Nzuloyilɛ Mɔɔ Ɩsɩkɛ Nninyeni—Mɩnla Yɛ Bayɩbʋlʋ Yɩ Kã a?

Ɔkɔ oyuwadɩ dɩka bela a, mmenii sʋ̃maa zɛ yɛ nzuloyilɛ ididee bɛ a. Kila amanɩyɛwɔlɛ eyimmɔ:

•  “Aɣile asã yɩ, nzulo kezile be dwuli wɔ Fʋlɔ kɔbʋmɩ Manlɩ wɔ China bo twonwa kezile yɩ nu, kɛyɛ alʋbɔ 140 yɛ dɩ, ebiye lótwuli ɔzɔ kyɩ̃. Idwuli nkʋ̃ʋ̃ maa sɛ enii tɩndɩnlɩ gyĩ nu a, nɩ ɩlɩla yɩ azɩ.”—AP News, August 2, 2023.

•  “Ahumi kezile be mɔɔ bɔfʋlɛ yɩ Typhoon Khanun duli na ɩmanlɩ nzulo kezile be dwuli na eyi manlɩ ahumi mɔɔ yi munwa yɛ sɩ duli wɔ Japan adɔlɩyɛ ɔfʋã nu. Nzulo nɩɩ ahumi mɔɔ iduli wɔ Manlɩ nɩɩ Kulo nɩ, ihunli mmenii anwɩ̃. . . . Nɩ bekila ɔhʋanɩ kɛɛ ahumi mɔɔ iduli nɩ kɔhʋla kɛma nzulo kodwu wɔ Taiwan yɩ ɔfʋã be mɔɔ sɛ ekyina nu a ɩkɔhʋla ɩkɛva wʋ nzɔlɔ nwʋ.”—Deutsche Welle, August 3, 2023.

•  “Nzulo kezile be mɔɔ idwuli wɔ dapɛnɩ awielɩyɛ nɩ manlɩ nzuloyilɛ zili wɔ [Nova Scotia]. Bosunzu kɛɛ eyi yɛ ɩdɩ nzulo kezile paa mɔɔ idwu wɔ Atlantic Canada wɔ alʋbɔ 50 nu yɛ ɛdɩ.”—BBC News, July 24, 2023.

Mɩnla yɛ Bayɩbʋlʋ kã falɩ ɔzɔ ndwokɔ eyi mɔɔ isizii nɩ nwʋ a?

Sɛnkyɩlɛdɩ mɔɔ ikile kɛɛ yɛwɔ “awielɩyɛ mmɩlɩ nu”

Bayɩbʋlʋ ma yɛnwʋ kɛɛ yɛda mmɩlɩ “mɔɔ ili awielɩyɛ nu”. (2 Timoti 3:1) Gyisɛsɩ hyɛlɩ nkɔmɩ kɛɛ wɔ yɛ mmɩlɩ nu nɩ, yɛkɔnwʋ “sɛnkyɩlɛdɩ nɣezile nɣezile,” anzɛnyɩɩ nninyeni ɛyɛlɛ ɛyɛlɛ kezizi. (Luuku 21:11) Oyumi bʋwabɩlɛ mɔɔ ɩsɩnza nɩ kʋla ma nninyeni ɛyɛlɛ ɛyɛlɛ mɔɔ yɛáhila yɩ ɔhʋanɩ ta sizi na yɩ munwa yɛ sɩ sʋ̃.

Sianti mɔɔ ɩsɛ kɛɛ enyia anyɩnlɩlazʋ

Bayɩbʋlʋ ma yɛnwʋ kɛɛ nninyeni tanɩ mɔɔ isizii nɩ ma yenyia anyɩnlɩlazʋ. Mɩnla ti a? Gyisɛsɩ hanlɩ kɛɛ: “Sɛ mʋnlʋmmɔ bɔnwʋ yɩ kɛ eyimmɔ besizii a, nɩ mʋnlʋmmɔ bɛdɩ yɩ tʋ kɛɛ Nyamɩnlɩ yi bulombunlililɛ nɩ iɣike.”—Luuku 21:31; Matiyu 24:3.

Nninyeni mɔɔ isizii nnɛ nɩ ma yɛnwʋ kɛ ɩlɛ́kyɛ Nyamɩnlɩ yi Bulombunlililɛ kɛma ahumi nɣezile nɩɩ nzuloyilɛ mɔɔ ɩsɩkɛ dɩyɛ nɩ munwala keyiaki donwuu.—Dwoobu 36:27, 28; Ndwomi 107:29.

Sɛ ɛpɛ kɛɛ osuma sʋ̃maa falɩ kezimɔ Nyamɩnlɩ yi Bulombunlililɛ kɛyɛ oyuwadɩ eyi bʋwɔ a, kila odwokɔ eyi “Who Will Save the Earth?”