¿Chemu ayüucüleafuiñ üdengeliyiñ rume?

1. ¿Chem feipi Jesús ca chemu raquiduamfali?

JESÚS feipi: “Ayühun nieimün üdengelmün” (Luc. 6:22). Tati pu allcütulelu raquiduamcülehuepelai, inei no rume ayüquelai ñi üdengeal. Feimu, ¿chemu feipi Jesús? Com taiñ cristianongen ayünieiñ taiñ quimal, üdequeteu cai caquelu pu che. Tüfachi troquiñ mu, ngüneduamaiñ chumngelu taiñ üdequeteu pu che ca chemu ayüucüleafuiñ üdengeliyiñ rume.

¿CHEMU ÜDEQUEIÑMU PU CHE?

2, 3. 1) Taiñ rüf cristianongen, ¿chumngelu caiñetungequeiñ? 2) Quimfiel mu inei taiñ rüf caiñetuqueteu, ¿chumngechi quelluqueiñmu? (Juan 16:2, 3).

² Tati pu che üdequeiñmu taiñ poyequefiel mu Jehová. Jesús feipi pu che tañi quimnoeteu iñche ca tañi Chau no rume inantucuafi tañi pu inanieteu ca langümafui quiñeque (papeltunge Juan 16:2, 3). Tañi üdengequeel Jehová ñi pu che, ¿inei adniefi? Satanás llemai, “tati dioscülelu tüfachi mapu meu” (2 Cor. 4:3, 4). Fei traumalelfi reque pu che ñi raquiduam tañi quimnoafiel tati rüf dungu Jehová mu cüpalu. Ca adniefi pu che tañi caiñetuafiel pu quimfilu Jehová ca poyequefilu (Juan 8:42-44). Quimfiel mu Satanás ñi ngünencaeteu feichi pu che, quelluqueiñmu taiñ üdenoafiel taiñ huesa femeteu.

³ Peaiñ ñi rupan taiñ peñi Pável pingelu.a Cheu tañi mülen catrütungequei taiñ amuldungun. Taiñ peñi fentecünulai ñi serfinieafiel Jehová, feimu presuntucungei ca hulelcangei. Ca quiñeque cüyen huichucünungei caquelu presu mu, quisulequefui müten. Taiñ peñi feipi: “Cüme quimnien inei tañi caiñetuqueteu: Huecüfü ca tañi huesaque püllü, fei engün ayüqueingün taiñ poyehuenoafiel Jehová. Epe com che cüdauquelu carcel mu üdequelafi pu testigo, femquei tañi cüdau müten”. Ca quiñe peñi Croacia mülelu huesa femeyu tañi pu chau ñi serfihuenoafiel Jehová. Fei feipi: “Caiñetuqueneu tañi pu chau, huelu quimtucun feichi caiñetuhun cüpai Huecüfü mu” (Efes. 6:12).

4. ¿Chem quimeltueiñmu ñi femün Jesús ca Esteban? (Ca inaduamnge ti adentun).

⁴ Taiñ pu cristianongen, üdequelafiyiñ taiñ pu caiñetuqueteu, doi mai llellipuqueiñ fei engün mu (Mat. 5:44). Ngüneduamaiñ ñi femün Jesús ca ti discipulo Esteban. Deu ñi clafantucueteu pu Roma soltau orcon mamüll meu, Jesús llellipufi tañi chau: “Rulpacünuñmafinge ñi femün engün” (Luc. 23:34). Jesús llellipuñmafi feichi pu soltau huercüngelu ñi langümaeteu. Jesús ca raquiduamtucupelafi feichi pu che langümngepe feipilu tañi ngüchaltucueteu pu religioso. Jesús ngüneduami feichi pu che quimlaingün tañi chem femmequen. Ca femngechi Esteban llellipui tañi perdonangeal tañi pu curatumequeteu (Hech. 7:58-60). ¿Huiñoldungupei mai Jehová Jesús ca Esteban ñi llellipun? Femi llemai. Fentren che ayülu ñi langümngeal Jesús nor raquiduamtuingün, feyentuingün Jesús mu ca fautizahuingün (Hech. 2:36-41). Saulo quelluntuculu ñi langümngeal Esteban, fei rupachi antü cristianongerpui. ¿Rume hueñancülpelaeyu tañi quelluntucun? (1 Tim. 1:13).

5. ¿Chem quimeltueiñmu ñi rupan César?

