ÉZÉKIEL

1 I nwii mi nyônôs 30, i hilo hi nyônôs hitan hi sôñ i nyônôs ina, i ngéda me bé lôñni i bôt ba bé i minkôm,+ bebee ni lom Kébar,+ ha nyen ngii i bi yibla, me bôdôl tehe biyiinda bi Nyambe. 2 I hilo hi nyônôs hitan hi sôñ, hala wee i nwii mi nyônôs mintan le Kiñe Yéhôyakin+ a bi ke i minkôm, 3 ha nyen Yéhôva a bi pôdôs me Ézékiel,* man prisi le Buzi, bebee ni lom Kébar, i loñ i bôt ba Kaldéa.+ Nyoo nyen woo u Yéhôva u bi kahap i ngii yem.+

4 Kiki me bé béñge, me tehe mbuk mbebi+ a nlôl i ñombok, ni ond ikeñi lôñni hié hi nloñ ni ngui,*+ mapubi ma bé kéña gwo, ma bayak. Ngim yom i bé mu ñemkété hié, i pôn-ga puba gôl.*+ 5 Gwom bi bé mukété hié, bi bé nene kiki bihégél bina bi bi niñ,*+ bi pôn-ga mut binam. 6 Hiki hégél i bééna masu ma-na ni bipapai bina.+ 7 Makôô map ma bé ma téé le pet, ma pôn-ga bipal bi man nyaga, ma bayak kiki mamuna le ba nse loñge.+ 8 I bihégél bini bi bééna moo ma mut binam isi bipapai gwap, mu bipes gwo bina, hiki hégél i ban-ga masu ni bipapai. 9 Hiki hégél i bééna bipapai bi bi bé tihbana. Bihégél bi bi niñ* bi bé hielba bé i ngéda bi bé ke; hiki yada mu i bé ke ndigi i bisu gwé.+

10 Lana nyen hiki hégél i bé nene: i bééna su u mut binam, su u mbondo njéé+ i pes walôm, su u nyaga+ i pes waé, gwo bina bi ban-ga ki su+ u nyôgôl.+ 11 Hala nyen masu map ma bé. Bipapai gwap bi bé nsamblak, bi nunuk ngii. Hiki hégél i bééna bipapai biba bi bi bé tihbana, i ban-ga ki bipapai biba bi bi bé hô nyuu yé.+

12 Hiki hégél i bé ke ndigi i bisu gwé; i homa mbuu u bé tinde gwo i ke, nyoo nyen bi bé ke.+ Bi bé hielba bé i ngéda bi bé ke. 13 Bihégél bi bi niñ* bi bé nene kiki makalak ma ma nloñ; yak ngim yom, i i bé pôna nwai mi mi nloñ ni ngui, i bé kenek, i lok ipôla i bihégél bi, yak nwegnwek a pémlak mu hié.+ 14 I ngéda bihégél* bi bé ke, bi lok, liké jap ni malo map bi bé kiki nwegnwek.

15 Kiki me bé béñge bihégél bi bi niñ, ipañ hiki hégél i i gwé masu ma-na,+ me bi tehe kôô kak wada u téé ’isi. 16 Makôô ma kak momasôna ma bé bai kiki krisôlitô, mo ma-na ma bé nlélém. Ba bi ôô mo i nya i yé le hiki kôô u bé nene wengoñle ba nsom kôô kak wada ikété uu kôô umpe.* 17 I ngéda ma bé ke, ma bé le ma ke to imbe pes mu bipes gwo bina ibabé le ma hielba. 18 Bikeñgee bi makôô ma kak bi bé bi nyôgi kiyaga kayéle bi bé kônha woñi, bi bak ki bi yôni ni mis homa nyensôna.+ 19 Hiki ngéda bihégél bi bé bi ke, yak makôô ma kak ma bé ma ke ni gwo; i ngéda bi bé bi nyodi ’isi, yak makôô ma bé ma nyodi ’isi.+ 20 Bi bé ke i homa mbuu u bé tinde gwo i ke, bi bé ke to hee homa mbuu u bé tinde gwo i ke. Makôô ma kak ma bé nyodi ’isi i nlélém ngéda ni bihégél, inyule i mbuu u bé kena bihégél bi bi niñ* won u bé kena yak makôô ma kak. 21 I ngéda bihégél bi bi niñ bi bé ke, yak makôô ma kak ma bé ma ke; i ngéda bi bé bi telep, yak makôô ma kak ma bé ma telep. I ngéda bihégél bi bé bi nyodi ’isi, yak makôô ma kak ma bé ma nyodi ’isi i nlélém ngéda ni bihégél, inyule i mbuu u bé kena bihégél* won u bé kena yak makôô ma kak.

22 Yom i bé i ngii miño mi bihégél bi bi niñ, i pôn-ga nwandlak yom i i bé bai kiki minluñ mi ais mi mi mbai kiyaga, i bak nsamblak i ngii miño nwap.+ 23 Isi nwandlak yom, hiki hégél i bééna bipapai bi bi bé nsamblak, bi nunuk ngii,* bi tihbanaga. Hiki hégél i bééna bipapai biba inyu hô pes yada i nyuu yé, ni bipapai biba bipe inyu hô ii pes nyuu ipe. 24 I ngéda me bi nok mbimba i bipapai gwap, i bé kiki mbimba i hundul, i bak kiki mbimba i Nu ngui yosôna.+ I ngéda bihégél bi bi niñ bi bé bi ke, mbimba yap i bé kiki mbimba i ntôñ u gwét. I ngéda bihégél bi bé bi telep, bi bé bi suhus bipapai gwap.

25 Nyoo i ngii nwandlak yom i i bé i ngii bihégél* bi bi niñ nyen kiñ i bé pémél. (I ngéda bihégél bi bé bi telep, bi bé bi suhus bipapai gwap.) 26 Yom yada i bé i ngii nwandlak yom i i bé i ngii bihégél,* i nen-ge kiki ngok safirô,+ i pôn-ga yééne ane.+ Nu a bé a yii mu yééne ane nyoo i ngii, a bé pôna mut binam.+ 27 Ibôdôl i homa a bé wengoñle bôbôk yé, u bedek i ngii, me bi tehe ngim yom i mbai kiki puba gôl,*+ i pôn-ga hié hi hi mbai ni ngui; ibôdôl i bôbôk yé, u sôhôk ’isi, me bi tehe ki ngim yom i mpôna hié.+ Mapubi ma mbai ma bé kéña nye bipes gwobisôna, 28 ma pôn-ga nyum+ ikété ond i i mpam i kel nop. Hala nyen mapubi ma ma bé kéña nye, ma bayak, ma bé nene. Ma bé pôna lipém li Yéhôva.+ I ngéda me bi tehe mo, me ôôp, me ôm mbom ’isi, ha nyen me bi kahal nok kiñ i mut a mpot.

2 I mbus, a kal me le: “A man mut,* telep, le ndi me pôdôs we.”+ 2 I ngéda a bi pôdôs me, mbuu u Nyambe u jôp ikété yem, u téé+ ki me inyu boñ le me emble nu a bé pôdôs me.

3 A kal ki me le: “A man mut, me yé i ep we yak bon ba Israel,+ nyoo i biloñ* bi bi yé ndok, bi ndogbene ki me.+ Bo ni basôgôlsôgôl bap ba bi bôk mambén mem letee ni len.+ 4 Me yé i ep we yak bon ba ndok ba ba gwé minledek mi miñem,+ u ga kal bo le: ‘Lana nyen Nwet Bayemlikok le Yéhôva a mpot.’ 5 Ndi kiki ba yé litén li li yé ndok, to ba ñemble we, to ba ñemble bé we,+ ba ga yi yaa le mpôdôl a bé ipôla yap.+

6 “Ndi we, a man mut, u kon bañ bo woñi,+ u kon bañ to i yom ba mpot woñi, to hala kiki maum ni biloo*+ bi nkéña we ni le u yiine ipôla diéé di nyoo. Ba yé litén li li yé ndok, ndi u kon bañ i mam ba mpot woñi,+ to masu map ma boñ bañ we le u sehla.+ 7 U ga kal bo i yom me mpot, to ba ñemble, to ba ñemble bé. Ni maliga, ba yé litén li bôt ba ndok.+

8 “Ndi we, a man mut, emble i yom me nkal we. U ndogop bañ kiki litén li bôt ba ndok lini. Nahal nyo, u je i yom me yé i ti we.”+

9 Kiki me bé béñge, me tehe mut a nsamblene me woo,+ nhôôk kaat+ u bak nye mu. 10 I ngéda a bi wandal yo i bisu gwem, matila ma bé mu, i bisu ni i mbus.+ I mam ma bé ntilga mu ma bé tjémbi di maéya, miñumnde ni minlénd.+

3 A kal me le: “A man mut, je i yom i yé i bisu gwoñ.* Je nhôôk kaat unu; i mbus, u kee u pôdôs bôt ba litén li Israel.”+

2 Ha nyen me bi nahal nyo, a jés me nhôôk kaat u. 3 A kônde le: “A man mut, je nhôôk kaat me yé i ti we, le u yônôs libum joñ ni wo.” Ha nyen me bi kahal je wo, u bé nél me mu nyo kiki wéi.+

4 I mbus, a kal me le: “A man mut, kenek yak bôt ba litén li Israel, u kal bo i yom me mpot. 5 Inyule me ñom bé we yak bôt ba ba mpot hop u u nlet i nok, to hop u u nyiba bé, ndi yak bôt ba litén li Israel. 6 Me ñom bé we yak bôt ba ba mpot hop u u nlet i nok, to hop u u nyiba bé, to hop u u ngwélél bibuk u nla bé nok. Ibale me ep we i boni, ki ba bak le ba emble we.+ 7 Ndi bôt ba litén li Israel ba ga tjél emble we inyule ba ntop bé emble me.+ Bôt ba litén li Israel bobasôna ba gwé nledek ño ni nledek ñem.+ 8 Emble! Me mboñ le u bana nledek su nlélém kiki bomede, me mboñ ki le mbom yoñ i let nlélém kiki mbom+ yap. 9 Me mboñ le mbom yoñ i let kiki diamañ, i let yaga iloo ngok.*+ Ba yé litén li li yé ndok, ndi u kon bañ bo woñi, to masu+ map ma boñ bañ we le u sehla.”

10 A kônde kal me le: “A man mut, emble mam momasôna me nkal we, u tééda ki mo mu ñem woñ. 11 Kee yak bôt ba litén*+ joñ ba ba yé i minkôm, u pôdôs bo. To ba ñemble we, to ba ñemble bé we,+ kal bo le: ‘Lana nyen Nwet Bayemlikok le Yéhôva a mpot.’”

12 Ha nyen mbuu* u Nyambe u bi begee me,+ me nok kiñ ikeñi i mbus yem i nkal le: “Lipém li Yéhôva li kôhna bibégés nyoo i homa a nyééne.” 13 Me bi nok mbimba i bipapai bi bihégél bi bi niñ i ngéda bi bé tihbana,+ me nok ki mbimba i makôô ma kak ma ma bé ipañ yap,+ me nok yak kiñ ikeñi. 14 Ha nyen mbuu u Nyambe u bi pa me, u kena me; me bi ke ni lôlha ñem, me bak ñunbak kiyaga, yak woo u Yéhôva u bi kahap yaga i ngii yem. 15 Jon me bi ke yak bôt ba ba bé i minkôm i Tel-Abib, ba ba bé yééne bebee ni lom Kébar,+ me yén nyoo i homa ba bé yééne; me yén ni bo dilo disaambok, me bak kiki nhelek mut.+

16 I ngéda dilo disaambok di bi mal, Yéhôva a pôdôs me, a kal me le:

17 “A man mut, me ntéé we mut faa* i litén li Israel;+ i ngéda u ga nok bibuk bi mpémél i nyo wem, u ga béhne me bo.+ 18 Ibale me nkal béba mut le: ‘U ga wo yaga,’ ndi we u béhe bé nye, u pôdôs bé to béba mut inyu béhe nye le a tjôô liboñok jé libe inyu boñ le a niñ,+ wee a ga wo inyu liboñok jé libe inyule a yé béba,+ ndi m’a ôm we nsohi le wen u mboñ le a wo.*+ 19 Ndi ibale u mbéhe béba mut, to hala, a tjôô bé béba yé, to liboñok jé libe, wee a ga wo inyu liboñok jé libe, ndi we, u ga sôñ yaga niñ yoñ.+ 20 Ndi ibale mut a téé sép a ntjôô njel telepsép, a boñ jam libe,* m’a bii ngok baagene i bisu gwé, a wo+ ki. Ibale u bi béhe bé nye, wee a ga wo inyu béba yé, ba ga bigda bé to maboñok mé ma téé sép, ndi m’a ôm we nsohi le wen u mboñ le a wo.*+ 21 Ndi ibale u bi béhe mut a téé sép le a boñ bañ béba, ndi a boñ bé béba, wee a ga niñ inyule u bi béhe nye,+ yak wemede u ga sôñ niñ yoñ.”

22 Ha homa nu nyen woo u Yéhôva u bi kahap i ngii yem, a kal ki me le: “Kee i tegep mbok, nyoo nyen m’a pôdhene we.” 23 Jon me bi telep, me ke nyoo i tegep mbok, ndi nun-ki, lipém li Yéhôva li bé nyoo,+ li bak kiki lipém me bi tehe bebee ni lom Kébar,+ jon me bi ôôp, me ôm mbom ’isi. 24 Ha nyen mbuu u Nyambe u bi jôp ikété yem, u boñ me le me telep;+ i mbus, Nyambe a pôdôs me, a kal me le:

“Ke jôp i ndap yoñ, u yipba. 25 A man mut, ba ga lép we minkôô, ñ, ba ga kañ we ni nwo inyu boñ le u la ha bañ ke i boni. 26 M’a boñ le hilémb hioñ hi adbe i hias hioñ, le u kwoo mbuk, u laa ha bé kônd bo. Ni maliga, ba yé litén li bôt ba ndok. 27 Ndi i ngéda me ga pôdôs we, me ga yibil nyo woñ, ha nyen u ga kal bo le:+ ‘Lana nyen Nwet Bayemlikok le Yéhôva a mpot.’ I mut a ñemble+ we, a emblege we; yak i mut a ntjél emble we, a tjélék emble we. Ni maliga, ba yé litén li bôt ba ndok.+

4 “Ndi we, a man mut, yoñ brik yada, u bii yo i bisu gwoñ. Kédél titii i tison Yérusalem mu ngii brik. 2 Kéña yo,+ oñ lipénd inyu kéña yo,+ u bédés ki lingund li biték inyu jôs yo,+ u oñ ki bahoma ba liyééne inyu bôt ba gwét mu mapañ ma tison, u kéña ki yo ni basoso ba minkok inyu bôk lipénd.+ 3 Yoñ flapan i kei, u téé yo le i ba kiki libap li bikei* ipôla we ni tison. I mbus, bok tison mis; hala nyen tison i ga ba nkéñga, we yaga nyen u ga kéña yo. Hala a yé yimbne inyu litén li Israel.+

4 “I mbus, nañle i pes yoñ waé, mu* nyen u ga beglene liboñok libe li litén li Israel.+ U ga begel liboñok jap libe dilo tjodisôna u mba u niñne mu pes i. 5 M’a nyégsa we i boñ hala 390 dilo; i nsoñgi u, u yé nsoñgi nwii ba bi boñ mam mabe.+ Hala nyen u ga begel liboñok libe li litén li Israel. 6 Boñ hala letee le i dilo di, di tagbe.

“I mbus, u ga témb u nañal, ndi lini lisañ u ga nañle pes yoñ walôm. U ga begel liboñok libe li litén li Yuda+ 40 ma dilo. Hilo hiada inyu nwii wada, ñ, hilo hiada inyu nwii wada; i jam li jon me nkit le u boñ. 7 U ga bok Yérusalem mis mu kiki a yé nkéñga,+ u ma hôt binam bi mbot yoñ; ha nyen u ga añal mandutu ma ga kwél tison.

8 “Emble! M’a kañ we ni minkôô le u hielba bañ, kayéle u nyodi i pes yada inyu nañle i pes ipe, letee dilo u nkéña tison di yon.

9 “U ga yoñ blé, ni kôn,* ni kôn ikeñi,* ni dinjañga di kôn, ni mil, ni ntén blé umpe;* u ha gwo ikété hibee le u boñ bret inyu yoñ. U ga je yo 390 dilo, hala wee mu dilo tjodisôna u mba u niñne mu pes yoñ waé.+ 10 I bijek u ga je hiki kel bi ga ba hihéga hi 20 ma sékel.* U ga je gwo i ntéak ngéda.

11 “Yak malép u ga nyo ma ga ba hihéga hiada hi hin* ikété disamal. U ga nyo mo i ntéak ngéda.

12 “U ga je i bret ini kiki ba nje ngiiña bret i kôn; u ga bôm yo i ngii minkôt mi tjibi mi mut binam, bomede ba tehge.” 13 I mbus, Yéhôva a kal le: “Hala nyen bon ba Israel ba ga je bret gwap, bi bak yom nyega, nyoo i biloñ i het me ga sand bo.”+

14 Ha nyen me bi kal le: “Hala bé, a Nwet Bayemlikok le Yéhôva! Ibôdôl me mañge ipam nano, me maa bé hindis memede le me je minsôn mi nuga ba nkoba le i nwo, to minsôn mi nuga le nuga bikai i mpat,+ to minsôn mi nuga i i yé nyega* mi ma jôp bé i nyo wem.”+

15 Jon a bi kal me le: “Loñge, u nla gwélél tjibi di nyaga iloole u gwélél tjibi di mut, mu ngii tjibi di nyaga nyen u ga bumul bret yoñ.” 16 A kal ki me le: “A man mut, m’a boñ le bijek* bi mal i Yérusalem.+ Ba ga hek ngaba yap bret i kilô,+ ba je ki gwo ni ngandak nduña. Ba ga nyo ki hihéga hiap hi malép, ba sehlaga;+ 17 inyu boñ le i ngéda bret ni malép bi ga héñél bo, ba ga béñgna, ba bak nhelek, ba tjiba ki inyu liboñok jap libe.

5 “Ndi we, a man mut, yoñ pansoñ i nhoo, u gwélél yo kiki hikéñ* hi mut a nkohol miño. Homb ño woñ ni mayéé moñ; i mbus, yoñ kilô,* u hek tjôñ tjoñ ni mayéé moñ, u bagal gwo môga maa. 2 I ngéda dilo u nkéña tison di ga yon,+ u ga ligis jôga jada ikété môga maa mukété tison. I mbus, u ga yoñ ki jôga lipe jada ikété môga maa, u señde jo ni pansoñ mu mapañ momasôna ma tison.*+ Lini jôga jada li nyégle, u ga nwes jo i mbebi; m’a sodol pansoñ, me noñ jo.+

3 “U ga yoñ ki ndék mu, u kañ yo mu mbot* yoñ. 4 U ga kônde ki yoñ ndék mu, u leñ yo i hié, u ligis yo. I hié hi, hi ga tjama mu litén li Israel+ jolisôna.

5 “Lana nyen Nwet Bayemlikok le Yéhôva a mpot: ‘Yérusalem nunu. Me bi téé nye i ñemkété biloñ, minkoñ mimpe mi bak mu mapañ mé momasôna. 6 Ndi a bi ndogbene matéak mem ni matiñ mem, a boñok mam mabe iloo minkoñ ni biloñ bi bi nkéña nye,+ inyule ba bi tjél matéak mem, ba nôgôl bé to matiñ mem.’

7 “Jon lana nyen Nwet Bayemlikok le Yéhôva a mpot : ‘Hala kiki ni bi boñ mam mabe iloo biloñ bi bi nkéña bé, ni tééda bé matiñ mem, ni noñ bé to matéak mem, ndi ni noñ matéak ma biloñ bi bi nkéña bé,+ 8 inyu hala nyen lana nyen Nwet Bayemlikok le Yéhôva a nkal: “A tison Yérusalem,+ memede m’a kolba we, m’a lona we mbagi nôgôs, biloñ bipe bi tehge.+ 9 M’a boñ we mam me maa bé boñ, ni mam m’a boñ ha bé kekikel, inyu mam momasôna u bi boñ, ma ma nsuñgaha ñem.+

10 “‘“Jon basañ ba ba yé i weeni ba ga je bon bap bôlôm,+ yak bon bôlôm ba je basañ bap; m’a lona ki we mbagi nôgôs, me sand ki ba bobasôna ba nyégle i weeni, hiki mut a’ yoñ yé njel.”’*+

11 “Jon Nwet Bayemlikok le Yéhôva a nkal le: ‘Me nkum soñ ni niñ yem le, hala kiki u bi hindis homa wem mpubhaga ni bisat gwoñ bi nyega gwobisôna, lôñni maboñok moñ momasôna ma ma nsuñgaha ñem,+ yak me, me ga tjôô we; me ga* kônôl bé we ngoo, to tôñ, me ga tôñ bé we.+ 12 Mukété bôt ba nyééne i weeni, himala hi kon hi ga nol jôga jada ikété môga maa, tole njal yon i ga tjé bo nyoo i weeni. Jôga lipe jada ikété môga maa li ga nôla ni pansoñ+ mu mapañ moñ momasôna. Ndi lini jôga jada li nyégle ikété môga maa, m’a sand jo, hiki mut a’ yoñ yé njel;* m’a sodol pansoñ, me noñ bo.+ 13 Ha nyen hiun hiem hi ga mal, yak liyot me gwééne bo li ga sôs kayéle me kôhna hogbe.+ I ngéda m’a mal kôp hiun hiem i ngii yap, ba ga yi yaga le, me Yéhôva, men me bi pot inyule me mbat le ba bégés ndik metama.+

14 “‘M’a yilha we homa nu a ntjé, me yilha ki we yom diyana ikété biloñ bi bi nkéña we, ni i mis ma hiki mut a ntagbene ha.+ 15 Ikété biloñ bi bi nkéña we, u ga yila yom diyana,+ ni yom mandegle, ni ndémbél inyu béhe bape, ni yom i i nkônhana woñi i ngéda m’a lona we mbagi nôgôs ikété hiun hiem, ni i ngéda m’a kogse we bañga bañga. Me, Yéhôva, me mal pot.

16 “‘M’a éble bé njal le i tjé bé kiki makoñ ma ma nola. I makoñ m’a éble bé ma ga nol bé.+ M’a mélés bijek binan* inyu boñ le njal i ba nnayak i bééni.+ 17 I bôt ba nyééne i weeni, m’a éble bo njal ni binuga bi bikai,+ gwon bi ga nol bon boñ. Himala hi kon ni manola bi ga tjé we. M’a lona ki pansoñ le i tjé we.+ Me, Yéhôva, me mal pot.’”

6 Yéhôva a pôdôs ki me, a kal le: 2 “A man mut, hielba, u nun dikôa di Israel, u añal bikuu bi ga kwél tjo. 3 U ga kal le: ‘A bé dikôa di Israel, emblana lipôdôl li Nwet Bayemlikok le Yéhôva: lana nyen Nwet Bayemlikok le Yéhôva a nkal dikôa, ni dikôa dikeñi, ni diléléba, ni minsôsôgô: “Nuna-ki, m’a kolba bé ni pansoñ, me tjé ki bahoma banan ba nyôgi. 4 Muu manan m’a nyugdana, muu manan ma binjinjiñ m’a buga ngéñ ngéñ,+ m’a lep ki mim mi bôt banan ba ba nôla i bisu bi bisat binan bi nyega.*+ 5 Me ga leñ mim mi bon ba srael i bisu bi bisat gwap bi nyega, me sand ki bihés binan mu mapañ momasôna ma muu manan ma bisesema.+ 6 Mu bahoma bobasôna ni nyééne, bitison bi ga tjiba,+ yak bahoma ba nyôgi ba ga buga, ba yégle hôlô.+ Muu manan ma ga buga, ma nyugdana ki, bisat binan bi nyega bi ga tjiba, muu manan ma binjinjiñ ma ga buga, yak gwom gwobisôna ni bi bañ bi ga tjiba. 7 Ngandak i ga nôla i ti nan,+ ha nyen n’a yi le men me yé Yéhôva.+

8 “‘“Ndi m’a nwas le ndék bôt i yégle, inyule bahogi ipôla nan ba ga pei pansoñ i ngéda n’a ba mukété biloñ, ñ, i ngéda n’a ba ntjamak mukété biloñ.+ 9 I bôt ba ga pei ba ga bigda me mukété biloñ i het ba ga ke i minkôm.+ Ba ga nôgda le me bé nok njôghe i ñem inyule ba bi téñbe bé ni me,* ba kôm me mbus,+ ba ban-ga ndik ngôñ i bégés bisat gwap bi nyega.*+ Ba ga wo nyuu, yak i mam mabe momasôna ba bi boñ ni mam ma nsuñgaha ñem, ba ga tehe mo kiki yom nyega.+ 10 Ba ga yi le men me yé Yéhôva, ni le yañga bé nyen me bi pot i ngéda me bi han bo le m’a lona bo bikuu.”’+

11 “Lana nyen Nwet Bayemlikok le Yéhôva a nkal: ‘Bamb moo, tumb kôô ’isi, u ee ki inyu mam mabe momasôna ni mam ma nsuñgaha ñem bon ba Israel ba bi boñ, inyule ba ga nôla ni pansoñ, ni njal, yak ni himala hi kon.+ 12 I mut a yé haa, himala hi kon hi ga nol nye. I mut a yé bebee, a ga nôla ni pansoñ. Yak nu ni nu a ga yégle, nu a ga pei ki i bikuu bi, njal i ga nol nye. Ñ, m’a kôp bo hiun hiem hikeñi.+ 13 Ha nyen n’a yi le men me yé Yéhôva,+ i ngéda mim nwap mi mba mi niñi ipôla bisat gwap bi nyega, mu mapañ momasôna ma muu map ma bisesema,+ mu dikôa di nyôgi tjodisôna, mu ngii dikôa tjodisôna, isi bie bikeñi gwobisôna, ni isi mintjep mi bie bikeñi, i bahoma bobasôna ba bé tine bisat gwap gwobisôna makébla ma numb loñge njiñ.+ 14 M’a sambal woo wem inyu kogse bo, me yilha ki loñ yap hôlô; yak i bahoma bobasôna ba nyééne ba ga yégle hôlô iloo ñoñ u u yé bebee ni Dibla. Ha nyen b’a yi le men me yé Yéhôva.’”

7 Yéhôva a kônde pôdôs me, a kal le: 2 “A man mut, lana nyen Nwet Bayemlikok le Yéhôva a nkal loñ Israel: ‘Lisuk lini! Lisuk li nlo mu makas ma-na ma loñ. 3 Nano, lisuk joñ li nlo, m’a kôp we hiun hiem. Ñ, m’a kéés we inyu maboñok* moñ, m’a kogse ki we inyu mam momasôna ma nsuñgaha ñem u bi boñ. 4 Me ga* kônôl bé we ngoo,+ to tôñ, me ga tôñ bé we, inyule me ga boñ le maboñok moñ ma timbil we, u ga nok ki njôghe inyu mam ma nsuñgaha ñem u bi boñ.+ Ha nyen u ga yi le men me yé Yéhôva.’+

5 “Lana nyen Nwet Bayemlikok le Yéhôva a nkal: ‘Nun-ki! Ndutu i yé njel, i nya i maa bé ba.+ 6 Lisuk li yé i lo; lisuk li ga lo; li ga telbene* we. Nun-ki, li yé i lo. 7 A we nu u nyééne mukété loñ, ngéda yoñ i nkola.*+ Ngéda i yé i lo, hilo hi nkôôge bebee. Yubda i yé i ngii dikôa, he liyôgbe li maséé bé.

8 “‘Ndék ngéda wee me nkôp we kundul yem,+ me suglene we hiun hiem.+ Ñ, m’a kéés we inyu maboñok* moñ, m’a kogse ki we inyu mam momasôna ma nsuñgaha ñem u bi boñ. 9 Me ga* kônôl bé we ngoo,+ to tôñ me ga tôñ bé we, inyule me ga boñ le maboñok moñ ma timbil we, u ga nok ki njôghe inyu mam ma nsuñgaha ñem u bi boñ. Ha nyen u ga yi le men me yé Yéhôva.+

10 “‘Nun-ki, i kel i, yo ini! Ñ, yo ini i yé i lo!+ Ngéda yoñ i nkola;* ntoñgo u mal pémés mbônji, yak ngôk u mal pémés bisem. 11 Njôô i ga sôk yila ntoñgo u u ngwéélana inyu kogse bibéba bi bôt.+ To bon ba Israel, to lingwañ jap, to mamut, to lipém jap bi ga ba ha bé. 12 Ngéda i ga kola, kel i ga lo. I bôt ba nsomb gwom ba séé bañ, to bôt ba nyuñga ba ee bañ, inyule Nyambe a ñunbene i limut lini kiyaga.*+ 13 Inyule mut nyuñga a ga témbna ha bé i yom a bi nuñul to ibale a ngi yii i niñ, inyule yiinda ini i mbéñge i limut li bôt li jolisôna. To wada wap a ga pei bé; to wada wap a ga niñ bé inyu maboñok map mabe.

14 “‘Ba mal hem sép,+ bôt bobasôna ba yé nkôôbaga ndi to wada a nke bé i gwét, inyule me nlôôha unbene limut jap jolisôna.+ 15 Pansoñ i yé i mbégdé,+ yak himala hi kon ni njal bi yé ikété. I bôt ba yé i bikai ba ga nôla ni pansoñ; yak njal ni himala hi kon bi ga nol ba ba yé ikété tison.+ 16 I bôt ba ga pei ba ga so, ba kee i ngii dikôa; kiki dibeñ di minsôsôgô, hiki mut a ga siida, a hoñlak liboñok jé libe.+ 17 Bobasôna moo map ma ga yoomba, maboñ map momasôna ma ga yoo malép.*+ 18 Ba nhaba minsugut,+ ba sehlaga.* Bobasôna ba ga wo nyuu, yak miño nwap nwominsôna mi ga ba ngos.*+

19 “‘Ba ga lep silba yap i minloñ, yak gôl yap i ga yilna bo yom nyega. To silba yap, to gôl yap bi ga la bé tohol bo i hilo hi hiun hikeñi hi Yéhôva.+ Ba ga nuu bé, ba ga yônôs bé to mabum map, inyule i gwom bi* gwon bi ga yilna bo ngok baagene i i mboñ le ba kwoo i béba. 20 Ba bé ngôgôp inyu bieñg gwap bilam, ba gwéélak gwo inyu bañ biôñgba gwap bi bi nsuñgaha ñem, bisat gwap bi nyega.+ Inyu hala nyen m’a yilha gwo* yom nyega i mis map. 21 M’a ti gwo bakén ba bôt le ba yoñ gwom gwap gwobisôna, m’a ti ki gwo bibéba bi bôt bi hisi le bi kadal nkus wap wonsôna, bi hindis ki wo.

22 “‘Me ga kôm bo* mbus,+ ba* ga hindis homa wem lisolbene,* yak bôt ba wip ba ga jôp mu, ba hindis ki nye.+

23 “‘Ôô nsañ u bikei,*+ inyule ngandak bôt i nôla mukété loñ inyu nkoda mbagi,+ yak tison i yôni ni bisañ.*+ 24 M’a lona biloñ+ bi bi nlôôha béba, bi ga kadal mandap+ map. M’a mélés ngôk u mimpémba mi bôt, yak bahoma bap bapubhaga ba ga hindhana.+ 25 I ngéda ba ga ba ikété nduña, ba ga yéñ nsañ, ndi u ga ba bé.+ 26 Mandutu ma ga kwél bo yada mbus yada, ba nogok ndigi nwin mbe ni nwin mbe, yañga nyen bôt ba ga bat mpôdôl yiinda;+ ndi i mbén* biprisi bi ga niiga, ni maéba* mimañ mi litén mi ga ti, bi ga bana bé mahee mo ki mo.+ 27 Kiñe i ga jôp maéya,+ yak ñane a ga lehel ñem;* woñi u ga boñ ki le moo ma bôt ba loñ ma sehla. M’a saa bo inoñnaga ni maboñok map, m’a kéés bo nlélém kiki ba bé kéés bôt bape. Ha nyen b’a yi le men me yé Yéhôva.’”+

8 I nwii mi nyônôs minsamal, i hilo hi nyônôs hitan hi sôñ i nyônôs isamal, me bé me yii i ndap yem, mimañ mi Yuda mi bak mi yii i bisu gwem, nyoo nyen Nwet Bayemlikok le Yéhôva a bi gwel me ni woo wé. 2 Kiki me bé béñge, me tehe yom i mpôna mut binam, i nen-ge ki kiki hié; hié hi bé ibôdôl i yom i bé nene wengoñle bôbôk yé,+ u sôhôk ’isi. Ndi ibôdôl i bôbôk yé, u bedek i ngii, i bé nene wengoñle mapubi ma mbai, i bayak kiki puba gôl.*+ 3 I mbus, a sambal yom i bé wengoñle woo, a gwélél me mu tjôñ di ño wem. Ha nyen, ikété biyiinda bi bé lôl ni Nyambe, mbuu u Nyambe u bi pa me ipôla hisi ni ngii, u kena me i Yérusalem, u téé me i lijubul li kotoo li li yé ikétékété,+ li bé nun pes ñombok. Ha homa nu nyen sat nyega* i i nsuñgaha ñem, i hindhak Nyambe ñem i bé i tééne.+ 4 Ndi nun-ki, lipém li Nyambe nu Israel li bé ha,+ kiki yiinda me bi bôk me tehe i tegep mbok.+

5 Ha nyen a bi kal me le: “Soho, a man mut, pa mis, u béñge pes ñombok.” Jon me bi pa mis, me béñge pes ñombok; ha homa nu, i pes ñombok i juu li bisesema, ha i lijubul li kotoo nyen sat* i nsuñgaha ñem i bééne. 6 I mbus, a kal me le: “A man mut, baa u ntehe mam ma nlôôha mabe ni mam ma nsuñgaha ñem litén li Israel li mboñ,+ mam ma ma nkiha me haa ni homa wem mpubhaga?+ Ndi u ga tehe ki mam mape ma ma nlôôha suñgaha ñem.”

7 Ha nyen a bi kena me i lijubul li kotoo; i ngéda me bi béñge, me tehe lipondo mu libap. 8 A kal me le: “A man mut, soho, tôp libap.” Kiki me ntôp libap, me tehe lijubul jada. 9 A kal me le: “Jôp, u tehe ki mam mabe ni mam ma nsuñgaha ñem ba mboñ hana.” 10 Ha nyen me bi jôp, me béñge, me tehe mintén mi binuga nwominsôna bi bi ñôdba ’isi, ni binuga bi bi yé nyega,+ ni bisat gwobisôna bi nyega* bi litén li Israel;+ bi bé nkédlak mu mabap momasôna. 11 I bisu gwap nyen 70 ma mimañ mi litén li Israel mi bé mi téé; yak Yaazania, man Safan,+ a bé a téé ha ni bo. Hiki wada wap a bééna beglene yé binjinjiñ i woo, yak hiida hi bé lôl mu binjinjiñ, hi numbuk loñge.+ 12 A kal me le: “A man mut, baa u ntehe i mam mimañ mi litén li Israel mi mboñ i jiibe, hiki wada wap ikété bituñ gwé bi kétékété, i homa bisat gwé bi yéne?* Inyule ba nkal le: ‘Yéhôva a ntehe bé bés. Yéhôva a bi nyodi munu loñ yés.’”+

13 A kal ki me le: “U ga kônde ki tehe mam mape ba mboñ, ma ma nlôôha suñgaha ñem.” 14 A kena me i lijubul li kotoo li li yé i pes ñombok i ndap Yéhôva; nyoo nyen me bi tehe bôda ba yii, ba eek nyambe wap Tamuz.

15 A bat me le: “A man mut, baa u ntehe i jam lini? U ga tehe mam ma nsuñgaha ñem iloo mana.”+ 16 Ha nyen a bi kena me i kotoo i ndap Yéhôva,+ i i yé ikétékété. Ha i lijubul li témpel Yéhôva, ipôla libebe ni juu li bisesema nyen 25 bôt ba bi kôm témpel Yéhôva mbus, ba nunuk pes likôl; ba bé ôôp i bisu bi hiañgaa, ba nunuk pes likôl.+

17 A bat ki me le: “A man mut, baa u ntehe i jam lini? Baa hala a yé isii jam inyu litén li Yuda le ba mboñ mam ma nsuñgaha ñem, ba yônhak loñ ni njôô,+ ba kôndge ndik unbaha me? Nano, bo bana ba yé i tiigaha yom nyega* bebee ni jôl jem. 18 Jon b’a nôgda hiun hiem hikeñi, me ga* kônôl bé bo ngoo, to tôñ, me ga tôñ bé bo.+ To ibale ba nlond ni ngui i maôô mem, m’a emble bé me bo.”+

9 I mbus, me nok Nyambe a nlond makeñi, a kalak le: “Séblana i bôt ba ga ke i kogse tison, le ba loo, hiki mut a ban-ga jôl yé gwét i woo, i a ga gwélél inyu nol bôt!”

