Tu Mpʋnɩ Wɔ Kezimɔ Ekilehile Wɔ Dasɩlɛlilɛ Nu Nɩ Nu

1. Mɩnla yɛ ɩsɛ kɛɛ Kilisinyiamaa suma yɩ yɛlɛ a, na mɩnla ti a? (2 Timoti 4:2) (Kila mfonyini yi sʋ̃.)

GYISƐSƖ hã hileli yɩ adʋwavʋlɔ yɩ kɛɛ: ‘Bɔhɔ́ bɛyɛ manlɩ yɩ munwatĩĩ mɩ adʋwavʋlɔ, behilehile bɛ ma beli mɔɔ mɩhyɛ bɛ nɩ munwala zʋ.’ (Mt. 28:​19, 20, NWT) Odwokɔ eyi mɔɔ Gyisɛsɩ hanlɩ nɩ kile kɛɛ, ɩsɛ kɛɛ Kilisinyiamaa munwala kilehile mmenii. Ɩwɔ numɔ, Gyehova yɛ ɩtwɩ̃ “bɛzabɛ mɔɔ bɔwɔ ahʋnlɩnɩba” nɩ a, yɛɛ awɔvʋlɔ yɩ sʋ̃ bʋwa yɛ ma yɛnwʋ bɛ a. (Egy. 13:48; Dwɔ. 6:44; Yik. 14:6) Naasʋ̃, ɩsɛ kɛɛ yesuma kezimɔ yekehilehile mmenii Gyehova nwʋ dɩyɛ. Sunzu ndianwʋ mɔɔ Pɔɔlʋ nɩɩ Banabasɩ yɛlɩ nɩ nwʋ kila. Bayɩbʋlʋ yɩ kã kɛɛ mmɩlɩ mɔ nɩ bekilehilee wɔ ayiyialɩyɛ aliyia nu wɔ Akoninyia nɩ, “kɛ bezili bɛhanlɩ Odwokɔba nɩ ɩmanlɩ Dwuumaa nɩɩ mmenii mɔɔ bɛ́dɩ Dwuumaa nɩ mmɔ sʋ̃maa bɛvalɩ bɔ nwʋ bɛmanlɩ Niibenyia.” (Egy. 14:1) Pɩlazunlɛ bela íni nwʋmɔ kɛɛ nɩ Pɔɔlʋ nɩɩ Banabasɩ bozuma kezimɔ bekehilehile mmenii wɔ ɔhʋanɩ mɔɔ itu mpʋnɩ zʋ. (Kɩnga 2 Timoti 4:2.) Na ɩsɛ kɛɛ Kilisinyiamaa munwatĩĩ suma kezimɔ bɛkɛma be ehilehilelɛ kodu mpʋnɩ.

2. Mɩnla yɛ ɩma mbiyemmɔ tɩ nɣanlɩ kɛɛ bɔlɔ́kʋla kodu mpʋnɩ wɔ be ehilehilelɛ nu a?

² Mbiyemmɔ tɩ nɣanlɩ kɛɛ bɔlɔ́kʋla kodu mpʋnɩ wɔ be ehilehilelɛ nu iluwakɛɛ bɛákɔ sukuulu botwu aɣinzi anzɛnyɩɩ bézi kilehile baaba. Ɔzɔ la yɛ mmenii be mɔɔ Bayɩbʋlʋ hanlɩ bɔ nwʋ odwokɔ nɩ dɩlɩ nɣanlɩ a. (Ɛkɩ. 4:10; Gyɛ. 1:6) Mmenii mvʋlɔ sʋ̃ tɩ nɣanlɩ kɛɛ bézi kilehile baaba iluwakɛɛ béni Bayɩbʋlʋ dɩyɛzumanlɛmaa anzɛnyɩɩ béni dasɩlɛlilɛ nu ozumanlɛnwʋnlɛ sʋ̃maa. Ɩdɩ nɔhʋanlɛ kɛɛ, kɛ abiyela yɛ yɩ anyɩ keleli odwokɔba yɩ nwʋ anzɛnyɩɩ ɩkɛbɛ yɩ kɛɛ ɩ nɩɩ yɛ kɛdɩndɛ a. Akʋ̃ sʋ̃, sɛ yɛ dasɩlɛlilɛ egyima yɩ kozo mma a, ígyĩ kezimɔ yɛfa yekehilehile yɩzayɩ nkʋ̃ zʋ. Kɛmɔ yɛhã daada nɩ, Gyehova nɩɩ awɔvʋlɔ yɩ kila kɛɛ yɛ sa kɛhã ahʋnlɩnɩbamaa. Naasʋ̃, yɛpɛ kɛɛ yɛyɛ yɛ ɔfʋã nu dɩyɛ yɛkã odwokɔba yɩ ma ɩkã mmenii ahʋnlɩnɩ. Dɩyɛzumanlɛ eyi kɔwʋwa yɛ ma yɛkɔnwʋ ɔhʋanɩ asã mɔɔ yɛkɔhʋla yɛkɛma ye ehilehilelɛ kodu mpʋnɩ wɔ dasɩlɛlilɛ nu.

