KAAT PAUL A BI TILNA BÔT BA ÉFÉSÔ

1 Me Paul, ñôma nu Kristô Yésu ni njel sômbôl i Nyambe, me ntilna bapubhaga ba ba yé i Éfésô, ba ba ntéñbe ni hémle ikété adna ni Kristô Yésu:

2 Konangoo i mbuma ñañ ni nsañ bi nlôl yak Nyambe Tata wés ni Nwet le Yésu Kristô bi ba lôñni bé.

3 Bibégés bi ba ni Nyambe, Isañ Nwet wés Yésu Kristô, inyule a bi sayap bés ni bisai bi mbuu gwobisôna nyoo ngii ikété adna ni Kristô, 4 hala kiki a bi pohol bés i ba ikété adna ni nye* ilole nkoñ ’isi u mbôdôl,* le di unda gwéha, di ba ki bapubhaga ngi liton li mahindi i bisu gwé. 5 Inyule a bi pohol bés i bisu bi ngéda le di ba inyu yé nyemede kiki bon ngwalakbel ni njel Yésu Kristô inoñnaga ni ngôñ yé lôñni sômbôl yé, 6 le ndi a kôhna bibégés inyu lipém li konangoo yé i mbuma ñañ a bi ti bés ni loñgeñem ni njel nugwéha wé. 7 Ni njel matjél ma nugwéha wé nyen Nyambe a bi saa binoñ, le ndi bés di koblana, ñ, di kôhna ki nwéhél i bibéba gwés, inoñnaga ni lingwañ li konangoo yé i mbuma ñañ.

8 A bi boñ le i konangoo i mbuma ñañ ini i bôl i ngii yés ikété pék ni nogna* yosôna, 9 hala kiki a bi yis bés jimb lipubi li sômbôl yé. I jimb lini li yé inoñnaga ni ngôñ yé nyemede a bi téé 10 le i ngeñ ntéak wé ngéda u nyon, ngim liégaga li mam* i kot mam momasôna ikété Kristô, i mam ma yé ngii lôñni mam ma yé ’isi. Ñ, ikété Kristô, 11 ni nye nyen di yé ikété adna; di bi tééba le di ba bakôdôlbum, di pohlana ki i bisu bi ngéda inoñnaga ni bitééne bi nu a nyônôs mam momasôna kiki a mal kit inoñnaga ni sômbôl yé, 12 le ndi a gwélél bés ba di bi bôk di bôdôl Kristô ñem inyu bibégés bi lipém jé. 13 Ndi yak bé ni bi bôdôl nye ñem ngéda ni bi nok bañga i maliga, ñañ nlam inyu tohi nan. Ni njel yé ki nyen ngéda ni bi hémle, Nyambe a bi band bé ni njel mbuu mpubi a bi bôn, 14 won u yé bibep bi bi bôk tiba* inyu bum yés, hala a yé inyu kobol litén* li Nyambe nyemede ni njel binoñ, inyu lipém ni bibégés gwé.

15 Inyu hala nyen yak me, ibôdôl nu me bi nok i hémle ni gwé inyu Nwet le Yésu lôñni gwéha ni ñunda inyu bapubhaga bobasôna, 16 me ma waa bé ti mayéga inyu nan. Me nke ki ni bisu i sima bé ikété masoohe mem, 17 le Nyambe nu Nwet wés Yésu Kristô, Tata nu lipém, a ti bé mbuu u pék ni u masoola kayéle ni pam i tibil yi nye. 18 A bi boñ le mis ma miñem minan ma tehe mapubi, le ndi ni yi inyu imbe botñem a bi séble bé, ni limbe lingwañ li lipém a ntééda kiki ngababum inyu bapubhaga, 19 ni lelaa bikeñi bi lipémba jé bi nyamb mayoo inyu bés bahémle. Hala a yé inoñnaga ni nson u lipémba li ngui yé, 20 won a bi unda inyu Kristô ngéda a bi tugul nye ikété bawoga, a yis nye i woo wé walôm nyoo ngii, 21 i ngingii bangomin bobasôna, ni baane bobasôna, ni ngui yosôna, ni bet bobasôna, lôñni i ngii hiki jôl ba nsima, ha ndigi munu nkoñ ’isi unu* bé, ndi yak uu u nlo. 22 A bi suhus ki mam momasôna isi makôô mé, a téé ki nye ñéga i ngii mam momasôna ikété likoda 23 li li yé nyuu yé, li bak nyonok ni bilem gwé;* nye ki nyen a nyônôs mam momasôna ikété bôt bobasôna.

