Nyia Wu Ndwokɔzɩzɩbɛ Nwʋ Adwɩnɩba

1-2. Mɩnla yɛ ihyinyia kɛɛ yɛyɛ na ama yɛahʋla yɛava anyɩnlɩlelɛ yɛagyina ye ndwokɔzɩzɩbɛ munwa a? (Kila mfonyini yi sʋ̃.)

ASƲ̃ iluwa wu dedi ti eyiyiaa nsisi, anzɛnyɩɩ wu mmusunwamaa nɩɩ mmenii mvʋlɔ botwodwuu betiyia wʋ a? Asʋ̃ adimakɛlɛ anzɛnyɩɩ ebaniyɛlɛ ɩtɩɩdɩɩ wʋ a? Anzɛnyɩɩ iluwa odwokɔ be mɔɔ ɩdʋ wʋ anzɛnyɩɩ wʋ dɔvʋlɔ be mɔɔ iwu nɩ ti, edii ɛyɛkɛ a? Ɔhawʋ nɩɩ amanɩyɛnwʋnlɛ hyɛ Gyehova yɩ nɔhʋanlɛ azʋ̃mɩvʋlɔ sʋ̃maa bɛ ɛbɩlawɔlɛ nu manlɩ. Na ebiye a, wʋzawʋ sʋ̃ ɛlɛ wu ndwokɔzɩzɩbɛ dɩyɛ.—Ndw. 90:10.

² Sɛ yɛkɔhʋla keli ye ndwokɔzɩzɩbɛ nwʋ egyima bʋwɔ a, ɩsɛ kɛɛ yenyia nwʋmɔ adwɩnɩba. Mɩnla ti mɔɔ eyi nwʋ hyinyia a? Iluwakɛɛ sɛ yɛányia ye ndwokɔzɩzɩbɛ nwʋ adwɩnɩba anzɛnyɩɩ adwɩnɩ mɔɔ Gyehova lɛ wɔ nwʋmɔ nɩ be a, ɩkɛyɛ sɩ kɛɛ yɛkɔhʋla yekeli nwʋmɔ egyima bʋwɔ. Sa yɛkʋla yɛfa eyi yetindiã abiye mɔɔ ɩkãã kaalɩ nwʋ. Sɛ awɔhwɛ mɔɔ ɩwɔ kaalɩ yɩ anyunu nɩ munwala yɛ evinli, na sɛ debe la ɔhʋanɩ yɩ zʋ anzɛnyɩɩ ɩkɔdɔɔ kuma nu po a, ɩlɔ́nwʋ yɩ. Naasʋ̃, sɛ awɔhwɛ yɩ yɩ anyunu tɩ a, ɩma ɩnwʋ ɔhʋanɩ yɩ nu bʋwɔ. Wɔ dɩyɛzumanlɛ eyi nu nɩ, yɛkɔnwʋ (1) adwɩnɩba mɔɔ ɩsɛ kɛɛ yenyia wɔ ye ndwokɔzɩzɩbɛ nwʋ, (2) mɔɔ ɩkɔhʋla ikezi mmɩlɩ mɔ yeányia ye ndwokɔzɩzɩbɛ nwʋ adwɩnɩba nɩ, nɩɩ (3) mɔɔ yɛkɔhʋla kɛyɛ mmɩlɩ mɔ ndwokɔzɩzɩbɛ be dwodwu nɩ.

ADWƖNƖBA MƆƆ ƖSƐ KƐƐ YENYIA WƆ YE NDWOKƆZƖZƖBƐ NWƲ

3. Mɩnla ti mɔɔ ɩsɛ kɛɛ yede yetiã numɔ kɛɛ yɛkɔhɔ zʋlɔ yekeyiyia ɔhawʋ wɔ oyuwadɩ tanɩ eyi nu a?

³ Ndwokɔzɩzɩbɛ lɔ́kʋla kɛbalɩ ye ti wɔ oyuwadɩ tanɩ eyi nu kyɩ̃. Mbɔmɩ sʋ̃maa mɔɔ yɛáli munli na Setanɩ sʋ̃ idii oyuwadɩ yɩ zʋ nɩ mɛyɩ, mɔɔ ɩdɩ bela sa yeyiyiaa ɔhawʋ. Akʋ̃ sʋ̃, iluwakɛɛ oyuwadɩ yɩ awielɩyɛ yɩ ibikee paa nɩ ti, asianɩ azʋlɔtʋ dɩkɛɛ azɩlɛwʋsʋlɛ, nɩɩ nzuloyilɛ sizi wɔ nnɩka nnɩka. Na mmenii mvʋlɔ sʋ̃ nwʋ amanɩyɛ iluwa tanɩyɛlɛmaa mɔɔ bowuli zʋlɔ nɩ ti. (Mt. 24:8; 2 Tim. 3:13) Gyehova kodu ɔhawʋ eyimmɔ munwala tʋ. Naasʋ̃ sɛ idi nwʋmɔ egyima sikalɛyɩ a, ɩkɛyɛ dɩkɛɛ mɔɔ ɩbʋwaa Setanɩ ma ikeli oyuwadɩ yɩ zʋ. Meti Setanɩ lanwʋ la idii oyuwadɩ eyi zʋ nɩ mɛyɩ, ɔhawʋ lɛ́palɩ ye ti kyɩ̃.—Odw. 9:12.

