KAAT BISU I YÔHANES

1 I jam li bé ibôdôl i bibôdle, li di bi emble, di tehe jo ni mis més, di tibil béñge jo, yak moo més ma tihba jo, hala wee bañga i niñ,+ 2 (ñ, niñ boga i bi yeli, di tehe ki yo, di mbôgôl yo mbôgi,+ di añlege ki bé niñ boga+ i i bé ni Tata, yon ba bi yeelene bés), 3 i jam di bi tehe ni nok, jon yak bés di yé i añle bé,+ inyu boñ le yak bé ni bana adna* ni bés. I adna ini di gwé, i yé lôñni Tata bo Man wé Yésu Kristô.+ 4 Di ntila i mam mana inyu boñ le maséé més ma ba nyonok.

5 I nwin unu won di bi nôgôl i nyeni, won di ñañle bé le: Nyambe a yé mapubi,+ jiibe jo ki jo li ta bé ikété yé.* 6 Ibale di nkal le: “Di gwé adna ni nye,” ndi di kôndge ki kil ikété jiibe, wee di ntembee, di niñ bé to inoñnaga ni maliga.+ 7 Ndi ibale di yé i kil ikété mapubi kiki nyemede a yé ikété mapubi, wee di gwé toi adna bés ni bés, yak matjél ma Man wé Yésu ma mpubus bés inyu bibéba gwobisôna.+

8 Ibale di nkal le: “Di gwé bé béba,” wee di yé i lôk bésbomede,+ to maliga ma ta bé ikété yés. 9 Ibale di mpahal bibéba gwés, a yé maliga, a téé ki sép inyu nwéhél bés bibéba gwés ni pubus bés inyu ngitelepsép yosôna.+ 10 Ibale di nkal le: “Di bi boñ bé béba,” wee di nyilha nye mut bitembee, to bañga yé i ta bé ikété yés.

2 A bon bem batitigi, me ntilna bé i mam mana inyu boñ le ni boñ bañ béba. Ndi ibale mut a mboñ toi béba, di gwé nhôla* yak Tata, mut a téé sép+ le Yésu Kristô.+ 2 A yé sesema inyu kôp nsañ*+ inyu bibéba gwés,+ ha inyu bibéba gwés gwotama bé, ndi yak inyu bi nkoñ ’isi wonsôna.+ 3 Ni njel ini nyen di nyi le di bi pam i yi nye, hala wee ibale di nke ni bisu i nôgôl mambén mé. 4 I mut a nkal le: “Me mpam i yi nye,” ndi a nôgôl bé mambén mé, a yé mut bitembee, to maliga ma ta bé ikété yé. 5 Ndi nu ni nu a nôgôl bañga yé, gwéha Nyambe i yôni+ toi ikété mut nu. Ni njel ini nyen di nyi le di yé ikété adna ni nye.+ 6 I mut a nkal le a ntéñbe ikété adna ni nye, nyemede a yé nyégsaga i kônde niñ nlélém kiki yak Yésu a bi niñ.*+

7 A bagwéha, me ntilna bé me bé mbén mondo, ndi me ntilna bé nlômbi mbén ni bi kôhna ibôdôl i bibôdle.+ I bañga ni bi nok yon i yé i nlômbi mbén unu. 8 Me nkônde ki le, me yé i tilna bé mbén mondo i i yé maliga inyu yé, i bak ki maliga inyu nan, inyule jiibe li yé i tagbe, yak bañga mapubi i mal bôdôl bai.+

9 I mut a nkal le a yé ikété mapubi, ndi a ook+ maasañ, wee a ngi yii ikété jiibe.+ 10 I mut a ngwés maasañ a ngi yii ikété mapubi,+ to ngok baagene i ta bé inyu yé. 11 Ndi i mut a ñoo maasañ a yé ikété jiibe, a nkil ki ikété jiibe,+ a nyi bé to i homa a nke+ inyule jiibe li nkwés mis mé ndim.