2 Jam lipe ki, Nyambe a bi témbna bé i niñ, to hala kiki ni bé bawoga ikété mahôha ni bibéba binan, 2 mu nyen ni bé hiumul ngéda kôba inoñnaga ni maboñok ma nkoñ ’isi unu,* inoñnaga ni ñane nu a gwé ngui i énél mbebi, hala wee mbuu u u nsal nano ikété bon ba ngimanôgla. 3 Ñ, ipôla yap nyen yak bésbobasôna di bé hiumul kôba inoñnaga ni minheña mi minsôn nwés, di boñok sômbôl i minsôn ni i mahoñol més, di bak bôt ba kôli ni hiun hi Nyambe* ibôdôl i ligwéé kiki bana bôt bape. 4 Ndi Nyambe a yé lingwañ ikété konangoo yé; inyu gwéha keñi a bi gwés bés, 5 a bi témbna bés i niñ lôñ yada ni Kristô, yak ngéda di bé nwok ikété mahôha més (ni bi tohlana ni njel konangoo i mbuma ñañ). 6 Handugi hala, a bi tugul bés lôñ, a yis ki bés lôñ nyoo i ngii, ikété adna ni Kristô Yésu, 7 kayéle i mangéda ma nlo,* a unda sôkbôk lingwañ li konangoo yé i mbuma ñañ ikété loñgeñem* a gwé inyu bés ba di yé ikété adna ni Kristô Yésu.

8 Inyu konangoo i mbuma ñañ ini nyen ni bi kôhna tohi ni njel hémle; hala a ta bé liboñok linan, ndi hala a yé likébla li Nyambe. 9 To, hala a nlôl bé ni minson, le ndi mut to wada a bana bañ njom i kadba. 10 Di yé nson u moo* ma Nyambe, di bi héga ki ikété adna ni Kristô Yésu inyu gwel minson minlam mi Nyambe a bi bôk a téé inyu yés le di kilak mukété.

11 Jon a bé bôt ba matén i pes minsôn, bigdana le i ngéda kôba, i bôt ba nséblana le “minkweebaga” ba bé sébél bé le “bongikweeba,” i bak le moo ma bôt ba binam mon ma nkwee minsôn. 12 Ha ngéda i, ni bééna bé Kristô, ni bak haa ni libak li man Israel, ni bak ki bakén i malômbla ma mbônga; ni bééna bé botñem, ni bééna bé to Nyambe ikété nkoñ ’isi. 13 Ndi nano, ni yé ikété adna ni Kristô Yésu, bé ba ni bé haa i ngéda kôba, ni ntiige bebee ni njel matjél ma Kristô. 14 Inyule nyen a yé nsañ wés, nye yaga nyen a bi yilha mintôñ mi bôt nwo ima jam jada, a bôk ki lipénd li mbagal mintôñ mini. 15 Ni njel minsôn nwé, a bi mélés ôa, a mélés mbén Môsi i i gwé mambén ni matéak, inyu boñ le mintôñ mi bôt nwo ima mi mi yé ikété adna ni nye mi yila mut yondo wada, mi kôp ki nsañ, 16 le ndi a tibil sañgal matén mo ima le ma ba nyuu yada inyu Nyambe ni njel kék njiiha,* inyule a bi nol ôa ni njel yé. 17 A bi lo ki, a añal ñañ nlam u nsañ inyu bé ba ni bé nonok, ni inyu bôt ba yé bebee, 18 inyule ni njel yé, bés matén mo ima, di gwé pôla i kôôge Nyambe bebee ni njel mbuu wada ibabé le jam li kéñ bés njel.

19 Jon ni ta ha bé bakén ba bôt to biyoyo, ndi ni yé bon ba loñ lôñni bapubhaga, ni yé ki bôt ba ndap lihaa i Nyambe, 20 ni bi ôña ki i ngii hikuu hi baôma ni bapôdôl, Kristô Yésu nyemede a bak ngok likas i hikuu. 21 Ikété adna ni nye nyen maoñ momasôna, ma ma yé noñgaga loñge, ma nkônde bet inyu yila témpel pubhaga inyu Yéhôva.* 22 Ikété adna ni nye ki nyen yak bé ni yé i ôña lôñ inyu ba homa Nyambe a nyééne ni njel mbuu.