2 Me bi tehe bôt basamal ba bé lôl i nwemel u mabeda+ u u nun pes ñombok; hiki wada wap a bééna jôl yé gwét inyu nol bôt; mut wada a bé mu lôñ yap, a bé a hééba mbot i loñge bôñgô,* pôs tinti i mut matila i bak i tiñi nye i bôbôk. I bôt ba, ba bi jôp, ba telep ipañ juu li bisesema li mamuna.+

3 Ha nyen lipém li Nyambe nu Israel+ li bi nyodi mu ngii bikérubim, i homa li bééne, li bet, li ke letee ni i lijubul li témpel.+ Ha nyen a* bi bôdôl sébél i mut a bé a hééba mbot i loñge bôñgô,* pôs tinti i mut matila i bak i tiñi nye i bôbôk. 4 Yéhôva a kal nye le: “Kee mu tison i Yérusalem, u yéñ bôt ba ba nok ndutu ngandak, ba siidaga+ inyu mam ma nsuñgaha ñem ma ma mbôña mu tison, u ha bo yimbne i mbom.”+

5 Me nok ki nye a nkal baa bôt bape le: “Kena mu tison, ni noñok i mut nunu, ni nolok bôt ba tison. Ni* kônôl bañ bo ngoo, to tôñ, ni tôñ bañ bo.+ 6 Mimañ mi bôt, boñge ba wanda, bingond bi ngi yi munlôm, boñge batitigi ni bôda, ni ga nol bobasôna.+ Ndi ni tiige bañ bebee ni i mut nu a gwé yimbne i mbom.+ Bôdlana i homa wem mpubhaga.”+ Ha nyen ba bi bôdôl ni mimañ mi bôt mi mi bé i bisu bi témpel.*+ 7 I mbus, a kal bo le: “Hindhana témpel, yônhana bikotoo gwé ni mim mi bôt.+ Nano, kena, boña hala!” Ha nyen ba bi ke, ba nol bôt mu tison.

8 I ngéda ba bé nol bôt, metama nyen me bi yégle i niñ; ha nyen me bi ôôp, me ôm mbom ’isi, me lond le: “Éé, a Nwet Bayemlikok le Yéhôva! Baa u ga tjé bôt ba Israel bobasôna ba ba nyégle i kôp u nkôp hiun hioñ hikeñi i ngii Yérusalem?”+

9 A timbhe me le: “Liboñok libe li litén li Israel ni li Yuda li yé likeñi kiyaga.+ Loñ i nyon ni manola,+ yak bôt ba tison ba nai ni boñ mam ma téé bé sép.+ Inyule ba nkal le: ‘Yéhôva a bi nyodi munu loñ yés, Yéhôva a ntehna bé.’+ 10 Jon to me, me ga* kônôl bé bo ngoo, to tôñ, me ga tôñ bé bo.+ Me ga boñ le maboñok map ma timbil bo.”

11 I mbus, me tehe mut a hééba mbot i loñge bôñgô* a nlo i kal i yom i ntagbe, pôs tinti i mut matila i bak i tiñi nye i bôbôk, a kal le: “Me mal boñ i jam u nkal me.”

10 Kiki me bé béñge, me tehe yom yada i ngii nwandlak yom, i i bé i ngii miño mi bikérubim, i nen-ge kiki ngok safirô, i bak i ngii yap, i pôn-ga yééne ane.+ 2 Ha nyen Nyambe a bi kal* mut a bé a hééba mbot i loñge bôñgô*+ le: “Jôp ipôla makôô ma kak,+ isi bikérubim, u yônôs moo moñ ni makalak ma hié+ u ga yoñ ipôla bikérubim; i mbus, u nwes mo i ngii tison.”+ Ha nyen me bi tehe i mut nu a nke i jôp mu.

3 I ngéda i mut nu a bi jôp nyoo, bikérubim bi bé bi téé i pes walôm i témpel, yak ond i yon mu kotoo i kétékété. 4 Ha nyen lipém li Yéhôva+ li bi nyodi mu ngii bikérubim, li bet, li ke li telbene i kula nwemel u témpel.* Ndék ni ndék, témpel i yon ni ond,+ yak mapubi ma lipém li Yéhôva ma yon mu kotoo, ma bayak kiyaga. 5 Mbimba i bipapai bi bikérubim i bé nôga letee ni nyoo kotoo i i yé i mbégdé, i bé nôga wengoñle kiñ i Nyambe Nu ngui yosôna i ngéda a mpot.+

6 I mbus, Nyambe a kal* i mut a bé a hééba mbot i loñge bôñgô* le: “Yoñ hié ipôla makôô ma kak, ipôla bikérubim.” I mut nu a ke nyoo, a telep ipañ kôô kak wada. 7 Ha nyen kérubim yada i bi sambal woo wé inyu yoñ hié ipôla bikérubim.+ Kérubim i yoñ ndék makalak mu, i ha mo i moo ma mut a bé a hééba mbot i loñge bôñgô.*+ I mut nu a yoñ makalak, a pam. 8 Isi bipapai gwap, bikérubim bi bééna gwom bi bi bé pôna moo ma mut binam.+

9 Kiki me bé béñge, me tehe makôô ma kak ma-na ipañ bikérubim, kôô kak wada u bé ipañ hiki kérubim, makôô ma kak ma bé bai kiki ngok krisôlitô.+ 10 Mo ma-na ma bé nene nlélém, ñ, ma bé pôna. Hiki kôô u bé wengoñle ba nsom kôô kak wada ikété uu kôô umpe. 11 I ngéda ma bé ke, ma bé le ma ke to imbe pes mu bipes gwo bina ibabé le ma hielba, inyule to imbe pes ño u kérubim u bé nun, nyoo nyen yak makôô ma kak ma bé ke ibabé le ma hielba. 12 Manyuu momasôna ma bikérubim, mbus yap, moo map ni bipapai gwap bi bé bi yôni ni mis homa nyensôna, nlélém jam ni makôô ma kak; hiki kérubim i bé i gwé kôô kak ipañ yé.+ 13 Me nok kiñ i nsébél makôô ma kak, i kalak mo le: “A makôô, jôba i njel!”

14 Hiki kérubim i bééna masu ma-na. Su u bisu u bé su u kérubim, su u nyônôs iba u bé su u mut binam, su u nyônôs aa u bé su u mbondo njéé, su u nyônôs ina u bé su u nyôgôl.+

15 I ngéda bikérubim bi bé bet (gwon bi bé bihégél bi bi niñ* me bi tehe bebee ni lom Kébar),+ 16 ni i ngéda bikérubim bi bé bi ke, makôô ma kak ma bé ma ke ni gwo; i ngéda bikérubim bi bé bi pa bipapai gwap le bi nyodi ’isi, makôô ma kak ma bé hielba bé, to nyodi ma bé nyodi bé ipañ yap.+ 17 I ngéda bikérubim bi bé bi telep, yak makôô ma kak ma bé ma telep. I ngéda bikérubim bi bé bi nyodi ’isi, yak makôô ma kak ma bé ma nyodi ’isi i nlélém ngéda ni bikérubim, inyule i mbuu u bé kena bihégél bi bi niñ* won u bé kena yak makôô ma kak.

18 I mbus, lipém li Yéhôva+ li nyodi i kula nwemel u témpel,* li telbene i ngii bikérubim.+ 19 Mu kiki me bé béñge, bikérubim bi pa bipapai gwap, bi nyodi ’isi. I ngéda bi bé ke, yak makôô ma kak ma bé ipañ yap. Bi telbene i kula nwemel u ndap Yéhôva u u bé i pes likôl, yak lipém li Nyambe nu Israel li bé i ngii yap.+

20 I bihégél bi bi niñ bini gwon* me bi tehe bi téé isi yééne ane i Nyambe nu Israel, bebee ni lom Kébar;+ ha nyen me bi yi le bikérubim bi. 21 Hiki kérubim mu gwo bina i bééna masu ma-na, ni bipapai bina, i ban-ga gwom isi bipapai gwé bi bi bé pôna moo ma mut binam.+ 22 Masu map ma bé nene kiki masu me bi tehe bebee ni lom Kébar.+ Hiki yada mu i bé ke ndigi i bisu gwé.+

11 I mbus, mbuu u Nyambe u pa me, u kena me i nwemel u ndap Yéhôva, nwemel u u nun i pes likôl.+ Ha i lijubul li nwemel li nyen me bi tehe 25 bôt, yak i baane ba litén+ bana ba bé ni bo: Yaazania man Azur, ni Pélatia man Bénaya. 2 Ha nyen Nyambe a bi kal me le: “A man mut, i bôt bana bon ba ñôt bipék bibe, ba tinak maéba mabe munu* tison ini. 3 Ba nkal le: ‘Ngéda i oñ mandap ini.+ I tison* ini i yé kiki hibee,*+ ndi bés di yé kiki nlamb mukété.’

4 “Jon añal i mam ma ga pémél bo. A man mut, pot mbañ.”+

5 Ha nyen mbuu u Yéhôva u bi lo i ngii yem,+ Nyambe a kal me le: “Kal bo le: ‘Lana nyen Yéhôva a mpot: “A litén li Israel, ngo i mam ni mpot ma yé maliga, me nyi ki i mam ni nhoñol.* 6 Ni bi boñ le ngandak bôt i wo munu tison ini, ni yônôs ki minloñ nwé ni mim mi bôt.”’”+ 7 “Lana nyen Nwet Bayemlikok le Yéhôva a nkal: ‘I mim mi bôt ni ntjam munu tison nwon mi yé kiki nlamb mukété yé, yak tison i yé kiki hibee.+ Ndi bé, b’a pémés bé mu tison.’”

8 “Lana nyen Nwet Bayemlikok le Yéhôva a nkal: ‘Ni nkon pansoñ woñi,+ ndi m’a boñ le ni nôla ni pansoñ. 9 M’a pémés bé mu tison, me ti bé i moo ma bakén ba bôt, me kogse ki bé.+ 10 N’a nôla ni pansoñ,+ m’a kéés ki bé i nwaa nkoñ u Israel;+ ha nyen n’a yi le men me yé Yéhôva.+ 11 I tison ini i ga bane bé bé kiki hibee, to bé ni ga ba bé kiki nlamb mukété yé; m’a kéés bé i nwaa nkoñ u Israel, 12 ha nyen n’a yi le men me yé Yéhôva; inyule ni bi noñ bé matéak mem, ni noñ bé to mabéhna+ mem, ndi ni bi noñ matiñ ma biloñ bi bi nkéña bé.’”+

13 Ndik kiki me bi mal pot i mbañ i, Pélatia man Bénaya, a wo. Ha nyen me bi ôôp, me ôm mbom ’isi, me lond le: “Éé, a Nwet Bayemlikok le Yéhôva! Baa u ga tjé bôt ba Israel bobasôna ba ba nyégle?”+

14 Yéhôva a témb a pôdôs me, a kal me le: 15 “A man mut, bôt ba Yérusalem ba bi pôdôs lôkisoñ, hala wee lôkisoñ i i gwé kunde i kôdôl ngababum nan, ba pôdôs ki litén li Israel jolisôna, ba kal le: ‘Yéna haa ni Yéhôva. Loñ i yé yés; bés bon di bi kôhna yo le i ba ngababum yés.’ 16 Jon kal bo le: ‘Lana nyen Nwet Bayemlikok le Yéhôva a mpot: “To hala kiki me bi kena bo haa le ba niñ mu biloñ bipe, me sand ki bo mu minkoñ mimpe,+ ndi m’a bane bo homa mpubhaga inyu ndék ngéda, nyoo i minkoñ i het ba bi ke.”’+

17 “Jon kal bo le: ‘Lana nyen Nwet Bayemlikok le Yéhôva a mpot: “M’a héya bé mu matén mape, me nyodna bé mu minkoñ i het ni bi tjama, me kot bé, me ti ki bé nkoñ u Israel.+ 18 Ha nyen ba ga témb nyoo, ba héya gwom bi nyega gwobisôna, ba mélés ki maboñok momasôna ma nsuñgaha ñem.+ 19 I mbus, m’a boñ le ba niñ ikété adna,*+ me boñ ki le ba bana mahoñol ma* mondo;+ ñ, m’a héya ñem u nlet kiki ngok mu nyuu yap,+ me ti bo ñem u ntomb kiki nsôn,*+ 20 inyu boñ le ba noñ matéak mem, ba tééda mabéhna mem, ba nôgôl ki mo. Ha nyen ba ga ba bôt bem, yak me m’a ba Nyambe wap.”’

21 “‘“Ndi i bôt ba nai ndik* le ba mboñ mam ma nyega ni mam ma nsuñgaha ñem, m’a boñ le maboñok map ma timbil bo,” hala nyen Nwet Bayemlikok le Yéhôva a mpot.’”

22 I mbus, bikérubim bi pa bipapai gwap, makôô ma kak ma bak ipañ yap,+ yak lipém li Nyambe nu Israel li bak i ngii yap.+ 23 Ha nyen lipém li Yéhôva+ li bi nyodi mu tison, li bet, li ke li telbene i ngii hikôa hi hi bé i pes likôl i tison.+ 24 Ha nyen mbuu u bi pa me ikété yiinda me bi kôhna, i i bé lôl ni mbuu u Nyambe, u kena me yak bôt ba ba bé minkôm i Kaldéa. I mbus, i yiinda me bi kôhna i nyoi. 25 Ha nyen me bi bôdôl añle ba ba bé i minkôm mam momasôna Yéhôva a bi unda me.

12 Yéhôva a pôdôs ki me, a kal me le: 2 “A man mut, u yiine ipôla litén li bôt ba ndok. Ba gwé mis inyu tehna ndi ba ntehna bé, ba gwé maôô inyu noga ndi ba noga bé,+ inyule ba yé litén li bôt ba ndok.+ 3 Ndi we, a man mut, kôôba mbegee kiki mut le ba nkena i minkôm. I mbus, u pamna yo i mbégdé, bomede ba tehge. Nyodi i homa u nyééne, u kee homa numpe wengoñle ba yé i kena we i minkôm, bomede ba tehge. Bebek le i jam li, li ga tinde bo i ôt pék, to hala kiki ba yé litén li bôt ba ndok. 4 Njamuha, pamna mbegee yoñ i mbégdé kiki mut le ba nkena i minkôm, bomede ba tehge. Kôkôa, u nyodi mu tison kiki mut le ba nkena i minkôm, bomede ba tehge.+

5 “I mbus, tôp lipondo mu libap, bomede ba tehge; mu nyen u ga tégbaha mambegee moñ.+ 6 U ga begee mambegee i tuu yoñ, bomede ba tehge, u pamna mo juu. Hô su woñ le u tehe bañ ’isi, inyule me nyilha we yimbne inyu litén li Israel.”+

7 Ha nyen me bi boñ kiki a bi kal me. Njamuha, me pamna mbegee yem i mbégdé kiki mut le ba nkena i minkôm. Kôkôa, me tôp lipondo mu libap ni moo mem. Me pamna ki mambegee mem juu, me bak me bééga mo i tuu, bomede ba tehge.

8 Yéhôva a kônde pôdôs me i kegla i bé noñ ha, a kal me le: 9 “A man mut, litén li Israel, litén li bôt ba ndok li mbat we kii u yé i boñ, hala bé? 10 Timbhe ni bo le: ‘Lana nyen Nwet Bayemlikok le Yéhôva a nkal: “I nwin unu u yé inyu ñane+ nu a yé i Yérusalem, ni inyu bôt ba litén li Israel bobasôna ba ba yé mu tison.”’

11 “Kal bo le u yéne bo yimbne,+ ni le kiki u mboñ, hala nyen ba ga boñ bo. Ba ga kena bo i minkôm, ñ, i minkôm+ yaga. 12 I ñane nu a yé ipôla yap a ga begee mambegee mé i tuu, a nyodi mu tison juu. A ga tôp lipondo mu libap, a tégbaha ki mambegee mé mu.+ A ga hô su wé le a tehe bañ ’isi. 13 M’a leñ pése yem i ngii yé, a ga gwéla mu.+ I mbus, m’a kena nye i Babilôn, i loñ i bôt ba Kaldéa, ndi a ga tehe bé yo; a ga wél nyoo.+ 14 I bôt bobasôna ba yé nye ipañ, bahôla bé, ni bôt bé ba gwét, m’a sand bo homa nyensôna;+ m’a sodol pansoñ, me noñ bo.+ 15 Ha nyen b’a yi le men me yé Yéhôva i ngéda me ga boñ le ba tjama mu biloñ, me sand ki bo mu minkoñ. 16 Ndi m’a boñ le bahogi ikété yap ba pei gwét,* njal, ni dimala di kon inyu boñ le mu biloñ i het ba ga ke, ba añal mam ma nsuñgaha ñem momasôna ba bi boñ; ha nyen b’a yi le men me yé Yéhôva.”

17 Yéhôva a témb a pôdôs me, a kal me le: 18 “A man mut, u ga je bret gwoñ, u sehlaga; u ga nyo malép moñ, u konok woñi ni nduña i ñem.+ 19 Kal bôt ba loñ le: ‘Lana nyen Nwet Bayemlikok le Yéhôva a mpot inyu bôt ba Yérusalem ba ba yé mu loñ Israel: “Ba ga je bret gwap, ba ban-ga nduña i ñem; ba nyo ki malép map, ba konok woñi kiyaga inyule loñ yap i ga yégle toi hôlô,+ inyu njôô bôt bobasôna ba nyééne mu ba nlona.+ 20 Bitison i het bôt ba nyééne bi ga tjiba, yak loñ i ga yila ñoñ;+ ha nyen n’a yi le men me yé Yéhôva.”’”+

21 Yéhôva a kônde pôdôs me, a kal me le: 22 “A man mut, baa ngén yada i ta bé i Israel i i nkal le: ‘Dilo di ntagbe ndigi, ndi yiinda to yada i nyon bé’?+ 23 Kal ni bo le: ‘Lana nyen Nwet Bayemlikok le Yéhôva a mpot: “M’a mélés i ngén i, mut to wada a ga gwélél ha bé yo mu Israel.”’ Ndi kal bo le: ‘Dilo di yé i kôôge bebee,+ yak biyiinda gwobisôna bi ga yon.’ 24 Inyule yiinda i bitembee to yada, to mbañ i malôga* yo ki yo, bi ga ba ha bé ikété litén li Israel.*+ 25 “‘Inyule me Yéhôva, m’a pot. To kinje jam m’a pot li ga yon ibabé le li tiñha.+ A litén li bôt ba ndok, ngo mu dilo dinan+ nyen m’a pot jam, me yônôs ki jo,” hala nyen Nwet Bayemlikok le Yéhôva a mpot.’”

26 Yéhôva a témb a pôdôs me, a kal le: 27 “A man mut, i jam lini jon litén li Israel* li nkal: ‘I yiinda u ntehe i ga yon ndik i mbus ngandak dilo, yak i mbañ u mpot i ga yon ndik i mbus ntandaa ngéda.’+ 28 Inyu hala nyen, kal bo le: ‘Lana nyen Nwet Bayemlikok le Yéhôva a mpot: “Bañga yem to yada i ga tiñha bé yon; i yom yosôna me nkal, i ga yon ndigi,’ hala nyen Nwet Bayemlikok le Yéhôva a mpot.”’”

13 Yéhôva a pôdôs ki me, a kal le: 2 “A man mut, añle bapôdôl ba Israel+ i mandutu ma ga kwél bo, añle yak ba ba mbot mbañ yap bomede*+ le: ‘Emblana lipôdôl li Yéhôva. 3 Lana nyen Nwet Bayemlikok le Yéhôva a nkal: “Ngoo ni bijôñ bi bapôdôl ba ba noñ mahoñol map, ki le ba ntehe bé to yom!+ 4 A Israel, bapôdôl boñ ba nyila kiki ndon i i niñil mu bibum.* 5 Mabap ma ngok ma gwé mapondo bahoma bahoma, ndi ni ga ke bé i hôla litén li Israel+ i tibil mo, le bon ba Israel ba pei i hilo hi gwét hi Yéhôva.”+ 6 “Ba bi tehe biyiinda bi bitembee, ba pot ki mbañ i malôga, ba kalak le: ‘Lana nyen Yéhôva a mpot,’ ki le Yéhôva bé nyen a ñom bo; to hala, ba nhoñol le Nyambe a’ boñ le bipôdôl gwap bi yon.+ 7 Baa yiinda i bitembee bé yon ni bi tehe, ni pot ki mbañ i malôga i ngéda ni bé kal le: ‘Lana nyen Yéhôva a mpot,’ ki le me bi pot bé me to jam?”’

8 “‘Lana nyen Nwet Bayemlikok le Yéhôva a nkal: “‘Kiki ni bi pot bitembee, ni tehe ki biyiinda bi malôga, m’a jôs bé,’ hala nyen Nwet Bayemlikok le Yéhôva a mpot.”+ 9 M’a sambal woo wem, me kogse bapôdôl ba ba ntehe biyiinda bi bitembee,+ ba podok mbañ i malôga. Ba ga ba bé mawanda mem ma ñem nyuu, môl map m’a tilba bé ikété kaat i litén li Israel, to témb ba ga témb bé i loñ Israel; ha nyen n’a yi le men me yé Nwet Bayemlikok le Yéhôva.+ 10 I mam mana momasôna ma ga bôña ndik inyule ba nyumus litén jem, ba kalak le: “Nsañ u yé!” Ki le nsañ u ta bé.+ I ngéda mut a ñoñ libap li li gwééba bé, ba nlo ba hoo jo puba pén.’*+

11 “Kal i bôt ba nhoo puba pén mu libap le li ga kwo. Soso nop a ga sugla, nop matan-ga* a kwoo, yak mbuk mbebi a hôñ, gwobisôna bi bôk i libap li.+ 12 I ngéda libap li ga kwo, ba ga bat bé le: ‘I pén ni bi hoo mu, i hôlga ni kii?’+

13 “Jon lana nyen Nwet Bayemlikok le Yéhôva a nkal: ‘Ikété liyot jem, m’a boñ le mbuk mbebi a hôñ; ikété hiun hiem, me boñ le soso nop a sugla; ikété kundul yem, me boñ ki le nop matan-ga a kwoo. 14 M’a bôk libap ni bi hoo puba pén, me bes jo ’isi, yak hikuu hié hi nene. I ngéda tison i ga tjiba, yak bé n’a nôla mu tison; ha nyen n’a yi le men me yé Yéhôva.’

15 “‘I ngéda m’a boñ le hiun hiem hikeñi hi kwél libap, hi kwél ki i bôt ba bi hoo jo puba pén, ha nyen m’a kal bé le: “Libap li ta ha bé, to i bôt ba bi hoo jo puba pén ba ta ha bé.+ 16 Bapôdôl ba Israel ba ta ha bé, ba ba bé pot mbañ inyu Yérusalem, ba tehge ndik biyiinda bi bi ñunda le Yérusalem a bé ikété nsañ, ki le nsañ u bé bé,”’+ hala nyen Nwet Bayemlikok le Yéhôva a mpot.

17 “Ndi we, a man mut, hielba, u nun bôda ba* litén joñ ba ba mbot mbañ yap, u añle bo i mandutu ma ga kwél bo. 18 Kal bo le: ‘Lana nyen Nwet Bayemlikok le Yéhôva a nkal: “Ngoo ni bôda ba ba mboñ minkôô le bôt bobasôna ba téñ nwo mu moo* map, ba boñok basanja inyu hô miño mi bôt ba mintel nwominsôna, le ndi ba gwel bôt ba litén i hiandi! Baa ni nyéñ gwel bôt ba litén jem i hiandi, ndi ni hoñlak le ni nla sôñ biniñ binan? 19 Baa ni ga hindis jôl jem yak bôt ba litén jem inyu ndék moo ma kôn* ni bikét bi bret?+ Ni ñañle bôt bem bitembee, yak bo ba emblege bé, hala nyen ni nol i bôt ba lamga bé wo, ni téédaga i bôt ba nlama wo i niñ!”’+

20 “Lana nyen Nwet Bayemlikok le Yéhôva a nkal: ‘A bôda, me ñoo minkôô minan, mi ni ngwélél inyu gwel bôt i hiandi kiki dinuni. Ñ, m’a pat minkôô mu moo manan, me kobol ki bôt ni ngwel mu hiandi kiki dinuni. 21 Ñ, m’a pat basanja banan, me kobol ki bôt bem i moo manan; i mis manan, ba ga ba ha bé nuga le ni ngwel i nsômbi. Ha nyen n’a yi le men me yé Yéhôva.+ 22 Bitembee binan bi bi boñ le mut a téé sép a nimis makénd,+ ki le me bi nôgha bé nye njôghe,* ndi ni bi ti béba mut makénd le a tjôô bañ maboñok mé mabe,+ le ndi a niñ.+ 23 Jon, a bé bôda, n’a tehe ha bé biyiinda bi bitembee,+ to ngambi ni ga bo ha bé; m’a sôñ bôt bem i moo manan, ha nyen n’a yi le men me yé Yéhôva.’”

14 I mbus, mimañ mi Israel minhogi mi lo mi yén i bisu gwem.+ 2 Ha nyen Yéhôva a bi pôdôs me, a kal le: 3 “A man mut, i bôt bana ba nai ndik le ba mbégés bisat gwap bi nyega,* ba mbiine ki bôt bape ngok baagene i i mboñ le ba kwoo i béba. Baa me nlama nwas le ba bat me mahoñol mem?+ 4 Nano ni, pôdôs bo, kal bo le: ‘Lana nyen Nwet Bayemlikok le Yéhôva a nkal: “Ibale man Lôk Israel a nai ndik le a mbégés bisat gwé bi nyega, a biinege ki bôt bape ngok baagene i i mboñ le ba kwoo i béba, ndi a lo i bat mpôdôl mam, me Yéhôva, memede nyen m’a timbhe nye bañga bañga, inoñnaga ni nsoñgi u bisat bi nyega a gwé. 5 Inyule m’a yônôs miñem mi bôt ba litén li Israel* ni woñi, hala kiki bobasôna ba bi ke haa ni me, ba béghak bisat gwap bi nyega.”’+

6 “Jon kal bôt ba litén li Israel le: ‘Lana nyen Nwet Bayemlikok le Yéhôva a nkal: “Témba i meeni, ni kôm bisat binan bi nyega mbus, ni tjôô ki maboñok manan ma ma nsuñgaha ñem.+ 7 Inyule ibale to numbe man Lôk Israel, tole nkén mut nu a nyééne i nkoñ u Israel a nke haa ni me, ibale a nai ndik le a mbégés bisat bi nyega, a biinege ki bôt bape ngok baagene i i mboñ le ba kwoo i béba, ndi a lo i bat mpôdôl mam,+ me Yéhôva, memede nyen m’a timbhe nye. 8 M’a pémhene i mut nu mbagi nôgôs, me yilha nye ndémbél inyu béhe bôt bape, a yila ki kéne ngén; m’a nol nye.*+ Ha nyen n’a yi le men me yé Yéhôva.”’

9 “‘Ndi ibale ba nlôk mpôdôl ndi a ti yé yé ndimbhe, wee memede Yéhôva nyen me nlôk i mpôdôl nu.+ M’a sambal woo wem, me kogse nye, me nol ki nye.* 10 Bikuu bi béba yap bi ga kwél bo; i mut a mbat mpôdôl mam, ni mpôdôl nyemede ba ga kôhna minlélém mi bikuu, 11 inyu boñ le bôt ba litén li Israel ba waa ke haa ni me, ba waa ki hindis bomede ni maboñok map mabe momasôna. Ha nyen ba ga ba litén jem, yak me, m’a ba Nyambe wap,’+ hala nyen Nwet Bayemlikok le Yéhôva a mpot.”

12 Yéhôva a témb a pôdôs me, a kal le: 13 “A man mut, ibale bôt ba ngim loñ ba mboñ béba i mis mem, ba téñbe bé ni me, m’a sambal woo wem, me kogse bo, me mélés bijek*+ mu loñ i,+ me om njal mu, me nol ki bôt ni bilém bi bi yé mu.”+ 14 “‘To ibale Nôa,+ Daniel+ ni Hiôb+ ba bak mu loñ i, ki i bôt ba bo baa ba bak le ba tohol ndik biniñ gwap gwotama inyule ba yé bôt ba téé sép,’+ hala nyen Nwet Bayemlikok le Yéhôva a mpot.”

15 “‘Tole ibale me mboñ le binuga bi bikai bi lôô mu loñ i, bi nol ngandak bôt,* bi boñ ki le loñ i yégle hôlô kayéle mut nye ki nye a nlôô bé mu, inyule ba nkon binuga bi bikai woñi.+ 16 Me nkum soñ ni niñ yem le, to ibale i bôt ba bo baa ba bak mu loñ i, ki ba bak bé le ba tohol bon bap bôlôm, to bon bap bôda; ki ba ntohol ndik biniñ gwap gwotama, ndi loñ yo i yégle hôlô,’ hala nyen Nwet Bayemlikok le Yéhôva a mpot.”

17 “‘Tole ibale me ñom pansoñ mu loñ+ i, me kal le: “Pansoñ i lôô mu loñ,” me tjé ki bôt ni binuga bi bi yé mu,+ 18 me nkum soñ ni niñ yem le, to ibale i bôt ba bo baa ba bak mu loñ i, ki ba bak bé le ba tohol bon bap bôlôm, to bon bap bôda; ki ba ntohol ndik biniñ gwap gwotama,’ hala nyen Nwet Bayemlikok le Yéhôva a mpot.”

19 “‘Tole ibale me ñom himala hi kon mu loñ i,+ me kôp yo hiun hiem hikeñi, ngandak i wo kayéle me tjé bôt ni bilém bi bi yé mu, 20 me nkum soñ ni niñ yem le, to ibale Nôa,+ Daniel+ ni Hiôb+ ba bak mu loñ i, ki ba bak bé le ba tohol bon bap bôlôm, to bon bap bôda; ki ba ntohol ndik biniñ gwap gwotama inyu telepsép+ yap,’ hala nyen Nwet Bayemlikok le Yéhôva a mpot.”

21 “Inyule lana nyen Nwet Bayemlikok le Yéhôva a nkal: ‘Hala nyen mam ma ga ba i ngéda m’a boñ le i bikuu bini gwo bina*+ bi kwél Yérusalem: pansoñ, njal, binuga bi bikai ni himala hi kon,+ le bi nol bôt ni binuga bi bi yé mu.+ 22 Ndi bahogi ba ga pei mu loñ i, ba ga pémés bo:+ bon bôlôm ni bon bôda. Ba yé i lo i bééni; i ngéda ni ga tehe bihiumul gwap ni maboñok map, ni ga nok yaga inyuki* me bi boñ le i bikuu bi gwobisôna bi kwél Yérusalem, ñ, i mam momasôna me bi boñ le ma kwél nye.’”

23 “‘I ngéda ni ga tehe bihiumul gwap ni maboñok map, ha nyen ni ga nok yaga inyuki* me bi boñ le i bikuu bi gwobisôna bi kwél Yérusalem, le yañga bé nyen me bi boñ i mam ma,’+ hala nyen Nwet Bayemlikok le Yéhôva a mpot.”

15 Yéhôva a pôdôs ki me, a kal le: 2 “A man mut, baa kék i nlôl i nkôô wai i gwé mahee iloo bikék bi bi nlôl i bie bipe, tole baa i gwé mahee iloo mintjep mi bie mi lipan? 3 Baa mut a yé le a gwélél kék i nlôl i nkôô wai inyu sal ni yo? To gwélél, baa ba yé le ba gwélél yo inyu kéi gwom mu? 4 Emble ki! Ba nleñ yo i hié le hi kônde loñ. Hié hi nligis masuk ma kék mo ima, hi ligis ki yo i ñemkété. Ha ngéda i, baa ba yé ki le ba gwélél yo inyu sal ni yo? 5 To i ngéda ba bé ngi ligis yo, i bééna bé nseñ; bôô ni ngélé yañen nano le ba nligis yo!”

6 “Jon lana nyen Nwet Bayemlikok le Yéhôva a nkal: ‘Nlélém kiki me bi yoñ kék i i nlôl mu nkôô wai u u yé ipôla bie bi lipan, me leñ yo i hié le hi kônde loñ, hala nyen m’a boñ yak bôt ba Yérusalem.+ 7 M’a kogse bo. Ba bi pei hié, ndi hié hipe hion hi ga ligis bo. I ngéda m’a mal kogse bo,+ ha nyen n’a yi le men me yé Yéhôva.’”

8 “‘M’a boñ le loñ i yégle hôlô+ inyule ba bi téñbe bé ni me,’+ hala nyen Nwet Bayemlikok le Yéhôva a mpot.”

16 Yéhôva a témb a pôdôs me, a kal le: 2 “A man mut, kal Yérusalem i mam a mboñ, ma ma nsuñgaha ñem.+ 3 U ga kal nye le: ‘Lana nyen Nwet Bayemlikok le Yéhôva a nkal Yérusalem: “Basôgôlsôgôl boñ ba bi lôl i loñ Kanaan, nyoo ki nyen u bi gwééne. Isoñ a bé man Lôk Amôr,+ nyuñ a bak ngond Lôk Hét.+ 4 I ligwéé joñ, ñ, i kel u bi gwéé, mut to wada a bi kit bé ngop yoñ, to nugus we le u pôp, to siñha we ni bas, to lép we mabadô. 5 Mut to wada a bi kônôl bé we ngoo le a bôñôl we to jam jada mu mam ma. To tôñ, mut to wada a bi tôñ bé we. Ndi ba bi lep we i bikai, inyule ba bi oo we i kel u bi gwéé.

6 “‘“I ngéda me bé tagbe ipañ yoñ, me tehe we u mbépba ikété matjél moñ. Kiki u bé u niñi ikété matjél moñ, me kal we le: ‘U ga wo bé!’ Ñ, kiki u bé u niñi ikété matjél moñ, me kal we le: ‘U ga wo bé!’ 7 Me bi boñ le u yila limut li bôt likeñi kiyaga, kiki bibebela bi bi nañ i wom. U bi nañ, u pop, u habga bieñg bi nlôôha bilam. Tôl yoñ i yon ni méé, yak tjôñ tjoñ di nañ; ndi u bé u ngi yii nso, nso yaga.”’

8 “‘I ngéda me bé tagbe ipañ yoñ, me tehe we, me yimbe le u mal kondop. Ha nyen me bi hô we libadô*+ jem, ñ, me hô nso woñ, me kumul we soñ, me boñ ki malômbla ni we, ha nyen u bi yila wem,’ hala nyen Nwet Bayemlikok le Yéhôva a mpot. 9 ‘Handugi hala, me bi nugus we, me héya matjél mu nyuu yoñ, me hoo ki we môô.+ 10 I mbus, me ha we mbot le ba mage, me ti we bitamb ba mbañ ni biloñge bi bikôp,* me kañ we yañsi i loñge bôñgô* mu ño, me ha ki we mambot ma ma nhee diye. 11 Me bi ha we bieñg inyu lémés we, me ha ki we minkôm i moo ni nsañ i joo. 12 Me ha ki we hilonde i jôl ni dimbuñga* i maôô, me ha yak we ntut u u nlôôha nlam i ño. 13 U bé haba gôl ni silba le u ba nlam. Mambot moñ ma bé ni loñge bôñgô,* ma bak mabadô ma nhee diye ni mambot le ba mage. U bé je flawa ilam, wéi ni môô. U yila nlam kiyaga,+ u bak kiki muda nu a yé le a ba kiñemuda.’”*

14 “‘Inyu bilama gwoñ, jôl joñ li bi ke ngan mu biloñ.+ U bé bé le u ba nlam iloo ha, inyule men me bi ha we lipém jem,’+ hala nyen Nwet Bayemlikok le Yéhôva a mpot.”