⁵ Fachantü, Jehová ca huiñoldunguqueiñmu llellipufiliyiñ taiñ pu caiñetuqueteu mu. Peaiñ ñi rupan César Venezuela mu mülelu. Tañi chau rume caiñetuquefeyu tañi testigongen mu. César feipi: “Tañi ñuque eluuquefui tañi cüme afcadingeal ca cüme ñuquengeal. Hunentucuquefui tañi serfinieafiel Jehová, huelu ca eluuquefui ñi duamtuafiel tañi afcadi. Quimeltueiñmu tañi pu peñi ca lamngen iñchiñ taiñ respetayafiel taiñ chau ca feyentuafiel chaftunofile ñi ayüqueel Jehová”. Rupachi tripantu mu, César tañi chau cacünutui ñi raquiduam. César feipi: “Quiñe antü, llellipufiñ Jehová com tañi piuque mu. Fei hula, ramtufiñ tañi chau ñi cüpa estudiafiel Biblia. Eluulu ñi femal, tüfa rume ayühuleneu”. Rupachi antü mu, César tañi chau fautizahurpui. Com pu che taiñ caiñetuqueteu serfirpulayafui Jehová. Huelu cüme femliyiñ ca yamquechi dunguliyiñ, cacünutuafui tañi raquiduam. ¡Tüfa rume ayühulqueiñmu! Chau Jehová cutranpiuqueyechequelu ca ‘Juez ngelu com mapu mu’, quelluafui taiñ pu caiñetuqueteu ñi pülleconal fei mu (Gén. 18:25). Rume ayünieiñ ñi femngechi rupayal.

6. Ñi feipin Marcos 13:13, ¿ca chemu üdequeiñmu pu che?

⁶ Pu che üdequeiñmu taiñ quelluntucufiel mu Jesús. Jesús feipifi tañi pu inanieteu: “Iñche ñi üi mu com pu che üdeaimünmeu” (papeltunge Marcos 13:13). Jesús tañi üi mu coneltulei tañi chumngen ca ñi Rey ngen Chau Dios ñi Gobierno mu. Fachantü alün che maneluuquelaingün Jesús mu, doi mai pu che ñi gobierno mu, feimu üdequeiñmu. Jesús coni ñi ngünenieal 1914 tripantu mu, fei pürümquechi apümafi com caquelu gobierno mülelu mapu mu.

7, 8. ¿Chemu quiñeque testigo ayentungequei? (Juan 15:18-20; ca inaduamnge ti adentun).

⁷ Pu che üdequeiñmu taiñ inayentunofiel pu poyequenofilu Jehová. Jesús feipifi tañi pu inanieteu: “Mapu mülechi pu che reque femngelaimün, feimu üdeeimünmeu mapu mülechi pu che” (papeltunge Juan 15:18-20). Jesús tañi pu discipulo reque, iñchiñ famentuquefiyiñ chumngechi ñi femquen, ñi dunguquen ca ñi raquiduamquen pu poyequenofilu Jehová. Feimu fentren pu peñi, pu lamngen ayentungequei cüdau mu cam colegio mu (1 Ped. 4:3, 4). Rupachi antü mu, quiñeque taiñ pu ayentuqueteu cüme elcünuquetui tañi raquiduam, fei doi yamquetueiñmu. Tañi femün mu, ayühulqueiñmu.

⁸ Nütramcayaiñ ñi rupan quiñe peñi Ignacio pingelu. Quiñe tañi pu profesor fentren tripantu ayentuquefeyu tañi inaquefiel Jehová tañi huercün dungu. Epe tripalu colegio mu, ti profesor ramtueyu chumngelu ñi inaquefiel Biblia ñi feipin ayentungelu rume. Ignacio feipi Chau Dios tañi cümeque ngülam cuñiutucuqueneu, feimu inaquefiñ pifi. Fei mangelfi ñi amual trahun mu. Fei ti profesor amui trahun mu. Fente tañi cüme lloungen, fentecünulai tañi amual. Rupachi antü mu, papelturpui Biblia. Ca caiñetungerpui. Huelu fentecünulai tañi doi hueniyerpuafiel Jehová, fei fautizahurpui.

9, 10. 1) ¿Ca chem dungu mu trürlaiñ caquelu che mu? 2) ¿Chem quimeltueiñmu ñi femün ta Pablo?

