YÔNA

1 Lana nyen Yéhôva a bi pôdôs Yôna,*+ man Amitai, a kal nye le: 2 “Telep, kee i soso tison le Ninivé,+ legel bôt ba tison le m’a tjé tison yap, inyule béba yap i mpam i maôô mem.”

3 Ndi Yôna a telep, a ke ngwéé i Tarsis, haa ni Yéhôva; a sôs i Yôpé, a koba sitima i i nke i Tarsis. Kiki a mal saa ndiyô, a jôp i sitima inyu ke i Tarsis ni i bôt ba bé mu sitima, haa ni Yéhôva.

4 Ha nyen Yéhôva a bi om mbebi i bééna ngui i ngii tuye, mbuk mbebi a kahal hôñ kayéle sitima i bé bebee ni yin. 5 Basal i sitima ba kon woñi ngandak kayéle hiki mut a bôdôl sébél nyambe wé i mahôla. Ba bôdôl ki leñ gwom bi bi bé mu sitima i tuye inyu hôyôs yo.+ Ndi Yôna a bi sôs ikétékété sitima, nyoo nyen a bé a niñi, a wo yaga ’ilo. 6 Nkena sitima a tiige nye bebee, a kal nye le: “Inyuki u nke ’ilo? Telep, lôndôl Nyambe woñ! Bebek le bañga Nyambe a ga tôñ bés, le di wo bañ.”+

7 I mbus, basal i sitima ba kalna le: “Loga, di leñ mbam+ inyu yi njee a nlona bés i ndutu ini.” Jon ba bi leñ mbam, mbam i kwél Yôna.+ 8 Ba bat nye le: “Soho kal bés, njee a nlona bés i ndutu ini? U nsal imbe bôlô? U nlôl hee? U nlôl imbe loñ? U yé man lôk kii?”

9 A timbhe bo le: “Me yé man Lôk Héber, me nkon Yéhôva woñi,* Nyambe nu ngii, Nu a bi hek tuye ni nnumuk ’isi.”

10 Ha nyen i bôt bana ba bi kônde kon woñi, ba bat nye le: “Inyuki u mboñ i nya jam ini?” (I bôt bana ba bi yi le Yôna a bé ke Yéhôva ngwéé, inyule nyemede a bi kal bo hala.) 11 Jon ba bi bat ki nye le: “Kii di boñ ni we, le tuye a mom nwee?” Inyule mbuk mbebi a bé hôñ ndigi, hôñ ni hôñ i ngii tuye. 12 A timbhe bo le: “Ni begee me, ni leñ me i tuye, ha nyen tuye a ga mom nwee; inyule me nyen me nlona bé i mbuk mbebi nunu.” 13 Ndi i bôt bana ba noode yaga* témbna sitima i ngwañ tuye, ba luguk yo ni ngui yap yosôna, ndi ba bi la bé, inyule mbuk mbebi a bé hôñ ndigi, hôñ ni hôñ i ngii tuye nu a bé kéña bo.

14 Jon ba bi yemhe Yéhôva, ba kal le: “Éé a Yéhôva, soho, u nwas bañ bés le di wo inyu mut nunu!* U ôm bañ bés nsohi inyu nyemb i mut nu a yé nginsohi, inyule we a Yéhôva, u mal boñ i jam li nlémél we.” 15 I mbus ha, ba begee Yôna, ba leñ nye i tuye; tuye a mom nwee. 16 Ha nyen i bôt bana ba bi lôôha kon Yéhôva woñi,+ ba ti Yéhôva sesema, ba bôn ki le ba ga gwélél nye.

17 Nano, Yéhôva a ep soso hiobi le a mil Yôna. Yôna a yén dilo daa*+ ikété libum li hiobi.

2 Yôna a soohe Yéhôva Nyambe wé, a bak ikété libum li hiobi,+ 2 a kal le:

“Me bi lôndôl Yéhôva ikété ndutu yem, a timbhe me.+

Me bat mahôla, me bak ikétékété* Soñ.*+

U bi nok kiñ yem.

Mangudga ni minoñgo bi bi hô me.+

 4 Ha nyen me bi kal le: ‘U mal luhul me i bisu gwoñ!

Lelaa ni m’a memle ki témpel yoñ pubhaga?’

Bikai bi lép bi bi libda me i ño.

 6 Me bi sôs letee ni nyoo isi dikôa.

Hisi hi kwéhne me makôga mé* i boga ni boga.

