¿Chumngechi quelluafuiñ taiñ pu che testigongenolu?

1, 2. ¿Chemu cüdaungeafui taiñ cüme yeucüleal taiñ pu che testigongenolu?

QUIÑE huentru ayüfui Jesús tañi discipulongerpual, fei Jesús feipieyu: “Huiñotunge ruca mu tami pu che engün, fei nütramcalelfinge com ñi femün Chau Jehová eimi tami duam mu” (Mar. 5:19). Jesús ñi feipin tüfa, pengeli pu che ayüquei ñi feipiafiel cümeque dungu tañi pu che.

² ¿Acordaimi chum duamimi hue estudiafilu Biblia eimi? ¿Ayüpelaimi tami nütramcayal tami quimürpuel? Huelu tami pu che müte ayülai chi tami hue quimürpuel. Ca chumngechi tami entun tami nütram ayülaingün chi, feimu illcuingün. Femngechi rupalmi, tüfachi troquiñ quelluaimu tami cüme yeucüleal tami pu che engün ca tami serfinieafiel Jehová.

3. ¿Chem peaiñ tüfachi troquiñ mu?

³ Tüfachi troquiñ mu peaiñ 4 dungu taiñ cüme yeucüleal taiñ pu che iñchiñ. 1) Cutranpiuqueyefiliyiñ, quelluaiñmu taiñ nieal paciencia ca taiñ duamtuafiel, ayünole rume ñi allcütual Biblia ñi dungu, 2) chem femafuiñ huesa duameleliyiñmu, 3) chumngechi quelluafeiñmu nielelfiliyiñ paciencia taiñ pu che ca maneluuliyiñ tañi serfirpuafiel Jehová, ca 4) chumngechi pengelelafuiñ taiñ pu che taiñ piuqueyefiel.

CUTRANPIUQUEYEAFIYIÑ TAIÑ PU CHE

4. ¿Chumi Jesús pu che ayünolu tañi discipulongeal?

⁴ Jesús fentecünulai ñi quellufiel pu che ayünolu rume ñi allcütual tañi feipin. Jesús trürümuhui quiñe huentru mu cüdauquelu lelfün mu, femquei fillque dungu ñi quelluafiel quiñe anümca ñi hulal fün (Luc. 13:6-9). Jesús nütramcalu feichi trürümün dungu, doi 3 tripantu yeniefui ñi quellufiel pu judio tañi discipulongerpual. Jesús amulei ñi quellufiel tañi cutranpiuqueyefiel mu, ca feimu niei paciencia.

5. ¿Chemu Jesús cutranpiuqueyefi pu judio?

⁵ Jesús cutranpiuqueyefi pu judio, ngüneduami tati pu loncolechi religioso quellulaeyu engün tañi pülleconal Jehová mu. Feimu Jesús feipi feichi pu che “ufisa reque” feleingün nienolu inei tañi cuidayaeteu (Mar. 6:34). Epe puucülelu ñi layal Jesús, ngümai pefiel mu Jerusalén. Quimnielu cai alün che mülelu fei meu larpuai tañi feyentunon mu Jehová ca Jesús mu (Luc. 19:41-44). Jesús reque, raquiduamliyiñ chemu taiñ pu che duamniei ñi quimal ti rüf dungu, feita quelluaiñmu taiñ amuldungulelafiel.

6. Taiñ pu che testigongenolu, ¿chemu mülei taiñ nielafiel paciencia? (Gálatas 6:9).

⁶ (Papeltunge Gálatas 6:9). Taiñ pu che petu ayünole tañi quimelngeal Jehová mu, fentecünulayaiñ taiñ nielafiel paciencia ca cüme femafiyiñ. Quimnieiñ quiñe che alüñmayafui tañi cacünutual ñi raquiduam ca tañi maneluhual Jehová mu. Cuifi mu ca felefuiñ chi, ‘niequelafuiñ maneluhun ca quimquelafuiñ ta Chau Dios’ (Efes. 2:12). Huelu pengelngeiñ paciencia ca quellungeiñ ñi quimafiel ta Chau Dios. Acordafiel mu tüfa, ¿ca quellupelayaiñmu taiñ quelluafiel taiñ pu che ñi quimafiel Chau Dios?

¿CHUMAFUIÑ HUESA PINGELIYIÑ?

