KAAT PAUL A BI TILNA BÔT BA FILIPI

1 Paul ni Timôtéô, minkol mi Kristô Yésu, di ntilna bapubhaga bobasôna ba ba yé ikété adna ni Kristô Yésu i Filipi,+ lôñni mimañ mi likoda ni bahôla nson:+

2 Konangoo i mbuma ñañ ni nsañ bi nlôl yak Nyambe Tata wés lôñni yak Nwet le Yésu Kristô bi ba ni bé.

3 Me nti Nyambe wem mayéga hiki ngéda me nhoñol bé 4 ikété masoohe mem momasôna inyu bébobasôna. Me nyemhe hiki ngéda ni maséé,+ 5 inyu ngaba ni bi yoñ inyu* ñañ nlam ibôdôl i kel bisu letee ni nano. 6 Inyule me yé nkwoog nkaa ni jam lini le: Nyambe nu a bi bôdôl loñge nson i bééni a’ kena ki wo ni bisu ipam lisuk+ letee ni i hilo hi Kristô Yésu.+ 7 Me kôli yaga hoñol hala inyu nan bébobasôna, inyule ni yé ikété ñem wem, bé ba ni nyoñ ngaba ni me i konangoo i mbuma ñañ i ngéda me yé i ndap mok,+ ni ngéda me nsôñ ñañ nlam i bisu bi mbén inyu bana kunde i tjam wo.+

8 Inyule Nyambe a yé me mbôgi le me gwé ngôñ i tehe bébobasôna, ni le i gwéha me gwé inyu nan i yé kiki i Kristô Yésu. 9 Inyu jam lini nyen me nke ni bisu i soohe le, gwéha nan i kônde keñep, keñep ni keñep,+ lôñni bañga yi+ ni nogna i yôni;+ 10 le ndi ni wan mambe mam ma nlôôha ba nseñ,+ inyu boñ le ni ba ngi nsohi ni le ni ba bañ ngok baagene inyu bôt bape+ letee ni i hilo hi Kristô; 11 ni le ni ba nyonok ni litam li telepsép li li nlo ni njel Yésu Kristô,+ kayéle Nyambe a kôhna lipém ni bibégés.

12 Nano a lôk kéé, me nsômbôl le ni yi le i mam ma mpémél me ma mboñ le ñañ nlam u kônde tjama, 13 kayéle ntôñ bisônda wonsôna u u ntat Kaisa ni bini bisônda bipe gwobisôna bi nyi le me yé i mok+ inyu Kristô.+ 14 Nano libim li lôk kéé ikété adna ni Nwet li nkôhna ñem ngui inyu mok nwem, li ñunda ki ngandak makénd i añal bañga i Nyambe ibabé woñi.

15 I yé maliga le bahogi ba ñañal Kristô inyu tama ni pémsan, ndi bape ki inyu ñem nlam. 16 I bôt ba ñañal Kristô inyu ñem nlam ba mboñ hala inyu gwéha, inyule ba nyi le me bi tééba inyu sôñ ñañ nlam.+ 17 Ndi bana bape ba mboñ hala inyu pémsan, ha ni mahoñol malam bé, inyule ba gwé ngôñ i tééñga me ki le me yé i mok. 18 Hala a gwé ni umbe nseñ? Ndik unu le ikété manjel momasôna, to ni bihéñba, to ni maliga, Kristô a yé yaa i añlana; me nkon maséé inyu jam li. Ni maliga, m’a kônde ki kon maséé, 19 inyule me nyi le hala a’ kena me i tohi ni njel minyemhe minan+ lôñni mahôla ma mbuu u Yésu Kristô.+ 20 Hala a nkiha ni ngôñ yem ikeñi lôñni botñem yem le m’a wo bé nyuu to ndék, ndi le lôñni ngap yem yosôna i pot ni makénd, me* ti Kristô lipém nano kiki i ngéda bisu, to me yé i niñ, to me yé nwok.+

