñemkété ngii,* i ban-ga ñañ nlam u boga i añle i bôt ba nyééne hana ’isi, ikété hiki loñ, ni hiki litén, ni hiki hilémb* ni hiki lihaa. 7 I bé pot ni kiñ keñi le: “Kona Nyambe woñi, tina ki nye lipém, inyule ngeñ yé bikééhene i nkola, jon béghana Nu a bi hek ngii, ni hisi, ni tuye, ni mangen* ma malép.”

8 Añgel ipe i nyônôs iba i bi noñ ha, i kalak le: “A mal kwo! Babilôn Nunkeñi a mal kwo, nyen a bi boñ le matén momasôna ma nyo wai i ngôñ yé keñi* i malal ma nyega!”*

9 Añgel ipe i nyônôs aa i bi noñ gwo, i kalak ni kiñ keñi le: “Ibale mut a mbégés nuga bikai ni ôñgba yé, a neebe ki yimbne i mbom yé tole i woo wé, 10 wee a ga nyo ki wai i hiun hi Nyambe i i nkuba ikété libôndô li hiun Hié, ibabé le i ba mpôdnaga, a’ son ki njonok lôñni hié ni solfa i mis ma biañgel bipubhaga ni i mis ma Man ntômba. 11 Yak hida hi njonok yap hi mbet i boga ni boga; i bôt ba mbégés nuga bikai lôñni ôñgba yé ba ga bana bé noi juu ni njamuha, yak nu ni nu a neebe yimbne i jôl jé. 12 Hana nyen i mbéda bapubhaga hônba, ba ba ntééda mambén ma Nyambe, ba téñbege i hémle Yésu.”

13 Me nok kiñ i nlôl i ngii i nkal le: “Tila le: Maséé ni bawoga ba ba nwo ikété adna ni Nwet ibôdôl hanano. Ñ, mbuu u nkal le, ba noyok inyu ndumbba yap, inyule i mam ba bi boñ ma nkiha lôñni bo.”*

14 I mbus hala, me tehe, nuna-ki! Puba ond; nu a bé a yii mu ngii a bé pôna man mut, a ban-ga ntut gôl i ño wé ni nhôdôk kwade i woo wé.

15 Añgel ipe i pémél i homa mpubhaga nu témpel, i séblak nu a yii i ngii ond ni kiñ keñi le: “Gwélél nhôdôk woñ kwade, u bumbul inyule ngeñ libumbul i nkola, inyule libumbul li hisi li yé nhôôlak jolisôna.” 16 Nu a bé a yii i ngii ond a tégbaha nhôdôk wé kwade hana ’isi, hisi hi bumblana.

17 Añgel ipe ki i pémél i homa mpubhaga nu témpel nyoo i ngii, yak yo i bééna nhôdôk kwade nu a nhoo.

18 Añgel ipe ki i pémél i juu li bisesema, i bééna kunde i ngii hié. I sébél nu a bééna nhôdôk kwade nu a nhoo ni kiñ keñi, i kal le: “Gwélél nhôdôk woñ kwade nu a nhoo, u kot mayuu ma nkôô wai u hisi, inyule matam ma nkôô wai ma nhôlôl.” 19 Añgel i tégbaha nhôdôk wé kwade hana ’isi, i kot matam ma nkôô wai u hisi, i leñ mo ikété soso waa wai u hiun hi Nyambe. 20 Ba bi tjôl matam i waa wai i mbus tison, matjél ma pam mu waa wai ma bet letee ni i manyo* ma bihosi, ma hô jam kiki bo mbôgôl kilôméta aa.*

15 Me tehe ki yimbne ipe nyoo i ngii, i keñi ni i hélha: Biañgel bisaambok lôñni dimala disaambok. Dini tjon di nsôk, inyule lôñni tjo nyen hiun hi Nyambe hi mpam i lisuk.

2 Me tehe yom wengoñle tuye nu a yé kiki léman, mpôdnaga ni hié; i bôt ba bi yémbél nuga bikai, ni ôñgba yé, lôñni nsoñgi u jôl jé, ba bé ba téé ipañ tuye nu a yé kiki léman, ba bak ba gwé diluñ di Nyambe. 3 Ba bé tôp hiémbi hi Môsi, nkol u Nyambe, lôñni hiémbi hi Man ntômba, ba kalak le:

“A Yéhôva,* Nyambe Nu ngui yosôna, minson nwoñ mi yé minkeñi, mi yé ki hélha. A Kiñe boga, manjel moñ ma téé sép, ma yé ki maliga. 4 A Yéhôva,* njee a ga kon yaga bé we woñi, to ti jôl joñ lipém, inyule wetama nyen u yé maliga? Inyule biloñ gwobisôna bi ga lo i bégés i bisu gwoñ, inyule mbagi yoñ i téé sép i mal nene.”