7. Jesús tañi pu peñi, ¿chemu feyentulaingün ñi Mesías ngen?

⁷ Jesús tañi pu peñi, ¿allcütupelaingün ñi femün afmatun dungu Galilea mu? (Luc. 4:14, 22-24). Huelu ellaca mu, feyentulaingün fei tañi Mesías ngen (Juan 7:5). ¿Chemu? Biblia feipilai, huelu Biblia feipi chemu quiñeque judio eluulaingün Jesús ñi discipulongeal. Quiñeque engün llicaingün tati pu che tañi caiñetuaeteu (Juan 9:18-22). Caquelu pefingün Jesús ñi tremcülerpun, feimu feyentulaingün Chau Dios tañi huercüeteu (Mar. 6:1-4). Jesús tañi pu peñi ca femngechi raquiduamingün chi. Taiñ pu che ca femngechi raquiduamqueingün chi iñchiñ meu.

8. ¿Chumngelu huesa piafeiñmu taiñ pu familia?

⁸ Raquiduamaiñ chumngelu chi taiñ pu che huesa piqueiñmu. Jesús tañi pu peñi peno feipifingün “hueluduamcülei” (Mar. 3:21). ¿Chumngelu feipingün chi? Biblia feipi feichi mu Jesús rume amuldungumequefui ca tremoltumequefui pu che, feimu pepi ilai rume (Mar. 3:20). Jesús hunentucuquefui tañi amuldungun, feimu peno hueluduamcülei pieyu tañi pu peñi. Ca femngechi iñchiñ taiñ doyümniefiel mu Jehová ñi dungu, taiñ pu familia huesa troquiafeiñmu chi, huelu taiñ femquen ca taiñ feipin mu quelluafuiñ tañi cacünutual tañi raquiduam.

9. ¿Chumngechi quelluafuiñ taiñ pu familia ñi doi cüme raquiduamtual pu testigo mu? (1 Pedro 3:1, 2; ca inaduamnge ti adentun).

⁹ Cüme duamelafiyiñ taiñ familia. Piuqueyenquechi nütramcafiliyiñ ca cümelcafiliyiñ, doi cüme raquiduamtuafui pu testigo mu (papeltunge 1 Pedro 3:1, 2). Raquiduamnge tüfa: quiñe lamngen tañi füta testigongelai, feimu amun mu trahun mu ca amuldungun mu, tañi füta quisulelu troquihuafui ca lladcüafui. ¿Chumafui taiñ lamngen? Adcünuafui tañi amuldungual mülenole tañi füta cam duamngemequele, femngechi tañi doi tiempo müleal tañi füta engu. Taiñ lamngen eluucülele ñi cacünutual quiñeque dungu ñi ayühulafiel ñi füta, fei doi cüme raquiduamtuafui pu testigo mu.

10. Huesa pingeliyiñ, ¿chumngechi inayentuafuiñ Jesús?

¹⁰ Huesa pingeliyiñ, quiñeque mu chem pilayafuiñ rume. Quiñeque che feipingün Jesús ñi putufengen ca ñi rume iquefel, huelu Jesús illculai ca eluulai tañi incañpehual, doi mai tañi femün mu pengeli ñi coilangen tañi feipin engün (Mat. 11:19). Ca pengeli tañi cüme yeniequefel ñi mongen ca tañi cüme rupaquefel (ca ngüneduamafuimi Juan 2:2, 6-10). Jesús reque, ca femngechi iñchiñ huesa pingeliyiñ, quiñeque mu duamfal-lai taiñ incañpehual, doi mai taiñ femün mu pengelaiñ taiñ cüme yenien taiñ mongen ca taiñ cüme rupaquen. Femngechi taiñ pu che allcürumele coilaque dungu pu testigo mu, quimtucuaingün tañi coilangen.

NIELELAFIYIÑ PACIENCIA TAIÑ PU CHE

11. Jesús, ¿chumngechi femfi tañi pu peñi?

¹¹ Biblia pengeli Jesús nielelfi paciencia tañi pu peñi. Raquiduamnge tüfa: Jesús femlu tañi hunen afmatun dungu Caná huaria mu, tañi pu peñi ca mülepelafuingün feiti mu (Juan 2:11, 12). Huelu feyentulaingün tañi Mesías ngen. Femfulu rume, Jesús famentulafi tañi pu peñi. Rupalu 3 tripantu peno, Biblia ca pengeli Jesús piuqueyenquechi nütramcafi tañi pu peñi tañi petu feyentunoeteu mu rume (Juan 7:5-8).