15 “‘Ndi u bi kahal bôdôl bilama gwoñ ñem,+ u gwélél libak le u nyiba inyu yila muda libambe.+ U nai ni libambe, u neebege hiki mut a bé tagbe ipañ yoñ;+ u ti bo bilama gwoñ. 16 U bi yoñ mambot moñ mahogi ma ma gwé minsonol minlam, u gwélél mo inyu lémés bahoma boñ ba nyôgi, i het u nkil i libambe.+ I mam ma, ma bé lama bé bôña, heni, ma bé lama yaga bé bôña. 17 U bi yoñ ki bieñg gwoñ bilam bi nyañga me bi ti we, bi ba bi bañ ni gôl lôñni silba, u gwélél gwo inyu uñghene wemede biôñgba bi bôlôm, u kenek i libambe ni gwo.+ 18 U bi yoñ ki mambot moñ ba bi mage, u hô gwo* ni mo, u ti yak gwo môô mem ni binjinjiñ gwem.+ 19 U yoñ ki bret me bi ti we le u je, bi ba bi boñ ni flawa ilam, ni môô, yak ni wéi, u ti bo gwo kiki sesema i i numb loñge njiñ.*+ Hala yaga nyen mam ma bi tagbe,’ hala nyen Nwet Bayemlikok le Yéhôva a mpot.”

20 “‘U bi yoñ bon boñ bôlôm ni bon boñ bôda ba u bi gwélél me,+ u sémél bo bisat le ba tjiba.+ Baa i mam ma nsuñgaha ñem u bi boñ ma bé bé ma kôli? 21 U bi nol bon bem, u ligis+ bo inyu ti bo gwo kiki sesema.* 22 I ngéda u bé boñ mam moñ momasôna ma ma nsuñgaha ñem, u kenek i libambe, u bi hoñol ha bé i ngéda u bé mañge, u bak nso, nso yaga, u bépbaga ikété matjél moñ. 23 Hala kiki u mal boñ i bibéba bini gwobisôna, ngoo ni we! Ngoo ni we!’+ hala nyen Nwet Bayemlikok le Yéhôva a mpot. 24 ‘Mu makanda momasôna, u bi ôñôl wemede homa inyu bégés banyambe ba bitembee,* u oñ ki homa a nyôgi. 25 U bi ôñôl wemede bahoma ba nyôgi mu bahoma ba nlôôha nene. U yilha bilama gwoñ yom i nsuñgaha ñem, hala kiki u bi ti wemede i moo ma* hiki mut a bé tagbe ipañ yoñ,+ u nai ki ni libambe.+ 26 U bi ke i libambe ni bon ba Égiptô,+ bôt boñ ba libôk ba ba yôni ni ngôñ ibe,* u nai ki ni libambe inyu hindha me ñem. 27 Nano ni, m’a sambal woo wem, me kogse we, m’a hubus ngaba yoñ bijek,+ me tjôô ki we i moo ma bôda ba ñoo we,+ bingond bi bôt ba Filistia, bi maboñok moñ ma nyega ma bi pat ñem.+

28 “‘Hala kiki u bi la bé yônôs ngôñ yoñ, jon i mbus ngéda, u bi ke i libambe ni bon ba Asiria.+ Ndi to hala kiki u bi ke i libambe ni bo, u la bé yônôs ngôñ yoñ. 29 Jon u bi nai ni libambe, u tinak wemede nyoo i loñ i bôt ba nyuñga,* i moo ba bôt ba Kaldéa.+ Ndi to hala, u bi la bé yônôs ngôñ yoñ. 30 Ñ, ñem* u bi kon toi we i ngéda u bi boñ i mam ma momasôna, ni i ngéda u bé boñ kiki muda libambe nu a nwo bé nyuu!+ Hala nyen Nwet Bayemlikok le Yéhôva a mpot. 31 I ngéda u bi ôñôl wemede homa inyu bégés banyambe ba bitembee* mu makanda momasôna, mu bahoma ba nlôôha nene, ni mu bahoma bobasôna, u bé bé kiki muda libambe inyule u bé neebe bé nsaa wo ki wo. 32 U yé muda ndéñg nu a ngwés bakén ba bôt iloole a gwés nlô wé!+ 33 Bôt ba yé ba nti bôda ba libambe bobasôna likébla,+ ndi we, i bôt bôbasôna ba noñ we ni ngôñ ibe,+ u bi ti bo makébla, u nsaa ki bo le ba loo i weeni le u kee i libambe ni bo, ba lôlak i bahoma bobasôna.+ 34 U mboñ bé kiki bana bôda ba libambe bape. Mut nye ki nye a nke bé i libambe kiki we! Wen u nsaa bôt, ndi bo ba nsaa bé we. U boñ mam nya ipe.’

35 “Jon a muda libambe,+ emble i yom Yéhôva a nkal. 36 Lana nyen Nwet Bayemlikok le Yéhôva a mpot: ‘Kiki u bi nwas le ngôñ yoñ ibe i yoña we, u undga ki nso woñ i mbamba i ngéda u bé ke i libambe ni manyaa moñ, u kenek ki i libambe ni bisat gwobisôna bi bi nsuñgaha ñem ni bisat bi nyega.*+ U ti ki i bisat bi, matjél ma bon boñ kiki sesema.+ 37 Inyu hala nyen me nkot manyaa moñ momasôna, ma u bé nôgha mane, ba bobasôna u bi gwés ni ba bobasôna u bi oo. M’a kot bo homa wada le ba jôs we, ba lôlak i bahoma bobasôna, m’a boñ le ba tehe nso woñ, ñ, ba ga tehe yaga wensôna nso.+

38 “‘M’a kogse we kiki ba nkogse bôda ba nke i ndéñg+ ni bôda ba ba nkôp matjél.+ Ñ, ikété kundul yem ni hiun hiem, m’a boñ le ba kôp matjél moñ.+ 39 M’a ti we i moo map, ba ga bôk bahoma u bi oñ inyu bégés banyambe ba bitembee,* ba tjé ki bahoma boñ ba nyôgi.+ Ba ga héya we mambot,+ ba kadal ki bieñg gwoñ bilam bi nyañga,+ ba yék we nso, nso yaga. 40 Ba ga lona limut li bôt+ li li ga jôs we, ba ga ôm we ngok,+ ba nol ki we ni paminsoñ+ yap. 41 Ba ga ligis mandap moñ,+ ba kogse we, ngandak bôda i tehge. M’a mélés libambe joñ,+ u ga saa ha bé bo. 42 Ha nyen hiun me gwééne we hi ga sôs,+ yak hiun me ñunbene we hi mal.+ Ñem wem u ga ba nwee, m’a unup ha bé.’

43 “‘Hala kiki u bi bigda ha bé lelaa me bi tééda we i ngéda u bé mañge,+ u unbaha ki me ni mam momasôna u bi boñ, inyu hala nyen me ga boñ le maboñok moñ ma timbil we; ha nyen u ga tjôô mam ma nyega u mboñ, u tjôô ki maboñok moñ momasôna ma ma nsuñgaha ñem,’ hala nyen Nwet Bayemlikok le Yéhôva a mpot.

44 “‘Emble ki! I bôt bobasôna ba nkéne ngén, ba ga kéne we ini ngén le: “Ngond muda i yé kiki nyañ!”+ 45 U yé toi ngond i nyuñ, nyuñ nu a bé yan nlô wé ni bon bé. U yé toi manyañ nu muda nu lôknyuñ i bôda, bon ba bé yan balôm bap ni bon bap. Nyuñ a bé ngond Lôk Hét, isoñ a bak man Lôk Amôr.’”+

46 “‘Manyuñ nu muda nu mañ a yé Samaria,+ nyen a yiine ni bingond gwé*+ nyoo i pes yoñ ñombok;* manyuñ nu muda nu sôk, nu a yiine ni bingond+ gwé i pes yoñ i nwelmbok* nyen a yé Sôdôm.+ 47 Handugi le u bi noñ ndémbél yap, u bi noñ ki maboñok map ma ma nsuñgaha ñem, ndi hala a bi bat bé to we ngandak ngéda, u boñ mam mabe iloo bo.+ 48 Me nkum soñ ni niñ yem le, manyuñ nu muda le Sôdôm ni bingond gwé ba bi boñ bé mam we ni bingond gwoñ ni bi boñ,’ hala nyen Nwet Bayemlikok le Yéhôva a mpot. 49 ‘Emble ki! I jam libe lini jon manyuñ nu muda le Sôdôm a bi boñ: nye ni bingond+ gwé ba bé ngôk,+ ba ban-ga ngandak bijek,+ ba niñik ki nwee ngi nduña yo ki yo;+ ndi a bi hôla bé ngoo bôt ni diyeyeba.+ 50 Ba bi nai ni ñem u lipamal,+ ba boñok ki mam ma nsuñgaha ñem i bisu gwem.+ Inyu hala nyen me bi tehe nseñ i tjé bo.+

51 “‘To Samaria+ a bi boñ bé pes i libim li bibéba u bi boñ. U bi boñ ngandak mam ma nsuñgaha ñem iloo ma ba bi boñ, kayéle bilôk bi nyuñ bi bôda bi bé nene le bi téé sép inyu maboñok moñ momasôna ma ma nsuñgaha ñem.+ 52 Nano ni, u nlama wo nyuu inyule u bi nit maboñok mabe ma* bilôk bi nyuñ bi bôda. Ba téé sép iloo we inyule u bi boñ mam ma nsuñgaha ñem iloo bo. Jon nano, u nlama wo nyuu, u kon ki hison, inyule u mboñ le bilôk bi nyuñ bi bôda bi nene wengoñle bi téé sép.’

53 “‘M’a kot i bôt bap ba ba yé i minkôm, bôt ba Sôdôm ba ba yé i minkôm ni bingond gwé; me kot yak bôt ba Samaria ba ba yé i minkôm ni bingond gwé. M’a kot ki bôt boñ ba ba yé i minkôm ni bo,+ 54 inyu boñ le u kôhna wonyuu. U ga kon ki hison inyu jam u bi boñ inyule u bi nit maboñok map. 55 Manyuñ nu muda le Sôdôm ni bingond gwé ba ga témb ba yila kiki i ngéda kôba, yak manyuñ nu muda le Samaria ni bingond gwé ba ga témb ba yila kiki i ngéda kôba, yak we ni bingond gwoñ ni ga témb ni yila kiki i ngéda kôba.+ 56 I ngéda u bé ngôgôp, u bé sima bé to jôl li manyuñ nu muda le Sôdôm, 57 ilole béba yoñ i nyeelana.+ Nano ni, bingond bi Siria ni bingond bipe bi bi yiine ipañ yé, bi nsol we; yak bingond bi bôt ba Filistia+ bi bi nkéña we, bi nyan we. 58 Mam ma nyega u bi boñ ni mam moñ ma ma nsuñgaha ñem ma ga timbil we,’ hala nyen Yéhôva a mpot.”

59 “Inyule lana nyen Nwet Bayemlikok le Yéhôva a nkal: ‘Kiki u bi boñ, hala nyen m’a boñ we,+ inyule u bi yan i soñ u bi kumul me, u bôk ki malômbla mem.+ 60 Ndi me m’a bigda malômbla me ni we di bi boñ i ngéda u bé mañge wanda, m’a boñ ki malômbla ni we ma ma nom i boga ni boga.+ 61 U ga bigda maboñok moñ, u wo ki nyuu+ i ngéda u ga leege bilôk bi nyuñ bi bôda bi mañ, ni bilôk bi nyuñ bi bôda bi mbus. M’a ti we bo le ba yila bingond gwoñ, ndi ha inyu bé le me ni we di bi boñ malômbla.’

62 “‘M’a boñ malômbla ni we, ñ, ha nyen u ga yi le men me yé Yéhôva. 63 Ha nyen u ga bigda i mam u bi boñ, u wo nyuu ngandak, u la ha bé to yibil nyo inyule u nkon hison,+ i ngéda m’a nwéhél we* mam momasôna u bé boñ,’+ hala nyen Nwet Bayemlikok le Yéhôva a mpot.”

17 Yéhôva a kônde pôdôs me, a kal le: 2 “A man mut, añle bon ba Israel bipôdôl bi bi nlet i nok* wengoñle u nkéne bo ngén.+ 3 Kal bo le: ‘Lana nyen Nwet Bayemlikok le Yéhôva a nkal: “Nyôgôl nkeñi+ u u gwé bipapai bikeñi, u ban-ga mimbôñgô mi tjimba, nyuu yé yosôna i ban-ga ki ngandak biléé bi bi gwé minsonol, u* bi lôl i Libañ,+ u ket bisosoñ bi bi yé i manjoñ ma e sidar.+ 4 Mukété bisosoñ bi, nyôgôl u pat sosoñ i i nlôôha ba i ngii, u kena yo nyoo i loñ i bôt ba nyuñga,* u bii ki yo i tison i bôt ba nyuñga.+ 5 I mbus, nyôgôl u yoñ ndék mbôô mu loñ,+ u nwes yo mu ’isi hi hi nha bijek ngandak. U bel yo le i nañ kiki e* i i yé bebee ni ngandak malép. 6 Ha nyen i mbôô i, i bi o, i yila nkôô wai+ u u ñandal mu ’isi. Tjai tjé di bé nañ i ngii, minkañ nwé mi jôbôk ’isi. Hala nyen i* bi yila nkôô wai u u nti bisem, i ban-ga mintjep.+

7 “‘“I mbus, nyôgôl nkeñi+ umpe u lo, u ban-ga bipapai bikeñi ni tjimba dikeñi.+ Nyoo i homa nyôgôl u bééne nyen nkôô wai unu u bi boñ le minkañ nwé mi yon homa nyensôna, haa ni dikuu i het ba bi bel wo. I nkôô wai u, u kahal sambal tjai tjé i pes nyôgôl u bééne, inyu boñ le nyôgôl u kôp wo malép.+ 8 Ki le ba bi bel nkôô wai ikété loñge wom, bebee ni ngandak malép inyu boñ le u bana ngandak mintjep, u num matam, u yila ki loñge nkôô wai.”’+

9 “U ga kal le: ‘Lana nyen Nwet Bayemlikok le Yéhôva a nkal: “Baa i nkôô wai u, u ga nañ? Baa mut a ga nup bé minkañ+ nwé, a boñ ki le matam mé ma bol, ni le bisosoñ gwé bi kôt?+ I nkôô wai u, u ga kôt ngandak kayéle i ga béda bé woo u ngui, to ngandak bôt inyu nup wo. 10 To hala kiki i nkôô wai unu u bi tiimba béla, baa u ga nañ? I ngéda mbebi i nlôl i pes likôl i ga hôñ, baa i ga boñ bé le u kôt, kôt yosôna? I nkôô wai u, u ga kôt yaga mu dikuu i het u bi néñél.”’”

11 Yéhôva a pôdôs ki me, a kal le: 12 “Soho, kal litén li bôt ba ndok le: ‘Baa ni nok bé kii i mam mana ma nkobla?’ Kal bo le: ‘Emblana ki! Kiñe Babilôn i bi lo i Yérusalem, i yoñ kiñe ni baane bé, i témb ni bo i Babilôn.+ 13 Handugi hala, a yoñ mut wada mu lihaa* li kiñe,+ a boñ malômbla ni nye, a nyégsa nye i kum soñ i bisu gwé.+ I mbus, a kena yak bañga bôt i loñ,+ 14 le ndi ane i suhlana, i tiimba ha bañ bana ngui, inyu boñ le i nom ndigi ibale bôt ba litén ba ntééda malômbla.+ 15 Ndi kiñe Yuda* i bi sôk i ndogbene kiñe Babilôn,*+ i om balegelnwin i Égiptô le a ti nye bihosi+ ni ntôñ gwét nkeñi.+ Baa a ga pamba? I mut a mboñ i mam ma, baa a ga pei kogse? Baa a yé le a bôk malômbla, ndi to hala a pei?’+

16 “‘Lana nyen Nwet Bayemlikok le Yéhôva a mpot: “Me nkum soñ ni niñ yem le a ga wél i Babilôn, i het kiñe* i i bi téé nye* kiñe i yiine, inyule a bi yan i soñ a bi kum i bisu gwé, a bôk ki malômbla a bi boñ ni nye.+ 17 I ngéda bôt ba gwét ba Babilôn ba ga bédés mangund ma biték, ba oñ ki mapénd inyu kéña tison ni i tjé ngandak bôt; ntôñ gwét nkeñi ni ngandak bôt ba gwét ba Faraô ba ga la bé hôla nye mu gwét bi.+ 18 A bi yan i soñ a bi kum, a bôk ki malômbla a bi boñ. A bi boñ i mam mana momasôna, ki le a bi boñ mbônga;* jon a ga pei bé.’”

19 “‘Lana nyen Nwet Bayemlikok le Yéhôva a nkal: “Me nkum soñ ni niñ yem le, m’a boñ le maboñok mé ma timbil nye inyule a bi yan i soñ a bi kum+ i jôl jem, a bôk ki malômbla a bi boñ i bisu gwem. 20 M’a leñ pése yem i ngii yé, ñ, a ga gwéla mu pése+ yem. M’a kena nye i Babilôn, nyoo nyen m’a pémhene nye mbagi nôgôs inyule a bi téñbe bé ni me.+ 21 Bôt bé ba gwét bobasôna ba ba ga so b’a nôla ni pansoñ, yak ba bobasôna ba ga pei ba ga tjama bipes gwobisôna.*+ Ha nyen n’a yi le me Yéhôva men me bi pot.”’+

22 “‘Lana nyen Nwet Bayemlikok le Yéhôva a nkal: “M’a ket sosoñ mu manjoñ ma soso e sidar,+ me bel yo; ñ, mukété bisosoñ bi yé mu manjoñ ma e sidar nyen m’a pat sosoñ i ntomb,+ i i nlôôha ba i ngii, memede me bel yo inyu kena yo i hikôa hikeñi, hi bak hi nyôgi.+ 23 M’a bel yo mu ngii hikôa hi nyôgi hi Israel. Mintjep nwé mi ga nañ, e i num ki matam, i yila soso e sidar. Mintén mi dinuni nwominsôna mi ga yééne isi yé, mi solbene ki isi yiye i tjai tjé. 24 Ha nyen yak bie gwobisôna bi bikai bi ga yi le me Yéhôva, me bi suhus e i i bé i nyôgi, me bédés e i i bé isi;+ me bi boñ le e i i bé yômi i kôt, me boñ ki le nkôt e u ti bisem.+ Me Yéhôva, men me bi pot, me boñ ki hala.”’”

18 Yéhôva a pôdôs ki me, a kal le: 2 “Ni mbéna kéne i ngén ini i loñ Israel le: ‘Basañ ba bi je bisua bi matam ma nkôô wai, ndi masoñ ma bon bap mon ma bana manyii;’ i ngén ini i kobla kii?+

3 “Lana nyen Nwet Bayemlikok le Yéhôva a nkal: ‘Me nkum soñ ni niñ yem le n’a sima ha bé i ngén ini i loñ Israel. 4 Emblana ki! Biniñ* gwobisôna bi yé gwem. Niñ i isañ i yé yem nlélém kiki niñ i man. I mut* a mboñ béba nyen a ga wo.

5 “‘Ibale mut a téé sép, a boñok loñge ni mam ma téé sép, 6 a nje bé to gwom ba nsémél bisat i ngii dikôa;+ a mbôdôl bé bisat bi nyega* bi litén li Israel ñem; a nke bé i ndéñg ni nwaa mut wé libôk,+ a nañlana bé to muda nu a nkon sôñ;+ 7 a ntééñga bé mut nye ki nye,+ a timbhak i mut a mbat nye pil bibep;+ a nibil bé mut nye ki nye,+ ndi a nyoñ bijek gwé,+ a tinak gwo i mut a yé njal; i mut a yé nso, a tinak nye mbot;+ 8 a mpôôs bé mut yom inyu kôhna ngim nseñ,+ a nuñul bé to moni inyu kôhna yéñe, ndi a ntjél boñ mam ma téé bé sép;+ a nkéés ki bôt i nya i téé sép;+ 9 a ntééda matiñ mem, a noñok ki matéak mem le ndi a boñ mam ma téé sép. Wee i mut nu a téé toi sép, a ga niñ yaga,’+ hala nyen Nwet Bayemlikok le Yéhôva a mpot.

10 “‘Ndi ibale i mut nu a ngwal man munlôm nu a yé mut wip,+ tole mut manola,*+ tole nu a mboñ jam to jada mu mam mana 11 (ki le isañ nye a mboñ bé jam to jada mu mam mana): a nje gwom ba nsémél bisat i ngii dikôa, a nke i ndéñg ni nwaa mut wé libôk, 12 a ntééñga ngoo mut ni hiyeyeba,+ a nip, a ntimbis bé bibep yak mut a bak a gwé nye pil, a mbôdôl bisat bi nyega* ñem,+ a mboñ mam ma nsuñgaha ñem,+ 13 a nuñul moni inyu kôhna yéñe,+ a mpôôs mut yom inyu kôhna ngim nseñ; i man nu a ga niñ bé. A ga nôla yaga inyu mam ma momasôna a bi boñ ma ma nsuñgaha ñem. Nyemede nyen a ga yéñ nyemb yé.*

14 “‘Ndi ibale man a ntehe bibéba gwobisôna isañ a mboñ, ndi to hala kiki a ntehe gwo, nye a mboñ bé i nya mam i. 15 A nje bé gwom ba nsémél bisat i ngii dikôa; a mbôdôl bé to bisat bi nyega bi litén li Israel ñem; a nke bé i ndéñg ni nwaa mut wé libôk; 16 a ntééñga bé mut nye ki nye, a ntééda bé bibep bi mut a mal saa nye pil wé; a nibil bé mut nye ki nye, ndi a nyoñ bijek gwé, a tinak gwo i mut a yé njal; i mut a yé nso, a tinak nye mbot; 17 a ntééñga bé hiyeyeba, a mpôôs bé mut yom inyu kôhna ngim nseñ, a nuñul bé to moni inyu kôhna yéñe, a ntééda matéak mem, a noñok matiñ mem. Wee i mut nu a ga wo bé inyu liboñok libe li isañ. A ga niñ yaga. 18 Ndi hala kiki isañ a bi kadal gwom bi bôt ni malôga, a nibil maasañ, a boñ ki béba ikété litén jé, wee nyetama nyen a ga wo inyu liboñok jé libe.

19 “‘Ndi bé n’a bat le: “Inyuki ba ñôm bé man nsohi inyu liboñok libe li isañ?” Hala kiki man a bi boñ loñge, a boñ mam ma téé sép, a tééda matiñ mem momasôna, a nôgôl ki mo, a ga niñ yaga.+ 20 I mut a mboñ béba nyen a ga wo,+ ba ga ôm bé man nsohi inyu liboñok libe li isañ, ba ga ôm bé to isañ nsohi inyu liboñok libe li man. Mut a téé sép nyen a ga kôhna bisai inyu telepsép yé, yak béba mut yon i ga kôhna kogse inyu béba yé.+

21 “‘Nano ni, ibale béba mut i ntjôô bibéba gwobisôna a bi boñ, ibale a ntééda ki matiñ mem, a boñok loñge ni mam ma téé sép, wee a ga niñ yaga. A ga wo bé.+ 22 Ba ga ôm bé nye nsohi inyu* liboñok libe to jada a bi boñ.+ A ga niñ inyule a bi boñ mam ma téé sép.’+

23 “‘Baa nyemb i béba mut i nkônha me maséé?+ Baa m’a ba bé maséé le a tjôô maboñok mé mabe inyu boñ le a niñ?’+ Hala nyen Nwet Bayemlikok le Yéhôva a mpot.

24 “‘Ndi ibale mut nu a téé sép a ntjôô njel telepsép, a boñ béba, a boñok mam momasôna ma nsuñgaha ñem* bibéba bi bôt bi mboñ, baa a ga niñ? Ba ga bigda bé liboñok li téé sép to jada a bi boñ.+ A ga wo inyu ndok yé ni inyu béba a bi boñ.+

25 “‘Ndi bé n’a kal le: “Liboñok li Yéhôva li téé bé sép.”+ Soho, emblana, a litén li Israel! Baa liboñok jem jon li téé bé sép?+ Baa maboñok manan bé mon ma téé bé sép?+

26 “‘Ibale mut a téé sép a ntjôô njel telepsép, a kahal boñ béba, ndi a wo inyu liboñok jé libe, wee a ga wo inyu béba a bi boñ.

27 “‘Ni le ibale béba mut i ntjôô béba a bi boñ, a bôdôl boñ loñge ni mam ma téé sép, a ga sôñ niñ yé.*+ 28 I ngéda a ntehe le i mam a mboñ ma yé mabe, ndi a tjôô momasôna, wee a ga niñ yaga. A ga wo bé.

29 “‘Ndi litén li Israel li ga kal le: “Liboñok li Yéhôva li téé bé sép.” Soho, emblana, a litén li Israel!+ I maliga, baa liboñok jem jon li téé bé sép? Baa maboñok manan bé mon ma téé bé sép?’

30 “‘Jon, a bôt ba litén li Israel, m’a kéés hiki wada nan inoñnaga ni maboñok mé.+ Ni tjôô maboñok manan mabe, ñ, ni tjôô momasôna, inyu boñ le ma bane bañ bé ngok baagene i i nkwés bé ikété béba,’ hala nyen Nwet Bayemlikok le Yéhôva a mpot. 31 ‘Ni tjôô* i mam mabe momasôna ni bi boñ,+ ni boñ ki le* miñem minan ni mahoñol manan ma témb yondo.+ Inyuki ni nlama wo,+ a bôt ba litén li Israel?’

32 “‘Nyemb i mut nye ki nye i nkônha bé me maséé.+ Jon héñhana maboñok manan, le ndi ni niñ,’”+ hala nyen Nwet Bayemlikok le Yéhôva a mpot.

19 “U nlama tôp hiémbi hi maéya inyu baane ba Israel, 2 u kal lana le:

 3 Ñin mbondo njéé u bi néñés man wé wada nu a bi yila mpémba.+

 5 Nyañ a bé bem nye, a lehel ñem le man a ga témb.

Ha nyen a bi yoñ man mbondo njéé numpe mu bon ba mbondo njéé, a yilha nye mpémba.

 6 Yak nye a bé hiôm ni ini mbondo njéé ipe, a yila mpémba man mbondo njéé.

A nigil i pat binuga a ngwel, a jek yak bôt ba binam.+

 9 Ba som nye dikoba i mben yé môl, ba ha nye i nkuu, ba kena nye yak kiñe Babilôn.

Nyoo nyen ba bi kwéhne nye, inyu boñ le kiñ yé i nôga ha bañ i ngii dikôa di Israel.

10 Nyuñ a bé kiki nkôô wai*+ u u bi béla bebee ni malép.

Kiki nkôô wai u bé ipañ malép, u bé num matam, u pémhak ngandak mintjep.

11 U bééna mintjep* mi ngui ba bé le ba gwélél inyu boñ mintoñgo mi ane mi baénél.

mintjep* nwé mi ngui mi bugi, mi kôt, yak hié hi ligis nwo.+

“‘Hiémbi hi maéya hini, hion bôt ba ga tôp i ngéda maéya.’”

20 I nwii mi nyônôs minsaambok, i hilo hi nyônôs jôm hi sôñ i nyônôs itan, mimañ mi Israel minhogi mi bi lo, mi yén i bisu gwem i bat me mahoñol ma Yéhôva. 2 Ha nyen Yéhôva a bi pôdôs me, a kal le: 3 “A man mut, pôdôs mimañ mi Israel, u kal bo le: ‘Lana nyen Nwet Bayemlikok le Yéhôva a nkal: “Baa mahoñol mem mon ni nlo i bat? ‘Me nkum soñ ni niñ yem le, m’a kal bé bé mahoñol mem,’+ hala nyen Nwet Bayemlikok le Yéhôva a mpot.”’

4 “Baa u yé bebee i kéés bo?* A man mut, baa u yé bebee i kéés bo? Wee yis bo mam ma nsuñgaha ñem basôgôlsôgôl bap ba bi boñ.+ 5 Kal bo le: ‘Lana nyen Nwet Bayemlikok le Yéhôva a nkal: “I kel me bi pohol Israel+ nyen me bi kumul ki mbôda Yakôb soñ,* me boñ ki le ba yi me i loñ Égiptô.+ Ñ, me bi kumul bo soñ, me kal bo le: ‘Men me yé Yéhôva Nyambe nan.’ 6 I kel i nyen me bi kum soñ le m’a nyodna bo i loñ Égiptô, me kena bo i loñ me bi yiñil bo,* loñ i i nkuli milik ni wéi.+ Yon i bé loo biloñ gwobisôna bilama. 7 I mbus, me kal bo le: ‘Hiki mut a nlama lep gwom bi nsuñgaha ñem bi bi yé i bisu gwé; ni hindis bañ bébomede ni bisat bi nyega* bi Égiptô.+ Men me yé Yéhôva.’+

8 “‘“Ndi ba bi ndogbene me, ba top bé to emble me. Ba lep bé gwom bi nsuñgaha ñem bi bi bé i bisu gwap, ba tjôô bé to bisat bi nyega bi Égiptô.+ Jon me bi bôn le m’a kôp kundul yem i ngii yap, me suglene ki bo hiun hiem hiosôna i loñ Égiptô. 9 Ndi inyu jôl jem nyen me bi bôñôl hala, le li hindhana bañ i bisu bi biloñ i het ba bé niñil.+ Inyule i bisu bi biloñ bi nyen me bi boñ le ba* yi me i ngéda me bi nyodna bo* i Égiptô.+ 10 Jon me bi nyodna bo mu loñ Égiptô, me kena bo i ñoñ.+

11 “‘“I mbus me ti bo matiñ mem, me yis bo matéak mem,+ inyu boñ le i mut a nôgôl mo, a niñ.+ 12 Me ti ki bo dilo tjem di sabat+ le di ba yimbne ipôla me ni bo+ inyu boñ le ba yi le me Yéhôva, men me nyilha bo bapubhaga.

13 “‘“Ndi litén li Israel li bi ndogbene me i ñoñ.+ Ba bi tjél matéak mem, ba nôgôl bé to matiñ mem, ki le ibale mut a nôgôl mo, a ga niñ. Ba bi hindis yaga dilo tjem di sabat. Jon me bi bôn le me ga suglene bo hiun hiem i ñoñ inyu tjé bo.+ 14 Ndi inyu jôl jem nyen me bi bôñôl hala, le jôl jem li hindhana bañ i bisu bi biloñ bipe, bi bi bi tehe i ngéda me bé nyodna bo* i loñ Égiptô.+ 15 Me bi kumul ki bo soñ i ñoñ le me ga jôbna bé bo mu loñ me bi ti bo,+ loñ i i nkuli milik ni wéi.+ Yon i bé loo biloñ gwobisôna bilama, 16 inyule ba bi tjél matéak mem, ba nôgôl bé to matiñ mem, ba hindis yak dilo tjem di sabat, inyule miñem nwap mi bé mi tiñi ni bisat gwap bi nyega.+

17 “‘“Ndi me* bi kônôl bo ngoo, me tjé bé bo; Me bi sas bé bo i ñoñ. 18 Me bi kal bon bap i ñoñ+ le: ‘Ni nôgôl bañ mambén ma basôgôlsôgôl banan,+ ni tééda bañ to mabéhna map, to hindis bébomede ni bisat gwap bi nyega. 19 Men me yé Yéhôva Nyambe nan, ni noñ matéak mem, ni tééda matiñ mem, ni nôgôl ki mo.+ 20 Téédana dilo tjem di sabat+ le di ba dipubhaga, ha nyen di ga ba yimbne ipôla me ni bé inyu boñ le ni yi le men me yé Yéhôva Nyambe nan.’+

21 “‘“Ndi bon bap ba bi bôdôl ndogbene me.+ Ba bi tjél matéak mem, ba tééda bé to matiñ mem, to nôgôl mo, ki le ibale mut a nôgôl mo, a ga niñ. Ba bi hindis dilo tjem di sabat. Jon me bi bôn le me ga suglene bo hiun hiem, me kôp ki kundul yem i ngii yap i ñoñ.+ 22 Ndi me bi gwel memede,+ inyu jôl+ jem nyen me bi boñ hala, le jôl jem li hindhana bañ i bisu bi biloñ bipe, bi bi bi tehe i ngéda me bé nyodna bo* i loñ Égiptô. 23 Me bi kumul ki bo soñ nyoo i ñoñ le, me ga boñ le ba tjama mu biloñ, me sand ki bo mu minkoñ,+ 24 inyule ba bi tjél matéak mem, ba nôgôl bé to matiñ mem,+ ba hindis dilo tjem di sabat, ba gwéélak* bisat bi nyega bi basôgôlsôgôl bap.+ 25 Me bi nwas ki bo le ba noñ matiñ ma ma bé bé malam, ni matéak ma ma bé la bé tééda bo i niñ.+ 26 I ngéda ba bé ligis babôkgwéé bap bobasôna,+ me bi nwas le ba hindis bomede ni bisesema gwap inyu boñ le me tjé bo, le ndi ba yi le men me yé Yéhôva.”’

27 “Jon a man mut, pôdôs litén li Israel, u kal bo le: ‘Lana nyen Nwet Bayemlikok le Yéhôva a nkal: “Basôgôlsôgôl banan ba bi ôbôs ki me jôl i ngéda ba bi téñbe bé ni me. 28 Me bi jôbna bo i loñ me bi kum soñ le m’a ti bo.+ I ngéda ba bi tehe dikôa di nyôgi tjodisôna, yak ni bie gwobisôna bi bi bééna ngandak tjai,+ mu nyen ba bi kahal ti bisesema gwap, ni makébla map ma ma numbul me béba njiñ. Mu ki nyen ba bé ti makébla map ma numb loñge njiñ,* ba kôbôk makébla map ma wai mu. 29 Ha nyen me bi bat bo le: ‘I homa a nyôgi i het ni nke, a ga hôla kii bé? (I len ini, ba ngi séblak i homa nu le Homa a nyôgi.)’”’+

30 “Nano ni, kal litén li Israel le: ‘Lana nyen Nwet Bayemlikok le Yéhôva a nkal: “Nlélém kiki basôgôlsôgôl banan, ni nhindis bébomede ni bisat bi nyega i ngéda ni mbégés banyambe bape.*+ 31 Yak i len ini, ni nhindis bébomede i ngéda ni nti bisat binan bi nyega gwobisôna bisesema, ni nwahak ki le ba ligis bon banan.*+ Ndi ni gwé ngôñ le me kal bé mahoñol mem, a litén li Israel?”’+

“‘Me nkum soñ ni niñ yem le, m’a kal bé me bé mahoñol mem,’+ hala nyen Nwet Bayemlikok le Yéhôva a mpot. 32 ‘I jam ni nhoñol i ngéda ni nkal le: “Di yila kiki biloñ, kiki mahaa ma biloñ bipe, bi bi mbégés* kék ni ngok,”+ li ga bôña bé kekikel.’”

33 “‘Me nkum soñ ni niñ yem le m’a ane i ngii nan ni woo wem ngui, ni woo wem u lipémba,* yak ni hiun hiem hikeñi,’+ hala nyen Nwet Bayemlikok le Yéhôva a mpot. 34 ‘Ni woo wem ngui, ni woo wem u lipémba, yak ni hiun hiem hikeñi nyen m’a nyodna bé ikété matén, me kot ki bé mu biloñ i het ni bé ntjamak.+ 35 M’a kena bé i ñoñ u matén, nyoo nyen m’a kéés bé mbom ni mbom.+

36 “‘Nlélém kiki me bi kéés basôgôlsôgôl banan i ñoñ u Égiptô, hala ki nyen m’a kéés bé,’ hala nyen Nwet Bayemlikok le Yéhôva a mpot. 37 ‘Me ga boñ le ni tagbe isi ntoñgo u bikodlene ni u njôghe,*+ me nyégsa ki bé i tééda malômbla.* 38 Ndi m’a héya bôt ba ndok ni babôkmbén ba ba nkolba me nyoo i bééni.+ Ñ, m’a nyodna bo mu loñ i het ba yiine kiki bakén ba bôt, ndi ba ga jôp bé i nkoñ u Israel;+ ha nyen n’a yi le men me yé Yéhôva.’

39 “Ndi bé, a bôt ba litén li Israel, lana nyen Nwet Bayemlikok le Yéhôva a nkal: ‘Hiki mut a kee a gwélél bisat gwé bi nyega!+ Ndi i mbus, yina le ibale ni nôgôl bé me, ngim ngéda i ga pam le ni ga hindis ha bé jôl jem lipubi ni bisesema binan, to ni bisat binan bi nyega.’+

40 “‘Inyule i hikôa hiem hipubhaga, i hikôa hiada hi nyôgi hi Israel+ nyen litén jolisôna li Israel, bobasôna yaga, ba ga gwélél me mu loñ.+ Ha homa nu nyen ba ga kônha me maséé, ha homa nu ki nyen m’a bem le ni lona me makébla manan ni matam ma nlôôha malam* ma bisesema binan, gwom binan bipubhaga gwobisôna,’ hala nyen Nwet Bayemlikok le Yéhôva a mpot.+ 41 ‘N’a kônha me maséé ni loñge njiñ* i bisesema binan i ngéda m’a nyodna bé ikété matén, me kot ki bé, ni lôlak i biloñ bipe i het ni bé ntjamak;+ ñ, m’a unda bé le me yé mpubi, biloñ bipe bi tehge.’+

42 “‘Ha nyen n’a yi le men me yé Yéhôva+ i ngéda m’a témbna bé i nkoñ u Israel,+ mu loñ me bi kumul basôgôlsôgôl banan soñ le m’a ti bo. 43 Nyoo nyen ni ga bigda maboñok manan ni mam momasôna ni bi boñ, ma ma bi boñ le ni hindis bébomede;+ hala a ga gwélha bébomede* nyega, inyu bibéba bi mam gwobisôna ni bi boñ.+ 44 Ha nyen n’a yi le men me yé Yéhôva i ngéda m’a bôñôl bé hala inyu jôl jem.+ Ndi m’a boñ bé hala inyu maboñok manan mabe, to inyu maboñok manan ma nyega, a litén li Israel,’ hala nyen Nwet Bayemlikok le Yéhôva a mpot.”