21 Inyule inyu yem, ibale me niñ, me niñ inyu Kristô;+ ibale me nwo, hala a yé me yéñe.+ 22 Ndi ibale me ngi niñik ikété minsôn, nson wem u nla kônde num matam. Ndi me nkal bé to mut i yom m’a pohol. 23 Me nyi bé kii me pohol* ipôla mam mana mo ima, inyule me gwé yaga ngôñ i kobla inyu ba lôñni Kristô,+ inyule ibabé pééna, hala nyen a nlôôha ba loñge.+ 24 Ndi i nlôôha ba nseñ inyu yem le me kônde yén ikété minsôn inyu loñge nan. 25 Jon, hala kiki me yé nkwoog nkaa inyu jam lini, me nyi le m’a yégle, me kônde ki ba lôñni bébobasôna inyu mahol ni maséé manan ikété hémle, 26 kayéle ni njel yem, i ngéda me ntiimba ba lôñni bé, ni kon maséé ngandak i ba banigil ba Kristô Yésu.

27 Ndigi le ni bana maboñok* ma ma ñunda le ni kôli ni ñañ nlam inyu Kristô,+ inyu boñ le to me nlo i tehe bé, to me nlo bé, me nogok ngan nan, me yik le ni ngi umi siñ siñ ikété minlélém mi mahoñol lôñni ñem wada,*+ ni nidnaga bé ni bé inyu hémle ni nhémle ñañ nlam. 28 Ni konok bañ bakolba banan woñi to ndék. I jam lini jon li ñunda yaga bo le b’a tjiba,+ ndi le bé n’a tohlana;+ hala a nlôl ni Nyambe. 29 Inyule ni bi kôhna bé ndik bisai i hémle Kristô, ndi yak i son njonok inyu yé.+ 30 Inyule yak bé ni njo nlélém sañ ni bi tehe me me njo,+ won ni nok nano le me ngi jok.

2 Jon, hiki ngéda ni nla ti bape ñem ngui ni njel Kristô, ni hôgbaha bo ni njel gwéha, ni ban-ga adna i mahoñol,* ni undga ñem gwéha lôñni ñem ngôô, 2 wee ni boñ hala inyu yônôs ñem wem ni maséé mu kiki ni gwé minlélém mi mahoñol, ni ban-ga nlélém gwéha, ni bak ni édi i nya i yôni,* ni ban-ga ki mahoñol mada.+ 3 Ni boñ bañ yom yo ki yo inyu pémsan,+ tole inyule ni ntôñ ndigi bébomede;+ ndi lôñni suhulnyuu,* ni neebege le bape ba nloo bé,+ 4 ni yéñ ndigi bañ yéñe nan bébotama,+ ndi yak yéñe i bôt bape.+

5 Ni bana minlélém mi mahoñol mi yak Kristô Yésu a bééna,+ 6 inyule to hala kiki a bé i pôna i Nyambe,+ a bi bana bé to mahoñol le bo Nyambe ba kôli.+ 7 To, ndi a bi tjôô mam momasôna a bééna,* a yoñ libak li nkol;+ i mbus, a yila mut binam.*+ 8 Iloo ki hala, i ngéda a bi lo kiki mut binam,* a suhus nyemede, a yila manôgla letee ni i nyemb,+ ñ, nyemb i kék njiiha.*+ 9 Inyu njom ini yaga nyen Nyambe a bi bédés nye i tel i nloo i a bééna,+ ni loñgeñem a ti ki nye jôl li li nloo môl momasôna,+ 10 le ndi bôt bobasôna ba ôm maboñ i jôl li Yésu (ba ba yé i ngii, ni ba ba yé hana ’isi, lôñni ba ba yé isi hini hisi)*+ 11 ni le hiki hilémb hi pahal i mbamba le Yésu Kristô a yé Nwet,+ kayéle Nyambe Tata a kôhna lipém.

