MALAKI

1 Lipôdôl li Nyambe lini:

Bibañga bi Yéhôva bini ni njel Malaki* inyu Israel:

2 Yéhôva a nkal le: “Me bi unda bé gwéha.+

Ndi bé ni nkal le: ‘Lelaa u bi unda bés gwéha?’”

Yéhôva a mpot le: “Baa Ésau a bé bé manyañ Yakôb?+ To hala, me bi gwés Yakôb, 3 ndi me oo Ésau;+ me tjé yak dikôa tjé,+ me ti ki dibaa di njéé di ñoñ ngababum yé.”+

4 “To hala kiki Édôm a nkal le: ‘Ba bi nyugut bés minluñ minluñ, ndi di ga témb, di tiimba ki oñ bahoma ba bi tjé;’ lana nyen Yéhôva nu mintôñ mi gwét a nkal: ‘B’a oñ, ndi me m’a bôk, ha nyen bôt ba ga sébél bo le “nkoñ u béba,” ba sébél ki bo le “litén Yéhôva a mal pémhene mbagi nôgôs.”+ 5 N’a tehe i mam ma ni mis manan, ha nyen n’a kal le: “Yéhôva a kôhna lipém* ni nkoñ Israel wonsôna.”’”

6 “‘Man munlôm a nti isañ lipém,+ yak ngwélél a nti nwet wé lipém. Ibale me yé isañ,+ wee lipém me kôli kôhna li yé hee?+ I ba ni le me yé nwet, wee woñi* ba nkon me u yé hee? Hala nyen me Yéhôva nu mintôñ mi gwét me mbat bé, a bé biprisi ba ni nyan jôl jem!+

“‘Ndi bé ni nkal le: “Lelaa di bi yan jôl joñ?”’

7 “‘Ni mboñ hala i ngéda ni nti bijek* bi nyega mu juu jem li bisesema.’

“‘To hala, ni ngi podok le: “Lelaa di bi hindis jôl joñ?”’

“‘Ni mboñ hala i ngéda ni nkal le: “Téblé i Yéhôva+ i yé yom ba kôli yan.” 8 I ngéda ni nti lém i i yé ndim kiki sesema, ni nkal le: “Béba yoo ha?” Yak i ngéda ni nti lém i i yé bôk tole i i nkon, ni kal le: “Béba yoo ha?”’”+

“Soho, ti le yo ngomin yoñ i pes mbok. Baa a ga nôgôl we maséé? Baa u ga lémél nye?” Hala nyen Yéhôva nu mintôñ mi gwét a nkal.

9 “‘Nano ni, soho ni yemhe* Nyambe le a unda bés loñge yé ñem. I ngéda ni nti nye i nya makébla i, lelaa to wada nan a nla lémél nye?” Hala nyen Yéhôva nu mintôñ mi gwét a nkal.

10 “Njee ikété nan a yé bebee i yip makôga?*+ Inyule to kuye, ni neebe bé i kuye hié mu juu jem li bisesema yañga.+ Me ta bé me maséé ni bé, to likébla jada mu makébla ni nti me li nkônha bé me maséé,”+ hala nyen Yéhôva nu mintôñ mi gwét a nkal.

11 “Inyule ibôdôl i homa hiañgaa hi mpémél letee ni i homa hi nañle,* jôl jem li ga kôhna lipém* ikété biloñ.+ Yak i bahoma bobasôna bôt ba ga lighene binjinjiñ, ba ga ti bisesema inyu ti jôl jem lipém, ñ, likébla lipubi yaga; inyule jôl jem li ga kôhna lipém ikété biloñ,”+ hala nyen Yéhôva nu mintôñ mi gwét a nkal.

12 “Ndi bé ni nhoo jôl jem mahindi*+ i ngéda ni nkal le: ‘Téblé i Yéhôva i yé nyega, yak litam jé, hala wee i bijek bi yé mu ngii, bi yé gwom ba kôli yan.’+ 13 Ndi ni nkal ki le: “Ôôkô! Kinje mam ma nwééhana! Ni ntjelel, ni yanak ki téblé yem,” hala nyen Yéhôva nu mintôñ mi gwét a nkal. Ni nlona bilém bi ba nip, bilém bi bi yé bibôk ni bilém bi bi nkon. Ñ, i nya gwom i yon ni nlona kiki makébla! Baa me nlama neebe i gwom ni nti me?”+ Hala nyen Yéhôva a nkal.

