KAAT PAUL A BI TILNA FILÉMÔN

1 Me Paul, mut mok inyu Kristô Yésu, ni Timôtéô mankéé wés, di ntilna Filémôn nu a yé so ngwelnson wés nu gwéha, 2 ni Apia mankéé wés nu muda, ni Arkipô nu a yé sônda i Kristô lôñ yada ni bés, ni likoda li yé i ndap yoñ:

3 Konangoo i mbuma ñañ ni nsañ bi bi nlôl ni Nyambe Tata wés yak ni Nwet le Yésu Kristô bi ba ni bé.

4 Hiki ngéda, me nti Nyambe mayéga ngéda me nsima we ikété masoohe mem, 5 hala kiki me nkônde nok ngan i hémle yoñ ni gwéha u gwé inyu Nwet le Yésu ni inyu bapubhaga bobasôna. 6 Me nsoohe le hémle i i ñat we ni bahémle bape i tinde we i neebe hiki loñge jam di nkôhna ni njel Kristô. 7 Inyule me bi kôhna ngandak maséé ni hogbe ngéda me bi nok ngan i gwéha yoñ, a mankéé, inyule miñem* mi bapubhaga mi bi témb mi bana ngui ni njel yoñ.

8 Inyu njom ini nyen, to hala kiki me gwé kunde keñi i i nlôl ni Kristô i ti we oda le u boñ jam li kôli, 9 me nsoohe we nsoohege inyu gwéha, inyule me Paul, me yé mañ mut, me yé ki mut mok hanano inyu Kristô Yésu. 10 Me nsoohe we inyu man wem Ônésimô. Me bi yila kiki isañ ikété ndap mok.* 11 I ngéda bisu, a bééne bé we nseñ to ndék, ndi nano a yéne we ni me nseñ. 12 Me yé i timbis nye i weeni, ñ, nye yaga nu me ngwés ngandak.*

13 Ngôñ yem i yé le me tééda nye ipañ yem, inyu boñ le a gwélél me nson kiki wemede u bak le u gwélél me nson ntel wonsôna me yé i ndap mok inyu ñañ nlam. 14 Ndi me nsômbôl bé boñ jam jo ki jo ibabé i bat we kunde, inyu boñ le u bôñôl bañ me i loñge jam ini wengoñle u yé nyégsaga, ndi ni ñem woñ wonsôna. 15 Bebek le inyu hala yaga nyen a bi bagla ni we inyu ndék ngéda,* le ndi a témb i weeni i boga ni boga, 16 kiki nkol ha bé, ndi iloo yaga nkol, kiki mankéé nu gwéha. Me ngwés nye ngandak, yak we w’a lôôha gwés nye kiki nkol ni kiki mankéé i Nwet.* 17 Jon, ibale u nyoñ me kiki liwanda* joñ, leege nye ni gwéha wengoñle memede nu. 18 Ndi ibale a bi boñ we béba yo ki yo, tole u mbédél nye pil wo ki wo, bat me wo. 19 Me Paul nyen me yé i tilna we ni woo wem memede le m’a saa i pil u, ndi u nyi le yak me me mbat we pil nkeñi kiyaga.* 20 Ñ, a mankéé, soho ti me mahôla mana i jôl li Nwet; lédés me ñem* i jôl li Kristô.

21 Me yé nkwoog nkaa le w’a nôgôl me, jon me yé i tilna we, me yik le w’a boñ Yak iloo kiki me nkal. 22 Ndi kôôbana ki me homa liyééne inyule me mbot ñem le ni njel masoohe manan, m’a témb i bééni.*

23 Épafras, nu a yé mut mok kiki me inyu Yésu Kristô, a nyéga we, 24 yak Markô, Aristarkô, Démas ni Lukas, ba ba yé baso bagwelnson bem.

25 Konangoo i mbuma ñañ i Nwet le Yésu Kristô i ba ni mahoñol malam ni gwé.*