11-17 MAYO, 2026
ÜLCANTUN 7 Jehová mu cüpai ñi nehuen
Maneluucüleaiñ Jehová mu, tati Doi Alüpüralelu
“Eimi müten tami Alüpüralen itrocom mapu mu, Jehová pingei tami üi” (SAL. 83:18).
¿CHEM QUIMAIÑ?
Chumngelu maneluhuafuiñ Jehová taiñ quelluaeteu chem huesaque dungu rume rupamequeliyiñ feula ca cüpalechi antü.
1. ¿Chem huesaque dungu mu rupai Job?
JOB rupai fentren huesaque dungu mu. Lai tañi pu yall, niehuetulai tañi pu culliñ ca tañi pu cüdaufe, fei ca huesa cutrani. Ñi rupan tüfa, fentren che respetahuelaeyu. Ca tañi 3 coilaque hueni tañi huesa pieteu, doi huesa duameleyu. Ca tañi domo afduamün mu feipieyu: “¡Malisiafinge ta Ngünechen ca lange!” (Job 2:9; 15:4, 5; 19:1-3). Femngechi rupan mu Job, maneluuhuelayafui Jehová ñi duamtuquefiel tañi pu che.
2, 3. 1) Rupan mu huesaque dungu, ¿chem ramtuhuafuiñ? 2) ¿Chem ngüneduamaiñ feitachi troquiñ mu?
2 Famülque mu, ‘mülei cüdaungechi dungu ca cuñihun-ngei ta mongen’ (2 Tim. 3:1). Job reque, rupayafuiñ fentren huesaque dungu meu. Fei fente taiñ huesa duamcülen, raquiduamafuiñ ñi felehueal taiñ mongen. Quiñe che afduamafui ca ramtuhuafui: “¿Duamtuniepeneu mai Jehová?”.
3 Eimi femngechi rupalmi, amulepe tami maneluucülen. Job quimtucui Jehová turpu quisucünuquelai tañi pu che. Ca femngechi iñchiñ maneluhuafuiñ Jehová taiñ rumel afcadinieaeteu. ¿Chem quelluafeiñmu? Feitachi troquiñ mu peaiñ 2 falin dungu taiñ quimeltueteu Job pingechi lifru. Hunelu mu, Jehová müten com ngüneniei. Ca epu, Jehová am com nehuen nielu adniefi ti dungu ñi femtripayal tañi feipicünuel ca eluqueiñmu com taiñ duamnieel taiñ cüme hueniyeafiel, femngechi cuñiutucuqueiñmu.
“SATANÁS CA CONPUI FEICHI TRAHUN MEU”
4. ¿Inei engün trahuluhui Jehová tañi adquiñ mu?
4 “Quiñe antü trahuluhuingün Chau Dios ñi pu fotüm Jehová tañi adquiñ meu, fei Satanás ca conpui feichi trahun meu” (Job 1:6). Tüfa tati hunen rupa üitungelu Satanás Biblia mu, femngechi feipingei tañi caiñetufiel ta Jehová. Feichi mu quiñe cüme püllüngehuelai, doi mai Jehová tañi caiñengetui. Ca caiñetufi tati pu cümeque püllü ca tati pu che serfiquefilu Jehová. Jehová quimfalcünui Huecüfü ñi coneltuhuenon tañi familia mu. Génesis feipilei ñi mülen quiñe “domo”, tüfa adentulei com pu cümeque püllü poyequefilu Jehová (Gén. 3:15). Huelu ti Huecüfü coneltulelai tüfa mu.
5. Feiti trahun mülelu huenu meu, ¿chem quimeltueiñmu ñi feipingeel?
5 Tañi feipingen feichi trahun mu Jehová elcünui Biblia mu taiñ quimeltuaeteu falinque dungu. Ñi feipin Satanás pengeli ñi fütra coilatufengen ca ñi üdequefiel tati norngechi che (Job 1:9; ca ngüneduamafuimi Apocalipsis 12:10). Cangelu dungu quimelqueiñmu taiñ tüngcüleal: Jehová femquei nor dungu müten tañi fütra nehuen mu. Ca quimeltueiñmu, Jehová cai Doi Alüpüralelu feipiafui chem ñi femnoafel caquelu.
