Ti Biblia cüme elcünutueyu ñi mongen
Quiñe üllcha tañi huesa rupan rume pichicalu, ¿chumngechi ayüucületui tañi mongen? Quiñe rume huesañmangechi politico huentru, ¿chumngechi quiñe ñom amuldungufe ngetui? Calli quisu huiñoldunguaiñmu.
“Rume duamniefun poyen ca ngünayehun” (INNA LEZHNINA)
TRIPANTU ÑI CHOYÜNGEEL: 1981
CHEU ÑI TUHUN: RUSIA
ÑI RUPAN: HUESA RUPAN PICHICALU
TAÑI CUIFI MONGEN: Tañi pu chau pilu ngefuingu, iñche ca. Pichicalu iñche ayüucülefun, huelu nielu 6 tripantu tañi pu chau püntühuingu. Tüfa rume cutrantupiuqueleneu. Deu püntüulu engu tañi chau ca tañi hunen lamngen mülenagingu Troick mapu mu, tañi ñuque yeeneu Cheliabinsk mapu mu. Tañi ñuque ca huentru nietueyu, ngollifengefui tüfa, feimu ahucaquefeyumu.
Tañi hunen poyen-ngechi lamngen 1993 tripantu mu ürfi. Tüfa rume huesa duameleiñmu. Tañi ñuque putufengerpui ca huimacaquefeneu. ¡Ahungen! Peumatripaquefun tañi nieal quiñe doi cüme mongen, tüfa lle tañi poyengeal ca tañi ngünayengeal. Fillque iglesia mu quintun tüfa, huelu pelan.
TI BIBLIA CÜME ELCÜNUTUENEU ÑI MONGEN: Nielu 13 tripantu iñche quiñe compañ colegio nütramcaleneu quiñeque troquiñ Biblia ñi nütram. Rume ayüquefun tati pu cuifique che Noé ca Job, huesa rupan mu rume püramyequefuingu ta Chau Dios. Pichin rupa mu deu chillcatuquefun Biblia pu testigo engün ca amuquefun cheu ñi trahuluuquen engün.
Rume ayüfalngechi quimeltun quimürpun Chau Dios ñi dungu mu. Ayühuleneu quimfiel mu Chau Dios tañi üi (Salmo 83:18). Rume afmatulehueneu tañi huirintucungen Biblia chem ñi rupayal “epe puucülele ñi afal mapu müleyechi dungu” (2 Timoteo 3:1-5). Trefcütrefcüngehuei reque tañi piuque quimün mu tañi müleal huiñomongetun. ¡Felei, huiñopetuafiñ tañi lamngen! (Juan 5:28, 29).
Huelu com che ayüucülelafui iñche tañi femmequen. Tañi ñuque ca tañi padrastro chaftuquefuingu pu testigo ca ayüfuingu tañi fentecünuafiel tañi chillcatun Biblia. Huelu iñche rume falintuquefun tañi quimeltumequengen, fei raquiduamlafun rume tañi elcünuafiel.
Rume cüdaungefui tañi familia chaftumequeteu iñche. Fei hula rupai ca quiñe huesa dungu: tañi inan lamngen, compañquefeteu tañi amual trahun mu, ca ürfi. Huelu pu testigo quiñepülecünulaeneu engün. Fei engün mu quimürpun tati rüf poyen ca tati ngünayehun. Tüfa tañi quintuyahulquefel com tañi mongen mu. Quimürpun tañi rüf religion ngen engün, feimu lle 1996 tripantu mu fautizahun, testigongerpun.
CHEM CÜMELCAN LLOHUN: Nietun quiñe müna cüme huentru Dmitry pingelu, deu nieuyu 6 tripantu. Mür iñchiu cüdauqueyu Betel ruca San Petersburgo mu. Rupachi antü mu tañi pu chau doi respetaqueneu tañi testigongen iñche.
¡Rume mañumtuniefiñ ta Jehová tañi quimürpufiel! Püramyequefilu elueneu rüf ayühun tañi mongen mu.
“Fillque dungu ramtuuquefun” (RAUDEL RODRÍGUEZ RODRÍGUEZ)
TRIPANTU ÑI CHOYÜNGEEL: 1959
CHEU ÑI TUHUN: CUBA
ÑI RUPAN: CHAFTUQUEFILU PU AUTORIDAD
TAÑI CUIFI MONGEN: Choyüngen La Habana, Cuba mapu mu, tremün cheu ñi mülequefel re quehuan ca fentren pofre. Huechengen mu deuma adümcantuquefun yudo ca re quehuan aucantun.