DWƖNƖ WU EDIYELƐMAA NƖ NWƲ

3. Mɩnla yɛ ɩmanlɩ mmenii sʋ̃maa anyɩ lelili nwʋmɔ kɛɛ bekediye Gyisɛsɩ a?

³ Bayɩbʋlʋ yɩ kã kɛɛ nɩ Gyisɛsɩ “izi mɔɔ ɩwɔ desanii bela yɩ ahʋnlɩnɩ nu.” (Dwɔ. 2:25) Odwokɔ eyi ma yɛnwʋ kɛɛ nɩ Gyisɛsɩ zi kezimɔ mmenii dwɩ̃ nɩɩ mɔɔ ɩma bɔdwɩ̃ zɔ nɩ. Nɩ Gyisɛsɩ kʋla twu yi ediyelɛmaa nɩ bɛ ahʋnlɩnɩ nu iluwakɛɛ nɩ izi mɔɔ behyinyia. Nɩ Gyisɛsɩ zi kɛɛ mmenii hyinyia ɛɣɛɛlɛyɩkyɩlɛ nɩɩ ɔhʋanɩhilelɛ. Na nɩ nyamɩnlɩzʋ̃mɩnlɛ nu mbanimbani yi hyɩhyɛ mmɛla sʋ̃maa ma mmenii yi nkʋ̃ʋ̃ ma ɛbɩlawɔlɛ nu yɛ sɩ ɩma bɛ. (Mt. 9:36; 23:4) Gyisɛsɩ hanlɩ eyi nwʋ odwokɔ wɔ yi File Zʋ Ehilehilelɛ yɩ nu. Mmenii sʋ̃maa anyɩ lelili nwʋmɔ kɛɛ bekediye Gyisɛsɩ, iluwakɛɛ ɩhanlɩ mɔɔ nɩ ididee bɛ ankasa nɩ nwʋ odwokɔ.

4. Kɛ ɩkɛyɛ na yɛahile kɛɛ yɛdwɩnɩ mmenii nwʋ a? (Kila mfonyini yi sʋ̃.)

⁴ Sa yɛkʋla yekile kɛɛ yɛdwɩnɩ mmenii mɔɔ yeyiyia bɛ wɔ dasɩlɛlilɛ nu nɩ nwʋ, iluwa mmɔdɩnɩ mɔɔ yɛkɔwɔ kɛɛ yɛkɛdɩ bʋwabɩlɛ mɔɔ beyiyiaa nɩ tʋ nɩ. Ndwokɔ tanɩ sʋ̃maa yɛ isizii wɔ Setanɩ yi oyuwadɩ eyi nu a. Meti abiyela mɔɔ yeyiyia yɩ wɔ dasɩlɛlilɛ nu nɩ wɔ yɩzayɩ yɩ ɔhawʋ mɔɔ ɩma ɩtɩɩdɩɩ. Eyi mɔɔ yɛkɛma ɩkɔwʋwa yɛ adwɩnɩ nu nɩ kɛma ɩkɛyɛ mɛlɛkɛ ɩkɛma yɛ kɛɛ yɛkɔwʋwa bɛ. Kɛ ndianwʋ nɩ, ebiye a odwokɔ be zi wɔ yɛ apaa yi nu mɔɔ ɩma mmenii mɔɔ bɔwɔ yɛ azɩlɛ-sini yi nu nɩ bɛ ɛɣɛɛlɛ ɩwɔ. Awʋvʋlɔ be sʋ̃ kɔhʋla kɛdɩ nɣanlɩ kɛɛ ebiye a, debe tanɩ be kɔhʋla kɔdʋ bo nnwuakula wɔ sukuulu. Ebiye a, egyimabɛlɛ nwʋ yɛ sɩ wɔ dɩka mɔɔ yɛda nɩ. Bɔ mmɔdɩnɩ kɛɛ ɔkɔnwʋ kezimɔ nninyeni nu yɛ sɩ ma bɛzabɛ mɔɔ bézi nninyeniba mɔɔ Bayɩbʋlʋ yɩ bɔ nwʋmɔ anʋhʋba nɩ.—2 Tim. 3:1; Ayɩ. 65:​13, 14.