12 Jon, a bagwéha bem, nlélém kiki ni yé manôgla ngéda yosôna, ha ndigi bé i ngéda me yé ha, ndi téntén i ngéda me ta bé ha; kena ni bisu i sal inyu tohi nan bébomede, ni konok woñi, ni tin-ga lipém.* 13 Inyule Nyambe nyen a yé maséé i ti bé ngui, a boñok le ni bana ngôñ lôñni ngui i boñ mam. 14 Kena ni bisu i boñ mam momasôna ibabé minhuñbe+ to momol,+ 15 inyu boñ le ni ba ngi likééhene ni ngi nsohi, ni le ni ba bon ba Nyambe+ ngi liton li mahindi i ñemkété u hiai hibe ni hi hi kôdi,+ mu nyen ni mbai kiki mapubi ikété nkoñ ’isi,+ 16 ni téñbege ni* bañga i niñ.+ Ha nyen m’a bana njom i kon maséé i hilo hi Kristô, me yik le me bi ke bé ngwéé yañga, to tumbba me bi tumbba bé yañga. 17 Ndi to ibale me yé i kuba kiki likébla li binyonyo+ i ngii sesema+ ni njel ngaba me nyoñ i nson mpubhaga,* me yé maséé, me nhak ki lôñni bébobasôna inyule nson unu won hémle nan i bi tinde bé i gwel. 18 Nlélém jam, yak bé ni nlama ba maséé, ni hagak ki lôñni me.

19 Ndi me mbot ñem, ibale sômbôl i Nwet wés Yésu i, le ndék ngéda, m’a ep Timôtéô+ nyoo bééni, kayéle me kôhna makénd i ngéda a’ legel me manwin ma nlôl nyoo bééni. 20 Inyule me gwé bé mut numpe nye ki nye nu a gwé mahoñol kiki nye, nu a ntôñ yaga inyu nan. 21 Inyule bana bape bobasôna ba nyéñ ndik gwéñe gwap bomede, ndi ha bi Yésu Kristô bé. 22 Ndi ni nyi kiki nyemede a bi unda mahee mé, le kiki man+ a nsal lôñni isañ, a bi sal kiki nkol lôñni me inyu boñ le ñañ nlam u kee ni bisu. 23 Jon, nyen me gwé botñem i ep i ngéda me mal ndik tehe lelaa mam m’a tagbe inyu yem. 24 Ni maliga, ibale sômbôl i Nwet i, me mbot ñem le ndék ngéda yak memede m’a loo.+

25 Ndi nano, me ntehe nseñ i ômle bé Épafrôditô, mankéé wem ni so ngwelnson nu a yé sônda i Kristô, nu ni bi ep le a gwélél me, a ti ki me i mam ma mbéda me,+ 26 inyule ñem u nloñ nye ni ngôñ i tehe bébobasôna, ni le nduña ikeñi i yé nye i ñem inyule ni bi nok le a bi kwo kon. 27 Ni maliga, a bi kwo toi kon, a ba bebee ni nyemb; ndi Nyambe a bi kon nye ngoo, ndi a bi kon ndik bé nyetama ngoo, a bi kon yak me ngoo, le ndi me bana bañ ndutu i ngii ndutu. 28 Jon, me yé i ep nye bihôô bihôô, kayéle i ngéda ni ntehe nye, ni témb ni kon maséé, le ndi yak me nduña yem i sôs. 29 Jon leegana nye kiki ni mbéna leege banigil ba Nwet, lôñni maséé momasôna; kena ki ni bisu i diihe i mintén mi bôt mini,+ 30 inyule a bi ba bebee ni nyemb inyu nson u Kristô,* a lek ki joo i ngéda a bi boma mandutu* le ndi a ti me mahôla ni bi la bé ti me inyule ni bé bé ha.+

3 Sôk i nsôk, a lôk kéé, kena ni bisu i kon maséé ikété Nwet.+ Hala a ntééñga bé me i tilna bé minlélém mi mam inyule hala a yé inyu loñge nan.

2 Yoña yihe ni ngwo, yoña yihe ni bôt ba mboñ mam mabe, yoña yihe ni bôt ba mboñ bikwéé mu manyuu.*+ 3 Inyule bés bon di gwé bañga likwee,+ bés ba di ngwel nson mpubhaga ni njel mbuu u Nyambe, di nkadba ki inyu Kristô Yésu,+ ndi di mbôdôl bé minsôn ñem, 4 to hala kiki memede me gwé manjom iloo mut numpe nye ki nye i bôdôl minsôn ñem.

