SÔFÔNIA
1 Lipôdôl li Yéhôva li li bi lôl Sôfônia,* man Kusi, man Gédalia, man Amaria, man Hézékia, i dilo di Yôsia,+ man Amôn,+ kiñe Yuda:
2 “M’a sas gwom gwobisôna hana ’isi,” hala nyen Yéhôva a mpot.+
3 “M’a sas mut binam ni nuga.
M’a sas dinuni di ngii ni tjobi di tuye,+
ngok baagene*+ yak ni bibéba bi bôt;
m’a héya ki bôt ba binam hana ’isi,” hala nyen Yéhôva a mpot.
4 “M’a sambal woo wem inyu kolba Yuda,
ni inyu kolba bôt bobasôna ba nyééne i Yérusalem,
m’a héya hiki yom i Baal i i nyégle hana homa nunu,+
ni môl ma biprisi bi bakén ba banyambe ni biprisi bi bi mbégés bisat,+
5 yak i bôt ba ñôôp i ngii minyôl i bisu bi tjôdôt di ngii,+
ni i bôt ba ñôôp i bisu bi Yéhôva, ba kumuk soñ le ba ntéñbe ni nye,+
i nlélém ngéda, ba kumuk ki soñ le ba ntéñbe ni Malkam;+
6 ni i bôt ba nkôm Yéhôva mbus,+
ba nyéñ bé Yéhôva, to bat nye maéba.”+
7 Moma nwee i bisu bi Yéhôva Nwet Bayemlikok, inyule hilo hi Yéhôva hi yé bebee.+
Yéhôva a nkôôba sesema; yak i bôt a naña, a nyilha bo bapubhaga.
8 “I hilo hi sesema i Yéhôva, m’a kéés baane,
ni bon ba kiñe,+ ni bôt bobasôna ba ba nhaba mambot ma biloñ bipe.
9 I kel i, m’a kéés bôt bobasôna ba mbet i hikôma,*
ni i bôt ba nyônôs ndap nwet wap ni bisañ* ni malôga.
10 Yéhôva a mpot le: “I yokel nu,
minlondok mi ga lôl i nwemel u Tjobi,+
maéya ma ga lôl i nkoñ mondo u tison,+
mbimba ikeñi i lôlak i ngii dikôa.
11 Eegana, a bôt ba nyééne i Maktes,*
inyule bôt ba nyuñga bobasôna ba nôla;
yak bôt bobasôna ba nhek silba i kilô ba ntjiba.
12 Ha ngéda i, m’a tibil hun Yérusalem ni bilambe,
m’a kéés i bôt ba nhoñol le yom i nhéñél bé bo,* ba ba nkal i miñem nwap le:
‘Yéhôva a ga boñ bé loñge, a ga boñ bé to béba.’+
13 B’a kadal lingwañ jap, ba tjé mandap map.+
B’a oñ mandap, ndi ba ga yééne bé mu;
b’a bel nwom mi minkôô mi wai, ndi ba ga nyo bé wai i nlôl mu.+
14 Hilo hikeñi hi Yéhôva hi yé bebee!+
Hi yé bebee, hi nlo ki ngwéé ngwéé!+
Mbimba i hilo hi Yéhôva i nlol.+
Yokel, njogwét a mbégél.+
15 I hilo hi, hi yé hilo hi hiun,+
hilo hi njiiha ni hi nduña,+
hilo hi mbuk mbebi ni hi tjiba,
hilo hi jiibe ni hi jiibe likeñi,+
hilo hi ond ni hi ngangañ jiibe.+
16 Hilo ba nhem hioñ ni hi ba nleñ nlondok u gwét,+
inyu kolba bitison bi bi gwé mapénd ma ngui, ni inyu kolba minkum mi mandap mi mi yé i makas.+
18 To silba yap, to gôl yap bi ga la bé sôñ bo i hilo hi Yéhôva;+
inyule a ga ligis hisi hiosôna ni hié hi hiun hié,+
inyule a ga lona tjiba, tjiba ikeñi yaga, inyu bôt bobasôna ba nyééne hana ’isi.”+
2 Ilole litéak li nyon,
ilole kel i ntagbe kiki bikôgôô le mbebi i nkena,
ilole hiun hikeñi hi Yéhôva hi nlo i ngii nan,+
ilole hilo hi hiun hi Yéhôva hi nlo i ngii nan,
3 yéña Yéhôva,+ a bé bobasôna ba ni gwé suhulnyuu hana ’isi,
bé ba ni nôgôl matéak* mé ma telepsép.
Yéña telepsép, yéña suhulnyuu.