5. Mɩnla ɔhʋanɩ zʋ yɛ nɩ Gyisɛsɩ dɩ sʋnʋnkʋ̃ wɔ Falasiimaa nɩ bɔ nwʋ a? (Matiyu 11:​28-30)

⁵ Nɩ Gyisɛsɩ dɔ mmenii, na mmenii sʋ̃ nwʋnlɩ kɛɛ ɩdwɩnɩ bɔ nwʋ iluwakɛɛ nɩ ɩ nɩɩ bɛ di yi bʋwɔ. Nɩ Gyisɛsɩ dɩ sʋnʋnkʋ̃ wɔ Falasiimaa nɩ bɔ nwʋ iluwakɛɛ bɔnlʋmmɔ mɛyɩ, nɩ bɛtɩ nɣanlɩ kɛɛ bɛdɩ baaba bɛtɛla mbiyemmɔ. Akʋ̃ sʋ̃, nɩ bɛ nɩɩ mmenii iáli yi bʋwɔ kʋlaa. (Mt. 23:13; Dwɔ. 7:49) Naasʋ̃ Gyisɛsɩ mɛyɩ, nɩ ɩda kunlumiba ali ikile mmenii, na nɩ ibu bɛ sʋ̃. Nɩ yi ‘odwokɔ dɩ bɛtɛɛ, na iábigyiabigyia yɩ nwʋ sʋlɔ,’ na eyi yɛ ɩmanlɩ yi ehilehilelɛ duli mpʋnɩ a. (Kɩnga Matiyu 11:​28-30.) Ɩsɛ kɛɛ amɩyɛ sʋ̃ yɛda kunlumiba nɩɩ annidi ali yekile bɛzabɛ mɔɔ yeyiyia bɛ wɔ dasɩlɛlilɛ nu nɩ.

6. Kɛ ɩkɛyɛ na yɛala kunlumiba nɩɩ annidi ali yɛahile bɛzabɛ mɔɔ bɛádiye ye odwokɔ yɩ anzɛnyɩɩ botwodwu betiyia yɛ nɩ a?

⁶ Ɩyɛ a, mbiyemmɔ bɛábɛ kɛɛ bekediye ye odwokɔ yɩ anzɛnyɩɩ botwodwu betiyia yɛ po. Kɛ ɩsɛ kɛɛ yɛ nɩɩ bɛ di se a? Gyisɛsɩ hilehileli yɛ kɛɛ yɛ nɩɩ bɛzabɛ mɔɔ botwodwu betiyia yɛ nɩ li yi bʋwɔ. Ɩhanlɩ po kɛɛ, ‘yɛyɛ́ baaba yɛma mmenii mɔɔ bekyi yɛ nɩ, yeyilá mmenii mɔɔ boku amʋnlɩ yɛ nɩ, na yɛwɔ́ mpayɩ yɛma mmenii mɔɔ bosua yɛ nɩ.’ (Lk. 6:​27, 28) Sɛ yɛnwʋ sianti mɔɔ mmenii twodwu tiyia yɛ anzɛnyɩɩ bɛádiye ye odwokɔ nɩ a, ɩkɛma ɩkɛyɛ mɛlɛkɛ kɛɛ yɛkɛla kunlumiba ali yekehile bɛ. Ɩwɔ numɔ, mbiyemmɔ wɔ kɛnɩ mɔɔ bɛábɛ kɛɛ yɛkã odwokɔba nɩ. Naasʋ̃ mbiyemmɔ sʋ̃ wɔ kɛnɩ a, iluwa ɔhawʋ be mɔɔ beyiyiaa nɩ ti yɛ bɛábɛ kɛɛ betiye yɛ a. Akʋ̃ sʋ̃ ebiye a, nɩ yɛákɔ bɛ ɛkɛnɩ wɔ mmɩlɩba nu. Kezimɔ bʋwabɩlɛ yɩ dɩ bela nɩ, ɩsɛ kɛɛ yɛma ‘ye munwa odwokɔ ɩyɛ fɛlɛkʋ̃, na ɩyɛ anyɩnlɩlelɛ ɩma abiyela mɔɔ ikediye nɩ. Akʋ̃ sʋ̃, sɛ abiye bizia odwokɔ yɛ a, ɩwɔ kɛɛ yɛyɩ yi munwa kɩnlɩma.’ (Kol. 4:6) Sɛ yɛdwɩnɩ mmenii nwʋ na yɛnwʋ ɔhawʋ mɔɔ boduwaa numɔ a, ɩkɔwʋwa yɛ ma yɛkɔnwʋ mɔɔ ɩsɛ kɛɛ yɛ nɩɩ bɛ bɔ nwʋmɔ nkɔmmɔ.

