QUIMELTUN 92

Jesús peufaluhui pu challhuafe mu

Jesús peufaluhui pu apostol meu. Fei, rupalu quiñeque antü, Pedro amui ñi challhuayal Galilea lafquen. Compañnieyu Tomás, Santiago, Juan ca caquelu discipulo. Com pun meu mülefuingün farcu mu, huelu entulaingün quiñe challhua no rume.

Deu hunlu, pefingün quiñe huentru inaltu lafquen mu. Ti huentru ramtui: “¿Entulaimün challhua?”. “Femlaiñ” pingün. Ti huentru feipi: “Man püle tucufimün ti challhuahue”. Femlu müten, fentren challhua coni. Fei, pepi entulafingün ti challhuahue. Feichi mu, Juan quimtucui ñi Jesús ngen ti huentru, fei feipi: “¡Tati Ñidol ürque!”. Feimeu müten, Pedro ütrüftucuhui lafquen mu ñi puhual Jesús meu. Caquelu discipulo farcu mu puhuingün.

Puulu engün inaltu lafquen mu, pefingün cütral. Huente cütral mu mülefui cofque ca challhua. Jesús feipi: “Cüpalmün quiñeque challhua tamün entupeel, fei ñi cancatual cafei”. Ca feipifi: “Ipamün”.

Pedro amui ñi pemeafiel Jesús inaltu lafquen, fei caquelu discipulo inaeyu farcu meu

Deu icünulu engün, Jesús ramtufi ta Pedro: “¿Doi piuqueyeen tüfachi challhua mu?”. Pedro feipi: “Mai, Ñidol. Eimi quimnieimi, rume piuqueyeyu”. Jesús feipi: “Eluafimi iyael tañi pichique cordero”. Jesús ca huiño ramtufi: “¿Piuqueyeen, Pedro?”. “Ñidol, quimnieimi, rume piuqueyeyu” pi Pedro. Jesús feipi: “Cuidayafimi tañi pichique ufisa”. Jesús ca huiño femngechi ramtueyu, fei Pedro rume hueñancünagi ca feipi: “Ñidol, eimi cüme quimnieimi itrocom, iñche rume piuqueyeyu”. Jesús feipi: “Eluafimi iyael tañi pichique ufisha”. Cafei feipi: “Inaniecaen”.

“Jesús feipifi engu: ‘Inamuchi, chumngechi quintuquefimu challhua, iñche pengeluhuayiñ tamu quintuafiel ta che’. Feimeu müten elcünuingu ñi cüdau, fei inafingu ta Jesús” (Mateo 4:19, 20).