14 “Tiihe tiihe ni mut malôga nu a gwé lém* nu a gwé bé lem yo ki yo mu bémba yé, ndi a nti Yéhôva lém i i nkon* kiki sesema, ki le a nti nye likak. Inyule me yé Kiñe ikeñi,+ yak biloñ bi ga kon jôl jem woñi, bi ti ki jo lipém,”+ hala nyen Yéhôva nu mintôñ mi gwét a nkal.

2 “Nano ni, a bé biprisi, i mbén ini i yé inyu nan.+ 2 Ibale ni ntjél emble, ni tibil bé to tééda i jam lini mu miñem minan le ni ti jôl jem lipém, m’a ep ndiihe i ngii nan,+ me boñ ki le bisai binan bi yila ndiihe.+ Ñ, me mal boñ le bisai binan bi yila ndiihe, inyule ni ntééda bé i jam lini mu miñem minan,” hala nyen Yéhôva nu mintôñ mi gwét a nkal.

3 “Nuna-ki! Bé bon ni ga boñ le me tjé* mbôô ni bi bel,+ m’a leñ bé tjibi mu masu manan, ñ, tjibi di bisesema bi mangand manan; ba ga bada ki bé, ba leñ bé nyoo.* 4 Ha nyen n’a yi le me bi ti bé i mbén ini inyu boñ le malômbla mem ni Lévi ma mal bañ,”+ hala nyen Yéhôva nu mintôñ mi gwét a nkal.

5 “Me bi boñ malômbla ni nye inyu tééda niñ yé ni inyu ti nye nsañ,* me bi ti ki nye i mam ma; hala a bi tinde nye i kon me woñi.* A bi kon me woñi, ñ, a ti ki jôl jem ngandak lipém. 6 Mbén* maliga i bé mu nyo wé,+ to bibép gwé bi bé pot bé ngitelepsép. A bi kiha lôñni me ikété nsañ ni telepsép,+ a boñ ki le ngandak bôt i tjôô béba njel. 7 Inyule bibép bi prisi bi nlama tééda yi, i nyeni* ki nyen bôt ba nlama ke inyu yi mbén,*+ inyule a yé nlegelnwin nu Yéhôva nu mintôñ mi gwét.

8 “Ndi bé ni bi yék njel. Ni boñ le* ngandak bôt i noñ ha bañ mbén.*+ Ni mal ôbôs malômbla mem ni Lévi,”+ hala nyen Yéhôva nu mintôñ mi gwét a nkal. 9 “Jon m’a boñ le bôt ba yan bé, me suhus ki bé i bisu bi litén jolisôna, inyule ni bi noñ bé manjel mem, ndi ni bé todol bôt i ngéda i bé béda le ni noñ mbén.”+

10 “Baa bésbobasôna di gwé bé isañ wada?+ Baa Nyambe wada bé nyen a bi hek bés? Inyuki ni di nliibana bés ni bés,+ di ôbhak malômbla ma basôgôlsôgôl bés? 11 Yuda a mal tjañgap, a mboñ ki jam libe i Israel ni i Yérusalem; inyule Yuda a mal hindis libak lipubi* li Yéhôva,+ libak lipubi Nyambe a ngwés. Yuda a bi bii muda nu a mbégés nkén nyambe.*+ 12 Nu ni nu a nyééne mu mandap ma mabadô ma Yakôb ndi a boñok i jam lini, to a yé njee,* Yéhôva a ga tjé* nye, to ibale a nti Yéhôva nu mintôñ mi gwét likébla.”+