FA BAYƖBƲLƲ YƖ DI EGYIMA

7. Mɩnla yɛ Gyisɛsɩ va lili egyima wɔ yi ehilehilelɛ nu a? (Dwɔɔnʋ 7:​14-16)

⁷ Gyisɛsɩ ɩáfa yɩzayɩ yi ti nu ndwokɔ ikilehile mmenii. Nɩ yi ehilehilelɛ gyĩ Nyamɩnlɩ Odwokɔ yɩ zʋ, na ɩva ilili egyima wɔ ɔhʋanɩ be zʋ mɔɔ nɩ ɩkɛma mmenii kɛdɩ yɩ tʋ na bɛahakɛ. Bayɩbʋlʋ yɩ kã kɛɛ nɩ Gyisɛsɩ yi ehilehilelɛ “ɩ́dɩ kɛɛ mmɛla ahilehilevʋlɔ nɩ mmɔ, na mfomi ɩvalɩ tumi ihilelihileli ɔlɔmɩ nɩ.” Eyi ti, “ɔhʋanɩ mɔɔ iluwalɩ ɔzʋlɔ ihilelihileli dɩyɛ nɩ ɩyɛlɩ mmenii mɔɔ bediyeli yɩ nɩ nnwʋánlɩ.” (Mk. 1:22) Ehilehilelɛmaa mɔɔ nɩ bɔwɔ Gyisɛsɩ yɩ mmɩlɩ zʋ nɩ, nɩ ehilehilelɛmaa mvʋlɔ mɔɔ bele dima bo ndwokɔ yɛ nɩ bɛfa bekilehile mmenii a. Naasʋ̃ Gyisɛsɩ mɛyɩ, nɩ ɩfa yi ehilehilelɛ ikyina Ɛhɛlɛlɛ nwanzanwanza yɩ zʋ. Gyisɛsɩ dɩ Nyamɩnlɩ yɩ Ɣa mɔɔ nɩ ɩwɔ sʋlɔ ansaana ɩbaa azɩlɛ yɩ zʋ, meti ankɩ sa ɩkʋla ɩkã nninyeni sʋ̃maa mɔɔ izi nɩ munwala ikile yi ediyelɛmaa na ɩama bɛadɩ nɣanlɩ po kɛɛ bézi hwɩɩ. Naasʋ̃ ɩáyɛ zɔ kʋlaa. Mfomi iluwalɩ Nyamɩnlɩ yɩ Odwokɔ yɩ zʋ ɩwʋwalɩ mmenii ma bɔnwʋnlɩ Nyamɩnlɩ yɩ apɛdɩ. (Kɩnga Dwɔɔnʋ 7:​14-16.) Gyisɛsɩ yi ndianwʋba eyi ɩma Kilisinyiamaa munwala nwʋ kezimɔ ɩsɛ kɛɛ bekilehile mmenii.

8. Mɩnla ɔhʋanɩ zʋ yɛ Pita zumazumanlɩ Gyisɛsɩ a?

⁸ Gyisɛsɩ yɩ adʋwavʋlɔ yɩ sʋ̃ zumazumanlɩ yɩ. Nyamɩnlɩ yɩ Odwokɔ yɩ yɛ bɛva behilehileli mmenii a. Kɛ ndianwʋ nɩ, Pɛntɩkɔsʋ 33 Y.M. nu mɔɔ nɩ sʋ̃mavʋlɔ Pita ɩ nɩɩ ɔlɔmɩ be tɩndɛɛ nɩ, ɩvalɩ Ɛhɛlɛlɛdwokɔ yɩ ilili egyima. Nɩ Pita ɩ́dɩ abiye mɔɔ izuma ɔnwʋma ɩhɔ aɣinzi, naasʋ̃ iluwalɩ Ɛhɛlɛlɛdwokɔ yɩ zʋ ɩmanlɩ mmenii nwʋnlɩ kezimɔ Gyisɛsɩ manlɩ Nyamɩnlɩ yɩ nkɔmɩhyɛ ɣalɩ numɔ. (Egy. 2:​14-37) Mɩnla yɛ ɩzʋ̃ eyi nu ɩɣalɩ a? Bayɩbʋlʋ yɩ kã kɛɛ, “bɛzabɛ mɔɔ beleli odwokɔ nɩ belili nɩ bonlumanlɩ bɛ, na demunwa nɩ la mmenii kɛyɛ 3,000 bɛɣalɩ bɛhɩnlanlɩ dedimaa nɩ mmɔ bɔ nwʋ.”—Egy. 2:41.

