¿Doi cüme quimniefimi mai ta Jehová?

1. Raquiduamfiel mu Chau Dios ñi quimün ca tañi femün mu, ¿chum duamcülequeiñ?

QUIÑEQUE MU, ¿raquiduampelaimi mai fente ñi quimün-ngen ta Chau Jehová? Rume fentrelei tañi quimün ca afmatun dungu femquei. Raquiduamfiel mu Chau Jehová itrocom deumalu, afmatulehueiñ. Ti apostol Pablo reque, feipiafuiñ: “¡Fentrelei Chau Ngünechen ñi cümelcan, ñi quimün ca tañi adümuhun! ¡Pepi cüme adümngequelai tañi dulliel ca tañi femün!” (Rom. 11:33, 34).

2. ¿Chemu quimnieiñ taiñ cüme quimafiel ta Chau Jehová?

² Turpu quimlayafuiñ com ñi femquen ca tañi chumngen Jehová, huelu quimürpuafuiñ quiñeque dungu. Ti rey David feipifi tañi fotüm: “Quimfinge tañi Chau Ngünechen, com piuque ca ayühun mu serfifinge. [...] Eimi quintufilmi, quisu eluhuai tami peafiel” (1 Crón. 28:9). Fentren tripantu rupalu, ti apostol Juan feipifi pu cristiano: “Fei elueiñmu adümuhun taiñ quimafiel taiñ rüfngechi Ngünechen” (1 Juan 5:20). Cafei Jesús feipi ñi quimelelafiel pu che “ñi rüf ineingen tañi Chau” (Mat. 11:27).

3. ¿Chem ngüneduamaiñ tüfachi chillcatun mu?

³ Com pu serfiquefilu Chau Jehová quimnieiñ fentren dungu tañi chumngen mu. Huelu fentecünuquelaiñ taiñ doi cüme quimafiel ta Jehová (Juan 17:3, peaimi ti nota de estudio). Por ejemplo, quimnieafuiñ chumngechi ayühulafiel tañi piuque ca chumngechi doi maneluhuafuiñ fei mu. Tunten tripantu yenieliyiñ rume taiñ poyefiel Jehová, doi cüme quimürpuafuiñ, ngüneduamaiñ 3 falin ramtun: ¿Chem cüpa feipi quimafiel ta Jehová? ¿Chemu rume fali doi cüme quimürpuafiel? Ca, ¿chumngechi doi cüme quimürpuafuiñ?

¿CHEM CÜPA FEIPI QUIMAFIEL TA JEHOVÁ?

4. ¿Chumafuiñ taiñ doi cüme quimafiel ta Jehová?

⁴ ¿Chem chumafuiñ taiñ doi cüme quimafiel ta Jehová? Peaiñ quiñe dungu, chem tañi feipicünufiel Jehová pu judio tripatulu Babilonia mu, fei feipi: “Eluafiñ engün quiñe piuque ayünielu tañi quimaeteu, fei quimtucuaingün Jehová ngen ta iñche” (Jer. 24:7). Pu judio tripatulu Babilonia mu, deu quimniefuingün chi quiñeque dungu Chau Jehová mu. Huelu duamfalngefui doi cüme hueniyeafiel. Quiñe lifru feipi: “Quiñe che quimürpuafui ta Jehová, huelu trürlai tañi cüme quimafiel ca hueniyeafiel. Raquiduamafuiñ tüfa: quiñe huentru papeltuafui quiñe lifru nütramcalu ñi piuqueyeuquen 2 che. Papeltufui rume, huelu trürlayafui ñi chum duamcülen piuqueyerpufilu tañi poyen”. Quimürpuafuiñ inei pingei Chau Dios ca tañi Dios ngen, huelu ayüqueiñ doi cüme quimafiel ñi chumngen Jehová.

5. Taiñ doi cüme quimafiel ta Jehová, ¿chumngechi inayentuafuiñ Josías tañi femün?

⁵ Doi cüme quimniefiel mu Chau Jehová, ca quimafuiñ chumngechi ayühulafiel ca chem dungu ayüquelai. Raquiduamaiñ ñi femün ti lonco ülmen Josías. Ti Biblia feipi: “Yenielu 8 tripantu tañi ngünenieel, petu hueche huentrungefui, fei eluhui ñi quintuafiel tañi cuifi lacu David ñi Chau Ngünechen” (2 Crón. 34:3). Josías re estudialai müten, fei inafi chem tañi quimürpuel. Chau Jehová adniefi ta Jeremías ñi feipial: nor dungu femi Josías ca cüme tripai ñi femün. Cafei “incafi pu pofre ca pu cutrancaucülelu”. Fei hula Jehová ca feipi: “Josías quimnieneu, feimu femngechi femi” (Jer. 22:15, 16).

