Jioba Ikukup Inye Ikikpukpo Emi Karake Ijija N̄a

Sabum nje nnyi isi, mabene me ikpakpa inu echi orọrọ sabum 1953 ya. Eman emi me Calgary, Canada me mgbọ ekitim Òso Akọn̄ Iba Etimbe Me Otutuuk Linyọn̄. Ire me akọp acha jaaba mè go oraraka ke gwun̄ ute enerieen̄ ge ekigwen Donald Fraser ogwu okigbọ oniin̄ ojot mgbọ otọbọ ubọk me uwu kiji mè ibene ikigọọk nga n̄a ikween̄ Baibul. Nga n̄a ichubọk ima atikọ enenen, ire, orukan̄ ikachieek ibe ọmọ itap lek ijaan̄ me lek ikwaan̄ ntitiin̄. Ire, nga n̄a ikachieek ibe orukan̄ ikifiak igban ọmọ ibe ikakaan̄ ntap-me-mun̄ me acha 1950. Ire, ire mkpọ nsan ibe ke nga n̄a ikwu me ikasoge acha iba eyi ikaan̄be ntap-me-mun̄ isan̄a. Nte n̄a ikare ogwu Ata-Ikọ Jioba me mgbọ ya, ire, itele ibe ebi Ata-Ikọ Jioba efuun̄ nga n̄a.

Sọnja usen iraraka me lek efuun̄be nga n̄a isan̄a, Alice, gwun̄ ute enenwaan̄ ge oninin̄ ugane ogwegwen emi ibe nnu nkween̄mkpọ ntitiin̄. Iriọọn̄ emi isi me mgbọ nkigọọk nga n̄a isi nkween̄mkpọ ntitiin̄ ota nde sabum orukan̄ orọbe ibe nga n̄a ikayaka ikọt isi. Ndodo nte n̄a mè makọt isi ye. Ichecheek ibe nsi mè ibe ke ọmọ mogọọk emi isi “mgbọ ge gaalek” inyi ọmọ mokọt itọn̄ gwun̄ ute enerieen̄ ogwu onyinyi usem me usen efuun̄be nga n̄a. Nte n̄a inwọọn̄ adasi nkween̄mkpọ isibe ya enenen. Usem inọbe me nkween̄mkpọ ya ike ọmọ chieen̄ ire lek itumube ifieek ikekisi nkween̄mkpọ etete nde me nde geelek. Ike mgbọ okije, ibebene ikisi nkween̄mkpọ ota nde igbaalek.

Me mgbọ ya, ogwu ibot ikasi me nkween̄mkpọ etete nde ikekigwen erieen̄ ebi ikup me uwu ikpa ya, ogwu inọ erieen̄ kan̄ ira ibe “emi owa.” Me usen nkween̄mkpọ ge, ntutumu ibe mè egwen erieen̄ n̄a si. Gwun̄ ute ya otọtọn̄ emi, ire, ikado mè ire ngobo itet mkpọ igọbọbe ọmọ igwegwen erieen̄ n̄a me nkween̄mkpọ ya.

Nkariọọn̄ ibe ke mbagọgọọk ikinyi usem me nkween̄mkpọ ntitiin̄ ire ekigwen erieen̄ n̄a isibi! Egwegwen erieen̄ n̄a me nde ogọgọọk, nchechieek “emi owa.” Eyi nkween̄mkpọ osibibe, bọn ute irieen̄ mè ibaan̄ enunu ikinitọn̄ emi. Nde inen mè inen iraraka me lek, enyinyi emi okpọkọ ikpa eyi mwuukbe lek itumu ikọ ofolek ya.

Owot ifieek emi enenen! Me mgbọ ya, esinyi ebi erieen̄ kiban̄ okupbe me uwu ikpa ya usem ebenyi, ema ekisa nkikek mgbọ gweregwen isa ire jeeta inyi usem cha me nkween̄mkpọ etete nde. Me mgbọ ya, kpekinyi ene mkpọ nrọ ibe efuk Baibul gaalek. Nte n̄a itap ubọk inyi emi nkọt nneen̄ usem ya, mè irọ ibe nkween̄ usem ya mkpọ òsoso akọp mgbọ iba sabum usen mbanyi usem ya orebe. Eyi nnyibe usem ya isan̄a, ogwu okikpọ chieen̄ me lek nkween̄mkpọ usen ya onyinyi emi nteme ogbegbe. Ike mgbọ okije, Jioba isa nte n̄a, bọn ute irieen̄ mè ibaan̄ melek ntitiin̄ kan̄ ikpukpo emi.