12 Me yé i tilna bé, a boñge batitigi, inyule bibéba binan bi mal nwéhlana inyu jôl jé.+ 13 Me yé i tilna bé, a basañ, inyule ni bi pam i yi nu a yé ibôdôl i bibôdle. Me yé i tilna bé, a boñge ba wanda, inyule ni bi yémbél mut mbe.+ Me ntilna bé, a boñge batitigi, inyule ni bi pam i yi Tata.+ 14 Me ntilna bé, a basañ, inyule ni bi pam i yi nu a yé ibôdôl i bibôdle. Me ntilna bé, a boñge ba wanda, inyule ni gwé ngui,+ ni le bañga i Nyambe i ngi yii ikété nan,+ ni bi yémbél ki mut mbe.+

15 Ni gwés bañ nkoñ ’isi,+ to i mam ma yé ikété nkoñ ’isi. Ibale mut a ngwés nkoñ ’isi, gwéha inyu Tata i ta bé ikété yé;+ 16 inyule i mam momasôna ma yé ikété nkoñ ’isi, kiki bo minheña mi minsôn,+ ni minheña mi mis,+ ni libambal bigwel moo bi niñ* inyu nene, bi nlôl bé yak Tata ndi bi nlôl i nkoñ ’isi. 17 Handugi hala, nkoñ ’isi u yé i tagbe, yak minheña nwé,+ ndi i mut a mboñ sômbôl i Nyambe a ga niñ* i boga ni boga.+

18 A boñge ba wanda, ngeñ i nsôk ini, ndik kiki ni bi nok le nkolba-Kristô a yé i lo,+ hala nyen to nano yaga ngandak bakolba-Kristô i nene,+ i jam lini jon li nyis bés le ngeñ i nsôk ini. 19 Ba bi pémél i béhni, ndi ba bé bé kiki bés;*+ ibale ba ba kiki bés, ki ba bi yégle lôñni bés. Ndi ba bi ke inyu boñ le i yiba le bôt bobasôna bé bon ba yé kiki bés.+ 20 Libak linan li minhook li nlôl yak Numpubi,+ bébobasôna ni gwé ki yi. 21 Me ntilna bé, ha inyu bé le ni nyi bé maliga,+ ndi inyule ni nyi mo, ni inyule tembee yo ki yo i nlôl bé i maliga.+

22 Njee a yé mut bitembee, handugi nu a ntañ le Yésu a yé Kristô?+ Nyen a yé nkolba-Kristô,+ nyen a ntañba Tata ni Man. 23 I mut a ntañba Man, wee to Tata a gwé bé.+ Ndi nu ni nu a neebe Man+ a gwé yak Tata.+ 24 Ndi i mam bé ni bi nok ibôdôl i bibôdle ma nlama yén ikété nan. Ibale mam ni bi nok ibôdôl i bibôdle ma nyén ikété nan,+ wee yak bé n’a yén ikété adna lôñni Man ni ikété adna lôñni Isañ. 25 Handugi hala, i jam lini jon nyemede a bi bôn bés: niñ boga.+

26 Me ntila i mam mana inyu nan, le me béhe bé inyu bôt ba noode yumus bé. 27 Ndi libak le a bi hoo bé li yii ikété nan,+ ni gwé bé to le mut a niiga bé; ndi libak le a bi hoo bé li yé i niiga bé mam momasôna,+ li yé maliga, li ta bé bitembee. Kiki li bi niiga bé, yéna ikété adna lôñni nye.+ 28 Jon nano, a boñge batitigi, yéna ikété adna lôñni nye inyu boñ le i ngéda a’ nene, di bana makénd i pot,+ di ke bañ to nye haa inyu wonyuu i ngéda a mba ha. 29 Ibale ni nyi le a téé sép, wee ni nyi ki le i mut a gwé lem i boñ mam ma téé sép a yé man wé.*+

3 Béñgnana umbe ntén gwéha Tata a bi unda bés,+ le di séblana le bon ba Nyambe!+ Hala ki nyen di yé. Inyu hala nyen nkoñ ’isi u nyi bé bés,+ inyule u bi pam bé to i yi nye.+ 2 A bagwéha, nano di yé bon ba Nyambe,+ ndi i yom di ga ba i yé ngi yeelana.+ Di nyi le i ngéda a’ nene, di ga ba kiki nye inyule di ga tehe yaga nye kiki a yé. 3 Yak i mut a gwé i botñem ini ikété yé a mpubus nyemede,+ nlélém kiki yak nye a yé mpubi.

