Sɛ Osumaa Dɩyɛ a, Bɔ Mmɔdɩnɩ Kɛɛ Okozuma Nninyeni Mvʋlɔ

Sɛ yɛbazuma dɩyɛ a, ebiye a yekeɣizia yɛ nwʋ kɛɛ, ‘Mɩnla pɔkyɩɩ yɛ mikilaa ɔhʋanɩ kɛɛ mʋkɔnwʋ yɩ a?’ Naasʋ̃ ɩsɛ kɛɛ yɛkakɛ kɛɛ, nninyeni mvʋlɔ sʋ̃ wɔ kɛnɩ mɔɔ Gyehova pɛ kɛɛ yɛnwʋ yɩ. Sɛ yesumaa dɩyɛ a, kɛ ɩkɛyɛ na yɛanwʋ yɩ kɛɛ Gyehova pɛ kɛɛ ikile dɩyɛ fʋlɔ yɛ a?

Bɔ mpayɩ siã nɣɛlɛbɛ. Siã Gyehova kɛɛ ɩwʋwá wʋ ma ɔnwʋ mɔɔ ɩpɛ kɛɛ osuma kakɩ yɩ. (Gye. 1:5) Áma enyia adwɩnɩ kɛɛ mɔɔ ezi yi daada nɩ la dɩyɛnɛ.—Ɛɣɛ. 3:​5, 6.

Ma ɔhʋanɩ ma Nyamɩnlɩ Odwokɔ yɩ ɩyɛ egyima wɔ wʋ ɛbɩlawɔlɛ nu. “Nyamɩnlɩ Odwokɔ ɩwɔ ɛkɛnɩ eɣile bela.” (Hib. 4:12) Mmɩlɩ bela mɔɔ yɛkɛɣɩnga Bayɩbʋlʋ yɩ nɩ, sa yɛkʋla yɛnwʋ dɩyɛ fʋlɔ mɔɔ ɩkɔwʋwa yɛ wɔ yɛ ɛbɩlawɔlɛ nu. Naasʋ̃ gyɩsɛ yede yetiã numɔ kɛɛ Nyamɩnlɩ pɛ kɛɛ ikile dɩyɛ fʋlɔ yɛ ansaana.

Ma wʋ anyɩ ɩzɔ dɩyɛ bela mɔɔ Gyehova kilehile yɛ nɩ. Sunzuma ɔfʋã nu alɩyɛ mɔɔ Gyehova fa ma yɛ nɩ dɩ kɛɛ “alɩyɛ baaba” mɔɔ ɩva ɩdʋ “ɔbʋnlɩ.” (Ayɩ. 25:6) Meti áma ɔpʋ kɛɛ okozuma debe mɔɔ osunzu kɛɛ wʋ anyɩ lédeli yi zumanlɛ nwʋ. Sɛ ɛyɛ zɔ a, nɩ ɛmaa Gyehova kɔwʋwa wʋ ma ɛkɛyɛ enii baaba, na wʋ anyɩ keleli dɩyɛzumanlɛ nwʋ sʋ̃.