JIOBA IKUKUP INYE IKIKPUKPO EMI

Alice, ogwu mwuukbe lek ikpa mkpọ ofolek ikpukpo emi me mgbọ mbenebe ikisibi uko. Me mgbọ ya, ere Baibul ita ke eji ekifuk inyi ene me uko mè enyi ene ya ikpa. Isikem mgbọ mbatumu ikọ, Alice modadasi itumu inyi ene ya ogwu ọmọ orebe mè ibe mfuk adasi ere Baibul. Eya isiraka, manenibọkọ ukpatu ya mè ifuk òso ere Baibul iba mè eyi òso ita mè inyi ene ya ikpa. Ike mgbọ okije, nkwekween̄ ubọk ekibene ukpatu. Me acha 1954, nte n̄a okakaan̄ ntap-me-mun̄ mè ikup inye ikikpukpo emi me ikwaan̄ ilolook ata etip. Eyi irebe ibe ke kpunu nga n̄a, ọmọ gaalek okikpukpo emi, ikisa ikpukpukpo emi ibe nkaan̄ ata mgbaan̄je melek Jioba. Ikakisa isisibi uko mè nkween̄mkpọ ntitiin̄ ifit ifit. Ota nde isirere, nriọọn̄ ibe ke eji mesibi uko mè isi nkween̄mkpọ ntitiin̄.

Nkween̄ ogbogbo mkpọ me akọp mè acha iba nkupbe me uwu ikpa ya echi otatap ubọk inyi emi ike acha okije. Kubọk inu njeen̄, nkween̄ ubọk ekifuk ifuk mè ubọk ekitumu usem ebeke ijaan̄. Ebeke melek ubọk ekige mkpọ eyi nkween̄be itap ubọk inyi emi me ikwaan̄ nkisi me mgbọ keyi me ere ibot ikwaan̄.

Ebi ene mikido emi mkpọ orọrọ mmabe okwa enenen. Nga n̄a mè nte n̄a mima okwa si. Nkween̄ ubọk ekifit piano me mgbọ nrebe acha jaaba ikerere ibe ke ogwu ijejeen̄ kiji ikikeek ibe ke nkariọọn̄ ubọk ekifit. Itumu inyi nte n̄a ibe mè nkayaka inikween̄ okwa ya. Ngobo itet mkpọ orọrọ itumube ikeya, nkachubọk ikaan̄ olilọk ikwekween̄ piano ya.

Onyan̄ inen mè inen iraraka, nte n̄a omumun̄ ofifi ogwu enenwaan̄ ojejeen̄ emi okwa. Mgbọ keyi, nkween̄ ubọk ekikọt okwa mè ikifit piano ijaan̄. Mgbọ nkupbe ijija, nkaan̄ ata ida isasa ikọt okwa, nkekikọt okwa igak usini ebi melek n̄a si. Nsirọ ikeya, mira ikiwak emi ubọk mè iyaka ire ikiche mkpọ inyi emi. Inu ntobe me isi ire ikwekween̄ okwa inyi nkaan̄ ikpa unye isasa ikijeen̄ okwa, inyi nkaan̄ mkpọ mbakọt isa ikikpọ chieen̄ me lek n̄a mije nkiweek igbọgbọ oniin̄ eyi ojot mgbọ. Ire, ike mgbọ okije, nnenimun̄ ibe ke mbakifafiat ogbogbo mgbọ ikikween̄ okwa mè ikineen̄ lek iban ule ebekinyi eji ike eji ekikween̄ okwa ya. Eya orọ, ntetele uwu ikpa ya mè ibene ikigbọ oniin̄ eyi ojot mgbọ me acha 1963.