45 Yéhôva a pôdôs ki me, a kal le: 46 “A man mut, hielba, u nun nkoñ u u yé i pes nwelmbok, u añle pes nwelmbok i jam lini, u kal ki i yom i ga pémél lipan li li yé i pes nwelmbok. 47 Kal lipan li pes nwelmbok le: ‘Emble i yom Yéhôva a nkal. Lana nyen Nwet Bayemlikok le Yéhôva a mpot: “M’a kuye hié nyoo i weeni,+ hi ga ligis bie gwoñ biyômi gwobisôna, ni minumuk nwoñ mi bie nwominsôna. I lindômbôô li hié li, li ga lém bé,+ li ga ligis masu momasôna ibôdôl i pes nwelmbok letee ni i pes ñombok. 48 Bôt bobasôna* ba ga tehe le me Yéhôva, men me bi kuye i hié hi, kayéle hi ga lém bé.”’”+

49 Ha nyen me bi kal le: “Éé, a Nwet Bayemlikok le Yéhôva! Ngo lana nyen ba nkal inyu yem: ‘A mpot ndik ni mangén!’”*

21 Yéhôva a pôdôs ki me, a kal le: 2 “A man mut, hielba, nun Yérusalem, añal i mam ma ga pémél bahoma bapubhaga, u añal ki i mam ma ga pémél nkoñ u Israel. 3 Kal Israel le: ‘Lana nyen Yéhôva a mpot: “M’a leñ we gwét. Ñ, m’a sodol pansoñ yem i sogoo,+ me tjé bôt ba téé sép ni bibéba bi bôt ba ba yé i weeni. 4 Hala kiki m’a tjé bôt ba téé sép ni bibéba bi bôt ba ba yé i weeni, m’a sodol pansoñ yem i sogoo yé inyu tjé bôt bobasôna,* ibôdôl i pes nwelmbok letee ni i pes ñombok. 5 Ñ, bôt bobasôna b’a yi le me Yéhôva, me mal sodol pansoñ yem i sogoo yé. I ga témb ha bé ki mu.”’+

6 “Ndi we, a man mut, siida, u sehlaga;* ñ, bomede ba tehe yaga we u nsiida.+ 7 Ibale ba mbat we le: ‘Inyuki u nsiida?’ Ha nyen u ga timbhe bo le: ‘Me nsiida inyu nwin u yé i lo.’ Inyule i nwin u, u ga lo ibabé set; miñem mi bôt nwominsôna mi ga sehla inyu* woñi, bobasôna moo map ma ga yoomba, ba ga tomb, yak maboñ map momasôna ma ga yoo malép.*+ ‘Emblana! I jam li, li ga lo ibabé set, li bôña ki,’ hala nyen Nwet Bayemlikok le Yéhôva a mpot.”

8 Yéhôva a pôdôs ki me, a kal le: 9 “A man mut, añal i mam ma ga yik bôña, u kal le: ‘Lana nyen Nwet Bayemlikok le Yéhôva a mpot: “U ga kal le: ‘Pansoñ! Ba yé i hôl pansoñ,+ ba yé ki i se yo. 10 Ba nhôl yo inyu nol yaga bôt bañga linolok; ba nhôl yo le i bai kiki nwegnwek.’”’”

“Baa di nlama bé séé?”

“‘Baa i* ga yan* ntoñgo ane u man wem,+ kiki i nyan hiki e?

11 “‘Ba nti pansoñ le ba se yo, le ndi mut a gwélél yo. Ba yé i hôl i pansoñ ini, ba yé ki i se yo, inyu ti yo mut manola.*+

12 “‘A man mut, bégél,+ u lond ki, inyule pansoñ i nkwél* litén jem; i ga bép baane ba Israel.+ Pansoñ i ga nol bo, i nol ki litén jem. Inyu hala nyen, siida yaga.* 13 Inyule litén jem li mal wéna.+ Kii i ga bôña ibale pansoñ i nyan ntoñgo ane? Wee u* ga ba ha bé,’+ hala nyen Nwet Bayemlikok le Yéhôva a mpot.

14 “Ndi we, a man mut, añal i mam ma ga yik bôña, bamb moo, u pot ki ngélé aa le: ‘Pansoñ!’ I yé pansoñ i i nol ngandak bôt, pansoñ i manola makeñi, yon i nkéña bo.+ 15 Miñem nwap mi ga sehla inyu woñi,*+ ngandak bôt ki i ga kwo i manwemel ma tison yap; m’a nol ngandak bôt ni pansoñ. Ñ, i pansoñ i, i mbai kiki nwegnwek, ba nse yo inyu nol bôt! 16 Kek i pes walôm! Bép i pes waé! Nwes pansoñ yoñ* bipes gwobisôna. 17 Yak me m’a bamb moo, me waa ki unup.+ Me Yéhôva, me mal pot hala.”

18 Yéhôva a pôdôs ki me, a kal le: 19 “Ndi we, a man mut, ôt titii i manjel ima i i ñunda i het pansoñ i kiñe Babilôn i ntagbene. I manjel mana mo ima, ma ga nyodne i nlélém loñ. Ba nlama téé yimbne* i het nloñ u mbagla, u yila minloñ ima mi mi nke nyoo i bitison bi gwo biba. 20 U nlama tand njel i i ñunda i het pansoñ i ntagbene inyu lo i kwél Raba,+ tison i bon ba Lôk Amôn; u tand ki njel ipe i i ñunda i het pansoñ i ntagbene inyu lo i kwél Yérusalem,+ tison i i gwé mapénd ma ngui ikété nkoñ u Yuda. 21 Inyule kiñe Babilôn i ntelep i homa minloñ ima mi mbagla inyu bo ngambi. A mpôgôs makoñ mé, a pôdhak bisat gwé, a gwéélak libaa li nuga inyu yéñ biyimbne. 22 I ngambi a mbo i woo wé walôm i ñunda nye le a kee i Yérusalem, inyu bii basoso ba minkok nyoo, inyu ti oda le ba nol bôt, inyu leñ nlondok gwét, inyu bii basoso ba minkok inyu bôk mapénd, inyu kéña tison ni lingund li biték, ni inyu oñ lipénd le li kéña yo.+ 23 I mis ma bôt* ba bi kumul bo* soñ,+ i ngambi i, i yé bitembee. Ndi nye a mbigda liboñok jap libe, a gwel ki bo.+

24 “Jon lana nyen Nwet Bayemlikok le Yéhôva a nkal: ‘Ibale ba mbigda liboñok linan libe, hala a yé inyule ni bi bambal i mam mabe ni mboñ, yak maboñok manan ma yelel bibéba binan. Nano kiki ba mbigda bé, wee ñoo nan a* ga kena bé ni ngui.’

25 “Ndi inyu yoñ, a béba ñane nu Israel,+ nano u yé kiki mut nu a yé bebee ni wo. Ngéda kogse yoñ nsôk i nkola. 26 Lana nyen Nwet Bayemlikok le Yéhôva a nkal: ‘Héya yañsi, u héya ki ntut.+ Mam ma ga héñha.+ Bédés yañga mut,+ u suhus bañga mut.’+ 27 Tjiba, tjiba, tjiba yon m’a lona i ngii ane.* Mut nye ki nye a ga bana bé yo, letee ni i ngéda mut a kôli a nlo,+ ha nyen m’a ti nye yo.’+

28 “Ndi we, a man mut, añal i mam ma ga yik bôña, u ga kal le: ‘Lana nyen Nwet Bayemlikok le Yéhôva a nkal inyu bon ba Lôk Amôn ni bisol gwap.’ Kal le: ‘Pansoñ! Ba yé i sodol pansoñ inyu nol ngandak bôt; ba yé i se yo loñge inyu nol bôt. Ñ, i pansoñ i, i mbai kiki nwegnwek; ba nse yo inyu tjé bôt, ba nse ki yo inyu bai kiki nwegnwek. 29 Kiki bôt boñ ba makañ ba ntéé we biyiinda bi bi yé malôga, ba mbôl ki we ngambi i i yé bitembee, to hala, ba ga kéhi mim mi bôt boñ i ngii mim mi bôt ba ba bi nôla, hala wee i ngii bibéba bi bôt; ñ, kel yap i nlo, ngéda kogse yap nsôk i nkola. 30 Timbis pansoñ i sogoo yé. M’a kéés we i homa u bi lôl,* i loñ u bi gwééne. 31 M’a kôp we hiun hiem. M’a hue we hié hi kundul hiem, me ti ki we i moo ma bôt ba bisañ, ba ba gwé likeñge i tjé bôt.+ 32 U ga yila yom i i nlôñôs hié;+ matjél moñ ma ga kuba mu loñ. Mut to wada a ga bigda ha bé we, inyule me Yéhôva, me mal pot hala.’”

22 Yéhôva a pôdôs ki me, a kal le: 2 “A man mut, baa u yé bebee i pémhene tison manola mbagi nôgôs,*+ u yis ki yo mam mé momasôna ma nsuñgaha ñem?+ 3 U nlama kal le: ‘Lana nyen Nwet Bayemlikok le Yéhôva a nkal: “A tison, we nu u nkôp matjél i weeni,+ ngéda yoñ i nkola,+ we nu u mboñ bisat bi nyega* inyu hindis wemede,+ 4 u mboñ béba inyule u nkôp matjél,+ u yé ki mahindi inyu bisat gwoñ bi nyega.+ U mboñ le lisuk li dilo tjoñ di niñ li pala lo, yak lisuk li nwii nwoñ mi niñ li mal lo. Jon m’a boñ le u yila yom biloñ bipe bi nyan, ni yom minkoñ nwominsôna mi ndegle.+ 5 I biloñ bi yé we bebee ni bi bi yé we haa bi ga nol we hiol,+ we nu jôl joñ li nke ngan inyu nyega yoñ, u bak nyonok ni yubda. 6 Emble! Hiki ñane Israel nu a yé i weeni a ngwélél ngui yé inyu kôp matjél.+ 7 I weeni nyen mut a nyan isañ bo nyañ.+ Bôt ba nyoñ gwom bi nkén mut ni malôga, ba tééñgaga man nyuu* ni yik muda.”’”+

8 “‘U nyan bahoma bem bapubhaga, u hindhak dilo tjem di sabat.+ 9 Bôt ba minsohi ba yé i weeni, ba nai ndik le ba nkôp matjél;+ i weeni, bôt ba nje bisesema ba nti bisat i ngii dikôa, i weeni ki nyen bôt ba mboñ mam ma nyega.+ 10 I weeni nyen mut a nlalna nwaa isañ,*+ a lalnaga muda nu a yé nyega ni ngui inyule a nkon sôñ.+ 11 I weeni nyen mut a mboñ mam mabe ni nwaa mut wé libôk,+ numpe a nhindis nkiya wé ni liboñok jé li nyega,+ numpe ki a nlalna manyañ nu muda ni ngui, hala wee ngond isañ.+ 12 I weeni nyen bôt ba neebe yoñ moni inyu nol bôt bape.+ U mpôôs ni yéñe+ tole u mpôôs yom inyu kôhna nseñ,* u nyoñ ki moni mi mut woñ libôk+ ni njel malôga. Ñ, u bi hôya toi me,’ hala nyen Nwet Bayemlikok le Yéhôva a mpot.

13 “‘Emble! Me mbamb moo, hala a ngwélha me nyega i ngéda me ntehe gwom u bi kôhna ni malôga, ni matjél ma ma bi kuba i weeni. 14 Baa u ga lédés ñem,* yak moo moñ m’a bana ngui i ngéda m’a kolba we?+ Me Yéhôva, men me mpot, m’a boñ ki hala. 15 Me ga boñ le u tjama mu biloñ, me sand ki we mu minkoñ,+ me ga mélés mam ma nyega u mboñ.+ 16 U ga wo nyuu, biloñ bipe bi tehge, ha nyen w’a yi le men me yé Yéhôva.’”+

17 Yéhôva a pôdôs ki me, a kal le: 18 “A man mut, bôt ba litén li Israel ba gwé ha bé nseñ i mis mem, ba yé kiki mahindi.* Bobasôna ba yé ni mamuna, ni kwémbé,* ni kei, lôñni lipidô ikété juu li hié hikeñi. Ba mal yila mahindi ma ma mpémél i silba.+

19 “Jon lana nyen Nwet Bayemlikok le Yéhôva a nkal: ‘Hala kiki ni gwé ha bé nseñ, ni bak mahindi,+ me nkot bé ikété Yérusalem. 20 Nlélém kiki ba nkot silba, mamuna, kei,* lipidô, kwémbé ikété juu li hié hikeñi, ba koda ki hié le hi loñ ni ngui inyu boñ le bi nyimbi, hala nyen ikété hiun hiem ni kundul yem, m’a kot bé, me hue ki bé inyu boñ le ni nyimbi.+ 21 M’a kot bé, me hue hié hi hiun hiem hikeñi i ngii nan,+ ha nyen ni ga nyimbi mukété tison.+ 22 Nlélém kiki ba nyimbi silba ikété juu li hié hikeñi, hala nyen n’a nyimbi ikété tison. Ha nyen n’a yi le men me yé Yéhôva, m’a kôp hiun hiem hikeñi i ngii nan.’”

23 Yéhôva a pôdôs ki me, a kal le: 24 “A man mut, kal i nkoñ u le: ‘U yé nkoñ u u ga pubhana bé, i het nop a ga no bé i kel hiun hiem hikeñi. 25 Bapôdôl boñ ba bi uune we jimb+ kiki mbondo njéé i i nkônd, i ngéda i mpat nuga.+ Hala nyen ba nje bôt. Ba nkadal nkus ni tik gwom, ba boñok le ngandak bôda i yila biyik i weeni. 26 Biprisi gwoñ bi bi bôk mbén+ yem, bi nke ni bisu i hindis bahoma bem bapubhaga,+ bi mboñ bé maselna ipôla yom i yé pubhaga ni yañga yom;+ bi niiga bé to bôt maselna ma yé ipôla yom i yé nyega ni yom i yé pubhaga,+ bi ntééda bé to dilo tjem di sabat, bi hindhak ki jôl jem i boni. 27 Baane boñ ba yé kiki ngwo-njéé i i mpat nuga, ba nkôp matjél, ba nolok bôt inyu kôhna nseñ ni njel malôga.+ 28 Ndi bapôdôl bap ba bi hô maboñok map mabe kiki ba nhoo libap puba pén. Ba ntehe biyiinda bi malôga,+ ba mbo ki ngambi i bitembee, ba kalak le: “Lana nyen Nwet Bayemlikok le Yéhôva a nkal,” ki le Yéhôva a mpot bé to yom. 29 Bôt ba loñ ba bi yoñ gwom ni malôga, ba nibik,+ ba tééñgaga ngoo bôt ni diyeyeba, ba yoñok gwom bi bakén ba bôt ni malôga, ba tjélék pémhene bo mbagi sép.’

30 “‘Me bé yéñ mut ipôla yap nu a bé le a tibil libap li ngok, tole nu a bé le a telep ha i likubne li libap i bisu gwem inyu sôñ loñ, inyu boñ le me tjé bañ yo,+ ndi me bi tehe bé mut nye ki nye. 31 Jon m’a kôp hiun hiem hikeñi i ngii yap, me tjé ki bo ni hié hi kundul yem. M’a boñ le maboñok map ma timbil bo,’ hala nyen Nwet Bayemlikok le Yéhôva a mpot.”

23 Yéhôva a pôdôs ki me, a kal le: 2 “A man mut, bôda iba ba bé, ba bak bingond bi nlélém muda.+ 3 Ba bi yila bôda ba libambe i loñ Égiptô;+ ba bi bôdôl ke i libambe, ba bak ba ngi yii bingond bi bôda. Nyoo nyen ba bi bôble bo méé, ba siñgii ki bo tôl, bo ngi yi bôlôm. 4 Nu mañ, jôl jé li bé le Ôhôla;* nu mbus, jôl jé li bak le Ôhôliba.* Ba bi yila bem, ba gwal ki bon bôlôm ni bon bôda. Ôhôla nyen a yé Samaria,+ Ôhôliba a bak Yérusalem.

5 “Ôhôla a bi bôdôl ke i libambe+ ki le a bé wem. A bééna ngôñ ikeñi i ba ni mimbok+ nwé, bôt bé ba libôk, hala wee bôt ba Asiria.+ 6 I bôt ba, ba bé bangomin ba bipes bi mbok, ba ba bé haba mambot ma ma yé mangoñ;* ba bak ki bakot nkus bakeñi; bobasôna ba bé balam ba boñge bôlôm, ba kilak i ngii bihosi. 7 A bi waa bé ke i libambe ni bañga bôt yosôna i Asiria, a hindis ki nyemede+ ni bisat bi nyega* bi bôt ba bé lôôha kon nye ngôñ. 8 A bi tjôô bé libambe a bé boñ i Égiptô, inyule ba bé lal ni nye i ngéda a bé a ngi yii ngond muda; ba bi siñgii nye tôl, nye ngi yi munlôm, ba gwélél ki nye inyu yônôs ngôñ yap ibe.*+ 9 Jon me bi ti nye i moo ma mimbok nwé, hala wee bôt ba Asiria,+ ba ba bé kon nye ngôñ. 10 Ba bi bambal nso+ wé, ba gwel bon bé bôlôm ni bon bé bôda,+ ba nol ki nye ni pansoñ. Jôl jé li bi ke ngan ipôla bôda, bôt ba Asiria ba pémhene ki nye mbagi nôgôs.

11 “I ngéda manyañ nu muda le Ôhôliba a bi tehe hala, a nai ni mam ma nyega, a ke ki ni bisu i boñ libambe iloo manyañ nu muda.+ 12 A bééna ngôñ ikeñi i ba ni bôt bé ba libôk le bôt ba Asiria,+ hala wee bangomin ba bipes bi mbok ni bakot nkus bakeñi, ba ba bé ba hééba mambot malam, ba kilak i ngii bihosi; bobasôna ba bé balam ba boñge bôlôm. 13 I ngéda a bi hindis nyemede, me yimbe le yak nye a mboñ kiki manyañ nu muda. Bo iba ba noñ nlélém njel.+ 14 Ndi a ke ni bisu i boñ libambe jé. A tehe minkédlak mi bititii mi bôt ba Kaldéa mu libap, mi ba bi hoo ni kôyôp pén, 15 ba bé ba hééba ngôli i bôbôk, biyañsi bi peglege bo i ngii miño, ba pôn-ga bôt ba gwét; i bititii bi gwobisôna bi bé bititii bi bôt ba Babilôn, bôt ba bi gwééne i nkoñ u bôt ba Kaldéa. 16 Ndik kiki a bi tehe bititii bi bôt ba, ba bôdôl kon nye ngôñ, a om balegelnwin i Kaldéa.+ 17 Jon bôt ba Babilôn ba bé ba lo i nyeni, ba nañlak i nañi yé inyu lal ni nye, ba hindhak nye ni ngôñ yap ibe.* I ngéda ba bi mal yilha nye nyega, a tjôô bo inyule ba bé gwélha nye nyega.

18 “I ngéda a bi ke i libambe jé ibabé le a wo nyuu, a undga ki nso+ wé i mbamba, ha nyen me bi tjôô nye inyule a bé gwélha me nyega, kiki me bi tjôô yak manyañ nu muda inyule a bé gwélha me nyega.+ 19 A bi nai ni libambe,+ li li bé hôñlaha nye i ngéda a bé ngond muda, a kenek i libambe i loñ Égiptô.+ 20 Mimbok nwé mi bé lôôha kon nye ngôñ, wengoñle muda nu a nlôôha bana ngôñ ni mbok u u gwé gwom bi mbôô kiki jagas tole hosi. 21 Liboñok joñ li nyega i ngéda u bé ngond muda i Égiptô+ li bé héñél we kiyaga, i ngéda bôt ba Égiptô ba bé siñgii we tôl, ba bôblege we méé, u bak u ngi yii ngond muda.+

22 “Inyu hala nyen a Ôhôliba, lana nyen Nwet Bayemlikok le Yéhôva a nkal: ‘M’a tinde mimbok nwoñ i kolba+ we, i bôt u bi tjôô inyule ba bé gwélha we nyega, m’a boñ le ba loo i jôs we, ba lôlak bipes gwobisôna:+ 23 bôt ba Babilôn,+ ni bôt ba Kaldéa bobasôna,+ ni bôt ba Pékod,+ ni bôt ba Sôa lôñni bôt ba Kôa, ntôñ ni bôt ba Asiria bobasôna. Bobasôna ba yé balam ba boñge bôlôm, hala wee bangomin ba bipes bi mbok ni bakot nkus bakeñi, ni mimpémba mi bôt ba gwét, ni mimpohlak mi bôt yaga;* bobasôna ba kilak i ngii bihosi. 24 Ba ga leñ we gwét, ikété liyôgbe likeñi li makôô ma bikak bi gwét, ba ban-ga ngandak bôt ba gwét, ba bak ba bééga biben bikeñi ni biben bititigi,* ba bak ki ba hééba bikôñgô. Ba ga kéña we bipes gwobisôna. M’a ti bo kunde i kéés, ba ga kogse we kiki ba ngwés.+ 25 M’a kôp we kundul yem ikeñi, m’a gwélél ki hiun hiap hikeñi inyu kolba we. Ba ga kit we jôl, ba kit ki we maôô; yak bôt boñ ba ba ga pei ba ga nôla ni pansoñ. Ba ga kena bon boñ bôlôm ni bon boñ bôda; yak bôt boñ ba ba ga pei ba ga lighana.+ 26 Ba ga héya we mambot,+ ba kadal ki bieñg gwoñ bi nyañga bilam.+ 27 Me ga mélés liboñok joñ li nyega ni libambe+ joñ, li u bi bôdôl i loñ Égiptô.+ U ga waa béñge bo,* u ga bigda ha bé Égiptô.’

28 “Inyule lana nyen Nwet Bayemlikok le Yéhôva a nkal: ‘Ndék ngéda wee me nti we i moo ma baoo boñ, ba u bi tjôô inyule ba bé gwélha we nyega.+ 29 Ba ga kolba we ikété ôa, ba ga kena i gwom gwobisôna u bi sal ni ngui inyu kôhna,+ ba yék ki we nso, ñ, nso yaga. Malal moñ ma nyega ma ma nwéha nyuu ma ga yeli, yak liboñok joñ li nyega ni libambe joñ bi ga yeli.+ 30 Ba ga boñ we i mam ma inyule u bé noñ biloñ bipe kiki muda libambe,+ inyule u bi hindis wemede ni bisat gwap bi nyega.+ 31 U bi bana nlélém liboñok kiki manyuñ nu muda;+ inyu hala nyen me ga ha libôndô jé li kogse i woo woñ.’+

32 “Lana nyen Nwet Bayemlikok le Yéhôva a nkal:

“Inyule men me mpot hala,” hala nyen Nwet Bayemlikok le Yéhôva a mpot.’

35 “Jon lana nyen Nwet Bayemlikok le Yéhôva a nkal: ‘Hala kiki u bi hôya me, u tjôô yaga me,*+ inyu hala nyen bikuu bi liboñok joñ li nyega ni libambe joñ bi ga kwél we.’”

36 I mbus, Yéhôva a kal me le: “A man mut, baa u yé bebee i kéés Ôhôla bo Ôhôliba,+ u nyéyéi ki bo inyu maboñok map ma nyega? 37 Ba bi ke i ndéñg,*+ moo map ki ma nhooba matjél. Ba nke ndik bé i ndéñg ni bisat gwap bi nyega, ndi ba bi yoñ ki bon ba ba bi gwélél me, ba ti bo le ba ba bijek inyu bisat+ gwap. 38 I mam mana mon ba bi boñ ki me: i kel ba bi hindis homa wem mpubhaga nyen ba bi hindis ki dilo tjem di sabat. 39 I ngéda ba bi mal nol bon bap inyu ti bo bisat gwap bi nyega kiki sesema,+ yokel ki nyen ba bi jôp i homa wem mpubhaga inyu hindis+ nye. I mam ma mon ba bi boñ mu ndap yem. 40 Ba bi om ki nlegelnwin inyu sébél bôlôm ba ba nlôl haa.+ I ngéda ba bé lo, we a Ôhôliba, u bi nogop, u pén mis, u haba ki bieñg bi nyañga inyu ba nlam.+ 41 U bi yén i nañi i i yé ilam,+ téblé i bak i tégi yo i bisu.+ Mu ngii téblé, u bii binjinjiñ+ gwem ni môô mem.+ 42 Nyoo nyen ba bé nôgôl liyôgbe li limut li bôt li li ndiihe bé yom yo ki yo. Bôt ba lihiua ba ba bé lôl i ñoñ ba bé mu nsoñgi wap. Bo yaga bon ba bé ha bôda minkôm i moo, ba hak ki bo mintut minlam mu miño nwap.

43 “I mbus, me pot inyu muda nu ndéñg i bi mélés, me kal le: ‘To hala, a ga kena libambe jé ni bisu.’ 44 Jon ba bi waa bé ke i nyeni kiki bôlôm ba nke yak muda libambe. Hala nyen ba bi ke yak Ôhôla bo Ôhôliba, bôda ba ba mboñ mam ma nyega. 45 Ndi bôt ba téé sép ba ga pémhene nye mbagi a kôli kôhna inyu ndéñg+ yé, ni manola+ mé; inyule ba yé yaga bôda ba ndéñg, moo map ma gwé matjél.+

46 “Inyule lana nyen Nwet Bayemlikok le Yéhôva a nkal: ‘Ba ga om ntôñ gwét inyu jôs bo, kayéle i ntôñ gwét unu u yilha bo yom bilim, ni yom le bôt ba mal hondol.+ 47 I ntôñ gwét u, u ga ôm bo ngok,+ u nol ki bo ni pansoñ. Ba ga nol bon bap bôlôm ni bon bap bôda,+ ba ligis ki mandap map.+ 48 Me ga mélés maboñok map ma nyega mu loñ. Bôda bobasôna ba ga ôt biniigana, ba ga nigle bé to maboñok manan mabe.+ 49 Ba ga boñ le bikuu bi maboñok manan ma nyega ni bikuu bi bibéba ni bi boñ lôñni bisat binan bi nyega bi kwél bé. Ha nyen n’a yi le men me yé Nwet Bayemlikok le Yéhôva.’”+

24 Yéhôva a bi pôdôs ki me i nwii mi nyônôs bôô, i hilo i nyônôs jôm hi sôñ i nyônôs jôm, a kal le: 2 “A man mut, mage i kel ini,* inyule i kel ini nyen kiñe Babilôn i bi bôdôl jôs Yérusalem gwét.+ 3 Kéne litén li ndok lini ngén.* Kal inyu yap le:

“‘Lana nyen Nwet Bayemlikok le Yéhôva a nkal:

“Téé hibee,* téé hio i juu, u ha ki malép mukété.+

 4 Ha bikét bi binuga mu hibee,+ bikét bilam gwobisôna:

bel ni tjep; yônôs hio ni bihés bilam.

 5 Yoñ biloñge bi mintômba mu bémba,+ u kot tjéé isi hibee, mu mapañ momasôna ma hibee.

Nat bikét bi binuga, u bélés ki bihés bi bi yé mukété hibee.”’

6 “Jon lana nyen Nwet Bayemlikok le Yéhôva a nkal:

‘Ngoo ni tison i manola,+ hibee hi hi gwé mañglét, hi ba bi héya bé mañglét!

Héya bikét bi binuga mu hibee, yada yada;+ ndi u pohol bañ imbe két nuga u nlama yoñ.

 7 Inyule matjél i tison ini i bi kôp ma ngi yii mukété yé;+ i bi kôp yaga mo i ngii liaa.

I tison ini i bi kôp bé mo ’isi le biték+ bi hô mo.

9 “Jon lana nyen Nwet Bayemlikok le Yéhôva a nkal:

‘Ngoo ni tison i manola!+

M’a kot soso nwind u tjéé.

Hié hi ga boñ le nyega yé i nyimbi,+ hi ligis ki mañglét nwé.

Leña hibee ni mañglét nwé i juu!’

13 “‘Maboñok moñ mabe ma bi yilha we nyega.+ Me bi yéñ le me pubus we, ndi njel i bé bé inyu pubus nyega yoñ. U ga pubhana ndik i ngéda hiun hikeñi me gwééne we hi nsôs.+ 14 Me Yéhôva, men me mpot hala. I jam li, li ga bôña. M’a boñ hala ibabé i tiñha, ibabé ngoo, ibabé i tam.+ Ba ga kéés we inoñnaga ni manjel moñ ni maboñok moñ,’ hala nyen Nwet Bayemlikok le Yéhôva a mpot.”

15 Yéhôva a pôdôs ki me, a kal le: 16 “A man mut, kunda yada, m’a héya mut u ngwés i moo moñ.+ U nlama bé ee;* u nlama bé bégél, u nlama bé to kulus gwiiha. 17 Nôgôl ndutu mu ñem woñ, ndi u jôp bañ malep inyu bawoga.+ Téñ yañsi,+ haba bitamb+ gwoñ. U hô bañ nyo*+ woñ, u je bañ to bret ba ga lona we.”*+

18 Me bi pôdôs litén kegla, nwaa wem a wo kôkôa. I kegla i bé noñ, me boñ i yom ba bi kal me le me boñ. 19 Bôt ba bé kal le: “Toñle bés: lelaa i mam u mboñ ma mbéñge bés?” 20 Me timbhe bo le: “Yéhôva a mpôdôs me. A kal me le: 21 ‘Kal litén li Israel le: “Lana nyen Nwet Bayemlikok le Yéhôva a nkal: ‘M’a hindis homa wem mpubhaga,+ nu a nyilha bé ngôk, nu ni ngwés, nu ni ndiihe ki ngandak. Bon bôlôm banan ni bon bôda banan, ba ni bi yék, ba ga nôla ni pansoñ.+ 22 Ha nyen ni ga boñ kiki me. Ni ga hô bé nyo* nan, ni ga je bé to bret ba ga lona bé.*+ 23 Ni ga héya bé biyañsi bi yé bé i miño, to bitamb bi yé bé i makôô. Ni ga ee bé, to bégél ni ga bégél bé to. Ndi ni ga nok ndutu inyu maboñok manan mabe,+ ni siidaga ki. 24 Ézékiel a ga ba yimbne inyu nan.+ Ni ga boñ nlélém kiki nye. I ngéda hala a ga bôña, ha nyen n’a yi le men me yé Nwet Bayemlikok le Yéhôva.’”’”

25 “Ndi we a man mut, i kel m’a héya lisolbene jap li ngui, i yom i nkônha bo maséé, i yom ba ngwés ni i yom ba ndiihe, i nlélém ngéda nyen m’a héya bon bôlôm bap ni bon bôda bap,+ 26 i mut a ga pei nyen a ga lo i yis we hala.+ 27 I yokel nu nyen u ga ba ha bé mbuk: u ga yibil nyo woñ, u pôdôs ki i mut a mpei.+ U ga bane bo yimbne, ha nyen b’a yi le men me yé Yéhôva.”

25 Yéhôva a pôdôs ki me, a kal le: 2 “A man mut, hielba, u nun pes i Lôk Amôn,+ u añal ki bikuu bi ga yik kwél bo.+ 3 U ga kal Lôk Amôn le: ‘Emblana bibañga bi Nwet Bayemlikok le Yéhôva. Lana nyen Nwet Bayemlikok le Yéhôva a nkal: “Hala kiki ni bi kal homa wem mpubhaga le ‘hiino!’ i ngéda ba bi hindis nye, ni kal ki loñ Israel hala i ngéda i bi yégle hôlô, ni témb ki ni kal bon ba Lôk Yuda hala i ngéda ba bi ke i minkôm, 4 jon m’a ti bé i moo ma bôt ba nyééne i pes likôl. Ba ga oñ mambai map* i bééni, ba téé ki mandap map ma mabadô i bééni. Ba ga je matam manan, ba nyo ki milik minan. 5 M’a yilha Raba+ homa kamél i njél, me yilha ki nkoñ u Lôk Amôn homa linôyôi li bémba; ha nyen n’a yi le men me yé Yéhôva.”’”

6 “Inyule lana nyen Nwet Bayemlikok le Yéhôva a nkal: ‘Hala kiki ni mbamb moo,+ ni pind ki ni maséé,* ni konok maséé inyu yom i bi pémél loñ Israel, ni yanak+ ki yo kiyaga, 7 inyu hala nyen m’a sambal woo wem, me kogse bé, me ti ki bé i moo ma biloñ bipe le bi yoñ gwom binan gwobisôna. M’a héya bé ikété matén, me sas bé ikété biloñ.+ M’a tjé bé, ha nyen n’a yi le men me yé Yéhôva.’

8 “Lana nyen Nwet Bayemlikok le Yéhôva a nkal: ‘Hala kiki Môab+ ni Séir+ ba nkal le: “Nuna-ki! Litén li Yuda li yé kiki bini biloñ bipe gwobisôna,” 9 m’a nwas le baoo ba jôs bitison bi bi yé i nwaa nkoñ u* Môab, ba jôs yak bitison bi bi nlôôha bilam bi Môab: Bét-Yésimôt, Baal-Méôn letee ni i Kiriataim.+ 10 M’a ti Lôk Môab ni Lôk Amôn i moo ma bôt ba nyééne i pes likôl,+ kayéle mut nye ki nye mu biloñ+ bipe a’ bigda ha bé Lôk Amôn. 11 M’a kogse ki Môab,+ ha nyen n’a yi le men me yé Yéhôva.’

12 “Lana nyen Nwet Bayemlikok le Yéhôva a nkal: ‘Édôm a bi kogse litén li* Yuda inyu pun nyemede, a boñ ki béba ikeñi inyule a bi pun nyemede;+ 13 jon lana nyen Nwet Bayemlikok le Yéhôva a nkal: “M’a sambal woo wem, me kogse ki Édôm, m’a sas bôt ba binam ni bémba mu loñ, me yilha yo hôlô.+ B’a nôla ni pansoñ ibôdôl i Téman letee ni i Dédan.+ 14 ‘M’a gwélél litén jem Israel+ inyu kogse Édôm le ndi me pun memede. B’a boñ le hiun hiem ni liyot jem bi kwél Édôm, inyu boñ le Lôk Édôm i nôgda mapuna+ mem,’ hala nyen Nwet Bayemlikok le Yéhôva a mpot.”’

15 “Lana nyen Nwet Bayemlikok le Yéhôva a nkal: ‘Hala kiki bôt ba Filistia ba ñoo ndik Lôk Israel oo ni oo, inyu hala nyen ba bi gwélél manjel mabe inyu pun bomede ni tjé bo.+ 16 Jon lana nyen Nwet Bayemlikok le Yéhôva a nkal: “M’a sambal woo wem, me kogse bôt ba Filistia,+ me sas bôt ba Kéret,+ me tjé ki i bôt ba nyégle, ba ba yiine i ngwañ tuye.+ 17 M’a lona mapuna makeñi inyu kogse bo bañga bañga, ha nyen b’a yi le men me yé Yéhôva i ngéda m’a boñ le mapuna mem ma kwél bo.”’”

26 I nwii mi nyônôs jôm ni wada, i hilo hi bisu hi sôñ, Yéhôva a pôdôs ki me, a kal le: 2 “A man mut, hala kiki Tir a nkal inyu Yérusalem+ le: ‘Hiino! A mbugi ngéñ ngéñ,+ nye nu a bak nwemel i het matén ma bak ma njubul! Nano le a ntjiba, gwom gwobisôna bi ga tagbene i meeni, m’a yila ngwañ!’ 3 Jon lana nyen Nwet Bayemlikok le Yéhôva a nkal: ‘A Tir, m’a jôs we, me bedna ki ngandak biloñ, kiki tuye a mbedna mangudga mé, le bi kolba we. 4 Bi ga bôk mapénd ma Tir, bi tjé ki minkum+ nwé mi mandap; m’a homb biték gwé, a yégle nso liaa li li bémbi. 5 Nyoo i ñemkété tuye+ nyen Tir a ga yila ndigi homa ba mbémbél bipése.’