⁹ ¿Ca chem dungu mu trürlaiñ caquelu che mu? Coneltuquelaiñ politica dungu mu ca hueichan mu no rume (Juan 18:36). Ñi feipilen Romanos 13:1, iñchiñ inaquefiyiñ pu gobierno ñi ley. Huelu coneltunolu am politica dungu mu, huirintucuquelaiñ taiñ üi taiñ candidatongeal ca eluquelafiyiñ voto quiñe canditato no rume. Quelluntucuquefiyiñ Jehová tañi Gobierno müten ca Cristo tañi loncolen. Fentren taiñ pu peñi, pu lamngen carceltucungequei tañi feyentun mu, huelu fentecünuquelai ñi amuldungual. Inayentuquefingün ñi femün ti apostol Pablo. Presulefulu rume, amuldungulequefui (Hech. 24:27; 28:16, 30). Com che amuldungulelquefui ti cümeque dungu: pu soltau, pu cüdauquelu corte mu, pu lonco ülmen. Ca amuldungulelfi chi pu cüdahuelquefilu Nerón, Roma ñi doi fütra lonco ülmen (Hech. 9:15).

¹⁰ Ca femngechi taiñ pu peñi ca lamngen carcelconcülelu amuldungulelquefi com pu ayünielu ñi allcütual. Ca tati pu juez, pu cüdahuelquefilu ti gobierno ca ti pu soltau. Quiñe peñi presulefui doi 6 tripantu tañi coneltunon politica dungu mu. Huesa femngelu troquiulai, doi mai quiñe cüdau tañi elueteu Jehová troquihui, ñi amuldungulelafiel pu cüme piuquengelu. Ca femngechi dungu rupaliyiñ, rume ayühuafuiñ Jehová taiñ adnieteu ñi amuldungucheal (Col. 4:3). Huelu feichi dungu mu müten ayüucülelayafuiñ üdengefuliyiñ rume. Feula doi ngüneduamafiyiñ.

¿CHEMU AYÜUCÜLEAFUIÑ ÜDENGELIYIÑ?

11. Inacangen mu, ¿chumngelu doi maneluuqueiñ Jehová mu? ¿Chem dungu mu rupai quiñe lamngen?

¹¹ Inaduamqueiñ ñi femtripamequen ñi feipin ta Biblia. Fütra cuifi mu, Jehová feipicünui Huecüfü ca tañi pu inanieteu ñi caiñetuafiel tati pu poyequefilu Jehová (Gén. 3:15). Cafei, Jesús fentren rupa feipicünui ñi üdengeal pu poyequefilu Jehová (Mat. 10:22; Mar. 13:9-12; Luc. 6:22, 23; Juan 15:20). Ca femngechi feipicünuingün ñi rupayal caquelu huirintuculu Biblia (2 Tim. 3:12; Sant. 1:2; 1 Ped. 4:12-14; Jud. 3, 17-19). Feimu afmatulquelaeiñmu inacangen mu, doi mai ayüuqueiñ ñi huechutripan ñi feipicünuel ta Biblia. Femngechi doi maneluuqueiñ taiñ serfiquefiel ti rüfngechi Dios. Quiñe lamngen mülei cheu ñi catrütungequen taiñ amuldungun, fei feipi: “Eluulu ñi serfiafiel Jehová, quimniefun ñi caiñetungeal. Feimu acun mu huesaque dungu, llicaquelan ca afmatulquelaeneu” pi. Quiñe tañi caiñetueteu, fei tañi füta. Tañi füta huesa femeyu, lüpümtucuñmaeyu tañi Biblia ca caquelu publicacion. Huelu taiñ lamngen llicalai ca püntütripalai Jehová mu, doi mai doi maneluhui Jehová mu (Heb. 10:39). Taiñ lamngen feipi: “Taiñ inacangeal huiriconcülefui Biblia mu, feimu quimniefun quiñe antü tañi acual. Huesa rupan mu iñche, quimniefun tañi mülen ti rüf religion mu”.

12. ¿Chem quellueyu quiñe peñi ñi nehuentuleal inacangelu?

¹² Quimnieiñ taiñ inacangeal. Femfulu rume, cüdautuafuiñ taiñ aguantayal. Quiñe peñi carcelconcülefulu feipi: “Quiñeque mu rume huesa duamcülequefun, ngümaconcülequefun müten”. ¿Chem quellueyu? Fei feipi: “Huitran mu müten llellipuquefun. Huesaque dungu rupan mu, llellipuniequefiñ Jehová. Ca huesa femngen mu, pichi huichutripaquefun ñi llellipual”. Taiñ peñi ca raquiduamquefui ñi femün pu poyequefilu Jehová cuifi ca famülque mu inacangelu rume. Fei quellueyu ñi nehuentuleal ca tüngcüleal chumngechi ñi feipifiel Jesús tañi pu inanieteu (Juan 14:27; 16:33).

