HAGAI

1 I nwii mi nyônôs ima mi ane i Kiñe Darius, i sôñ i nyônôs isamal, i hilo hi bisu hi sôñ, lipôdôl li Yéhôva li bi lôl mpôdôl Hagai*+ inyu Sôrôbabel,+ man Séaltiel, ngomin i pes mbok i Yuda, ni Yôsua, man Yéhôsadak, prisi keñi; li kalak le:

2 “Yéhôva nu mintôñ mi gwét a nkal le: ‘I bôt bana ba nkal le: “Ngéda i yé ngi kola inyu oñ* ndap* Yéhôva.”’”+

3 Lipôdôl li Yéhôva li bi témb li lôl Hagai,+ li kal le: 4 “Baa i ngéda ini le ni yén i mandap malam, ndi ki ndap ini i yé nkwoog?+ 5 Nano, Yéhôva nu mintôñ mi gwét a nkal le: ‘Tiblana hek pék mu mam ni yé i boñ.* 6 Ni nsal ngandak, ndi ni mbumbul ndék.+ Ni nje, ndi ni nuu bé. Ni nyo, ndi nyus i mal bé. Ni nhaba mambot, ndi ni nok bé lék. Nu a nkôhna nsaa, a yé wengoñle a nha wo ikété mpék u u gwé matuba.’”

7 “Yéhôva nu mintôñ mi gwét a nkal le: ‘Tiblana hek pék mu mam ni yé i boñ.’*

8 “‘Beda hikôa, ni lona bikék.+ Oña ndap,+ inyu boñ le me kônôl yo maséé, me kôhna ki lipém,’+ hala nyen Yéhôva a mpot.”

9 “‘Ni bé bem ngandak, ndi ni bi kôhna ndik ndék; i ngéda ni bi jôbna libumbul i ndap, me bi boñ le mbebi i kena jo.+ Inyuki? Inyule ndap yem i yé nkwoog, ndi bé ni mbet, ni nsôs inyu bôñgôl mandap manan.’+ Hala nyen Yéhôva nu mintôñ mi gwét a mpot. 10 Jon ngii i bi nim bé manwee, yak hisi hi nim bé bijek. 11 Me bi sébél sép hana ’isi, ni i ngii dikôa, i ngii bijek, i ngii wai yondo, i ngii môô, i ngii bikai bi bi ño ’isi, i ngii bôt ba binam, i ngii bilém, yak i ngii minson mi moo map nwominsôna.’”

12 Sôrôbabel+ man Séaltiel,+ bo Yôsua man Yéhôsadak,+ prisi keñi, ni bôt ba litén bobasôna ba bi emble kiñ Yéhôva Nyambe wap, ni bipôdôl bi mpôdôl Hagai, inyule Yéhôva Nyambe wap nyen a bi om nye; litén li bôdôl kon Yéhôva woñi.

13 Ha nyen Hagai, nlegelnwin nu Yéhôva, a bi legel litén nwin kiki Yéhôva a bi kal nye: “‘Me yé lôñni bé,’+ hala nyen Yéhôva a mpot.”

14 I mbus, Yéhôva a bi tinde*+ Sôrôbabel man Séaltiel, ngomin i pes mbok i Yuda,+ bo Yôsua+ man Yéhôsadak, prisi keñi, lôñni litén jolisôna; ba bôdôl bôlô i ndap Yéhôva nu mintôñ mi gwét, Nyambe wap.+ 15 Hala a bé hilo hi nyônôs 24 hi sôñ i nyônôs isamal, i nwii mi nyônôs ima mi ane i Kiñe Darius.+

2 I sôñ i nyônôs isaambok, i hilo hi nyônôs 21, lipôdôl li Yéhôva li bi lôl mpôdôl Hagai,+ li kalak le: 2 “Soho, bat Sôrôbabel+ man Séaltiel, ngomin i pes mbok i Yuda,+ bo Yôsua+ man Yéhôsadak,+ prisi keñi, ni bôt ba litén le: 3 ‘Njee ikété nan a bi tehe i ndap* ini i ngéda kôba, i ngéda i bééna lipém jé?+ Lelaa i nene nano? Baa i nene bé yañga jam i ngéda ni nhégha yo ni ndap bisu?’+

4 “‘Ndi nano a Sôrôbabel, bana ñem ngui; a Yôsua man Yéhôsadak, prisi keñi, bana ñem ngui.’ Hala nyen Yéhôva a mpot.

“‘Yak bé, ni bana ñem ngui a bôt ba loñ,+ gwela nson.’ Hala nyen Yéhôva a mpot.