JEHOVÁ ELUÑMALAFI HUECÜFÜ ÑI FEMAL COM DUNGU
6. ¿Chumngechi pengeli Jehová tañi adniefiel ti trahun huenu mu? (Job 1:7, 8).
6 (Papeltunge Job 1:7, 8). Feichi trahun mu Jehová adniefui ti dungu. Jehová quimniefui Satanás ñi cüpa huesalcafiel Job, feimu ramtufi: “¿Ngüneduamfimi am tañi poyequeteu Job?”. Feula peaiñ chumngechi Jehová quellufi Job tañi fütra nehuen mu.
7. Satanás, ¿chem feipi tati pu che mu serfiquefilu Jehová? (Job 1:10, 11).
7 (Papeltunge Job 1:10, 11). Jehová, tati Doi Alüpüralelu, com nehuen niei ñi femal chem rume tañi ayüqueel ca doi cüme quimniei ñi chumcünuafiel dungu (Jer. 32:17; Dan. 4:35). Huelu Huecüfü dalluntucufi Jehová ñi huesa pünequefiel tañi nehuen. Feipi Jehová ñi cümelcaquefiel Job ca caquelu pu che tañi serfiaeteu müten. Ca feipi tati pu che ñi serfiquefiel Dios re tañi cümelcayaeteu müten. ¿Chem femi Jehová?
8, 9. Jehová, ¿chem eluñmalafi ñi femal Huecüfü ca chemu? (Job 1:12; ca inaduamnge ti adentun).
8 (Papeltunge Job 1:12). Jehová eluñmafi Huecüfü ñi pengelal ñi rüfngepen mai tañi feipin Job mu. Huelu Jehová feipicünufi Huecüfü tañi allfülcanoafiel ta Job. Com pu cümeque püllü allcütulefuingün. Satanás mülefui tañi inayal ñi feipieteu Jehová, doi pepi amulcünulayafui, tañi eluñmaeteu Jehová müten. Fachantü ca femngechi felei. Jehová tañi fütra nehuen mu cuñiutucufi Job ca incafi quisu tañi üi.
9 Huecüfü eluulu rume ñi huesalcayafiel Job, Job turpu püntütripalai Jehová mu (Job 1:22). Huelu Huecüfü femcünuulai.
Jehová elufi Huecüfü ñi entual ñi dalluntucun pu cümeque püllü tañi adquiñ mu. (Inaduamnge parrafo 8, 9).
10. ¿Chemu Jehová eluñmafi Huecüfü ñi doi huesalcayafiel Job? (Job 2:2-6).
10 (Papeltunge Job 2:2-6). Huecüfü eluhui tañi doi huesalcayafiel Job tañi püntütripayal Jehová mu. Ca feipi Job tañi montulal tañi mongen püntütripayai Jehová mu. Jehová tañi pengelal ñi coilatumequen tati Huecüfü, eluñmafi tañi cutranelafiel Job. Huelu langümlayafimi pifi. Feimu Huecüfü mülefui ñi inayafiel müten tañi feipin Jehová. Femngechi Jehová ca quiñe rupa pengeli tañi doi alüpüralen. Huecüfü doi pepi amulcünulayafui tañi cüpa femün.
JEHOVÁ APÜMFI JOB ÑI CUTRANCAHUN
11. Job cutrancaufui, huelu Jehová ¿chumngechi cümelcatueyu? (Job 42:10-13).
11 (Papeltunge Job 42:10-13). Job deu pengelcünulu ñi turpu elcünunoafiel Jehová, fei Jehová catrütufi Huecüfü ñi huesalcahuenoafiel Job. Fei Jehová eluhui ñi cuñiutucuafiel ca ñi cümelcayafiel tañi cüme hueni Job. Fei Huecüfü pepi chumhuelafi rume Job.