12. ¿Chumngelu maneluhuafuiñ taiñ pu che ñi serfiafiel Jehová?

¹² Rupachi tripantu, doi cüme quimürpufiyiñ fente tañi cutranpiuqueyechen Jehová. Feita quelluqueiñmu taiñ maneluucüleal taiñ pu che mu ñi poyerpuafiel Jehová. ¿Chemu feipiafuiñ? Deu conle tati fütra cutrancahun, tati pu che ca eluhuafui tañi serfiafiel Jehová. Pefile engün tañi apümcangen tati coilaque religion, acordayafuingün taiñ feipicünufiel ñi femngechi rupayal, fei eluhuafuingün tañi poyeafiel Jehová (Apoc. 17:16).a Fachantü cai, ¿chumafuiñ? Huesaque dungu rupale taiñ pu che, quelluafiyiñ. Femngechi ngüneduamle taiñ piuqueyefiel, ayüafui tañi doi quimafiel Biblia.

PENGELELAFIYIÑ TAIÑ PIUQUEYEFIEL

13. Fentren cüdau nielu rume iñchiñ serfiniefiel mu Jehová, ¿chem femlayaiñ?

¹³ Nieiñ fentren cüdau serfiniefiel mu Jehová. Femlu rume, quisucünulayafiyiñ taiñ familia ñi raquiduamnoal taiñ duamtunofiel ca taiñ piuqueyehuenofiel (Mat. 7:12). Peaiñ chumngechi pengelelafuiñ taiñ duamtuquefiel.

14. ¿Chumngechi pengelelafuiñ taiñ pu familia testigongenolu taiñ piuqueyeniefiel?

¹⁴ Elcünumequeaiñ tiempo taiñ nütramcayafiel. Ñi ngüneduamal engün taiñ piuqueyeniefiel, nütramelafuiñ taiñ chumquen. Quiñe dungu: pasiayauliyiñ cam tripaliyiñ taiñ pu hueni engün, huercülelafuiñ taiñ pu che quiñe mensaje taiñ chaliafiel ca pengelelafuiñ quiñeque adngechi foto. Ca eluafuiñ quiñe pichi regalo ca huirintuculelafuiñ quiñe carta, femngechi doi cüme yeucüleafuiñ. Femliyiñ com tüfachi dungu, pengelelafiyiñ taiñ piuqueyeniefiel.

15. Quiñe lamngen, ¿chumngechi pengelelfi tañi familia ñi piuqueyeniefiel?

¹⁵ Peaiñ ñi rupan taiñ lamngen Ana, Armenia mu mülelu. Tañi familia rumel trahuluuquefui tañi cüme rupayal, doyelchi mai mülelu cumpleaños ca caquelu fiesta. Ana testigongerpulu, tañi pu familia rume raquiduamtuculefuingün quisu mu. Llicalefuingün Ana ñi huesalcalerpual ñi mongen ca piuqueyehuelayaiñmu pifuingün chi. ¿Chumquei Ana tañi cüme duamelafiel? Quisu feipi: “Huitrancontufiel mu tañi pu familia, nütramcaquefiñ tañi chumlen ca tañi chumquen. Ca mangelquefiñ ñi amual tañi ruca mu, trahuluuqueiñ tañi pu hueni engün, femngechi epe com tañi pu familia quimnieñmaeneu tañi pu hueni ca rume cüme duamcülequeingün. Fentren tañi pu familia feipiqueingün tañi cüme mongen yenieel ca huesa duamcülehuelaingün iñche mu”.

16. Jesús, ¿chumngechi pengelelfi tañi peñi Santiago tañi duamtuniefiel? (Ca inaduamnge ti quimal dungu).

¹⁶ Pengelelafiyiñ taiñ falintuquefiel engün. Huiñomongetulu Jesús, peufaluhui tañi peñi Santiago, femngechi pengelelfi tañi duamtuniefiel (1 Cor. 15:7). Santiago rume ayüupelai ngüneduamlu ñi piuqueyenieteu Jesús. Tañi huiño petufiel Jesús, feimu peno feyenturpui Jesús tañi Mesías ngen. Fei hula, Santiago nütramcamefi chi tañi pu familia ñi feyentual engün Jesús mu (Hech. 1:14).b

17. ¿Chumngechi femafuiñ feipilu Romanos 12:15? (Ca inaduamnge ti adentun).