“‘I pot me mal pot hala, biloñ bi ga yoñ gwom gwé gwobisôna,’ hala nyen Nwet Bayemlikok le Yéhôva a mpot. 6 ‘Yak i bôt ba nyééne mu mambai* ma yé i nkoñ wé ba ga nôla ni pansoñ, ha nyen b’a yi le men me yé Yéhôva.’

7 “Inyule lana nyen Nwet Bayemlikok le Yéhôva a nkal: ‘Me ga boñ le kiñe Babilôn le Nébukadnézar,* kiñe i bikiñe,+ a loo i jôs Tir; a ga lôl i pes ñombok+ ni bihosi,+ ni bikak bi gwét,+ ni bakilhosi, yak ni ntôñ nkeñi u bôt ba gwét.* 8 A’ nol i bôt ba nyééne mu mambai ma yé i nkoñ woñ ni pansoñ. A’ oñ lipénd inyu kéña we, a kéña ki we ni lingund li biték inyu leñ we gwét, yak ntôñ wé gwét w’a gwélél biben inyu jôs we. 9 A ga bôk mapénd moñ ni soso wé nkok,* a gwélél ki minkuleñ nwé* inyu kwés minkum nwoñ mi mandap ’isi. 10 Bihosi gwé bi ga ba ngandak kayéle lipum jap li biték li ga hô we. I ngéda a ga jubul mu manwemel moñ, kiki bôt ba gwét ba ba nyek i tison i i gwé mbugak lipénd, mbimba i bakilhosi ni i makôô ma bikak i ga boñ le mabap moñ ma nyeñg. 11 Bipal bi bihosi bi ga ôbôs minloñ nwoñ nwominsôna;+ a ga nol bôt boñ ni pansoñ, yak mél moñ ma ngui ma ga beha ’isi. 12 Baoo ba ga yoñ gwom gwoñ gwobisôna, ba yoñ manyuñga+ moñ, ba bôk mapénd moñ, ba nyugut ki mandap moñ malam. I mbus, ba ga lep ngok i lép, yak bikék gwoñ ni minluñ nwoñ mi biték.’

13 “‘M’a boñ le kiñ i tjémbi tjoñ i nôga ha bañ, to kiñ i diluñ tjoñ i ga nôga ha bé.+ 14 M’a yilha we nso liaa li li bémbi, u yila ki homa ba mbémbél bipése.+ Ba ga tiimba ha bé oñ we, inyule me Yéhôva, me mal pot hala,’ hala nyen Nwet Bayemlikok le Yéhôva a mpot.

15 “Lana nyen Nwet Bayemlikok le Yéhôva a nkal Tir: ‘Baa biôn bi ga sehla+ bé i ngéda bi ga nok ngan le u nkwoo, i ngéda bôt ba ba yé bebee ni wo* ba ga siida, i ngéda manola ma ga ba i weeni? 16 Baane bobasôna ba tuye ba ga nyodi i biyééne gwap bi ane, ba héya mimbôñgô nwap mi mambot,* ba héya ki mambot map ma ma yé magge; ba ga yén ’isi, ba sehlaga ni woñi,* ba béñgege we ni mahel.+ 17 Ba ga tôp hiémbi hi maéya+ inyu yoñ, ba ga kal le:

19 “Inyule lana nyen Nwet Bayemlikok le Yéhôva a nkal: ‘I ngéda m’a tjé we kiki bitison bi bi gwé ha bé bôt, i ngéda m’a lona mangudga makeñi le ma mil we, yak i ngéda tuye a ga hô we,+ 20 m’a suhus we i soñ,* kiki me nsuhus bana bape bobasôna i soñ, i het bôt ba bi wo kôba ba yé; m’a boñ ki le u yééne i homa a nlôôha ba ’isi, lôñni bitison bi bi bi tjiba kôba, yak ni bana bape bobasôna ba ba nsôs i soñ,+ inyu boñ le bôt ba yééne ha bañ i weeni. I mbus, m’a ti bôt ba loñ ba ba ngi yii i niñ lipém.*

21 “‘Me ga boñ le bikuu bi kwél we kunda yada, u ga ba ha bé.+ Ba ga yéñ we, ndi ba ga tehe ha bé we,’ hala nyen Nwet Bayemlikok le Yéhôva a mpot.”

27 Yéhôva a pôdôs ki me, a kal le: 2 “A man mut, tôp hiémbi hi maéya inyu Tir,+ 3 kal Tir le:

“A Tir, wen u bi kal le: ‘Me nlôôha ba nlam.’+

 8 Bôt ba Sidôn ni bôt ba Arvad+ bon ba bé lugul we sitima.

Bôt boñ ba makeñge bon ba bé sélél we mu sitima.+

 9 Minhôôlak mi bôt* ni bôt ba makeñge ba Gébal+ bon ba bé yip mapondo mu bisitima gwoñ.+

Bisitima gwobisôna bi tuye ni i bôt ba nsal mu ba bé lo i weeni inyu boñ nyuñga ni we.

10 Bôt ba Persia, ba Lud, ni ba Put+ ba bé mu ntôñ woñ gwét; bon ba bé bôt boñ ba gwét.

Ba bé kéi biben gwap ni bikôñgô gwap mu mapénd moñ, ba boñok le u kôhna lipém.

12 “‘“Kiki u bé ngwañ ngandak, jon Tarsis+ a bé boñ nyuñga ni we.+ Tarsis a bé ti we silba, kei,* bende ni lipidô, le yak we u ti nye gwom gwoñ.+ 13 Yavan, Tubal+ ni Mések+ ba bé boñ nyuñga ni we. Ba bé ti we minkol+ ni gwom bi mamuna, le yak we u ti bo gwom gwoñ. 14 Bôt ba litén li* Tôgarma+ ba bé ti we bihosi, bihosi bi gwét ni minyabén mi hosi,* le yak we u ti bo gwom gwoñ. 15 Bôt ba Dédan+ ba bé boñ nyuñga ni we; bôt ba nyuñga ba ngandak biôn ba bé sélél we; ba tinak we mañ mi njok+ ni kalaklum* inyu saa we. 16 Édôm a bé boñ nyuñga ni we inyule u bééna ngandak gwom. Ba bé ti we ngok turkuas, ni bôñgô i mahuu ma ntômba i i yé wedewede,* ni mabadô ma ba mage, ma ban-ga minsonol minlam, ni biloñge bi mabadô, ni tik ngok i tuye,* lôñni kôyôp tik ngok, le yak we u ti bo gwom gwoñ.

17 “‘“Yuda ni Israel ba bé boñ nyuñga ni we, ba tinak we blé i nlôl i Minit,+ bijek bilam, wéi,+ môô ni binunumba,+ le yak we u ti bo gwom gwoñ.+

18 “‘“Damaskô+ a bé boñ nyuñga ni we inyule u bééna ngandak gwom, u bak ki ngwañ ngandak. A bé ti we wai i nlôl i Helbôn ni mahuu ma ntômba* ma ma nlôl i Zahar. 19 Védan ni Yavan, ba ba bé lôl i nkoñ u Uzal, ba bé ti we miñôôk mi bikei,* kasia* ni makai,* le yak we u ti bo gwom gwoñ. 20 Dédan+ a bé boñ nyuñga ni we, a tinak we mabadô* ma hosi inyu bakilhosi. 21 Bôt ba Arabia ni baane ba Kédar+ bobasôna, ba ba bé nuñul bon ba mintômba, balôm ba mintômba ni kembee, bon ba bé sélél we.+ 22 Bôt ba nyuñga ba Séba ni ba Raama+ ba bé boñ nyuñga ni we. Ba bé ti we mintén nwominsôna mi binunumba mi mi nlôôha minlam, tik ngok ni gôl, le yak we u ti bo gwom gwoñ.+ 23 Haran,+ Kané, Éden,+ bôt ba nyuñga ba Séba,+ Asur+ ni Kilmad ba bé boñ nyuñga ni we. 24 I bôm yoñ nyen ba bé nuñlene mambot malam, mambot ma ma yé mangoñ* ni mambot ba mage, ma ban-ga minsonol minlam, ba nuñlak ki bibuñga bi bi gwé ngandak minsonol; gwobisôna bi bak nkañak loñge ni minkôô.

28 I ngéda basal i sitima ba ga lond, i minkoñ mi yé ha bebee mi ga sehla.

32 I ngéda njôghe i ga pam bo i ñem, ba ga tôp hiémbi hi maéya, ba eek we, ba kalak le:

‘Baa tison ipe i yé kiki Tir, i i ntjiba len* i ñemkété tuye?+

33 I ngéda gwom gwoñ bi bé lôl nyoo i ñemkété tuye, u bé yônôs ngôñ i ngandak matén.+

Ngandak yoñ nkus ni manyuñga moñ bi bi yilha bikiñe bi nkoñ ’isi mingwañ mi bôt.+

36 Bôt ba nyuñga ba ba nlôl i biloñ bipe ba ga hem hiôa inyu jam li nkwél we.

28 Yéhôva a bi pôdôs ki me, a kal le: 2 “A man mut, kal ñane Tir le: ‘Lana nyen Nwet Bayemlikok le Yéhôva a nkal:

“Hala kiki ñem woñ u nyon ni ngôk,+ jon u nwaa bé kal le: ‘Me yé ngim nyambe.

Me yiine i yééne ane i nyambe wada i ñemkété tuye.’+

6 “‘Jon lana nyen Nwet Bayemlikok le Yéhôva a nkal:

 9 I mut a ga nol we, baa u ga ke ni bisu i kal nye le: ‘Me yé ngim nyambe?

Ngo w’a ba ndigi mut binam, ha ngim nyambe bé, i moo ma bôt ba nwéha we nyuu.”’*

11 Yéhôva a pôdôs ki me, a kal le: 12 “A man mut, tôp hiémbi hi maéya inyu kiñe Tir, u kal ki nye le: ‘Lana nyen Nwet Bayemlikok le Yéhôva a nkal:

13 U bé i Éden, i wom u Nyambe.

Ba bi eñg we ni mintén mi tik ngok nwominsôna:

Me bi kôôba gwo i kel me bi hek we.

14 Me bi téé we le u ba nhook kérubim, le u ngwel nson u ntat.

U bé i hikôa hipubi hi Nyambe,+ u hiômôk ipôla ngok i i nloñ ni hié.

17 Kiki u yé nlam, jon ñem woñ u ngôgôp.+

Lipém joñ likeñi li ñôbôs pék yoñ.+

M’a bes we ’isi.+

M’a bambal we i bisu bi bikiñe.

18 Hala kiki u bé boñ mam mabe, u boñok nyuñga i malôga, u bi hindis bahoma boñ bapubhaga.

M’a kuye hié ikété yoñ, hi ga ligis we.+

M’a yilha we libu hana ’isi i bisu bi bôt bobasôna ba mbéñge we.

20 Yéhôva a pôdôs ki me, a kal le: 21 “A man mut, hielba, u nun i pes Sidôn,+ u añal ki bikuu bi ga yik kwél nye. 22 U ga kal le: ‘Lana nyen Nwet Bayemlikok le Yéhôva a mpot:

23 M’a om dimala di kon i nyeni, matjél m’a kuli mu minloñ nwé.

24 “‘“I ngéda i mam mana m’a tagbe, maum ma ma mbaabana ni biloo bi bi nsôghana,+ hala wee biloñ bi bi ndegle litén li Israel, bi ga kéña ha bé jo; ha nyen bôt b’a yi le men me yé Nwet Bayemlikok le Yéhôva.”’

25 “‘Lana nyen Nwet Bayemlikok le Yéhôva a nkal: “I ngéda m’a kot bôt ba litén li Israel, ba lôlak mu matén i het me bi tjam bo,+ m’a unda bo le me yé mpubi, biloñ bipe bi tehge.+ B’a yééne mu loñ+ yap, i loñ me bi ti ngwélél wem Yakôb.+ 26 B’a yén mu ibabé woñi,+ b’a oñ mandap, ba bel ki nwom mi minkôô mi wai.+ Ñ, b’a yén mu ibabé woñi i ngéda m’a kogse ba bobasôna ba nkéña bo, ni ba ba ndegle bo;+ ha nyen b’a yi le men me yé Yéhôva Nyambe wap.”’”

29 I hilo hi nyônôs 12 hi sôñ i nyônôs jôm, i nwii mi nyônôs jôm, Yéhôva a pôdôs me, a kal le: 2 “A man mut, hielba, u nun kiñe Égiptô le Faraô, u añal ki bikuu bi bi ga yik kwél nye ni loñ Égiptô yosôna.+ 3 I jam lini jon u ga kal: ‘Lana nyen Nwet Bayemlikok le Yéhôva a nkal:

Me bi boñ nye inyu yem.’+

 4 Ñ, m’a som dikoba mu mañg nwoñ, me boñ ki le tjobi di Nil woñ di adbe mu maloi moñ.

M’a pémés we mu Nil woñ, we ni tjobi tjodisôna di Nil di di ñadbe mu maloi moñ.

 5 M’a tjôô we i ñoñ, we ni tjobi tjodisôna di Nil woñ.

W’a kwél i nahap homa, b’a bada bé we, to jô, b’a jô bé we.+

M’a ti we le u ba bijek inyu binuga bi bikai ni dinuni.+

8 “‘Jon lana nyen Nwet Bayemlikok le Yéhôva a nkal: “M’a ep pansoñ le i kwél we,+ me tjé ki bôt ba binam ni binuga ba ba yé i weeni. 9 Loñ Égiptô i ga yégle hôlô ni homa a ntjé;+ ha nyen n’a yi le men me yé Yéhôva, inyule u* bi kal le: ‘Lom Nil a yé wem; men me bi boñ nye.’+ 10 Inyu hala nyen m’a jôs we ni Nil woñ, m’a boñ le loñ Égiptô i yila homa a ntjé ni nnumuk homa,+ i yila ki ñoñ ibôdôl i Migdol+ letee ni i Sién,+ ipam i nwaa nkoñ u Étiôpia. 11 To bôt ba binam, to bémba b’a téé bé kôô mu loñ,+ to tagbene mu; mut nye ki nye a ga yééne bé mu 40 ma nwii. 12 M’a boñ le loñ Égiptô i yégle hôlô iloo biloñ gwobisôna, yak bitison gwé bi yégle hôlô iloo bitison gwobisôna 40 ma nwii;+ ñ, m’a boñ le bôt ba Égiptô ba tjama mu biloñ, me sand ki bo mu minkoñ.”+

13 “‘Inyule lana nyen Nwet Bayemlikok le Yéhôva a nkal: “I mbus 40 ma nwii, m’a témb me kot bôt ba Égiptô, ba lôlak mu matén i het me bi tjam bo;+ 14 m’a témbna bôt ba Égiptô ba ba bé i minkôm i loñ Patros,+ hala wee i loñ ba bi gwééne; nyoo nyen ba ga ba ane i i gwééba bé. 15 Ane i Égiptô yon i ga ba isi bini biane bipe gwobisôna, i ga énél ha bé bini biloñ bipe;+ ñ, m’a boñ le Égiptô a lôôha bomb, kayéle a’ la ha bé suhus bini biloñ bipe isi yé.+ 16 Litén li Israel li ga top ha bé bôdôl Égiptô ñem,+ ndi i jam li bi pémél Égiptô li ga hôñlaha Israel i jam libe a bi boñ i ngéda a bi bat bôt ba Égiptô mahôla. Ha nyen b’a yi le men me yé Nwet Bayemlikok le Yéhôva.”’”

17 Ndi i nwii mi nyônôs 27, i hilo hi bisu i sôñ bisu, Yéhôva a pôdôs me, a kal me le: 18 “A man mut, kiñe Babilôn le Nébukadnézar*+ a bi sélha ntôñ wé gwét bôlô njok i ngéda ba bi jôs Tir.+ Miño nwominsôna mi bi yila ngos, yak bituu gwobisôna bi hondi. Ndi to nye, to ntôñ wé gwét ba bi kôhna bé nsaa inyu bôlô njok ba bi sal i ngéda ba bi jôs Tir.

19 “Jon lana nyen Nwet Bayemlikok le Yéhôva a nkal: ‘M’a ti loñ Égiptô i moo ma kiñe Babilôn le Nébukadnézar,*+ a’ kena lingwañ jé, a yoñ ngandak nkus, a hondol ki gwom gwé gwobisôna; i gwom bi gwon bi ga ba nsaa inyu ntôñ wé gwét.’

20 “‘M’a ti nye loñ Égiptô le i ba nsaa inyu bôlô njok ba bi sal i ngéda ba bi jôs tison,* inyule inyu yem nyen ba bi boñ i jam li,’+ hala nyen Nwet Bayemlikok le Yéhôva a mpot.

21 “I kel i nyen m’a ti litén li Israel ngui,*+ me ti ki we kunde i pot i ti yap; b’a yi le men me yé Yéhôva.”

30 Yéhôva a pôdôs ki me, a kal le: 2 “A man mut, añal i mam ma ga yik bôña, u kal le: ‘Lana nyen Nwet Bayemlikok le Yéhôva a nkal:

“Béglana le: ‘Kinje ngoo! I hilo hi, hi yé i lo!’

 3 Inyule i hilo hi, hi yé bebee; ñ, hilo hi Yéhôva hi yé bebee.+

Hi ga ba hilo hi ond,+ ntéak ngéda inyu kéés biloñ.+

 6 Lana nyen Yéhôva a nkal:

“‘Ba ga nôla ni pansoñ mu loñ, ibôdôl i Migdol+ letee ni i Sién,’+ hala nyen Nwet Bayemlikok le Yéhôva a mpot. 7 ‘Loñ yap i ga yégle hôlô iloo biloñ gwobisôna, yak bitison gwé bi ga yégle hôlô iloo bitison gwobisôna.+ 8 Ha nyen b’a yi le men me yé Yéhôva i ngéda m’a ha hié i Égiptô, ni i ngéda ba bobasôna ba nit nye b’a nyugdana. 9 I kel i nyen m’a ep balegelnwin, ba ba nkil i bisitima, le ba kee i Étiôpia nu a mbôdôl nyemede ñem, inyu kônha nye woñi. I ngéda i hilo hi, hi ga kwél Égiptô, ñem u ga bôô nye matjél, inyule i mam mana m’a bôña toi.’

10 “Lana nyen Nwet Bayemlikok le Yéhôva a nkal: ‘M’a gwélél Kiñe Nébukadnézar* nu Babilôn inyu tjé mamut ma Égiptô.+ 11 Nye ni bôt bé ba gwét, ba ba nlôôha béba ikété biloñ,+ b’a lo inyu tjé loñ. B’a sodol paminsoñ yap inyu tjé Égiptô, ba yônôs ki loñ ni mim.+ 12 M’a boñ le diléléba di Nil+ di yila nnumuk ’isi, me nuñle ki bibéba bi bôt loñ. M’a gwélél bakén ba bôt inyu tjé loñ ni i gwom gwobisôna bi yé mukété.+ Me Yéhôva, me mal pot hala.’

13 “Lana nyen Nwet Bayemlikok le Yéhôva a nkal: ‘M’a tjé bisat bi nyega,* me mélés ki banyambe ba Nof* ba ba gwé bé nseñ.+ Man Égiptô to wada nu a ñane a ga ba ha bé, m’a yônôs ki Égiptô ni woñi.+ 14 M’a tjé Patros,+ me ha hié i Zôan, me pémhene ki Nô* mbagi nôgôs.+ 15 M’a kôp hiun hiem i ngii Sin, lisolbene li ngui li Égiptô, me tjé ki i bôt ba nyééne i Nô. 16 M’a ha hié i Égiptô, ñem w’a bôô Sin matjél, ba ga bôk lipénd li Nô inyu yoñ nye, ba leñ ki Nof* gwét, mapubi ma kel ma bayak! 17 Boñge bôlôm ba Ôn* ni ba Pibéset ba ga nôla ni pansoñ, yak i bôt ba nyééne mu bitison ba ga ke i minkôm. 18 Jiibe li ga kôp njamuha i Tapanés i ngéda m’a bôk bikop bi nson bi Égiptô nyoo.+ Lipémba jé li li nti nye ngôk li ga mal,+ ond i ga hô nye, yak i bôt ba nyééne mu bitison gwé b’a ke i minkôm.+ 19 M’a pémhene Égiptô mbagi nôgôs; ha nyen b’a yi le men me yé Yéhôva.’”

20 I nwii mi nyônôs 11, i hilo hisaambok hi sôñ bisu, Yéhôva a pôdôs me, a kal le: 21 “A man mut, me mal bôk woo u Faraô, kiñe Égiptô; b’a ha bé bee mu woo wé, to lép wo ni libadô* le u mbôôp; ba ga kañ bé to wo bandas le u bana ngui i gwel pansoñ.”

22 “Jon lana nyen Nwet Bayemlikok le Yéhôva a nkal: ‘M’a jôs Faraô, kiñe Égiptô,+ me bôk nye moo: woo u u gwé ngui ni woo u u mal bugi;+ m’a boñ ki le pansoñ i tohla nye i woo.+ 23 I mbus, m’a boñ le bôt ba Égiptô ba tjama mu biloñ, me sand ki bo mu minkoñ.+ 24 M’a lédés moo ma kiñe Babilôn,*+ me ha ki pansoñ i woo wé;+ ndi m’a bôk moo ma Faraô, a’ bégél ki i bisu gwé* bañga bañga kiki mut nu a yé bebee ni wo. 25 M’a lédés moo ma kiñe Babilôn, ndi moo ma Faraô m’a yoomba; ha nyen b’a yi le men me yé Yéhôva i ngéda m’a ha pansoñ yem i woo u kiñe Babilôn, ni i ngéda a’ gwélél yo inyu jôs loñ Égiptô.+ 26 Ñ, m’a boñ le bôt ba Égiptô ba tjama mu biloñ, me sand ki bo mu minkoñ,+ ha nyen b’a yi le men me yé Yéhôva.’”

31 I nwii mi nyônôs 11, i hilo hi bisu hi sôñ i nyônôs aa, Yéhôva a pôdôs ki me, a kal le: 2 “A man mut, kal Faraô kiñe Égiptô, ni mamut mé le:+

‘Njee a yé mpémba kiki we?

 5 Inyu hala nyen i e ini i bi nañ iloo bini bie bipe bi bikai gwobisôna.

yak biloñ bikeñi gwobisôna bi bé yééne isi yiye yé.

 8 E sidar to yada mu wom u Nyambe+ i bé bé kiki yo.

E ipe mu wom Nyambe i bé pam bé yo bilama.

10 “Jon lana nyen Nwet Bayemlikok le Yéhôva a nkal: ‘Hala kiki i e ini i bi nañ i ngii,* yak manjoñ mé ma pam letee ni i ond, kayéle ñem wé u yila ngôk inyule i nyôgi, 11 jon m’a ti yo i moo ma mpémba ñane nu biloñ.+ Nyen a’ kogse yo; yak me m’a tjél yo inyu béba yé. 12 Bakén ba bôt, ba ba nlôôha béba ikété biloñ, ba ga kit yo, ba tjôô yo nyoo i dikôa. Tjai tjé di ga kwél mu minsôsôgô nwominsôna; yak mintjep nwé mi ga bugi ngéñ ngéñ, mi kwél mu balom bobasôna ba loñ.+ Matén momasôna ma nkoñ ’isi m’a nyodi isi yiye yé, ma tjôô yo. 13 Dinuni tjodisôna di ga yééne mu nkok wé, yak binuga bi bikai gwobisôna bi yén mu mintjep nwé.+ 14 Hala a ga bôña le ndi e to yada i i yé bebee ni malép i nañ bañ i ngii, to manjoñ mé ma pam bañ letee ni i ond, ni le e to yada i i nkôhna ngandak malép i nañ bañ letee ni i ond. Inyule bie gwobisôna bi ga wo yaga, ba ga tém ’isi, ba jô ki gwo kiki bôt ba binam ba ba nsôs ikété bee.’*

15 “Lana nyen Nwet Bayemlikok le Yéhôva a nkal: ‘I kel i e ini i ga sôs i Soñ,* m’a ééha bôt. Jon m’a hék ndip malép, me hék ki balom le malép ma kuli ha bañ. Inyu e i, m’a boñ le Libañ a ba ikété jiibe, yak bie gwobisôna bi bikai bi kôt. 16 M’a boñ le biloñ bi sehla i ngéda bi ga nok yo i mbeha ’isi, i ngéda m’a boñ le i sôs ikété bee* lôñni ba bobasôna ba nsôs ikété Soñ.* Ha nyen bie bi Éden gwobisôna,+ mimpohlak mi bie ni bi bi nlôôha bilam bi Libañ bi bi nkôhna ngandak malép bi ga kôhna hogbe nyoo ikété ’isi. 17 I bie bi, bi ga sôs ikété Soñ* kiki nye,* i het bôt ba bi nôla ni pansoñ ba yé.+ Yak i bôt ba bé nit nye,* ba ba bé yééne isi yiye yé ikété biloñ, ba yé ni nye.’+

18 “‘Imbe e i Éden i bééna lipém ni bikeñi kiki we?+ To hala, u ga suhlana yaga, we ni bie bi Éden. U ga nañal ipôla bongikweeba lôñni i bôt ba nôla ni pansoñ. I mam mana mon ma ga kwél Faraô ni mamut mé momasôna,’ hala nyen Nwet Bayemlikok le Yéhôva a mpot.”

32 I nwii mi nyônôs 12, i hilo hi bisu hi sôñ i nyônôs 12, Yéhôva a pôdôs ki me, a kal le: 2 “A man mut, tôp hiémbi hi maéya inyu Faraô, kiñe Égiptô, u kal nye le:

 3 Lana nyen Nwet Bayemlikok le Yéhôva a nkal:

 7 ‘I ngéda u ga tjiba, m’a hô ngii, me boñ le i tjôdôt di yé mu di kôp jiibe.

11 Inyule lana nyen Nwet Bayemlikok le Yéhôva a nkal:

‘Pansoñ i kiñe Babilôn i ga kwél we.+

Ba ga suhus ngôk u Égiptô, yak mamut mé momasôna ma ga tjiba.+

Bi ga tôp hio inyu bigda Égiptô ni mamut mé momasôna,’ hala nyen Nwet Bayemlikok le Yéhôva a mpot.”

17 Ndi i nwii mi nyônôs 12, i hilo 15 hi sôñ, Yéhôva a pôdôs me, a kal le: 18 “A man mut, bégél inyu mamut ma Égiptô, u suhus bo nyoo ikété ’isi, nye ni bingond bi mimpémba mi biloñ, lôñni ba ba nsôs ikété bee.*

19 “‘U yé nlam iloo njee? Sôs, u nañal lôñni bongikweeba!’

20 “‘Bôt ba Égiptô ba ga kwo ipôla ba ba nôla ni pansoñ.+ Égiptô a ntjiba ni pansoñ. Yoña nye, ni kena nye haa, nye ni mamut mé momasôna.

21 “‘Ibôdôl nyoo ikétékété Soñ,* mimpémba mi bôt ba gwét mi ga pôdôs Faraô lôñni ba ba nit nye. Ba ga nôla ni pansoñ, ba bak ba niñi mim kiki bongikweeba ba ba bi nôla ni pansoñ. 22 Nyoo nyen Asiria ni bôt bé ba gwét bobasôna ba yéne. Bisoñ gwap bi nkéña nye:* bobasôna ba bi nôla ni pansoñ.+ 23 Bisoñ gwé bi yé ikétékété bee,* yak mim mi bôt bé ba gwét mi nkéña soñ yé: bobasôna ba bi nôla ni pansoñ, inyule i ngéda ba bé ba ngi yii i niñ, ba bé kônha bôt woñi kiyaga.

24 “‘Nyoo nyen Élam+ a yéne, mim mi mamut mé momasôna ma nkéña nye: bobasôna ba bi nôla ni pansoñ. Ba bi sôs ni wonyuu nyoo ikété ’isi,* inyule i ngéda ba bé ba ngi yii i niñ, ba bé kônha bôt woñi kiyaga. Nano, ba ga wo yaga nyuu lôñni ba ba nsôs ikété bee.* 25 Ba bi tégél nye nañi ipôla ba ba bi nôla, mim mi mamut mé momasôna ma bé kéña bisoñ gwé. Bobasôna ba yé bongikweeba, ba bi nôla ni pansoñ, inyule i ngéda ba bé ba ngi yii i niñ,* ba bé kônha bôt woñi kiyaga; ba ga wo yaga nyuu lôñni ba ba nsôs ikété bee.* Ba bi niñi nye ipôla ba ba bi nôla.

26 “‘Nyoo nyen Mések bo Tubal+ ba yéne, yak mamut map* momasôna. Bisoñ gwap* bi nkéña nye. Bobasôna ba yé bongikweeba, pansoñ i mal tôp bobasôna, inyule i ngéda ba bé ba ngi yii i niñ, ba bé kônha bôt woñi kiyaga. 27 Baa ba ga nañal bé lôñni mimpémba mi bôt ba gwét, bongikweeba, mi mi bi kwo, mi sôs ki i Soñ* ni bijôl gwap bi gwét? Ba ga bii paminsoñ yap isi miño nwap,* yak kogse i bibéba gwap i ga kwél bo i ngii bihés, inyule i mimpémba mi bôt mini mi bi kônha bôt woñi kiyaga i ngéda mi bé mi ngi yii i niñ. 28 Ndi we, u ga nyugdana ipôla bongikweeba, u nañal ki ni ba bobasôna ba bi nôla ni pansoñ.

29 “‘Nyoo nyen Édôm+ a yéne, bikiñe gwé ni baane bé bobasôna ba bi nañal lôñni ba bobasôna ba bi nôla ni pansoñ to hala kiki ba bé mimpémba mi bôt; yak bo ba ga nañal ni bongikweeba+ lôñni ba ba nsôs ikété bee.*

30 “‘Nyoo nyen baane ba ñombok bobasôna ba yéne, yak bôt ba Sidôn bobasôna+ ba ba bi sôs i soñ ni wonyuu lôñni ba ba bi nôla, to hala kiki ngui yap i bé tinde bôt i kon bo woñi. Ba ga nañal, bongikweeba yaga, lôñni ba ba bi nôla ni pansoñ, ba wo ki nyuu lôñni ba ba nsôs ikété bee.*

31 “‘Faraô a ga tehe bobasôna; i mam momasôna ma nkwél mamut mé ma ga ti nye hogbe;+ Faraô ni ntôñ wé gwét wonsôna ba ga nôla ni pansoñ,’ hala nyen Nwet Bayemlikok le Yéhôva a mpot.

32 “‘Kiki Faraô ni mamut mé momasôna ba bé kônha bôt woñi i ngéda ba bé ba ngi yii i niñ, ba ga juba ni bongikweeba, lôñni ba bobasôna ba bi nôla ni pansoñ,’ hala nyen Nwet Bayemlikok le Yéhôva a mpot.”

33 Yéhôva a pôdôs ki me, a kal le: 2 “A man mut, pôdôs bon ba litén joñ,+ u kal bo le:

“‘Di hégda le me ñom pansoñ le i kwél bôt ba ngim loñ+ ndi bôt bobasôna ba loñ i, ba pohol mut, ba téé nye le a ba bane bo mut faa.* 3 I ngéda i mut nu a ntehe pansoñ i nlo i jôp ikété loñ, a nhem hioñ, a béhe ki bôt ba litén.+ 4 Ibale mut a nok kiñ i hioñ ndi a emble bé mabéhna,+ pansoñ i kwél nye, ndi i nol nye, wee nyemede nyen a nyéñ nyemb yé.*+ 5 A bi nok kiñ i hioñ, ndi a tjél emble mabéhna, wee nyemede nyen a nyéñ nyemb yé. Ibale a emble mabéhna, ki a bak le a péyés niñ yé.

6 “‘Ndi ibale mut faa* a ntehe pansoñ i yé i lo, ndi a hem bé hioñ,+ a béhe bé to bôt ba litén, pansoñ i nol mut wada ipôla yap, wee i mut nu a ga wo inyu liboñok jé libe. Ndi m’a ôm mut faa nsohi le nyen a mboñ le a wo.’*+

7 “A man mut, me ntéé we mut faa* i litén li Israel; i ngéda u ga nok bibuk bi mpémél i nyo wem, u ga béhne me bo.+ 8 Ibale me nkal béba mut le: ‘U ga wo yaga,’+ ndi u pôdôs bé béba mut inyu béhe nye le a héñha liboñok jé, wee a ga wo inyu liboñok jé libe kiki béba mut,+ ndi m’a ôm we nsohi le wen u mboñ le a wo.* 9 Ndi ibale u mbéhe béba mut le a tjôô béba yé, ndi a tjél héñha, wee a ga wo inyu liboñok jé libe;+ ndi we, u ga sôñ yaga niñ yoñ.+

10 “Ndi we, a man mut, kal litén li Israel le: ‘Ni bi kal le: “Maboñok més mabe ni bibéba gwés bi nyidil bés kiyaga, bi nkena ki bés i tjiba.+ Lelaa ni di yé le di kônde niñ?”’+ 11 Kal bo le: ‘“Me nkum soñ ni niñ yem le, nyemb i béba mut i nkônha bé me maséé,+ ndi me ngwés le béba mut i héñha liboñok jé+ le ndi a kônde niñ.+ Héñhana, ni tjôô ki maboñok manan mabe!+ A bôt ba litén li Israel, inyuki ni nyéñ wo?”+ Hala nyen Nwet Bayemlikok le Yéhôva a mpot.’

12 “Ndi we, a man mut, kal bon ba litén joñ le: ‘Minson mi telepsép mi mut a téé sép mi ga sôñ bé nye ibale a mbôdôl boñ béba;+ to maboñok mabe ma béba mut ma ga boñ bé le a tjiba ibale a ntjôô béba yé;+ minson mi telepsép mi mut a téé sép mi ga boñ bé le a kônde niñ ibale a mboñ béba.+ 13 Ibale me nkal mut a téé sép le: “U ga niñ yaga,” ndi a boñ béba,*+ a hoñlak le telepsép yé i ga sôñ nye, wee ba ga bigda bé liboñok jé lilam to jada: a ga wo inyu béba a bi boñ.+

14 “‘Ndi ibale me nkal béba mut le: “U ga wo yaga,” ndi a tjôô béba yé, a boñ loñge, a boñ ki mam ma téé sép,+ 15 ibale a ntimbis i yom a bi yoñ kiki bibep,+ a timbis ki i yom a bi nip,+ ibale a ntééda matiñ ma ma nti niñ, a tjélék boñ béba, wee a ga niñ yaga.+ A ga wo bé. 16 M’a kogse bé nye inyu béba yé to yada.*+ Kiki a mboñ loñge, a boñ ki mam ma téé sép, wee a ga niñ yaga.’+

17 “Ndi bôt ba litén joñ ba bi kal le: ‘Liboñok li Yéhôva li téé bé sép,’ ki le maboñok map mon ma téé bé sép.

18 “Ndi ibale mut a téé sép a ntjôô njel telepsép, a boñ jam libe, a ga wo inyu béba yé.+ 19 Ndi ibale béba mut i ntjôô béba yé, a boñok loñge ni mam ma téé sép, wee a ga niñ yaga.+ A ga wo bé.

20 “Ndi bé ni bi kal le: ‘Liboñok li Yéhôva li téé bé sép.’+ A litén li Israel, m’a kéés hiki wada nan inoñnaga ni maboñok mé.”*

21 Ndi i nwii mi nyônôs 12, i hilo hi nyônôs hitan hi sôñ i nyônôs jôm, i ngéda di bé i minkôm, mut wada nu a bi pei i ngéda ba bi leñ Yérusalem gwét, a lo,+ a kal me le: “Tison i mal yôña!”+

22 Kôkôa, ilole mpeyek mut* u nlo, woo u Yéhôva u bi kahap i ngii yem, a yibil nyo wem, ilole i mut nu a nlo i tehe me kegla i bé noñ ha. Jon nyo wem u bi yibla, me bé ha bé mbuk.+

23 Yéhôva a pôdôs ki me, a kal le: 24 “A man mut, i bôt ba nyééne mu loñ i bi tjiba+ ba yé pôdôl nkoñ u Israel, ba kalak le: ‘Abraham a bé nyetama, ndi a bi yoñ i nkoñ u.+ Ndi bés ba di yé ngandak, di bi kôhna nkoñ le u ba ngababum yés nkôhnaga.’

