KAAT I NYÔNÔS IBA PAUL A BI TILNA TIMÔTÉÔ

1 Me Paul, ñôma nu Kristô Yésu ni njel sômbôl i Nyambe inoñnaga ni mbônga u niñ u u yé ni njel Kristô Yésu,+ 2 me ntilna Timôtéô, man wem nu gwéha:+

konangoo i mbuma ñañ ni konangoo lôñni nsañ bi nlôl yak Nyambe Tata ni yak Kristô Yésu Nwet wés bi ba lôñni we.

3 Me nti Nyambe mayéga; inyu yé nyen me ngwel nson mpubhaga lôñni kiññem i mpôp, kiki yak basôgôlsôgôl bem ba bi boñ; kekikel me nwaa bé to hoñol we ikété minyemhe nwem juu ni njamuha. 4 Ngo i ngéda me nhoñol gwiiha gwoñ, me gwé ngôñ ikeñi i tehe we inyu boñ le me ba nyonok ni maséé. 5 Inyule me nhoñol hémle yoñ+ i i gwé bé bihéñba, yon majô moñ* Lôis ni nyuñ Euniké ba bi bôk ba bana; me yé ki nkwoog nkaa le yon yak we u gwé.

6 Inyu njom ini nyen me mbigdaha we le, i likébla Nyambe a bi ti we i ngéda me bi kéhi moo mem i ngii yoñ,+ lôñôs jo kiki hié. 7 Inyule Nyambe a bi ti bé bés miñem* mi mbomb,+ ndi miñem mi ngui,+ mi gwéha ni mi liyi hek pék. 8 Jon u wo bañ nyuu i bok mbôgi inyu Nwet wés,+ to inyu me nu me yé mut mok inyu yé; ndi ba nkôôbaga i nihbe mandutu+ inyu ñañ nlam, u bôdlak ngui Nyambe ñem.+ 9 A bi tohol bés, a sébél ki bés lôñni nsébla mpubi,+ ha inyu minson nwés bé, ndi inyu bitééne gwé nyemede lôñni konangoo i mbuma ñañ.+ A bi ti bés i konangoo ini ni njel Kristô Yésu ibôdôl kôba ni kwañ; 10 ndi nano, i ntibil yaga nene ni njel masoola ma Ntohol wés Kristô Yésu,+ nu a bi mélés nyemb,+ a yeelene bés ni njel ñañ nlam+ lelaa di nla bana niñ+ lôñni nyuu i i mbol bé.+ 11 Inyu ñañ nlam u won me bi téébana ñañal ni ñôma ni nniiga.+

12 Inyu hala nyen yak me me nok ndutu inyu mam mana,+ ndi me nwo bé me nyuu.+ Inyule me nyi Nu me nhémle, me yé ki nkwoog nkaa le i jam me bi bôdôl nye ñem ndi me ti nye, a nla tééda jo letee ni kel i.+ 13 Téñbe yaga ni ndémbél* i bibañga bi maliga,*+ yon u bi nôgôl i meeni lôñni hémle ni gwéha bi bi nlôl ikété adna ni Kristô Yésu. 14 I jam ba bi bôdôl we ñem ndi ba ti we, tibil yaga tééda jo ni njel mbuu mpubi u u nyééne ikété yés.+

15 U nyi jam lini: le bôt bobasôna nyoo i pes mbok Asia+ ba bi kôm me mbus, yak Figélô bo Hérmôgéne. 16 Nwet a kônôl ndap lihaa i Ônésifôrô+ ngoo, inyule a bé béna ti me makénd; minsañ nwem mi mut mok mi bi wéha bé to nye nyuu. 17 Ndi i ngéda a bé i Rôma, a bi yéñ me ibabé waa, a léba me. 18 Nwet* a boñ le a léba konangoo i nlôl yak Yéhôva* i kel i. Yak we u ntibil yaga yi minson nwominsôna a bi gwel i Éfésô.