3 Inyu njom ini nyen me Paul, me yé mut mok nu Yésu Kristô inyu nan, bé bôt ba matén, 2 ibale ni bi nok toi le nson kindak u konangoo i mbuma ñañ i Nyambe u bi tina me inyu loñge nan, 3 le ni njel masoola nyen me bi yi jimb lipubi ndik kiki me bi bôk me tilna bé i sem kwep. 4 Jon ngéda ni ñañ yo, n’a la yi nogna i jimb lipubi li Kristô me gwé. 5 I mangéda ma bi tagbe,* Nyambe a bi yis bé bon ba bôt ba binam i jimb lini kiki a nyeelene jo baôma ni bapôdôl bé bapubhaga nano ni njel mbuu. 6 I jimb li jon li yé le: Ikété adna lôñni Kristô Yésu ni njel ñañ nlam, bôt ba matén ba nlama ba baso bakôdôlbum ni baso bijô bi nyuu ni bayoñngaba lôñni bés mu mbônga. 7 Inyu jimb lini nyen me bi yila ngwélél inoñnaga ni likébla li konangoo i mbuma ñañ i Nyambe me bi kôhna yañga ni njel nson u lipémba jé.

8 Me nu me yé yaga nuntitigi iloo nuntitigi ikété bapubhaga bobasôna, men me bi kôhna ini konangoo i mbuma ñañ, le me añle biloñ bipe ñañ nlam u lingwañ li Kristô li li mbuma ñañ, 9 ni le me boñ le bôt bobasôna ba tehe lelaa Nyambe, nu a bi hek mam momasôna, a ñéga jimb jé li a bi sôô ibôdôl tjai ndi tjai. 10 Hala a bé inyu boñ le nano ni njel likoda, bangomin ni baane nyoo ngii ba yi le pék i Nyambe i nene ikété ngandak manjel. 11 Hala a yé inoñnaga ni bitééne bi boga a bi kôôba inyu Kristô Yésu, Nwet wés; 12 ni njel yé nyen di gwééne kunde i pot, di ban-ga ki njel i tiige nye bebee ibabé le jam li kéñ bés njel lôñni botñem inyu hémle di nhémle nye. 13 Jon me nsoohe bé le ni tomb bañ inyu njiiha me nkôhna inyu nan, inyule yon i yé lipém inyu nan.

14 Inyu njom ini nyen me ñôm maboñ i bisu bi Tata, 15 inyu yé nyen hiki lihaa i ngii ni hana ’isi li gwééne jôl.* 16 Me nsoohe le, ni njel lingwañ li lipém jé, a boñ le mut nan kété a bana ngui, lôñni lipémba ni njel mbuu wé, 17 ni le ni njel hémle nan, ni bana Kristô ikété miñem minan lôñni gwéha. Ona minkañ, telbana ki siñ siñ i ngii hikuu, 18 kayéle lôñni bapubhaga bobasôna, ni la yaga tibil nok kii i yé pôk, ni bibôñgô, ni ntel, ni ndip, 19 ni yi ki gwéha i Kristô, i i nloo yaga yi, le ndi ni ba nyonok ni bilem gwobisôna Nyambe a nti.*

20 Ndi nano, inyu nu a nla boñ mam ma nlôôha yaga loo mam momasôna di mbat to hégda, inoñnaga ni lipémba jé li li yé i gwel nson ikété yés, 21 lipém li ba ni nye ni njel likoda, yak ni njel Kristô Yésu inyu tjai tjodisôna i boga ni boga. Amen.

4 Jon me, mut mok inyu Nwet, me nsoohe bé le ni hiôm i nya i kôli ni nsébla ba bi sébél bé, 2 ni suhulnyuu yosôna,* ni ñemlima, lôñni wongut; ni nihbanaga bé ni bé ikété gwéha, 3 ni boñok biliya bi ngui i tééda adna i mbuu mpubi ikété maada ma nsañ. 4 Nyuu i yé ndik yada, mbuu u bak ki wada, kiki yak botñem inyu nsébla ni bi kôhna i yé yada; 5 Nwet a yé wada, hémle yada, sôble yada, 6 Nyambe wada nu a yé Isañ bobasôna, nyen a yé i ngii bobasôna, a ngwel nson ni njel bobasôna, yak ngui yé i nsal ikété bobasôna.