5 I mbus hala, homa mpubhaga nu lap i mbôgi a yibla nyoo i ngii, 6 ha nyen i biañgel bisaambok bi bé bi gwé dimala disaambok bi bi pémél i homa mpubhaga, bi bak bi hééba mambot* ma mpôp, ma bayak, bi ban-ga ki ngôli i gôl nkañak i tôl yap. 7 Wada ikété bihégél bi niñ bina a ti biañgel bisaambok biséya bi gôl bisaambok bi bi yé nyonok ni hiun hi Nyambe, nu a niñ i boga ni boga. 8 Homa mpubhaga a yon ni hida inyu lipém li Nyambe, ni inyu ngui yé; mut to wada a bé bé le a jôp i homa mpubhaga letee dimala disaambok di biañgel bisaambok di mal.

16 Me nok kiñ keñi i nlôl i homa mpubhaga i nkal biañgel bisaambok le: “Kena, ni kôp biséya bisaambok bi hiun hi Nyambe nyoo ’isi.”

2 Añgel bisu i ke, i kôp séya yé i hisi. Hibogoo hi poo hi hi nsôghe kiyaga hi kon i bôt ba bééna yimbne i nuga bikai, ba béghak ki ôñgba yé.

3 Añgel i nyônôs iba i kôp séya yé i tuye, tuye a yila matjél wengoñle matjél ma mim, yak hiki hégél niñ* i wo, ñ, i gwom bi bé ikété tuye.

4 Añgel i nyônôs aa i kôp séya yé ikété balom ni mangen* ma malép, ha nyen ba bi yila matjél. 5 Me nok añgel i gwé kunde i ngii malép i nkal le: “A we Nu u yé, nu u bé, Nu maliga, u téé sép inyule wen u mpémés i mbagi ini, 6 inyule ba bi kôp matjél ma bapubhaga ni ma bapôdôl, yak we u ti bo matjél le ba nyo; ba kôli kôhna i jam li.” 7 Me nok juu li bisesema li nkal le: “Ñ, a Yéhôva* Nyambe Nu ngui yosôna, mbagi yoñ* i yé maliga, i téé ki sép.”

8 Añgel i nyônôs ina i kôp séya yé i hiañgaa, kunde i tina hiañgaa le hi ligis bôt ni hié. 9 Bôt ba lighana inyu ngandak lék, ndi ba bi ôbôs jôl li Nyambe nu a gwé kunde i ngii dimala dini, ba bi hiel bé miñem, ba ti bé to nye lipém.

10 Añgel i nyônôs itan i kôp séya yé i yééne ane i nuga bikai. Ane yé i kôp jiibe, bôt ba bôdôl kogoo dilémb tjap inyu njôghe ba bé nok, 11 ndi ba ôbôs jôl li Nyambe nu ngii inyu njôhge yap ni bibogoo gwap bi poo, ba tam bé minson nwap.

12 Añgel i nyônôs isamal i kôp séya yé ikété lom nkeñi le Ufraté, malép mé ma sa, le ndi njel i ba nkôôbaga inyu bikiñe bi nlôl i pes hiañgaa hi mpémél.*

13 Ha nyen me bi tehe bipôdôl bi mbuu* baa bi bi yé nyega, bi pôn-ga minkoñgo, bi pémlak i nyo u kômnyoo, ni i nyo u nuga bikai, ni i nyo u mpôdôl nu bitembee. 14 Ni maliga, bi yé bipôdôl bi bi nlôl ni mimbuu mimbe, bi mboñ biyimbne, bi kenek yak bikiñe bi nkoñ ’isi wonsôna, le bi kot gwo inyu gwét bi hilo hikeñi hi Nyambe Nu ngui yosôna.

15 “Nun-ki! Me nlo kiki mut wip. Maséé ni nu a nyén péé, a téédaga mambot mé ma ngii, tiga le a hiôm nso, ni le bôt ba tehe wonyuu yé.”

16 Bini bipôdôl bi bi kot bikiñe i homa a nsébla ni hop Lôk Héber le Armagédôn.*

17 Añgel i nyônôs isaambok i kôp séya yé i mbebi. Ha nyen kiñ keñi i bi lôl i homa mpubhaga, i yééne ane, i kal le: “Hala a mal bôña!” 18 Nwegnwek a nwek, yak makiñ ni mbambat bi bamak, hisi hi nyeñg ngandak, i nya hi bé ngi nyeñg ibôdôl nu bôt ba binam ba yé hana ’isi, nyeñg hisi ikeñi kiyaga. 19 Tison keñi i bagla bipes baa, yak bitison bi biloñ bipe bi kwo; ha nyen Nyambe a bi hoñol Babilôn Nunkeñi le a ti nye libôndô li wai i hiun hié hikeñi. 20 Yak hiki ôn i ke ngwéé, to dikôa di bi nene ha bé. 21 Ha nyen matan-ga makeñi ma bi lôl i ngii, ma kwél bôt, hiki jada mu li édék jam kiki talént yada,* ndi bôt ba ôbôs jôl li Nyambe inyu himala hi matan-ga, inyule himala hi bé ngui iloo hihéga.

