¿Chumngechi hunentucunieafuiñ Jehová taiñ mongen mu?

1, 2. Fentren cüdau nielu am iñchiñ, ¿chem dungu mu cuñiutucuhuafuiñ?

RAQUIDUAMNGE tüfa: eimi amuleimi carretera mu, amulnieimi tami auto, fei quiñe che mütrümrumeimu. Falin-ngefui chi tami mütrümmequengen, huelu doi falin-ngei tami adquintunieafiel tati carretera. Feimu cümelai tami nüafiel ti celular tami huiñoldungual. Feitachi ejemplo pengeleleiñmu fentren rupa com femlayafuiñ, mülei taiñ dullial tati doi falin-ngelu.

² Iñchiñ fentren falinque cüdau niefuiñ. Huelu, ¿chem doi falin-ngei? Taiñ serfiafiel ta Jehová (Mat. 6:33).a Feimu eluuqueiñ taiñ hunentucuafiel Jehová taiñ mongen mu, cuñiutucuuqueiñ chem no rume taiñ ca raquiduamelaeteu (Prov. 4:25; Mat. 6:22).

3. ¿Chem peaiñ feitachi troquiñ mu?

³ Com iñchiñ ayüqueiñ taiñ hunentucuafiel Jehová taiñ mongen mu, huelu fillque dungu ca raquiduamelafeiñmu (Luc. 21:34-36). Taiñ quelluaeteu taiñ cüme cüdahuelafiel Chau Jehová, peaiñ 3 dungu: 1) ¿chem dungu ca raquiduamelafeiñmu?, 2) ¿chumi Jesús chem no rume tañi ca raquiduamelnoaeteu?, 3) ¿chumngechi inayafuiñ Jesús tañi femün?

¿CHEM DUNGU CA RAQUIDUAMELAFEIÑMU?

4-6. ¿Chem dungu catrütuafeiñmu taiñ hunentucuafiel Jehová taiñ mongen mu?

⁴ Fentren dungu nieiñ taiñ lonco mu. Rume raquiduamelafeiñmu chi taiñ tremoleal, taiñ cüme dapiafiel taiñ familia cam caquelu duam. Com feitachi dungu falin-ngei, feimu duamfali taiñ raquiduamtucuafiel. Huelu rume raquiduamtucuniefiliyiñ, niehuelayafuiñ tiempo ca nehuen taiñ cüme cüdahuelafiel Jehová.

⁵ Cafei cheu taiñ mülemum rume mülei chi quehuan dungu, cüdaungei puhulcayal chi plata cam rume müleafui cutran (2 Tim. 3:1). Femngechi dungu rupamequele, raquiduamcüleafuiñ müten chi taiñ huesa rupamequen.

⁶ Quimfiyiñ chi quiñeque che huesa rupamequelu caletui ñi mongen engün. Feimu rume huesa duamcületuingün Jehová am deumanofilu pu che ñi cutrancaucüleal. Quiñeque che huesa rupamequelu turpu niehuenoalu cüme mongen troquiuqueingün. Tañi doi cüme duamtual, quiñeque che quintuqueingün tañi cüme rupaleal müten. Femngechi dungu rupaliyiñ, ¿chumafuiñ? Peafiyiñ ñi femün ta Jesús, chem no rume famentulaeyu ñi serfiafiel Jehová.

¿CHUMI JESÚS TAÑI RUMEL HUNENTUCUAFIEL JEHOVÁ?

7. ¿Chem dungu ca raquiduamelafeyu Jesús?

⁷ Jesús mülepalu mapu mu, pefi fentren huesaque dungu. Fentren che pofrelequefui ca cutrancülequefui (Mat. 14:14; Mar. 14:7). Cafei huesa femquefeyu pu Roma che ca caquelu judio. Tati pu che pefilu Jesús ñi femün afmatufalchi dungu, ayüfuingün tañi reycünuafiel (Juan 6:14, 15). Huecüfü ca feipifi Jesús tañi fente esperanoal ñi ngünenieafiel mapu, iñche eluafeyu com autoridad pifi (Mat. 4:8, 9). Ca quiñe rupa tañi cüme hueni Pedro feipieyu tañi fente cutrancaunoal, “¡cutranpiuqueyeunge Ñidol!” pieyu (Mat. 16:21, 22).