6. ¿Chum tripayaiñ doi cüme quimfiliyiñ Jehová? (Salmo 9:10).

⁶ (Papeltunge Salmo 9:10). Doi quimfiel mu ta Jehová, doi maneluuqueiñ fei mu. Ti apostol Pablo ngüneduami ñi rüfngen tüfachi dungu, presuntucungelu ca epe puulu ñi layal, huirintucui: “Yehuequelan. Iñche quimniefiñ ta Chau Ngünechen, feyentuquefiñ” (2 Tim. 1:12). Com tañi rupan ca ñi quimürpuel Pablo quellueyu tañi maneluhual Jehová mu. Pablo maneluhui Jehová tañi loncontucunieaeteu com tañi cüme femün, feimu maneluhui ñi huiñomongeltuaeteu.

¿CHEMU FALIN-NGEI DOI CÜME QUIMÜRPUAFIEL TA JEHOVÁ?

7. Fentren tripantu taiñ serfiniefiel ta Jehová, ¿chem rupayafuiñ?

⁷ Iñchiñ hue quimfilu ñi ineingen Jehová, fentren dungu quimürpuiñ. Huelu rupan mu ta tripantu, müte femhuelafuiñ. ¿Chemu? Papeltulu Biblia ruca mu ca trahunche mu, entuiñ falinque quimeltun taiñ quellueteu iñchiñ, cafei entuiñ falinque dungu taiñ quelluafiel caquelu che. Biblia ngülamtueiñmu taiñ femngechi femal (2 Tim. 3:16, 17). Huelu doi falin-ngei chem quimeltuqueiñmu Chau Dios mu (Sal. 25:8-10). Feimu papeltufiliyiñ Biblia ramtuhuaiñ: “Tüfachi dungu, ¿chem quimeleneu Chau Jehová mu?”.a

8. Cüme quimfiliyiñ ca hueniyefiliyiñ ta Jehová, ¿chem rupayai? (Salmo 73:24-28).

⁸ Doi cüme quimfiel mu ta Jehová, doi cüme hueniyeafiyiñ. Raquiduamnge: deu papeltulmi Biblia fill antü, ¿chum duamquei tami piuque? Pefiel mu ti broadcasting ca amun mu fütra trahun mu, ¿doi hueniyefilu Jehová troquiupelaimi? Femün mu iñchiñ, doi cüme quimfiyiñ ta Jehová, feimu doi poyefiyiñ ca mañumfiyiñ. Ti salmista reque duamcüleafuiñ, fei raquiduami chumngechi tañi cuidaeteu Jehová ca feipi: “Chau Dios nehuentucuqueneu tañi piuque. Iñche rumel nieafiñ ta Chau Ngünechen” (papeltunge Salmo 73:24-28). Feimu chem rume femaiñ taiñ doi cüme quimafiel ta Jehová. Femliyiñ, doi mañumnieafiyiñ ca doi hueniyeafiyiñ.

9. Raquiduamliyiñ Jehová mu, ¿chem chumaiñ? ¿Chumngechi trürümafuimi yenieal quiñe foto?

⁹ Ti Biblia feipieiñmu “raquiduamnieafimi” ta Chau Jehová (Prov. 3:5, 6). Taiñ femngechi femal, duamfali raquiduamal chem taiñ quimürpuel Jehová mu ca chum duamcülei taiñ femün mu. Tüfa quelluqueiñmu taiñ cüme dullial chem chumal. Raquiduamaiñ quiñe ejemplo: fentren peñi ca lamngen niequeingün quiñe foto cheu ñi tripan tañi afcadi, fei tucuqueingün tañi escritorio, tañi billetera ca tañi celular mu. Tüfa quellueyu tañi piuquentucuafiel tañi afcadi. Cafei quelluayu ñi huesa duamelnoafiel tañi afcadi. Ca femngechi doi raquiduamliyiñ Jehová, doi cüme dulliaiñ chem chumal taiñ ayühulafiel (Sal. 19:13, 14).