IGBỌGBỌ ONIIN̄ OJOT MGBỌ IKISA UNWỌỌN̄ INU

Mgbọ oniin̄ iso acha ge sabum erọbe emi ogwu okigbọ oniin̄ osibi esese mè iria emi isi Kapuskasing okup me Ontario. Ire gwun̄ ute Daniel Skinner ogwu osasa ogbogbo acha ire ugane n̄a melek n̄a egbaan̄ isi ikwaan̄ me ama ya. Ijeen̄ emi ogbogbo mkpọ ofolek ubọk ekineen̄ mkpọ me ntitiin̄. Mgbọ nrebe akọp acha iba, enyinyi emi ikwaan̄ ikekigọọk ikpọ chieen̄ me lek ntitiin̄, eya orọ, nkaan̄ owuwa mkpọ mbakween̄. Ibele emi ejit enenen imumun̄ ibe ke ntitiin̄ ikpọkpọk ikigon aban me lek ikpukpukpo nsabọn irieen̄ me ntitiin̄. Ire bọn ute chi itet lek inye, ema mekọt irọ owuwa ikwaan̄ inyi Jioba ikerere me mgbọ ema ekupbe ijija!

Ugwem ikiyọt me Kapuskasing usini mgbọ, mije, ere ikimalek itọọk mè iyaka ire ikimalek iyok. Daniel melek n̄a ekimalek ije ukot ukot isi ere geelek eji ebesi. Ge me lek mkpọ onyinyi emi unwọọn̄ me lek ikwaan̄ yi ire irọriọọn̄ gwun̄ ute enenwaan̄ ge ekigwen Linda Cole ogwu oyayaka inire Linda Splane.

Linda ima isisibi uko, ikaan̄ si ogbogbo ebi ikije ichak. Ikinwọọn̄ icheche mkpọ inyi ene, ikaan̄ ata ejit mè ima ikekije iriaak lek ebi ene. Goldie nga Linda ire ata akpat ukot inyi bọn ute me ntitiin̄. Nte kan̄ Allen ikawuuk lek ima ebi Ata-ikọ Jioba. Ikerere ibe ke Allen ikisisaak ema, Goldie ikisasa Linda mè ebi ngwan̄ kan̄ ebirieen̄ John mè Gordon isi nkween̄mkpọ mè ikijeen̄ ema ubọk ekilook ata etip. Me esese esese mgbọ, Goldie, Linda, John mè Gordon migbọ oniin̄. Ike mgbọ ojebe, Allen onenibọkọ atikọ itap mè itet lek inye me ntitiin̄.

Me acha 1965, egwegwen emi ibe nsi Kingdom Ministry School me otu agọọk ikwaan̄ okup me Canada inyi nsi mbọkọ kpokpo mgbaalek. Mbọkọ kpokpo me uwu ikpa ya iso onyan̄ ge. Eyi nkupbe me uwu ikpa ya, egwegwen emi ibe ntap ikpa isisi Gilead. Nkakekeek ibe ke makọt ire ge me lek ebi ekiria isi ofifi ido isi ilook ata etip, ire, ntatap ikpa ya. Ebi ijejeen̄ kiji me Gilead mikimalek itumu inyi eji agan̄ eji ekirọ ijaan̄ mè agan̄ eji ebetap efuuk isọkọ. Adasi nteme enyibe emi ire mè nsa irọriọọn̄ otutuuk mkpọ mbakọt iriọọn̄ ofolek ntitiin̄ eyi nkupbe me uwu ikpa ya. Eya ire ata nteme bak lek emi ire akọp acha iba mè ge me mgbọ ya.

Ge me lek mkpọ eji ekween̄be me uwu ikpa Gilead ire ubọk ekisa akpata mbia, akpata ogugo, mè ikpa ilook-etip irọ mkpọ. Nnwọọn̄ eyi enenen. Nkariọọn̄ ibe ke makaan̄ oruru omimin enenen me lek ayaya mkpọ nkween̄be yi. Sọnja mgbọ, makpa iwele oruru nkaan̄be.

MIRIA EMI ISI SENEGAL

Usen inen mè inen iraraka me lek nsibibe uwu ikpa ya, emi mè Michael Höhle ogwu eriabe melek n̄a ibe esi elook ata atip me ofifi ido esisi ido Senegal me Africa. Me ike mgbọ ya, ebi ikilook ata etip me ido ya meso efit ene ge.