Ibale mut numpe a nhoñol le a gwé mam ma ntinde nye i bôdôl minsôn ñem, me gwé yaga mo iloo nye: 5 me bi kweeba i hilo hi nyônôs juem,+ me yé man loñ Israel, i litén li Benyamin; me yé man Lôk Héber,+ bagwal bem ba bé bon ba Lôk Héber; inyu mbén, me yé mut Farisai;+ 6 inyu makénd, me bi tééñga likoda;+ inyu telepsép i nlôl ni mbén, me bi unda le me yé ngi nsohi. 7 Ndi i mam ma bé nseñ inyu yem, me bi neebe le me nimis mo* inyu Kristô.+ 8 Iloo ki hala, me ntehe toi nseñ le me nimis mam momasôna inyu bana yi i Kristô Yésu Nwet wem i i gwé nseñ iloo mam momasôna. Inyu yé nyen me neebe i nimis mam momasôna, me ntehe ki mo kiki ngandak binan,* inyu boñ le Kristô a ba me nseñ wem, 9 ni le me lébna ikété adna ni nye, ha bé inyu telepsép yem memede i i nlôl i noñ mbén Môsi, ndi inyu telepsép i i yé ni njel hémle+ me nhémle Kristô,+ telepsép i i nlôl yak Nyambe, i bak i niñne i hémle.+ 10 Ngôñ yem i yé le me yi Kristô lôñni ngui i bitugne gwé,+ ni le me yoñ ngaba i mandutu mé,+ memede me neebe ki i bana nlélém nyemb kiki nye;+ 11 le ndi me tehe too yak me me nla pam i kôhna bitugne ikété bawoga bi bi mbôk tagbe.+

12 Ndi hala a nkobla bé le me mal kôhna bom tole me mal yila peles, ndi me nligip+ le me tehe too yak me me nla kabda bom, inyule inyu yo nyen Kristô Yésu a bi pohlene me.*+ 13 A lôk kéé, me nhégda bé me le memede me mal yaga kôhna yo, ndi jam jada li yé maliga le: me nhôya mam ma yé me i mbus,+ me boñok biliya* inyu mam ma yé me i bisu,+ 14 me nligip yaga inyu yônôs njômbi yem i kôhna bom+ inyu nsébla u ngii,+ won Nyambe a nti ni njel Kristô Yésu. 15 Jon, i bôt ba yé minhôôlak+ ikété yés ba nlama bana i mahoñol mana; ndi ibale ni gwé mahoñol mape, Nyambe a ga yeelene bé mahoñol ma kôli. 16 Ndi to ibale mahol més ma mpam to limbe likala, wee di kilak ndigi ikété oda mu nlélém njel.

17 A lôk kéé, bébobasôna yilnana banigle me,+ kena ki ni bisu i bok mis i ngii ba ba nke inoñnaga ni ndémbél di bi ti bé. 18 Inyule ngandak bôt i yé le me bé béna sima, ndi nano me nsima bo lôñni gwiiha i mis, ba ba nhiôm kiki baoo ba kék njiiha* i Kristô. 19 Lisuk jap li yé tjiba, libum jap jon li yé nyambe wap, wonyuu yap yon i yé toi lipém jap, ba nhoñol ndik mam ma nkoñ ’isi.+ 20 Ndi bés, loñ+ yés ligwéé i yéne i ngii,+ di nyégi ki i bem ntohol nu a nlôl i ngii le Nwet Yésu Kristô,+ 21 nu a’ heñel nyuu yés i i mbomb, a yilha yo kiki* nyuu yé lipém+ ni njel lipémba jé likeñi li li mboñ nye le a nla suhus mam momasôna isi yé.+

4 Jon, a lôk kéé yem i me ngwés ni i me gwé ngôñ i tehe, ni yé maséé mem ni ntut+ wem. A bagwéha bem, me nsoohe le ni téñbe+ ni* Nwet.