4 I mut a gwé lem i boñ béba, wee a gwé yak lem i yan mbén, inyule béba i yé liyanmbén. 5 Ni nyi ki le a bi nene inyu héya bibéba gwés,+ to béba yo ki yo i ta bé ikété yé. 6 I mut a nyégle ikété adna lôñni nye a gwé bé lem i boñ béba;+ i mut a gwé lem i boñ béba a bi tehe bé nye, a bi pam bé to i yi nye. 7 A boñge batitigi, mut to wada a yumus bañ bé; i mut a gwé lem i boñ mam ma téé sép a téé sép, nlélém kiki yak nye a téé sép. 8 I mut a gwé lem i boñ béba a nlôl yak Nsohop, inyule Nsohop a mboñ béba ibôdôl i bibôdle.*+ Inyu njom ini nyen Man Nyambe a bi lo,* le a tjé* minson mi Nsohop.+

9 I mut a yé man Nyambe a gwé bé lem i boñ béba,+ inyule mbôô* i Nyambe i nyén ikété nya mut ini, a nla bé to bana lem i boñ béba inyule a yé man Nyambe.+ 10 Bon ba Nyambe ni bon ba Nsohop ba nyiba munu jam lini le: nu ni nu a gwé bé lem i boñ mam ma téé sép a nlôl bé yak Nyambe, to nu a ngwés bé maasañ.+ 11 Inyule i nwin unu won ni bi nok ibôdôl i bibôdle: le di nlama gwéhna bés ni bés,+ 12 ndi di ba bañ kiki Kain, nu a bi lôl yak mut mbe, a nol ki manyañ.+ Ndi inyuki a bi nôlôl nye? Inyule minson nwé nwomede mi bé mimbe,+ ndi mi manyañ mi bé mi téé sép.+

13 A lôk kéé, ni hel bañ le nkoñ ’isi u ñoo bé.+ 14 Di nyi le di mal nyodi i nyemb, di témb i niñ,+ inyule di ngwés lôk kéé.+ I mut a gwé bé gwéha a nyégle ikété nyemb.+ 15 I mut a ñoo maasañ a yé mut manola,*+ ndi ni nyi le mut manola nye ki nye a ga bana bé niñ boga.+ 16 Ni njel ini nyen di bi pam i yi gwéha, inyule Yésu Kristô a bi sem niñ* yé inyu yés,+ yak bés di yé nyégsaga i sem biniñ* gwés inyu lôk kéé yés.+ 17 Ndi nu ni nu a gwé bigwel moo bi nkoñ ’isi unu, a tehge maasañ a gwé ngôñ ni mahôla, ndi a tjél kon nye ngoo, lelaa gwéha Nyambe i nyén ikété yé?+ 18 A boñge batitigi, di nlama ndik bé gwéhna ni nyo to ni bibuk,*+ ndi yak ni maboñok+ lôñni maliga.+

19 Ni njel ini nyen d’a yi le di nlôl i maliga, di mômôs ki miñem nwés nwee* i bisu gwé 20 inyu to limbe jam miñem nwés mi yé le mi ôm bés nsohi, inyule Nyambe a nloo miñem nwés, a nyi ki mam momasôna.+ 21 A bagwéha, ibale miñem nwés mi ñôm bé bés nsohi, wee di gwé makénd i pot i bisu bi Nyambe;+ 22 ni le to limbe jam di mbat,+ a nti bés jo inyule di yé i nôgôl mambén mé, di boñok ki mam ma yé malam i mis mé. 23 Ni maliga, mbén yé ini le: di hémle jôl li Man wé Yésu Kristô,+ di gwéhna ki bés ni bés,+ inoñnaga ni mbén a bi ti bés. 24 Handugi hala, i mut a nôgôl mambén mé a nyégle ikété adna lôñni nye, yak nye a nyégle ikété adna lôñni nya mut ini.+ Ni njel mbuu a bi ti bés, di nyi le a nyégle ikété adna lôñni bés.+