Bebek,* n’a ba ni sôli i hilo hi hiun hi Yéhôva.+
4 Inyule bôt b’a tjôô tison Gasa;
Askélôn a’ tjiba.+
5 “Ngoo ni bôt ba nyééne i ngwañ tuye, loñ i bôt ba Kéret!+
Lipôdôl li Yéhôva li yé inyu kolba bé.
A Kanaan, loñ i bôt ba Filistia, m’a tjé we,
kayéle mut nye ki nye a’ yégle bé.
6 Ngwañ tuye w’a yila homa bilém bi njél bikai,
homa bibee bi malép inyu batééda bémba ni bikotoo inyu mintômba.
7 W’a yila nkoñ u bôt ba Yuda ba ba nyégle;+
nyoo nyen b’a jél bikai.
Bikôkôa, ba nañlak ikété mandap ma Askélôn.
8 “Me bi nok diyana di Môab+ lôñni bisol bi Lôk Amôn,+
ba ba bi nyumbla litén jem, ba kadbaga ki le ba nkadal nkoñ wap.+
9 Jon me nkum soñ ni niñ yem,” hala nyen Yéhôva nu mintôñ mi gwét, Nyambe nu Israel a mpot,
“Môab a ga yila kiki Sôdôm,+
Lôk Amôn i yila kiki Gômôra,+
homa disañla di mput, homa bibee bi bas, ni ñoñ mba ni mba.+
Bôt ba litén jem ba ba nyégle, b’a kadal nkus wap;
bôt ba loñ yem ba ba nyégle, b’a kadal nkoñ wap.
10 I jam lini jon ba ga kôhna kiki nsaa u ngôk wap,+
inyule ba bé nyumbla, ba boñok ki litén li Yéhôva nu mintôñ mi gwét mam ni lôs.
11 Yéhôva a ga boñ le miñem mi bôô bo matjél;*
inyule a ga tjé* banyambe ba nkoñ ’isi bobasôna,
biôn bi biloñ gwobisôna bi ga ôôp i bisu gwé,*+
hiki ôn i bak i homa wé.
12 Yak bé bôt ba Étiôpia, n’a nôla ni pansoñ yem.+
13 A ga sambal woo wé i pes ñombok, a tjé Asiria,
a ga tjé Ninivé,+ a yilha nye nnumuk kiki ñoñ.
14 Mintén mi binuga bi bikai* nwominsôna mi ga ba nyoo.
Lolo lép ni nyik bi ga nañal ipôla mél ma mabebe mé.
Kiñ y’a nôga i winda.
Tjiba y’a ba i manwemel;
inyule a ga boñ le mabam ma sidar ma nene i mbamba.
15 I tison ini yon i bé ngôgôp, i bak i yii ngi nduña yo ki yo,
I kalak i ñem wé le: ‘Men me yé, numpe a ta bé kiki me.’
Nano, i nyila yom bilim,
liyééne li binuga bi bikai!
Hiki mut a ga tagbe ipañ yé, a ga tjamla, a hegek nye hinoo.”*+
3 Ngoo ni tison i ndok, i nyega, ni i i nkép bôt mbai!+
2 I bi nôgôl bé kiñ yo ki yo;+ i bi neebe bé bikodlene gwo ki gwo.+
I bi bôdlene bé Yéhôva ñem;+ i bi kôôge bé to Nyambe wé bebee.+
3 Baane bé ba yé kiki mbondo njéé i i nkônd.+
Bakéés ba yé kiki ngwo-njéé i i mpam juu;
to hés yada ba nyék bé le ba nla koñ kegla.
4 Bapôdôl bé ba yé bôt ba lipamal, bôt ba nliba.+
5 Yéhôva nu a yé ipôla yap a téé sép;+ a mboñ bé béba yo ki yo.
Hiki kegla, a niiga bo mbagi sép,+
hala a nset bé, nlélém kiki kel i nye.
Ndi mut ngitelepsép a nyi bé wonyuu.+
6 “Me bi tjé biloñ, minkum nwap mi mandap mi bugi.
Me bi tjé minloñ nwap kayéle mut nye ki nye a bé kil ha bé mu.