2 Jon we, a man wem,+ konangoo i mbuma ñañ i kônde ti we ngui ikété adna ni Kristô Yésu; 2 i mam u bi nôgôl i meeni, mam le ngandak mbôgi i bi nit,+ niiga mo bôt ba maliga, yak bo b’a bana ngap i nya i kôli inyu niiga bape. 3 Kiki bañga sônda+ i Kristô Yésu, ba nkôôbaga i hônba mandutu.+ 4 Mut to wada nu a ngwel nson u sônda a njôp bé* i manyuñga* ma niñ, le ndi a lémél nu a bi yoñ nye i nson sônda. 5 Yak i mintuk, i mut a nyoñ ngaba i mintuk, a nkôhna bé ntut handugi le a mélés mintuk inoñnaga ni matiñ.+ 6 Nsalnwom nu a ntumbba ni nson nyen a nlama ba mut bisu i kôhna yé ngaba matam. 7 Hoñol mam me nkal we ngéda yosôna; Nwet a’ ti we nogna* ikété mam momasôna.

8 Bigda le Yésu Kristô a bi tuge ikété bawoga,+ a bak mu mbôda* David,+ inoñnaga ni ñañ nlam me ñañal,+ 9 inyu ñañ nlam nyen me yé i nôgôl ndutu, me bak ki i mok kiki ntonba.+ Ndi bañga i Nyambe i ta bé nkañak.+ 10 Inyu njom ini nyen me nkônde hônba mam momasôna inyu mimpohlak,+ le ndi yak nwo mi pam i kôhna tohi i i yé ni njel Kristô Yésu, lôñni lipém li boga. 11 I lipôdôl lini li kôli le di bôdôl jo ñem: ibabé pééna, ibale di bi wo lôñni nye, wee d’a niñ ki lôñni nye;+ 12 ibale di nke ni bisu i hônba, wee yak bés d’a ba bikiñe lôñni nye;+ ndi ibale di ntañba nye, yak nye a’ tañba bés;+ 13 ibale di ta bé maliga, nye a ntéñbe i ba maliga, inyule a nla bé tañba nyemede.

14 Kee ni bisu i hôñlaha bo i mam mana, u niigaga bo* i bisu bi Nyambe le ba jo bañ bisañ inyu bibuk, hala a nhôla bé to yom; inyule i bôt ba ñemble, hala a mboñ bo béba.* 15 Boñ biliya gwoñ gwobisôna le wemede u telep i bisu bi Nyambe kiki mut nu a nlémél nye, ngwelnson nu a gwé bé jam li wonyuu jo ki jo, nu a ntoñol bañga i maliga ni likeñge.+ 16 Ndi tjél biyôglô bi minkwel bi bi nhindis i jam li yé lipubi,+ inyule hala a’ kônde ndik tinde bôt i yan Nyambe,* 17 yak bibañga gwap bi ga tjama kiki pos.* Himénéô bo Filétô ba yé ikété yap.+ 18 I bôt bana ba bi ke haa ni maliga, ba kalak le bitugne bi mal tagbe,+ ba yé ki i tjé hémle i bôt bahogi. 19 Ndi to hala, hikuu hi ngui hi Nyambe hi ngi umi siñ, hi ban-ga i béndél ini le: “Yéhôva* a nyi i bôt ba yé bé,”+ ni le: “Hiki mut a nsébél jôl li Yéhôva*+ a tjél ngitelepsép.”

20 Ndi ikété ndap ikeñi, biébél bi gôl ni bi silba gwotama bé gwon bi yé, ndi yak bi bikék ni bi biték; bihogi bi ngwéélana inyu bañga mam,* ndi bipe inyu gwañga bi mam.* 21 Jon ibale mut a nke haa ni biébél inyu gwañga bi mam, wee a’ ba sélél* inyu bañga mam; sélél i i nyila pubhaga, i bak nseñ inyu nwet wé, nkôôbaga inyu hiki nson nlam. 22 Jon kee minheña mi boñge ba wanda ngwéé, ndi noñ telepsép, hémle, gwéha, nsañ, lôñni bôt ba nsébél jôl li Nwet ni ñem u mpôp.