12. Jehová, ¿chumngechi quellufi tañi pu che maneluulu fei meu?
12 Fachantü, Jehová montulquefi tañi pu che tañi fütra nehuen mu. Feichi 1945 tripantu Alemania mapu mu, 230 testigo mülequefulu campo de concentracion mu trecalen yengeingün rume camapu tañi lapual engün. Huelu mongetripaingün. Rupan antü mu, feipingün Jehová tañi montuleteu chumngechi ñi montulfiel tati 3 hebreo ti cofilechi horno mu. Tüfachi 3 hebreo fitrun nümülaingün rume. Ca femngechi feitachi pu testigo rupaingün quiñe fütra huesa dungu mu, huelu doi maneluhurpuingün Jehová mu. Jehová nehuentucueyu engün. Ngüneduamingün Jehová tañi montuleteu chumngechi ñi montulfiel Daniel ütrüftucungelu cheu ñi mülen pu leon. Mongetripalu engün, doi eluhuingün tañi poyenieafiel Jehová tunte puule tañi mongen engün. Tüfa tati doi cüme dungu taiñ llohuafel feipingün (ca ngüneduamafuimi Daniel 3:27; 6:22).
13. Huesa rupamequelmi, ¿chem dungu meu maneluhuafuimi? (Ca inaduamnge ti adentun).
13 Iñchiñ ca cutrancahuafuiñ rupan mu huesaque dungu mu (1 Ped. 5:8-10). Quiñeque mu, afduamafuiñ ca raquiduamafuiñ ñi felerpual müten ti dungu. Femngechi rupan mu, cümeafui taiñ acordayafiel ñi rupan Job. Rumel maneluucüleafuiñ Jehová niei ti nehuen ñi apümafiel taiñ cutrancahun feula cam ti hue mapu mu. Jehová elantücünui tañi apümafiel com huesaque dungu, doi alüñmalayai.
Jehová apümafi ñi cutrancahun tañi pu che. (Inaduamnge parrafo 13).
JEHOVÁ PIUQUEYENIEI TAÑI PU CHE
14, 15. Jehová, ¿chumngechi cümelcayafi tañi pu hueniyeteu ca chemu? (Job 14:15; ca inaduamnge ti adentun).
14 (Papeltunge Job 14:15). Jehová rume piuqueyeniefi tañi pu hueniyeteu. Fente tañi piuqueyefiel, fei engün lan mu ayüniei ñi huiñoleltuafiel tañi mongen. Chau Jehová huiñomongeltufile tañi pu che tati hue mapu mu, com che rume ayüucületuai (Is. 65:17).
15 Job mülefulu rume ti mapu mu ñi ngünenieel Huecüfü, Biblia feipi Jehová tremoltueyu ca elueyu doi alün cümelcan tañi niequefel. Huelu Jehová doi fütra cümelcayafi Job tati hue mapu mu. Jehová pengeli ñi ayünieel tañi pu che ñi cüme mongeleal ca ñi ayüucüleal. Feimu tati pu püntütripanolu fei meu eluñmayafi tañi rumel mongeleal tati hue mapu mu (Apoc. 21:3, 4). Jehová cai Doi Alüpüralelu, ayüniei ñi huechurpual. Iñchiñ quimtuculu tüfa, rume yafültucuqueiñmu rupan mu huesaque dungu.
Cutrancaufulu rume ta Job, Jehová elutufi tañi cüme feleal ca tañi domo. (Inaduamnge parrafo 14, 15).
16. ¿Ca chem dungu mu maneluhuafuiñ Jehová mu?
16 Deu ñi alüntu mongelen, Job larpui. Huelu Jehová cai Doi Alüpüralelu ca Com Nehuen Nielu, niei nehuen tañi huiñomongeltuafiel (Deut. 32:39). Jehová elantücünui ñi huiñomongeltuafiel tañi piuqueyenieelchi pu che, fei inei no rume catrütulayafui ñi femal (Rom. 8:38, 39).
JEHOVÁ MU MANELUUCÜLEAIÑ COM TAIÑ PIUQUE MU
17. ¿Chumngelu feipiafuiñ Huecüfü tañi pepi apümquenofiel Jehová tañi pu che?