9. Mɩnla ti mɔɔ ɩsɛ kɛɛ yɛfa Nyamɩnlɩ yɩ Odwokɔ yɩ yedi egyima mmɩlɩ mɔ yekilehilee nɩ a?

⁹ Bayɩbʋlʋ yɩ la yɛ ɩkɔhʋla ɩkɔwʋwa mmenii ma bɛkɛyɛ nzɩnzanlɩyɛ na bɛayɛ mɔɔ ɩsɔ Nyamɩnlɩ anyɩ a. (Hib. 4:12) Meti ɩsɛ kɛɛ yɛfa Bayɩbʋlʋ yɩ yedi egyima mmɩlɩ mɔ yekilehilee nɩ. Yɛpɛ kɛɛ ‘yɛbɔ Odwokɔba nɩ ɛlawulo,’ na kɛ yɛzayɛ ye ti nu ndwokɔ a. (2 Tim. 4:2) Ɛɣɛlɛwulɛ 2:6 kã kɛɛ: “Gyehova yɩzayɩ yɛ ɩma nɣɛlɛbɛ a, na yi munwa nu yɛ nnimidi nɩɩ dɩyɛnunwʋnlɛ ɩzʋ̃ ɩba a.” Meti sɛ yɛfa Bayɩbʋlʋ yɩ yedi egyima mmɩlɩ mɔ yekilehilee mmenii a, ikile kɛɛ, ɔhʋanɩ be zʋ nɩ, nɩ yɛmaa ɔhʋanɩ ma Gyehova kɛdɩndɛ. (Mal. 2:7) Yɛpɛ kɛɛ mmenii nwʋ kɛɛ fʋlɔdulɛ mɔɔ ɩwɔ Bayɩbʋlʋ yɩ nu nɩ dɩ baaba kʋlaa tɛla enii yɩ nɣɛlɛbɛ. Mɔɔ Bayɩbʋlʋ yɩ kilehile nɩ zʋ̃ yɛ Wɔlɛvʋlɔ yɩ kɛnɩ, na ɩbʋwa yɛ ma yɛyɛ mɔɔ ɩsɔ yɩ anyɩ, na eyi ma yɛ anyɩ de.—2 Tim. 3:​16, 17.

10. Kɛ ɩkɛyɛ na yɛahwɩ̃ Bayɩbʋlʋ dɩyɛzumanlɛvʋlɔ be yɩ adwɩnɩ yɛahɔ Nyamɩnlɩ yɩ Odwokɔ yɩ zʋ a?

¹⁰ Sɛ esiyeziyee wʋ nwʋ ɛ nɩɩ abiye kɔhɔ kozuma Bayɩbʋlʋ yɩ a, pɩbɛ ahʋanɩ mɔɔ okoluwa zʋlɔ kɔhwɩ̃ yɩ adwɩnɩ kɔhɔ mɔɔ Bayɩbʋlʋ yɩ kilehile ankasa nɩ zʋ. Ɩwɔ numɔ kɛɛ yɛfa vidiyo nɩɩ mfonyini azʋlɔtʋ yedi egyima wɔ ye ehilehilelɛ nu dɩyɛ, naasʋ̃ Bayɩbʋlʋ yɩ yɛ ɩsɛ kɛɛ yɛtwɩ̃ adwɩnɩ yesiye zʋlɔ paa a. Sɛ ɛ nɩɩ abiye sumaa dɩyɛ a, ɛ nɩɩ yɩ ɣɩnga ɛhɛlɛlɛdwokɔ mɔɔ ɩkɛma ɩkɛdɩ ndwokɔ aditili mɔɔ ɩwɔ mɔɔ bosumaa yɩ nu nɩ yɩ tʋ bʋwɔ. Akʋ̃ bʋwa yɩ ma ɩdwɩnɩndwɩnɩɩ mɔɔ ɩkɔhʋla kozuma wɔ ɔzɔ nkyɩkyɛmi yi nu nɩ nwʋ. Na sɛ ɛfa vidiyo anzɛnyɩɩ mfonyini po edi egyima a, bʋwa yɩ ma ɩnwʋ ozumalɛdɩyɛ mɔɔ ɩwɔ Bayɩbʋlʋ yɩ nu mɔɔ ɩkɔhʋla kɛva kɛyɛ egyima. Naasʋ̃ eyi iáhile kɛɛ ɩsɛ kɛɛ ɛtɩndɛ sʋ̃maa anzɛnyɩɩ ɛkɩnga ɛhɛlɛlɛdwokɔ bela mɔɔ ɩwɔ mɔɔ bosumaa yɩ nu nɩ. Mfomi sɛ bɛkɩnga ɛhɛlɛlɛdwokɔ be a, ma mmɩlɩ wɔ wʋ Bayɩbʋlʋ dɩyɛzumanlɛvʋlɔ yɩ ma ɩdwɩnɩndwɩnɩɩ mɔɔ bɛɣɩnga yɩ nwʋ na ɩdɩ yɩ tʋ. Itwu mmɩlɩ be po a, ɩkɛyɛ baaba kɛɛ bekezia bɛkɛɣɩnga ɔzɔ kotehyɛnɩ yɩ dɔkʋ̃. Sɛ yɛyɛ zɔ a, nɩ ikile kɛɛ yɛyɛɛ Bayɩbʋlʋ dɩyɛzumanlɛ, na kɛ buuku, mfonyini, anzɛnyɩɩ vidiyo dɩyɛzumanlɛ a.—1 Kɔl. 2:13.

