ÉSRA

1 I nwii bisu u ane i kiñe Persia le Kirus,+ Yéhôva a bi tinde nye* le a legel nwin ikété nkoñ wonsôna a bé ane, inyu boñ le bibañga Yéhôva a bi kal Yérémia+ bi yon. Ba bi tila+ yak i nlegla u, won u bé le:

2 “Lana nyen Kirus, kiñe Persia, a nkal: ‘Yéhôva, Nyambe nu ngii a mal ti me biane gwobisôna bi nkoñ ’isi,+ a kal ki me le me ôñôl nye ndap i Yérusalem,+ yon i yé i Yuda. 3 Tonjee ikété nan mu litén jé nu a ngwélél nye, Nyambe wé a ba ni nye, a bet i Yérusalem, nu a yé i Yuda, inyu tiimba oñ ndap Yéhôva, Nyambe nu Israel, hala wee bañga Nyambe, nyen ndap yé i bé i Yérusalem.* 4 Tonjee a yé nkén mut,+ to hee homa a yé, bôt bé ba libôk* ba hôla nye ni silba, ni gôl, ni nkus, ni bilém, yak ni makébla miñem mi ntinde bo i ti inyu ndap i bañga Nyambe,+ i i bé i Yérusalem.’”

5 Ha nyen baéga ba mandap ma bikôkôa ma Yuda ni ma Benyamin, ni biprisi, ni Lôk Lévi, hala wee i bôt bobasôna mbuu u bañga Nyambe u bi tinde i bet i Yérusalem, ba bi kôôba i bet inyu tiimba oñ ndap Yéhôva, i i bé i Yérusalem. 6 I bôt bobasôna ba bé yééne ipañ yap ba bi hôla bo* ni gwom bi silba ni bi gôl, ni nkus, ni bilém, yak ni tik gwom ipe, handugi makébla bôt ba bi ti ni ñem wap wonsôna.

7 Kiñe Kirus a pémés ki gwom bi ndap Yéhôva, bi Nébukadnézar a bi yoñ i Yérusalem, a* ha mu ndap nyambe+ wé. 8 Kiñe Persia le Kirus a bat Mitrédat, ntééda nkus, le a lona i gwom bi, ni le a soñgle gwo ñane nkoñ u Yuda le Sesbazar.*+

9 Nsoñgi u gwom unu: 30 ma biséya bi gôl, 1 000 hi biséya bi silba, 29 biséya bipe, 10 30 ma bon ba biséya bi gôl, 410 bon ba biséya bi silba, ni 1 000 hi gwom bipe. 11 Gwom bi gôl ni bi silba gwobisôna bi bé 5 400. Sesbazar a bi bedna i gwom bini gwobisôna, i ngéda i bôt ba bé i minkôm+ i Babilôn ba bé nyodi inyu ke i Yérusalem.

2 I bôt bana bon ba bé bôt ba pes mbok,* ba ba bi lôl i minkôm, bon kiñe Babilôn le Nébukadnézar a bi kena i minkôm+ i Babilôn;+ ndi i mbus ngéda, ba témb i Yérusalem ni i Yuda, hiki mut i tison+ yé, 2 i bôt bana bon ba bi lo lôñni Sôrôbabel:+ Yésua,+ Néhémia, Séraya, Rélaya, Mordékai, Bilsan, Mispar, Bigvai, Réhum ni Baana.

Nsoñgi u bon bôlôm ba Lôk Israel+ unu: 3 bon ba Parôs: 2 172; 4 bon ba Séfatia: 372; 5 bon ba Ara:+ 775; 6 bon ba Pahat-Môab,+ mu mahaa ma Yésua ni ma Yôab: 2 812; 7 bon ba Élam:+ 1 254; 8 bon ba Zatu:+ 945; 9 bon ba Zakai: 760; 10 bon ba Bani: 642; 11 bon ba Bébai: 623; 12 bon ba Azgad: 1 222; 13 bon ba Adônikam: 666; 14 bon ba Bigvai: 2 056; 15 bon ba Adin: 454; 16 bon ba Ater, mu lihaa li Hézékia: 98; 17 bon ba Bézai: 323; 18 bon ba Yôra: 112; 19 bon ba Hasum:+ 223; 20 bon ba Gibar: 95; 21 bon ba Bétléhém 123; 22 bôt ba Nétôfa: 56; 23 bôt ba Anatôt:+ 128; 24 bon ba Azmavet: 42; 25 bon ba Kiriat-Yéarim, bon ba Kéfira ni bon ba Béérôt: 743; 26 bon ba Rama+ ni ba Géba:+ 621; 27 bôt ba Mikmas: 122; 28 bôt ba Bétel ni ba Ai:+ 223; 29 bon ba Nébô:+ 52; 30 bon ba Magbis: 156; 31 bon ba Élam numpe: 1 254; 32 bon ba Harim: 320; 33 bon ba Lôd, bon ba Hadid ni bon ba Ônô: 725; 34 bon ba Yérikô: 345; 35 bon ba Sénaa: 3 630.

36 Nsoñgi u biprisi+ unu: bon ba Yédaya,+ mu lihaa li Yésua:+ 973; 37 bon ba Imer:+ 1 052; 38 bon ba Pasur:+ 1 247; 39 bon ba Harim:+ 1 017.

40 Nsoñgi u Lôk Lévi+ unu: bon ba Yésua ni bon ba Kadmiel,+ mu lihaa li Hôdavia: 74. 41 Nsoñgi u batôp tjémbi+ unu: bon ba Asaf:+ 128. 42 Nsoñgi u batat nwemel+ unu: bon ba Salum, bon ba Ater, bon ba Talmôn,+ bon ba Akub,+ bon ba Hatita ni bon ba Sôbai, bobasôna ba bé 139.

43 Basal i témpel*+ bana: bon ba Ziha, bon ba Hasufa, bon ba Tabaôt, 44 bon ba Kérôs, bon ba Siaha, bon ba Padôn, 45 bon ba Lébana, bon ba Hagaba, bon ba Akub, 46 bon ba Hagab, bon ba Salmai, bon ba Hanan, 47 bon ba Gidel, bon ba Gahar, bon ba Réaya, 48 bon ba Rézin, bon ba Nékôda, bon ba Gazam, 49 bon ba Uza, bon ba Paséa, bon ba Bésai, 50 bon ba Asna, bon ba Méunim, bon ba Néfisim, 51 bon ba Bakbuk, bon ba Hakufa, bon ba Harur, 52 bon ba Bazlut, bon ba Méhida, bon ba Harsa, 53 bon ba Barkos, bon ba Siséra, bon ba Téma, 54 bon ba Nézia, bon ba Hatifa.

55 Bon ba bagwélél ba Salômô bana: bon ba Sôtai, bon ba Sôféret, bon ba Péruda,+ 56 bon ba Yaala, bon ba Darkon, bon ba Gidel, 57 bon ba Séfatia, bon ba Hatil, bon ba Pôkéret-Hazébaim, bon ba Ami.