23 Ndi tjél pééna i bijôñ ni i ngiyi,+ u yik le i nlona ndik bisañ. 24 Inyule nkol u Nwet u gwé bé le u joo bisañ, ndi u nlama unda bôt bobasôna loñgeñem,*+ u yik niiga, u gwelek womede i ngéda ba mboñ wo béba,+ 25 u niigaga bôt ba ba gwé bé mahoñol malam ni ñemlima.+ Bebek Nyambe a’ ti bo hielñem* i i nkena i bañga yi i maliga,+ 26 le ño u yi bo jam, ba tohla ki i hiandi hi Nsohop, hala kiki a bi gwel bo yômi le ba boñ sômbôl yé.+

3 Ndi yi le, i dilo di nsôk,+ mangéda m’a ba mabe, ma bak ki nledek kiyaga. 2 Inyule bôt b’a gwés ndik bomede, ba gwéhék moni, ba bak bôt ba ngôk, bôt ba humbulnyuu, baôbôs môl, bandogbene bagwal bap, bôt ba nyi bé ti mayéga, bôt ba ba ta bé maliga, 3 ba ban-ga bé gwéha lisañ li bôt, ba bak bôt ba ngwés bé nôgla ni bape, bôt ba minsohi, bôt ba ba gwé bé hôtnyuu, bôt ba miñem mimbe,* baoo mam malam, 4 baliibana bôt, bôt ba ño mbe, bôt ba ba yôni ni ngôk, bôt ba ba ngwés ba ntuk niñ iloole ba gwés Nyambe, 5 ba nene wengoñle ba ntéñbe i gwélél Nyambe ndi maboñok map ma ñunda bé le ba ntéñbe ni nye;+ kôm i nya bôt ini mbus. 6 I bôt ba nlôl mukété yap, bon ba nsooma ikété mandap, ba nibik miñem mi bôda ba mbomb,* bôda le mbegee i bibéba i nyidil, minheña nwap nwon mi ñéga bo, 7 ba nigil ngéda yosôna, ndi kekikel ba ma pam bé i kôhna bañga yi i maliga.

8 Ndi nlélém kiki Yané bo Yambré ba bi kolba Môsi, hala nyen yak bana bôt ba nke ni bisu i kolba maliga. I mahoñol ma mintén mi bôt mini ma yé yaga ñôbak, ba nlémél bé Nyambe inyule ba nkolba hémle. 9 Ndi to hala, ba ga hol bé to ndék, inyule njék* yap i ga yeli i mis ma bôt bobasôna, kiki i bi bôña inyu bôt bana bo iba.+ 10 Ndi we u bi tibil toi noñ biniigana gwem, ntén niñ me niñ,+ njômbi yem, hémle yem, wongut yem, gwéha yem, hônba yem, 11 ndééñga ni mandutu, kiki i nya me bi kôhna i Antiôkia,+ i Ikônium+ ni i Listra.+ Me bi hônba i ndééñga ini, yak Nwet a tohol me ikété mam mana momasôna.+ 12 Ni maliga, i bôt bobasôna ba ngwés niñ ikété adna ni Kristô Yésu, ba téñbege i gwélél Nyambe, yak bo b’a kôhna ndééñga.+ 13 Ndi bibéba bi bôt lôñni bôt ba mandon b’a ke ndik ni bisu i hol ikété béba, hol ni hol; ba yumhak bôt, yak bomede ba yômôk.+

14 Ndi we, téñbe ni mam u bi nigil, ma ba bi kwés we nkaa le u hémle,+ hala kiki u nyi bonjee ba bi niiga we mo, 15 ni le ibôdôl we nkéñéé man+ u nyi bitilna bipubi+ bi bi nla ti we pék inyu tohi ni njel hémle u nhémle Kristô Yésu.+ 16 Tilna yosôna i nlôl ni Nyambe,+ i bak nseñ inyu niiga,+ inyu kodol, inyu téé mam loñge,* inyu niiga ikété telepsép,+ 17 le mut Nyambe a bana ngap i kôli, a bak yaga nkôôbaga i nya i yôni inyu hiki nson nlam.