25 “Jon kal bo le: ‘Lana nyen Nwet Bayemlikok Yéhôva a nkal: “Ni nje minsôn mbôda ni matjél,+ ni paak mis inyu béñge bisat binan bi nyega,* ni kôbôk matjél.+ Inyuki loñ i nlama ba nan? 26 Ni mbôdôl pansoñ nan ñem,+ ni boñok mam ma nsuñgaha ñem; hiki wada nan a nke i ndéñg ni nwaa mut wé libôk.+ Inyuki loñ i nlama ba nan?”’+

27 “U ga kal bo le: ‘Lana nyen Nwet Bayemlikok le Yéhôva a nkal: “Me nkum soñ ni niñ yem le, i bôt ba nyééne mu loñ i bi tjiba ba ga nôla ni pansoñ; ba ba yé i bikai, m’a ti bo binuga bi bikai le bi je bo; yak ba ba nyééne i masolbene ma ngui ni ikété bihôk, himala hi kon hion hi ga nol bo.+ 28 M’a boñ le loñ i yila ñoñ,+ ngôk wé u ga mal, yak dikôa di Israel di ga yégle hôlô,+ kayéle mut a ga lôô ha bé mu. 29 Ha nyen b’a yi le men me yé Yéhôva i ngéda m’a boñ le i nkoñ u, u yila ñoñ+ inyu mam momasôna ma nsuñgaha ñem ba bi boñ.”’+

30 “Ndi we, a man mut, bôt ba litén joñ ba mpot inyu yoñ, ba téé bebee ni mabap, ni manwemel ma mandap.+ Wada a pôdhak numpe, hiki mut a kalak maasañ le: ‘Loo, di kee di emble lipôdôl li Yéhôva.’ 31 Ngandak bôt i ga lo i weeni, ba yén i bisu gwoñ kiki litén jem li mbéna boñ. Ba ga emble i mam u mpot, ndi ba ga boñ bé mo;+ inyule ba nlôbhe we* ni manyo map, ndi ba nhép ndik nkus. 32 Nun-ki! Inyu yap u yé kiki hiémbi hi gwéha, hi ba ntôp ni kiñ ilam lôñni bikôkôda bi manganda bi ba nkôt loñge. Ba ga emble i mam u mpot, ndi ba ga boñ bé mo. 33 Ndi i ngéda i mam mana m’a yon, ñ, m’a yon ibabé set, ha nyen b’a yi le mpôdôl a bé i boni.”+

34 Yéhôva a pôdôs ki me, a kal le: 2 “A man mut, añal bikuu bi ga kwél batééda mintômba ba Israel. Kal bo i mam ma ga kwél bo, u kal batééda mintômba le: ‘Lana nyen Nwet Bayemlikok le Yéhôva a nkal: “Ngoo ni batééda mintômba ba Israel,+ inyule ba nhoñol ndik i je botama! Baa bémba bé yon batééda mintômba ba nlama jés?+ 3 Ni nje mahoñ, ni habga mahuu ma ntômba, ni nolok bilém bi bi gwé ngandak mahoñ,+ ndi ni njés bé bémba.+ 4 Ni bi lédés bé ntômba u u bééna bé ngui, to ntômba u u bé kon, ni mbuubaha bé wo; to u u bi babaa, ni kañ bé wo bandas; to u u bi ke haa, ni lona bé wo; to u u bi nimil, ni yéñ bé wo;+ ndi ni bi bémbe nwo, ni tét ki nwo.+ 5 Jon mintômba mi bi tjama inyule mi bééna bé ntééda;+ mi bi tjama, mi yila ki bijek inyu binuga bi bikai gwobisôna. 6 Mintômba nwem mi bi ke mu dikôa tjodisôna, ni mu dikôa di nyôgi; ñ, mintômba nwem mi bé ntjamak ni hisi hiosôna, ibabé le mut a kee i yéñ nwo, tole mut a bana ngôñ i léba nwo.

7 “‘“Jon, a bé batééda mintômba, emblana bibañga bi Yéhôva: 8 ‘“Me nkum soñ ni niñ yem le hala kiki mintômba nwem mi nyila binuga ba mpat, bijek inyu binuga bi bikai gwobisôna, inyule ntééda mintômba a bé bé, to batééda mintômba bem ba bi ke bé i yéñ mintômba nwem; ndi ba bi hoñol ndik i je botama, ba jés bé mintômba nwem,” hala nyen Nwet Bayemlikok le Yéhôva a mpot,’ 9 jon, a bé batééda mintômba, emblana bibañga bi Yéhôva. 10 Lana nyen Nwet Bayemlikok le Yéhôva a nkal: ‘M’a kolba batééda mintômba, me bat bo lelaa ba ntééda mintômba nwem,* m’a neebe ha bé le bon ba jés* mintômba nwem;+ i batééda mintômba ba, ba ga la ha bé je botama. M’a kéñ le ba ha mintômba nwem mu manyo map, mi ga ba ha bé bijek gwap.’”

11 “‘Inyule lana nyen Nwet Bayemlikok le Yéhôva a nkal: “Nuna-ki! Memede m’a ke i yéñ mintômba nwem, me tééda ki nwo.+ 12 M’a tééda mintômba nwem kiki ntééda mintômba nu a nléba mintômba nwé mi mi bi tjama, a jéhak nwo.+ M’a kobol nwo le mi nyodi mu bahoma bobasôna, i het mi bi tjama i kel ond ni jiibe likeñi.+ 13 Ñ, m’a pémés nwo mukété matén, me kot ki nwo, mi lôlak i biloñ, me témbna nwo i nkoñ wap, me jés ki nwo i ngii dikôa di Israel,+ bebee ni diléléba ni bahoma bobasôna bôt ba nyééne mu loñ. 14 M’a jés nwo i biloñge bi bahoma i het bikai bi yé, i homa ba ga jél a ga bane i ngii dikôa di Israel.+ Mi ga nañle nyoo i biloñge bi bahoma i het bikai bi yéne,+ mi ga je i bahoma ba nlôôha balam i ngii dikôa di Israel i het bikai bi yéne.”

15 “‘“Memede m’a jés mintômba nwem,+ me ki nyen m’a niñi nwo,”+ hala nyen Nwet Bayemlikok le Yéhôva a mpot. 16 “M’a yéñ ntômba u u bi nimil,+ me témbna u u bi ke haa, me kañ u u bi babaa ni bandas, me lédés u u gwé bé ngui. Ndi m’a tjé ntômba u u gwé mahoñ ni u u yé mpémba. M’a kéés nwo, me kogse ki nwo i nya i kôli.”

17 “‘Ndi bé, a mintômba nwem, lana nyen Nwet Bayemlikok le Yéhôva a nkal: “Me yé bebee i pémés mbagi ipôla ntômba wada ni ntômba umpe, ni ipôla balôm ba mintômba ni balôm ba kembee.+ 18 Baa i je ni nje i bahoma ba nlôôha balam, hala a nkola bé bé? Inyuki ni, ni ntidbe bikai bi bi nyégle mu bahoma ni njél? Yak i ngéda ni mal nyo malép ma mpôp, inyuki ni tuñgul mo ni makôô manan? 19 Baa mintômba nwem nwon mi ga jél i bahoma ni ntidbe, mi nyôl ki malép i homa ni ntuñgul ni makôô manan?”

20 “‘Jon lana nyen Nwet Bayemlikok le Yéhôva a nkal: “Nuna-ki! Memede m’a pémés mbagi ipôla ntômba u u gwé mahoñ ni ntômba u u yé nkôt, 21 inyule i mintômba nwominsôna mi bé kon, ni bi nyuge nwo ni bituu, yak ni mbai; ni kumul nwo ni bitoñ binan, letee ni sand nwo le mi kee haa. 22 Ñ, m’a tohol mintômba nwem, mi ga ba ha bé binuga ba mpat;+ m’a pémés ki mbagi ipôla ntômba wada ni ntômba umpe. 23 M’a ti bo ntééda mintômba wada,+ ngwélél wem David,*+ nyen a ga jés nwo. Nyen a ga jés nwo, a ba ki ntééda wap.+ 24 Memede Yéhôva, m’a ba Nyambe wap,+ yak ngwélél wem David a’ ba ñane wap;+ me Yéhôva, me mal pot hala.

25 “‘“M’a boñ malômbla ma nsañ ni nwo,+ me luhul binuga bi bikai bi bi yé mu loñ,+ inyu boñ le mintômba nwem mi laa niñ mu ñoñ ibabé le mi kon woñi, mi kee ki ’ilo ikété lipan.+ 26 M’a boñ le mintômba nwem ni bahoma ba nkéña hikôa hiem bi kôhna bisai,+ me nôs ki nop i loñge ngéda. Bisai bi ga sugla kiki nop.+ 27 Bie bi bikai bi ga num matam, hisi hi ti bijek,+ yak bôt ba litén jem b’a yén mu loñ ibabé le ba kon woñi. Ha nyen b’a yi le men me yé Yéhôva i ngéda m’a bôk kop yap nson,+ me kobol ki bo i moo ma bôt ba bi yilha bo minkol. 28 Ba ga ba ha bé binuga biloñ bipe bi mpat, to binuga bi bikai bi ga je ha bé bo, ba ga yén nwee ibabé le ba sehla, ibabé to le mut nye ki nye a kônha bo woñi.+

29 “‘“M’a ti bo hisi hi hi ga yiba* inyule hi nti bijek ngandak. Ba ga wo ha bé njal ikété loñ,+ to biloñ bipe bi ga wéha bé bo nyuu.+ 30 ‘Ha nyen b’a yi le me Yéhôva, Nyambe wap, me yé ni bo; yak bo, litén li Israel, ba yé litén jem,’+ hala nyen Nwet Bayemlikok le Yéhôva a mpot.”’

31 “‘Ndi bé, a mintômba nwem,+ mintômba memede me ntééda, ni yé bôt ba binam, ndi me me yé Nyambe nan,’ hala nyen Nwet Bayemlikok le Yéhôva a mpot.”

35 Yéhôva a pôdôs ki me, a kal le: 2 “A man mut, hielba, u nun mbok dikôa i yé nyoo i Séir,+ u añal bikuu bi ga kwél yo.+ 3 Kal yo le: ‘Lana nyen Nwet Bayemlikok le Yéhôva a nkal: “M’a kolba we, a mbok dikôa i Séir! M’a sambal woo wem, me kogse we, me yilha ki we ñoñ.+ 4 M’a yilha bitison gwoñ makund, u ga yila ñoñ;+ ha nyen w’a yi le men me yé Yéhôva. 5 Hala kiki u bi oo bon ba Israel ngandak,+ jon u bi boñ le ba nôla ni pansoñ i ngéda ba bi kôhna bikuu, i ngéda ba bé kôhna kogse yap i nsôk”’+

6 “Jon me nkum soñ ni niñ yem le: ‘M’a kôôbana we nyemb,* u ga pei bé yo.+ Hala kiki nyemb yon u bi téédana bôt u bé oo, jon to wemede u ga pei bé yo,’+ hala nyen Nwet Bayemlikok le Yéhôva a mpot. 7 ‘M’a yilha mbok dikôa i Séir ñoñ,+ me tjé ki ba bobasôna ba nke nyoo ni ba bobasôna ba nlôl nyoo. 8 M’a yônôs dikôa tjé ni mim; i bôt b’a nôla ni pansoñ b’a kwél mu dikôa tjoñ, ba kwél ki mukété minsôsôgô nwoñ ni ikété diléléba tjoñ tjodisôna. 9 M’a yilha we homa a ntjé i boga ni boga, mut to wada a’ yén ha bé mu bitison gwoñ;+ ha nyen n’a yi le men me yé Yéhôva.’

10 “Inyule u bi kal le: ‘I biloñ bini gwo biba ni i minkoñ mini nwo ima bi ga ba gwem, bés bon d’a yoñ gwo biba,’+ to hala kiki Yéhôva nyemede a bé nyoo, 11 ‘jon me nkum soñ ni niñ yem le, nlélém kiki u bi unbene bôt ba litén jem, u kil bo njôñ, u oo ki bo, hala yaga nyen yak me m’a boñ we;+ ha nyen m’a yiba ipôla yap i ngéda me mba me nkéés we,’ hala nyen Nwet Bayemlikok le Yéhôva a mpot. 12 ‘Ha nyen w’a yi le me Yéhôva, memede me bi nok mam mabe momasôna u bi pot inyu dikôa di Israel, u kalak le: “Dikôa di Israel di nyégle hôlô, di ntina ki bés kiki bijek.” 13 Ni bi pot me béba, ni ngôgbak, ni sol ki me kiyaga.+ Me bi nok i mam ma momasôna.’

14 “Lana nyen Nwet Bayemlikok le Yéhôva a nkal: ‘Hisi hiosôna hi ga kon maséé i ngéda m’a yilha we ñoñ. 15 Hala kiki u bi kon maséé i ngéda ngababum i litén li Israel i bi tjiba, jon yak me m’a boñ we nlélém jam.+ U ga yégle hôlô, a mbok dikôa i Séir, ñ, a Édôm nyensôna!+ Ha nyen b’a yi le men me yé Yéhôva.’”

36 “Ndi we, a man mut, añle dikôa di Israel i mam ma ga pémél tjo, u kal tjo le: ‘A dikôa di Israel, emblana bibañga bi Yéhôva. 2 Lana nyen Nwet Bayemlikok le Yéhôva a nkal: “Baoo ba bi kal inyu nan le: ‘Hiino! Hiino! Ngo nano, yak bahoma ba nyôgi ba ngéda kôba ba nyila yom yés!’”’+

3 “Jon añal i mam ma ga pémél tjo, u kal tjo le: ‘Lana nyen Nwet Bayemlikok le Yéhôva a nkal: “Hala kiki baoo banan ba bi tjé bé, ba leñ ki bé gwét, ba lôlak bipes gwobisôna kayéle ni bi yila yom i bôt ba ba bi pei ikété biloñ,* ba podok bé béba, ba ômôk bé nsohi.+ 4 Jon, a dikôa di Israel, emblana bibañga bi Nwet Bayemlikok le Yéhôva! Lana nyen Nwet Bayemlikok le Yéhôva a nkal dikôa, ni dikôa di nyôgi, ni diléléba, ni minsôsôgô, ni bahoma ba ba bi tjé,+ ni i bitison bi bi yégle hôlô, bi i bôt ba bi pei ikété biloñ bi nkéña gwo ba bi hondol, ba ndegle ki;+ 5 ñ, Nwet Bayemlikok le Yéhôva a nkal gwobisôna le: ‘Ikété hiun hiem hikeñi,+ m’a pémhene bôt ba bi pei ikété biloñ mbagi nôgôs bo ni bôt ba Édôm bobasôna ba ba bi yoñ loñ yem ni ngandak maséé, yak ni ngandak diyana,+ ba kalak le loñ yem i yé yap inyu kadal bahoma i het bémba i njél ni inyu hondol yo.’”’+

6 “Jon kal loñ Israel i mam ma ga pémél yo, u pôdôs dikôa, ni dikôa di nyôgi, ni diléléba, ni minsôsôgô, u kal gwo le: ‘Lana nyen Nwet Bayemlikok le Yéhôva a nkal: “Emblana! Hala kiki biloñ bipe bi bi wéha bé nyuu, jon m’a pot ikété hiun hiem hikeñi ni ikété kundul yem.”’+

7 “Jon lana nyen Nwet Bayemlikok le Yéhôva a nkal: ‘Memede m’a pa woo wem, me kumuk soñ le biloñ bi bi nkéña bé bi ga begee wonyuu yap.+ 8 Ndi bé, a dikôa di Israel, ni ga pémés mintjep, ni num ki matam inyu litén jem Israel inyule ndék ngéda,+ wee litén jem li ntémb. 9 Inyule me yé ni bé, m’a tôñ ki bé, n’a séla, ni béla ki. 10 M’a bulus bôt ba litén linan, bôt bobasôna ba litén li Israel, ñ, bobasôna yaga; bôt ba ga yééne mu bitison,+ yak bahoma ba bi tjé ba ga témb ba ôña.+ 11 Ñ, m’a bulus bôt ba litén linan ni bilém binan;+ b’a bôl, ba gwal ki ngandak. M’a boñ le bôt ba yééne i bééni iloo kiki ngéda bisu,+ m’a boñ ki le niñ nan i lama iloo kiki ngéda kôba;+ ha nyen n’a yi le men me yé Yéhôva.+ 12 M’a boñ le bôt bem, ñ, litén jem Israel, li kil i ngii nan; ni ga yila ki ngababum yap.+ Kekikel, ni ga boñ ha bé le bôt ba ba ha bañ ni bon bap.’”+

13 “Lana nyen Nwet Bayemlikok le Yéhôva a nkal: ‘Bôt bahogi ba nkal we le: “Wen u yé loñ i i nje bôt ba binam, we ki nyen u mboñ le biloñ bi ba ha bañ ni bon bap,”’ 14 ‘jon u ga je ha bé bôt, to boñ le biloñ bi ba ha bañ ni bon bap,’ hala nyen Nwet Bayemlikok le Yéhôva a mpot. 15 ‘M’a nwas ha bé le u nok lelaa biloñ bi nsol we, to nihbe mandegle ma matén;+ u ga boñ ha bé le bôt ba loñ yoñ ba baage,’ hala nyen Nwet Bayemlikok le Yéhôva a mpot.”

16 Yéhôva a pôdôs ki me, a kal le: 17 “A man mut, i ngéda bôt ba litén li Israel ba bé yééne mu loñ yap, ba bé hindis yo ni bihiumul, ni maboñok map.+ Maboñok map ma bééne me kiki nyega i muda nu a nkon sôñ.+ 18 Jon me bi kôp bo hiun hiem hikeñi inyu matjél ba bi kôp mu loñ, ni inyule ba bi yilha loñ+ nyega ni bisat gwap bi nyega.*+ 19 Inyu hala nyen me bi boñ le ba tjama mu biloñ, me sand ki bo mu minkoñ.+ Me bi kéés bo inoñnaga ni bihiumul gwap, ni maboñok map. 20 Ndi i ngéda ba bi pam nyoo i biloñ bi, bôt ba bi hindis jôl jem lipubhaga,+ ba kalak inyu yap le: ‘I bôt bana bon ba yé litén li Yéhôva, ndi ba bi ba nyégsaga i nyodi i loñ yap.’ 21 Jon m’a sôñ jôl jem lipubi, li litén li Israel li bi hindis ikété biloñ, i het ba bi ke.”+

22 “Inyu hala nyen, kal bôt ba Israel le: ‘Lana nyen Nwet Bayemlikok le Yéhôva a nkal: “A litén li Israel, inyu nan bé nyen me mbôñôl hala, ndi me mbôñôl hala inyu jôl jem lipubi, li ni bi hindis ikété biloñ, i het ni bi ke.”’+ 23 ‘M’a pubus jôl jem likeñi,+ li li bi hindhana ikété biloñ, li yak bé ni bi hindis ikété yap;* ha nyen biloñ bi ga yi le men me yé Yéhôva+ i ngéda m’a pubhana i bééni, gwomede bi tehge,’ hala nyen Nwet Bayemlikok le Yéhôva a mpot. 24 ‘M’a héya bé ikété biloñ, me kot bé, ni lôlak i biloñ gwobisôna, me kena ki bé i loñ nan.+ 25 M’a nwes bé malép ma mpôp, ni yila bapubhaga;+ m’a pubus yaga bé ni nyega nan yosôna,+ yak ni bisat binan bi nyega gwobisôna.+ 26 M’a ti bé ñem yondo,+ me ha ki mahoñol ma mondo ikété nan.+ M’a héya ñem u nlet kiki ngok+ mu nyuu nan, me ti bé ñem u ntomb kiki nsôn.* 27 M’a ha bé mbuu wem, me boñ le ni tééda matiñ mem,+ ni nôgôl matéak mem, ni tééda ki mo. 28 Ha nyen n’a yén mu nkoñ me bi ti basôgôlsôgôl banan. N’a ba litén jem, yak me m’a ba Nyambe nan.’+

29 “‘M’a hôla bé le ni boñ ha bañ mam manan ma nyega. M’a boñ le bijek bi ha ngandak, bi bôl ki; m’a lona bé bé njal.+ 30 M’a bulus matam ma bie ni bijek bi nwom, le ndi ni wo ha bañ nyuu kekikel i bisu bi biloñ inyu njal.+ 31 Ha nyen n’a bigda bihiumul binan bibe ni maboñok manan mabe; Bibéba binan ni maboñok manan ma ma nsuñgaha ñem bi ga gwélha bébomede nyega.+ 32 Ndi yina le: inyu nan bé nyen me mbôñôl i mam ma;+ ndi a litén li Israel, me mbôñôl hala le ni wo nyuu, ni kon ki hison inyu maboñok manan,’ hala nyen Nwet Bayemlikok le Yéhôva a mpot.

33 “Lana nyen Nwet Bayemlikok le Yéhôva a nkal: ‘I kel m’a pubus bé inyu bibéba binan gwobisôna, m’a boñ le bôt ba yééne mukété bitison,+ me boñ ki le bahoma ba ba bi tjé, ba tiimba ôña.+ 34 Loñ i i bé hôlô, i het bôt bobasôna ba bé tagbene, ba tehge lelaa i mput, i ga séla. 35 Bôt ba ga kal le: “Loñ i i mput i nyila kiki wom Éden;+ yak i bitison bi bi tjé, bi bak hôlô, bi kwo ki, nano bi gwé mapénd ma ngui, yak bôt ba nyééne mu.”+ 36 Ha nyen biloñ bi bi nkéña bé, bi bi ga pei, gw’a yi le me yé Yéhôva, men me ntiimba oñ bahoma ba bi tjé, ni le men me bi tiimba bel bie mu bahoma ba bi tjé. Me Yéhôva, me mal pot, me mboñ ki hala.’+

37 “Lana nyen Nwet Bayemlikok le Yéhôva a nkal: ‘M’a nwas le bôt ba litén li Israel ba bat le me, le me bulus bôt bap kiki ngandak mintômba, m’a boñ ki hala. 38 Kiki ngandak bapubhaga, kiki mintômba ba bé jôbna i Yérusalem* i dilo di mangand mé,+ hala nyen i bitison bi bi yégle hôlô bi ga yon ni bôt;+ ha nyen b’a yi le men me yé Yéhôva.’”

37 Woo u Yéhôva u bé i ngii yem, Yéhôva a gwélél mbuu wé inyu yoñ me, a bii me i ñemkété u nsôsôgô*+ u u bé u yôni ni bihés. 2 A boñ me le me kiiña i homa bihés bi bééne, me tehe le nsôsôgô* wonsôna u bé u yôni ni ngandak bihés, bi bé ki minkôt kiyaga.+ 3 Nyambe a bat me le: “A man mut, baa bihés bini bi yé ki le bi témb i niñ?” Me timbhe le: “A Nwet Bayemlikok le Yéhôva, wen u nyi.”+ 4 Ha nyen a bi kal me le: “Añal i mam ma ga pémél i bihés bini, u kal gwo le: ‘A bé minkôt mi bihés, emblana bibañga bi Yéhôva:

5 “‘Lana nyen Nwet Bayemlikok le Yéhôva a nkal i bihés bini: “M’a jubus nhébék ikété nan le ni témb i niñ.+ 6 M’a ha bé minliiñ ni minsôn, me hô bé ni koo, me ha ki nhébék ikété nan le ni témb i niñ; ha nyen n’a yi le men me yé Yéhôva.”’”

7 Ha nyen me bi añal i mam ma ga yik bôña, kiki a bi kal me. Ndik kiki me bi bôdôl añal mam ma ga yik lo, ha nyen me bi nok mbimba, mbimba i bihés bi bi ntat, bi kahal tôômana, hés yada ni hés ipe. 8 I mbus, me tehe minliiñ ni minsôn mi nlo mu ngii, yak koo i hô nwo. Ndi bihés bi bé ngi bana nhébék ikété yap.

9 Ha nyen Nyambe a bi kal me le: “Añal i mam ma ga pémél mbebi. A man mut, pot i mam ma ga yik bôña, u kal mbebi le: ‘Lana nyen Nwet Bayemlikok le Yéhôva a nkal: “A mbebi,* lôl i makas mo ma-na, u hue i ngii bôt ba bi nôla.”’”

10 Jon me bi añal i mam ma ga yik bôña, kiki a bi kal me; ha nyen nhébék* u bi jôp ikété yap, bihés bi témb i niñ, bi telep,+ bi bé soso ntôñ gwét.

11 I mbus, Nyambe a kal me le: “A man mut, i bihés bini bi yé bôt ba litén li Israel bobasôna.+ Ba nkal le: ‘Bihés gwés bi nkôt, di gwé bé botñem yo ki yo.+ Més ma mal yaga.’ 12 Inyu hala nyen añal i mam m’a yik bôña, u kal bo le: ‘Lana nyen Nwet Bayemlikok le Yéhôva a nkal: “M’a yibil bisoñ binan,+ me pémés bé mu, a litén jem, me témbna ki bé i Israel.+ 13 Ha nyen n’a yi le men me yé Yéhôva i ngéda m’a yibil bisoñ binan, me pémés ki bé mu, a litén jem!”’+ 14 ‘M’a ha mbuu wem ikété nan le ni témb i niñ.+ M’a boñ le ni yén i loñ nan. Ha nyen n’a yi le me Yéhôva, men me bi pot, me boñ ki hala,’ hala nyen Yéhôva a mpot.”

15 Yéhôva a pôdôs ki me, a kal le: 16 “Ndi we, a man mut, yoñ kék yada, u tila mu le: ‘Inyu Yuda ni bon ba Israel ba ba yé lôñni nye.’*+ I mbus, u yoñ kék ipe, u tila mu le: ‘Inyu Yôsep, kék i Éfraim, ni bon ba Israel bobasôna ba ba yé lôñni nye.’*+ 17 I mbus ha, kôôgaha gwo biba bebee, le bi yila ndik kék yada i woo woñ.+ 18 I ngéda bôt* ba litén joñ ba ga kal le: ‘Toñle bés kii i mam mana ma nkobla?’ 19 U ga kal bo le: ‘Lana nyen Nwet Bayemlikok le Yéhôva a nkal: “M’a yoñ kék i Yôsep i i yé i woo u Éfraim, me yoñ ki matén ma Israel ma ma yé lôñni nye; i mbus, m’a at kék i Yôsep ni kék i Yuda, me boñ le bi ba kék yada,+ ha nyen bi ga yila ndik kék yada i woo woñ.”’ 20 I bikék i het u ga tila bi ga ba i woo woñ le ba tehe yaga gwo.

21 “Kal bo le: ‘Lana nyen Nwet Bayemlikok le Yéhôva a nkal: “M’a yôñôl bon ba Israel ikété biloñ bipe i het ba bi ke, me kot bo homa wada, ba lôlak bipes gwobisôna, me témbna bo i loñ yap.+ 22 M’a boñ le ba yila litén jada ikété loñ,+ mu ngii dikôa di Israel, ba ga bana ndik kiñe yada,+ ba ga ba ha bé matén ima, ba ga ba ha bé to mbaglak le ba ba biane biba.+ 23 Ba ga hindis ha bé bomede ni bisat gwap bi nyega,* to ni maboñok map ma ma nsuñgaha ñem, to ni bibéba gwap gwobisôna.+ M’a hôla bo i tjôô yaga ndok yap i i bi tinde bo i boñ béba, me pubus ki bo. Ba ga ba litén jem, yak me m’a ba Nyambe wap.+

24 “‘“Ngwélél wem David* nyen a ga ba kiñe yap,+ bobasôna ba ga bana ki ntééda wada.+ Ba ga noñ matéak mem, ba téédaga yaga matiñ mem.+ 25 Ba ga yééne mu loñ me bi ti ngwélél wem le Yakôb, loñ i het basôgôlsôgôl banan ba bi yééne,+ ba ga yééne ki mu i boga ni boga,+ bo ni bon bap* lôñni balal bap i boga ni boga;+ ngwélél wem David* nyen a ga ba ñane wap i boga ni boga.+

26 “‘“M’a boñ malômbla ma nsañ ni bo;+ i malômbla m’a boñ ni bo ma ga nom i boga ni boga. M’a boñ le ba yééne mu loñ, me bulus bo,+ me téé ki homa wem mpubhaga ikété yap i boga ni boga. 27 Lap yem* i ga ba lôñni bo;* m’a ba Nyambe wap, yak bo b’a ba litén jem.+ 28 I ngéda homa wem mpubhaga a ga ba ikété yap i boga ni boga, ha nyen biloñ bipe bi ga yi le me Yéhôva, men me mpubus Israel.”’”+

38 Yéhôva a pôdôs ki me, a kal me le: 2 “A man mut, hielba, u nun i pes i Gôg nu loñ Magôg,+ ñane nunkeñi nu Mések ni Tubal,+ u añal bikuu bi ga kwél nye.+ 3 U kal le: ‘Lana nyen Nwet Bayemlikok le Yéhôva a mpot: “M’a kolba we, a Gôg, we nu u yé ñane nu Mések ni Tubal. 4 M’a boñ le u témb ni mbus, me ha dikoba mu mañg nwoñ,+ me pémés ki we ni ntôñ woñ gwét wonsôna+ ni bihosi gwoñ lôñni bakilhosi boñ, bobasôna ba bak ba hééba mambot malam, ba bak ki ntôñ gwét nkeñi yaga, ba bak ba bééga biben bikeñi ni biben bititigi,* bobasôna ba gwéélak pansoñ. 5 Bôt ba Persia, bôt ba Étiôpia ni bôt ba Put+ ba yé lôñni bo, bobasôna ba bak ba bééga biben bititigi, ba bak ba hééba bikôñgô. 6 Yak bôt ba Gômer ni bôt bap ba gwét bobasôna ba yé ni bo, bo ni mbôda Tôgarma+ lôñni bôt bap ba gwét bobasôna, ba lôlak i bahoma ba ñombok ba ba yé haa kiyaga. Ngandak matén ipe i yé lôñni we.+

7 “‘“Ba bebee, ba nkôôbaga, we ni mintôñ nwoñ mi gwét nwominsôna mi mi mal kodba lôñni we; wen u ga ba ñane ntôñ wap gwét.*

8 “‘“I mbus ngandak dilo, m’a yoñ ngéda ni we.* I nwii mi nsôk, u ga jôp mu loñ i het bôt ba ba bi pei tjiba i pansoñ ba bi témb. Ba bi kodba i ngii dikôa di Israel, di di bi yégle hôlô ntandaa ngéda, ba lôlak i ngandak matén. Ba bi témb ki i loñ yap, ba lôlak mu matén, bobasôna ba nyén mu ibabé le ba kon woñi.+ 9 U ga kwél bo kiki mbuk mbebi, u hô ki loñ kiki ond, we ni bôt boñ ba gwét bobasôna ni ngandak matén ma ma yé lôñni we.”’

10 “Lana nyen Nwet Bayemlikok le Yéhôva a nkal: ‘I kel i, u ga hoñol mam mu ñem woñ, u hek ki pék ibe. 11 U ga kal le: “M’a jôp i loñ i bôt ba nyééne i mambai ma néhi.+ I bôt ba nyén ibabé le ba kon woñi, ba niñik nwee, ba yéénege i bahoma ba gwé bé mapénd, to bihimbil, to makôga, m’a leñ bo gwét.” 12 Hala a ga bôña inyu yoñ ngandak nkus ni hondol gwom gwap gwobisôna; u ga boñ ki hala inyu jôs bahoma ba ba bi tjiba kôba+ ndi bôt ba témb ba yééne mu, ni inyu jôs litén li li bi kodba, li lôlak i matén ni matén,+ litén li li nkôhna ngandak nkus ni ngandak lingwañ,+ li yéénege i ñemkété u nkoñ ’isi.

13 “‘Bôt ba Séba,+ ni ba Dédan,+ ni bôt ba nyuñga ba Tarsis+ lôñni mimpémba nwé mi bôt ba gwét* nwominsôna mi ga bat we le: “Baa inyu yoñ ngandak nkus ni hondol gwom gwobisôna nyen u njôp mu loñ? Baa inyu kena silba ni gôl, ni ngandak nkus, ni gwom gwobisôna nyen u nkot mintôñ nwoñ mi gwét?”’

14 “Jon, a man mut, pot i mam m’a yik bôña, kal Gôg le: ‘Lana nyen Nwet Bayemlikok le Yéhôva a nkal: “I kel litén jem Israel li ga niñ nwee ibabé le li kon woñi, baa u ga yimbe bé hala?+ 15 U ga nyodne mu homa woñ, u lôlak mu bahoma ba ñombok ba ba yé haa,+ we ni ngandak matén ma ma yé lôñni we, bobasôna ba bak i ngii bihosi, limut likeñi yaga, ñ, ntôñ gwét nkeñi.+ 16 Kiki ond i nhô loñ, hala nyen u ga leñ litén jem Israel gwét. I dilo di nsôk, m’a lona we le u jôs loñ yem+ le ndi biloñ bipe bi yi me i ngéda m’a gwélél we, a Gôg, inyu unda le men me yé Numpubi, bomede ba tehge.”’+

17 “Lana nyen Nwet Bayemlikok le Yéhôva a nkal: ‘Baa we bé nyen u yé i mut me bi pôdôl behee ni njel bagwélél bem le bapôdôl, ba ba bi pot ngandak nwii i bisu bi ngéda le u ga lo i jôs litén jem?’

18 “‘I kel i, i ngéda Gôg a’ jôp i loñ Israel, hiun hiem hi ga kala,’ hala nyen Nwet Bayemlikok le Yéhôva a mpot.+ 19 ‘Ikété hiun hiem, ikété hié hi kundul yem, m’a pot, yak hisi hi ga nyeñg ni ngui i loñ Israel i kel i. 20 M’a boñ le tjobi di tuye di sehla, yak dinuni, ni binuga bi bikai, ni i gwom bi ñôdba ’isi lôñni bôt ba binam bobasôna ba ba yé hana ’isi; m’a boñ ki le dikôa di kwoo,+ mimpuge mi kuuba, yak mapénd momasôna ma beha ’isi.’

21 “‘M’a sébél pansoñ le i kwél nye mu ngii dikôa tjem tjodisôna. Hiki wada wap a ga gwélél pansoñ inyu jôs manyañ,’ hala nyen Nwet Bayemlikok le Yéhôva a mpot.+ 22 M’a kogse nye* ni himala hi kon,+ me kôp ki matjél. M’a boñ le nop nkeñi a nôl nye, nye ni bôt bé ba gwét, yak ni ngandak matén i i ga ba lôñni nye; me boñ ki le nop matan-ga+ lôñni hié+ ni solfa+ bi nôl bo.+ 23 Ha nyen m’a unda yaga lipémba jem, me unda ki le men me yé Numpubi, me boñ ki le ngandak bôt i yi me, biloñ bipe bi tehge; ha nyen b’a yi le men me yé Yéhôva.’

39 “Ndi we, a man mut, añal bikuu bi ga kwél Gôg,+ u kal nye le: ‘Lana nye Nwet Bayemlikok le Yéhôva a nkal: “M’a kolba we, a Gôg, ñane nunkeñi nu Mések ni Tubal.+ 2 M’a boñ le u témb ni mbus, me éga we, me nyodna we nyoo i bahoma ba ñombok+ ba ba yé haa, me bedna we i ngii dikôa di Israel. 3 M’a bép mpihlôñgô woñ le u tohla we i woo woñ waé, me boñ ki le makoñ ma mpihlôñgô ma ma yéne we i woo walôm ma kwoo. 4 U ga kwél i ngii dikôa di Israel,+ we ni bôt boñ ba gwét bobasôna, lôñni matén ma ma ga ba ni we. M’a ti we le u ba bijek inyu mintén mi dinuni nwominsôna mi mi nje minsôn, ni inyu binuga bi bikai.”’+

5 “‘U ga kwél i nahap mbok,+ inyule me mal pot hala,’ hala nyen Nwet Bayemlikok le Yéhôva a mpot.

6 “‘M’a om hié i ngii Magôg ni i ngii bôt ba nyééne i biôn ibabé le ba kon woñi,+ ha nyen b’a yi le men me yé Yéhôva. 7 M’a boñ le litén jem Israel li yi jôl jem lipubi, m’a nwas ha bé le ba hindis jôl jem lipubi; ha nyen matén m’a yi le men me yé Yéhôva,+ Numpubi ikété Israel.’+

8 “‘Ñ, i mam mana ma ga lo, ma yon ki,’ hala nyen Nwet Bayemlikok le Yéhôva a mpot. ‘Ngo i hilo hi hion me bé pôdôl. 9 I bôt ba nyééne mu bitison bi Israel ba ga pam, ba koda hié ni i bijôl bi gwét bini: biben bikeñi,* ni biben bititigi, ni mimpihlôñgô, ni makoñ ma mimpihlôñgô, ni mintoñgo mi gwé nsoñ likoñ, yak ni makoñ. Ba ga koda hié+ ni i bijôl bi gwét bini nwii minsaambok. 10 Ba ga bana bé ngôñ i ke i yéñ tjéé i bikai, to ke i kot tjéé i lipan, inyule ba ga gwélél i bijôl bi gwét bi inyu koda hié.’