58 Nsoñgi u basal i témpel* ni u bagwélél ba Salômô bobasôna u bé 392.

59 I bôt ba bi lôl i Tel-Méla, i Tel-Harsa, i Kérub, i Adôn, ni i Imer, ndi ba la bé unda le basañ bap* ba bé bon ba Israel, ba la bé to unda le bomede ba yé toi bon ba Israel,+ bon nsoñgi wap unu: 60 bon ba Délaya, bon ba Tôbia, bon ba Nékoda: 652. 61 Mu bon ba biprisi: bon ba Habaya, bon ba Hakôs,+ bon ba Barzilai, nu a bi bii ngond yada mu bingond bi man Lôk Giléad le Barzilai,+ ba ti ki nye jôl li lihaa li. 62 I bôt bana bon ba bi yéñ mahaa ma basañ bap ikété bikaat bi mahaa, ndi ba bi léba bé mo mu; jon ba bi ti bé bo kunde i gwel nson u biprisi.*+ 63 Ngomin i pes mbok* i bi kal bo le ba nlama bé je gwom bi nlôôha bipubhaga,+ letee ba bana prisi i i nla bat Nyambe mahoñol mé ni njel Urim ni Tumim.*+

64 Nsoñgi u bôt ba likoda jolisôna u bé 42 360,+ 65 handugi minkol mi bôlôm ni mi bôda, mi mi bé 7 337; yak nsoñgi u bôlôm ni u bôda ba ba bé batôp tjémbi u bé 200. 66 Bihosi gwap bi bé 736, minyabén nwap mi hosi* mi bak 245, 67 kamél yap i bé 435, yak magas map ma bak 6 720.

68 I ngéda ba bi pam i ndap Yéhôva i Yérusalem, baéga bahogi ba mandap ma bikôkôa ba bi boñ makébla+ inyu ndap i bañga Nyambe, le ba tiimba oñ* yo i het i bé ndugi.+ 69 Hiki wada a bi ti inoñnaga ni i yom a bééna; i makébla mana mon ba bi ti inyu bôlô: drakma* i gôl: 61 000; mina*+ i silba: 5 000; ni mimbôñgô mi mambot inyu biprisi: 100. 70 Biprisi, Lôk Lévi, bôt ba litén bahogi, batat nwemel, batôp tjémbi, basal i témpel* ni bana bôt bape ba litén bobasôna ba bi ke i yén i bitison gwap. Hala nyen bon ba Israel bobasôna ba bi yén i bitison+ gwap.

3 I ngéda sôñ i nyônôs isaambok+ i bi kola, bon ba Israel ba ma mal yén mu bitison gwap, ba kodba i Yérusalem wengoñle mut wada. 2 Man Yéhôsadak le Yésua,+ ni biprisi bi bé gwel nson lôñni nye, yak man Séaltiel+ le Sôrôbabel+ lôñni lôkisañ, ba bôdôl sal, ba oñ juu li bisesema li Nyambe nu Israel, inyu boñ le mu nyen ba lighene bisesema bi ntul i hié, kiki i yé ntilga ikété mbén Môsi,+ mut bañga Nyambe.

3 Ba tiimba téé juu li bisesema i homa li bé ngéda bisu, to hala kiki ba bé kon bôt ba biloñ bi bi bé kéña bo+ woñi; ba bôdôl ki lighene Yéhôva bisesema bi ntul i hié mu, bisesema bi kegla ni bi kôkôa.+ 4 Ha nyen ba bi tégbaha ngand Bilap,* kiki i bé ntilga+ i mbén Môsi, ba lighak libim li bisesema ba bé lama ligis hiki kel.+ 5 I mbus, ba ti bisesema bi ntul i hié hiki kel,+ yak bisesema inyu sôñ mondo,+ ni bisesema inyu mangand mapubhaga+ momasôna ma Yéhôva lôñni bisesema bi bôt bobasôna, ba ñem u bé tinde i ti Yéhôva likébla.+ 6 I hilo hi bisu hi sôñ i nyônôs isaambok+ nyen ba bi bôdôl ti Yéhôva bisesema bi ntul i hié, to hala kiki ba bé ngi tek hikuu hi témpel Yéhôva.

7 Ba bi ti bakôñg ngok+ ni baôô gwom+ moni, ba ti ki bôt ba Sidôn ni bôt ba Tir bijek, binyonyo ni môô, le ba yoñ bikék bi e sidar i Libañ, ba lona gwo i Yôpé,+ ba lôak i tuye. Kiñe Persia+ le Kirus nyen a bi ti bo kunde i boñ hala.

8 I nwii mi nyônôs ima, i mbus le ba bi lo i ndap i bañga Nyambe i Yérusalem, i sôñ i nyônôs iba nyen man Séaltiel le Sôrôbabel, yak man Yéhôsadak le Yésua, ni ini lôkisañ yap ipe, biprisi ni Lôk Lévi, lôñni ba bobasôna ba bi lôl i minkôm,+ ba ke i Yérusalem, ba bôdôl sal. Ba téé Lôk Lévi yosôna i i bééna 20 ma nwii tole iloo ha, le ba éga bôlô i ndap Yéhôva. 9 Jon mu lihaa li Yuda, Yésua ni bon bé lôñni lôkisañ, yak Kadmiel ni bon bé ba bi sal ntôñ inyu éga bôlô i ndap i bañga Nyambe. Yak i bôt bana ba bi hôla bo: bon ba Hénadad,+ ni bon bap, lôñni lôkisañ yap, i yak yo i bé Lôk Lévi.

10 I ngéda bôt ba maoñ ba bi mal tek hikuu hi témpel Yéhôva,+ ha nyen biprisi bi bi telep, bi bak bi hééba mambot map ma nson, bi ban-ga sép;+ yak Lôk Lévi, hala wee bon ba Asaf, ba telep ni bibende bi mamuna i moo inyu ti Yéhôva bibégés inoñnaga ni biniigana kiñe Israel+ le David a bi yék. 11 Ha nyen ba bi bôdôl tôp tjémbi, ba tinak Yéhôva bibégés ni mayéga, bana ba timbhege baa bape,+ ba tôbôk le: “Inyule Nyambe a yé loñge, yak loñge yé ñem* i nom i boga ni boga.”+ I mbus, bôt ba litén bobasôna ba bédés makiñ inyu bégés Yéhôva, inyule ba bi mal tek hikuu hi ndap Yéhôva. 12 Ngandak biprisi, Lôk Lévi ni baéga ba mandap ma bikôkôa, hala wee mimañ mi bôt mi mi bi tehe nlômbi ndap,+ ba bi ee makeñi i ngéda ba bi tehe kiki ba mal tek hikuu hi ndap; ndi i nlélém ngéda, bana bôt bape ba bé maséé ngandak, ba londok kiyaga.+ 13 Bôt ba bé bé le ba boñ maselna ipôla liyôgbe li maséé ni minlondok mi bôt ba ñee, inyule bôt ba bé lond ngandak kayéle liyôgbe li bé nôga yaga haa.