7 Ndi konangoo i mbuma ñañ i bi tina hiki wada wés inoñnaga ni kiki Kristô a bi hégél nye likébla a nti yañga. 8 Inyule Bitilna bi nkal le: “I ngéda a bi bet i ngii, a bi kena bôt i minkôm; a ti bôt kiki makébla.” 9 Nano bini bibañga le “a bi bet” bi nkobla le kii? Handugi le a bi bôk ndugi a sôs i mambok ma hisi, hala wee nkoñ ’isi. 10 Nu yaga a bi sôs, nye ki nyen a bi bet yaga i ngingii, le ndi a yônôs mam momasôna.*

11 A bi ti bahogi kiki baôma, bape kiki bapôdôl, bape kiki baañal ñañ nlam,* bape ki kiki batééda bémba ni baniiga, 12 inyu kodol* bapubhaga, inyu gwel nson u likoda, inyu mahol ma nyuu Kristô, 13 letee bésbobasôna di pam i bana adna* i hémle ni i bañga yi i Man Nyambe, inyu ba yaga nhôôlak mut,* inyu pam i hihéga hi libak li Kristô i nya i yôni. 14 Jon di nlama ha bé ba boñge batitigi le mangudga ma ndéñgés, yak hiki mbebi biniigana i ken-ga bahoma bahoma ni njel mandon ma bôt ba binam, ni njel likeñge i bot bitembee. 15 Ndi di pot maliga, di holok ki ni njel gwéha ikété mam momasôna isi nu a yé ño le Kristô. 16 I nyeni nyen nyuu yosôna i yé yaga noñgaga loñge, i salak ikété adna hala kiki hiki jô* i nti yom i mbéda. I ngéda hiki jô i nsal loñge, hala a nhôla nyuu i hôlôl, mu kiki i nhol ikété gwéha.

17 Jon i jam lini jon me nkal, me bogok ki mbôgi ikété Nwet, le ni nlama bé hiôm kiki bôt ba matén ba nhiôm, inyule ba nhoñol ndik gwañga bi mam.* 18 Mahoñol map ma yé ikété jiibe, ba bak mbaglak ni niñ Nyambe a nti, inyu ngiyi yap, ni inyule miñem mi nyila bo ntuduk.* 19 Kiki ba nkon ha bé hison, bomede ba nsôôbe ikété maboñok mabe ngi wonyuu,* le ba boñ mintén mi mam ma nyega nwominsôna ni huluk ñem.

20 Ndi ni bi nigil bé le hala nyen Kristô a yé, 21 ibale ni bi emble toi nye, ni kôhna ki biniigana ni njel yé, ndik kiki maliga ma yéne yak Yésu. 22 Ni bi nigil i héya nlômbi mut u u nkiha ni minlômbi minan mi maboñok, u ñôbi ki inoñnaga ni minheña nwé mi malôga. 23 Ndi ni nlama ke ni bisu i yila yondo ikété ngui i ñénél mahoñol manan,* 24 ni haba ki mut yondo nu a bi héga inoñnaga ni sômbôl Nyambe ikété bañga telepsép ni bañga ndéñbe.

25 Jon, nano kiki ni mal nwas bitembee, hiki wada nan a kal mut wé libôk maliga, inyule ni yé bijô bi nyuu bi bi édi gwo ni gwo. 26 Unbana, ndi ni boñ bañ béba, ni nwas bañ le hiañgaa hi nañal, hiun hi bak bé i ñem; 27 ni ti bañ Nsohop pôla.* 28 I mut a nibik, a nip ha bañ; ndi a sal bôlô ni ngui, a boñok bôlô lam ni moo mé, le ndi a bana yom i kap ni nu a gwé bé. 29 Buk ibe yo ki yo i pémél bañ i manyo manan,* ndi ndik mam ma nlédhana ngéda hala a mbéda, inyu ti baemble mam ma yé nseñ. 30 Ni unbaha bañ* mbuu mpubi u Nyambe, lôñni wo nyen Nyambe a bi band bé inyu kel kobla ni njel binoñ.

31 Ni héya mintén mi lôlha ñem nwominsôna ikété nan, ni hiun, ni nyayak, ni nlondok, ni bisol, lôñni béba ñem yosôna. 32 Ndi ni bana loñgeñem bé ni bé, ni ñem konangoo, ni nwéhlana ki bé ni bé ni ñem wonsôna, kiki yak Nyambe a bi nwéhél bé ni ñem wé wonsôna ni njel Kristô.

