KAAT I NYÔNÔS IBA PAUL A BI TILNA BÔT BA TÉSALÔNIKA

1 Me Paul, Silvanô* lôñni Timôtéô,+ di ntilna likoda li bôt ba Tésalônika li li yé ikété adna ni Nyambe Tata wés lôñni Nwet le Yésu Kristô:

2 Konangoo i mbuma ñañ lôñni nsañ bi nlôl yak Nyambe Tata lôñni Nwet le Yésu Kristô bi ba ni bé.

3 A lôk kéé, di yé nyégsaga i ti Nyambe mayéga inyu nan ngéda yosôna. Hala a kôli inyule hémle nan i nkônde hol, hol ni hol, yak gwéha i hiki wada nan inyu nuu numpe i keñep.+ 4 Inyu hala nyen bésbomede di nkônôl bé maséé+ ikété makoda ma Nyambe inyu hônba nan ni hémle nan ikété ndééñga yosôna lôñni mandutu* ni yé i kôhna.*+ 5 Hala a ñunda le mbagi i Nyambe i téé sép, inyu mbagi i nyen ni bi éña le ni kôli jôp i Ane Nyambe, inyu yo nyen ni yé toi i kuhul mandutu.+

6 Inyule hala a téé yaga sép inyu Nyambe le yak nye a lona njiiha inyu kogse i bôt ba nlona bé njiiha.+ 7 Ndi bé ba ni nkôhna njiiha n’a bana hogbe lôñni bés i masoola ma Nwet le Yésu,+ i ngéda a ga lôl i ngii lôñni mimpémba nwé mi biañgel,+ 8 ikété lindômbôô li hié, i ngéda a nlona mapuna i ngii bôt ba nyi bé Nyambe ni ba ba nôgôl bé ñañ nlam inyu Nwet wés Yésu.+ 9 Bo yaga bon b’a kôhna mbagi kogse i tjiba i boga,+ inyu héya bo i bisu bi Nwet ni i bisu bi lipém li ngui yé; 10 i ngéda Nwet wés a’ loo inyu kôhna lipém lôñni bapubhaga bé, i bôt bobasôna ba ñunda le ba gwé hémle, kiki yak bé ni bi hémle i ngéda di bi bôgôl bé mbôgi, b’a béñge nye i kel i, ba bak nhelek.

11 Inyu jam li yaga nyen di nsoohe hiki ngéda inyu nan, le Nyambe wés a añ bé kiki bôt le ba kôli ni nsébla wé;+ ni le ni ngui yé, a boñ i loñge yosôna i nlémél nye i nya i yôni, a yônôs ki i mam hémle nan i ntinde bé i boñ. 12 Hala a yé inyu boñ le jôl li Nwet wés Yésu li kôhna lipém ni njel nan, ni le yak bé ni kôhna lipém ikété adna ni nye, inoñnaga ni konangoo i mbuma ñañ i Nyambe wés ni i Nwet le Yésu Kristô.

2 Ndi, a lôk kéé, inyu ngéda Nwet wés Yésu Kristô+ a mba ha, ni ngéda d’a kodba lôñni nye,+ di mbat bé 2 le ni pala bañ yôm ikété mahoñol manan, ni pala bañ to sehla inyu lipôdôl li li nene wengoñle li nlôl yak Nyambe,*+ to nwin bôt ba nlegel, to kaat i i nene wengoñle i nlôl i béhni, bi kalak le hilo hi Yéhôva*+ hi yé ha.

3 Mut to wada a yumus* yaga bañ bé to ndék, inyule i hilo hi, hi ga lo bé handugi le batjañgbene+ Nyambe ba bôk ndugi ba lo, yak i mut a nkolba mbén*+ a yeli, nyen a’ tjiba.*+ 4 A nkolba hiki yom ba nsébél le “nyambe,” tole hiki yom bôt ba mbégés,* a humblak ki nyuu le a kahap i ngii yap, inyu hala nyen a nyén ikété témpel Nyambe, a undga i mbamba le nyemede a yé ngim nyambe. 5 Baa ni mbigda bé le i ngéda me bé me ngi yii lôñni bé, me bé béna kal bé i mam mana?

6 Ndi nano, ni nyi nu a yé i kéñ* mut liyanmbén njel, kayéle a’ yeli ndigi i ntéak wé ngéda. 7 I yé maliga le i liyanmbén lini li mal bôdôl nson wé+ bisôsôli,* ndi li ga kônde ndik ba ikété lisol letee nu a yé i kéñ jo njel nano a nyodi. 8 Ha yaga nyen mut liyanmbén a’ yeli, nyen Nwet le Yésu a’ tjé ni njel bibañga bi nyo wé,*+ a yilha ki nye yañga ni njel masoola+ mé i ngéda a mba ha. 9 Ndi libak le mut liyanmbén a yé ha, li yé nson u Satan+ ni njel mimpémba mi mam, biyimbne bi bitembee, lôñni bihélha bi mam* bi bitembee,+ 10 yak ni ngitelepsép lôñni malôga+ momasôna inyu bôt ba yé i kôhna tjiba kiki kogse inyule ba bi neebe bé maliga, ba gwés bé to mo, kayéle ba kôhna tohi. 11 Inyu hala nyen Nyambe a nwas le biniigana bi malôga bi yumus bo le ndi ba hémle bitembee,+ 12 inyu boñ le bobasôna ba kôhna mbagi nôgôs inyule ba bi hémle bé maliga, ndi ngitelepsép yon i bi lémél bo.