Bitison gwap bi bi tjiba, mut a ta ha bé mu; mut nye ki nye a nyééne ha bé mu.+
7 Me bi kal le: ‘Ibabé set w’a kon me woñi, u neebe ki bikodlene,’*+
Ndi ba bééna ndik ngôñ i boñ mam mabe.+
8 ‘Jon ni kônde bem* me,’+ hala nyen Yéhôva a mpot,
‘letee ni i hilo me ntelep inyu lona tjiba,*
inyule makidik mem ma yé le me kot biloñ, me kot ki biane,
inyu sugle bo hiun hiem, hiun hiem hiosôna;+
inyule me ga ligis hisi hiosôna ni hié hi hiun hiem.+
9 Inyule m’a yilha hilémb hi matén hilémb hipubi,
inyu boñ le bôt bobasôna ba bégés jôl li Yéhôva,
10 Ibôdôl i mambok ma balom ba Étiôpia,
i bôt ba nsoohe me, minsandak nwem mi bôt, ba ga lona me likébla.+
11 I hilo hi, u ga wo ha bé nyuu
inyu mam mabe momasôna u bi boñ inyu ndogbene me,+
inyule m’a héya bôt ba ngôk i weeni;
u ga ba ha bé ki ngôk i hikôa hiem hipubhaga.+
12 Me ga nwas le litén li suhulnyuu ni li ñem nsôhga li yégle i weeni,+
ba ga solbene ki i jôl li Yéhôva.
13 I bôt ba Israel ba nyégle,+ ba ga boñ ha bé mam ma ngitelepsép;+
ba ga pot ha bé bitembee, bipôdôl bi malôga bi ga pam ha bé i manyo map;
ba ga je,* ba nañlak ibabé le mut nye ki nye a kônha bo woñi.”+
14 Konok maséé, a ngond Siôn!
Leñek diléla, a Israel!+
Hagak, u kon ki maséé ni ñem woñ wonsôna, a ngond Yérusalem!+
15 Yéhôva a nhéya mbagi nôgôs a bi pémés inyu yoñ.+
A ntimbis ñoo woñ ni mbus.+
Yéhôva, Kiñe Israel, a yé i weeni.+
W’a kon bé ndutu yo ki yo woñi.+
16 I hilo hi, ba ga kal Yérusalem le:
“U kon bañ woñi, a Siôn.+
Moo ma tomb bañ we.
17 Yéhôva Nyambe woñ a yé i weeni.+
A yé Nyambe nu lipémba, a ga tohol we.
A ga hak inyu yoñ ni ngandak maséé.+
Ñem wé w’a ba nwee,* inyule a yé maséé i unda we gwéha.
A ga kon maséé inyu yoñ, a leñ ki diléla.
18 Ba ga kot i bôt ba nok ndutu inyule mangand moñ ma nhéñél bo;+
ba bé haa ni we inyule ba bi nihbe diyana inyu yoñ.+
19 Nun-ki! Ha ngéda i, m’a kolba bôt bobasôna ba ntééñga we;+
m’a tohol ba ba yé bibôk,+
m’a kot ba ba yé nsandak.+
M’a boñ le ba kôhna bibégés ni jôl lilam
ikété biloñ gwobisôna i het ba bé wéha bo nyuu.
20 Ha ngéda i, m’a témbna bé i loñ nan,
ha ngéda i, m’a kot bé.
Inyule m’a boñ le ni bana jôl lilam ni bibégés+ ikété biloñ bi nkoñ ’isi gwobisôna,
i ngéda m’a témbna bôt banan ba ba bi ke i minkôm, mis manan ma tehge,” hala nyen Yéhôva a mpot.+
Hala a nkobla le “Yéhôva a nsôô.”
I nene le mam ma gwé maada ni libégés bisat mon ba mpôdôl hana.
Tole “homa a nyôgi.” I nene le ba mpôdôl i homa a nyôgi i het yééne ane i kiñe i bé i téé.
Tole “njôô.”
I nene le a yé libôga li Yérusalem li li yé bebee ni nwemel u Tjobi.
Ni hop Lôk Héber, “i bôt ba yôgi i binañi gwap,” wengoñle i waa wai.
Ni hop Lôk Héber, “minla.”
Ni hop Lôk Héber, “mbagi.”
Tole “I nla ba le.”
Tole “ñem kosi.”
Tole “a’ tôñ bo.”
Tole “a ga kônha bo woñi.”
Tole “kudus.”
Tole “bi ga bégés nye.”
Ni hop Lôk Héber, “Hiki nuga i ngim loñ.”
Ni hop Lôk Héber, “a ga hem hiôa, a hôdôk bikut.”
Tole “mabéhna.”
Tole “kogse.”
Tole “ni hônba i bem.”
I nla ki ba, “me ntelep inyu bok mbogi.”
Ni hop Lôk Héber, “tuu ipañ tuu.”
Tole “ba ga je bikai.”
Ni hop Lôk Héber, “A’ mom nwee ikété gwéha yé.”