13 “Ni mboñ ki jam lipe,* jon li mboñ le juu li bisesema li Yéhôva li yon ni gwiiha, ni maéya, ni njelel kayéle a mbéñge ha bé likébla linan, a neebe ha bé to jam jo ki jo li nlôl i moo manan.+ 14 Ndi bé ni mbat le: ‘Inyuki?’ Inyule Yéhôva a mbok mbôgi ikolba we, inyule u ntjañgbene nwaa u bi bii we mañge wanda,* to hala kiki a yé liwanda joñ ni nwaa woñ nu u bi bôn le w’a téñbe ni nye.*+ 15 Ndi wada a bi boñ bé hala, inyule a bééna ki ndék mbuu u Nyambe. Kii a bé yéñ? A bé yéñ Mbôda Nyambe.* Jon yoña yihe ni mahoñol* manan, ni tjañgbene bañ baa ni bi bii bé boñge ba wanda.* 16 Inyule me* ñoo maboha,”+ hala nyen Yéhôva, Nyambe nu Israel a nkal. “Me ñoo yak mut nu a ngwés bisañ,”* hala nyen Yéhôva nu mintôñ mi gwét a nkal. “Jon yoña yihe ni mahoñol manan, ni tjañgap bañ to.+

17 “Ni bi wéés Yéhôva ni bibañga binan.+ Ndi bé ni nkal le: ‘Lelaa di bi wéés nye?’ Ni mboñ hala i ngéda ni nkal le: ‘Hiki mut nu a mboñ béba a yé loñge i mis ma Yéhôva, Nyambe a ngwés ki i ntén mut u;’+ tole ni mboñ hala i ngéda ni nkal le: ‘Nyambe nu telepsép a yé hee?’”

3 “Nuna-ki! Me yé i ep nlegelnwin wem, a ga tibil* njel i bisu gwem.+ Ha nyen i bañga Nwet ni nyéñ, a ga lo i témpel+ yé kunda yada; yak nlegelnwin nu malômbla a ga lo, nu ni mbem ni maséé. Nuna-ki! A ga lo yaga,” hala nyen Yéhôva nu mintôñ mi gwét a nkal.

2 “Ndi njee a ga nihbe hilo hi malo mé? Njee a ga ba nkôôbaga i ngéda a ga lo? Inyule a ga ba kiki hié hi mut hiuu,* a bak kiki sobe*+ i bajôwa mambot. 3 A ga pubus bon ba Lévi kiki mut a nyén ’isi inyu héya mahindi ma silba+ ni pubus yo; a ga baa* bo kiki ba mbaa gôl ni silba, ha nyen ba ga yila toi bôt ba ba nti makébla ni telepsép i mis ma Yéhôva. 4 Ha nyen likébla li Yuda ni li Yérusalem li ga lémél toi* Yéhôva, kiki i dilo di bisu ni kiki i ngéda kôba.+

5 “M’a tiige bé bebee inyu kéés bé; m’a pala kéés* i bôt bana: bôt ba makañ,+ bôt ba ndéñg, bôt ba nkum soñ bitembee,+ bôt ba nyoñ gwom bi bagwélél bap ni njel malôga,+ yak gwom bi yik muda ni bi man nyuu,*+ yak bôt ba ntjél hôla nkén mut.*+ I bôt bana ba nkon bé me woñi,” hala nyen Yéhôva nu mintôñ mi gwét a nkal.

6 “Inyule men me yé Yéhôva, me nhéñha bé.*+ Inyu hala nyen ni yé ngi tjiba, a bon ba Yakôb. 7 Ibôdôl i dilo di basôgôlsôgôl banan, ni bi ke haa ni mambén mem, ni tééda bé mo.+ Ni témb i meeni, ndi m’a témb i bééni,”+ hala nyen Yéhôva nu mintôñ mi gwét a nkal.

Ndi bé ni nkal le: “Di boñ ni kii inyu témb i weeni?”

8 “Baa mut binam a nla nibil Nyambe? Ndi bé ni nibil me.”

To hala, ni nkal le: “Lelaa di bi nibil we?”

“Ni mboñ hala mu jôga jada ikété jôm, ni mu makébla. 9 Ni yé toi ntiihege,* inyule ni nibil me, ñ, loñ yosôna i nibil me. 10 Ni lona jôga jada jolisôna ikété jôm ikété ndugi,+ kayéle bijek bi ba mu ndap yem;+ soho, noodana le me mu jam li, inyu tehe ibale m’a yiblene bé me bé makôga ma ngii,+ ni ibale m’a umbe* bé me bé bisai kayéle yom to yada i héñél bañ bé,”+ hala nyen Yéhôva nu mintôñ mi gwét a nkal.