¹⁷ (Papeltunge Romanos 12:15). Taiñ pu familia rupayaingün cümeque dungu ca huesaque dungu tañi mongen mu. Iñchiñ duamtufiliyiñ femngechi dungu ñi rupalen engün, doi cüme raquiduamtuafuingün iñchiñ mu.c Quiñe dungu: quiñe taiñ pu familia niele quiñe hue püñeñ, pemeafuiñ ca yelelafuiñ quiñe regalo tati hue püñeñ, femngechi pengelelafiyiñ taiñ inaye ayüucülen. Cam quiñe taiñ familia layeluule, yafültucuafuiñ, huirintuculelafuiñ quiñe tarjeta cam quelluafuiñ duamnieelchi dungu mu. Ca acordanieaiñ taiñ mütrümafiel, mandalelafiel quiñe mensaje ca pemeafiel taiñ familia, doyelchi mai rupamequele huesaque dungu.

18. ¿Chumngechi inayentuafuiñ ti discipulo Andrés?

¹⁸ Quelluafiyiñ ñi quimafiel engün hueluque taiñ pu peñi ca lamngen. Ti discipulo Andrés ngüneduamlu Jesús tañi Mesías ngen, yemei tañi peñi Pedro tañi ca quimafiel (Juan 1:40-42). ¿Chumngechi inayentuafuiñ Andrés? Quiñe dungu, mangelafuiñ quiñeque taiñ pu pariente ñi amual Trahunhue Ruca mu, cam taiñ ruca mu ñi cüme rupayal taiñ pu hueni engün. Femngechi peafuingün taiñ cüme yenieel taiñ mongen.

19. Taiñ pu familia com adümnofule rume taiñ feyentuqueel, ¿chumngechi mülei taiñ dunguafiel? (1 Pedro 3:15).

¹⁹ (Papeltunge 1 Pedro 3:15). Taiñ pu familia cüme adümlayafuingün chi chumngelu taiñ femquenon quiñeque dungu, huelu rumel acordayaingün taiñ dungufiel ñom piuque ca yamün meu. Iñchiñ deu coneltuhuelaiñ quiñeque tañi huimtun engün, huelu eluuliyiñ ca antü mu taiñ trahuluhual, cüme duamelafiyiñ. Pemeafuiñ taiñ müleal quisu engün mu, trür iyafuiñ ca eluafuiñ regalo chem antü rume.

MANELUUCÜLEAIÑ TAIÑ PU CHE ÑI SERFIRPUAFIEL JEHOVÁ

20. ¿Chumngelu yafültucuqueiñmu Santiago ñi femürpun?

²⁰ Santiago turpu compañlafi Jesús amuldunguyaulu. Huelu larpulu hula Jesús, fei discipulongerpui (Gál. 1:18, 19; 2:9). Santiago piuquentucurpui Jesús tañi quimeltun, ¿chemu feipiafuiñ? Santiago huirintuculu tañi carta, entui fentren quimeltun nüucülelu Jesús tañi quimeltun mu.d

21. ¿Chemu maneluucüleaiñ taiñ pu che ñi serfirpuafiel Jehová?

²¹ Eluuliyiñ rume taiñ cüme duamelafiel taiñ pu che testigongenolu, cüme raquiduamtulayafuingün chi iñchiñ mu cam pilayafui chi ñi doi quimal Jehová mu. Huelu fentecünulayaiñ taiñ cüme duamelafiel. ¿Chumngelu? Femngechi inayentuquefiyiñ Jehová ca Jesús ñi cutranpiuqueyechen (Luc. 6:33, 36). Fentecünunoliyiñ taiñ duamtuquefiel engün, rupachi antü cacünutuafuingün tañi raquiduam. Acordayafuingün chi quiñeque quimeltun taiñ feipifiel. Feimu llemai fentecünulayaiñ taiñ duamtufiel engün, femngechi eluhuafuingün chi tañi serfirpuafiel Jehová iñchiñ reque, feita rume ayühulaiñmu.