The Hiémbi hi Salômô
Me ket mire yem ni binunumba gwem.+
Me je babi yem wéi ni wéi wem;
me nyo wai yem ni milik nwem.”+
“A mawanda di ngwés, jena!
Nyona, ni hiôô ki gwéha!”+
2 “Me yé i ke ’ilo, ndi ñem wem wo u yé péé.+
Me nok nugwéha wem a nkoode!
‘Yible me a mankéé nu muda, a nugwéha wem,
a hibeñ hiem, a we nu u gwé bé liton i nyuu!
Inyule manwee ma nyôôs ño wem,
matôi ma malép ma nyôôs tjôñ tjem juu.’+
3 Me bak me héya mbot yem.
Baa me témb me haba yo?
Me bak me jôwa makôô mem.
Baa me témb me hindis mo?
4 Nugwéha wem a nhéya woo wé i lipondo li likôga,
ñem wem u bôdôl bép ni ngui inyu yé.
5 Me bi telep inyu yible nugwéha wem;
moo mem ma bé toi* ni mire,
yak dinoo tjem di bé yoo môô ma mire,
munu bigwélél bi likôga.
6 Me bi yible nugwéha wem,
ndi me bi koba ha bé nugwéha wem, a bi ke, a yék me.
I ngéda a bi ke, me bi nôgda wengoñle me nwo nano.
Me bi yéñ nye, ndi me bi léba bé me nye.+
Me bi sébél nye, ndi a bi neebe bé me.
7 Batat ba ba bé kiiña i tison ba bi boma me.
Ba bép me, ba babaa yak me.
Batat ba ba bé ba téé i ngii mabap ba bi kadal me yañsi.
8 A bingond bi Yérusalem, me nkumha bé soñ le:
Ibale ni nkoba nugwéha wem,
kala nye le me nkon kon u gwéha.”
9 “Nugwéha woñ a nloo bana bôlôm bape ni kii,
a we nu u yé nlam iloo bôda bobasôna?
Nugwéha woñ a nloo bana bôlôm bape ni kii,
le ndi u bat bés le di kum soñ hala?”
10 “Nugwéha wem a yé nlam, a kôibak ki;
to a téé ikété jôm li dikôô, me nyi nye.
11 Ño wé u yé gôl, bañga gôl yaga.
Tjôñ tjé di yé kiki masee ma lién* le mbebi i ndéñgés,
di héndék kiki boboñ.
12 Mis mé ma yé kiki dibeñ di di yé bebee ni lép,
di nogbak ni milik,
di bak di téé bebee ni titimba i i yé nyonok ni malép.*
13 Mamañ mé ma yé kiki homa le ba mbel binunumba,+
hikuu i het ba mbel mbônji i i numb loñge.
Bibép gwé bi yé mbônji, bi toyok môô ma mire.+
14 Dinoo di moo mé di yé gôl, gwalak bi bak ni krisôlitô.
Nyuu yé i yé kiki mañ mi njok le ba nse, ba eñg ni safirô.
15 Makôô mé ma yé kiki mél ma ngok mpuma ma ma yé i ngii bitééne bi bañga gôl.
A yé nlam kiki Libañ, a yé nténdéé kiki bie bi sidar.+
A bingond bi Yérusalem, nugwéha wem nunu, nunu nyen me ngwés.”