KAAT I NYÔNÔS AA I YÔHANES

1 Me mañ mut,* me ntilna nugwéha le Gayô, nu me ngwés toi.

2 A nugwéha, me nsoohe le mam momasôna ma kônde ke we loñge, ni le u ba mbôô, ndik kiki u yé nano. 3 Inyule me bi kon maséé iloo hihéga i ngéda lôk kéé i bi lo, i bok mbôgi le u ntéñbe ni maliga, kiki u nke ni bisu i kil ikété maliga.+ 4 Me gwé bé maséé* mape ma ma nloo mana le: me nok le bon bem ba ntéñbe i kil ikété maliga.+

5 A nugwéha, u ñunda maliga moñ ikété mam u mbôñôl lôk kéé, to hala kiki ba yéne we bakén.+ 6 Ba bi bok mbôgi inyu gwéha yoñ i bisu bi likoda. Soho, huuha bo mu njel yap i nya i nlémél Nyambe.+ 7 Inyule inyu jôl jé nyen ba bi nyodi, ba yoñ bé yom to yada+ yak bôt ba matén. 8 Jon di yé nyégsaga i leege i nya bôt ini loñge,+ inyu boñ le di yila baso bagwelnson ikété maliga.+

9 Me bi tilna likoda ngim jam, ndi Diôtréfé nu a ngwés yééne i bisu ipôla yap,+ a neebe bé yom yo ki yo i nlôl i béhni lôñni lipém.+ 10 Inyu hala nyen ibale me nlo, m’a yelel minson a mboñ, kiki a ñôbôs bés jôl homa nyensôna.*+ Ndi a nsôk bé ha, a ntjél leege lôk kéé+ lôñni lipém; yak i bôt ba nsômbôl leege bo, a noode kéñ bo njel, a noodege ki pémés bo i likoda.

11 A nugwéha, u nigle bañ mam mabe, ndi nigle mam malam.+ I mut a mboñ loñge a nlôl ni Nyambe,+ i mut a mboñ béba a bi tehe bé Nyambe.+ 12 Lôk kéé yosôna i mbok mbôgi ilam inyu Démétriô, yak maliga momede ma mbok mbôgi ilam inyu yé. Ni maliga, yak bés di mbok mbôgi inyu yé, u nyi ki le mbôgi di mbok i yé maliga.

13 Me bak me gwé ngandak mam i tilna we, ndi me nsômbôl bé ke ni bisu i tilna we ni saô lôñni tinti. 14 Ndi me mbot ñem le m’a tehe we ndék ngéda, ni le d’a kwel i mbombom.

Nsañ u ba ni we.

Mawanda ma nyéga we. Yak we yégna me mawanda, hiki wada ni jôl jé.