4 I ngéda baoo ba Yuda ni ba Benyamin+ ba bi nok le i bôt ba bi lôl i minkôm+ ba yé oñ témpel inyu Yéhôva, Nyambe nu Israel, 2 ha nyen ba bi pala ke yak Sôrôbabel ni yak baéga ba mandap ma bikôkôa, ba kal bo le: “Nwaha le di oñ témpel ni bé; inyule yak bés di mbégés* Nyambe+ nan, di nti ki nye bisesema ibôdôl i ngéda kiñe Asiria le Ésar-Hadôn,+ nu a bi lona bés hana,+ a bi bôdôl énél.” 3 Ndi Sôrôbabel, ni Yésua, lôñni bana baéga bape ba mandap ma bikôkôa ma Israel, ba timbhe bo le: “Di nla bé nwas bé le ni oñ ndap Nyambe+ wés lôñni bés. Bésbotama bon di ga oñ ndap inyu Yéhôva, Nyambe nu Israel. Kiñe Persia le Kirus nyen a bi ti bés oda le di boñ hala.”+

4 Jo ni jon hiki ngéda, i bôt ba bé kéña bôt ba Yuda ba bé yéñ le ba tômbôs bo, ba yéñék ki le ba kônha bo woñi, inyu boñ le maoñ ma telep.+ 5 Ba bi ti batipék ba kiñe moni inyu kwés nsoñgi+ u bon ba Yuda; hala nyen ba bé boñ ibôdôl i dilo tjodisôna di ane di kiñe Persia le Kirus, letee ni i dilo di ane di kiñe Persia le Darius.+ 6 I bibôdle bi ane i Ahasuérus, ba bi tila kaat soman. Mu kaat i, ba bé soman bôt ba Yuda, ni bôt ba Yérusalem. 7 Mu dilo di ane di kiñe Persia le Artaserses, Bislam, Mitrédat, Tabéel ni bôt ba bé sal ni nye, ba bi tilna Kiñe Artaserses kaat. Ba bi kobol yo ni hop Araméa,+ ba gwélél ki bibañga bi Araméa inyu tila yo.*

8 * Ñéga bôt ba ngomin wada le Réhum, yak ni mut matila le Simsai, ba bi tilna Kiñe Artaserses kaat, inyu soman bôt ba Yérusalem, ba kalak le: 9 (I bôt bana bon ba bi tila kaat: ñéga bôt ba ngomin le Réhum, mut matila le Simsai ni bôt ba bé sal ni nye, bakéés, bangomin ba bipes bi mbok, bôt ba matila, bôt ba Érek,+ bôt ba Babilôn, bôt ba Susan,+ hala wee bôt ba Élam,+ 10 ni bôt bape ba biloñ ba ba bi yégle, i bôt ba bon bañga mut le Isnapar a bi kena i minkôm, a boñ le bahogi mu ba yén mu bitison bi Samaria,+ bape ki ba yén ni bôt ba ba bé nyoo uu Ngwañ Lom.*) ndi nano, 11 i mam mana mon ba bi tila mu kaat ba bi ômle nye:

“A Kiñe Artaserses, bagwélél boñ bon ba ntilna we, bés ba di yé bôt ba uu Ngwañ Lom: nano 12 a kiñe, yi le i bôt ba Yuda ba bi nyodi i weeni, ba lo ba koba bés i Yérusalem, ba yé i tiimba oñ tison. Behee, i bôt ba tison i, ba bé bibéba bi bôt, ba ban-ga ño mbe, bon ba yé i mal oñ lipénd li tison,+ ba yé ki i tibil hikuu hi tison. 13 Nano ni, a kiñe, yi le ibale ba ntiimba oñ tison, ba mal ki lipénd jé, ki ba ga saa ha bé tas,+ to ntola, to nsul wo ki wo, ki ane i ga jubus ha bé ngandak moni. 14 Ndi kiki nsaa* wés u nlôl mu ndap kiñe, ni le i ta bé to loñge inyu yés le di tehe i nya ndutu i i nkwél kiñe, jon a kiñe, di ñômle we i kaat ini inyu yis we i mam ma, 15 inyu boñ le u yéñ mo mu kaat miñañ mi bosoñ.+ U ga léba mu le, i bôt ba tison i, ba gwé ño mbe, ba ntééñga yak bikiñe ni i bôt ba yé mu bipes bi mbok* bipe; mu nyen ba bi léba ki le ibôdôl behee, i bôt ba tison i, ba nkolba ngomin. Inyu hala nyen i tison i, i bi tjiba.+ 16 A kiñe, di nyis we le ibale ba ntiimba oñ tison, ba mal ki lipénd jé, u ga la ha bé énél* pes mbok i i yé nyoo uu Ngwañ Lom.”+

17 I ndimbhe ini yon kiñe i bi ômle ñéga bôt ba ngomin le Réhum, ni mut matila le Simsai lôñni bôt ba bé sal ni nye ba ba bé yééne i Samaria, ni bôt ba uu Ngwañ Lom:

“Me nyéga bé! Yina le, 18 i kaat ni bi ômle me, ba bi éñél* me yo loñge loñge. 19 Me bi ti oda, ba boñ minyiña, ba léba le ibôdôl behee, bôt ba tison ini ba bé ndogbene bikiñe hiki ngéda kayéle hala a lona yubda ni lisanda.+ 20 Yérusalem a bééna mimpémba mi bikiñe mi mi bé énél bôt ba uu Ngwañ Lom; i bôt ba bobasôna ba bé lama saa i bikiñe bi, tas, ntola ni nsul. 21 Jon, tina i bôt bana oda le ba téé bôlô, inyu boñ le ba tiimba bañ oñ i tison ini, letee me ti bo kunde. 22 Ni jôha bañ, boña yaga mam momasôna me nkal bé, inyu boñ le kiñe i nimis bañ nseñ+ wé.”

23 I ngéda ba bi añ i kaat Kiñe Artaserses a bi om i bisu bi Réhum, ni i bisu bi mut matila le Simsai ni bôt ba bé sal ni nye, ha nyen ba bi pala ke i tehe Lôk Yuda i i bé i Yérusalem, inyu nyégsa bo le ba téé bôlô. 24 Ha ngéda i nyen bôlô maoñ ma ndap Nyambe, i i bé i Yérusalem, i bi telep; i bi telep letee ni i nwii mi nyônôs ima mi ane mi kiñe Persia+ le Darius.

5 I mbus, mpôdôl Hagai+ ni nlal Idô+ le mpôdôl Sakaria,+ ba bi pôdôs Lôk Yuda i i bé i Yuda ni i Yérusalem, ba kal bo i bipôdôl bini i jôl li Nyambe nu Israel, nu a bé ni bo. 2 Hala nyen man Séaltiel le Sôrôbabel+ ni man Yéhôsadak le Yésua,+ ba bi témb ba bôdôl maoñ ma ndap Nyambe+ i i bé i Yérusalem; bapôdôl ba Nyambe ba bé ni bo, ba hôlga ki bo.+ 3 Ha ngéda i nyen ngomin i pes mbok i uu Ngwañ Lom* le Taténai, ni Sétar-Bôzenai, ni bôt ba bé sal lôñni bo ba lo, ba bat bo le: “Bonjee ba nti bé kunde i oñ ndap ini, ni i mélés i bôlô ini?”* 4 Ba bat ki bo le: “Tina bés môl ma bôt ba yé oñ i ndap ini.” 5 Ndi Nyambe a bé tat* mimañ mi Lôk Yuda,+ kayéle i bôt bana ba bi téé bé bôlô i Lôk Yuda letee kaat i pam yak Darius, ndi to le a ntilna bo ndimbhe yé.