8. ¿Chem quellueyu Jesús tañi hunentucuafiel Jehová?

⁸ ¿Chem quellueyu Jesús tañi hunentucuafiel Jehová? Hunelu mu, inaquefui Jehová tañi raquiduam (Juan 8:28; 14:9). Epu, doyümniequefui ñi amuldunguchequen (Mat. 9:35). Ca cüla, cüme quimniefui chem tañi doi falin-ngen (Juan 4:34). Famentufi tañi feipieteu Huecüfü. Ca quimniefui rume Pedro ñi cüpa quellueteu, famentufi tañi ngülam nüucülenolu am Jehová tañi raquiduam mu (Mat. 4:10; 16:23). Chem raquiduamfule rume pu che, chem feipifule rume ca chem femfule rume, Jesús fentecünulai tañi huechurpual tañi Chau ñi ayüqueel. Fachantü iñchiñ rupamequelaiñ ñi rupan Jesús cuifi mu. Huelu tañi femün quelluafeiñmu taiñ rumel hunentucuafiel Jehová taiñ mongen mu.

¿CHUMNGECHI HUNENTUCUNIEAFUIÑ JEHOVÁ TAIÑ MONGEN MU?

9. Ñi feipin Efesios 5:17, ¿chumaiñ?

⁹ Raquiduamaiñ Jehová reque. Femngechi quimaiñ “chem ñi ayünieel ta Chau Jehová” (papeltunge Efesios 5:17). Papeltufiliyiñ Biblia ca raquiduamliyiñ ñi feipin mu, quimaiñ chem ñi ayüqueel Jehová. Huelu quiñeque dungu mu Biblia com feipilai taiñ chumal, fei ¿chumngechi quimafuiñ chem ñi ayüqueel Jehová? Biblia mu quintuaiñ chumngechi ñi raquiduamquen Jehová ca eluhuaiñ taiñ adnieaeteu.

10. ¿Chumngechi quimafuiñ Jehová tañi raquiduam?

¹⁰ Quimafuiñ Jehová tañi raquiduam papeltufiliyiñ Biblia ca inaduamliyiñ chumngechi ñi piuqueyenquechi adniequefiel pu che (Jer. 45:5). Papeltufiel mu Biblia, ramtuhuafuiñ: “Feita, ¿chem quimeltueneu Jehová mu? ¿Chem dungu mu norümuhuafun tañi raquiduamal Jehová reque?”. Iñchiñ quimnieiñ Chau Dios doi quimün-ngei iñchiñ mu (Is. 55:9). Feimu llellipuafiyiñ taiñ quimeltuaeteu taiñ femal tañi ayüqueel (Sal. 143:10). Ca llellipuafiyiñ taiñ quimafiel ca inayafiel ñi raquiduam (1 Juan 5:14).

11. ¿Chem ayüquei Jehová taiñ femal?

¹¹ Jehová ayüquei taiñ cüme pepicaucüleal petu ñi acunon Jehová ñi antü. Feimu ayüniei taiñ loncontucual chem dungu ñi doi falin-ngen (Mat. 24:44). Cafei ayüquelai taiñ fill raquiduamcüleal caquelu dungu mu (Mat. 6:31, 32). Feimu rume fill raquiduamcüleliyiñ taiñ cüdau mu, taiñ tremoleal, pu familia cam caquelu dungu mu, Jehová eluqueiñmu cümeque ngülam taiñ quimal chem chumal. Eluen nehuen ca quimün pifiliyiñ Jehová, quelluaiñmu llemai taiñ chaftuafiel taiñ huesa rupan (Sal. 55:22; Prov. 3:5-7).

12. Huesaque dungu rupafule rume mapu mu, ¿chem quelluaiñmu taiñ ayüucüleal? (Mateo 5:3).

¹² Rume cüdauconcüleaiñ serfinieafiel Jehová. Com iñchiñ huesa duamqueiñ rupamequen mapu mu huesaque dungu, huelu pepi catrütulayafuiñ. Feimu taiñ huesa raquiduamcülenoal, coneltuleaiñ Chau Jehová tañi cüdau mu. Yafüluucüleliyiñ taiñ cüme hueniyeafiel Jehová, ayüucüleaiñ, femngechi am taiñ deumaeteu quisu (papeltunge Mateo 5:3). ¿Chumngechi femafuiñ? Papeltuafiyiñ Biblia. Ca chem cüdau rume elungeliyiñ serfiafiel Jehová, cüme entuafiyiñ. Femliyiñ, ayühulafiyiñ Jehová ca cüme püneaiñ taiñ tiempo (Prov. 23:15).