11-12. (a) Kɛ ɩkɛyɛ na yɛanyia yɛ Bayɩbʋlʋ dɩyɛzumanlɛmaa bɔ nwʋ abʋtalɩ a? (Egyima 17:​1-4) (Kila mfonyini yi sʋ̃.) (b) Mɩnla yɛ mbiyemmɔ bézi falɩ Bayɩbʋlʋ yɩ nwʋ a, na kɛ ɩkɛyɛ na yɛawʋwa bɛ a?

¹¹ Itwu mmɩlɩ be a, ebiye a ɩkɛyɛ sɩ ɩkɛma Bayɩbʋlʋ dɩyɛzumanlɛvʋlɔ be kɛɛ ɩkɛdɩ odwokɔ be tʋ anzɛnyɩɩ ikele ikeli. Sɛ ɩba yɩ zɔ a, yɛkɔ zʋlɔ ‘yekilehile wɔ abʋtalɩ nu.’ Kɛ abiyela yɛ ɩtɩ nninyeni tʋ ndɛndɛ a. Ehilehilelɛ be wɔ kɛnɩ a, amɩyɛ mɛyɩ ɩáyɛ sɩ ɩma yɛ kʋlaa, naasʋ̃ mbiyemmɔ mɛyɩ ikele mmɩlɩ ansaana bɛadɩ yɩ tʋ. Mmɩlɩ mɔ Pɔɔlʋ lili Dwuumaa mɔɔ nɩ bɔwɔ Tɛsalonika nɩ dasɩlɛ nɩ, kɛ ɛkɛnɩ la bɛdɩlɩ yɩ tʋ a. Meti ɩhɔlɩ bɛ kɛnɩ mbɔmɩ sʋ̃maa ɩhɔ ihilehileli Ɛhɛlɛlɛdwokɔ yɩ nu ansaana bo nu be bɛbadɩ yɩ tʋ bʋwɔ.—Kɩnga Egyima 17:​1-4.

¹² Ɔhʋanɩ fʋlɔ sʋ̃ mɔɔ yɛkɔhʋla yekenyia yɛ Bayɩbʋlʋ dɩyɛzumanlɛmaa bɔ nwʋ abʋtalɩ yɛ lɛ kɛɛ, sɛ yebizia odwokɔ be bɛ a, yɛkɛma mmɩlɩ bɛ ma bɛkɛyɩ yi munwa. Bɔ mmɔdɩnɩ kɛɛ ekediye bɛ bʋwɔ na nwʋ sianti mɔɔ bɔwɔ ɔzɔ adwɩnɩ yɩ. Ɛ nɩɩ bɛ ɣɩngá ɛhɛlɛlɛdwokɔ mɔɔ ɩkɔwʋwa bɛ ma bɛkɛdɩ Nyamɩnlɩ yɩ adwɩnɩ wɔ mɔɔ bosumaa yɩ nu nɩ yɩ tʋ na bozunzuu nwʋmɔ. Akʋ̃ sʋ̃, mmenii be lɔ́nwʋnlɩ Bayɩbʋlʋ kyɩ̃, na bézi mɔɔ ɩwɔ numɔ po. Asʋ̃ ɛfa Bayɩbʋlʋ mɔɔ bɛbɩlɩntɩ nɩ be ma bɛ a, ɩkɔwʋwa bɛ a? Sa ɔkʋla fa “Dɛn na Ɛwɔ Onyankopɔn Asɛm Mu?” mɔɔ ɩwɔ New World Translation Twi dɩyɛ yɩ, yɩ anyunu nɩ bʋwa yɩ ma ɩnwʋ ndwokɔ adile mɔɔ nwʋmɔ hyinyia mɔɔ ɩwɔ Bayɩbʋlʋ yɩ nu nɩ. Sa ɔkʋla fa kotehyɛnɩ ɔkʋ̃ anzɛnyɩɩ anwɩ̃ be mɔɔ ɩwɔ odwokɔɣizialɛ 15, mɔɔ ɩwɔ ɔzɔ ɔfʋã yɩ nu nɩ bʋwa yɩ ma ɩnwʋ kezimɔ Bayɩbʋlʋ yɩ kɔhʋla kɔwʋwa yɛ ma yekenyia anyɩnlɩlelɛ wɔ yɛ ɛbɩlawɔlɛ nu. Sɛ ɔbʋwa wʋ Bayɩbʋlʋ dɩyɛzumanlɛmaa ma bɔnwʋ mfasʋ mɔɔ ɩwɔ Bayɩbʋlʋ yɩ zʋ a, bɛkɛva mɔɔ bosumaa nɩ bekeli egyima wɔ bɛ ɛbɩlawɔlɛ nu na bɛkɛbɛ yɩ kɛɛ bokozuma sʋ̃maa.