17 Añgel yada ikété biañgel bisaambok bi bi bééna biséya i lo, i kal me le: “Lo, m’a unda we mbagi i muda libambe nunkeñi nu a yii i ngii ngandak malép, 2 nyen a bi boñ malal ma nyega* ni bikiñe bi nkoñ ’isi, yak bôt ba hisi bobasôna ba bi hiôô wai i malal mé ma nyega.”*

3 Añgel i kena me i ñoñ ni ngui i mbuu mpubi. Ha nyen me bi tehe muda a yii i ngii nuga bikai i i nkôyôp tjôôm, i bé nyonok ni môl ma ñôbôs Nyambe jôl,* i bééna ki miño minsaambok ni jôm li bitoñ. 4 Muda a bé a hééba mbot wedewede, i kôibak tjôôm, a bi eñgep ni gôl, ni tik ngok, ni perl; a bééna libôndô li gôl i woo wé, li li bé nyonok ni mam ma nyega, lôñni mam ma mahindi ma malal mé ma nyega.* 5 I jôl li bé ntilga mu mbom yé li bé jimb: “Babilôn Nunkeñi, nyañ bôda ba libambe ni nu mam ma nyega ma nkoñ ’isi.” 6 Me tehe le muda a bi hiôô matjél ma bapubhaga ni matjél ma bôt ba mbôgi ba Yésu.

I ngéda me bi tehe nye, me hel ngandak. 7 Jon añgel i bi kal me le: “Inyuki u bak nhelek? Me ga kal we jimb inyu muda ni inyu nuga bikai i i bééga nye, i i gwé miño minsaambok ni jôm li bitoñ: 8 Nuga bikai u ntip tehe i bé, ndi i ta bé; to hala, i yé bebee ni pémél mu soñkum le i ke i tjiba. I bôt ba nyééne hana ’isi, ba ba gwé bé môl map ntilga ikété nhôdôk kaat niñ ibôdôl i bibôdle bi nkoñ ’isi,* b’a hel ngéda b’a tehe lelaa nuga bikai i bé, ndi i ta bé, to hala y’a ba ki ha.

9 “Hana nyen i mbéda pék* inyu nok i jam lini: Miño minsaambok mi yé dikôa disaambok, tjon muda a yiine i ngii. 10 Bikiñe bi yé bisaambok: Bitan bi bi kwo, yada i yé, ipe i yé ngi lo; ndi ngéda i nlo, i nlama yégle ndék ngéda. 11 I nuga bikai i i bé, ndi i ta bé, yak yomede i yé kiñe i nyônôs juem, ndi i nlôl mu bikiñe bisaambok, i kenek i tjiba.

12 “Jôm li bitoñ u bi tehe li yé jôm li bikiñe bi bi yé ngi kôhna ane, ndi bi ga kôhna kunde i ba bikiñe lôñni nuga bikai inyu ngeñ yada. 13 Bi gwé mahoñol mada, jon bi nti nuga bikai ngui yap ni kunde yap. 14 Bi ga jôs Man ntômba gwét, ndi inyule a yé Nwet nu bet ni Kiñe i bikiñe, Man ntômba a ga yémbél gwo. Yak i bôt ba yé nséblaga ni mpohlak, ba bak ki maliga, b’a yémbél.”

15 Añgel i kal me le: “I malép u ntehe, het muda libambe a yiine ma yé mahaa, ni mamut, ni biloñ, ni dilémb.* 16 Jôm li bitoñ u bi tehe ni nuga bikai, bi ga oo muda libambe, bi boñ le a tjiba, a ba nso, bi je minsôn nwé, bi ligis ki nyensôna ni hié. 17 Inyule Nyambe a bi ha i miñem nwap le bi yônôs mahoñol mé, ñ, le bi yônôs mahoñol mada bobasôna ba gwé, le bi ti nuga bikai ane yap, letee bipôdôl bi Nyambe bi yon. 18 I muda u bi tehe a yé tison keñi i i gwé ane i ngii bikiñe bi nkoñ ’isi.”

18 I mbus hala, me tehe añgel ipe i nlôl i ngii lôñni kunde keñi, i sôhôk ’isi, lipém jé li bi béyéi hisi. 2 I lond ni kiñ keñi, i kal le: “A mal kwo, Babilôn Nunkeñi a mal kwo, a nyila liyééne li mimbuu mimbe, ni lisolbene li hiki mbuu u nyega,* ni hiki hinuni hi mahindi ni hi bôt ba ñoo! 3 Inyule biloñ gwobisôna bi nhiôô wai i ngôñ yé keñi* i malal ma nyega,* bikiñe bi hisi bi bi boñ malal ma nyega lôñni nye, yak bôt ba nyuñga* ba hisi ba kwo ngwañ ni njel lipémba li ngandak yé lingwañ li lipamal.”