Nrọ ikwaan̄ n̄a iso onyan̄ inen mè inen sabum mbọkọbe ogwen isisi ikwaan̄ me otu agọọk ikwaan̄ usen ge me nde. Ire otu agwut ge me ere ebi eriabe isi ofifi ido ibe esi elook ata etip ekiluk ke esa irọ otu agọọk ikwaan̄ ya. Ikerere ibe ke ere ya isip enenen, gwun̄ ute Emmanuel Paterakis, ogwu okikpọ chieen̄ me lek otu agọọk ikwaan̄ ikakilọ ikekeek emi mgbọ geelek ibe ke otu agọọk ikwaan̄ ya ikeke ichit chieen̄ ntitiin̄ Jioba me ido ya. Ikaan̄ mgbọ gwun̄ ute Paterakis otumube ibe mè eji ege ikpa ejet otutuuk ebi eriabe ibe esi elook ata etip me ofifi ido esa etap ema efuuk me owot. Me mgbọ ya, ikafet igogon ikpa, eya orọ, eji esasa ubọk ige ikpa chi ge ge. Ichubọk ire unye ikwaan̄, bak me lek eji ebemumun̄ ijaan̄ ibe ke eji kpege inu geege ilọ.

Ike nkibem lek igwugwu ikom ika inu me uwu n̄a me eririeen̄ ya, Gwun̄ ute Paterakis oyayaka ikpa ge itap emi me ubọk mè itumu ibe: “David, ntitiin̄ ige ikpa ijet owu.” Me mgbọ nchilibe ikpa ya, mmumun̄ ibe ke ire ge me lek ikpa ngebe! Inu yi ijeen̄ emi ufiak irebe ikakaan̄ ulibi inyi ntitiin̄ Jioba me ekakpọge chieen̄ me lek ubọk otu agọọk ikwaan̄ osabe imin mè iyaka ire isip ire.

Nrọ unene melek owuwa ene mè ikigọọk esese esese ebi ototun̄ ukan̄ me ntitiin̄ igbaan̄ ikup me ikakwun̄ Saturday. Mgbọ cha ichubọk ire mgbọ ubelejit! Mege inire chereyi, eji mikigbaan̄ ikpa usem. Nkween̄ ida usem French, eyi irebe ibe ke eya ore ida usem ekisa irọ mkpọ me Senegal ere mwuukbe lek isi ikwaan̄, ida usem ya ikitap ubọk inyi emi me mgbọ nkisi ikpọ esese esese otu agọọk ikwaan̄.

Me acha 1968, emi mè Linda echechieek ge ge use ibe ke eji mebat. Nsa iweweek ikwaan̄ mbakirọ me mgbidim mgbọ me Senegal me owuwa onyan̄ inyi emi mè Linda mekọt ikigbọ oniin̄ ojot mgbọ me ere ya. Ire, nkamun̄ geege bak me lek ebi ikinyi ene ikwaan̄ me ama ya ekinyi ebi inan̄a me ido ya ikwaan̄ kpan̄asi ebi inan̄a me ofifi ido. Nnenigwu ikom ifo Canada, ike mgbọ ojebe, emi mè Linda ekakana olom mè nwa, eji ekakaan̄ ikwaan̄ igbọgbọ oniin̄ ojot mgbọ eyi osisibi esese me gwun̄ ama okup me New Brunswick ekigwen Edmundston, okup iriak lek Quebec.

EJI MIGBỌ ONIIN̄ OJOT MGBỌ ME NEW BRUNSWICK MÈ QUEBEC

Sabum eji esibe ama chi, kpunu ebi ikilook ata etip irere bọn owot ama chi, ikerere ebi ekigọọk ikween̄ Baibul kpewa. Uwu uriaak Catholic ochubọk ikaan̄ mgbaan̄ me ugwem owuwa ebi ene me ama chi. Sọntiik more otutuuk uwu ke ege ibe ke kpeweek imumun̄ ebi Ata-Ikọ Jioba. Me mgbọ ya, eji kpemalek iriọọn̄ ufiak irebe ikakaan̄ ulibi me lek inu egebe ya kubọk mgbọ keyi, eya orọ, eji ekisisi uwu geelek mè ire mige mkpọ sa kpege. Me nde geelek, ebi uwu uriaak Catholic ekitatap me ikpa ekisa ilook etip me ama ya ibe: “Eji esi eweek ebi Ata-Ikọ Jioba mè elap ema esibi me ama kiji.” Eji ene ini gaalek ere ebi Ata-Ikọ Jioba me ama ya.​—Victor mè Velda Norberg mè Linda mè emi​—eya orọ, eji miriọọn̄ ebi ema ekitumu mkpọ ofolek.