4 I bisu bi Nyambe ni bi Kristô Yésu, nu a nlama kéés+ bayômi ni bawoga,+ yak ni njel masoola mé+ lôñni Ane yé,+ me nti yaga we oda le: 2 añal bañga i Nyambe;+ ligip i boñ hala bihôô bihôô i loñge ngéda ni i béba ngéda; kodol,+ ti mabéhna ma ngui,* ti maéba, ni wongut yosôna lôñni likeñge i niiga.+ 3 Inyule ngim ngéda y’a pam le b’a nihbe ha bé biniigana bi maliga,*+ ndi inoñnaga ni ngôñ yap, ba ga yiñil bomede ngandak balét inyu nyuñgul bo maôô.*+ 4 B’a emble ha bé maliga, ndi ba ga sédi maôô inyu emble miñañ mi bitembee. 5 Ndi we, tééda ngap yoñ i hek pék inyu mam momasôna, hônba mandutu,+ boñ nson u ñañal ñañ nlam,* gwel yaga nson woñ i nya i yôni.+

6 Inyule me yé i kuba kiki likébla li binyonyo,+ yak ngéda kobla yem+ i yé toi bebee. 7 Me mal jo gwét bilam,+ me ke ngwéé ipam lisuk,+ me tééda hémle. 8 Ibôdôl hanano, ntut u telepsép+ u yé ntéédaga inyu yem; won Nwet, nkéés nu a téé sép,+ a ga ti me kiki bibom i hilo hi;+ ha metama ndik bé, ndi yak bôt bobasôna ba ba bi gwés masoola mé.

9 Boñ biliya gwoñ gwobisôna le u pala lo i meeni. 10 Inyule Démas+ a bi tjôô me, hala kiki a bi gwés nkoñ ’isi unu,* a ke i Tésalônika. Kréskens a ke i Galatia, Titô nye a ke i Dalmatia. 11 Lukas nyetama nyen a yé lôñni me. Lona Markô, inyule a yé me nseñ inyu nson. 12 Ndi me bi om Tikikô+ i Éfésô. 13 I ngéda u nkahal lo, lona mbôñgô wem mbot u lihep me bi yék i Trôas yak Karpô, lona yak minhôôk mi bikaat, téntén mi bikôgôô bi binuga.*

14 Aléksandrô, ñôô gwom bi mamuna, a bi boñ me béba ngandak. Yéhôva* a ga timbhe nye inoñnaga ni maboñok mé.+ 15 Yak we u nlama yoñ yihe ni nye, inyule a bi kolba nwin wés iloo hihéga.

16 I ngéda me bé i nkaa wem u bisu, mut to wada a bé bé ipañ yem, bobasôna ba bi tjôô me. Nyambe a éñél bañ bo i béba i. 17 Ndi Nwet a bi telep ipañ yem, a ti ki me ngui kayéle ni njel yem, likalô li tééba i nya i yôni ni le biloñ bipe gwobisôna bi nok jo,+ a bi sôñ ki me i nyo mbondo njéé.+ 18 Nwet a’ sôñ me ikété hiki nson mbe, a tohol ki me inyu kena me i Ane yé nyoo i ngii.+ Lipém li ba ni nye i boga ni boga. Amen.

19 Yégna me Priska bo Akila,+ yak bôt ba ndap lihaa i Ônésifôrô.+

20 Érastô+ a bi yégle i Korintô, ndi me bi yék Trôfimô+ a nkon i Milétô. 21 Boñ biliya gwoñ gwobisôna i pam nyono ilole ngéda lihep i mbôdôl.

Ubulô a ñômle we mayéga, yak Pudens, ni Linô, ni Klôdia lôñni lôk kéé yosôna.

22 Nwet a ba lôñni mahoñol* u gwé. Konangoo yé i mbuma ñañ i ba lôñni we.