6 Ngomin i pes mbok i uu Ngwañ Lom le Taténai, ni Sétar-Bôzenai, ni bôt ba bé sal lôñni nye, yak ni bangomin ba bipes bi mbok ba uu Ngwañ Lom, ba bi ômle Kiñe Darius i kaat ini, 7 inyu yis nye mam ma bi tagbe; ba bi tila le:

“Inyu Kiñe Darius:

“Nsañ u ba ni we! 8 A kiñe, di bi ke i pes mbok* i Yuda i ndap Nyambe nunkeñi. Ba yé i oñ yo ni basoso ba ngok, ba mal yak ha bikék mu mabap ma ndap. Bôlô i nke ni bisu inyule i bôt ba, ba nsal ni makénd. 9 Di bi pôdôs mimañ mi Lôk Yuda. Di bat bo le: ‘Bonjee ba nti bé kunde i oñ ndap ini, ni i mélés i bôlô ini?’+ 10 Di bi bat ki bo môl map, di tila mo, inyu boñ le u yi bonjee ba ñéga bôlô.

11 “Lana nyen ba bi timbhe bés: ‘Di yé bagwélél ba Nyambe nu ngii ni ’isi, di yé i tiimba oñ ndap i ba bi oñ hala a yé ngandak nwii len, i ndap i yon kiñe ikeñi yada i Israel i bi oñ letee i mal.+ 12 Botata bon ba bi unbaha Nyambe nu ngii,+ inyu hala nyen a bi ti bo i moo ma kiñe Babilôn le Nébukadnézar,+ mut Kaldéa, nu a bi bôk i ndap+ i, a kena ki bôt ba litén i minkôm i Babilôn.+ 13 Ndi i nwii bisu u ane i kiñe Babilôn le Kirus, Kiñe Kirus a bi ti kunde le ba tiimba oñ ndap Nyambe.+ 14 A pémés ki gwom bi gôl ni bi silba, bi Nebukadnézar a bi yoñ i ndap Nyambe i i bé i Yérusalem, a kena gwo i témpel Babilôn.+ Ba bi ti i mut ba bé sébél le Sesbazar*+ i gwom bi, nyen Kirus a bi téé ngomin i pes mbok yada.+ 15 Kirus a kal nye le: “Yoñ i gwom bini. Kena gwo i témpel i i yé i Yérusalem, ni nwas ki le ba tiimba oñ ndap Nyambe i het i bé ndugi.”+ 16 I mbus hala, Sesbazar a bi lo, a tek hikuu hi ndap Nyambe+ i i yé i Yérusalem. Ibôdôl ha ngéda i letee ni nano, ba ngi oñok ndap i, ndi i yé ngi mal.’+

17 “Jon, ibale hala a nene loñge i mis moñ, a kiñe, ba wan mu litéédana* li nkus li kiñe li li yé i Babilôn, inyu yi ibale Kiñe Kirus a bi ti toi kunde le ba tiimba oñ ndap Nyambe i i yé i Yérusalem;+ u yis ki bés makidik moñ mu jam li.”

6 Ha nyen Kiñe Darius a bi ti oda, ba yéñ mu bikaat bi miñañ,* i het ba bé téédana tik gwom i Babilôn. 2 Ba léba nhôôk kaat nyoo ikété yale i Ekbatana, i pes mbok* i Média; i mam mana mon ma bé tilga mu:

3 “I nwii u bisu u ane i Kiñe Kirus, Kiñe Kirus a bi ti oda inyu ndap Nyambe i i yé i Yérusalem+ le: ‘Ndap Nyambe i nlama tiimba ôña, kayéle i ba homa ba nti bisesema, ba tek yak hikuu hié. I nlama ap 60 ma dikéñéé di moo,* pôk yé ki i bak 60 ma dikéñéé di moo,+ 4 i ban-ga minlôñ maa mi basoso ba ngok nkééhaga, ni nlôñ u bikék wada nkééhaga;+ moni inyu saa i gwom bini mi nlama yôña i nkuu u makébla u kiñe.+ 5 Handugi hala, ba timbis gôl ni mabôndô ma silba ma ndap Nyambe, bi Nébukadnézar a bi yoñ i témpel i i bé i Yérusalem, a lona gwo i Babilôn,+ kayéle ba timbis hiki yom i homa wé nyoo i témpel Yérusalem, ba ha ki gwo i ndap Nyambe.’+

6 “Jon we, a Taténai, ngomin i uu Ngwañ Lom,* ni we a Sétar-Bôzenai, bé lôñni bôt ba nsal ni bé, yak ni bangomin bape ba uu Ngwañ Lom,+ nwaha i jam li. 7 Ni kéñ bañ maoñ ma ndap Nyambe ini. Ngomin i pes mbok i Lôk Yuda, ni mimañ mi Lôk Yuda ba ga tiimba oñ i ndap Nyambe ini i homa i bé behee. 8 Me nti ki oda inyu kal i jam ni nlama bôñôl mimañ mi Lôk Yuda, le ndi ba tiimba oñ ndap Nyambe: ba nlama yoñ moni mu litéédana* li nkus li kiñe,+ hala wee i moni ba nyôñôl mu tas ba nkot nyoo uu Ngwañ Lom, ba pala saa i bôt bana kayéle bôlô i telep bañ.+ 9 I gwom gwobisôna bi yé bo nseñ, hala wee: bon ba balôm ba nyaga,+ balôm ba mintômba,+ bon ba mintômba+ inyu bisesema bi ntul i hié inyu Nyambe nu ngii, blé,+ bas,+ wai,+ ni môô,+ inoñnaga ni i gwom biprisi bi bi yé i Yérusalem bi ga bat; ba kee ni bisu i ti bo gwo ngéda yosôna ibabé set, 10 inyu boñ le ba ti Nyambe nu ngii bisesema ngéda yosôna, ni le ba soohe inyu kiñe ni bon bé bôlôm+ le ba niñ ntandaa ngéda. 11 Me nti ki oda le ibale mut a ntjél nôgôl i mbén ini, ba nlama kogse nye inyu béba yé: ba ga nup mbiñ yada mu ndap yé, ba péni* nye mu, ba boñ ki le ndap yé i yila luk.* 12 Nyambe nu a bi boñ le jôl jé li ba nyoo i ndap yé,+ a kwés bikiñe gwobisôna ni biloñ gwobisôna bi bi mpa woo inyu kolba i mbén ini, ni i tjé ndap Nyambe i i yé i Yérusalem. Me Darius, men me nti i oda ini. Boña hala ngwéé ngwéé.”

13 Ha nyen Taténai, ngomin i pes mbok i uu Ngwañ Lom, ni Sétar-Bôzenai+ lôñni bôt ba nsal ni bo, ba bi pala boñ mam momasôna Kiñe Darius a bi kal. 14 Mbañ i mpôdôl Hagai+ ni i mpôdôl Sakaria,+ nlal Idô, i bi ti mimañ mi Lôk Yuda makénd le ba téñbe i oñ ndap, ni i kena bôlô ni bisu;+ ba bi mal maoñ inoñnaga ni oda Nyambe nu Israel+ a bi ti, yak ni oda i Kirus,+ i Darius,+ lôñni i kiñe Persia le Artaserses.+ 15 Ba bi mal oñ ndap Nyambe i hilo hi nyônôs aa hi sôñ Adar,* i nwii mi nyônôs minsamal mi ane i Kiñe Darius.