Mkpabawuuk adasi inunu ogwu sekut me ere ya. Eyi igọọkbe eji ikup nde ge isan̄a, itutumu ibe, inu enyi ebekọt irọ isasa itap ubọk inyi ebi ikup me ere yi ire inwenwene ubọk ema ekimun̄ ebi Ata-Ikọ Jioba. Bene me mgbọ ya nyi isi, inu eji ekebirọ ire eya, itet mun̄ si! Sọnja sọnja, ebi ene ebebene ikimun̄ esese okup me lek ebi Ata-Ikọ Jioba ebi ikisiki lek mè ebi ibot uwu uriaak Catholic ebi ikigumu lek.

Eyi eji ekupbe me ntutun̄ ere ya me mkpọ obet lek acha ge, egwegwen eji ibe mè esi etap ubọk enyi ntitiin̄ ge okup me Quebec. Eji mikup iso onyan̄ gweregwen melek bọn ute irieen̄ mè ibaan̄ ebi ikichili ubọk me ntitiin̄ ya, sabum egwenbe eji me lek ikwaan̄ sekut.

Akọp mè acha ini ke eji esa isi ikikpọ esese esese ntitiin̄ me Quebec. Mgbọ cha ichubọk ire mgbọ ototop! Ikwaan̄ ilolook ata etip ikpọkpọk ikije inyi isi me ere ya. Me ntitiin̄ eji ekisi ikpọ, eji mikimun̄ esese esese ebi ototun̄ ukan̄ ikikween̄ mkpọ inyi ekọt ekana ebi Ata-Ikọ Jioba!

EJI KPEWUUK BỌN UTE IRIEEN̄ MÈ IBAAN̄ EBI IGBEGBE UTOON̄-EJIT

Ikifet imama bọn ute irieen̄ mè ibaan̄ ebi ikiluk me agan̄ ekitumu French me Canada. Bak me lek ema kpekifiaan̄ irọ mkpọ, mikibele ejit, mè ikisa me uyok uyok ejit irọ mkpọ si. Ire, ikakifet inyi ema ibọbọkọ atikọ itap bak lek ukeme okinan̄a me ubọk ebi ototun̄ ukan̄ kiban̄ mikinye. Usini uga mè ute ebi kpere ebi Ata-Ikọ Jioba etumu inyi nsabọn kiban̄ ebi ikikween̄ Baibul ibe: “Ikayaka ikigọọk ebi Ata-Ikọ Jioba ikween̄ mkpọ, ire enyi ikup inye ikigọọk ema ikween̄ mkpọ, eji merieen̄ enyi isibi me uwu!” Nsabọn cha ekukup inye ikigbe utoon̄-ejit inyi Jioba ikerere me isi ukeme. Jioba ichubọk imọnọ ema ibene enenen!

Me mgbọ keyi, makpa si mkpọ ofolek bọn ute ebi ikigbọ oniin̄ ojot mgbọ mè ebi ikigbọ oniin̄ osisibi esese ebi isisi ikwaan̄ me Quebec. Ogbogbo me lek kiban̄ ire ebi inan̄a me ofifi agan̄ me Canada. Isọkọ me lek ikwekween̄ ida usem French, ema mikween̄ si mkpọ ofolek ebi ene me agan̄ ya mè ubọk ema ekikeek mè ikirọ mkpọ eyi irebe ibe ke ebi uwu uriaak Catholic ekakaan̄ mgbaan̄ me lek agan̄ ilile me lek ife cha.

Ekiria ebi ikigbọ oniin̄ ojot mgbọ eyi osibi esese isi ere kpunube ebi ikilook ata etip. Bak me lek ebi ama cha kpema ebi Ata-Ikọ Jioba, ikiyọt ikakaan̄ ere iluluk mè ikwaan̄ ebekọt irọ me mgbidim mgbọ. Ikerere ebi olom mè nwa ibabat ayaya ekekigọọk ebi bọn ute igbaan̄ iluk mkpọ ososo ene ini, gweregwen mè iyaka ire jeeta me uwu ge inyi mekọt ikpe ikpoko uwu cha. Ebi ikigbọ oniin̄ ojot mgbọ chi ekisisi unye ikwaan̄. Ema esibene ikigọọk ene ge ikween̄ mkpọ, ekinyinyi ene ya otutuuk ntap-ubọk ema ebekọt inyi. Mgbọ keyi Quebec okaan̄be owuwa ebi ikilook ata etip, owuwa ebi ikigbọ oniin̄ ojot mgbọ chi miyaka isi ofifi agan̄ ufiak ominbe.