10. Doi quimfiliyiñ Jehová, ¿ca chem chumafuiñ?

¹⁰ Iñchiñ deumangeiñ taiñ inayentuafiel Jehová ñi chumngen (Gén. 1:26). Doi cüme quimfiliyiñ Jehová ñi chumngen, doi cüme inayentuafuiñ. Pu escriba ca pu fariseo inayentulafingün Chau Dios ñi cümeque chumngen, feimu Jesús condenaeyu engün. Fei engün cüme quimquefuingün chem pi Moisés ñi ley, huelu ‘quiñepülecünuquefui tati doi falinque dungu mülelu Moisés ñi ley meu. ¿Chem am? Femal nor dungu, cutranpiuqueyecheal ca nor piuquengeal’ (Mat. 23:23). Inalayaiñ ñi femün feichi pu loncolechi religioso, doi mai papeltufiel mu ti ley ca ngülam mülelu Biblia mu, raquiduamnieaiñ chem taiñ quimeltueteu Jehová mu. Tüfa quelluaiñmu taiñ inayentunieafiel tañi chumngen (1 Juan 4:8, 11).

¿CHUMNGECHI DOI CÜME QUIMÜRPUAFUIÑ TA JEHOVÁ?

11. ¿Chumngechi quimürpufimi ta Chau Jehová?

¹¹ ¿Inei dungueimu Chau Jehová mu? ¿Tami chau ca ñuque peno? ¿Fei engu nütramcapelaeimu Biblia ñi nütram ñi quimeltual Jehová ñi chumngen? Ca, ¿quimeltupelaeimu chumngechi Chau Dios ñi deumael quimfalcünui tañi cümeque chumngen? Cam, ¿quiñe testigo quimeltueimu? Fei papeltulelpelaeimu peno ti lifru ¡Rumel ayüucüleaimi!, fei raquiduameleimu Biblia ñi feipin ca com ñi deuman Chau Dios, femngechi quimeltueimu Chau Jehová ñi chumngen (Neh. 8:8; Hech. 14:17).b Ngüneduamaiñ chumngechi doi cüme quimürpuafuiñ ta Jehová.

12, 13. Papeltulu Biblia iñchiñ, ¿chem quimürpuafuiñ Jehová mu? Feipinge quiñe ejemplo (Jeremías 39:15-18; inaduamnge ti adentun).

¹² Ngülam 1. Papeltufiel ca estudiafiel mu Biblia, doi quimafuiñ ta Jehová. Quiñeque mu, Biblia cüme pengeli Chau Jehová tañi chumngen (Éx. 34:6, 7). Huelu fentren rupa nütramcai ñi femün pu che ca tañi dulliel engün. Papeltulu iñchiñ feichi nütram, raquiduamqueiñ chem quimürpuiñ Jehová mu.

¹³ Peaiñ quiñe ejemplo. Papeltuliyiñ Jeremías 38:6-13, quimafuiñ ñi femün ti Etiopía huentru Ébed-Mélec pingelu, fei montulfi ta Jeremías. Eimi ngüneduamimi chi chumngechi inayentuafiel ta Ébed-Mélec tañi duamtuchequen, nehuen piuquengen ca tañi piuqueyefiel pu poyequefilu Jehová. Huelu tüfachi nütram mu, ¿ngüneduamimi chem quimeleimu Chau Jehová mu? (Papeltunge Jeremías 39:15-18). Por ejemplo, ¿chem versiculo nütramcai Jehová ñi falintuchequen, nor dungu femquen ca tañi dullintuchequenon? Tüfachi nütram, ¿ca chem quimeltueimu Chau Jehová mu? Papeltufilmi quiñe versiculo Biblia mu, ca ngüneduamaimi Jehová tañi chumngen. Fei hula mañumafimi ca püramyeafimi tañi chumngen mu.

14. ¿Chumngechi quelluqueiñmu adquintufiel Chau Dios ñi deuman?

¹⁴ Ngülam 2. Ngüneduamfiel mu com ñi mülen mapu mu, doi quimafuiñ ta Chau Dios (Sal. 145:9, 10). Huelu re adquintulayaiñ müten com ñi deuman ta Jehová. Quiñeque che com ñi mongen mu ngüneduammequei chem ñi mülen mapu mu, huelu ngüneduamlaingün Chau Dios ñi chumngen ca tañi mülen. Ti apostol Pablo huirintucui: “Chau Dios pengequelai, huelu quimafuiñ ñi chumngen ngüneduamliyiñ chumngechi ñi deumael ti mapu. Taiñ quimal ñi chumngen, ngüneduamafuiñ ñi deumael” (Rom. 1:20). Feimu ngüneduamaiñ Chau Dios ñi deumael, femngechi quimafuiñ Chau Dios tañi chumngen.