4 Me nok ki kiñ ipe i nlôl i ngii i nkal le: “A bôt bem, pama nyeni, ibale ni nsômbôl bé yoñ ngaba lôñni nye ikété bibéba gwé, ni ibale ni nsômbôl bé kôhna ngaba mu dimala tjé. 5 Inyule nwind u bibéba gwé u mpam letee ni i ngii, yak Nyambe a mbigda maboñok mé ma ngitelepsép.* 6 Boña nye kiki a bi boñ bôt bape, ñ, kiki a bi boñ, boña nye hala ngélé iba; ikété libôndô a bé kôôba yom i nyo, mu nyen kôôbana nye yom i nyo ngélé iba. 7 I likala a bi ti nyemede lipém, a niñik ki ikété ngandak yé lingwañ li lipamal, mu likala li nyen nôghana nye njôghe, ééhana ki nye. Inyule a ngi kalak ikété yé ñem le: ‘Me yii kiki kiñemuda, me ta bé yik muda, m’a kôhna bé to maéya.’ 8 Inyu hala nyen dimala tjé di ga lo i mpom kel wada: Nyemb, ni maéya, ni njal, yak nyensôna a ga lighana ni hié, inyule Yéhôva* Nyambe, nu a bi kéés nye, a gwé ngui.

9 “Bikiñe bi hisi bi bi boñ malal ma nyega* lôñni nye, bi niñ ki lôñni nye ikété ngandak yé lingwañ li lipamal, bi ga tumbba ni ndutu inyu yé ngéda bi ga tehe hida hi hié hi nligis nye. 10 Bi ga telep haa inyule njiiha yé i nkônha bo woñi, bi kalak le: ‘Weeke, kinje béba jam! Weeke, kinje béba jam! A Babilôn, we tison keñi ni tison i ngui, inyule mbagi yoñ nôgôs i nyoñ ndigi ngeñ yada inyu kwo!’

11 “Yak bôt ba nyuñga ba hisi ba nlond, ba eek inyu yé, inyule mut a nsomb gwom gwap bi nyuñga gwobisôna a ta ha bé, 12 gwom gwobisôna bi gôl, bi silba, tik ngok, perl, biloñge bi mabadô, mabadô ma wedewede, ma siliki, ni ma ma nkôyôp tjôôm; hiki yom i yé mbañak ni kék i numb loñge; mintén mi gwom nwominsôna mi mi yé mbañak ni mañ mi njok, ni tik bikék, ni mamuna, ni biéña, ni mimpuma; 13 yak hiomi, ni kule i India, ni binjinjiñ, ni labinda, ni nunumba, ni wai, ni môô ma ôlivé, ni loñge flawa, ni blé, ni nyaga, ni mintômba, ni bihosi, ni bikak, ni minkol, ni biniñ* bi bôt. 14 Ñ, biloñge bi gwom* bi bi bé kon we* ngôñ bi nke we haa, yak tik gwom yosôna ni gwom bilam gwobisôna bi nhéñél we, bi ga nene ha bé kekikel.

15 “I bôt ba nyuñga ba bé nuñul i gwom bini, ba ba bi kwo mingwañ ni njel yé, ba ga telep haa inyule njiiha yé i ga kônha bo woñi, ba ga lond, b’a ee ki, 16 ba kalak le: ‘Weeke, kinje béba jam! Weeke, kinje béba jam! A tison keñi, we nu u bak u hééba loñge libadô ni mbot wedewede, ni i i nkôyôp tjôôm, u eñgbak ki ngandak gwom bi gôl, ni tik ngok, ni perl, 17 inyule hala a nyoñ ndik ngeñ yada inyu tjé i ngandak lingwañ ini!’

“Yak hiki nkena sitima, ni hiki mut a nkil i tuye, ni baluk sitima, lôñni bôt bobasôna ba nkuhul koga kel i bôlô tuye, ba bi telep haa, 18 ba lond ngéda ba bé béñge hida hi hié hi hi bi ligis nye, ba kal le: ‘Imbe tison i yé kiki tison keñi ini?’ 19 Ba leñ lipum li biték i ngii miño nwap, ba lond, ba bégél, ba ee, ba kalak le: ‘Weeke, kinje béba jam! Weeke, kinje béba jam inyu tison keñi ini! Ni njel nkus wé nyen i bôt bobasôna ba bééna bisitima i tuye ba bi kwo ngwañ, inyule hala a nyoñ ndik ngeñ yada le i tjiba!’

20 “A ngii, kon maséé inyu jam li mpémél nye, yak bé bapubhaga ni baôma lôñni bapôdôl, inyule inyu nan nyen Nyambe a mpémhene nye mbagi nôgôs!”