Me mgbọ eji ekisi ikpọ ntitiin̄ kubọk ebi Sekut, eji mikisa imumun̄ ibe ke eji migọọk ebi ijija isibi uko me ewelegwe Saturday. Eyi itap ubọk inyi eji ekọt eriọọn̄ mbet lek rumurumun̄ ema ekichichini. Usini me lek ebi ijija chi ire ebi ikilook ata etip me ofifi ido mè iyaka ire, ebi ikaan̄ esese esese ikwaan̄ me ntitiin̄.

Me mgbọ ya, usini mgbọ, eji kpekikaan̄ ikpoko onyan̄ isita mije usini ntitiin̄ kpekikọt ikaan̄ ikpoko ilep inorie mè ofifi ofifi mkpọ eji eweekbe. Me irek cha, eji ekiyayaka lek imaan̄ me lek Jioba isan̄a, mije, ọmọ gaalek oriọọn̄ mbet lek irek eji ekupbe me emen. Ikajuuk eji itele me mgbọ geege. Ikitap ubọk inyi eji ekọt ekesi ekpọ ofifi ofifi ntitiin̄ si.

INU NKWEEN̄BE INAN̄A ME LEK EBI BỌN UTE

Kubọk mwuukbe lek itumu, nkaan̄ oruru enenen inan̄a me lek ikwekween̄ me uwu ikpa Gilead ubọk ekisa akpata mbia, akpata ogugo mè ikpa ilook-etip irọ mkpọ. Me mgbọ ya me Quebec, eji mikaan̄ owuwa irek isasa akpata mbia, akpata ogugo mè ikpa ilook-etip ilook ata etip. Ekimalek ibe mè emi melek gwun̄ ute Léonce Crépeault ogwu Sekut ogbo n̄a egbaan̄ esi ikwaan̄ yi, ọmọ ire ogwu ochuchubọk iriọọn̄ ubọk ekisa inu ekisa ilook etip chi irọ mkpọ. Eji esikije igbet lek ene ge me lek ebi isisibi isi me ere ikwaan̄ yi, kpan̄asi gwun̄ ute Léonce Crépeault obojeen̄ ene ya ubọk isabe iriọọn̄ ikwaan̄ ya ire, ira itumu inyi ene ya ibe: “Emi melek ogwu melek n̄a ire ebi ikikpa ikọ Awaji. Sọntiik mkpọ ke eji eriọọn̄ ofolek ubọk ekisa akpata mbia, akpata ogugo mè ikpa ilook-etip irọ mkpọ. Ire, ntitiin̄ kiji iria eji ibe enetumu enyi ebi ene mkpọ ofolek chinichini ilile ebi Ata-Ikọ Jioba eyi eji ebekaan̄. Eji menwọọn̄ ntap-ubọk geelek obokọt inyi eji.” Bak me lek usikilek kan̄, owuwa ebi ene mikima itatap ubọk inyi eji.

Ike mgbọ ojebe, otu agọọk ikwaan̄ oraria emi ibe mè ngọọk ge me lek ogwu okigọọk ebi usọ ikan kiji igbaan̄ isi ikwaan̄, gwun̄ ute Glen How nsi ikwaan̄ me lek usini inu echi oyọyọt, echi ebi ikisa akpata mbia, akpata ogugo mè ikpa ilook-etip irọ mkpọ ekaan̄be ulọk me lek. Nkaan̄ oruru me lek kpokpo mbọkọbe me Gilead mè inu nkween̄be me ubọk gwun̄ ute Léonce. Ire ugbana isa inyi emi igọgọọk gwun̄ ute Glen How isi ikwaan̄. Ikakaan̄ ukpook geege me isasa ikan ido itumu ikọ me ibot ntitiin̄. Ichubọk ikaan̄ ima odọdọk me lek Jioba.

Me acha 1985, eraria eji isi sekut okup iriaak me lek uwu nte n̄a me agan̄ ichep ura me Canada, eyi orọrọ ibe eji ekaan̄ irek ikekisi itap ubọk inyi ọmọ. Onyan̄ ita iraraka me lek eji erebe ere ya, nte n̄a okwukwu. Eji ekukup inye ikisi ikwaan̄ kiji me sekut ya mege ire acha 1989 mgbọ egwenbe eji ibe enesi ikwaan̄ me ere ibot ikwaan̄ me United States. Eyi ike eji chieen̄ enenen. Isibi ibe ke eji metele ikwaan̄ ikekisi ikpọ ntitiin̄ eji erọbe me mkpọ oboso akọp mè acha onaan̄ge. Me acha chi oraraka, eji mikup me efit efit uwu mè igọọk bọn ute ebi ikichilli ubọk irie inorie me owuwa mgbọ. Eji michubọk itọn̄ otutuuk ebi ichichili isotu uwu kiban̄ inyi eji eluk mè egọọk ema erie mkpọ!

