Uji Ilile kè Nuwa

Ike mgbọ okije, ebi ene ekekiwa me inyọn̄ ijọn̄ yi. Ogbogbo me lek kiban̄ ire ebi ijo. Usini ebi osat me emen inyọn̄ mikana ebi ijo si. Ema mitele ere iluluk kiban̄ me emen inyọn̄ mè inu me inyọn̄ ijọn̄ yi. Ire oriọọn̄ inu orọrọ ema erọbe inu okup ikeya ni? Inyi ema ekọt enwene ekana ebilene mè emọnọ ebibaan̄ enyi lek kiban̄.

Ebi osat mè ebibaan̄ cha ekakaan̄ nsabọn ebirieen̄. Nsabọn irieen̄ cha emimiin̄ ikana ebi inyenye lek enenen mè ebi afa. Ema mitap unan me lek ebi ene. Jioba ikpotele ibe inu okup ikeya ikpọkpọk ikirọ. Eya orọ itumube ifieek isasa mun̄ ile ifiat ebi ijo cha.

Ire, ikaan̄ ogwu enerieen̄ ge okup esese bak lek imabe Jioba. Erieen̄ kan̄ ire Nuwa. Ikaan̄ nwa ge mè nsabọn ita ekigwen, Sem, Am, mè Jefet, ema ge ge si mikaan̄ nwa. Jioba otutumu inyi Nuwa ibe inama uji ilile ge ufuna ọmọ mè ebi ototun̄ ukan̄ kan̄ ekọt eluk etibi mun̄ ile ya. Enama uji ilile ya kubọk okop okiwook me isi mun̄. Jioba itumu si inyi Nuwa ibe itap owuwa anam me emen uji ilile ya inyi ema si ekọt eluk.

Nuwa obebene mgbọ yaage ikinama uji ilile ya. Iben Nuwa mè ebi ototun̄ ukan̄ kan̄ akọp acha go inanama uji ya. Ema enama uji ilile ya ubọk Jioba otumube ibe mè ema enama. Me okike mgbọ ya, Nuwa itaba ebi ene ubọk me utọn̄ ofolek mun̄ ile ya. Ire, kpunu ene geege ogbagban̄ ọmọ.

Me ota kan̄, mgbọ ema ebenin̄ uji ya okekem. Kè eji ekween̄-nu inu oyaka ibọkọ irek.