Cornelio llohui Chau Dios ñi nehuen

Cesarea huaria mu mülefui quiñe Roma loncolechi soltau, Cornelio pingelu. Judiongelai, huelu pu judio yamniequeyu. Cüme piuquengefui, rume quelluquefi pu pofre. Cornelio maneluuquefui Chau Jehová mu, fei llellipuquefi. Quiñe rupa, quiñe cüme püllü peufaluhui, fei feipieyu: “Chau Dios allcütuquei tami llellipuel. Huercünge quiñeque huentru ñi amual ta Jope huaria mu. Yemeafingün ta Pedro tami pepayaeteu”. Feimeu müten, Cornelio huercüfi 3 huentru ta Jope, 50 kilometro camapulefui sur püle.

Petu ñi puunon engün Jope mu, Pedro pei quiñe afmatun dungu. Pefi quiñeque culliñ ñi iquenofel pu judio. Fei, feipingei ñi iyafiel. Huelu, Pedro feipi: “Turpu iquelan feiti culliñ podcülelu”. Fei, feipingei: “Feula Chau Dios lifngelu troquitufi feichi pu culliñ, feimu podcülelu pihuelayafimi”. Ca feipingei: “Mülei 3 huentru huecun ruca mu, compañfinge engün”. Pedro ramtufi pu huentru: “¿Chem duam nieimün?”. Fei engün feipi: “Huercüeiñmu Cornelio, loncolelu pu soltau Roma mu. Ayüniei tami amual tañi ruca Cesarea mu”. Pedro feipifi pu huentru ñi umayal engün tañi ruca mu. Ca antü hula, Pedro ca caquelu cristiano Jope mu mülelu compañfi engün ñi amual Cesarea mu.

Cornelio pefilu ñi acun Pedro, lucutunagi. Huelu Pedro feipi: “Huitrapürange. Iñche quiñe huentru müten eimi reque. Pu judio conquelaiñ pu judiongenolu ñi ruca mu, huelu Chau Dios feipieneu ñi cüpayal. Feula, ¿feipiafen chumngelu mütrümen?”.

Cornelio feipifi ta Pedro: “Llellipufiñ ta Chau Dios, fei quiñe cüme püllü feipieneu tami mütrümafiel, deu rupauyei 4 antü. Füreneen, quimeltumuiñ Chau Jehová tañi feipin”. Pedro feipi: “Feulaque loncontucun Chau Dios dullintuchequelai, llouquefi inei rume ayünielu ñi poyeaeteu”. Pedro quimeltufi engün fentren dungu Jesús mu. Fei Cornelio ca pu trahuluulu tañi ruca mu llohuingün Chau Dios ñi nehuen, fei fautizahuingün.