KAAT I NYÔNÔS IBA I PÉTRÔ

1 Me Simôn Pétrô, nkol ni ñôma nu Yésu Kristô, me ntilna i bôt ba bi kôhna nlélém tik hémle kiki bés* ni njel telepsép i Nyambe wés ni i Ntohol le Yésu Kristô:

2 Konangoo i mbuma ñan lôñni nsañ bi bôl i ngii nan ni njel bañga yi+ i Nyambe ni i Nwet wés Yésu, 3 inyule lipémba jé li Nyambe li mal ti bés mam momasôna ma mbéda bés inyu niñ ni inyu téñbe i gwélél Nyambe ni njel bañga yi i Nu a bi sébél bés+ ni njel lipém jé nyemede ni libak jé lilam. 4 Ni njel i mam mana nyen a bi ti bés mimbônga+ mi mi yé tik, mi bak ki minkeñi iloo hihéga, kayéle ni njel yap nyen ni nla yila bayoñngaba i libak li Nyambe,+ hala kiki di bi pei maboñok mabe ma nkoñ ’isi ma ma nlôl i ngôñ ibe.*

5 Inyu njom yaga ini nyen boña biliya+ binan gwobisôna le mu hémle nan ni kônde libak lilam,+ mu libak lilam linan ni kônde yi,+ 6 mu yi nan ni kônde hôtnyuu, mu hôtnyuu+ nan ni kônde hônba, mu hônba nan ni kônde ndéñbe i gwélél Nyambe,+ 7 mu ndéñbe nan i gwélél Nyambe ni kônde gwéha lisañ li bôt, mu gwéha nan lisañ li bôt ni kônde gwéha.+ 8 Inyule ibale ni gwé i mam mana, ma bôlôk ki, ma ga kéñ bé njel le ni ba bôt ba nwaa gwel nson, tole bôt ba ba num bé matam*+ inoñnaga ni bañga yi i Nwet wés Yésu Kristô.

9 Inyule i mut a gwé bé i mam mana, wee a yé ndim, a nyip mis le a tehe bañ mapubi,*+ a nhôya ki le a bi pubhana ni bibéba+ gwé bi kôba. 10 Jon, a lôk kéé, boña biliya binan gwobisôna le nsébla+ nan ni nteba nan bi ba yaga ntiik inyu bébomede, inyule ibale ni ntéñbe i boñ i mam mana, n’a kwo yaga bé+ kekikel. 11 Ni maliga, ni njel ini nyen n’a jôp ni ngandak lipém* i Ane+ boga i Nwet wés ni Ntohol wés Yésu Kristô.+

12 Inyu njom ini nyen me gwé ngôñ i hôñlaha bé i mam mana ngéda yosôna, to hala kiki ni nyi mo, ni bak ni téé yaga siñ siñ ikété maliga ni nyi. 13 Ndi me ntehe le hala a téé sép le ntel wonsôna me yé munu lap*+ ini, me hôñlaha+ bé i mam mana inyu ti bé makénd, 14 ni yik kiki me le ndék ngéda wee ba nhéya me lap yem, ndik kiki yak Nwet wés Yésu Kristô a bi tibil yaga yis me.+ 15 M’a boñ biliya gwem gwobisôna le i mbus maké mem, ni pam i hoñol* i mam mana bébomede.

16 To, di bi noñ bé miñañ mi bitembee bôt ba binam ba mbot ni mandon inyu yis bé ngui i Nwet wés Yésu Kristô ni ngéda a mba ha, ndi di bi tehe lipémba+ jé ni mis més. 17 Inyule Nyambe Tata a bi ti nye lipém ni bibégés i ngéda a bi nok bibañga bini* ni njel lipém likeñi le: “Man wem nunu, Man wem nu gwéha, nyen a nlémél me.”+ 18 Ñ, di bi nok bibañga bini, bi lôlak i ngii i ngéda di bé lôñni nye nyoo hikôa hipubhaga.

19 Jon di gwé bibañga bi bapôdôl bi bi nkônde yaga yila ntiik, ni mboñ ki loñge hala kiki ni mbok mahoñol manan mu; bi yé wengoñle lambe+ i i nloñ i homa jiibe, hala wee ikété miñem minan (letee kel i ye, yak hiôdôt hi maye ma kel+ hi pam). 20 Inyule kiki jam li bisu, ni nyi le mbañ i Bitilna yo ki yo i nlôl bé ni ndoñi i mut binam. 21 Inyule mbañ i bi lôl bé kel to yada ni sômbôl+ i mut binam, ndi bôt ba bi pot mam ma nlôl yak Nyambe mu kiki mbuu mpubi+ u bé éga* bo.