16 Ha nyen Lôk Israel, biprisi ni Lôk Lévi,+ ni bana bôt bape ba ba bi lôl i minkôm, ba bi tégbaha ngand mayibil* ma ndap Nyambe ini ni ngandak maséé. 17 Inyu mayibil ma ndap Nyambe, ba bi ti 100 balôm ba nyaga, 200 balôm ba mintômba, 400 bon ba mintômba, ba ti ki 12 balôm ba kembee kiki sesema inyu bibéba, 12 kiki nsoñgi u matén ma Israel.+ 18 Ba téé ki biprisi mu mintôñ nwap, ba kap yak Lôk Lévi mintôñ mintôñ, inyu gwel nson u Nyambe i Yérusalem,+ kiki i yé ntilga i kaat Môsi.+

19 I bôt ba bi lôl i minkôm ba bi tégbaha ngand Pasa i hilo hi nyônôs 14 hi sôñ bisu.+ 20 Biprisi gwobisôna ni Lôk Lévi yosôna ba bi pubhana,+ jon bobasôna ba bé bapubhaga. Inyu Pasa, ba bi nol bilém inyu bôt ba bi lôl i minkôm, inyu biprisi bipe ni inyu yap bomede. 21 Ha nyen i bon ba Israel ba bi lôl i minkôm ba bi je Pasa, lôñni i bôt bobasôna ba bi noñ bo, ba ba bi tjôô maboñok mabe ma matén ma ma bé yééne mu loñ, inyu bégés* Yéhôva, Nyambe nu Israel.+ 22 Ba bi yoñ ki dilo disaambok inyu tégbaha ngand Bret+ bi ngi-séñha, inyule Yéhôva a bi boñ le ba kon maséé, a boñ ki le kiñe Asiria i unda bo loñgeñem, kayéle a nit bo*+ le ba gwel nson i ndap bañga Nyambe, Nyambe nu Israel.

7 I mbus mam mana, i nwii mi ane mi kiñe Persia le Artaserses,+ Ésra*+ a témb. A bé man Séraya,+ man Azaria, man Hilkia,+ 2 man Salum, man Zadok, man Ahitub, 3 man Amaria, man Azaria,+ man Mérayôt, 4 man Zérahia, man Uzi, man Buki, 5 man Abisua, man Finéhas,+ man Éléazar,+ man Arôn,+ ñéga biprisi. 6 I Ésra nunu nyen a bi lôl i Babilôn. A bé mut matila,* a yik ki mbén Môsi+ loñge loñge,* i Yéhôva, Nyambe nu Israel a bi ti. Kiñe i bi ti nye mam momasôna a bi bat, inyule woo u Yéhôva Nyambe wé u bé ni nye.

7 I nwii mi nyônôs minsaambok mi ane i Kiñe Artaserses, Ésra ni bon ba Israel bahogi, biprisi, Lôk Lévi,+ batôp tjémbi,+ batat nwemel,+ ni basal i témpel*+ ba bet i Yérusalem. 8 Ésra a pam i Yérusalem i sôñ i nyônôs itan, i nwii mi nyônôs minsaambok mi ane i kiñe. 9 A bi nyodi i Babilôn i hilo hi bisu hi sôñ bisu, a pam i Yérusalem i hilo hi bisu hi sôñ i nyônôs itan, inyule woo u Nyambe wé nu konangoo u bé ni nye.+ 10 Ésra a bi kôôba ñem wé* i wan Mbén Yéhôva, i nôgôl yo,+ ni i niiga Israel+ matiñ ni matéak ma telepsép ma Mbén.

11 Ésra a bé prisi ni mut matila;* yak mambén ni matéak Yéhôva a bi ti Israel, a bé yi mo bañga liyik. Kiñe Artaserses a bi ti Ésra kaat, i bé ntilga mu le:

12 * “Me Artaserses,+ kiñe i bikiñe, me ntilna prisi le Ésra, mut matila nu Mbén Nyambe nu ngii: nsañ u ba ni we! Nano ni, 13 me nti i oda ini: i bôt bobasôna ba yé munu ane yem, ba ba yé bon ba Israel, yak biprisi ni Lôk Lévi, ba ban-ga ngôñ i ke lôñni we i Yérusalem, ba kenek.+ 14 Inyule me kiñe, ni batipék bem basaambok, di ñep we le u béñge too bôt ba Yuda ni bôt ba Yérusalem ba noñ Mbén Nyambe woñ, i u gwé.* 15 U ga kena silba ni gôl, bi me kiñe ni batipék bem, di nti ni ñem wés wonsôna inyu Nyambe nu Israel, nu liyééne jé li yé i Yérusalem. 16 U ga kena ki silba ni gôl yosôna u ga kôhna* mu pes mbok* Babilôn yosôna, lôñni makébla bôt ba litén ni biprisi ba nti ni ñem wap wonsôna inyu ndap Nyambe wap, i i yé i Yérusalem.+ 17 I mbus, u ga yoñ i makébla mana,* u pala somb balôm ba nyaga,+ balôm ba mintômba,+ bon ba mintômba;+ ba ga sem bo i nlélém ngéda ni makébla ma bijek+ lôñni makébla ma wai,+ ma u ga somb. U ga bii ki gwobisôna mu juu li bisesema li ndap Nyambe woñ, i i yé i Yérusalem.

18 “I silba ni gôl bi ga yégle, we ni lôkison ni nla gwélél gwo inyu boñ kii yosôna ni ntehe loñge, inoñnaga ni sômbôl i Nyambe nan. 19 I gwom gwobisôna ba ga ti we, bi bi ga gwéélana inyu nson u mbôña i ndap Nyambe, bii gwo i bisu bi Nyambe, i Yérusalem.+ 20 Ibale u nlama ti gwom bipe bi bi mbéda inyu ndap Nyambe woñ, u ga yoñ moni i litéédana* li nkus li kiñe+ inyu somb gwo.

21 “Me Kiñe Artaserses, me nti i oda ini inyu batééda nkus bobasôna ba uu Ngwañ Lom:* i gwom gwobisôna Ésra+ a ga bat bé, nu a yé prisi ni mut matila* nu Mbén Nyambe nu ngii, ni nlama hoo ti nye gwo, 22 to bi mpam 100 talént* i silba, 16 000 kilô* i blé, 100 dihéga* di wai,+ 100 dihéga di môô;+ ni ga ti ki nye bas+ ibabé hihéga. 23 I mam momasôna Nyambe nu ngii+ a nkal bé, ni boñ mo ni makénd, le ndi hiun hié hi kwél bañ ane i kiñe, to bon bé bôlôm.+ 24 Yina ki le mut to wada a nlama bé nyégsa biprisi to Lôk Lévi, to batôp tjémbi,+ to batat nwemel, to basal i témpel,*+ to bôt bape ba ba ngwel nson i ndap Nyambe i saa tas,+ to ntola, to nsul.

25 “Yak we, a Ésra, gwélél pék Nyambe woñ a nti we,* u téé biloya* ni bakéés inyu kéés bôt ba litén jolisôna ba ba yé i pes mbok i uu Ngwañ Lom, ba bobasôna ba nyi mambén ma Nyambe woñ; ni nlama ki niiga mo nu ni nu a nyi bé mo.+ 26 Ibale mut a nôgôl bé Mbén Nyambe woñ, to mbén i kiñe, ba nlama hoo kogse nye, tole ba ga nol nye, tole ba kena nye i minkôm, tole ba fane nye, tole ba ha nye i mok.”