4 A bagwéha, ni hémle bañ hiki lipôdôl li li nene wengoñle li nlôl yak Nyambe,*+ ndi wana i bipôdôl bi* inyu yi too bi nlôl toi yak Nyambe,+ inyule ngandak bapôdôl ba bitembee ba mal nene ikété nkoñ ’isi.+

2 Haana nyen ni nyi le lipôdôl* li nlôl yak Nyambe: hiki lipôdôl li neebe le Yésu Kristô a bi lo ni nyuu minsôn li nlôl yak Nyambe.+ 3 Ndi hiki lipôdôl* li neebe bé Yésu li nlôl bé yak Nyambe.+ Handugi hala, i lipôdôl lini li yé li nkolba-Kristô, i lipôdôl li jon ni bi nok le li yé i lo,+ nano li mal yaga lo ikété nkoñ ’isi.+

4 A boñge batitigi, ni nlôl yak Nyambe, ni bi yémbél+ ki bo inyule nu a yé ikété adna lôñni bé+ a nloo nu a yé ikété adna lôñni nkoñ ’isi.+ 5 Ba nlôl i nkoñ ’isi,+ jon ba mpot mam ma nlôl ni nkoñ ’isi, yak nkoñ ’isi u ñemble bo.+ 6 Bés di nlôl yak Nyambe. Nu ni nu a mpam i yi Nyambe a ñemble bés;+ nu ni nu a nlôl bé yak Nyambe a ñemble bé bés.+ Ni njel ini nyen di mboñ maselna ipôla lipôdôl li maliga ni lipôdôl li bitembee.*+

7 A bagwéha, di kee ni bisu i gwéhna bés ni bés+ inyule gwéha i nlôl yak Nyambe; ni le i mut a ngwés a yé man Nyambe, a nyi ki Nyambe.+ 8 Nu ni nu a ngwés bé, a mpam bé i yi Nyambe, inyule Nyambe a yé gwéha.+ 9 Ni njel ini nyen gwéha Nyambe i bi yeelana inyu yés le: Nyambe a bi ep mpom wé Man+ ikété nkoñ ’isi le ndi di kôhna niñ ni njel yé.+ 10 Gwéha munu jam lini i ta bé le di bi gwés Nyambe, ndi le a bi gwés bés, a ep ki Man wé kiki sesema inyu kôp nsañ*+ inyu bibéba gwés.+

11 A bagwéha, ibale hala nyen Nyambe a bi gwés bés, wee yak bés di yé nyégsaga i gwéhna bés ni bés.+ 12 Mut to wada a ma tehe bé Nyambe.+ Ibale di nke ni bisu i gwéhna bés ni bés, Nyambe a nyégle ikété yés, yak gwéha yé i mba ikété yés i nya i yôni.+ 13 Ni njel ini nyen di nyi le di nyégle ikété adna lôñni nye, yak nye a nyégle ikété adna lôñni bés, inyule a bi ti bés mbuu wé. 14 Jam lipe ki, bésbomede di bi tehe, di yé ki i bok mbôgi le Tata a bi ep Man wé le a ba ntohol nkoñ ’isi.+ 15 Nu ni nu a neebe le Yésu a yé Man Nyambe,+ Nyambe a nyégle ikété adna lôñni nya mut ini, yak nye a nyégle ikété adna lôñni Nyambe.+ 16 Di bi pam i yi, di hémle ki gwéha Nyambe a gwé inyu yés.+

Nyambe a yé gwéha,+ i mut a nyégle ikété gwéha a nyégle ki ikété adna lôñni Nyambe, yak Nyambe a nyégle ikété adna lôñni nye.+ 17 Ni njel ini nyen gwéha i bi ba ikété yés i nya i yôni, le ndi di pot ni makénd*+ i hilo hi bikééhene, inyule nlélém kiki nyemede* a yé, hala nyen yak bés di yé munu nkoñ ’isi unu. 18 Woñi wo ki wo u ta bé ikété gwéha,+ ndi gwéha i yôni i nleñ* woñi i mbégdé, inyule woñi u nkéñ bés njel. Ibabé pééna, i mut a nkon woñi a gwé bé gwéha i nya i yôni.+ 19 Di ngwés inyule a bi bôk a gwés bés.+