2 Ndi yak bapôdôl ba bitembee ba bé ikété litén, hala ki nyen baniiga ba bitembee b’a ba ikété nan.+ Bisôsôli, b’a jubus mintôñ mi mbagla mi mi nkena i tjiba, b’a tañba yak nwet nu a bi somb bo,+ ba pala ki lona bomede tjiba. 2 Jam lipe ki, ngandak bôt y’a noñ ki bo ikété maboñok map mabe ngi wonyuu,*+ inyu yap nyen bôt b’a pôdôl njel maliga béba.+ 3 Handugi hala, ni huluk ñem, ba ga pôh bé lôñni bibañga bi malôga. Ndi mbagi yap i i bi pam kôba,+ i ntiñha bé, to tjiba yap i nke bé ’ilo.+

4 Nyambe a bi tjél bé kogse biañgel bi bi boñ béba,+ ndi a bi leñ gwo ikété Tartarô,*+ a ha gwo minsañ mi bikei* mi jiibe likeñi inyu boñ le bi ba ntéédaga inyu mbagi.+ 5 A bi tjél bé to kogse nlômbi nkoñ ’isi,+ ndi a sôñ ñañal telepsép+ le Nôa lôñni bôt basaambok bape+ i ngéda a bi lona ntida malép ikété nkoñ ’isi u bôt ba nyan Nyambe.+ 6 Yak bitison bi Sôdôm ni Gômôra, a bi yilha gwo libu i ngéda a bi pémhene gwo mbagi nôgôs,+ le inyu bayan Nyambe, hala a ba ndémbél i mam m’a yik lo.+ 7 A sôñ yak mut a téé sép le Lôt,+ nu maboñok mabe ngi wonyuu* ma bôt ba nyan mbén ma bé tééñga i ñem, 8 inyule maboñok mabe ma bôt ba ba nwo bé nyuu le mut a téé sép nunu a bé tehe, a nogok i ngéda a bé yééne ipôla yap, ma bé tééñga ñem* wé u téé sép hiki kel. 9 Jon, Yéhôva* a nyi sôñ bôt ba ntéñbe i gwés nye ikété manoodana,+ ndi a nyi ki tééda bôt ba téé bé sép le ba tjiba* i kel mbagi,+ 10 téntén i bôt ba nyéñ hindis minsôn mi bôt bape+ ni ba ba nyan i bôt ba gwé énél.*+

Ba yé bôt ba lipamal ni bôt ba ño mbe, ba nkon bé woñi i pôdôl bôt ba gwé lipém béba, 11 ki le to hala kiki biañgel bi nloo bo ngui ni lipémba, bi ñôm bé bo nsohi ni bibuk bibe, inyu lipém bi nti* Yéhôva.*+ 12 Ndi i bôt bana ba mpot mam ba nyi bé béba, ba yé kiki binuga bi bi gwé bé yi, bi bi mboñ ndik mam inoñnaga ni kiki bi bi héga, bi bi gwéé* le ba gwel gwo, ba nol ki gwo.+ Njel yap tjiba yomede yon y’a lona i bôt bana tjiba, 13 njôghe ba nok i yé nsaa u béba yap niñ.

Ba nhoñol le i tuk niñ+ yak njamuha yon i yé bañga maséé. Ba yé kiki maton ma mahindi ni dibôlô, ba nkon maséé ngandak* ni biniigana gwap bi malôga, ndi ba jek lôñni bé i mangand.+ 14 Ba gwé mis ma ma yé nyonok ni ndéñg,+ ba nla bé to waa boñ béba, ba nlop bôt* ba gwé hémle i ntomb.* Ba gwé miñem mi mi bi nigil tama. Ba yé mintiihege mi bon. 15 Hala kiki ba bi tjôô njel i téé sép, ba bi yôm. Ba noñ njel Balam,+ man Béor nu a bi gwés nsaa u mam mabe,+ 16 ndi a kôhna bikodlene inyule nyemede a bi boñ jam li téé bé sép.+ Nuga nson i i nla bé pot i bi pôdôs nye ni kiñ i mut binam, i kéñ maboñok ma njék ma mpôdôl nunu.+

17 Ba yé mangen ma gwé bé malép, ba yé ond mbuk mbebi i nyuge, bañga bañga jiibe yon i mbem bo.+ 18 Ba mpot biyôglô bi mam ni kiñ ikeñi. Ba ngwélél minheña mi minsôn+ ni maboñok mabe ngi wonyuu* inyu lop ba ba ntip pei i moo ma bôt ba niñ ikété hihôha.+ 19 Ba mbôn bo kunde, ndi ki le bomede ba yé minkol mi béba;+ inyule ibale ngim mut i nyémbél mut numpe, wee nunu a nyila nkol wé.*+ 20 Ibabé pééna, ibale ba bi pei mahindi ma nkoñ ’isi+ ni njel bañga yi i Nwet ni Ntohol le Yésu Kristô, ndi ba tiimba ki yoñ ngaba mu minlélém mi mam kayéle mi yémbél bo, wee libak jap li nsôk li nyila béba inyu yap iloo li bisu.+ 21 I bak nseñ inyu yap le ba bana bañ bañga yi i njel telepsép, iloole i ngéda ba mal yi yo, ba témb ba kôm mbén pubi ba bi kôhna mbus.+ 22 Wee maliga ma ngén ini ma nyônôl bo le: “Ngwo i ntémb i je bilôô gwé, yak ñin ngôi ba bi nugus u ntémb u booba* ndobo.”+