17 Job tañi lifru quimeltuqueiñmu com piuque mu taiñ maneluucüleal Jehová mu. Rume mañumniefiyiñ Jehová ñi catrütuniefiel mu Huecüfü taiñ apümnoaeteu. Fachantü 9 millon che nor piuque mu poyequefingün Jehová, tüfa pengeli Jehová tañi doi alüpüralen. Fentren fütraque gobierno ca loncolechi religioso ayüniefuingün taiñ catrütuaeteu, huelu nielai pepiluhun engün, Jehová am quellunieteu iñchiñ (Is. 54:17). Chem no rume catrütuquelaeiñmu taiñ quimelelafiel caquelu che Jehová tañi rüfngechi Dios ngen ca Huecüfü coilatufengei ca langümchefengei. Lafuliyiñ rume, Jehová huiñomongeltuaiñmu püntütripanoliyiñ quisu mu (Os. 13:14).
18. ¿Chumngelu llicalelayaiñ chem ñi rupayal cüpalechi antü mu?
18 Raquiduamliyiñ Job tañi rupan mu, doi maneluhuaiñ Jehová taiñ quelluaeteu chem dungu rume rupamequele cüpalechi antü meu, feimu ngelai taiñ llicaleal. Tati fütra cutrancahun mu, Huecüfü ca tañi pu hueichafe quisulelu troquiafi Jehová tañi troquiñche, fei lefcontuafi. Huelu Job ñi antü mu reque, Jehová tañi fütra nehuen mu elulayafi Huecüfü ñi apümcayafiel tañi troquiñche. Pichiñma mu, Jehová apümcayafi tati cutrancahun Huecüfü tañi adniefiel. Jesús cerrantucuafi tati Huecüfü ca tati pu huesaque püllü quiñe fütra conchi lolo meu mil tripantu (Luc. 8:31; Apoc. 20:1-3). Deu rupale tati mil tripantu, Satanás ca com pu caiñetuquefilu Jehová apümcünungetuai, ngehuetulayai engün, femngechi femtripayai Jehová tañi feipicünuel (Gén. 3:15; Rom. 16:20).
19. ¿Chumngechi cümelcatuafi Jehová tiyechi maneluucülelu quisu meu? (Ca inaduamnge ti adentun).
19 Rume ayünieiñ ñi acual tati hue mapu, feichi mu cüme mongen nietuaiñ ca rüf ayüucületuaiñ. Feula raquiduamlayafuiñ rume tunte taiñ cümelcaletual feichi hue mapu mu. Jehová feipicünui: “Huecünumequetufiñ com dungu” (Apoc. 21:5). ¿Chem pin am tüfa? Puhuai chi antü com pu che tañi lifretripaletual tati Huecüfü meu. Satanás ca tañi pu huesaque püllü cutrancahuelayafi tati pu che ca huelulcahuelayafi. Re cüme mongen nietuaiñ. Fill raquiduamlayaiñ chem dungu mu no rume, feimu huesa umautuhuelayaiñ. Tiyechi montuluulu Armagedón mu peai fill afmatufalchi dungu. Cutran ngehuetulayai ca petuaiñ ñi huiñomongetun taiñ poyenque che. Rumel ayüucületuaiñ chumngechi tañi ayüquefel taiñ Chau Ngünechen ellaca mu.
Tati pu che püntütripanolu Jehová mu huesa rupalu rume, Jehová eluayu fentren cümeque dungu. (Inaduamnge parrafo 19).
20. ¿Chem eluucüleiñ taiñ femal?
20 Chem cutrancahun rume rupaliyiñ tüfachi afaelchi antü mu, mülei taiñ nehuencünuhual. Ca rumel maneluhuaiñ Jehová mu ca eluhuaiñ quisu müten taiñ ngünenieaeteu. Duamnieiñ pengelal taiñ piuqueyefiel Chau Jehová ca ñi coilangen Huecüfü ñi dalluntucun. Chau Jehová, tati Doi Alüpüralelu, ayüquei ñi cümelcayafiel tañi pu che, feimu maneluucüleaiñ taiñ nietual rume cüme mongen.
ÜLCANTUN 153 Fütra piuquecünuen