21 Mpémba añgel wada u bi pa ngok, i i bé kiki soso ngok kôgôl, u leñ yo ikété tuye, u kal le: “Hala nyen tison keñi le Babilôn y’a léña ’isi kiki yom le i mpala kwo, y’a nene ha bé ki kekikel. 22 Kiñ i bôt ba ntôp tjémbi ba kôdôk hiluñ, ni i bakôt nsik, ni i bahem hikos, ni i bahem sép y’a nôga ha bé kekikel i weeni. To ñôô gwom nye ki nye nu a mboñ to umbe ntén bôlô a’ nene ha bé i weeni, to liyôgbe li ngok kôgôl li ga nôga ha bé i weeni kekikel. 23 Mapubi ma lambe yo ki yo m’a bai ha bé i weeni kekikel, to kiñ i mbiimuda lôñni mbom y’a nôga ha bé i weeni kekikel, inyule bôt boñ ba nyuñga bon ba bé bañga bôt ba nkoñ ’isi; u bi yumus ki biloñ gwobisôna ni njel makañ* moñ. 24 Ñ, i nyeni nyen ba bi léba matjél ma bapôdôl ni ma bapubhaga, ni ma bôt bobasôna ba bi nôla hana ’isi.”

19 I mbus ha, me nok yom wengoñle kiñ keñi i limut likeñi nyoo i ngii. Ba bé kal le: “Béghana Yéhôva!* Tohi ni lipém ni ngui bi yé bi Nyambe wés, 2 inyule mbagi yé i yé maliga, i téé ki sép. Inyule a mal kogse muda libambe nunkeñi nu a bé ôbôs ’isi ni malal mé ma nyega;* ni inyule a mal pun matjél ma minkol nwé ma ma bak i moo* ma muda libambe nunkeñi.” 3 Kunda yada, inyu ngélé i nyônôs iba, ba kal le: “Béghana Yéhôva!* Hida hi hié, hi hi bi ligis nye,* hi mbet i boga ni boga.”

4 Yak môm ima ma mimañ ni mina lôñni bihégél bi niñ bina ba ôôp, ba bégés Nyambe nu a yii i yééne ane, ba kal le: “Amen! Béghana Yéhôva!”*

5 Yak kiñ i lôl i yééne ane, i kal le: “Béghana Nyambe wés, bébobasôna ba ni yé minkol nwé, bé ba ni nkon nye woñi, batitigi ni bakeñi.”

6 Me nok yom wengoñle kiñ i limut likeñi, i pôn-ga liyôgbe li ngandak malép, i pôn-ga ki soso mbambat le i mbam. Ba kal le: “Béghana Yéhôva,* inyule Yéhôva* Nyambe wés, Nu ngui yosôna, a mal bôdôl ane! 7 Di konok maséé, di hagak, di tinak ki nye lipém, inyule ngéda libii i Man ntômba i nkola, yak nwaa wé a mal kôôba. 8 Ñ, ba bi ti nye kunde le a haba mambot ma loñge libadô ma ma mbai, ma pôbôk, inyule loñge libadô i yé maboñok ma telepsép ma bapubhaga.”

9 Añgel i kal me le: “Tila le: Maséé ni ba ba yé nséblaga* i ngand* libii i Man ntômba.” I kal ki me le: “Bini bi yé bipôdôl bi maliga bi Nyambe.” 10 Ha nyen me bi kwo i makôô mé le me bégés nye. Ndi a kal me le: “Yoñ yihe! U boñ bañ hala! Me yé ndik so nkol woñ ni u lôkisoñ i i ngwel nson i bok mbôgi inyu Yésu. Bégés Nyambe! Inyule mbañ i nlôl mu mbôgi ba mbok inyu Yésu.”

11 Me tehe ngii i nyibla, ndi nuna-ki! Puba hosi. Ba nsébél Nu a yii yo i ngii le Nu maliga ni Nu a yé ntiik, nyen a nkéés, a jok ki gwét ikété telepsép. 12 Mis mé ma yé kiki lindômbôô li hié, yak ngandak mintut mi ane mi yé i ngii ño wé.* A gwé jôl li yé ntilga le mut nye ki nye a nyi bé ndik nyemede, 13 a hééba ki mbot ngii i i gwé matjél,* ba nsébél nye ni i jôl lini le Bañga i Nyambe. 14 Yak mintôñ mi gwét mi ngii mi bé noñ nye, mi bak i ngii bipuba bi bihosi, mi bak mi hééba bipuba bi mambot bi loñge libadô li li mpôp. 15 Mbôñgô pansoñ u u nhoo u mpémél i nyo wé, lôñni wo nyen a ntjé biloñ, a’ ane* ki gwo ni ntoñgo kei. Handugi hala, a ntjo ikété waa wai u hiun hikeñi hi Nyambe Nu ngui yosôna. 16 Mu mbot yé ngii, ñ, i bel wé, a gwé jôl li yé ntilga le: Kiñe i bikiñe ni Nwet nu bet.