5 Jon, yilnana banigle Nyambe kiki bon a ngwés, 2 kena ki ni bisu i kil ikété gwéha nlélém kiki yak Kristô a bi gwés bés,* a ti nyemede inyu yés* kiki likébla ni sesema bi bi numbul Nyambe loñge njiñ.

3 Ba sima yaga bañ malal ma nyega,* to mintén mi nyega nwominsôna, to hép ipôla nan, hala nyen a kôli ni bapubhaga; 4 to maboñok ma nwéha nyuu, to bipôdôl bi bijôñ, to minjôha mi mahindi, mam ma ma kôli bé, ndi ni tinak ndik mayéga. 5 Inyule ni nyi hala, bébomede ni neebege ki hala, le mut malal ma nyega,* to mut nyega, to mut huluk ñem, hala wee mbégés bisat, a gwé bé ngababum ikété Ane i Kristô ni i Nyambe.

6 Mut to wada a lôk bañ bé ni bipôdôl bi bi yé hôlô, inyule inyu mintén mi mam mini nyen hiun hi Nyambe hi yé i lo i ngii bon ba ngimanôgla. 7 Jon ni yoñ bañ ngaba yo ki yo ni bo; 8 inyule ni bé jiibe i ngéda bisu, ndi nano ni yé mapubi inyule ni gwé maada lôñni Nwet. Jon kena ni bisu i hiôm kiki bon ba mapubi, 9 inyule litam li mapubi li yé i bana ñem nlam ikété mam momasôna, lôñni telepsép ni maliga. 10 Kena yaga ni bisu i tibil wan i mam ma nlémél Nwet; 11 ni yoñ ha bañ ngaba ikété minson mi jiibe mi mi num bé matam malam, ndi yeelana nwo. 12 Inyule i mam ba mboñ bisôsôli, to sima mo, ma nwéha nyuu i sima. 13 Ndi mapubi mon ma nyelel* mam momasôna, inyule mam momasôna ma nyeli ma yé mapubi. 14 Jon i nkéla le: “Tôde, a we nu u yé ’ilo, nyodi ikété bawoga, ha nyen Kristô a’ béyéi we.”

15 Jon yoña yaga yihe bañga liyoñok le ni hiôm bañ kiki bijôñ bi bôt, ndi kiki bôt ba pék, 16 ni tiblak yaga gwélél ngéda nan* inyule dilo di yé dibe. 17 Inyu hala nyen ni waa ba bijôñ bi bôt, ndi kena ni bisu i nok kii i yé sômbôl i Yéhôva.* 18 Ni hiôô bañ to wai inyule i nkena i mpuñgu,* ndi kena ni bisu i ba nyonok ni mbuu mpubi. 19 Ni podok bé ni bé* ni tjémbi di bibégés, ni béghak Nyambe lôñni tjémbi di mbuu; ni tôbôk, bébomede ni kôdôk nsik ikété miñem minan inyu Yéhôva,* 20 ni tinak Nyambe wés ni Tata wés mayéga ngéda yosôna inyu mam momasôna i jôl li Nwet wés Yésu Kristô.

21 Suhlana bébomede, hiki mut isi nuu numpe, ikété woñi u Kristô. 22 Bôda* ba suhus bomede isi balôm bap wengoñle isi Nwet, 23 inyule nlôm nyen a yé ñane nwaa ndik kiki Kristô a yé ñane likoda, a bak ki ntohol nu nyuu ini. 24 Ni maliga, kiki likoda li nsuhus jomede isi Kristô, hala nyen yak baa ba nlama suhus bomede isi balôm bap ikété mam momasôna. 25 A balôm, kena ni bisu i gwés baa banan, ndik kiki yak Kristô a bi gwés likoda, a sem ki nyemede inyu likoda, 26 le ndi a téé jo lipubhaga, a pubus jo ni malép ma bañga i Nyambe, 27 inyu boñ le nyemede a tehe le likoda li mbai, li ban-ga bé to liton li mahindi, to manyeda, to mintén mi mam kiki mi, ndi li bak lipubhaga ni ngi mahindi.

28 Hala nyen yak balôm ba nlama gwés baa bap kiki manyuu map momede. Ibale munlôm a ngwés nwaa, wee a ngwés nyemede, 29 inyule mut to wada a ma oo bé nyuu yé nyemede;* ndi a njés yo, a tôñglak ki yo, kiki Kristô a mboñ inyu likoda, 30 inyule di yé bijô bi nyuu yé. 31 “Inyu hala nyen munlôm a’ yék isañ bo nyañ, a adbe* nwaa wé kayéle bo iba b’a ba nsôn wada.” 32 I jimb lipubi lini li yé likeñi. Ndi me yé i pôdôl inyu Kristô ni likoda. 33 To hala, hiki wada nan a nlama gwés nwaa wé kiki nyemede; ndi yak nwaa a nlama ti nlô wé njôôñ lipém.