BƲWA BƐ MA BƆNWƲ GYEHOVA

13. Sɛ yekilehilee mmenii a, aninyia yɛ ɩsɛ kɛɛ yɛtwɩ̃ adwɩnɩ yesiye yɩ zʋ a? Ma nwʋmɔ ndianwʋ.

¹³ Yɛ bʋtayɩ yɛ lɛ kɛɛ yɛkɔwʋwa mmenii mɔɔ yeyiyia bɛ wɔ dasɩlɛlilɛ nu nɩ ma bɔkɔnwʋ Gyehova na bɛaɣike yi. (Gye. 4:8) Sa yɛkʋla yɛfa yɛ dasɩlɛlilɛ egyima yɩ yetindiã abiye mɔɔ ɩlɛ kɩnlanɩyɛ anzɛnyɩɩ tɔɔkyɩ ɩbʋwaa abiye ma ɩkɛva dɩyɛ wɔ anwunzumi nu nɩ nwʋ. Enii kʋ̃ nɩ ɩáva kɩnlanɩyɛ anzɛnyɩɩ tɔɔkyɩ yɩ ikila yɩzayɩ yɩ nwʋ, mfomi ɩfa ikile dɩyɛ ɔkʋ̃ nɩ yɩ zʋ. Ɔzɔ la yɛ sɛ yɛ nɩɩ mmenii sumaa Bayɩbʋlʋ yɩ a, íni kɛɛ yɛtwɩ̃ adwɩnɩ yɛba yɛ nwʋ zʋ, mfomi ɩsɛ kɛɛ yɛtwɩ̃ adwɩnɩ yɛkɔ Gyehova zʋ a.

14. Mɩnla yɛ yɛkɔhʋla kɛyɛ kɔwʋwa yɛ Bayɩbʋlʋ dɩyɛzumanlɛvʋlɔ ma ɩkɛyɛ mɔɔ ɩsɔ Gyehova anyɩ a?

¹⁴ Sɛ ɛ nɩɩ abiye sumaa Bayɩbʋlʋ yɩ a, bʋwa yɩ ma ɩlɔ́ Gyehova, na eyi kɛma ɩkɛyɛ mɔɔ ɩsɔ yɩ anyɩ. (Ɛɣɛ. 27:11) Kɛ mɔɔ iziye wʋ anyɩ zʋ la yɛ lɛ kɛɛ ɔbʋwaa abiye ma ikeyiaki nninyeni tanɩyɛlɛ na ɩayɛ mɔɔ ɩdɩ baaba na ama ɩaɣa ɩayɛ Gyehova Dasɩvʋlɔmaa bo nu ɔkʋ̃ a. Mfomi mɔɔ ɛpɛ yɩ yɛ lɛ kɛɛ wʋ Bayɩbʋlʋ dɩyɛzumanlɛvʋlɔ yɩ kɛyɛ nzɩnzanlɩyɛ mɔɔ ɩfata na ama ɩazɔ Gyehova anyɩ. Kɛ ndianwʋ nɩ, sɛ ɩyɛ sɩ ɩma wʋ Bayɩbʋlʋ dɩyɛzumanlɛvʋlɔ be kɛɛ ikeyiaki subanɩ tanɩ be a, sa ɔkʋla bizia yɩ kɛɛ: “Mɩnla ti mɔɔ Gyehova kyi nyɛlɩyɛ eyi a? Mɩnla ti mɔɔ Gyehova pɛ kɛɛ eyiaki dɩyɛ be mɔɔ wʋ anyɩ deli yɩ yɛlɛ nwʋ nɩ a? Mɩnla ɔhʋanɩ zʋ yɛ nyɛlɩyɛ eyi mɔɔ Gyehova pɛ kɛɛ eyiaki nɩ ma ɔnwʋ kɛɛ ɩdɔ wʋ a?” Sɛ ɔbʋwa wʋ Bayɩbʋlʋ dɩyɛzumanlɛvʋlɔ be ma ɩdwɩnɩndwɩnɩ Gyehova nɩɩ yi subanɩ azʋlɔtʋ yɩ nwʋ a, ɩkɔwʋwa yɩ ma ɩkɔnwʋ kɛɛ Gyehova dɔ yɩ paa. Na eyi kɛma wʋ Bayɩbʋlʋ dɩyɛzumanlɛvʋlɔ yɩ kɛɣa kɔlɔ Gyehova, na ɩkɛbɛ yɩ kɛɛ ɩkɛyɛ mɔɔ ɩsɔ yɩ anyɩ.