4. Mɩnla ɔhawʋ mvʋlɔ yɛ Kilisinyiamaa yiyia a?

⁴ Kilisinyiamaa yiyia ɔhawʋ mvʋlɔ. Nɩ Gyisɛsɩ ta kã kile yɩ adʋwavʋlɔ yɩ kɛɛ, iluwa be dedi ti bekeyiyia odwodwudiyialɛ. (Mt. 24:9; Dwɔ. 16:2) Meti sɛ yeyiyiaa odwodwudiyialɛ a, ɩáyɛ yɛ nnwʋánlɩ kʋlaa. Yezi kɛɛ yɛyɛɛ sutiye yɛkɛma Gyisɛsɩ, na yezi yɛ kɛnɣa kɛɛ yekeli nɔhʋanlɛ kɔhɔ kɔbʋmɩ awielɩyɛ. (1 Tɛs. 3:​3, 4) Sɛ yeyiyiaa ndwokɔzɩzɩbɛ na yɛkɔ zʋlɔ yedi nɔhʋanlɛ a, yɛkɔhʋla kenyia anwʋlazʋ paa kɛɛ yɛyɛɛ mɔɔ ɩtɩnɣɛ, na Gyehova nɩɩ Gyisɛsɩ sʋ̃ kɛma yekenyia nnwʋanlɩ mɔɔ íni awielɩyɛ. Akʋ̃ sʋ̃, ɩma yɛda yɩ ali kɛɛ Gyehova yɛ ɩfata paa kɛɛ idi yɛ zʋ tumi a, na kɛ Setanɩ mɔɔ ɩdɩ awohwivʋlɔ nɩ a. Setanɩ yɩ awohwi ndwokɔ yɩ be yɛ lɛ kɛɛ, mɔɔ adasamaa nyia wɔ Gyehova yɩ kɛnɩ nɩ ti yɛ bɔsʋ̃mɩ yɩ a. Meti mɔɔ ɩkɛyɛ na nɔhʋanlɛ mɔɔ ɩwɔ odwokɔ eyi nu ɩala ali nɩ, ɩfa ɔhawʋ mɔɔ numɔ yɛ sɩ ɩba Gyehova yi mmenii zʋ. (Dwb. 1:​9-11) Naasʋ̃ sɛ yɛkɔ zʋlɔ yedi Gyehova nɔhʋanlɛ a, yɛda yɩ ali kɛɛ yɛdɔ Gyehova na ɩma yɩ anyɩ de paa.—Ɛɣɛ. 27:11.

5. Mɩnla yɛ Odwokɔhanlɛvʋlɔ 7:​13, 14 ma yɛnwʋ yɩ a? (Kila mfonyini yi sʋ̃.)

⁵ Kɛ ndwokɔzɩzɩbɛ munwala yɛ Gyehova si yɩ ɔhʋanɩ a. Gyehova lɛ́yɛlɩ tanɩ kyɩ̃, na ɩáva nninyeni tanɩ itwe yɛ kila. (Gye. 1:13) Naasʋ̃, mɩnla ti mɔɔ Bulombunli Sɔlɔmɔnʋ hanlɩ kɛɛ “amanɩyɛnwʋnlɛ eɣile” dɩ “nɔhʋanlɛ Nyamɩnlɩ yɩ egyima” a? (Kɩnga Odwokɔhanlɛvʋlɔ 7:​13, 14.) Odwokɔ eyi iáhile kɛɛ, Gyehova yɛ ɩma nninyeni tanɩ sizi a, mfomi ɩma nwʋmɔ ɔhʋanɩ ma isizi. Meti Sɔlɔmɔnʋ yɩ odwokɔ yɩ bʋwa yɛ ma yɛnwʋ adwɩnɩba mɔɔ ɩsɛ kɛɛ yenyia wɔ ye odwohilalɛ nwʋ. Mɔɔ ili bɔmʋnlɩ, ɩma yɛnwʋ kɛɛ oyuwadɩ tanɩ eyi nu mɛyɩ, itwu mmɩlɩ be a, nninyeni kɔhɔ bʋwɔ, ɩyɛ sʋ̃ a, nninyeni lɔ́kɔ bʋwɔ. Naasʋ̃ eɣile mɔɔ nninyeni kɔhɔ bʋwɔ nɩ, íni kɛɛ yɛma yɛ ɛɣɛɛlɛ fi kɛɛ yɛkɛla Gyehova asɩ, iluwakɛɛ nninyeniba munwala zʋ̃ yɩ kɛnɩ. Mɔɔ ɩtɔ zʋlɔ anwɩ̃, Sɔlɔmɔnʋ yɩ odwokɔ yɩ sia ma yɛnwʋ kɛɛ yɛlɔ́kʋla ‘yɛkɔnwʋ mɔɔ ikezi wɔ ɛhyɩ̃ be.’ Meti kɛ nninyeni kɔhɔ bʋwɔ kɛma yɛ wɔ eɣile yi nu anzɛnyɩɩ yekeyiyia ndwokɔzɩzɩbɛ mɛyɩ, yézi. Sianti yɛ lɛ kɛɛ, asianɩ kʋla tʋ baabayɛlɛmaa nɩɩ tanɩyɛlɛmaa munwala.

