Pu papeltuquelu ñi ramtuqueel

¿Chumül pu gobierno feipiai “¡com cümelcalei, ngelai chem dungu rume!”?

Rupachi revista Ti Huerquen ngüneduamiyiña Jehová raquiduamelafi tati “mari müta” ñi eluafiel tañi autoridad “tati quelü huapo huesa culliñ”. Tüfa feipilei com pu gobierno ñi eluafiel tañi autoridad tati Naciones Unidas, feita “huapo huesa culliñ ñi adentun” ca pingequei (Apoc. 13:14, 15; 17:3, 16, 17). Femngechi tati pu gobierno ca tati Naciones Unidas, doi autoridad niele, apümafingün com tati coilaque religion. Biblia ca feipi pu gobierno feipiai: “¡Com cümelcalei, ngelai chem dungu rume!”.b ¿Chumül feipingeai tüfa? ¿Deu apümcangele ti coilaque religion cam petu tañi femnon? (1 Tes. 5:3).

Quimlaiñ chumül tañi feipingeal “¡com cümelcalei, ngelai chem dungu rume!”. Com quimfuliyiñ ti dungu, Jesús feipilayafeiñmu taiñ rumel llihuatuleal ca taiñ trepeluucüleal (Mat. 24:42; 25:13; 26:41). Feula doi cüme ngüneduamaiñ ñi feipiel ta Pablo.

Pablo feipi: “Pu che feipimequeai ‘¡Com cümelcalei, ngelai chem dungu rume!’. Feimeu müten acurumeai ñi apümcangeal engün” (1 Tes. 5:2, 3). ¿Chem pin am tüfa? Taiñ publicacion mu feipingequei pichi faltale ñi conal ti fütra cutrancahun, feipingeai “¡com cümelcalei, ngelai chem dungu rume!”. Fei apümcangeai tati Fütra Babilonia, tüfa com tati coilaque religion, femngechi conai tati fütra cutrancahun. Taiñ publicacion ca feipiquei feipingele ñi com cümelcalen, femngechi pengelai ñi epe aculen ti fütra cutrancahun.

Huelu doi cüme ngüneduamfiel mu ti dungu, feipiafuiñ ñi rupayafel ca dungu. Hune apümngeafui com coilaque religion, fei hula feipingeafui “¡com cümelcalei, ngelai chem dungu rume!”. ¿Chemu feipiafuiñ? Peafiyiñ.

¿Chumngechi coneltuquei tati coilaque religion hueichan mu? Biblia nütramcalu Fütra Babilonia mu, feipi: “Com pu langümngelu mapu meu, hutrulngei tañi mollfüñ engün tüfachi huaria mu” (Apoc. 17:1, 5; 18:24). Cuifi ca fantepu mu, tati coilaque religion quelluntucuquei hueichan mu ca quisu ñi duam mu langümngequei fentrenque che. Feimu tati coilaque religion cüpalquelai tüngün ca cüme felen, doi mai hueichan ca quehuan dungu. Feimu deu apümngele ti coilaque religion, fei hula feipingeafui chi “¡com cümelcalei, ngelai chem dungu rume!”. Rupayafui chi feichi dungu, quimlaiñ.

Pu gobierno feipile: “¡Com cümelcalei, ngelai chem dungu rume!”, ¿ca chem rupayai? Pablo feipi: “Feimeu müten acurumeai ñi apümcangeal engün” (1 Tes. 5:3). Tati pu gobierno feipile ñi com cümelcalen, pürüm müten apümcangeaingün. Tañi femngechi rupayal, deu apümcangeafui tati coilaque religion.

¿Chumai Jehová tañi pu che? Pablo feipi: “Pu peñi, dumiñ mu miyauquelaimün. Feimu acurumele feichi antü, afmatulayaimün chumngechi afmatuafui ti hueñefe ñi pepaeteu ti pelon antü” (1 Tes. 5:4). Raquiduamnge tüfa mu: hunelu mu apümcangele tati coilaque religion, ca fei hula feipingele ñi com cümelcalen, Jehová ñi pu che quimnieai ñi pichilehuen tañi apümcangeal pu gobierno. Huelu pu gobierno hue feipilu am tañi com cümelcalen, raquiduamcülelayaingün tañi apümcangeal. Feimu acurumeai ñi apümcangeal chumngechi acurumequei quiñe hueñefe.

Taiñ ngüneduampeel, ¿chem quimnieiñ tañi rupayal? Pichiñma mu, pu gobierno ca ti Naciones Unidas doi autoridad nielu apümcayafi com tati coilaque religion. Femngechi conai tati fütra cutrancahun. Ca quimnieiñ tati pu gobierno feipiai: “¡Com cümelcalei, ngelai chem dungu rume!”. ¿Chumül feipiaingün? Quimlaiñ. Huelu peiñ epu dungu tañi rupayafel. Quiñe dungu, tati pu gobierno petu ñi apümcanofiel tati coilaque religion, feipiaingün tañi com cümelcalen. Huelu ca dungu rupayafui, pu gobierno hune apümcayafingün tati coilaque religion, fei hula feipiaingün tañi com cümelcalen. Üngümcüleafuiñ müten chem tañi rupayal. Quiñeque profecia doi quimürpuquefiyiñ huechurpumequen mu, caquelu adümquefiyiñ deu huechutripalu (ca ngüneduamnge Juan 12:16).

Quimnoliyiñ rume chumül ñi rupayal tüfachi dungu, doi falin-ngei taiñ püntütripanoal Jehová mu. Feimu llemai, “trepeluucüleaiñ ca cüme raquiduam nieaiñ”. Femngechi chem dungu rume rupafule, pepicaucüleaiñ (1 Tes. 5:6).