KƆ ZƲLƆ TU MPƲNƖ WƆ KEZIMƆ EKILEHILE NƖ NU

15. Mɩnla yɛ ɔkɔhʋla kɛyɛ na ama wʋahɔ zʋlɔ wʋadu mpʋnɩ wɔ wʋ ehilehilelɛ nu a?

¹⁵ Sa ɔkʋla bɔ Gyehova mpayɩ kɛɛ ɩwʋwá wʋ ma odu mpʋnɩ wɔ kezimɔ ekilehile nɩ nu. (1 Dwɔ. 5:14) Sɛ ɔbɔ ɔzɔ mpayɩ yɩ a, ɩsɛ kɛɛ ɛyɛ nwʋmɔ egyima. Meti sɛ ɔkɔ dɩyɛzumanlɛ tʋ a, ɛdɩdɩlɛ azʋlɔtʋ mɔɔ Gyehova fa ma yɛ wɔ kezimɔ yekehilehile mmenii nɩ, ɩsɛ kɛɛ ɛyɛ azʋnlɩ etiye na ɛfa ɛyɛ egyima. Sa ɔkʋla ɛma mmeliyema mvʋlɔ mɔɔ bɔ nwʋ wʋkwa wɔ dasɩlɛlilɛ nu nɩ kɩnla wʋ nwʋ ma bɛ nɩɩ wʋ Bayɩbʋlʋ dɩyɛzumanlɛvʋlɔ be suma dɩyɛ. Mɛyɩ mɛda nɩ, bizia bɛ ɔfʋã mɔɔ ɩsɛ kɛɛ otu mpʋnɩ wɔ numɔ. Akʋ̃ sʋ̃, sɛ bɛbawɔ ozumalɛdɩyɛ fʋlɔ be tʋ a, bɔ mmɔdɩnɩ kɛɛ ɔkɔnwʋ mɔɔ wʋ Bayɩbʋlʋ dɩyɛzumanlɛvʋlɔ yɩ izi anzɛnyɩɩ ízi falɩ ɔzɔ odwokɔtile yi nwʋ. Bɔ mmɔdɩnɩ kɛɛ ɔkɔdwɩnɩndwɩnɩ kezimɔ ɩkɛdɩ nɣanlɩ wɔ nninyeni mɔɔ bokozunzu nwʋmɔ nɩ nwʋ. Mmɩlɩ mɔ bogua zʋlɔ bosumaa dɩyɛ nɩ, bʋwa yɩ ma ɩnwʋ mfasʋ mɔɔ ɩwɔ mɔɔ bosumaa yɩ zʋ, nɩɩ nninyeniba mɔɔ Gyehova va wɔ anʋhʋba yɛ nɩ. Sɛ ɛyɛ zɔ a, ɩkɔwʋwa yɩ ma ɩkɛɣa kɛyɛ Gyehova yɩ ɔhɔnwʋ na ikenyia anyɩnlɩlelɛ wɔ yɩ ɛbɩlawɔlɛ nu.—Ndw. 1:​1-3.

16. Sɛ yɛkɔ zʋlɔ yɛma ye ehilehilelɛ tu mpʋnɩ a, mɩnla mfasʋ yɛ yekenyia a?

¹⁶ Nninyeni mɔɔ ɩma yɛ anyɩ de nɩ, numɔ ɔkʋ̃ yɛ lɛ kɛɛ yekehilehile mmenii Gyehova nwʋ dɩyɛ. Na ɔzɔ ehilehilelɛ egyima eyi mɔɔ ɩma yɛ anyɩ de nɩ, sa yi kezile kɔlɩ zʋlɔ wɔ oyuwadɩ fʋlɔ yɩ nu. Meti bɛmá yɛhɔ zʋlɔ yɛdwɩnɩ ye ediyelɛmaa bɔ nwʋ, yɛvá Bayɩbʋlʋ yɩ yeli egyima wɔ dasɩlɛlilɛ nu, na yɛwʋwá mmenii ma bɔnwʋ Gyehova. Mmɩlɩ mɔ yɛyɛɛ zɔ nɩ, nɩ kezimɔ yɛfa yekilehile wɔ dasɩlɛlilɛ nu nɩ ituu mpʋnɩ.