Cüme estudiante ngefulu iñche cai, tañi pu chau ayüingu tañi amual universidad mu. Feiti mu doi üderpufiñ chumngechi ngüneniengen tati pais ca chaftufiñ ti pu autoridad. Quiñe rupa, tañi compañ iñchiu quehuatufiyiñ quiñe soltau tañi montuñmayafiel ñi tralca, fei allfülcañmafiyu tañi lonco. Fei tüfa mu carceltucungeyu tayu langümngeal. ¡Ahuem, niefun 20 tripantu müten huelu deu epe lalen!
Petu tañi mülen mu carcel iñche, raquiduamquefun tañi chumngechi eluucünuhual petu tañi tralcatueteu, “llicalelayan” piquefun. Huelu cafei huesa duamelquefeneu quiñeque ramtun: “¿chumngelu mülei norngenochi dungu mapu meu?”, cam “tüfachi mongen müten mülei, ¿fei ca müten?”.
TI BIBLIA CÜME ELCÜNUTUENEU ÑI MONGEN: Langümngelayaimu feipingeyu huelu 30 tripantu carceltucucünungeyu. Feiti mu quimürpufiñ quiñeque testigo de Jehová carceltucungen mu tañi religion ñi duam meu. Rume afmatuleneu tañi llicaquenon huelu ca tañi ñochi chengen engün. Ca norngenochi dungu mu carceltucungefui huelu illculelafuingün ca huesa duamcülelafui engün rume.
Pu testigo quimeleneu Chau Dios deu adcünufi tañi chumlerpual pu che mapu meu. Pengeleleneu Biblia mu tañi chumngechi quiñe jardincünungetuai tüfachi mapu ngenon mu fillad ca norngenochi dungu, re cümeque che mületuai ca rumel mongen nieaingün, re cümeque dungu nietuaingün (Salmo 37:29).
Ayüquefun tañi quimelaeteu iñche, huelu tañi ad pichin feingelafui fei engün mu. Turpu raquiduamquelafun tañi furiñmacünuafiel politica dungu ca ñochi chengeal rume, feimu eluhun tañi quisu papeltuafiel ti Biblia. Deu femfilu iñche, quimürpun pu testigo müten cüme yequeingün tañi mongen tati pu hunenque cristiano reque.
Tañi chillcatun Biblia mu quimürpun tañi cacünutual fillque dungu tañi mongen mu, por ejemplo tañi huesa tripadunguquefel, elcünual tati pütrem ca quiñepülecünual politica dungu. Cüdaungefui huelu Chau Jehová quellueneu, feimu huechuenturpufiñ.
Tañi ngünehual doi cüdautuquen. Petu llellipuquefiñ ta Chau Dios tañi quelluaeteu tüfachi dungu mu, tañi illcufe chengehuenoal. Rume quelluqueneu ñi feipilen Proverbios 16:32, feipilelu: “Tati huentru illcufemquenolu doi cümei tati nehuen-ngelu mu, ca ti quisutu ngüneuquelu doi cümei tati contuhuariaquelu mu”.
Puulu 1991 tripantu, carcel mu fautizahun quiñe apolechi barril co meu. Rupachi quiñe tripantu lifrecünungeiñ tañi amutual España mapu mu. Puulu müten iñche amun cheu tañi trahuquen pu testigo de Jehová, fei rume cüme lloungen familia reque. Feimu lle müten, quiñe hue mongen nietun reque.
CHEM CÜMELCAN LLOHUN: Feulaque quiñe ayühun ngechi huentru ngen, tañi domo ca tañi pu ñahue iñchiñ serfiquefiyiñ ta Chau Dios. Epe fill antü enseñaquefiñ caquelu chem pifel ta Biblia. Quiñeque mu acordaquen tañi huechengefel iñche, epe topantucuufulu lan dungu mu, fei rume mañumtuquen tañi fente cümelcaletun. Mongelen, huelu doi mai nien maneluhun. Llihuatuniefiñ tati hue mapu, cheu tañi müleal re nor dungu ca tati lan ngehuetulayai (Apocalipsis 21:3, 4).
[Feipin]
“Ayühuleneu quimfiel mu Chau Dios tañi üi”
[Adentun]
Tañi huentru iñchiu ayühunquechi quimeltuquefiyu Biblia pu pilungelu