27 Yéhôva, Nyambe nu basôgôlsôgôl bés a kôhna bibégés, nu a nha i ñem kiñe le a lémés ndap Yéhôva, i Yérusalem!+ 28 A bi unda le a ntéñbe i gwés me, hala kiki a bi tinde kiñe+ ni batipék+ bé lôñni mimpémba nwé mi baane, le ba unda me loñgeñem. Jon me bi bana ñem ngui,* inyule woo u Yéhôva Nyambe wem u bé ni me, me kot ki mbiñ bôt* i Israel le i bet ni me i Yérusalem.

8 Baéga ba mandap ma bikôkôa ni mahaa momasôna ma ma bé ntilga mu kaat lihaa, hala wee bôlôm ba ba bi ke ni me i Babilôn, i ngéda Kiñe Artaserses+ a bé ane, môl map mana: 2 mu bon ba Finéhas:+ Gersôm; mu bon ba Itamar:+ Daniel; mu bon ba David: Hatus. 3 Mu bon ba Sékania, ñ, mu bon ba Parôs: Sakaria, lôñni 150 bôlôm i i bi tila môl map mu kaat lihaa ni nye. 4 Mu bon ba Pahat-Môab:+ Éliéhô-Énai, man Zérahia, lôñni 200 bôlôm i i bé ni nye. 5 Mu bon ba Zatu:+ Sékania, man Yahaziel, lôñni 300 bôlôm i i bé ni nye. 6 Mu bon ba Adin:+ Ébed, man Yônatan, lôñni 50 ma bôlôm ma ma bé ni nye. 7 Mu bon ba Élam:+ Yésaya, man Atalia, lôñni 70 ma bôlôm ma ma bé ni nye. 8 Mu bon ba Séfatia:+ Zébadia, man Mikael, lôñni 80 ma bôlôm ma ma bé ni nye. 9 Mu bon ba Yôab: Ôbadia, man Yéhiel, lôñni 218 bôlôm i i bé ni nye. 10 Mu bon ba Bani: Sélômit, man Yôsifia, lôñni 160 bôlôm i i bé ni nye. 11 Mu bon ba Bébai:+ Sakaria, man Bébai, lôñni 28 bôlôm ma ma bé ni nye. 12 Mu bon ba Azgad:+ Yôhanan, man Hakatan, lôñni 110 bôlôm i i bé ni nye. 13 Mu bon ba Adônikam,+ bôlôm ba nsôk ba ba bi témb, môl map mana: Élifélet, Yéel, Sémaya, lôñni 60 ma bôlôm ma ma bé ni bo. 14 Mu bon ba Bigvai:+ Utai bo Zabud, lôñni 70 ma bôlôm ma ma bé ni bo.

15 Me bi kot bo ipañ lom nu a nsul Ahava,+ di yén ki nyoo dilo daa. Ndi i ngéda me bé béñge mukété bôt ba litén ni ikété biprisi, me bi léba bé man Lôk Lévi to wada. 16 Jon me bi sébél Éliézer, Ariel, Sémaya, Elnatan, Yarib, Elnatan, Natan, Sakaria ni Mésulam, ba ba bé mbiñ bôt; me sébél ki Yôyarib ni Elnatan, ba ba bé balét.* 17 I mbus, me ti bo oda le ba kee yak Idô, nu a bé ñane homa wada le Kasifia. Me kal bo le ba legel Idô ni lôkisañ, i i bé basal i témpel* ba ba bé i Kasifia, le ba lona bés bôt ba ba ga gwel nson mu ndap Nyambe wés. 18 Kiki woo u Nyambe wés nu konangoo u bé ni bés, ba bi lona bés mut pék nu jôl jé le Sérébia,+ a bé mu bon ba Mali,+ nlal Lévi, man Israel, a bi lo ni bon bé bôlôm lôñni lôkisañ, bobasôna ba bé 18 bôlôm. 19 Ba lona ki bés Hasabia ni Yésaya, mu bon ba Mérari;+ a bi lo ni lôkisañ lôñni bon bap, bobasôna ba bé 20 ma bôlôm. 20 Handugi hala, David ni baane ba bi ti 220 basal i témpel* le ba gwélél Lôk Lévi nson, bobasôna môl map ma bé ntilga mu kaat lihaa.

21 Ipañ lom ba nsébél le Ahava nyen me bi kal le bôt ba sôga je* inyu suhus bésbomede i bisu bi Nyambe wés, inyu bat nye le a éga bés mu liké jés, a tat bés, a tat yak bon bés lôñni nkus wés wonsôna. 22 Me bi wo nyuu i bat kiñe le a ti bés bisônda ni bakilhosi, inyu sôñ bés i moo ma baoo bés mu njel, inyule di bi kal kiñe le: “Woo u Nyambe wés nu konangoo u yé ni ba bobasôna ba nyéñ nye,+ ndi a ngwélél ngui yé ni hiun hié inyu kolba ba bobasôna ba ntjôô nye.”+ 23 Jon di bi sôga je,* di yemhe ki Nyambe wés le a éga bés mu liké jés; a bi emble minyemhe+ nwés.

24 I mbus, me pohol* 12 bôlôm mukété baane ba biprisi: Sérébia, ni Hasabia+ lôñni jôm li lôkisañ yap. 25 Ha nyen me bi hek silba, gôl ni gwom bipe, hala wee makébla kiñe, ni batipék bé, ni baane bé, ni bon ba Israel bobasôna ba ba bé ha, ba bi ti inyu ndap Nyambe+ wés; i mbus, me ti bo i gwom bi gwobisôna. 26 I gwom bini gwon me bi ti bo i ngéda me bi mal hek gwo: 650 talént* i silba; 100 gwom bi silba, bi bé yét talént iba; 100 talént i gôl; 27 ni 20 ma bon ba biséya bi gôl, ndamba yap i bak 1 000 hi darik;* lôñni gwom biba bi bañga mamuna, bi bak kôyôp, bi bayak, bi bak ki tik kiki gôl.

28 I mbus me kal bo le: “Ni yé bapubhaga inyu Yéhôva,+ yak i gwom bini bi yé bipubhaga; silba ni gôl bi yé likébla ñem u ntinde bôt i ti Yéhôva, nu a yé Nyambe nu basôgôlsôgôl banan. 29 Ni tééda gwo loñge letee ni i ngéda n’a hek gwo ikété bituñ* bi ndap Yéhôva, i bisu bi baane ba biprisi, Lôk Lévi, ni baéga ba mandap ma bikôkôa ma Israel nyoo i Yérusalem.”+ 30 Ha nyen biprisi ni Lôk Lévi ba bi yoñ silba, gôl ni i gwom ba bi ti bo i ngéda ba bi mal hek gwo, le ba kena gwo i Yérusalem, i ndap Nyambe wés.