6. Mɩnla sianti fʋlɔ ti yɛ Gyehova ma ɔhʋanɩ ma yeyiyia odwohilalɛ a? (Hibulumaa 12:​7, 11)

⁶ Wɔ ye odwohilalɛ nu po nɩ, Gyehova bʋwa yɛ ma yɛnwʋ kɛɛ íni kɛɛ yɛfa yɛ nwʋ yetiã yɛ nwʋ zʋ mfomi ɩsɛ kɛɛ yɛfa yɛ nwʋ yetiã yɩ zʋ. Gyehova nwʋ atɩɩtɩɩ bela mɔɔ yeduwaa numɔ nɩ, na iziyeziye yɩ nwʋ kɛɛ ɩkɔwʋwa yɛ eɣile bela. Ɩwɔ numɔ kɛɛ, ɩma nwʋmɔ ɔhʋanɩ ma ndwokɔzɩzɩbɛ tʋ yɛ ma yedi ɛyɛkɛ dɩyɛ, naasʋ̃ ɩbʋwa yɛ ma yɛnwʋ mɔɔ ɩsɛ kɛɛ yɛyɛ. Akʋ̃ sʋ̃, ɩyɛ nninyeni be ma yɛnwʋ yɩ petee kɛɛ ɩdɔ yɛ, na ɩma yenyia anwʋzɩzɩbɛ mɔɔ yɛkɛva kegyina ɔzɔ ɔhawʋ nɩ yi munwa. (Ndw. 23:4) Sɛ yeyiyiaa atɩɩtɩɩ be a, ɩma yɛnwʋ subanɩ azʋlɔtʋ be mɔɔ ɩsɛ kɛɛ yɛbɔ numɔ mmɔdɩnɩ, na Gyehova bʋwa yɛ ma yetu mpʋnɩ wɔ numɔ. (Kɩnga Hibulumaa 12:​7, 11.) Kɛ ndianwʋ nɩ, mmɩlɩ mɔ Dwoobu iyiyiaa odwohilalɛ nɩ, ɩɣa nwʋnlɩ yɩ kɛɛ ɩsɛ kɛɛ isuma kãnwʋazɩ. Ɩwɔ numɔ kɛɛ, kɛ Gyehova yɛ ɩvalɩ odwohilalɛ yɩ ɩɣalɩ Dwoobu zʋ dɩyɛ, naasʋ̃ ɩmanlɩ nwʋmɔ ɔhʋanɩ na ama ɩawʋwa Dwoobu ma ianyia ozumalɛdɩyɛ azʋlɔtʋ be. (Dwb. 42:​1-6) Ɩávalɩ nwʋmɔ mɔɔ ɩkɔdʋ yɛ bela nɩ, yezi kɛɛ dɩyɛ bela mɔɔ Gyehova ma nwʋmɔ ɔhʋanɩ nɩ, sɛ ɩkyɛ kɛɛ mɩnla la po a, yɩ tʋ kodua. Sɛ yɛfa nɔhʋanlɛlilɛ yekyina ye odwohilalɛ nu pindinyii a, Gyehova keyila yɛ.—Wul. 8:​35-39.

7. Mɩnla ti mɔɔ wʋ anyɩ kɔhʋla kele mmɩlɩ mɔ eyiyiaa wu dedi nwʋ odwodwudiyialɛ nɩ a?

⁷ Sa yɛ anyɩ kʋla de mmɩlɩ po mɔ yeyiyiaa odwodwudiyialɛ nɩ. Sɛ iluwa wu dedi ti eyiyiaa odwodwudiyialɛ a, áma enyia adwɩnɩ kɛɛ Gyehova ɩyɩ yɩ anyɩ ɩma wʋ. Mfomi, wu odwodwudiyialɛ nɩ da yɩ ali kɛɛ Gyehova de wʋ tiã nu, iluwakɛɛ ɛyɛɛ mɔɔ ɩsɔ yɩ anyɩ. (Mt. 5:​10-12) Sɛ yɛnwʋ yɛ odwodwudiyialɛ yɩ wɔ ɔzɔ ɔhʋanɩ yɩ zʋ a, ɩma yɛ anyɩ de. Na ɔzɔ pɛpɛɛpɛ yɛ asʋ̃mavʋlɔ yɩ yɛlɩ a. (Egy. 5:​40-42) Akʋ̃ sʋ̃, sɛ yɛkɔ zʋlɔ yedi nɔhʋanlɛ mmɩlɩ mɔ yeyiyiaa odwodwudiyialɛ a, ɩbʋwa bɛzabɛ mɔɔ bɛázʋ̃mɩ Gyehova nɩ ma bɛba bɔnwʋ nɔhʋanlɛ odwokɔ mɔɔ ɩfalɩ yɩ nwʋ nɩ na ‘bɛyɩ yɩ ayɛlɛ.’ (1 Pit. 2:12) Mɔwʋ dɩyɛ sunzu Dwosefi nwʋ kila, mmɩlɩ mɔ ɩlanwʋ la ɩla fiyiadɩ po nɩ, Gyehova wʋwalɩ yɩ, na iyilalɩ yɩ. Ɔzɔ la Gyehova kɔwʋwa yɛzayɛ sʋ̃ mmɩlɩ mɔ yɛnwʋʋ amanɩyɛ be nɩ a.—Gyn. 39:​3, 23.