20 Ibale mut a nkal le: “Me ngwés Nyambe,” ndi a ook maasañ, wee a yé mut bitembee.+ Inyule i mut a ngwés bé maasañ+ nu a ntehe, a ta bé le a gwés Nyambe nu a ntehe bé.+ 21 Di gwé mbén ini i nlôl i nyeni le: nu ni nu a ngwés Nyambe a nlama yak gwés maasañ.+

5 I mut a nhémle le Yésu a yé Kristô, wee a ngwéé ni njel Nyambe;+ yak i mut a ngwés nu a ngwal, a ngwés ki man i mut nu a ngwal. 2 Hala nyen di nyi le di ngwés bon ba Nyambe,+ i ngéda di ngwés Nyambe, di nôglak ki mambén mé. 3 Inyule gwéha Nyambe ini le: di nôgôl mambén mé;+ ndi mambén mé ma nyét bé,+ 4 inyule i mut* a ngwéé ni njel Nyambe a nyémbél nkoñ ’isi.+ I jam lini jon li bi ti bés ngui i yémbél nkoñ ’isi: hémle yés.+

5 Njee a nla yémbél nkoñ ’isi?+ I mut a nhémle le Yésu a yé Man Nyambe, hala bé?+ 6 Yésu Kristô nyen a bi lo ni njel malép lôñni matjél, a bi lo bé ndik ni malép motama,+ ndi a bi lo ni malép lôñni matjél.+ Yak mbuu u mbok mbôgi+ inyule mbuu u yé maliga. 7 Inyule mam ma mbok mbôgi ma yé maa: 8 mbuu,+ ni malép,+ ni matjél;+ mana mo maa ma mbok nlélém mbôgi.

9 Ibale di neebe mbôgi i bôt ba binam, ngo mbôgi i Nyambe i nloo yo. Inyule ini mbôgi yon Nyambe a mbok, mbôgi a bi bok inyu Man wé. 10 I mut a nhémle Man Nyambe, a gwé mbôgi ikété yé nyemede. I mut a nhémle bé Nyambe, wee a nyilha nye mut bitembee+ inyule a nhémle bé mbôgi Nyambe a bi bok inyu Man wé. 11 I mbôgi ini i yé le: Nyambe a bi ti bés niñ boga,+ i niñ ini i yé ikété Man wé.+ 12 I mut a gwé Man, a gwé i niñ ini; i mut a gwé bé Man Nyambe, a gwé bé i niñ ini.+

13 Me ntilna bé i mam mana inyu boñ le ni yi le ni gwé niñ boga,+ bé ba ni nhémle jôl li Man Nyambe.+ 14 Ndi i botñem* ini yon di gwé inyu yé,+ le to kinje jam di mbat inoñnaga ni sômbôl yé, a ñemble bés.+ 15 Ibale di nyi le a ñemble bés inyu to kinje jam di yé i bat, di nyi ki le d’a bana i mam di mbat inyule di bi bat nye mo.+

16 Ibale mut a ntehe maasañ a yé i boñ béba i i kôli bé ni nyemb, a ga soohe inyu yé, yak Nyambe a’ ti maasañ niñ;+ ñ, hala a yé inyu bôt ba ba mboñ béba i i kôli bé ni nyemb.+ Ndi béba yada i yé le i kôli ni nyemb. Me mbat bé mut nye ki nye le a soohe inyu ntén béba unu. 17 Ngitelepsép yosôna i yé béba,+ ndi béba yada i yé le i kôli bé ni nyemb.

18 Di nyi le i mut a ngwéé ni njel Nyambe a gwé bé lem i boñ béba, ndi Man Nyambe* a ntat nye, to mut mbe a nla bé tihba nye.*+ 19 Di nyi le di nlôl yak Nyambe, ndi nkoñ ’isi wonsôna u yé isi ane i mut mbe.+ 20 Ndi di nyi le Man Nyambe a bi lo,+ a ti ki bés pék,* le ndi di bana yi i nu a yé maliga. Di yé ikété adna lôñni nu a yé maliga+ ni njel Man wé Yésu Kristô. Nyen a yé bañga Nyambe, a yé ki niñ boga.+ 21 A boñge batitigi, yoña yihe ni bisat.+