Ndi u bi témbna me i niñ, a Yéhôva Nyambe wem.+

 7 I ngéda me bé bebee ni nimis niñ yem, Yéhôva nyen me bi hoñol.+

Ha nyen masoohe mem ma bi pam i weeni, letee ni i témpel yoñ pubhaga.+

 8 I bôt ba mbégés bisat bi bi gwé bé nseñ, ba ntjôô nu a ñunda bo loñgeñem.*

 9 Ndi me m’a ti we mayéga, m’a ti ki we bisesema.

I yom me mbôn, m’a yônôs yo.+

Tohi i nlôl yak Yéhôva.”+

10 Sôk i nsôk, Yéhôva a ti hiobi oda, hi lo Yôna i ngwañ tuye.

3 I mbus, Yéhôva a pôdôs Yôna ngélé i nyônôs iba, a kal nye le:+ 2 “Telep, kee i soso tison le Ninivé,+ legel bôt ba tison mam me nkal we.”

3 Ha nyen Yôna a bi telep, a ke i Ninivé+ kiki Yéhôva+ a bi kal nye. Ninivé a bé yaga soso tison:* i bé béda dilo daa inyu kiiña tison yosôna.* 4 I ngéda Yôna a bi jôp i tison, a ke ngim kel yosôna, a kalak le: “I ngi yii ndigi 40 ma dilo, wee Ninivé a ntjiba.”

5 Ha nyen bôt ba Ninivé ba bi hémle Nyambe,+ ba téé ngéda i sôga je, ibôdôl i mimañ mi bôt letee ni i disiina di boñge; bobasôna ba haba minsugut. 6 I ngéda kiñe Ninivé i bi nok i nwin unu, i nyodi i yééne yé ane, i héya mbot yé kiñe, i haba nsugut, i yén i libu. 7 A om ki le ba legel bôt ba Ninivé le:

“Kiñe ni mintôô nwé mi bôt ba nti ini mbén le: ‘Mut to wada, to lém, to nyaga, to ntômba, ba nlama bé je yom yo ki yo. Ba nlama bé je, ba nlama bé to nyo malép. 8 Bôt ni bilém ba haba minsugut, ba lôndôl Nyambe ni ngui yap yosôna, ba nwas ki maboñok map mabe ni mam ma ntina njôô. 9 Njee a nyi? Bebek le bañga Nyambe a ga héñha mahoñol* mé, a nwas ki hiun hié hikeñi inyu boñ le di wo bañ.’”

10 I ngéda bañga Nyambe a bi tehe i yom ba bi boñ, lelaa ba bi nwas maboñok map mabe,+ Nyambe a héñha mahoñol,* a lona ha bé kogse a bi kal le a nlona.+

4 Ndi hala a bi lémél bé Yôna to ndék, a unup ki ngandak. 2 Jon a bi soohe Yéhôva, a kal le: “Éé a Yéhôva, baa i jam lini bé jon me bé kal i ngéda me bé me ngi yii i loñ yem? Inyu hala nyen me bé sômbôl ke ngwéé i Tarsis;+ inyule me bé yi le u yé Nyambe nu konangoo ni nu ñem ngôô,* nu a mpala bé unup, nu a ntéñbe ki i unda ngandak gwéha,+ Nyambe nu a ta bé maséé i tehe bape ba nok ndutu. 3 Nano ni, a Yéhôva, soho yoñ niñ yem, inyule i yé nseñ le me wo iloole me niñ.”+

4 Yéhôva a bat nye le: “Baa u kôli unup ngandak hala?”

5 Ha nyen Yôna a bi nyodi i tison, a ke i pes likôl i tison, a yén ’isi. A ôñôl nyemede pele, a yén mu, isi yiye, inyu tehe i yom i ga pémél tison.+ 6 Yéhôva Nyambe a boñ le bebela i oo, hala wee bék,* kayéle i bet, i hô ño u Yôna, inyu ti nye yiye, ni inyu ti nye hogbe. Yôna a kon maséé ngandak ni i bebela i.

7 Ndi i kel i bé noñ, i maye ma kel, bañga Nyambe a ep nsoñ le u je bék,* bék i kôt. 8 I ngéda hiañgaa hi bi bôdôl bai, Nyambe a ep mbebi i nlôl i pes likôl, i légék; hiañgaa hi bi lôôha bép Yôna i ño kayéle a kwo lihiô. A bé yéñ le a wo, a kalak le: “I yé nseñ le me wo iloole me niñ.”+

9 Nyambe a bat Yôna le: “Baa u kôli unup ngandak hala inyu bebela?”*+

Ha nyen Yôna a bi timbhe le: “Ñ, me kôli unup, me kôli yaga unup i nya i yé le ngôñ i yé me le me wo.” 10 Ndi Yéhôva a kal le: “U ntôñ i bebela* ini, ki le u bi sal bé yom yo ki yo inyu bana yo, we bé to nyen u bi boñ le i oo; i bi nañ u wada, i wo ki u wada. 11 Baa me, me kôli bé tôñ tison ikeñi le Ninivé,+ i het iloo 120 000 bôt ba ba nyi bé to mahéñha ipôla loñge ni béba,* ibabé i soñgol ngandak yap bilém?”+