“‘Inyule me yé lôñni bé,’+ hala nyen Yéhôva nu mintôñ mi gwét a mpot. 5 ‘Bigdana i jam me bi bôn bé i ngéda ni bi nyodi i Égiptô,+ mbuu wem u ngi yii lôñni bé.*+ Ni kon bañ woñi.’”+

6 “Inyule Yéhôva nu mintôñ mi gwét a nkal le: ‘Ndék ngéda, m’a kônde ki nyiñgis ngii, ni hisi, ni tuye lôñni nkoñngii.’+

7 “‘M’a nyiñgis biloñ gwobisôna, tik gwom* i biloñ gwobisôna y’a jôp munu ndap ini;+ m’a yônôs ki ndap ini ni lipém,’+ hala nyen Yéhôva nu mintôñ mi gwét a mpot.

8 “‘Silba i yé yem, yak gôl i yé yem,’ hala nyen Yéhôva nu mintôñ mi gwét a mpot.

9 “‘I lipém ndap ini i ga bana, li ga loo lipém i bééna kôba,’+ hala nyen Yéhôva nu mintôñ mi gwét a mpot.

“‘M’a lona ki nsañ hana homa nunu,’+ hala nyen Yéhôva nu mintôñ mi gwét a mpot.”

10 I hilo hi nyônôs 24 hi sôñ bôô, i nwii mi nyônôs ima mi ane i Darius, lipôdôl li Yéhôva li bi lôl mpôdôl Hagai,+ li kalak le: 11 “Yéhôva nu mintôñ mi gwét a nkal le: ‘Soho, bat biprisi kii mbén i nkal:+ 12 “Ibale mut a bééga két nuga ipubhaga i mpék u mbot yé, ndi mbot yé i tihba bret, tole nlamb, tole wai, tole ntén bijek umpe, baa bijek bi bi ga yila bipubhaga?”’”

Biprisi bi timbhe le: “To!”

13 I mbus, Hagai a bat le: “Ibale mut a yé nyega inyule a ntihba mim, ndi a tihba yom munu gwom bini, baa yom i, i ga yila nyega?”+

Biprisi bi timbhe le: “I ga yila nyega.”

14 Ha nyen Hagai a bi kal le: “‘Hala nyen i litén lini li yé, hala nyen yak loñ ini i yé i bisu gwem, hala ki nyen yak nson wonsôna u moo map u yé; hiki sesema ba nlona hana i yé nyega.’ Hala nyen Yéhôva a mpot.

15 “‘Ndi ibôdôl nano, soho tiblana hek pék* mu jam li: ilole ba nkéhi ngok i ngii ngok inyu maoñ ma témpel Yéhôva,+ 16 lelaa mam ba bé ha ngéda i? I ngéda mut a bé a ke i nwind u blé, a hoñlak le u ga ti 20 ma dihéga, ndi a kôhna ndik 10; yak ni i ngéda mut a bé a ke i waa wai, a hoñlak le a ga bana 50 ma dihéga, ndi a kôhna ndik 20;+ 17 me bi ôbôs minson mi moo manan nwominsôna, me ligis bijek binan, me boñ le bi njum,+ me ômle bé nop matan-ga, ndi to wada ikété nan a bi témb bé i meeni,’ hala nyen Yéhôva a mpot.

18 “‘Jon soho, ibôdôl len i hilo 24 hi sôñ bôô, tiblana hek pék* mu jam li, i hilo hikuu hi témpel Yéhôva hi bi téga;+ tiblana hek pék mu: 19 baa bijek bi ngi yii ikété mandugi?*+ Nkôô wai, e faigé, e grénad ni e ôlivé, bi num bé matam, hala bé? Ibôdôl ni len, m’a lona bisai.’”+

20 Lipôdôl li Yéhôva li bi témb li lôl Hagai inyu ngélé nyônôs iba, hilo 24 hi sôñ,+ li kalak le: 21 “Kal Sôrôbabel, ngomin i pes mbok i Yuda, le: ‘Me ga nyiñgis ngii ni hisi.+ 22 Me ga tjé biyééne bi biane, me mélés ki ngui i biane bi biloñ;+ me ga tjé bikak ni baluk gwo, bihosi bi ga kwo lôñni i bôt ba nluk gwo, ba ga nolna, hiki mut ni pansoñ i maasañ.’”+

23 “‘I hilo hi,’ hala nyen Yéhôva nu mintôñ mi gwét a mpot, ‘m’a yoñ we, a ngwélél wem Sôrôbabel,+ man Séaltiel,’+ hala nyen Yéhôva a mpot, ‘M’a yilha we kiki hilonde hi sitamp inyule wen me mpohol,’ hala nyen Yéhôva nu mintôñ mi gwét a mpot.”