8. Mɩnla dɔkʋ̃ yɛ ɩkɔhʋla kɔwʋwa yɛ ma yɛkɔhɔlɩ zʋlɔ yekeli nɔhʋanlɛ mmɩlɩ mɔ yeyiyiaa ndwokɔzɩzɩbɛ be nɩ a?

⁸ Ndwokɔzɩzɩbɛ mɔɔ yeyiyiaa nɩ tʋ kodua. Dwoobu yi odwokɔ yɩ ma yɛnwʋ kɛɛ, atɩɩtɩɩ nɩɩ amanɩyɛnwʋnlɛ mɔɔ yeyiyiaa nɩ tʋ kodua. Mɔɔ ɩdɩ yɛ lɛ kɛɛ, “Gyehova yilalɩ Dwoobu wɔ yɩ nnwʋanlɩ eɣile mɔɔ ili awielɩyɛ yɩ nu nɩ ɩdɛlalɩ ahyɛasɩ yɩ.” (Dwb. 42:12) Ɔzɔ la yɛ wɔ oyuwadɩ fʋlɔ yɩ nu nɩ, Gyehova keyila yɛ a. Atɩɩtɩɩ nɩɩ amanɩyɛnwʋnlɛ mɔɔ ɩhyɛ yɛ ɛbɩlawɔlɛ nu manlɩ nɩ tʋ kodua, na yekenyia nnwʋanlɩ mɔɔ íni awielɩyɛ. Yekilaa ɔhʋanɩ kɛɛ yɛkɔnwʋ kezimɔ Gyehova yɩ anʋhʋba eyi kɛɣa numɔ, meti bɛmá yeminyia yɛ nwʋ yɛva nɔhʋanlɛlilɛ yegyina ye ndwokɔzɩzɩbɛ munwa pindinyii!—Mt. 24:13.

MƆƆ ƖKƆHƲLA IKEZI MMƖLƖ MƆ YEÁNYIA YE NDWOKƆZƖZƖBƐ NWƲ ADWƖNƖBA NƖ

9. Sɛ yeányia ye ndwokɔzɩzɩbɛ nwʋ adwɩnɩba a, mɩnla yɛ ɩkɔhʋla ikezi a?

⁹ Ɩávalɩ nwʋmɔ odwohilalɛ bela mɔɔ yeyiyiaa nɩ, ɩsɛ kɛɛ yenyia nwʋmɔ adwɩnɩba na ama ɩávalɩ ɔhawʋ mvʋlɔ ɩáɣalɩ yɛ zʋ eɣile be. Kɛ ndianwʋ nɩ, ebiye a yɛkɛdɩ nɣanlɩ kɛɛ Gyehova yɛ ɩlɛ ɔzɔ ɔhawʋ yɩ ɩbaa yɛ zʋ a. Odwokɔ eyi be dʋlɩ Dwoobu. Mmɩlɩ mɔ ɩnwʋʋ amanɩyɛ nɩ, nɩ yɩ adwɩnɩ yɛ yɩ kɛɛ Gyehova yɛ igyĩ yɩ amanɩyɛnwʋnlɛ yɩ mɛda a. Eyi manlɩ Dwoobu ‘wuli yɩ nwʋ ɛdɩnɣɛlɛnii dɛlalɩ Nyamɩnlɩ.’ (Dwb. 32:2) Ɔzɔ la yɛ Nawomi sʋ̃ dɩlɩ nɣanlɩ a. Ahyɛasɩ yɩ, nɩ isunzu kɛɛ Gyehova yɛ ɩma ɩnwʋʋ amanɩyɛ a. (Wu. 1:​13, 20, 21) Sɛ Dwoobu nɩɩ Nawomi hɔlɩ zʋlɔ nyianlɩ ɔzɔ adwɩnɩ yɩ a, ankɩ bɛkɛva Gyehova nwʋ ɛya na bɛáyiaki kɛɛ bɔsʋ̃mɩɩ yɩ. (Ɛɣɛ. 19:3) Naasʋ̃, Gyehova wʋwalɩ bɛ ma benyianlɩ bo ndwokɔzɩzɩbɛ yɩ nwʋ adwɩnɩba na iyilalɩ bɛ wɔ bɔ nɔhʋanlɛlilɛ yɩ nwʋ.