“‘Ba ga yoñ nkus wonsôna u bôt ba bé yoñ bo nkus wap, ba hondol ki gwom gwobisôna bi bôt ba bé hondol gwom gwap,’ hala nyen Nwet Bayemlikok le Yéhôva a mpot.

11 “‘I kel i, m’a ti Gôg+ soñ nyoo i Israel, mu nsôsôgô u bôt ba nke liké i pes likôl i tuye; i nsôsôgô unu u ga kéñ i bôt ba nkil mu. Nyoo nyen ba ga jul Gôg ni mamut mé momasôna, ha nyen ba ga sébél i homa nu le Nsôsôgô u Hamôn-Gôg.*+ 12 Litén li Israel li ga yoñ sôñ isaambok inyu jô bobasôna, kayéle ba pubus loñ.+ 13 Bôt ba loñ bobasôna ba ga sal inyu jô bo, hala a ga boñ le jôl jap li kee ngan i kel m’a ti memede lipém,’+ hala nyen Nwet Bayemlikok le Yéhôva a mpot.

14 “‘Ba ga pohol ngim bôt le i tagbe mu loñ ngéda yosôna inyu jô mim mi ngi niñi ’isi, kayéle ba pubus loñ. Ba ga ke ni bisu i yéñ mim hala ikété loñ sôñ isaambok. 15 I ngéda i bôt ba ntagbe mu loñ ba ntehe bihés bi bôt ba binam, ba ga bii yimbne ha ipañ. I mbus, i bôt ba bi pohol inyu jô mim ba ga jô i bihés bi mu nsôsôgô u Hamôn-Gôg.+ 16 Nyoo ki nyen i tison ba nsébél le Hamôna* y’a bane. Hala nyen i bôt ba, ba ga pubus loñ.’+

17 “A man mut, lana nyen Nwet Bayemlikok le Yéhôva a mpot: ‘Kal mintén mi dinuni nwominsôna ni binuga bi bikai gwobisôna le: “Kodbana, lona! Kodbana i het sesema me nkôôbana bé i yéne, ngand i sesema ikeñi i ngii dikôa di Israel.+ Ni ga je minsôn, ni nyo ki matjél.+ 18 Ni ga je minsôn mi mimpémba mi bôt, ni nyo ki matjél ma baane ba hisi; bo yaga bon ba yé balôm ba mintômba, ni bon ba mintômba, ni balôm ba kembee, yak ni balôm ba nyaga: i bilém bini gwobisôna bi yé bilém bi mahoñ bi Basan. 19 Ni ga je mahoñ ma sesema me nkôôbana bé letee ni nuu; ni nyo ki matjél mé letee ni hiôô.”’

20 “‘N’a nuu bihosi ni baluk bikak bi hosi i téblé yem, ni nuu ki mimpémba mi bôt ni mintén mi bajogwét nwominsôna,’+ hala nyen Nwet Bayemlikok le Yéhôva a mpot.

21 “‘M’a unda biloñ bipe lipém jem, biloñ bipe gwobisôna bi ga tehe i kogse me bi lona i ngii yap, ba tehe ki lelaa me bi gwélél ngui yem* inyu jôs bo.+ 22 Ibôdôl i kel i, litén li Israel li ga yi le men me yé Yéhôva Nyambe wap. 23 Yak biloñ bipe bi ga yi le bôt ba litén li Israel ba bi ke i minkôm inyu liboñok jap libe inyule ba bi ndogbene me.+ Inyu hala nyen me bi kôm bo mbus,*+ me ti ki bo i moo ma baoo bap;+ bobasôna ba nôla ni pansoñ. 24 Me bi boñ bo mam ba kôli kôhna inyu nyega yap ni inyu mam map mabe, me kôm ki bo mbus.’*

25 “Jon lana nyen Nwet Bayemlikok le Yéhôva a nkal: ‘M’a témbna bôt ba Yakôb+ ba ba bé i minkôm i loñ yap, me kônôl ki litén li Israel jolisôna ngoo.+ M’a sôñ jôl jem lipubi ni makénd.*+ 26 I mbus le ba mal wo nyuu inyule ba bi lôôha ndogbene me,+ ba ga yén i loñ yap ibabé le ba sehla, ibabé to le mut nye ki nye a kônha bo woñi.+ 27 I ngéda m’a témbna bo i loñ yap, ba lôlak mu matén ma baoo bap,+ ni i ngéda m’a kot bo, ba lôlak mu biloñ bi baoo bap, m’a unda bo le men me yé Numpubi, ngandak biloñ i tehge.’+

28 “‘B’a yi le men me yé Yéhôva Nyambe wap i ngéda m’a om bo i minkôm i biloñ bipe; i mbus, me témb me kot bo, me témbna bo mu loñ yap, ibabé le mut to wada a yégle nyoo.+ 29 M’a kôm ha bé bo mbus,+ inyule m’a kôp mbuu wem i ngii litén li Israel,’+ hala nyen Nwet Bayemlikok le Yéhôva a mpot.”

40 I nwii mi nyônôs 25, di bak di ngi yii i minkôm,+ i bibôdle bi nwii, i hilo hi nyônôs 10 hi sôñ, hala wee i nwii mi nyônôs 14 le ba mal yoñ tison Yérusalem,+ i kel i yaga, ngui* i Yéhôva i bi lo i ngii yem, a kena me i tison.+ 2 Ikété yiinda i i bé lôl yak Nyambe, a kena me i Israel, a téé me i ngii hikôa hi hi nlôôha ba i ngii.+ I ngii hikôa hi, i pes nwelmbok, yom i i bé pôna tison i bé ñoñok nyoo.

3 I ngéda a bi kena me nyoo, me tehe mut a bé nene kiki mamuna.+ A bééna nkôô u loñge bôñgô* i woo,+ a ban-ga likai inyu hek gwom,* nyemede a bak a téé ha i lijubul. 4 I mut nu a kal me le: “A man mut, béñge loñge, tibil emble, yimbe ki* i mam momasôna me ñunda we, inyule inyu hala nyen ba nlona we hana. I yom yosôna u ga tehe, añle yo litén li Israel.”+

5 Me bi tehe lipénd li li nkéña mbégdé i témpel.* Mut a bééna likai i woo inyu hek gwom, li bé ap dikéñéé di moo disamal (inyu hiki hikéñéé hi woo, ba bé kônde libai li woo jada.)* I mut nu a bôdôl hek lipénd, mbibi i lipénd i bé likai jada, yak ntel wé u bak likai jada.

6 I mbus, a ke i lijubul li li bé nun pes likôl,+ a bet bitééne bi makôô. A hek kula nwemel i lijubul, pôk yé i bé likai jada, yak pôk i ii kula nwemel ipe i bé likai jada. 7 Hiki tuñ i batat i bé ntel u likai jada, pôk yé i bak likai jada; i pôla i bé bagal bituñ bi batat i bé ti dikéñéé di moo ditan.+ I kula nwemel i bé ipañ libebe, i nunuk kété témpel, i bé ap likai jada.

8 A hek libebe li lijubul, li li bé nun ikété, pôk yé i bé likai jada. 9 I mbus, a hek libebe li lijubul, li bé dikéñéé di moo juem; a hek ki mél mé makeñi, ma bé dikéñéé di moo diba. Libebe li lijubul li bé nun kété témpel.

10 Lijubul li li bé nun pes likôl li bééna bituñ bi batat baa ini pes ni ii, i bituñ bi gwo baa bi bé hihéga hiada, yak mél makeñi ma ma bé ini pes ni ii ma bé hihéga hiada.

11 I mbus, a hek nwemel u lijubul, pôk yé i bé 10 li dikéñéé di moo, lijubul jomede li abak 13 dikéñéé di moo.

12 Ini pes ni ii, bituñ bi batat gwobisôna bi bééna homa i bisu gwap, nu a bé nkéñék ni man libap, a bak dikéñéé di moo disamal.

13 A hek ki lijubul, ibôdôl i nyôl u tuñ batat* yada ikepam i nyôl u ii tuñ ipe, pôk i lijubul i bé 25 dikéñéé di moo; nwemel u tuñ yada i nunuk yaga nwemel u ii tuñ ipe.+ 14 I mbus, a hek mél makeñi, ntel wap u bé 60 ma dikéñéé di moo, a hek ki mél mé makeñi ma ma bé mu majubul ma ma bé kéña kotoo. 15 Ibôdôl i bisu bi lijubul ikepam i bisu bi libebe li lijubul li li bé nun kété témpel, hala a bé ti 50 ma dikéñéé di moo.

16 Ini pes ni ii, ikété lijubul, bituñ bi batat ni mél map makeñi bi bééna biwinda bi bi bé siip+ ikété. Ini pes ni ii, mabebe ma bééna biwinda ikété, yak bititii bi maén+ bi bak nkédlak mu mél makeñi.

17 I mbus, a kena me i kotoo i i yé i mbégdé, ha nyen me bi tehe bikumba,*+ me tehe ki hisi ba bi nai ni ngok mu mapañ ma kotoo momasôna. I bikumba bi bé mu hisi ba bi nai ni ngok bi bé môm maa. 18 I hisi ba bi nai ni ngok hi bé ini pes ni ii i majubul, bibôñgô gwé bi bak nlélém ni bibôñgô bi majubul: i homa ba bi nai ni ngok a bé isi iloo kotoo i kétékété.

19 I mbus, a hek homa* a bé ipôla bisu bi lijubul li li yé nsôhôk ikepam i bisu bi kotoo i kétékété. Hala a ti 100 dikéñéé di moo i pes likôl, a ti ki nlélém yom i pes ñombok.

20 Kotoo i i bé i mbégdé i bééna lijubul li li bé nun pes ñombok, a hek bibôngô bi lijubul li, a hek ki pôk yé. 21 Bituñ baa bi batat bi bé ini pes ni ii. Dihéga di mél makeñi ni di libebe li lijubul li, di bé nlélém ni dihéga di lijubul li bisu. I lijubul li, li bé ap 50 ma dikéñéé di moo, pôk yé i bak 25 dikéñéé di moo. 22 Dihéga di biwinda gwé, ni di libebe jé, ni di bititii gwé bi maén,+ di bé nlélém ni dihéga di lijubul li li bé nun i pes likôl. Bôt ba bé bet bitééne bi makôô bisaambok inyu jôp mu, yak libebe jé li bak i mbombom.

23 Lijubul jada li bééne i kotoo i kétékété, li bak i mbombom i lijubul li bé nun pes ñombok; lijubul lipe li bak i mbombom lijubul li li bé nun pes likôl. A hek homa a bé ipôla lijubul jada ni lii lijubul lipe, hala a ti 100 dikéñéé di moo.

24 I mbus, a kena me i pes nwelmbok, ha nyen me bi tehe lijubul li li bé ha i pes nwelmbok.+ A hek mél makeñi ma lijubul li, a hek ki libebe jé: dihéga tjap di bé nlélém ni dihéga di gwom a bi bôk a hek. 25 Ini pes ni ii, i biwinda bi bé mu lijubul li ni mu libebe jé, bi bé kiki bii biwinda bipe. I lijubul li, li bé ap 50 ma dikéñéé di moo, pôk yé i bak 25 dikéñéé di moo. 26 Bôt ba bé bet bitééne bi makôô bisaambok inyu jôp mu.+ Ini pes ni ii, bititii bi maén bi bé nkédlak mu mél mé makeñi.

27 Lijubul jada li bééne mu kotoo i kétékété, li nunuk pes nwelmbok. A hek i homa a bé ibôdôl i lijubul jada ikepam lii lijubul lipe li li bé nun pes nwelmbok: hala a ti 100 dikéñéé di moo. 28 I mbus, a kena me i kotoo i kétékété, di tagbene mu lijubul li li bé nun pes nwelmbok. I ngéda a bi hek lijubul li li bé nun pes nwelmbok, dihéga tjé di bé nlélém ni dihéga di maa majubul mape. 29 Dihéga di bituñ gwé bi batat, ni di mél mé makeñi, ni di libebe jé, di bé nlélém ni dihéga di gwom a bi bôk a hek. Ini pes ni ii, biwinda bi bé mu lijubul li ni mu libebe jé. I lijubul li, li bé ap 50 ma dikéñéé di moo, pôk yé i bak 25 dikéñéé di moo.+ 30 Mabebe ma bé mu majubul ma ma bé i bipes gwobisôna; ma bé ap 25 dikéñéé di moo, pôk yap i bak dikéñéé di moo ditan. 31 Libebe jé li bé nun kotoo i i bé i mbégdé, yak bititii bi maén bi bé nkédlak mu mél mé makeñi;+ bôt ba bé bet bitééne bi makôô juem inyu jôp mu.+

32 I ngéda a bi kena me i kotoo i kétékété, di tagbene i pes likôl, a hek i lijubul li, dihéga tjé di bé nlélém ni dihéga di maa majubul mape. 33 Dihéga di bituñ gwé bi batat, ni di mél mé makeñi, ni di libebe jé, di bé nlélém ni dihéga di gwom a bi bôk a hek. Ini pes ni ii, biwinda bi bé mu lijubul li, ni mu libebe jé. I lijubul li, li bé ap 50 ma dikéñéé di moo, pôk yé i bak 25 dikéñéé di moo. 34 Libebe jé li bé nun kotoo i i bé i mbégdé, yak bititii bi maén bi bé nkédlak mu mél mé makeñi mo ima; bôt ba bé bet bitééne bi makôô juem inyu jôp mu.

35 I mbus, a jôbna me i lijubul li bé nun pes ñombok;+ kiki a nhek jo, dihéga tjé di bé nlélém ni dihéga di gwom a bi bôk a hek. 36 Dihéga di bituñ gwé bi batat, ni di mél mé makeñi, ni di libebe jé, di bé nlélém ni dihéga di gwom a bi bôk a hek. Ini pes ni ii, biwinda bi bé mu lijubul li. I lijubul li, li bé ap 50 ma dikéñéé di moo, pôk yé i bak 25 dikéñéé di moo. 37 Mél mé makeñi ma bé nun kotoo i i bé i mbégdé, yak bititii bi maén bi bé nkédlak mu mél mé makeñi mo ima; bôt ba bé bet bitééne bi makôô juem inyu jôp mu.

38 Kumba yada ni nwemel wé bi bé bebee ni mél makeñi ma ma bé mu majubul, nyoo nyen ba bé jôôna bisesema bi ntul i hié.+

39 Bitéblé biba bi bé i libebe li lijubul ini pes ni ii; mu ngii yap nyen ba bé nôlôl bisesema bi ntul i hié,+ bisesema inyu béba+ ni bisesema inyu hô hihôha.+ 40 I het bôt ba bé jubul i pes ñombok, bitéblé biba bi bé ha i mbégdé. Bitéblé biba bipe bi bé ii pes ipe i libebe li lijubul. 41 Ini pes i lijubul ni ii, bitéblé bina bi bé ha (gwobisôna bi bé juem); mu ngii nyen ba bé nôlôl bisesema. 42 I bitéblé bina bi, bi bé gwéélana inyu bisesema bi ntul i hié, bi bé mbañak ni ngok ba nkôñg. Hiki téblé i bé ap hikéñéé hi woo hiada ni pes, i ban-ga ntel u hikéñéé hi woo hiada. Mu ngii bitéblé bi nyen ba bé biine bisélél ba bé gwélél inyu nol bisesema bi ntul i hié lôñni bisesema bipe. 43 I bitaga* bi bé mu bipes bi mabap gwobisôna bi bééna pôk i libai li woo jada; mu ngii bitéblé nyen ba bé biine binuga ba bé ti inyu bisesema.

44 Bikumba bi batôp tjémbi bi bé ipañ lijubul li li nke i kotoo i kétékété,+ bebee ni lijubul li li yéne i pes ñombok, bi nunuk pes nwelmbok. Kumba ipe i bé bebee ni lijubul li li bééne i pes likôl, i nunuk pes ñombok.

45 A kal me le: “I kumba ini i i nun pes nwelmbok i yé inyu biprisi bi bi ngwel nson i témpel.+ 46 I kumba i i nun pes ñombok i yé inyu biprisi bi bi gwel nson mu juu li bisesema.+ Ba yé mbôda Zadok,+ bon ba yé Lôk Lévi i i bi pohlana inyu kôôge bebee ni Yéhôva inyu gwel nson i bisu gwé.”+

47 A hek ki kotoo i kétékété. I bé ap 100 dikéñéé di moo, pôk yé i bak 100 dikéñéé di moo: bipes gwé gwo bina bi bé ap nlélém. Juu li bisesema li bééne i bisu bi témpel.

48 I mbus, a jôbna me i libebe li témpel,+ a hek mél makeñi ma ma bé ha i libebe: hala a ti dikéñéé di moo ditan pes yada, ni dikéñéé di moo ditan ii pes ipe. Pôk i lijubul jomede i bé dikéñéé di moo daa pes yada, ni dikéñéé di moo daa ii pes ipe.

49 Libebe li bé ap 20 ma dikéñéé di moo, pôk yé i bak 11* dikéñéé di moo. Bôt ba bé bet bitééne bi makôô inyu jôp mu. Mél ma bé ipañ mél makeñi, jada ini pes, jada ki ii pes ipe.+

41 I mbus, a jôbna me i Homa mpubhaga,* a hek mél makeñi; mbibi yap i bé dikéñéé di moo disamal* ini pes, i bak dikéñéé di moo disamal ii pes ipe. 2 Pôk i nwemel i bé 10 li dikéñéé di moo; yak mabap* ma ma bé ini pes i nwemel ni ii, ma bé dikéñéé di moo ditan. A hek Homa mpubhaga, a bé ap 40 ma dikéñéé di moo, pôk yé i bak 20 ma dikéñéé di moo.

3 I mbus, a jôp i tuñ i kétékété,* a hek mél makeñi ma nwemel: mbibi yap i bé dikéñéé di moo diba. Pôk i nwemel i bé dikéñéé di moo disamal. Yak mabap mé, ini pes ni ii, ma bé* dikéñéé di moo disaambok. 4 A hek tuñ i bé i mbus Homa mpubhaga, i bé ap 20 ma dikéñéé di moo, pôk yé i bak 20 ma dikéñéé di moo.+ A kal me le: “Homa a nlôôha mpubhaga nunu.”+

5 I mbus ha, a hek libap li témpel: mbibi yé i bé dikéñéé di moo disamal. Pôk i bituñ bi édi ni mabap ma témpel i bé dikéñéé di moo dina.+ 6 I bituñ bi, bi bé bi kéhi yada i ngii ini ipe. Ndegi i bé aa. Hiki ndegi i bééna 30 ma bituñ. I bituñ bi bi édi ni mabap ma témpel bi bé bi kéhne i ngii gwom bi bé nit gwo mu mapañ ma témpel ibabé le mbiñ yap i jôp mu mabap ma témpel yomede.+ 7 I bituñ bi, kiki bi bé bet, hala nyen bi bé keñep, ibôdôl i ndegi i bisu ikepam i ndegi i nyônôs aa.+ Ini pes i témpel ni ii, likala li li yé ngiiña li bé ha i ndegi bisu, li kenek i ndegi i nyônôs iba letee ni i ndegi i nyônôs aa.

8 Me tehe le isi yé, mu mapañ mé, témpel i bééna mbédhak homa; hikuu hi bituñ bi bi édi ni mabap ma témpel, ntel wé u bé ngim likai i dikéñéé di moo disamal, ibôdôl ’isi letee ni i bibôdle bi ndegi i si.* 9 Mabap ma ma édi ni mabap ma témpel, ma bak i pes mbégdé, mbibi yap i bé dikéñéé di moo ditan. Homa a bé yégle* mu mapañ ma bituñ bi bi édi ni mabap ma témpel.

10 Ini pes i témpel ni ii, ipôla témpel ni bikumba,*+ nahap homa i bé ha, pôk yé i bé 20 ma dikéñéé di moo. 11 Nwemel wada u bééne i pes ñombok, u u bé ipôla homa a bé yégle ni bituñ bi bi édi ni mabap ma témpel. Pôk i homa a bé yégle mu mapañ ma témpel i bé dikéñéé di moo ditan.

12 I ndap i bé i pes hiôñg, i nunuk nahap homa, pôk yé i bé 70 ma dikéñéé di moo, i abak 90 ma dikéñéé di moo. Mbibi i mabap ma ndap ini i bé dikéñéé di moo ditan.

13 A hek témpel, i bé ap 100 dikéñéé di moo. Yak nahap homa, ni ndap i,* lôñni mabap mé, gwobisôna bi bé ap 100 dikéñéé di moo. 14 Bisu bi témpel bi bi bé nun pes likôl lôñni nahap homa nu a bé ini pes i témpel ni ii, pôk yap i bé 100 dikéñéé di moo.

15 A hek bibôñgô bi ndap i i bé i mbus témpel, i nunuk nahap homa, a hek ki mabebe mé matitigi ma ma bé ini pes ni ii, hala a ti 100 dikéñéé di moo.

A hek yak Homa mpubhaga, ni Homa a nlôôha mpubhaga,+ lôñni mabebe ma kotoo, 16 a hek ki bikula bi manwemel, ni biwinda bi bi bé siip ikété,+ lôñni mabebe ma ma bé mu bahoma ba bo baa. Dibambha di mabam di di bé di édi mu mabap,+ di bé ipañ hiki kula nwemel, ibôdôl ’isi ikepam i biwinda; biwinda bi bé nhôk. 17 A hek ngii nwemel, a hek kété témpel, a hek mbégdé, a hek ki ngii mabap. 18 Bititii bi bikérubim,+ ni bititii bi maén+ bi bé nkédlak mu mabap; hiki lién li bé li téé ipôla bikérubim biba, yak hiki kérubim i bééna masu ima: 19 su u mut binam u bé nun lién ini pes yada, yak su u mbondo njéé* u nunuk lién ii pes ipe.+ Hala nyen bi bé nkédlak mu témpel yosôna. 20 Bititii bi bikérubim, ni bititii bi maén bi bé nkédlak mu mabap ma témpel, ibôdôl ’isi ikepam i ngii kula nwemel.

21 Bipes gwo bina bi bitembee bi makôga* ma témpel bi bé ap nlélém.+ Yom yada i bé i bisu bi Homa mpubhaga,* i bé pôna 22 juu li bisesema li li bé ni mabam;+ ntel wé u bé dikéñéé di moo daa, li abak dikéñéé di moo diba. Mbiñ i bé mu makas mé, yak tééne yé,* lôñni mapañ mé bi bé ni mabam. I mut nu a kal me le: “I téblé ini yon i yé i bisu bi Yéhôva.”+

23 Homa mpubhaga a bééna makôga ima, yak Homa a nlôôha mpubhaga a bééna makôga ima.+ 24 Manwemel ma bééna bikuga* biba bi bi nhielba, hiki nwemel u ban-ga bikuga biba. 25 Bititii bi bikérubim ni bititii bi maén bi bé nkédlak mu makôga ma témpel, nlélém kiki bi bé nkédlak mu mabap.+ Homa nyôl ba bi lémés ni kék a bééne i bisu bi libebe nyoo i mbégdé. 26 Biwinda bi bi bé siip ikété+ bi bé ini pes i libebe ni ii, yak bititii bi maén bi bé nkédlak mu bipes gwo biba bi libebe, bi bé ki nkédlak mu mabap ma bituñ ma ma édi ni témpel, ni mu homa nyôl ba bi lémés ni kék.

42 I mbus, a kena me i kotoo i i yé i mbégdé, i bak i pes ñombok.+ A jôbna me ikété ndap i het bikumba bi bééne, i i yé bebee ni nahap homa,+ i bak i pes ñombok i ndap i i bé i pes hiôñg.*+ 2 I het nwemel wé u bééne, u nunuk pes ñombok, i ndap ini i bé ap 100 dikéñéé di moo,* pôk yé i bak 50 ma dikéñéé di moo. 3 Ndap i het bikumba bi bé, i bé ipôla kotoo i kétékété ni homa ba bi nai ni ngok nu kotoo i i yé i mbégdé; pôk i kotoo i kétékété i bé 20 ma dikéñéé di moo.+ Ndap i bééna mabebe matitigi ini pes ni ii mu ndegi yo aa, ma nun-naga. 4 Man njel+ a bé i bisu bi bikumba,* pôk yé i bé 10 li dikéñéé di moo, a abak 100 dikéñéé di moo;* manwemel ma bikumba ma bé nun pes ñombok. 5 Pôk i bikumba bi ndegi i ngii i bé isii iloo pôk i bikumba bi ndegi i si ni bi ndegi i ñemkété, inyule mabebe matitigi ma bé je pôk yap. 6 Inyule bikumba bi bé mu ndegi i yo aa, ndi bi bééna bé mél kiki mél ma bikotoo. Inyu hala nyen pôk i bikumba bi ndegi i ngii i bé isii iloo pôk i bikumba bi ndegi i si ni bi ndegi i ñemkété.

7 Lipénd li ngok li li bé i mbégdé, bebee ni bikumba, i pes kotoo i i yé i mbégdé, li nunuk bii bikumba bipe, li bé ap 50 ma dikéñéé di moo. 8 I bikumba bi bé i pes kotoo i i yé i mbégdé bi bé ap 50 ma dikéñéé di moo, ki le i bikumba bi bé nun témpel bi bé ap 100 dikéñéé di moo. 9 Nwemel wada u bé i pes likôl, mut a bé lama tagbene i kotoo i i yé i mbégdé, a jubul mu nwemel u, inyu jôp mu bikumba.

10 Bebee ni nahap homa, yak bebee ni ndap i i bé i pes hiôñg,* bikumba bipe bi bé ha i mbus* lipénd li ngok, bi bi bé kena i kotoo i i bé i pes likôl.+ 11 Njel i bé i bisu bi bikumba bi bi bé i pes nwelmbok, i bé kiki njel i i bé i bisu bi bikumba bi bi bé i pes ñombok;+ bikumba bi pes nwelmbok ni bi pes ñombok bi bé ap nlélém, bi ban-ga nlélém pôk, bi ban-ga ki minlélém mi mapémél, ni minlélém mi dihéga. I manwemel ma bé i pes ñombok 12 ma bé kiki manwemel ma ma bé i pes nwelmbok. I homa man njel a bé bôdle, libap li ngok li bé ha, li nunuk pes likôl, ha nyen nwemel u bééne, mu nyen mut a bé le a jubul.+

13 Ha nyen a bi kal me le: “I bikumba bi yé i pes ñombok ni i bikumba bi yé i pes nwelmbok, bi bak bebee ni nahap homa,+ bi yé bikumba bipubhaga i het biprisi bi bi ntiige bebee ni Yéhôva bi njél; mu ki nyen bi mbiine makébla ma nlôôha mapubhaga,+ likébla li bijek, sesema inyu béba ni sesema inyu hô hihôha, inyule i homa nu a yé mpubhaga.+ 14 I ngéda biprisi bi njôp i Homa mpubhaga, bi nlama bé pam nyoo inyu ke i kotoo i i yé i mbégdé bo ngi héya mambot map, ma ba bak ba hééba inyu gwel nson;+ inyule i mambot ma, ma yé mapubhaga. Ilole ba njôp i bahoma bôt ba litén ba nla jôp, ba ga héñha mambot map.”

15 I ngéda a bi mal hek témpel yosôna,* a pamna me, di tagbene i lijubul li nun pes likôl;+ i mbus, a hek i mbok i yosôna.

16 A hek pes likôl ni likai ba ngwélél inyu hek gwom.* Inoñnaga ni likai ba ngwélél inyu hek gwom, pes likôl i bé ap 500 makai ibôdôl ini pes ipam ii pes ipe.

17 A hek pes ñombok. Inoñnaga ni likai ba ngwélél inyu hek gwom, pes ñombok i bé ap 500 makai.

18 A hek pes nwelmbok. Inoñnaga ni likai ba ngwélél inyu hek gwom, pes nwelmbok i bé ap 500 makai.

19 A hielba, a ke i pes hiôñg. Kiki a nhek yo ni likai ba ngwélél inyu hek gwom, pes hiôñg i bé ap 500 makai.

20 A bi hek i mbok i, i bipes gwé gwo bina. I lipénd li bé kéña i mbok i,+ li bé ap 500 makai, pôk yé i bak 500 makai,+ inyu bagal i yom i yé pubhaga ni yañga yom.+

43 I mbus, i mut nu a kena me i lijubul li li nun pes likôl.+ 2 Nyoo nyen me bi tehe lipém li Nyambe nu Israel, li bé lôl i pes likôl,+ kiñ yé i bak kiki mbimba i hundul;+ lipém jé li bi béyéi hisi.+ 3 I yiinda me bi tehe i bé pôna yiinda me bi tehe i ngéda me* bi lo i tjé tison, i pônaga yiinda me bi tehe bebee ni Lom Kébar;+ ha nyen me bi ôm maboñ ’isi, me ôm ki mbom ’isi.

4 Lipém li Yéhôva li tagbene i lijubul li nun pes likôl, li jôp i témpel.*+ 5 Ha nyen mbuu u bi pa me, u jôbna me i kotoo i kétékété, me tehe le témpel i bé i yôni ni lipém li Yéhôva.+ 6 I mbus, me nok mut a mpôdôs me, kiñ yé i lôlak i témpel; i mut nu a lo, a telep ipañ yem.+ 7 A kal me le:

“A man mut, i homa nunu a yé homa yééne yem ane,+ ni homa me ntééne mabal mem,+ homa m’a yééne ni bon ba Israel i boga ni boga.+ Bôt ba litén li Israel,* bo ni bikiñe gwap, ba ga hindis ha bé jôl jem lipubi+ ni banyambe bape ba mbégés,* to ni mim mi bikiñe gwap.* 8 Hala kiki ba bé bii kula yap nwemel bebee ni kula yem nwemel, kayéle libap jada jotama jon li bé ipôla me ni bo,+ ba bi hindis jôl jem lipubi ni gwom bi nsuñgaha ñem ba bi boñ, jon me bi unup, me tjé bo.+ 9 Nano ni, ba waa bégés banyambe* bape ni mim mi bikiñe gwap, inyu boñ le me yén ni bo i boga ni boga.+

10 “Ndi we, a man mut, toñle litén li Israel lelaa témpel i yé,+ kayéle ba wo nyuu inyu maboñok map mabe,+ ni le ba yi lelaa i yé ñoñok.* 11 Ibale ba nwo nyuu ni mam momasôna ba bi boñ, wee éba bo titii i ñunda lelaa témpel i yé ñoñok: dihéga tjé, mapémél mé ni manwemel mé.+ Unda bo maoñ mé momasôna ni matéak mé, maoñ mé momasôna ni mambén mé; tila i mam ma, bomede ba tehge, inyu boñ le ba wan maoñ mé momasôna, ba tééda ki matéak mé.+ 12 Mbén témpel ini: nkoñ wonsôna u u yé mu mapañ ma ngii hikôa u nlôôha ba mpubhaga.+ Ñ, mbén témpel i.

13 “Dihéga di juu li bisesema dini inoñnaga ni dikéñéé di moo+ (inyu hiki hikéñéé hi woo hiada, ba bé kônde nsamblak libai li woo jada):* tééne yé i gwé ntel u hikéñéé hi woo hiada; pôk i tééne i nloo pes bisu i juu li bisesema i i kéhne yo i ngii ni hikéñéé hi woo hiada. Minten mi yé mu ngii tééne, mu mapañ mé momasôna, mbibi yap i yé nsamblak libai li woo* jada. Tééne i juu li bisesema i. 14 Pes bisu i i yé i ngii tééne, ntel wé u yé dikéñéé di moo diba; pôk yé i nloo pes i nyônôs iba i i kéhne yo i ngii ni hikéñéé hi woo hiada. Pes i nyônôs iba i yé i ngii pes bisu, ntel wé u yé dikéñéé di moo dina; pôk yé i nloo mpôm juu li bisesema u u kéhne yo ngii ni hikéñéé hi woo hiada. 15 Ntel u mpôm juu li bisesema u yé dikéñéé di moo dina, bitoñ bina bi mpémél mu ngii mpôm juu li bisesema.+ 16 Bipes gwo bina bi mpôm juu bi ñap nlélém: u ñap 12 dikéñéé di moo, pôk yé i bak 12 dikéñéé di moo.+ 17 Mapañ mo ma-na ma pes i nyônôs iba i juu li bisesema ma ñap 14 dikéñéé di moo, yak minten mi mi yé mu mapañ mé momasôna, mbibi yap i yé pes hikéñéé hi woo. Pôk i tééne i nloo pes bisu i i kéhne yo i ngii ni hikéñéé hi woo hiada.

“Likala li* juu li bisesema li nun pes likôl.”

18 I mbus, a kal me le: “A man mut, lana nyen Nwet Bayemlikok le Yéhôva a nkal: ‘I biniigana bini gwon ni ga noñ i ngéda juu li bisesema li ga ôña, inyu ti bisesema bi ntul i hié i ngii yé, ni inyu nwes matjél mu.’+

19 “‘U ga yoñ man nlôm nyaga mu bémba, u lona nye biprisi, hala wee Lôk Lévi i i yé mbôda Zadok,+ i i nkôôge me bebee inyu gwélél me nson, u ti bo nye le a ba sesema inyu béba,’+ hala nyen Nwet Bayemlikok le Yéhôva a mpot. 20 ‘U ga yoñ ndék matjél mu matjél mé, u hoo mo mu bitoñ gwo bina bi juu li bisesema, mu makas ma-na ma pes i nyônôs iba, inyu pubus juu li bisesema inyu béba, ni inyu hô bibéba.*+ 21 I mbus, yoñ man nlôm nyaga, hala wee sesema inyu béba, le ba ligis nye i homa témpel nu ba bi kôôba inyu jam li, nyoo i mbégdé i homa mpubhaga.+ 22 I hilo hi nyônôs iba, u ga ti man nlôm kembee,* nu a gwé bé lem yo ki yo, le a ba sesema inyu béba; ba ga pubus juu li bisesema inyu béba kiki ba bi pubus jo ni matjél ma man nlôm nyaga.’

23 “‘I ngéda u ga mal pubus jo inyu béba, ha nyen u ga ti man nlôm nyaga mu bémba nu a gwé bé lem yo ki yo, ni man nlôm ntômba mu bémba nu a gwé bé lem yo ki yo. 24 U ga ti gwo i bisu bi Yéhôva, biprisi bi ga kuñle bas mu,+ bi ti ki gwo le bi ba sesema i ntul i hié inyu Yéhôva. 25 Hiki kel, inyu dilo disaambok, u ga ti nlôm kembee le a ba sesema inyu béba,+ u ti ki man nlôm nyaga mu bémba lôñni nlôm ntômba mu bémba; u ga ti bilém bi bi gwé bé lem yo ki yo.* 26 Dilo disaambok, u ga ti bisesema inyu hô bibéba, le ndi ba pubus juu li bisesema, ba kôôba ki jo. 27 I ngéda i dilo di, di ga tagbe, ibôdôl i hilo hi nyônôs juem,+ biprisi bi ga ti bisesema binan* bi bi ntul i hié mu ngii juu li bisesema, bi boñ ki hala ni bisesema binan inyu kôp nsañ;* ha nyen ni ga kônha me maséé,’+ hala nyen Nwet Bayemlikok le Yéhôva a mpot.”

44 A témbna me i kotoo i i yé i lijubul li témpel li li yé i mbégdé, li li nun pes likôl;+ li bé nyibak.+ 2 Ha nyen Yéhôva a bi kal me le: “I lijubul lini li nlama yégle nyibak, mut nye ki nye a ga jubul bé mu; inyule me Yéhôva, Nyambe nu Israel, me bi jubul mu;+ jon li nlama yégle nyibak. 3 Ndi, ñane litén nye a ga yén mu inyu je bret i bisu bi Yéhôva,+ inyule nyen a yé ñane litén. I libebe li lijubul nyen a ga jubul, mu ki nyen a ga pémél.”+

4 I mbus, di tagbene mu lijubul li li nun pes ñombok, a kena me i bisu bi témpel. Kiki me bé béñge, me tehe lipém li Yéhôva li nyon mu témpel Yéhôva.+ Ha nyen me bi ôm maboñ ’isi, me ôm ki mbom ’isi.+ 5 Yéhôva a kal me le: “A man mut, sédi ôô,* béñge, tibil emble i mam momasôna me yé i kal we inyu matéak ni mambén ma témpel Yéhôva. Yimbe yaga lijubul ni mapémél momasôna ma témpel.+ 6 U ga kal litén li Israel li li yé ndok le: ‘Lana nyen Nwet Bayemlikok le Yéhôva a nkal: “A litén li Israel, me nwaa maboñok manan ma ma nsuñgaha ñem. 7 I ngéda ni bé jôbna bakén ba bôt ba ba ta bé nkweebaga i ñem ni i minsôn i homa mpubhaga, bon ba bé hindis témpel yem. Ni bé lona bret gwem i bisu gwem, ni lon-ga mahoñ ni matjél, ki le ni bi bôk malômbla mem ni mam momasôna ni mboñ, ma ma nsuñgaha ñem. 8 Ni bi tééda bé gwom gwem bipubhaga.+ Ndi bôt bape bon ni bi téé le bon ba gwel nson mu témpel yem.”’