2 Me nsoohe Éwôdia, me soohege yak Sintiké le ba nôgla kiki banigil ba Nwet.*+ 3 Ñ, me nsoohe yak we, a bañga so ngwelnson,* le u kee ni bisu i hôla i bôda bana ba ba bi sal nson ngui lôñni me inyu ñañ nlam, yak ni Klémensi lôñni bana baso bagwelnson bem bape, ba môl map ma yé ikété kaat niñ.+

4 Kona maséé i Nwet ngéda yosôna. Me ntiimba kal le, kona maséé!+ 5 I lem nan ini le ni nai bé* ni litehge linan li mam+ i yiba ni bôt bobasôna. Nwet a yé bebee. 6 Ni tôñ bañ inyu jam jo ki jo,+ ndi inyu mam momasôna, ni njel masoohe, ni minyemhe lôñni mayéga, boña le Nyambe a yi mayagal manan;+ 7 ha nyen nsañ+ u Nyambe, u u nloo mam momasôna mut binam a nla nok, w’a tat miñem minan+ ni mahoñol manan* ni njel Kristô Yésu.

8 Kiki jam li nsôk, a lôk kéé, to mambe mam ma yé maliga, to ma ma gwé mahee, to ma ma téé sép, to ma ma yé mapubhaga,* to ma ma kôli le di gwés mo, to ma ma gwé jôl lilam, to ma ma gwé lem ilam, to ma ma kôli ni bibégés, kena ni bisu i wan* i mam mana.+ 9 I mam ma nlôl i meeni, ma ni bi nigil, ni neebe, ni nok, ni tehe ki, ni bana lem i boñ mo;+ ha nyen Nyambe nu nsañ a’ ba lôñni bé.

10 Me nkon maséé ngandak ikété Nwet le nano ni ntémb ni bôdôl tôñ me.+ To hala kiki ni bé tôñ me, ndi ni bééna bé pôla i unda hala. 11 Ndi me mpot bé hala inyule gwom bi mbéda me, inyule to kinje jam li ntagbe i niñ yem, me bi nigil i kon maséé ni gwom me gwé.*+ 12 Me nyi yaga niñ ni ndék,+ me nyi ki niñ ni ngandak. Ikété mam momasôna, to kinje jam li ntagbe i niñ yem, me bi nigil likeñge i ba maséé to me yé nuak tole me nôgda njal, to me gwé ngandak tole me gwé bé to yom. 13 Inyu mam momasôna, me gwé ngui ni njel nu a nti me lipémba.+

14 Ndi to hala ni bi boñ loñge i hôla me* ikété njiiha yem. 15 Ni maliga, bé bôt ba Filipi ni nyi ki le i ngéda ni bi bôk ni nok ñañ nlam i ngéda me bi nyodi i Makédônia, likoda jo ki jo li bi hôla bé me to neebe mahôla mem,* handugi bé botama;+ 16 inyule i ngéda me bé i Tésalônika, ni bi ômle me mahôla ma bé béda me, ha ngélé yada bé, ndi ngélé iba. 17 Hala a ta bé le me yé i yagal likébla, ndi me nyéñ le maboñok manan malam ma bôl i bisu bi Nyambe.* 18 Ndi me gwé mam momasôna ma mbéda me, me gwé yak iloo ha. Ngo jam li nhéñél bé me, nano kiki me nkôhna i yom ni ñômle me ni njel Épafrôditô,+ sesema ilam i i numb loñge njiñ,+ i lémlak Nyambe. 19 I pes yé, Nyambe wem a’ ti bé mam momasôna ma mbéda bé+ i nya i yôni inoñnaga ni lingwañ li lipém jé ni njel Kristô Yésu. 20 Nano, lipém li ba ni Nyambe Tata wés i boga ni boga. Amen.

21 Yégnana bapubhaga bobasôna ba ba yé ikété adna ni Kristô Yésu. Lôk kéé i i yé lôñni me i ñômle bé mayéga. 22 Bapubhaga bobasôna ba ñômle bé mayéga, ndi téntén ba ndap lihaa i Kaisa.+

23 Konangoo i mbuma ñañ i Nwet le Yésu Kristô i ba lôñni mahoñol ni gwé.*