13. ¿Chumngechi cüme püneafuiñ taiñ tiempo?

¹³ Iñchiñ taiñ pu cristianongen, eluucüleaiñ taiñ ‘ngünamcanoal taiñ tiempo’ (Efes. 5:15, 16). Tüfachi texto feipilai chumngechi adcünual müten taiñ fillque duam. Doi mai yafültucuqueiñmu taiñ cüme püneafiel taiñ tiempo petu ñi acunon Jehová ñi antü. Feimu, ¿chumngechi femafuiñ? Cuñiutucuhuaiñ taiñ rume ngüneduamnienoal huesaque noticia. Femfuliyiñ, hueluraquiduamelafeiñmu ca nehuen-ngehuelayafuiñ taiñ serfinieafiel Jehová. Ngünehuaiñ taiñ rume penienoal noticia, femngechi nieaiñ doi tiempo ca nehuen taiñ coneltual Jehová tañi cüdau mu. Ca raquiduamafuiñ chumngechi doi cüme entual taiñ amuldungun cüdau, ca doi tripayafuiñ taiñ huiño pemetuafiel pu che. Rume ayünieiñ pu che “ñi montual ca ñi cüme quimürpuafiel ti rüf dungu”, feimu rulpacünulayaiñ taiñ quelluafiel (1 Tim. 2:4).

14. ¿Chumngechi quelluqueiñmu cüdauconcüleal Jehová mu? (Ca inaduamnge ti adentun).

¹⁴ Cüdauconcüleliyiñ Jehová mu, acordanieaiñ chumngelu ñi rupamequen fentren huesaque dungu mapu mu. Inaduamniefilu iñchiñ ñi rupamequen quehuan, fillan ca cutran, müte raquiduamcülequelaiñ, Biblia am deu feipilelu ñi rupayal. Eluuquelaiñ taiñ hueluraquiduamelaeteu ti llican dungu, doi mai maneluhuaiñ Jehová ñi cüme elcünutuafiel com huesaque dungu. Quimnieiñ Jehová taiñ cuidanieaeteu, feimu tüngduamcüleaiñ (Sal. 16:8; 112:1, 6-8).

15. Cüme raquiduam nieliyiñ, ¿chumngechi quelluafeiñmu? (1 Pedro 4:7).

¹⁵ Raquiduamcüleaiñ chem tañi doi falintufalngen. Fachantü, fentren che re falintuquefi ñi cüme rupamequeal müten, feimu raquiduamquelai rume ñi epe aculen Jehová ñi antü. Cümei taiñ cüme rupaleal, huelu mülei taiñ nieal “cüme raquiduam”, femngechi inañmalayafiyiñ pu che poyequenofilu Jehová ñi raquiduam (papeltunge 1 Pedro 4:7). Cüme raquiduam nieliyiñ, doyümnielayaiñ taiñ cüme rupaleal, doi mai cüme dulliaiñ taiñ chumal. Cüme püneliyiñ taiñ tiempo, pengelaiñ taiñ inaquefiel Jehová ñi raquiduam ca taiñ raquiduamtucuniefiel ti doi falinque dungu (2 Tim. 1:7).

16. Feichi epe puucülelu ñi layal Jesús, ¿chem raquiduamcülei?

¹⁶ Jesús rumel cüme quimniei chem ñi doi falintufalngen. Epe puucülelu ñi layal rume, Jesús raquiduamcülefui ñi püntütripanoal Jehová mu ca ñi femal tañi ayüqueel. Feimu llellipui com tañi piuque mu. Huelu tañi pu discipulo femlaingün. Tañi llellipuafel, umaunagingün. “Ürcülerquei fente ñi hueñancün engün” (Luc. 22:39-46; Juan 19:30).

17. ¿Chumngelu fentren che conquei internet mu ca chem rupayafui? (Ca inaduamnge ti adentun).

