KAAT YUDA

1 Me Yuda, nkol u Yésu Kristô, ndi manyañ Yakôbô, me ntilna i bôt ba yé nséblak, ba Nyambe Tata a ngwés, ba bak ki ntéédaga inyu Yésu Kristô:

2 Konangoo ni nsañ ni gwéha bi bôl i ngii nan.

3 A bagwéha, to hala kiki me ban-ga ngôñ keñi i tilna bé inyu tohi yés bésbobasôna, me ntehe nseñ i tilna bé inyu ti bé makénd i kônde jo sañ inyu hémle i bi tina bapubhaga ngélé yada inyu ngélé yosôna. 4 Me ntilna bé inyule ngim bôt i bi sooma ipôla nan, bôt le Bitilna bi bi pôdôl kôba le b’a kôhna mbagi ini. Ba yé bayan Nyambe ba ba ngwélél konangoo i mbuma ñañ i Nyambe wés inyu boñ mam mabe ngi wonyuu,* ba tañbaga ki mpom mut* nu a bi somb bés, hala wee Nwet wés le Yésu Kristô.

5 To hala kiki ni ntibil yaga yi i mam mana momasôna, me nyéñ hôñlaha bé le ngéda Yéhôva* a bi mal tohol litén jé i loñ Égiptô, a bi yik tjé i bôt ba bi unda le ba gwé bé hémle. 6 Yak i biañgel bi bi tééda bé liyééne jap li bisu, ndi bi tjôô bañga yap liyééne, a bi leñ gwo i mok mi boga ikété jiibe likeñi inyu mbagi i hilo hikeñi. 7 Nlélém jam ni Sôdôm lôñni Gômôra ni bitison bi bé kéña gwo, bi bi nai ni malal ma nyega,* bi kôndge ndik yônôs ngôñ minsôn i i kôli bé. Bi bi kôhna mbagi nôgôs i hié hi boga, jon bi yé mabéhna inyu yés.

8 Ndi to hala, Yak i bôt bana ba nhôiba ikété bieem, ba hindhak minsôn, ba yanak bôt ba gwé kunde i ngii yap, ba ôbhak ki môl ma bôt ba gwé lipém li Nyambe. 9 Ndi ngéda ñane biañgel le Mikael a bi bana ndañ ni Nsohop, ba sôñnaga mim u Môsi, a bi noode bé pémés mbagi ikolba nye, to sol nye, ndi a bi kal le: “Yéhôva* a kogse we.” 10 To hala, bana bôt ba nsol mam momasôna ba ntibil bé nok. Ndi Yak ikété mam momasôna ba nok yaga, kiki binuga bi bi gwé bé yi, ba nke ni bisu i ôbôs bomede mu mam ma.

11 Hala a yé ngoo ngandak inyu yap, inyule ba bi noñ njel Kain, ba pala ki jôp i njel malôga i Balam inyu kôhna nsaa, ba bi tjiba ki ikété bibañga bi ngolba bi Kôra! 12 Bana bôt bon ba yé maaa ma sôli ikété lép i mangand manan ma gwéha ngéda ba nje lôñni bé, ba yé batééda mintômba ba ba njés bomede ibabé i kon woñi; ba yé ond i i gwé bé malép, i mbebi i ndéñgés bahoma bahoma; ba yé bie bi num bé matam ngéda yap, bi bi yé minwok ngélé iba,* bi ba nup ni minkañ nwap; 13 ba mpémés mam map ma mahindi ngi wonyuu kiki mangudga ma tuye ma mpémés mahus, ba yé tjôdôt di di gwé bé njel, jiibe likeñi li yé nkôôbaga inyu yap i boga.

14 Ndi yak Énok, mut nu yônôs isaambok ibôdôl Adam, a pot kôba inyu yap ngéda a kal le: “Nuna-ki! Yéhôva* a bi lo ni didun di didun* di biañgel gwé bipubhaga 15 inyu lona mbagi ikolba bobasôna, ni unda bayan Nyambe bobasôna le ba mbôk mbén inyu mam ma liyan Nyambe momasôna ba bi boñ i yan Nyambe, ni inyu mam ma bilim bibéba bi bôt bi nyan Nyambe bi bi pot ikolba nye.”

16 Bana bôt ba yé bôt ba minhuñbe, bôt ba ntjelel inyu niñ yap, ba noñok ngôñ yap ibe, ba kumbuk manyo ni bibañga bikeñi, ba lémhak bipôdôl* i yoña bôt inyu nseñ wap bomede.

17 Ndi bé, a bagwéha, hoñlana bibañga bi pôda kôba* ni baôma ba Nwet wés Yésu Kristô, 18 kiki ba bé béna kal bé le: “I mangéda ma nsôk, bôt ba nol bape hiol ba mba, ba noñok ngôñ yap ibe inyu mam ma liyan Nyambe.” 19 Bon ba nlona mbagla, ba niñ kiki binuga,* ba gwé bé mbuu u Nyambe.* 20 Ndi bé, a bagwéha, lédhana bébomede ikété hémle nan i i nlôôha pubhaga, ni soohege ki ni mbuu mpubi, 21 inyu tééda bébomede ikété gwéha Nyambe, ni bemek konangoo i Nwet wés Yésu Kristô i i nkena i niñ boga. 22 Yak bahogi ba ba mpééna, kena ki ni bisu i kônôl bo ngoo; 23 ni pala héya bo i hié inyu tohol bo. Ndi kena ni bisu i kônôl bape ngoo, ni boñok hala ni woñi, ni ook yak mahindi ma bibéba gwap le ma tihba bañ bé.*

24 Ndi inyu Nyambe nu a nla tat bé le ni baage bañ, nu a nla ki téé bé ngi liton li mahindi i bisu bi lipém jé* ni maséé makeñi, 25 inyu nu a yé mpom Nyambe wada ni Ntohol wés ni njel Yésu Kristô Nwet wés, lipém, énél, lipémba ni kunde bi ba ni nye ibôdôl yaga i boga, hanano, ikepam i boga. Amen.