31 Di bi sôk nyodi i lom Ahava+ i hilo hi nyônôs 12 hi sôñ bisu,+ inyu ke i Yérusalem. Woo u Nyambe wés u bé ni bés, a sôñ ki bés i moo ma baoo bés, ni i moo ma mintonba mi mi bé mu njel. 32 Hala nyen di bi pam i Yérusalem,+ di yén nyoo dilo daa. 33 I hilo hi nyônôs hina, di hek silba, gôl ni gwom bipe ikété ndap Nyambe+ wés; i mbus, di ti gwo Mérémôt,+ man prisi le Uriya; a bé lôñni man Finéhas le Éléazar, ba bé ki ni i Lôk Lévi ini le Yôzabad,+ man Yésua, lôñni Nôadia, man Binui.+ 34 Ba bi soñgol gwom gwobisôna, ba hek ki gwo; i mbus, ba tila ki ét yap ikété kaat. 35 I bôt ba bi lôl i minkôm ba ti Nyambe nu Israel bisesema bi ntul i hié: 12 balôm ba nyaga+ inyu Israel yosôna, 96 balôm ba mintômba,+ 77 bon balôm ba mintômba, ni 12 balôm ba kembee*+ kiki sesema inyu béba; i gwom bini gwobisôna bi bé sesema i ntul i hié inyu Yéhôva.+

36 I mbus, di yoñ mbén kiñe,+ di ti yo batééda nkoñ* ba kiñe, ni bangomin ba bipes bi mbok ba uu Ngwañ Lom;*+ yak bo ba hôla bôt ba litén, ba ti ki makébla inyu ndap i bañga Nyambe.+

9 Kiki i mam mana ma bi bôña, baane ba lo, ba kal me le: “Litén li Israel, biprisi ni Lôk Lévi ba mbagla bé ni bôt ba biloñ bipe, hala wee Lôk Kanaan, Lôk Hét, Lôk Péris, Lôk Yébus, Lôk Amôn, Lôk Môab, bôt ba Égiptô+ ni Lôk Amôr;+ ba mbagla bé ki to ni maboñok mabe+ ma biloñ bi. 2 Mu biloñ biloñ bini, bo ni bon bap bôlôm ba bi yoñ bingond bihogi i mabii.+ Nano ni, bôt ba litén lipubhaga*+ ba mpôdna ni bôt ba biloñ+ bipe. Baane ni bakot nkus bakeñi bon ba bak bôt ba bisu i boñ i béba ini.”

3 Ndik kiki me bi nok hala, me pat mbot yem ni mbôñgô wem mbot u u gwé bé binam, me nup ki tjôñ tjem di ño ni mayéé mem; me yén ’isi, i jam lini li tééñgaga me ngandak. 4 Me bé me ngi yii ’isi letee ni i ngéda ba nti likébla li bijek kôkôa,+ i jam lini li tééñgaga me, ha nyen i bôt ba bé diihe* bibañga bi Nyambe nu Israel, ba bi kodba ipañ yem, inyule béba i bôt ba bi lôl i minkôm i bé tééñga bo.

5 I ngéda me bi waa modop, me telep i ngéda ba bé ti likébla li bijek li kôkôa,+ mbot yem ni mbôñgô wem mbot u u gwé bé binam bi bé mpadak. Ha nyen me bi ôm maboñ ’isi, me pa moo i ngii yak Yéhôva Nyambe wem. 6 I mbus, me kal le: “Éé a Nyambe wem, me nwo nyuu, me nôgda bé to le me kôli pa su i bisu gwoñ; éé a Nyambe wem, mahôha més ma mbôl kayéle ma nloo bés ntel, yak maboñok més mabe ma mpam letee ni i ngii.+ 7 Ibôdôl i dilo di basôgôlsôgôl bés letee ni len, di bi lôôha boñ mam mabe.+ Inyu mahôha més nyen u bi ti bés, ni bikiñe gwés lôñni biprisi gwés, i moo ma bikiñe bi biloñ bipe. Ba bi nol bés ni pansoñ,+ ba kena bés i minkôm,+ ba kadal gwom gwés gwobisôna,+ ba wéha bés nyuu, kiki ba mboñ yak i len ini.+ 8 Ndi nano, éé a Yéhôva Nyambe wés, inyu ndék ngéda, u ñunda bés loñgeñem hala kiki u neebe le ndék bôt i i nlôl i minkôm i pei, u ti ki bés homa lisolbene* i homa woñ mpubhaga,+ inyu boñ le mis més ma bai, éé a Nyambe wés, we ki nyen u nti bés ngui, ki le di bé minkol. 9 To hala kiki di yé minkol,+ a Nyambe wés, u bi tjôô bé bés mu libak jés li minkol; ndi u bi unda le u ntéñbe i gwés bés, i ngéda u bi boñ le bikiñe bi Persia+ bi unda bés loñgeñem, le ndi di kôhna ngui, di tiimba oñ ndap Nyambe,+ di téé ki bahoma bé ba ba bi kwo, ni le di bana lisolbene* i Yuda ni i Yérusalem.

10 “Ndi nano ni, a Nyambe wés, kii di nla ni kal i mbus mam mana ma ntip tagbe? Inyule di ntjôô mambén moñ, 11 ma u bi ti bés ni njel bagwélél boñ le bapôdôl, u kalak le: ‘I loñ ni nke i yoñ, i yé loñ i i yé nyega inyule bôt ba biloñ bipe ba ba niñ mu ba mboñ mam ma nyega, ni inyule ba nyônôs loñ ni maboñok map mabe ma nyega,+ ibôdôl lini lisuk jada letee ni lii lisuk lipe. 12 Inyu hala nyen, ni ti bañ bon bôlôm+ bap bingond binan, ni neebe bañ to bingond gwap inyu bon bôlôm banan. Kekikel, ni hôla bañ bo i niñ ikété nsañ, to hôla bo le mam map ma kee loñge,+ le ndi ni bana ngui, ni je gwom bilam bi loñ, ni yoñ ki loñ le i ba inyu bon banan i boga ni boga.’ 13 I mam mana momasôna ma bi kwél bés inyule di bi boñ béba, ni inyule di bi lôôha boñ mam mabe, ndi to hala, éé a Nyambe wés, u bi kogse bé bés kiki i bé béda le u kogse bés inyu hihôha hiés,+ ndi u bi neebe le i bôt ba yé hana ba nyodi i minkôm, ba pei+ ki. 14 Ndi nano, baa di ga tiimba bôk mambén moñ, di biiba* ki ni bôt ba biloñ bipe ba ba mboñ i mam mabe+ mana? Baa hala a ga unbaha bé we le u tjé bés tjé yosôna, kayéle mut to wada a yégle bé, to pei mut a pei bé? 15 Éé a Yéhôva Nyambe, u téé sép+ inyule ndék bôt i i nlôl i minkôm i nyégle, i pei ki. Bés bana di téé i bisu gwoñ ni béba yés, inyule di kôli bé telep i bisu gwoñ+ i mbus mam mana ma ntip ntagbe.”