6 A boñge, nôglana bagwal banan ikété adna ni Nwet, inyule hala a téé sép. 2 “Ti isoñ bo nyuñ lipém,” hala a yé mbén bisu lôñni mbônga le: 3 “Inyu boñ le mam ma ke loñge inyu yoñ,* u nom ki ntandaa ngéda hana ’isi.” 4 A basañ, ni hombok bañ bon banan, ndi kena ni bisu i néñés bo ikété biniigana ni mabéhna* ma Yéhôva.*

5 A minkol, nôglana bet banan hana ’isi,* ni konok woñi, ni sehlaga, ni boñok hala ni miñem minan nwominsôna wengoñle inyu Kristô; 6 ni boñ ndik bañ hala ngéda ba ntehe bé inyu lémél bôt,* ndi kiki minkol mi Kristô mi mi mboñ sômbôl i Nyambe ni ñem* wap wonsôna. 7 Ni salak kiki minkol lôñni mahoñol malam wengoñle inyu Yéhôva,* ndi ha inyu bôt ba binam bé, 8 inyule ni nyi le hiki loñge jam mut a mboñ, Yéhôva* nyen a’ timbhe nye jo, to a yé nkol, to a ta bé nkol. 9 A bet, yak bé boña nlélém jam inyu yap, ni han bañ, inyule ni nyi le bé ni bo ni gwé nlélém Nwet nu a yé i ngii, a ntodol bé ki to mut nye ki nye.

10 Kiki jam li nsôk, kena ni bisu i bana ngui i nlôl yak Nwet ni ikété lipémba li ngui yé. 11 Ni haba bijôl bi gwét gwobisôna bi bi nlôl yak Nyambe inyu boñ le ni la telep siñ ikolba dipa* di Nsohop; 12 inyule di njôs* bé minsôn ni matjél, ndi di njôs bangomin, baane, basañnkoñ ba jiibe lini, mintôñ mi mimbuu mimbe mi mi yéne i ngii. 13 Inyu hala nyen yoña bijôl bi gwét gwobisôna bi bi nlôl yak Nyambe, le ndi ni la hônba i hilo hibe, ni le ngéda ni mal boñ mam momasôna, ni telep siñ.

14 Jon telbana siñ, ni ngôli i maliga ntéñék i bôbôk, ni bak ni hééba ben tôl i telepsép, 15 makôô manan ma ban-ga bitamb le ndi ni ba nkôôbaga i añal ñañ nlam u nsañ. 16 Handugi mam mana momasôna, yoña ben keñi i hémle, yon n’a gwélél inyu lém makoñ* ma hié ma mut mbe momasôna. 17 Neebana yak kôñgô* i tohi lôñni pansoñ i mbuu, hala wee bañga i Nyambe, 18 ni soohege ngéda yosôna ni njel mbuu lôñni mintén mi masoohe nwominsôna ni minyemhe. Jon yéna péé, ni yemhege hiki ngéda inyu bapubhaga bobasôna. 19 Soohana Yak inyu yem, le ndi me kôhna bibuk ngéda me nyibil nyo kayéle me la pot ni makénd i yis bôt jimb lipubi li ñañ nlam, 20 ni le me la pot inyu ñañ nlam ni makénd kiki i nsômbla; ngo inyu ñañ nlam nyen me yéne nkenwin, me bak ki nkañak ni minsañ mi bikei.

21 Nano, inyu boñ le ni yi kii me yé i boñ ni lelaa me yé, Tikikô, mankéé nugwéha ni ngwelnson nu maliga ikété adna ni Nwet, a’ yis bé mam momasôna. 22 Inyu hala yaga nyen me yé i ep nye i bééni, le ndi ni yi lelaa di yé, a ti ki miñem minan hogbe.

23 Nsañ ni gwéha ni hémle bi bi nlôl yak Nyambe Tata ni yak Nwet le Yésu Kristô bi ba ni lôk kéé. 24 Konangoo i mbuma ñañ i ba ni bôt bobasôna ba ba ngwés Nwet wés Yésu Kristô ni gwéha i i mal bé.