17 Me tehe ki añgel i téé i hiañgaa, i lond ni kiñ keñi, i kal dinuni tjodisôna di mpuue ñemkété ngii* le: “Lona hana, kodbana inyu ngand* keñi i Nyambe, 18 le ni je minsôn mi bikiñe, ni minsôn mi baane dikôô di bisônda, ni minsôn mi mimpémba mi bôt, ni minsôn mi bihosi lôñni bôt ba bé ba yii gwo ngii, ni minsôn mi bôt bobasôna, mi bôt ba yé kunde ni mi bôt ba yé minkol, mi batitigi ni mi bakeñi.”

19 Me tehe ki nuga bikai ni bikiñe bi hisi ni mintôñ nwap mi gwét mi nkodba inyu jo gwét ikolba nu a yii i ngii hosi, ni ikolba ntôñ wé gwét. 20 Ndi nuga bikai i bi gwéla, yo lôñni mpôdôl bitembee nu a bi boñ biyimbne i bisu gwé, gwon a bi gwélél inyu yumus i bôt ba bi kôhna yimbne i nuga bikai ni i bôt ba bi bégés ôñgba yé. Bo iba ba bi léña yômi ikété titimba hié i i nloñ ni solfa. 21 Ndi ba ba bi yégle, ba bi nôla ni pansoñ i bi pémél mu nyo u nu a yii i ngii hosi. Dinuni tjodisôna di nuu minsôn nwap.

20 Me tehe añgel i nlôl i ngii, i sôhôk ni hiliba hi soñkum lôñni soso nsañ bikei i woo wé. 2 I gwel kômnyoo, nlômbi nyoo, yon i yé Nsohop ni Satan, i kañ nye inyu hikôô hi nwii. 3 I leñ nye ikété soñkum, i kwés nye mukété, i band ki yo, le a yumus ha bañ biloñ letee hikôô hi nwii hi mal. I mbus hala, ba nlama kobol nye inyu ndék ngéda.

4 Me tehe ki biyééne bi ane, i bôt ba bi yén mu ngii ba kôhna kunde i kéés. Ñ, me tehe biniñ* bi bôt ba bi nôla* inyu mbôgi ba bi bok inyu Yésu, ni inyule ba bi pot inyu Nyambe, ni ba ba bi bégés bé nuga bikai to ôñgba yé, ba kôhna bé to yimbne i mbom yap, to i woo wap. Ba bi témb i niñ, ba ane lôñni Kristô inyu hikôô hi nwii. 5 (Ndi bawoga ba ba bi yégle, ba bi kôhna bé niñ letee hikôô hi nwii hi mal.) Bitugne bi bisu bini. 6 Maséé ni nu a nyoñ ngaba i bitugne bi bisu, a yé ki mpubhaga; nyemb i nyônôs iba i gwé bé ngui i ngii yap, ndi b’a ba biprisi bi Nyambe ni bi Kristô, b’a ane ki hikôô hi nwii lôñni nye.

7 Ndi kiki hikôô hi nwii hi’a mal ndigi, b’a pémés Satan i mok nwé, 8 a ga pam inyu yumus biloñ bi yé i makas ma hisi mo ma-na, Gôg ni Magôg, le a kot gwo inyu gwét. Nsoñgi wap u yé kiki lisege li tuye. 9 Ba bi tjama ni nkoñ ’isi wonsôna, ba kéña libôga li bapubhaga ni tison Nyambe a ngwés. Ndi hié hi lôl i ngii, hi ligis bo. 10 Nsohop nu a bé yumus bo, a léña ikété titimba i hié ni i solfa, i het nuga bikai lôñni mpôdôl bitembee ba yé, b’a son njonok juu ni njamuha i boga ni boga.

11 Me tehe soso puba yééne ane, yak Nu a bé a yii mu ngii. Hisi ni ngii bi nyodi ngwéé i bisu gwé, homa to wada a nene ha bé inyu yap. 12 Me tehe bawoga, bakeñi ni batitigi, ba téé i bisu bi yééne ane, yak minhôdôk mi bikaat mi yiblana. Ndi nhôdôk kaat umpe u yiblana; won u yé nhôdôk kaat niñ. Bawoga ba kééhana inoñnaga ni mam ma bé ntilga ikété minhôdôk mi bikaat inoñnaga ni maboñok map. 13 Tuye a timbis bawoga ba bé ikété yé, yak nyemb ni Soñ* bi timbis bawoga ba bé ikété yap; hiki wada wap a kééhana inoñnaga ni maboñok mé. 14 Nyemb ni Soñ* bi léña ikété titimba i hié. Titimba i hié yon i yé nyemb i nyônôs iba. 15 Yak nu ni nu a bééna bé jôl jé ntilga ikété kaat niñ a léña ikété titimba i hié.