10 I ngéda Ésra a bé a ngi soohege,+ a pahlak bibéba bi litén jé, a eek, a ma ôm maboñ ’isi i bisu bi ndap i bañga Nyambe, limut li bôt likeñi li kodba ipañ yé: bôlôm, bôda ni boñge; litén jolisôna li bé ee ngandak. 2 Ha nyen Sékania, man Yéhiel,+ wada mu bon bôlôm ba Élam,+ a bi kal Ésra le: “Di bi nôgôl bé Nyambe wés, hala kiki di bi bii bakén ba bôda,* ba di bi yôñôl mu matén ma loñ+ ini. Ndi to hala, botñem i ngi yii inyu Israel. 3 Nano ni, di boñ malômbla ni Nyambe+ wés le di ga luhul i bôda ba bobasôna ni bon bap, inoñnaga ni oda i Yéhôva lôñni oda i ba bobasôna ba ndiihe* mbén Nyambe+ wés. Di boñ kiki mbén Môsi i nkal. 4 Telep, wen u nlama mélés i jam lini, yak bés di yé ni we. Bana ñem ngui, u jôp i bôlô.”

5 Ha nyen Ésra a bi telep, a boñ le baane ba biprisi, Lôk Lévi, ni bon ba Israel bobasôna ba kum soñ le ba ga boñ i yom i bi kéla.+ Hala ki nyen ba bi kum soñ. 6 I mbus, Ésra a nyodi i bisu bi ndap i bañga Nyambe, a ke i tuñ* i man Éliasib le Yéhôhanan. Ndi to hala kiki a bi ke nyoo, a bi je bé bijek, a nyo bé to malép, inyule a bé ee inyu ndok i bôt ba bi lôl i minkôm.+

7 Ba legel mu Yuda yosôna ni Yérusalem, le i bôt bobasôna ba bi lôl i minkôm ba kodba i Yérusalem; 8 ba legel ki le baane ni mimañ mi litén ba nyoñ makidik le ibale mut a nlo bé mu dilo daa di noñ, ba ga kadal* gwom gwé gwobisôna, ba héya ki nye mu ntôñ u Israel.*+ 9 Jon bôlôm ba Yuda ni ba Benyamin bobasôna ba bi kodba i Yérusalem mu dilo daa di. Hala a bé hilo hi nyônôs 20 hi sôñ i nyônôs 9. Bôt ba litén bobasôna ba bi yén i kotoo i ndap bañga Nyambe, ba sehlaga ngandak inyule i jam lini li bé ngui kiyaga, yak nop a nok ngandak.

10 I mbus, prisi le Ésra a telep, a kal bo le: “Ni bi nôgôl bé Nyambe nan inyule ni mbiiba ni bakén ba bôda,+ hala ki nyen ni nkéñbaha béba i Israel. 11 Nano ni, ni pahal bibéba binan i bisu bi Yéhôva, Nyambe nu basôgôlsôgôl banan, ni boñ ki sômbôl yé. Ni bagla ni matén ma loñ ini, ni bagla ki ni i bakén ba bôda+ bana.” 12 Ha nyen litén jolisôna li bi timbhe makeñi, li kal le: “Di nlama yaga boñ kiki u nkal. 13 Ndi di yé ngandak, yak ngéda nop ini. Di nla bé yén i mbégdé, yak i jam lini li ga yoñ ndik bé bés hilo hiada tole dilo diba, inyule di bi boñ béba ngandak munu jam lini. 14 Jon, soho, nwas le baane bés ba yén hana, ba sal i bôlô ini i jôl li litén jolisôna.+ I bôlôm bobasôna ba yé i bitison gwés, ba ba bi bii bakén ba bôda, hiki wada a loo hana i ngéda ba ga kal nye le a loo, nye ni mimañ mi litén lôñni bakéés ba hiki tison. Hala a ga boñ le Nyambe a unbene ha bañ bés inyu jam lini.”

15 Ndi Yônatan man Asahel bo Yazéya man Tikva ba bi tjél neebe makidik ma, yak i Lôk Lévi ini le Mésulam bo Sabétai,+ ba nit bo. 16 Ndi i bôt ba bi lôl i minkôm, ba bi yônôs mbônga wap; ha nyen prisi le Ésra, ni baéga ba mandap map ma bikôkôa, ba bobasôna môl map ma bé ntilga mu kaat lihaa, ba bi kodba botama ipañ inyu wan i jam li. Hala a bé i hilo hi bisu hi sôñ i nyônôs jôm. 17 Hala nyen i hilo hi bisu hi sôñ bisu, ba bi mal wan hop u bôlôm bobasôna ba ba bi bii bakén ba bôda. 18 Ba sôk léba le bahogi ikété bon ba biprisi ba bi bii bakén ba bôda.+ Bon bôlôm bahogi ba Yésua ba bi yoñ bakén ba bôda, yak lôkisañ i Yésua+ i bi boñ nlélém, môl map mana: Maaséya, Éliézer, Yarib ni Gédalia. 19 Ndi ba bi bôn* le ba ga luhul baa bap; kiki ba bi neebe le ba bi boñ béba, jon ba bi bôn le hiki wada wap a ga ti nlôm ntômba mu bémba yé kiki sesema inyu béba+ yap.

20 Mu bon ba Imer:+ Hanani ni Zébadia. 21 Mu bon ba Harim:+ Maaséya, Éliya, Sémaya, Yéhiel ni Ôsiya. 22 Mu bon ba Pasur:+ Éliôénai, Maaséya, Ismael, Nétanel, Yôzabad ni Éléasa. 23 Mu Lôk Lévi: Yôzabad, Siméi, Kélaya (hala wee Kélita), Pétaya, Yuda ni Éliézer. 24 Mu batôp tjémbi: Éliasib. Mu batat nwemel: Salum, Télem ni Uri.

25 Bon ba Israel bape bana: mu bon ba Parôs:+ Ramia, Izia, Malkiya, Miyamin, Éléazar, Malkiya ni Bénaya. 26 Mu bon ba Élam:+ Matania, Sakaria, Yéhiel,+ Abdi, Yérémôt ni Éliya. 27 Mu bon ba Zatu:+ Éliôénai, Éliasib, Matania, Yérémôt, Zabad ni Aziza. 28 Mu bon ba Bébai:+ Yéhôhanan, Hanania, Zabai ni Atlai. 29 Mu bon ba Bani: Mésulam, Maluk, Adaya, Yasub, Séal ni Yérémôt. 30 Mu bon ba Pahat-Môab:+ Adna, Kelal, Bénaya, Maaséya, Matania, Bézalél, Binui ni Manasé. 31 Mu bon ba Harim:+ Éliézer, Isiya, Malkiya,+ Sémaya, Siméôn, 32 Benyamin, Maluk ni Sémaria. 33 Mu bon ba Hasum:+ Matenai, Matata, Zabad, Élifélet, Yérémai, Manasé ni Siméi. 34 Mu bon ba Bani: Maadai, Amram, Uel, 35 Bénaya, Bédéya, Keluhi, 36 Vania, Mérémôt, Éliasib, 37 Matania, Matenai ni Yaasu. 38 Mu bon ba Binui: Siméi, 39 Sélémia, Natan, Adaya, 40 Maknadébai, Sasai, Sarai, 41 Azarel, Sélémia, Sémaria, 42 Salum, Amaria ni Yôsep. 43 Mu bon ba Nébô: Yéel, Matitiya, Zabad, Zébina, Yadai, Yôel ni Bénaya. 44 I bôt bana bobasôna bon ba bi bii bakén ba bôda,+ ndi i mbus ba luhul baa bap ni bon ba i bôda ba.+