¹⁷ Iñchiñ hueñancülafeiñmu huesaque dungu ñi rupamequen mapu mu, feimu ürcüleafuiñ Jesús ñi pu discipulo reque. Fentren che conquei internet mu ñi raquiduamcülenoal ñi huesa rupamequen mu. Quiñeque conqueingün redes sociales mu ñi quiñeucüleal tañi pu hueni ca tañi familia engün, ñi pengelal foto ca pichi nütramcayal. Ca conqueingün ñi peal fentrenque video ca aucantual. Fill antü fentren dungu tripamequei redes sociales mu, feimu pu che ngünamcayafui ñi tiempo tañi com peafiel. Iñchiñ taiñ femngechi rupamequenoal, ramtuhuafuiñ: “Tañi pequeel redes sociales mu, ¿rüf quelluqueneu cam raquiduamelqueneu falinochi dungu meu müten?”.

18. ¿Chumngechi cüme dulliafuiñ taiñ rulpaantüleal?

¹⁸ Pünefiliyiñ quiñeque aplicacion internet mu ñi peafiel pelicula, pichique video cam aucantual, duamfali taiñ cüme raquiduamcüleal. Feitachi dungu ayühulafeiñmu ca cüme duamelafeiñmu. Huelu cüme raquiduamcüleliyiñ, cüme dulliaiñ chem taiñ peal internet mu ca tunten tiempo mu. Raquiduamnge tüfa: deu taiñ pefiel quiñe video, ca video peufaluuquei, fei pengelelafeiñmu quehuan dungu cam pod dungu. Peafiyiñ chem ñi rupan quiñe peñi Asia mapu mu mülelu. Hunelu mu, pequefui video pengelquelu pichique troquiñ pelicula. Fei coni ñi inaduamafiel caquelu video peufaluuquelu. Rupachi antü meu, coni ñi peafiel pod dungu. Fei ca pichin mu, perpui pod cudumuhun, pornografia pingelu. Huelu quellueyu pu loncolelu ca tañi cümeque hueni, femngechi elcünutufi. ¿Chem femi? Borracünutufi quiñeque aplicacion tañi celular mu ca eluhui tañi pichiñma müten conal tañi telefono mu. Ñi rupan tüfachi peñi pengeli fente ñi falin-ngen taiñ cüme dullial chumngechi rulpaantüleal.

19. ¿Chem rupayafui doyümfiliyiñ ürcütual cam cüme rupaleal?

¹⁹ Cafei duamfali taiñ cüme raquiduamcüleal taiñ dullial chumngechi taiñ cüme rupaleal cam tripaliyiñ vacacion mu. Com iñchiñ duamnieiñ taiñ ürcütual, feita cümelcaqueiñmu ca cüme duamelqueiñmu. Huelu doi ayünieliyiñ taiñ cüme rupaleal, quiñepülecünuafuiñ reque ti doi falinque dungu (Filip. 1:10). Caque quiñeque iñchiñ mülei taiñ dullial chumngechi püneafiel taiñ tiempo. Taiñ cüme dullial taiñ chumal, ramtuhuaiñ: “Tañi elcünuelchi tiempo tañi cüme rupayal cam tañi cansatual, ¿pengelquepen mai tañi nien cüme raquiduam? ¿Doyümniequepefiñ mai tuchi tañi doi falin-ngen? ¿Pepicaucülepen mai acual Jehová ñi antü?”.

20. Hunentucuafiel Jehová taiñ mongen mu, ¿chumngechi cümelcayaiñmu?

²⁰ Chumngechi taiñ inaduampeel, rume yafüluhuaiñ chem no rume taiñ famentuaeteu ti doi falinque dungu mu. ¿Chem am? Taiñ coneltuleal Jehová ñi cüdau mu (Is. 48:17). Jehová ñi quellun mu, chaftuafiyiñ taiñ huesa rupamequen, rume raquiduamcülelayaiñ chem ñi rupamequen mapu mu ca doyümlayafiyiñ taiñ cüme rupaleal müten. Doi mai raquiduamaiñ Jehová reque, rume cüdauconcüleaiñ serfinieafiel Jehová ca raquiduamcüleaiñ chem tañi doi falintufalngen. Femngechi hunentucuafiyiñ Jehová taiñ mongen mu ca nüucüleaiñ reque “tati rüfngechi mongen meu” (1 Tim. 6:19).