21 Me tehe ngii yondo ni hisi hi yondo; inyule ngii i bisu ni hisi hi bisu bi bi tagbe, to tuye a ta ha bé. 2 Me tehe ki tison pubhaga le Yérusalem yondo, i sôhôk ’isi, i lôlak i ngii yak Nyambe, i bak ki nkôôbaga kiki mbom u u ñeñgep inyu bem nlô wé. 3 Ha nyen me bi nok kiñ keñi i nlôl i yééne ane, i kalak le: “Nuna-ki! Lap Nyambe i yé ni bôt ba binam, a ga yén ki lôñni bo, b’a ba bôt bé. Nyambe nyemede a’ ba lôñni bo. 4 A’ sas gwiiha gwobisôna i mis map, nyemb y’a ba ha bé, to maéya, to nlondok, to njôghe bi ga ba ha bé. Minlômbi mi mam mi mal tagbe.”

5 Nu a bé a yii mu yééne ane a kal le: “Nuna-ki! Me mboñ mam momasôna yondo.” A kal ki le: “Tila, inyule bibañga bini bi yé maliga,* bi yé ki ntiik.” 6 A kal me le: “Bi mal yon! Men me yé Alfa ni Ôméga,* bibôdle ni lisuk. I mut nyus i gwé, m’a ti nye malép yañga,* ma lôlak i lingen* li malép ma niñ. 7 I mut a’ yémbél nyen a’ kôdôl i mam mana, me ga ba Nyambe wé, yak nye a’ ba man wem. 8 Ndi i bôt ba nkon woñi ni bôt ba ngi hémle, ni i bôt ba yé nyega ikété mahindi map, ni bôt ba manola, ni bôt ba malal ma nyega,* ni bôt ba gwé lem i boñ makañ,* ni babégés bisat, ni bôt ba bitembee bobasôna, ngaba yap y’a ba ikété titimba i nloñ ni hié lôñni solfa. Hala a yé nyemb i nyônôs iba.”

9 Añgel yada i lo, i bé ikété biañgel bisaambok bi bi bééna biséya bisaambok bi bi bé nyonok ni dimala disaambok di nsôk, i kal me le: “Lo, m’a unda we mbom, nwaa Man ntômba.” 10 Jon a kena me ni ngui mbuu mpubi i soso hikôa hi nyôgi, a unda ki me tison ipubi le Yérusalem i nsôs ’isi, i lôlak i ngii yak Nyambe, 11 i ban-ga lipém li Nyambe. I bé bai kiki ngok i i nlôôha tik, kiki ngok yaspi i i mbai kiki kristal. 12 I bééna soso lipénd li nyôgi, i ban-ga ki jôm li manwemel ni ima, yak jôm li biañgel ni biba bi bé bi téé i manwemel, môl ma jôm li matén ma bon ba Israel ni ima ma bé ntilga mu manwemel. 13 I pes likôl manwemel ma bé maa, i pes ñombok manwemel maa, i pes nwelmbok manwemel maa, i pes hiôñg manwemel maa. 14 Hikuu hi lipénd li tison hi bééna jôm li ngok ni iba, jôm li môl ni ima ma jôm li baôma ni iba ba Man ntômba ma bé ntilga mu ngok.

15 Ndi nu a bé pôdôs me a bééna likai li gôl inyu hek tison ni manwemel mé ni lipénd jé. 16 Yak tison i bééna makas ma-na, bibôñgô gwé ni pôk yé bi bé nlélém. Añgel i hek tison ni likai, hala a ti jam kiki bo dikôô diba ni mbôgôl iba ni môm ima ma kilôméta;* bibôñgô gwé ni pôk yé ni ntel wé bi bak nlélém. 17 A hek ki lipénd jé, hala a ti mbôgôl ni môm ma-na ma dikéñéé di moo ni dina* inoñnaga ni lihegek li mut binam, li li yé nlélém ni lihegek li añgel. 18 Lipénd li bé ñoñok ni Yaspi, yak tison i bé ni bañga gôl wengoñle léman i mpôp. 19 Mintén mi tik ngok nwominsôna mi bé lémés hikuu hi tison: Ngok bisu i hikuu i bé yaspi, i nyônôs iba safirô, i nyônôs aa kalsédôn, i nyônôs ina émérôd, 20 i nyônôs itan sardônikô, i nyônôs isamal sardi, i nyônôs isaambok krisôlitô, i nyônôs juem bérilô, i nyônôs bôô tôpasô, i nyônôs jôm krisôpasô, i nyônôs jôm ni yada hiasintô, i nyônôs jôm ni iba amétistô. 21 Yak jôm li manwemel ni ima ma tison ma bé jôm li perl ni iba; hiki nwemel u bé ni perl yada. Nlôm njel nu tison a bé ni bañga gôl wengoñle léman i nehna.*

22 Me bi tehe bé témpel mukété, inyule Yéhôva* Nyambe Nu ngui yosôna a yé témpel i tison, bona Man ntômba. 23 Tison i gwé bé ngôñ ni hiañgaa to sôñ inyu béyéi yo, inyule lipém li Nyambe jon li nti yo mapubi, Man ntômba nyen a yé lambe yé. 24 Biloñ bi ga hiôm ni njel mapubi mé, yak bikiñe bi hisi bi ga lona lipém jap mukété. 25 Manwemel mé m’a kwéhba bé njamuha kekikel, inyule u w’a sude bé mu. 26 Bi ga lona lipém lôñni bikeñi bi biloñ mukété. 27 Ndi yom yo ki yo i i yé mahindi y’a jôp bé mu kekikel, to mut nye ki nye nu a mboñ mam ma nyega ni ma malôga; ndik ba ba gwé môl map ntilga mu nhôdôk kaat niñ u Man ntômba bon b’a jôp mu.