15. 1) ¿Chumi Patrick tañi cüme quimafiel ta Jehová? 2) ¿Chumngechi inayentuafuiñ ta Patrick? (Ca inaduamnge ti adentun).

¹⁵ Fentren peñi ca lamngen müleingün huaria mu cheu ngelai fentren anümca ca culliñ. Mülelmi huaria mu, ¿entuafuimi quimeltun Chau Dios ñi deumael? Raquiduamaiñ ñi feipin Patrick, mülelu Brazzaville huaria, República del Congo mu. Fei feipi: “Fill antü adquintufiñ quiñeque dungu ñi deumael Chau Dios. Fentren rupa adquintun insecto ca pichique üñüm quintuyaulu iyael ca cheu tañi müleal. Quiñe rupa, pen quiñeque üñüm dañetumequelu. Feichi pu üñüm ngülümingün pichique chemcün ñi dañetual ca tañi nieal ñi pichique üñüm”. Huelu Patrick feica müten femlai, doi mai cüme raquiduami Chau Ngünechen mu. Fei feipi: “Quimürpun Chau Jehová ñi cuidaniefiel com tañi deumael, pichique insectongele rume. Cafei quimtucun Chau Dios cuidanieneu ca rumel eluaeneu com tañi duamnieel”.

16. 1) ¿Chem quellueyu María ñi doi quimafiel ta Jehová? 2) ¿Chumngechi inayentuafuiñ ñi femün? (Ca inaduamnge ti adentun).

¹⁶ Ngülam 3. Raquiduamfiel mu taiñ rupan mongen mu, doi quimafuiñ ta Chau Dios. Tüfachi dungu femi María, Jesús tañi ñuque. María cüme quimniefui ta Chau Jehová ca quimniefui ‘Chau Ngünechen tañi füreneeteu’ (Luc. 1:30). Fei hula elungei quiñe falin cüdau: choyüafiel Chau Ngünechen ñi Fotüm. Huelu Jehová nehuentucufi ta María ca cüme duamelfi, tañi femal huercüfi quiñe cüme püllü Gabriel pingelu ca adniefi Elisabet ñi quelluafiel tañi pariente. Fei hula, María raquiduami tañi rupan mu ca entui quimeltun Chau Jehová mu. Doi cüme ngüneduami Chau Jehová ñi nehuen-ngen, ñi cutranpiuqueyechequen, ñi dullintuchequenon ca tañi duamtuniefiel pu falinolu troquiucülelu (Luc. 1:46-55). María mañumtufi Chau Dios tañi quelluqueteu, ca femngechi iñchiñ mañumafiyiñ taiñ quelluqueteu puuchi antü mu (Heb. 4:16). Eimi quellungelmi, ramtuhuafuimi: “¿Chem quimeleneu tüfa Chau Jehová mu? Iñche tañi rupan, ¿chumngechi pengeleneu ñi chumngen ta Jehová?”.

FENTECÜNULAYAIÑ TAIÑ QUIMÜRPUAFIEL TA CHAU DIOS

17, 18. ¿Chemu fentecünulayaiñ taiñ quimürpuafiel ta Jehová?

¹⁷ Raquiduamnge com tami quimürpual Chau Jehová mu hue mapu mu. Elungeaiñ hueque chumpol lifru pengelquelu chem taiñ chumal (Apoc. 20:12). Doi ayühuaiñ ngüneduamfiel com ñi mülen, fei doi cüme quimafuiñ ta Jehová (Is. 11:6-9). Peaiñ ñi huiñomongetual taiñ pu che ca taiñ pu hueni, ca ngüneduamaiñ chumngechi quelluaiñmu Chau Dios taiñ culpafengehuenoal, femngechi quimürpuafuiñ hueque dungu chumngechi chengei ta Jehová.

¹⁸ Fentecünulayaiñ taiñ quimürpuafiel ta Jehová. Fei rumel mülequei, feimu “quimfalngelai tunte adümuhun ñi nieel” (Sal. 90:2; 147:5). “Pu che turpu adümlayafi Chau Dios tañi femqueel” (Ecl. 3:11). Feimu llemai, tunten tripantu yenieliyiñ rume taiñ poyefiel ta Chau Dios, chumaiñ rume taiñ doi quimafiel taiñ poyen Chau Jehová.