10. Sɛ yeyiyiaa odwohilalɛ be a, ebiye a, mɩnla adwɩnɩ yɛ yɛkɔhʋla yekenyia a?

¹⁰ Yezi kɛɛ, kɛ Gyehova yɛ ɩfa odwohilalɛ ɩba yɛ zʋ a. Naasʋ̃ ebiye a, yɛkɔwɔ yɩ tʋ kɛɛ yɛtɩɩ nɣanlɩ kɛɛ Gyehova ɩádwɩnɩ yɛ nwʋ. Adwɩnɩ mɔɔ ɩdɩ zɔ nɩ kɔhʋla kogolɔ yɛ abɔkɔ na yeayiaki Gyehova yɩ ɔzʋ̃mɩnlɛ po. (Ɛɣɛ. 24:10) Bulombunli Devidi nɩɩ nkɔmɩhyɛnii Habakuki munwala yiyialɩ ndwokɔzɩzɩbɛ wɔ bɛ ɛbɩlawɔlɛ nu. Nɩ itwu mmɩlɩ be a, bɛ adwɩnɩ yɛ bɛ kɛɛ Gyehova iádiye bɛ mpayɩwɔlɛ. (Ndw. 10:1; Hab. 1:2) Naasʋ̃, bɛáyiaki mpayɩwɔlɛ kyɩ̃. Gyehova diyeli bɛ na ɩhɔlɩ zʋlɔ ɩwʋwalɩ bɛ, na ɩkɔhɔ zʋlɔ ɩkɔwʋwa wʋzawʋ sʋ̃.—Ndw. 10:17.

11. Sɛ yeyiyiaa odwodwudiyialɛ na yeányia nwʋmɔ adwɩnɩba a, mɩnla yɛ ɩkɔhʋla kezi a?

¹¹ Sɛ yeányia ye odwodwudiyialɛ nwʋ adwɩnɩba a, ebiye a, yɛkɛdɩ nɣanlɩ kɛɛ, ankɩ íni kɛɛ Gyehova ma ɔhʋanɩ ma ɔzɔ odwokɔ yɩ tʋ yɛ. (1 Pit. 4:12) Ɔzɔ yɛ ɩdʋlɩ Gyisɛsɩ yɩ adʋwavʋlɔ yɩ a. Mmɩlɩ mɔ Gyisɛsɩ hã hileli bɛ kɛɛ bokodwodwu bekediyia yɩ na bɛahũ yi nɩ, bɛáde bedi kɛɛ debe mɔɔ ɩdɩ zɔ kɔhʋla kɔdʋ yɩ. (Lk. 18:​33, 34) Naasʋ̃ ɩávalɩ nwʋmɔ kɛɛ Gyisɛsɩ hanlɩ ɔzɔ odwokɔ yɩ hileli yɩ adʋwavʋlɔ yɩ nɩ, nɩ Pita sunzu kɛɛ íni kɛɛ Gyehova ma ɔhʋanɩ ma Gyisɛsɩ nwʋ ɔzɔ amanɩyɛ yɩ. Naasʋ̃ nɩ Gyisɛsɩ zi kɛɛ sɛ ɩfa yɩ adwɩnɩ idi mɔɔ Pita ɩkãã nɩ mɛda a, ɩkɔhʋla ɩkɛma ɩkɛyɛ sɩ ɩkɛma yɩ kɛɛ ɩkɛyɛ Gyehova yɩ apɛdɩ. Meti ɩhanlɩ Pita yɩ anyunu wɔ ɔzɔ adwɩnɩ mɔɔ inyianlɩ nɩ nwʋ. (Mk. 8:​31-33) Mmɩlɩ mɔ Gyisɛsɩ wuli po nɩ, kɛ ɛkɛnɩ la yɛ yɩ adʋwavʋlɔ yɩ dɩlɩ sianti mɔɔ iwuli nɩ tʋ a. Naasʋ̃, Gyisɛsɩ yi padi iákolɔ mfomi ɩhɔlɩ zʋlɔ ɩwʋwalɩ bɛ. Na mmɩlɩ mɔ iyiyialɩ bɛ wɔ yɩ awudunwolɩyɛ mɛda nɩ, iluwalɩ Ɛhɛlɛlɛ yɩ nɩ zʋ ɩwʋwalɩ bɛ ma bɔnwʋnlɩ sianti mɔɔ nɩ ɩsɛ kɛɛ iyiyia ɔzɔ atɩɩtɩɩ yɩ nɩ. (Lk. 24:​25-27, 32, 44-48) Ehilehilelɛ mɔɔ Gyisɛsɩ va manlɩ yɩ adʋwavʋlɔ yɩ mɔɔ nɩ bɔkɔdwɩnɩndwɩnɩ nwʋmɔ nɩ kɔwʋwa bɛ ma bekeziyeziye bɔ nwʋ bɛkɛma odwodwudiyialɛ mɔɔ nɩ ɩlɛ́kyɛ bɛbayiyia nɩ. Amɩyɛ sʋ̃, sa yɛkʋla yɛdwɩnɩndwɩnɩɩ Bayɩbʋlʋ nu ndwokɔ mɔɔ ɩkɔwʋwa yɛ ma yekeziyeziye yɛ nwʋ yɛkɛma odwodwudiyialɛ nɩɩ odwohilalɛ mɔɔ yekeyiyia nɩ nwʋ.