3 A bagwéha, kaat i nyônôs iba ini le me ntilna bé; kiki ikété kaat yem bisu, me mbigdaha bé ngim mam mukété inyu tôdôl mahoñol manan, + 2 le ni hoñol mam* bapôdôl bapubhaga ba bi bôk pot; ni hoñol ki mbén i Nwet ni Ntohol, yon ni bi nok ni njel baôma banan. 3 Yina kiki jam li bisu le i dilo di nsôk, banol bôt hiol ba ga lo ni hiol hiap, ba boñok mam kiki ñem u ntinde bo,+ 4 ba kalak le: “A bi bôn le a mba ha, a yé ni hee?+ Ngo ibôdôl i kel basôgôlsôgôl bés ba bi ke ’ilo ikété nyemb, mam momasôna ma yé yaga ndik nlélém kiki ma bé ibôdôl nu nkoñ ’isi u bi héga.”+

5 Inyule ba nkôôba tjél neebe i jam lini le: ni njel bañga i Nyambe nyen ngii i bé ibôdôl kôba ni kwañ, yak hisi hi pémél malép, hi tééba siñ siñ i ñemkété malép;+ 6 ni le ni njel i mam mana nyen nkoñ ’isi ha ngéda i u bi tjiba mu kiki malép ma bi hô hisi.+ 7 Ndi ni njel nlélém bañga nyen ngii ni hisi bi bi yé hanano, bi yé nkôôbaga inyu hié, bi bak ki ntéédaga letee ni i kel mbagi ni i kel tjiba i bôt ba nyan Nyambe.+

8 Ndi, a bagwéha, ni hôya bañ i jam lini le, inyu Yéhôva,* hilo hiada hi yé kiki hikôô hi nwii, yak hikôô hi nwii hi bak kiki hilo hiada.+ 9 Yéhôva* a ntiñha bé inyu mbônga wé,+ kiki bôt bahogi ba nhoñol le a ntiñha, ndi a ñunda bé wongut inyule a nsômbôl bé le mut nye ki nye a tjiba, ndi a nsômbôl le bôt bobasôna ba pam i hiel miñem.+ 10 Ndi hilo+ hi Yéhôva* hi ga lo kiki mut wip,+ yokel nyen ngii i ga tagbe+ lôñni mbimba ikeñi,* ndi gwom bi ngii ni bi hisi gw’a lék kiyaga kayéle bi nyimbi, yak hisi ni i gwom bi yé mukété bi yeli.+

11 Kiki hala nyen i mam mana momasôna ma nlama nyimbi, hega pék inyu yi mimbe mintén mi bôt ni nlama ba ikété bihiumul bipubhaga ni maboñok ma ndéñbe i gwés Nyambe, 12 ni bemek i ngéda hilo hi Yéhôva*+ hi mba ha, ni téédaga ki hio ikété mahoñol* ngéda yosôna; ni njel hilo hi nyen ngii y’a tjiba+ ikété hié, yak gwom bi ngii ni bi hisi bi ga nyimbi ikété lék ikeñi! 13 Ndi inoñnaga ni mbônga wé,+ bés di mbem ngii yondo ni hisi hi yondo, mu nyen telepsép y’a bane.+

14 Jon, a bagwéha, hala kiki ni mbem i mam mana, boña biliya binan gwobisôna le i lisuk, ni lébna le ni gwé bé to liton li mahindi, to hibôlô, ndi le ni yé ikété nsañ.+ 15 Handugi hala, yoña wongut i Nwet wés kiki tohi, kiki yak mankéé wés nu gwéha le Paul a bi tilna bé inoñnaga ni pék i bi tina nye,+ 16 a podok i mam mana kiki a mbéna boñ ikété bikaat gwé gwobisôna. Ndi ngim mam mukété i nlet i nok, i mam ma mon bôt ba ngiyi* ni bôt ba gwé hémle i ntomb* ba nkena nkoda, hala ki nyen ba mboñ ni bini Bitilna bipe, inyu tjiba yap bomede.

17 Jon, a bagwéha, hala kiki bé ni nyi i mam mana i bisu bi ngéda, yoña yihe le ni yôm bañ lôñni bo mu hihôha hi bôt ba nyan mbén, kayéle bébomede ni bana ha bé makôô isi.*+ 18 To, ndi kena ni bisu i hol ikété konangoo i mbuma ñañ ni ikété yi i Nwet wés ni Ntohol le Yésu Kristô. Lipém li ba ni nye nano letee ni i hilo hi boga. Amen.