13. Üdengeliyiñ, ¿chem quelluaiñmu taiñ nehuentuleal?

¹³ Tati piuqueyehun nehuentucuqueiñmu. Jesús tunte puulu tañi mongen, fentecünulai ñi piuqueyefiel tañi Chau ca tañi pu hueni (Juan 13:1; 15:13). Ca femngechi iñchiñ com piuque mu piuqueyefiliyiñ Jehová ca taiñ pu peñi ca lamngen, nehuentuleaiñ üdengeliyiñ rume. Femngechi dungu quimeltueiñmu Pablo ñi femün, peafiyiñ.

14. ¿Chem quellueyu Pablo ñi püntütripanoal Jehová mu langümngefule rume?

¹⁴ Pichilehuelu ñi langümngeal, Pablo huirintuculelfi tañi cüme hueni Timoteo: “Chau Ngünechen ñi nehuen eluquelaeiñmeu taiñ llican chengeal, doi mai eluqueiñmeu nehuen, piuqueyehun ca cüme raquiduam” (2 Tim. 1:7). ¿Chem pifel tüfa? Quiñe cristiano rüf piuqueyefile Jehová, nehuentuleafui chem dungu rupafule rume (2 Tim. 1:8). Pablo ñi piuqueyeniefiel mu Jehová, quellueyu ñi nehuen piuquengeal ca püntütripanoal Jehová mu langümngefule rume (Hech. 20:22-24).

15. Taiñ pu peñi ca lamngen, ¿chumngechi pengelingün ñi piuqueyehun? (Ca inaduamnge ti adentun).

¹⁵ Rume piuqueyefiyiñ pu peñi ca lamngen püntütripaquenolu Jehová mu caiñetungefulu rume. Cuifi mu, Áquila ca Priscila cuñihun mu tucui ñi mongen ñi quelluafiel ta Pablo (Rom. 16:3, 4). Famülque mu, ca femngechi femquei taiñ pu peñi ca lamngen. Rusia mu fentren pu peñi, pu lamngen amuqueingün tribunal mu ñi yafültucuafiel pu peñi presulelu. Quiñe lamngen presulelu pefilu tañi pu lamngen tribunal mu, rume ayühui. Fente tañi afmatulehuen, pepi dungulafui rume. Feichi doi duamnielu ñi yafültucungeal, tañi pu lamngen piuqueyenquechi nehuentucueyu. Felei llemai, ti piuqueyen doi nehuen-ngei ti üdehun mu, feita rume ayühulqueiñmu.

16. ¿Chemu chi Pedro feipi rupaliyiñ huesaque dungu mu ayüucüleafuiñ? (1 Pedro 4:14).

¹⁶ Nehuentuleliyiñ üdengeliyiñ rume, ayühulafiyiñ Jehová (papeltunge 1 Pedro 4:14). Ti apostol Pedro feipi caiñetungeliyiñ taiñ serfiniefiel mu Jehová, ayüucüleafuiñ. ¿Chemu? Tüfa am pengelquelu taiñ nien Chau Ngünechen ñi nehuen. Pedro cüme quimniefui femngechi dungu mu am rupalu. Pichi rupalu ti Pentecostés 33 tripantu mu, tati pu soltau presuyefingün ti apostol Pedro ca caquelu apostol tañi amuldunguyahun mu. Huelu Pedro nehuen piuque mu feipi ñi amuldunguleal engün (Hech. 5:24-29). Hulelcangefulu rume engün, Pedro ca pu caquelu apostol fentecünulaingün ñi amuldungual. Doi mai, “ayüucületuingün elungelu cai ñi cutrancahual engün Jesús ñi üi meu”. Iñchiñ ca femngechi huesa rupaliyiñ rume, ayüucüleafuiñ (Hech. 5:40-42).

17. Jesús, ¿chem feipifi tañi pu discipulo feichi pun petu ñi lanon?

¹⁷ Feichi pun petu ñi lanon, Jesús feipifi tañi pu inanieteu: “Tañi Chau piuqueyeafi tuchi piuqueyeteu ta iñche. Ca piuqueyeafiñ iñche” (Juan 14:21). Puhuai chi antü inei no rume üdehuelayaiñmu taiñ poyequefiel Jehová, com che piuqueyehuai. ¡Rume ayünieiñ ñi puhual feichi antü! (2 Tes. 1:6-8). ¿Famülque mu cai? Eluucüleaiñ taiñ acordayal chumngelu ayüucüleafuiñ üdengen mu rume, feita yafültucuaiñmu ca nehuentucuaiñmu.