12. Sɛ yeányia ye ndwokɔzɩzɩbɛ nwʋ adwɩnɩba a, kɛ ɩkɛma yɛkɛdɩ nɣanlɩ keze a?

¹² Sɛ yeányia ye ndwokɔzɩzɩbɛ nwʋ adwɩnɩba a, ɩkɔhʋla kɛma yɛkɛdɩ nɣanlɩ kɛɛ ndwokɔzɩzɩbɛ mɔɔ yeyiyiaa nɩ dɩ kezi paa naasʋ̃ ebiye a na nɩ ɩ́dɩ zɔ ankasa. Yɛnwʋ eyi nwʋ ndianwʋ ɔkʋ̃ wɔ Gyisɛsɩ yɩ ndianwʋ mɔɔ ɩfalɩ egyimayɛlɛmaa mɔɔ nɩ bɛyɛ egyima wɔ nwanyɩ egyini nu nɩ nwʋ. Nɩ egyimayɛlɛmaa yɩ be tɩ nɣanlɩ kɛɛ bɛányia akatuwa mɔɔ ɩsɛ kɛɛ benyia nɩ. Naasʋ̃ egyini yi diibenyia yɩ hã hileli bo nu kʋ̃ kɛɛ: “Mʋ ɔhɔnwʋ, tiye, mɩlɛ́sizili wʋ donwuu.” (Mt. 20:​10-13) Nɩ egyimayɛlɛmaa yɩ nɩ tɩ nɣanlɩ kɛɛ egyini yi diibenyia ɩ nɩɩ bɛ iádi yi bʋwɔ naasʋ̃ nɩ ɩ́dɩ zɔ. Sianti mɔɔ ɩmanlɩ bɛdɩndɛnlɩ bɛ konza tʋ yɛ lɛ kɛɛ, akatuwa mɔɔ nɩ bekilaa yɩ ɔhʋanɩ nɩ, kɛ mɛyɩ yɛ bɛ sa hanlɩ yɩ a. Gyehova yɩ azʋ̃mɩvʋlɔ mbiyemmɔ wɔ kɛnɩ nnɛ mɔɔ ɩyɛ a bɛtɩ nɣanlɩ zɔ. Kɛ ndianwʋ nɩ, mbiyemmɔ sunzu kɛɛ bɔlɔ́kʋla kenyia ɔnwʋmɔ ɔhʋanɩ titili be mɔɔ bekilaa yɩ ɔhʋanɩ nɩ. Na wɔ mbiyemmɔ bɔ ɔfʋã nu nɩ, ɩyɛ sɩ ɩma bɛ kɛɛ bekeyiaki ɔnwʋmɔ ɔhʋanɩ be mɔɔ bɛ anyɩ deli nwʋmɔ bɛkɛma mmenii mvʋlɔ. Mɩnla yɛ ɩkɔwʋwa yɛ ma yekenyia adwɩnɩ mɔɔ Gyehova wɔ yɩ wɔ bʋwabɩlɛ mɔɔ ɩdɩ zɔ nwʋ a?

MƆƆ YƐKƆHƲLA KƐYƐ MMƖLƖ MƆ NDWOKƆZƖZƖBƐ BE DWODWU NƖ

13. Sɛ ndwokɔzɩzɩbɛ be twodwu a, mɩnla yɛ ɩkɔhʋla ikezi a?

¹³ Gyehova yɩ azʋ̃mɩvʋlɔ zi mɔɔ Bayɩbʋlʋ yɩ kã falɩ amanɩyɛnwʋnlɛ nwʋ. Na mbɔmɩ sʋ̃maa nɩ, yɛkɩnga ɛhɛlɛlɛndwokɔ azʋlɔtʋ mɔɔ ɩdɩ zɔ yɛfa yɛhyɛ bɛzabɛ mɔɔ bɔnwʋʋ amanɩyɛ nɩ ɛzɩzɩbɛ. Naasʋ̃, sɛ ndwokɔzɩzɩbɛ be tʋ yɛ a, ɩyɛ sɩ kɛɛ yekenyia nwʋmɔ adwɩnɩba. Kɛ ndianwʋ nɩ, ebiye a, yekenyia adwɩnɩ kɛɛ Gyehova ɩtwɩ̃ɩ̃ yɛ azʋ̃ anzɛnyɩɩ iádiye yɛ mpayɩwɔlɛ po. Sɛ yɛbɔ yɩ tʋ kɛɛ yenyiaa ɔzɔ adwɩnɩ yɩ a, mɩnla yɛ ɩkɔhʋla ɩkɔwʋwa yɛ a?