EJI MISI UNITED STATES

Me mgbọ eji erebe Brooklyn, ebebe mè nsi ikwaan̄ me Service Department. Nkibebele ejit me lek kpokpo mbọkọbe me ere ya. Ge me lek inu nkween̄be ire mè nkakikeek ibe ke ngobo mkpọ itet me mgbọ nkarọriọọn̄ otutuuk atikọ ofolek mkpọ ya. Me acha 1998, mbebene ikisi ikwaan̄ me Writing Department, ere nkikween̄ ubọk ekige mkpọ mege ire mgbọ keyi. Me owuwa acha oraraka, nkaan̄ irek itatap ubọk inyi gwun̄ ute John Barr, ogwu ibot ikasi ebi Writing Committee. Nchubọk inwọọn̄ kpokpo nkaan̄be me mgbọ ngọọkbe ogọt isi ikwaan̄. Ichubọk ikaan̄ ata eru echi ogbegbe ibe ogwu eyi Karais ikaan̄.

Ikitop emi me lek igọgọọk bọn ute irieen̄ mè ibaan̄ ebi isisiki lek ikigbaan̄ isi ikwaan̄ me Writing Department. Ema ekibebeek Jioba mgbọ geelek ibe itap ubọk inyi ema ekọt erọ ikwaan̄ kiban̄ ejaan̄. Ema miriọọn̄ ibe ke Jioba okisa ekwukwu mbuban kan̄ itap ubọk inyi ema ekọt erọ inu geelek ema ekirọ, ikare unye mè iriọọn̄-inu kiban̄ ke ekisa irọ.

Ichubọk ire irek ilile isa inyi emi mè Linda isisi ikpọ ebi bọn ute irieen̄ mè ibaan̄ ikigbe utoon̄-ejit ikup me efit ido ge mè akọp. Eji mimun̄ mbet lek ima ebi ikilook ata etip me ofifi ido, ebi ikikpọ chieen̄ me lek otu agọọk ikwaan̄ mè esese ebi ikup me ikwaan̄ ojot mgbọ ekaan̄be me lek Jioba. Ire si ugbana imumun̄ ubọk ebi bọn ute ebi ikup me esese esese ntitiin̄ ekijeen̄ uyok uyok ejit mè ikigbe utoon̄-ejit ike ema ekito ikwaan̄ Ama Ubọọn̄ me isi ikerere me mgbọ akọn̄, uyọt-mkpọ mè tukutuku. Me atikọ, Jioba ima ema enenen!

Eyi acha acha orakabe, Linda ichubọk itap ubọk inyi emi nkọt nrọ ikwaan̄ n̄a ntet. Ọmọ ichubọk ima ebi ene mè ikiweek esese esese oniin̄ isasa itap ubọk inyi ema. Ikirọ ijaan̄ me lek ibebene ukpatu. Itap ubọk inyi owuwa ebi ene ibe enekween̄ atikọ. Itap ubọk si inyi usini ebi itetele ntitiin̄ ibe eyaka ebene eketọbọ ebum enyi Jioba. Linda ichubọk ire ata inyinyi Jioba onyibe emi! Ike eji ekinin̄ ugane, eji mibele ejit ibe ke eji mikaan̄ bọn ute irieen̄ mè ibaan̄ ebi ijija ikitap ubọk ikpọ chieen̄ me lek esese esese ufiak kiji.​—Mak 10:​29, 30.

Ejit n̄a ijojot me lek itọn̄ ike nkikeek mkpọ ofolek inu echi obọbọkọ irek me akọp acha jeeta oraraka. Nchieek me lek inu yi ogwu okwa otumube: “Jei Awaji, karake nrebe nsabọn irieen̄, owu okijeen̄ emi uyeke ikwaan̄ okisi; ikeya si ke nkikpa inyi ebi ene abayaage ire mgbọ keyi.” (Itọn̄ 71:17) Mweek ikukup inye ikirọ eyi me otutuuk ugwem n̄a.