22 Añgel i unda me lom malép ma niñ, a pôbôk kiki kristal, a lôlak i yééne ane Nyambe ni i Man ntômba, 2 a kulak i ñemkété nlôm njel nu tison. Bipes bi lom gwo biba bi bééna bie bi niñ, bi numuk matam jôm li ngélé ni iba hiki nwii, bi tinak matam hiki sôñ. Tjai di bie di bé inyu mbuubaha biloñ.

3 Ndiihe yo ki yo y’a ba ha bé. Ndi yééne ane i Nyambe ni i Man ntômba y’a ba ikété tison, yak minkol nwé mi ga gwélél nye nson mpubhaga; 4 mi ga tehe ki su wé, yak jôl jé li ga ba ntilga mu mbom yap. 5 To u w’a sude ha bé, mi ga bana ha bé ngôñ ni mapubi ma lambe, to ni mapubi ma hiañgaa, inyule Yéhôva* Nyambe a’ béyés mapubi mé i ngii yap, mi ga ane ki i boga ni boga.

6 Añgel i kal me le: “Bibañga bini bi yé maliga,* bi yé ki ntiik; ñ, Yéhôva,* Nyambe nu a mpot ni njel bapôdôl, nyen a bi ep añgel yé i unda minkol nwé i mam ma nlama bôña ndék ngéda. 7 Nun-ki! Me mpala lo. Maséé ni nu a nôgôl bibañga bi mbañ bi nhôdôk kaat unu.”

8 Me Yôhanes, men me bé emble i mam mana, me tehge ki mo. I ngéda me bi emble, me tehe ki mo, me kwo i makôô ma añgel i bé unda me i mam mana le me bégés yo. 9 Ndi i kal me le: “Yoñ yihe! U boñ bañ hala! Me yé ndik we so nkol, ni u lôkisoñ le bapôdôl, ni u bôt bobasôna ba nôgôl bibañga bi nhôdôk kaat unu. Bégés Nyambe.”

10 Añgel i kal ki me le: “U band bañ bibañga bi mbañ bi nhôdôk kaat unu, inyule ntéak ngéda u yé bebee. 11 Nu a téé bé sép a ke ni bisu ikété ngitelepsép, yak nu a yé mahindi a ke ni bisu ikété mahindi mé; ndi nu a téé sép a ke ni bisu ikété telepsép, yak nu a yé mpubhaga a ke ni bisu ikété libak lipubhaga.

12 “‘Nun-ki! Me mpala lo, me gwé ki nsaa m’a ti, inyu timbhe hiki mut inoñnaga ni nson wé. 13 Men me yé Alfa ni Ôméga,* nu bisu ni nu sôk, bibôdle ni lisuk. 14 Maséé ni ba ba njôwa mimbôñgô nwap mi mambot, le ndi ba bana kunde i je matam ma bie bi niñ, ba bana ki kunde i tagbene i manwemel inyu jôp ikété tison. 15 Ngwo* i yéne i mbégdé, Yak i bôt ba gwé lem i boñ makañ,* ni bôt ba malal ma nyega,* ni bôt ba manola, ni babégés bisat, ni hiki mut a ngwés bitembee, a ban-ga ki lem i tembee.’

16 “‘Me Yésu, men me bi ep añgel yem i bôgôl i mam mana mbôgi inyu makoda. Me yé nkañ u David ni mbôda yé, me yé ki hiôdôt hi maye ma kel hi hi mbai.’”

17 Mbuu ni mbom ba nke ni bisu i kal le: “Lo!” Yak hiki mut a ñemble, a kal le: “Lo!” Yak hiki mut nyus i gwé, a lo; hiki mut a nsômbôl, a yoñ malép ma niñ yañga.

18 “Me mbok mbôgi inyu hiki mut a ñemble bibañga bi mbañ bi nhôdôk kaat unu: Ibale mut a nkônde jam munu mam mana, Nyambe a’ kônde nye dimala di yé ntilga ikété nhôdôk kaat unu; 19 Ibale mut a nhéya jam ikété bibañga bi nhôdôk kaat u mbañ ini, Nyambe a’ héya ngaba yé mu bie bi niñ ni mu tison pubhaga, i mam ma yé ntilga ikété nhôdôk kaat unu.

20 “Nu a mbok mbôgi inyu mam mana a nkal le: ‘Ñ, me mpala lo.’”

“Amen! Lok, a Nwet le Yésu.”

21 Konangoo i mbuma ñañ i Nwet le Yésu i ba lôñni bapubhaga.