14. Mɩnla yɛ ɔkɔhʋla kɔwɔ nwʋmɔ mpayɩ mmɩlɩ mɔ eyiyiaa ɔhawʋ be nɩ a? (Fɩlɩpɩmaa 4:13)

¹⁴ Siã mmʋwalɩyɛ wɔ Gyehova kɛnɩ. Kã wʋ bʋwabɩlɛ yɩ nwʋ odwokɔ kile Gyehova na ma ɩnwʋ kezimɔ ɛtɩ nɣanlɩ wɔ nwʋmɔ. Sɛ ɔwɔ debe pɔkyɩɩ mɔɔ ɛpɛ kɛɛ Gyehova di nwʋmɔ egyima ma wʋ a, kã kile yi. Sa ɔkʋla siã Gyehova kɛɛ ɩvá yɩ sunzuma nwanzanwanza yɩ ɩwʋwa wʋ ma enyia anwʋzɩzɩbɛ nɩɩ nɣɛlɛbɛ mɔɔ ɛkɛva kegyina wʋ ɔhawʋ yɩ munwa. Kakɛ kɛɛ, Gyehova kɔhʋla koluwa ɔhʋanɩ azʋlɔtʋ mɔɔ wʋáhila yɩ ɔhʋanɩ nɩ zʋ kowuwa wʋ mpayɩwɔlɛ. (Ɛfɩ. 3:20) Akʋ̃ sʋ̃, ɩkɔhʋla ikoluwa awɔvʋlɔ nɩɩ mmeliyema zʋ ɩkɛva mmʋwalɩyɛ mɔɔ ehyinyia nɩ ɩkɛma wʋ. (Ndw. 34:7) Meti fa wʋ anyɩ tiã azɩ kila kezimɔ Gyehova kowuwa wʋ mpayɩwɔlɛ na da yɩ asɩ. Sa ɔkʋla nyia anwʋlazʋ kɛɛ, Gyehova kɛva yɩ sunzuma yɩ kɔwʋwa wʋ ma ekegyina ɔhawʋ bela mɔɔ ekeyiyia nɩ munwa.—Kɩnga Fɩlɩpɩmaa 4:13.

15. Mɩnla yɛ ɩkɔhʋla ɩkɔwʋwa wʋ ma ekegyina ndwokɔzɩzɩbɛ be munwa a? (Kila mfonyini yi sʋ̃.)

¹⁵ Kɔ zʋlɔ yɛ sunzuma ɔfʋã nu nninyeni. Sɛ eyiyiaa ndwokɔzɩzɩbɛ be a, ebiye a, ɩkɛyɛ sɩ ɩkɛma wʋ kɛɛ ɛkɛyɛ sunzuma ɔfʋã nu nninyeni. Naasʋ̃ ɔzɔ mmɩlɩ yɩ nu paa yɛ ɩsɛ kɛɛ ɛyɛ nninyeni mɔɔ ɩkɛma ekenyia wʋ bʋwabɩlɛ yɩ nwʋ adwɩnɩba na ama wʋahʋla wʋagyina yi munwa a. (Ndw. 119:143) Kɔ zʋlɔ kɩnga Bayɩbʋlʋ yɩ eɣile bela, dwɩnɩndwɩnɩ nwʋmɔ, na yɛ ɛbɩbɛlɛnu azʋlɔtʋ. Bɔ mmɔdɩnɩ yɛ dasɩlɛlilɛ egyima yɩ be, na kɔ dɩyɛzumanlɛ. Akʋ̃ sʋ̃, sɛ ɔkɔ dɩyɛzumanlɛ a, bɔ mmɔdɩnɩ fa wʋ nwʋ wula egyimalilɛ yɩ nu. Áma wʋzawʋ nkʋ̃ ɛtɩ wʋ nwʋ kɔ wula dɩka be, mfomi ɛ nɩɩ wu mmeliyema wɔ́.—Ɛɣɛ. 18:1.