13 Ndi di yé nyégsaga i ti Nyambe mayéga ngéda yosôna inyu nan, a lôk kéé Yéhôva* a ngwés, inyule ibôdôl i bibôdle, Nyambe a bi pohol bé+ inyu bana tohi. Hala a bi bôña inyule a bi yilha bé bapubhaga+ ni njel mbuu wé ni inyule ni bi hémle maliga. 14 Inyu jam lini nyen a bi séblene bé ni njel ñañ nlam di ñañal, le ndi ni kôhna lipém li Nwet wés Yésu Kristô.+ 15 Jon, a lôk kéé, telbana siñ siñ,+ téñbana ki ni biniigana ni bi kôhna,+ to ni njel nwin, to ni njel kaat i i bi lôl i béhni. 16 Ndi Nwet wés Yésu Kristô nyemede ni Nyambe Tata wés nu a bi gwés bés,+ a ti ki bés hogbe i boga ni loñge botñem+ ni njel konangoo i mbuma ñañ, 17 ba ti miñem minan hogbe, ba lédés ki bé* le ni boñ mam malam, ni bana ki bipôdôl bilam ngéda yosôna.

3 Me nsôk kal bé le, a lôk kéé, soohana inyu yés+ le bañga i Yéhôva* i kônde tjama bihôô bihôô,+ i kôhna ki lipém, ndik kiki i nkôhna jo nyoo bééni, 2 ni le di pei i moo ma bôt ba ñem mbe ni ma bibéba bi bôt,+ inyule hémle i ta bé jam li bôt bobasôna.+ 3 Ndi Nwet a yé maliga, nyen a’ lédés bé, a sôñ ki bé i moo ma mut mbe. 4 Handugi hala, bés di yé nkwoog nkaa inyu nan ikété adna ni Nwet le ni yé i nôgôl biniigana gwés, ni le n’a ke ki ni bisu i nôgôl gwo. 5 Nwet a kônde éga miñem minan i loñge njel, kayéle ni gwés Nyambe,+ ni hônba ki inyu Kristô.+

6 Nano a lôk kéé, di nti bé biniigana i jôl li Nwet wés Yésu Kristô le ni bagla ni hiki mankéé nu a nke nkoda,+ nu a nke bé inoñnaga ni mam* di bi niiga bé.*+ 7 Inyule bébomede ni nyi kii ni nlama boñ inyu nigle bés.+ Ni maliga, di bi ke bé nkoda ipôla nan, 8 di bi je bé to bijek bi mut nye ki nye yañga.*+ Ndi, ni nson ngui lôñni ndumbba nyen di bé sal juu ni njamuha inyu boñ le di yilna bañ mut to wada ikété nan mbegee ikeñi.*+ 9 Hala a nkobla bé le di gwé bé kunde i boñ hala,+ ndi di bé yéñ le bésbomede di ti bé ndémbél ni nla nigle.+ 10 Ni maliga, i ngéda di bé lôñni bé, di bé béna ti bé i oda ini le: “Ibale mut a ngwés bé sal, wee to je, a je bañ.”+ 11 Inyule di nok le bahogi ikété nan ba nke nkoda,+ ba nsal yaga bé, ndi ba nha manyo map ikété mam ma mbéñge bé bo.+ 12 Di nti i nya bôt ini oda ni maéba ikété adna ni Nwet le Yésu Kristô le: ba nlama sal ikété nwee, ba jek bijek bomede ba nsal.+

13 I nan pes, a lôk kéé, ni waa bañ boñ loñge. 14 Ndi ibale mut a nôgôl bé bibañga gwés bi bi yé munu kaat ini, ni mage nye, ni waa ki kiha lôñni nye,+ inyu boñ le a wo nyuu. 15 To hala, ni yoñ bañ nye kiki ñoo, ndi kena ni bisu i ti nye maéba+ kiki mankéé.

16 Ndi Nwet nu nsañ nyemede a ti bé nsañ ngéda yosôna ikété manjel momasôna.+ Nwet a ba lôñni bébobasôna.

17 Me Paul, mayéga mem mana memede me ntila ni woo wem,+ mon ma yé yimbne i bikaat gwem gwobisôna; haana nyen me ntila.

18 Konangoo i mbuma ñañ i Nwet wés Yésu Kristô i ba lôñni bébobasôna.