11 “Inyu nan, m’a buñga nu a nje bijek,* a ga ôbôs ha bé matam ma loñ nan, yak nwom minan mi minkôô mi wai mi ga waa bé num matam,”+ hala nyen Yéhôva nu mintôñ mi gwét a nkal.

12 “Biloñ gwobisôna bi ga kal le ni yé bokimasoda,+ inyule ni ga yila loñ i nkônha maséé,” hala nyen Yéhôva nu mintôñ mi gwét a nkal.

13 “I bibuk ni nleñ me bi yé bibe ngandak,” hala nyen Yéhôva a nkal.

Ndi bé ni nkal le: “Bimbe bibuk di bi leñ we?”+

14 “Ni nkal le: ‘I ta bé nseñ i gwélél Nyambe.+ Umbe nseñ di bi kôhna i ngéda di bi yônôs minson nwés i bisu bi Yéhôva nu mintôñ mi gwét, ni i ngéda di bi unda le di ntam bibéba gwés?* 15 Ndi nano, d’a kal le bôt ba ngôk bon ba yé bokimasoda. Handugi hala, i bôt ba gwé lem i boñ béba bon mam map ma nke loñge.+ Ba noode Nyambe ibabé le ba wo nyuu, ndi to hala mam map ma nke loñge.’”

16 Ha ngéda i, i bôt ba nkon Yéhôva woñi ba bé kwel bo ni bo, hiki mut ni solôñ wé, yak Yéhôva a bi sédi maôô, a emblege bo. Ha nyen kaat mbigda i bi tilba i bisu gwé+ inyu ba ba nkon Yéhôva woñi, ni inyu ba ba nhoñol* jôl jé.+

17 “I kel m’a boñ le ba yila yom yem i tôbôtôbô,*+ m’a yilha bo bôt bem,+ hala nyen Yéhôva nu mintôñ mi gwét a nkal. M’a kônôl bo ngoo kiki mut a nkônôl man wé munlôm nu a ngwélél nye ngoo.+ 18 Ha nyen n’a témb ni tehe maselna ipôla mut a téé sép ni béba mut,+ ni tehe ki maselna ipôla mut a ngwélél Nyambe ni nu a ngwélél bé nye.”

4 “Inyule i hilo hini hi yé i lo, hi légék wengoñle juu li hié hikeñi,+ ha nyen bôt ba ngôk bobasôna ni bôt bobasôna ba gwé lem i boñ béba ba ga yila kiki minumuk mi bikai. Ba ga tjiba yaga i hilo hi nlo, kayéle to nkañ, to ntjep u ga yégle bé, hala nyen Yéhôva nu mintôñ mi gwét a nkal. 2 Ndi bé ba ni nti jôl jem lipém,* hiañgaa hi telepsép hi ga bai i ngii nan, mapubi mé* ma ban-ga ngui i mélés makon; ha nyen ni ga pind ni maséé kiki bon ba nyaga ba mahoñ.”

3 “Ni ga tidbe bibéba bi bôt, inyule bi ga ba kiki minluñ mi biték isi mabal manan i kel m’a boñ le i jam lini li yon,” hala nyen Yéhôva nu mintôñ mi gwét a nkal.

4 “Bigdana Mbén me bi ti ngwélél wem Môsi, yak matiñ ni matéak me bi ti nyoo i Hôreb, le ndi Israel nyensôna a nôgôl mo.+

5 “Nuna-ki! Me yé i ômle bé mpôdôl+ le Éliya ilole hilo hikeñi hi Yéhôva, hi hi nkônha woñi, hi nlo.+ 6 A ga boñ le miñem mi basañ mi témb kiki miñem mi bon,*+ a boñ ki le miñem mi bon mi témb kiki miñem mi basañ, tiga le me lo, me bép hisi, me tjé ki hio.”

(Lisuk li ngobol i Bitilna bi Lôk Héber ni bi Araméa, Bitilna bi bikristen ni hop Grikia gwon bi ga noñ)