16. Sɛ eyiyiaa ndwokɔzɩzɩbɛ be a, ebiye a, kɛ ɛkɛdɩ nɣanlɩ keze a, na mɩnla yɛ ɩsɛ kɛɛ ɛyɛ a? (2 Kɔlɛntɩmaa 10:​4, 5)

¹⁶ Sɛ wʋ adwɩnɩ yɛ wʋ anwɩ̃ anwɩ̃ wɔ debe nwʋ a, kila na di nwʋmɔ egyima. Sɛ yeyiyiaa ɔhawʋ be a, ebiye a, yekenyia adwɩnɩ mɔɔ ɩávata wɔ yɛ nwʋ anzɛnyɩɩ Gyehova nwʋ. Wɔ ɔzɔ bʋwabɩlɛ yɩ nu nɩ, mɩnla yɛ ɩkɔhʋla ɩkɔwʋwa wʋ a? (Kɩnga 2 Kɔlɛntɩmaa 10:​4, 5.) Sɛ ɛyɛ ɛbɩbɛlɛnu wɔ Bayɩbʋlʋ yɩ nɩɩ awuuku azʋlɔtʋ mɔɔ Gyehova yɩ ahyɩhyɛdɩ yɩ ɩyɛ nɩ nu a, ɩkɔwʋwa wʋ ma ekenyia adwɩnɩ mɔɔ ɩfata wɔ ɛ nɩɩ Gyehova nwʋ. Kɛ ndianwʋ nɩ, asʋ̃ ɛtɩ nɣanlɩ kɛɛ Gyehova bʋ wʋ a? Sɛ ɔzɔ a, sunzu sʋ̃mavʋlɔ Pɔɔlʋ yɩ ozumanlɛnwʋnlɛ yɩ nwʋ kila. Ɩávalɩ nwʋmɔ kɛɛ nɩ Pɔɔlʋ fa ɛhyɩmɛ yɛ odwokɔba egyima yɩ nɩ, nɩ iyiyia ndwokɔzɩzɩbɛ sʋ̃maa wɔ yɩ ɛbɩlawɔlɛ nu. Naasʋ̃ ɩávalɩ nwʋmɔ ɔhawʋ eyimmɔ nɩ, ɩhɔlɩ zʋlɔ ɩhanlɩ odwokɔba yɩ mɔɔ iáyiaki. Na eyi manlɩ inyianlɩ anwʋlazʋ kɛɛ Gyehova nɩɩ Gyisɛsɩ lɔ́pʋlɩ yɩ. (2 Kɔl. 11:​23-27) Asʋ̃ wʋ adwɩnɩ yɛ wʋ kɛɛ ebiye a, nɩ Gyehova ɩlɛ́falɩ tanɩ be mɔɔ ɛyɛ ma idua numɔ nɩ ɩlɛ́kyɛlɩ wʋ a? Ɛhɛlɛlɛndwokɔ sʋ̃maa wɔ kɛnɩ mɔɔ ɩma yɛnwʋ kɛɛ Gyehova fa tanɩ kyɛ. Meti bɔ mmɔdɩnɩ pɩbɛ ɔzɔ ɛhɛlɛlɛndwokɔ azʋlɔtʋ nɩ, na kɛlɛ kua dɩka be. (Ayɩ. 43:25) Akʋ̃, kɩnga ɔzɔ ɛhɛlɛlɛndwokɔ azʋlɔtʋ nɩ na dwɩnɩndwɩnɩ nwʋmɔ. (Ndw. 119:97) Asʋ̃ ndwokɔzɩzɩbɛ be mɔɔ eyiyiaa nɩ ti, wʋ adwɩnɩ yɛ wʋ anwɩ̃ anwɩ̃ wɔ Nyamɩnlɩ yɩ anʋhʋba mɔɔ ɩwɔ kɛɛ ɩkɔwɔ yɩ azʋ̃mɩvʋlɔ nwʋ banɩ nɩ nwʋ a? Sianti mɔɔ Nyamɩnlɩ ma amanɩyɛnwʋnlɛ nwʋ ɔhʋanɩ nɩɩ kezimɔ ɩbʋwa yɛ nɩ, yɛ nwʋmɔ ɛbɩbɛlɛnu. (Ndw. 91:​9-12) Akʋ̃ sʋ̃, kɩnga ndwokɔ azʋlɔtʋ mɔɔ ɩfalɩ mmeliyema mɔɔ bɔhʋla bɛvalɩ anyɩnlɩlelɛ begyinanlɩ bo ndwokɔzɩzɩbɛ yi munwa nɩ nwʋ.a

17. Sɛ ndwokɔzɩzɩbɛ be twodwu a, mɩnla yɛ yɛkɔhʋla yɛkɛyɛ a?

¹⁷ Asʋ̃ nninyeni ɩkɔɔ bʋwɔ ɩma wʋ, na ɩdɩ kɛɛ mɔɔ wʋáyiyia ɔhawʋ kezile bela a? Mɛyɩ nɩ da Gyehova asɩ wɔ nwʋmɔ, na fa nwʋmɔ ɔhʋanɩ eyi dwɩnɩndwɩnɩ nninyeniba mɔɔ ɩyɛ ɩma wʋ nɩ nwʋ. (Odw. 7:14) Naasʋ̃ sɛ ɔhawʋ be twodwu a, bɔ mmɔdɩnɩ kɛɛ ekenyia nwʋmɔ adwɩnɩba na kɔ zʋlɔ fa wʋ nwʋ tiã Gyehova zʋ. Sɛ ɛyɛ zɔ a, Gyehova ‘kɛma ɔhʋanɩ kɛla odwohilalɛ yɩ nwʋ na ama wʋahʋla wʋagyina yi munwa.’ (1 Kɔl. 10:13) Naasʋ̃ sɛ ye mmeliyema beyiyiaa ndwokɔzɩzɩbɛ be a, kɛ ɩkɛyɛ na yɛawʋwa bɛ a? Yekozunzu eyi nwʋ wɔ dɩyɛzumanlɛ mɔɔ ili kɛnɩ nɩ nu.