9 “‘Lana nyen Nwet Bayemlikok le Yéhôva a nkal: “Nkén mut nye ki nye nu a nyééne mu loñ Israel, nu a ta bé nkweebaga i ñem ni i minsôn, a ga jôp yaga bé i témpel yem.”’

10 “‘Lôk Lévi i i bi kôm me mbus+ i ngéda bon ba Israel ba bi kôm me mbus inyu bégés bisat gwap bi nyega,* bikuu bi ga kwél bo inyu maboñok map mabe. 11 I mbus, ba ga ba bagwélél mu homa wem mpubhaga, ba ga tat majubul ma témpel,+ ba gwel ki nson i témpel. Ba ga nol sesema i ntul i hié, ni sesema ipe; bo ki bon ba ga telep i bisu bi litén inyu gwélél jo nson. 12 Hala kiki ba bé gwélél litén li Israel i bisu bi bisat gwap bi nyega, ba yilga ngok baagene i i mboñ le litén li Israel li kwoo ikété béba,+ inyu hala nyen me bi pa woo wem, me kum ki soñ le: bikuu bi ga kwél bo inyu maboñok map mabe,’ hala nyen Nwet Bayemlikok le Yéhôva a mpot. 13 ‘Ba ga tiige bé bebee ni me inyu gwel nson u prisi, ba ga tiige bé to bebee ni yom yem ipubhaga yo ki yo, to yom yem yo ki yo i i nlôôha pubhaga. Ba ga wo yaga nyuu inyu gwom bi nsuñgaha ñem ba bi boñ. 14 Ndi m’a téé bo le ba ba bagwélél mu témpel, ba ba nsal bôlô yosôna mu, ba boñok ki mam momasôna ma nlama bôña mukété.’+

15 “‘Ndi biprisi, hala wee Lôk Lévi i i yé mu mbôda Zadok,+ kiki ba bi téñbe i gwel minson mi mi nlama bôña mu témpel yem i ngéda bon ba Israel ba bi kôm me mbus,+ bon ba ga tiige bebee ni me inyu gwélél me nson, bo ki bon ba ga telep i bisu gwem inyu sémél me mahoñ+ ni matjél,’+ hala nyen Nwet Bayemlikok le Yéhôva a mpot. 16 ‘Bo yaga bon ba ga jôp ikété témpel yem, bo ki bon ba ga kôôge bebee ni téblé* yem inyu gwélél me nson,+ ba yônôs ki minson nwap i bisu gwem.+

17 “‘I ngéda ba ga tagbene mu majubul ma kotoo i kétékété, ba ga haba mambot ma loñge bôñgô.*+ Ba ga haba bé to mambot ma mahuu ma ntômba i ngéda ba ngwel nson mu majubul ma kotoo i kétékété, to mukété kotoo i yomede. 18 Ba ga haba biyañsi bi loñge bôñgô* mu miño nwap, ba haba ki bihap* bi bi nhô bo bôbôk.+ Ba habga bañ yom yo ki yo i i mpémha bo mbiibe. 19 Ilole ba mpam inyu ke i kotoo i yé i mbégdé i homa litén li yéne, ba ga héya mambot ba bak ba hééba i ngéda ba gwelek nson,+ ba bii mo mu bikumba bipubhaga.*+ I mbus, ba haba mambot mape inyu boñ le ba yilha bañ bôt ba litén bapubhaga i nya i kôli bé.* 20 Ba homb bañ miño nwap,+ ba nwas bañ to le tjôñ tjap di bôñgôp. Ba nlama kit tjôñ tjap. 21 Biprisi bi nyo bañ wai i ngéda bi njôp i kotoo i i yé ikétékété.+ 22 Ba bii bañ yik muda, to muda nu a bi bos ni nlôm;+ ndi ba bii ndik ngond ngi yi munlôm, nu a yé ngond Lôk Israel; tole ba bii ndik yik muda, nu nlôm a bé prisi.’+

23 “‘Biprisi bi ga niiga litén jem i boñ maselna ipôla yañga yom ni yom ipubhaga; bi ga niiga ki bo maselna ipôla yom nyega ni yom ipubi.+ 24 Ibale ndañ u mpam, bo yaga bon ba nlama kéés; i ngéda ba ga kéés i hop u,+ ba nlama noñ matéak mem.+ Ba ga nôgôl mambén mem ni matiñ mem inyu mangand mem momasôna,+ ba ga tééda ki dilo tjem di sabat. 25 Ba ga tiige bé bebee ni mim u mut binam wo ki wo, tiga le ba yila nyega. Ndi ba nla ba nyega inyu isañ wap, inyu nyañ wap, inyu man wap nu munlôm, inyu man wap nu muda, inyu manyañ wap nu munlôm, inyu manyañ wap nu muda nu a yé ngi biiba.+ 26 Ndi i ngéda prisi i ga mal pubhana, i ga bem le dilo disaambok di tagbe ilole a ntiimba gwel nson wé. 27 I kel prisi i ga jôp i homa mpubhaga i kotoo i i yé ikétékété inyu gwel nson wé i homa mpubhaga, i ga ti sesema yé inyu béba,’+ hala nyen Nwet Bayemlikok le Yéhôva a mpot.

28 “‘Ngababum yap ini: men me yé ngababum yap.+ Ni ga ti bé bo nkoñ to wada mu Israel, inyule men me yé ngababum yap. 29 Bo yaga bon ba ga je likébla li bijek,+ ni sesema inyu béba, ni sesema inyu hô hihôha;+ yak hiki yom ba nsémél Nyambe i loñ Israel i ga ba inyu yap.+ 30 Matam malam ma bisu ma libumbul linan, ni mintén mi makébla nwominsôna bi ga ba inyu biprisi.+ Ni ga ti ki biprisi flawa* i libumbul linan li bisu kiki likébla.+ Ha nyen mahaa manan ma ga ba nsaibak.+ 31 Biprisi bi ga je bé hinuni hio ki hio, to nuga yo ki yo bi ba nkoba nwok tole bi binuga bipe bi mpat.’+

45 “‘I ngéda ni ga kap loñ le i ba ngababum nan,+ ni ga ti Yéhôva ngaba ’isi mu loñ.+ I ngaba i, i ga ba pubhaga. I ga ap 25 000 dikéñéé di moo,* pôk yé i bak 10 000 di dikéñéé di moo.+ I mbok i yosôna* i ga ba ngaba pubhaga. 2 Ikété ngaba ’isi ini nyen homa mpubhaga a’ bane, a abak 500 dikéñéé di moo*+ bipes gwé bina; ini pes ni ii, homa mpubhaga a ga bana minkoñ i het binuga bi njél bikai, pôk yap i ga ba 50 ma dikéñéé di moo.+ 3 Mu mbok u mal hek nyen u ga kônde ki hek nkoñ u ñap 25 000 dikéñéé di moo, pôk yé i bak 10 000 di dikéñéé di moo; mukété nyen témpel i ga bane, homa a nlôôha mpubhaga. 4 I nkoñ u, u ga ba ngaba pubhaga i loñ, yon i ga ba inyu biprisi,+ bi bi yé bagwelnson i témpel, bi tiigege bebee ni Yéhôva inyu gwélél nye nson.+ Nyoo nyen mandap map ma ga bane, nyoo ki nyen homa mpubhaga nu témpel a ga bane.

5 “‘Nkoñ umpe u ga ba inyu Lôk Lévi i i yé bagwelnson i témpel, u ga ap 25 000 dikéñéé di moo, pôk yé i bak 10 000 di dikéñéé di moo;+ Lôk Lévi i ga kôhna ki 20 ma bikumba*+ kiki ngababum.

6 “‘Ni ga ti tison nkoñ u u ñap 25 000 dikéñéé di moo (nlélém kiki ngaba pubhaga),* pôk yé i bak 5 000 di dikéñéé di moo.+ I nkoñ u won u ga ba inyu litén li Israel.

7 “‘Ni ga ti ñane litén nkoñ, u ga ba i bipes gwo biba bi ngaba pubhaga,* u bak ki i bipes gwo biba bi nkoñ u u yé inyu tison. I nkoñ u ñane litén u, u ga ba ipañ ngaba pubhaga ni ipañ nkoñ u u yé inyu tison. I nkoñ u, u ga ba i pes hiôñg, u bak ki i pes likôl. Ibôdôl i nwaa wé nkoñ i pes hiôñg letee ni i nwaa wé nkoñ i pes likôl, u ga ap nlélém kiki nkoñ wada u matén ma Israel.+ 8 I nkoñ u won u ga ba ngababum i ñane litén ikété loñ Israel. Baane bem ba litén ba ga tjome ha bé litén jem,+ ba ga ti ki litén li Israel loñ, hiki litén li ga kôhna yé ngaba.’+

9 “Lana nyen Nwet Bayemlikok le Yéhôva a nkal: ‘Ni mpéé, a baane ba litén li Israel!’

“‘Ni waa boñ mam ma njôô, ni waa ki tét bôt, ndi ni boñ loñge, ni boñ ki mam ma téé sép,+ ni waa kadal gwom bi litén jem,’+ hala nyen Nwet Bayemlikok le Yéhôva a mpot. 10 ‘Ni gwélél kilô i téé, hihéga hi éfa hi hi téé,* ni hihéga hi bath hi hi téé.*+ 11 Hihéga hi éfa hi ga ba nlélém ni hihéga hi bath. Hihéga hiada hi bath hi ga ba jôga jada li hômer* ikété jôm, yak hihéga hiada hi éfa hi ga ba jôga jada li hômer ikété jôm. Hômer yon ba ga gwélél inyu hégél gwom. 12 Sékel*+ i ga ba 20 ma géra.* Inyu nan, mina yada i ga ba 60 ma sékel.’*

13 “‘I likébla lini jon ni ga ti: inyu hiki 160 kilô i blé, ni ga ti yom kiki bo kilô aa i blé;* inyu hiki 130 kilô i kôn,* ni ga ti yom kiki bo kilô iba i kôn.* 14 Bath yon i ga gwéélana inyu hek hihéga hi môô ba nlama ti. Bath yada i yé jôga jada li kor* ikété jôm, yak jôm li bath li bak hihéga hiada hi hômer, inyule 10 li bath li yé hihéga hiada hi hômer. 15 ikété 200 mintômba, ba ga ti ntômba wada mu bibémba bi litén li Israel. Ba ga ti i gwom bini gwobisôna le bi ba likébla li bijek,+ ni sesema i ntul i hié,+ ni sesema inyu kôp nsañ,+ inyu bat nwéhél i bibéba bi litén,’*+ hala nyen Nwet Bayemlikok le Yéhôva a mpot.

16 “‘Bôt ba loñ bobasôna ba ga yoñ i likébla li,+ ba ti jo ñane litén li Israel. 17 Ñane litén nyen a ga kôôba bisesema bi ntul i hié,+ ni likébla li bijek,+ ni likébla li wai i ngéda mangand,+ i sôñ mondo, i dilo di sabat,+ ni i ngéda mangand momasôna ma litén li Israel.*+ Nyen a ga lona sesema inyu béba, ni likébla li bijek, ni sesema i ntul i hié, lôñni sesema inyu kôp nsañ inyu bat nwéhél i bibéba bi litén li Israel.’*

18 “Lana nyen Nwet Bayemlikok le Yéhôva a nkal: ‘I hilo hi bisu hi sôñ bisu, u ga yoñ man nlôm nyaga mu bémba nu a gwé bé lem yo ki yo, u pubus homa mpubhaga.+ 19 Prisi i ga yoñ ndék matjél mu matjél ma sesema inyu béba, i hoo mo mu bitembee bi likôga li témpel,+ i hoo ki mo mu makas mo ma-na ma pes i nyônôs iba i juu li bisesema, ni mu bitembee bi likôga li kotoo i kétékété. 20 Hala ki nyen u ga boñ i hilo hi nyônôs isaambok hi sôñ, inyu tonjee mut nu a ga boñ béba ngi kôôba tole a mboñ jam ngi yi;+ hala nyen ni ga pubus témpel.*+

21 “‘I hilo hi nyônôs 14 hi sôñ bisu, ni ga tégbaha ngand Pasa.+ Bôt ba ga je bret bi ngi-séñha dilo disaambok.+ 22 I kel i, ñane litén a ga kôôba man nlôm nyaga le a ba sesema inyu béba, inyu yé nyemede ni inyu bôt ba loñ bobasôna.+ 23 Ikété dilo disaambok di ngand, hiki kel, ñane litén a ga kôôbana Yéhôva bon ba balôm ba nyaga basaambok ba ba gwé bé lem yo ki yo, ni balôm ba mintômba basaambok ba ba gwé bé lem yo ki yo le ba ba bisesema bi ntul i hié;+ a ti ki nlôm kembee* le a ba sesema inyu béba. 24 A ga kôôba ki éfa yada inyu hiki man nlôm nyaga, ni éfa yada inyu hiki nlôm ntômba le bi ba likébla li bijek; a ga kôôba ki hin* môô yada inyu hiki éfa.

25 “‘I hilo hi nyônôs 15 hi sôñ i nyônôs isaambok, inyu dilo disaambok, bôt ba ga tégbaha ngand,+ ñane litén a ga kôôba nlélém sesema inyu béba, nlélém sesema i ntul i hié, nlélém likébla li bijek ni minlélém mi môô.’”

46 “Lana nyen Nwet Bayemlikok le Yéhôva a nkal: ‘Lijubul li kotoo i kétékété, li li nun pes likôl,+ li ga yégle nyibak+ mu dilo disamal bôt ba ga sal,+ ndi ba ga yibil jo i kel sabat ni i kel sôñ mondo.* 2 Ñane litén a ga lôl i kotoo i i yé i mbégdé, a jôp i libebe li lijubul,+ a telep bebee ni bitembee bi lijubul. Biprisi bi ga ti sesema yé i i ntul i hié ni bisesema gwé inyu kôp nsañ, a ga ôôp i kula nwemel i lijubul; i mbus, a pam. Ndi ba ga yip ndigi lijubul kôkôa. 3 I bisu bi lijubul li nyen bôt ba loñ ba ga ôôp i bisu bi Yéhôva i dilo di sabat ni i sôñ mondo.+

4 “‘Sesema i ntul i hié, i ñane litén a ga lona inyu ti Yéhôva i kel sabat, i ga ba bon ba mintômba basamal ba ba gwé bé lem yo ki yo, ni nlôm ntômba nu a gwé bé lem yo ki yo.+ 5 Likébla jé li bijek li ga ba hihéga hiada hi éfa* inyu nlôm ntômba, ndi inyu bon ba mintômba, a ga ti i yom a nla. Inyu hiki éfa, a ga kônde hin* môô yada.+ 6 I kel sôñ mondo, sesema i ga ba man nlôm nyaga mu bémba, nu a gwé bé lem yo ki yo, ni bon ba mintômba basamal, lôñni nlôm ntômba wada; bi ga bana bé lem yo ki yo.+ 7 A ga lona likébla li bijek, li ga ba hihéga hiada hi éfa inyu man nlôm nyaga, ni hihéga hiada hi éfa inyu nlôm ntômba; ndi inyu bon ba mintômba, a ga ti i yom a nla. Inyu hiki éfa, a ga kônde hin* môô yada.

8 “‘I ngéda ñane litén a njôp, a ga jubul i libebe li lijubul, a pémél ki i nlélém njel.+ 9 I ngéda bôt ba loñ ba ga lo i bisu bi Yéhôva i ngéda mangand,+ i bôt ba ga jubul i lijubul li nun pes ñombok+ inyu lo i bégés Nyambe, ba ga pémél i lijubul li nun pes nwelmbok;+ yak i bôt ba njubul i lijubul li nun pes nwelmbok ba ga pémél i lijubul li nun pes ñombok. To wada wap a timbil bañ i homa a njubul, ndi ba ga pémél i lijubul li yé bo i mbombom. 10 Yak ñane litén nu a yé ni bo a ga jôp i ngéda ba ga jôp, a pam ki i ngéda ba ga pam. 11 Mu mangand ni i ngéda mangand, likébla li bijek li ga ba hihéga hiada hi éfa inyu man nlôm nyaga, ni hihéga hiada hi éfa inyu nlôm ntômba; ndi inyu bon ba mintômba, a ga ti i yom a nla. Inyu hiki éfa, a ga kônde hin* môô yada.+

12 “‘Ibale ñane litén a nkôôba sesema i ntul i hié,+ tole bisesema inyu kôp nsañ kiki likébla ñem u ntinde nye i ti inyu Yéhôva, ba ga yible nye lijubul li li nun pes likôl, a ga kôôba ki sesema yé i ntul i hié, ni bisesema gwé inyu kôp nsañ kiki a yé a mboñ i kel sabat.+ I ngéda a mpam, ba ga yip lijubul.+

13 “‘Hiki kel, u ga yoñ man nlôm ntômba nu a ngi yii i nwii wé u bisu, a ban-ga bé lem yo ki yo, u kôôba nye le a ba sesema i ntul i hié inyu Yéhôva.+ U ga boñ hala hiki kegla. 14 Handugi hala, hiki kegla, u ga yoñ ki jôga jada li éfa ikété môga masamal, lôñni jôga jada li hin i môô ikété môga maa inyu nwes mo mu ngii flawa ilam; u kôôba i gwom bi le bi ba likébla li bijek ba nti Yéhôva ngéda yosôna. Hala a yé litéak li li ga nom mu tjai dinan tjodisôna. 15 Hiki kegla, ba ga kôôba man nlôm ntômba, ni likébla li bijek lôñni môô, le bi ba sesema i ntul i hié ngéda yosôna.’

16 “Lana nyen Nwet Bayemlikok le Yéhôva a nkal: ‘Ibale ñane litén a nti hiki man wé hisi le hi ba ngababum yé, wee i likébla li, li ga ba ngababum i bon bé. I hisi hi hion ba nkôhna kiki ngababum. 17 Ndi ibale a nti ngwélél wé wada likébla a nyôñôl mu ngababum yé, wee i likébla li, li ga ba ngababum i ngwélél wé letee ni i nwii bôt ba ga ba kunde.+ I mbus, ñane litén a ga témb a yoñ jo. Bon bé bôlôm botama bon ba ga tééda ngababum yap ngéda yosôna. 18 Ñane litén a ga yoñ bé yom yo ki yo mu ngababum i litén; a ga nyégsa bé bôt i nyodi mu nkoñ wap. Inyu ti bon bé ngababum, a ga yôñôl yo mu hisi hié nyemede inyu boñ le ba luhul bañ mut nye ki nye nu litén jem mu hisi hié.’”

19 I mbus, i mut nu a tagbana me i nwemel+ u bé ipañ lijubul li li nkena i bikumba bipubhaga* bi biprisi, gwon bi bé nun pes ñombok;+ ha nyen me bi tehe homa wada i mbus bikumba, a bééne i pes hiôñg. 20 A kal me le: “Hana homa nunu nyen biprisi bi ga nédél sesema inyu hô hihôha, ni sesema inyu béba; ha ki nyen ba ga bôm likébla li bijek,+ inyu boñ le ba pamna bañ yom yo ki yo nyoo i kotoo i i yé i mbégdé, le ba yilha bañ to bôt ba litén bapubhaga i nya i kôli bé.”*+

21 A bi pamna me i kotoo i i yé i mbédgé, a tagbana me mu makas momasôna ma kotoo, ha nyen me bi tehe le hiki likas li kotoo i i yé i mbédgé, li gwé man kotoo. 22 Ikété bikotoo bititigi bi bi bé mu makas mo ma-na ma kotoo i i yé i mbégdé, hiki yada mu i bé ap 40 ma dikéñéé di moo,* pôk yé i bak 30 ma dikéñéé di moo. I bikotoo bititigi bini gwo bina bi bééna minlélém mi dihéga.* 23 Minlôñ mi ngok mi bé mu mapañ momasôna ma bikotoo bititigi bini gwo bina, isi minlôñ mi ngok mi* nyen ba bi oñ bahoma inyu nédél makébla. 24 Ha nyen a bi kal me le: “Munu bahoma bana nyen bagwelnson ba témpel ba ga nédél bisesema bi litén.”+

47 I mbus, i mut nu a témbna me i lijubul li témpel,+ nyoo nyen me bi tehe malép ma nkuli, ma lôlak isi kula nwemel i témpel,+ i i bééne i pes likôl inyule bisu bi témpel bi bé nun pes likôl. Malép ma bé kuli, ma lôlak isi témpel, ma kulak i pes walôm i nwemel u témpel, ma tagbege juu li bisesema i pes nwelmbok.

2 I mbus, a pamna me, di tagbene i lijubul li li yé i pes ñombok,+ di kiiña i mbégdé, a kena me i lijubul li li nun pes likôl.+ Ha nyen me bi tehe malép ma nkuli i pes walôm.

3 I ngéda i mut nu a bi ke i pes likôl, a bak a gwé nkôô u hégél i woo;+ kiki a nhek 1 000 hi dikéñéé di moo,* a boñ le me lela malép: ma bé pam me i bikokoa bi makôô.

4 A hek ki 1 000 hi dikéñéé di moo dipe, a boñ le me lela malép: ma bé pam me i maboñ.

A hek ki 1 000 hi dikéñéé di moo dipe, a boñ le me lela malép: ma bé pam me i bôbôk.

5 A hek ki 1 000 hi dikéñéé di moo dipe, malép ma hôl, ma yila lom nkeñi kayéle me bé la bé yap nye ni makôô inyule lép u bé isi ngandak, i bé béda le mut a hok; mut a bé bé le a yap lom nkeñi ni makôô.

6 A bat me le: “A man mut, baa u ntehe i jam lini?”

Ha nyen a bi boñ le me lela malép, a témbna me i ngwañ lép. 7 I ngéda me bi témb nyoo i ngwañ, me tehe le bie bi yé ngandak ini pes i ngwañ lép ni ii pes ipe.+ 8 Ha nyen a bi kal me le: “I malép mana ma nkuli i pes mbok i yéne nyoo i pes likôl, ma sôhôk i Araba,*+ ma kenek letee ni i tuye. I ngéda ma ga sul tuye,+ ha nyen malép ma tuye m’a témb malam.* 9 Hiki homa i malép mana m’a* pam, yom yosôna i i niñ i ga la niñ mukété. Tjobi d’a ba ngandak kiyaga mu bahoma ba, inyule i malép mana m’a pam nyoo. Malép ma tuye m’a témb malam.* I homa nyensôna i malép ma m’a pam, hiki yom i ga niñ.

10 “Balop tjobi ba ga telbene i ngwañ, ibôdôl i En-Gédi+ letee ni i En-Églaim; mu ngwañ u nyen i homa ba mbémbél bipése a yéne. Tjobi d’a ba ngandak, nya ndi nya, kiki tjobi di Tuye Nkeñi.*+

11 “Ndi bahoma ba gwé ndobo ni bahoma ba gwé jambô* b’a témb bé balam. B’a yégle ndigi bas ni bas.+

12 “Mintén mi bie nwominsôna mi mi num matam ngandak, mi ga o ini pes i ngwañ lép ni ii. Tjai tjap di ga yuyi bé; bie bi ga num matam ngéda yosôna. Hiki sôñ, bi ga ti matam ma mondo, inyule i malép ma nlôl i témpel mon ma nyôôs gwo.+ Matam map m’a jéba, yak tjai tjap di gwéélana inyu matibla.”+

13 Lana nyen Nwet Bayemlikok le Yéhôva a nkal: “I nkoñ unu won ni ga kébha 12 matén ma Israel kiki ngababum yap, Yôsep a’ kôhna ngaba iba mu.+ 14 N’a kôdôl wo, ni kôhna ki nlélém ngaba.* Me bi kumul basôgôlsôgôl banan+ soñ le m’a ti bo i loñ ini; nano, i loñ ini yon i ntina bé* kiki ngababum.

15 Nwaa loñ i pes ñombok, wo unu: u mbôdle i Tuye Nkeñi, u noñok njel i nke i Hétlôn+ letee ni i Zédad,+ 16 u tagbege i Hamat,+ ni i Bérôta,+ ni i Sibraim, nu a yé ipôla nkoñ u Damaskô ni nkoñ u Hamat, u kenek letee ni i Hazer-Hatikôn, nu a yé bebee ni nwaa nkoñ u Hauran.+ 17 Jon nwaa u ga bôdle i tuye, u kenek letee ni i Hazar-Énan,+ u tagbege i nwaa nkoñ u Damaskô, i pes ñombok; u kenek letee ni i nkoñ u Hamat.+ Nwaa loñ i pes ñombok u.

18 “Nwaa loñ i pes likôl u ga tagbe ipôla Hauran ni Damaskô, u tagbege i Yordan, ipôla Giléad+ ni loñ Israel. Ni ga hek loñ ibôdôl i nwaa u yé i pes ñombok letee ni i tuye nu a yé i pes likôl.* Nwaa loñ i pes likôl u.

19 “Nwaa loñ i pes nwelmbok* u ga bôdle i Tamar, u kenek letee ni i malép ma Méribat-Kades,+ u tagbege i Nsôsôgô* letee ni i Tuye Nkeñi.+ Nwaa loñ i pes nwelmbok u.*

20 “Tuye Nkeñi nyen a yéne i pes hiôñg, nwaa loñ i pes hiôñg u ga bôdle i nwaa nkoñ u yéne i pes nwelmbok, u kenek letee ni i homa nu a yéne i mbombom Lébô-Hamat.*+ Nwaa loñ i pes hiôñg u.”

21 “N’a kabna loñ, bé 12 matén ma Israel. 22 N’a kabna yo kiki ngababum, bé ni bakén ba bôt ba ba nyén ni bé, ba ba bi gwal bon i ngéda ba bé niñ i bééni. Inyu nan, ba ga ba kiki bon ba Israel bomede. Yak bo ba ga kôhna ngababum kiki bé mu matén ma Israel. 23 N’a ti nkén mut ngababum mu nkoñ u litén a yiine,” hala nyen Nwet Bayemlikok le Yéhôva a mpot.

48 “I ngaba ’isi ini yon matén ma bi kôhna, hiki litén ni jôl jé, ibôdôl i lisuk li loñ li li yé nyoo i ñombok: ngaba ’isi i Dan+ i nke i Hétlôn letee ni i Lébô-Hamat,*+ i nke ki i Hazar-Énan, i tagbege mu nwaa nkoñ u Damaskô i pes ñombok, i pamak bebee ni Hamat;+ nkoñ wé u mbôdle i nwaa loñ u yé i pes likôl, u kenek letee ni i nwaa loñ u yé i pes hiôñg. 2 Ngaba ’isi+ i Aser i yé i nwaa nkoñ u Dan, nkoñ wé u mbôdle i nwaa loñ u yé i pes likôl, u kenek letee ni i nwaa loñ u yé i pes hiôñg. 3 Ngaba ’isi i Naftali+ i yé i nwaa nkoñ u Aser, nkoñ wé u mbôdle i nwaa loñ u yé i pes likôl, u kenek letee ni i nwaa loñ u yé i pes hiôñg. 4 Ngaba ’isi i Manasé+ i yé i nwaa nkoñ u Naftali, nkoñ wé u mbôdle i nwaa loñ u yé i pes likôl, u kenek letee ni i nwaa loñ u yé i pes hiôñg. 5 Ngaba ’isi i Éfraim i yé i nwaa nkoñ u Manasé,+ nkoñ wé u mbôdle i nwaa loñ u yé i pes likôl, u kenek letee ni i nwaa loñ u yé i pes hiôñg. 6 Ngaba ’isi i Ruben i yé i nwaa nkoñ u Éfraim,+ nkoñ wé u mbôdle i nwaa loñ u yé i pes likôl, u kenek letee ni i nwaa loñ u yé i pes hiôñg. 7 Ngaba ’isi i Yuda i yé i nwaa nkoñ u Ruben,+ nkoñ wé u mbôdle i nwaa loñ u yé i pes likôl, u kenek letee ni i nwaa loñ u yé i pes hiôñg. 8 I ngaba ’isi* ni ga tééda inyu nson u tôbôtôbô i ga ba i nwaa nkoñ u Yuda, i ga bôdle i nwaa loñ u yé i pes likôl, i kenek letee ni i nwaa loñ u yé i pes hiôñg, pôk yé i ga ba 25 000 dikéñéé di moo,*+ i abak kiki ngaba ’isi i mana matén mape ma yé nwaa ni wo, ibôdôl i nwaa loñ i pes likôl letee ni i nwaa loñ i pes hiôñg. I ñemkété ngaba ’isi i nyen témpel i ga bane.

9 “I ngaba ’isi* ni ga tééda inyu Yéhôva i ga ap 25 000 dikéñéé di moo, pôk yé i bak 10 000 di dikéñéé di moo. 10 I nkoñ u won u ga ba ngaba pubhaga* inyu biprisi.+ Ngaba pubhaga i ga ap 25 000 dikéñéé di moo i pes ñombok, pôk yé i bak 10 000 di dikéñéé di moo i pes hiôñg, pôk yé i bak ki 10 000 di dikéñéé di moo i pes likôl, i abak ki 25 000 dikéñéé di moo i pes nwelmbok. I ñemkété nkoñ u nyen témpel Yéhôva i ga bane. 11 I ngaba ’isi ini i ga ba inyu biprisi bi bi ntééba bipubhaga, bi bi yé mu mbôda Zadok,+ bo ki bon ba bi yônôs minson ba bé lama gwélél me, ba waa bé to boñ loñge i ngéda bon ba Israel ni Lôk Lévi ba bi waa boñ loñge.+ 12 Ba ga bana ngaba ’isi mu ngaba ’isi i* bi yôña mu loñ le i ba yom i nlôôha pubhaga. Ngaba yap i ga ba i nwaa ni Lôk Lévi.

13 “Ha yaga i nwaa nkoñ u biprisi nyen Lôk Lévi i ga bana ngaba ’isi, i ga ap 25 000 dikéñéé di moo, pôk yé i bak 10 000 di dikéñéé di moo. (Bibôñgô gwé gwobisôna bi ga ba 25 000 dikéñéé di moo, pôk yé i bak 10 000 di dikéñéé di moo.) 14 Mu ngaba ’isi i, i i nlôôha ilam, ba nlama bé nuñul to hikét hisi mu, to héñha hio ni yom ipe, to ti hio mut numpe, inyule hi yé yom ipubhaga inyu Yéhôva.

15 “I nkoñ u nyégle, u ga ap 5 000 di dikéñéé di moo, pôk yé i bak 25 000 dikéñéé di moo, u ga gwéélana inyu bibôlô bipe bi tison,+ nyoo nyen mandap ma ga bane ni bahoma bilém bi njél. I ñemkété nkoñ u nyen tison i ga bane.+ 16 Dihéga di tison dini: nwaa wé i pes ñombok u ga ap 4 500 dikéñéé di moo, nwaa wé i pes nwelmbok u abak 4 500 dikéñéé di moo, nwaa wé i pes likôl u abak 4 500 dikéñéé di moo, yak nwaa wé i pes hiôñg u abak 4 500 dikéñéé di moo. 17 I pes ñombok, pôk i bahoma bilém bi njél i ga ba 250 dikéñéé di moo; i pes nwelmbok, pôk yap i bak 250 dikéñéé di moo; i pes likôl, pôk yap i bak 250 dikéñéé di moo; yak i pes hiôñg, pôk yap i bak 250 dikéñéé di moo.

18 “I nkoñ u nyégle, u ga ap nlélém kiki ngaba ’isi i i yé ngaba pubhaga,*+ u ga bana hisi hiada i pes likôl hi hi ñap 10 000 di dikéñéé di moo, u ban-ga ki hisi hipe i pes hiôñg hi hi ñap 10 000 di dikéñéé di moo. I nkoñ u nyégle u ga ap nlélém kiki ngaba pubhaga.* I bijek ba ga bumbul mu disi di tjodiba, bi ga ba inyu bôt ba nsal mu tison. 19 I bôt ba nsal mu tison bon ba ga sal mu disi di, ba lôlak mu matén ma Israel momasôna.+

20 “I ngaba ’isi i yosôna* i ñap 25 000 dikéñéé di moo i bipes gwé gwo bina. Ni ga tééda yo ni disi di di yé inyu tison, le bi ba ngaba pubhaga.*

21 “I ngaba ’isi i nyégle mu bipes gwo biba bi ngaba pubhaga* ni mu bipes gwo biba bi disi di di yé inyu tison, i ga ba inyu ñane litén.+ I ngaba ini i ga ba ipañ minwaa mi ngaba pubhaga,* mi mi yéne i pes likôl ni i pes hiôñg, mi abak 25 000 dikéñéé di moo. I ngaba ini i ga ap nlélém kiki ngaba ’isi i mana matén mape ma yé nwaa ni yo, yon i ga ba inyu ñane litén. I ñemkété i ngaba ini nyen ngaba pubhaga* ni homa mpubhaga nu témpel bi ga bane.

22 “Ngaba ’isi i Lôk Lévi ni disi di di yé inyu tison, gwobisôna bi ga ba ñemkété ngaba ’isi i ñane litén. Ngaba ’isi i ñane litén i ga ba ipôla nwaa nkoñ u Yuda+ ni nwaa nkoñ u Benyamin.

23 “Inyu mana matén ma ma ngi yii, ngaba ’isi i Benyamin i mbôdle i nwaa loñ u yé i pes likôl, i kenek letee ni i nwaa loñ u yé i pes hiôñg.+ 24 Ngaba ’isi i Siméôn i yé i nwaa nkoñ u Benyamin,+ nkoñ wé u mbôdle i nwaa loñ u yé i pes likôl, u kenek letee ni i nwaa loñ u yé i pes hiôñg. 25 Ngaba ’isi i Isakar+ i yé i nwaa nkoñ u Siméôn, nkoñ wé u mbôdle i nwaa loñ u yé i pes likôl, u kenek letee ni i nwaa loñ u yé i pes hiôñg. 26 Ngaba ’isi i Zébulôn, i yé i nwaa nkoñ u Isakar,+ nkoñ wé u mbôdle i nwaa loñ u yé i pes likôl, u kenek letee ni i nwaa loñ u yé i pes hiôñg.+ 27 Ngaba ’isi i Gad, i yé i nwaa nkoñ u Zébulôn,+ nkoñ wé u mbôdle i nwaa loñ u yé i pes likôl, u kenek letee ni i nwaa loñ u yé i pes hiôñg. 28 Nwaa loñ i pes nwelmbok, u u yé i nwaa nkoñ u Gad, u mbôdle i Tamar+ letee ni i malép ma Méribat-Kades,+ u ntagbene mu Nsôsôgô,*+ u kenek letee ni i Tuye Nkeñi.*

29 “I loñ i yon ni ga kébha matén ma Israel kiki ngababum,+ i disi di tjon* ba ga kôhna,”+ hala nyen Nwet Bayemlikok le Yéhôva a mpot.

30 “Mapémél ma tison mana: nwaa u tison i pes ñombok u ga ap 4 500 dikéñéé di moo.+

31 “Manwemel ma ga séblana ni môl ma matén ma Israel. I pes ñombok, manwemel ma ga ba maa: nwemel wada inyu Ruben, nwemel wada inyu Yuda, ni nwemel wada inyu Lévi.

32 “Nwaa u tison i pes likôl u ga ap 4 500 dikéñéé di moo, u ga bana manwemel maa: nwemel wada inyu Yôsep, nwemel wada inyu Benyamin, ni nwemel wada inyu Dan.

33 “Nwaa u tison i pes nwelmbok u ga ap 4 500 dikéñéé di moo, u ga bana manwemel maa: nwemel wada inyu Siméôn, nwemel wada inyu Isakar, ni nwemel wada inyu Zébulôn.

34 “Nwaa u tison i pes hiôñg u ga ap 4 500 dikéñéé di moo, u ga bana manwemel maa: nwemel wada inyu Gad, nwemel wada inyu Aser, ni nwemel wada inyu Naftali.

35 “Lipénd li tison jolisôna li ga ap 18 000 dikéñéé di moo. Ibôdôl i kel i, ba ga sébél i tison i le: ‘Yéhôva a yé ha.’”+