Aninyiammɔ Yɛ Bɛdɩ Wʋ Ɔhɔnwʋmmɔ Wɔ Intanɛtɩ Zʋ a?

Sɛ bɛkã ɔhɔnwʋ a, ikile kɛɛ abiye ɩkɔvʋãmɩ abiye nwʋ iluwakɛɛ “ɩdɔ yɩ anzɛnyɩɩ ibu yi.” Kɛ ndianwʋ nɩ, mmɩlɩ mɔ Devidi ihunli Golayatɩ mɛda nɩ, ɩ nɩɩ Dwonatanɩ nyianlɩ ɔhɔnwʋvalɛ mɔɔ numɔ ɩyɛ sɩ. (1Sa 18:1) Bo nu bela yɩ subanɩ ɩmanlɩ bɛbɛlɩ yɩ kɛɛ bɛkɛva bɔ nwʋ bɔ nwʋ ɔhɔnwʋ. Meti yɛkɛhã a, ɔhɔnwʋvalɛ mɔɔ numɔ ɩyɛ sɩ nɩ, igyĩ nɔhʋanlɛ nnimidi zʋ. Ide mmɩlɩ nɩɩ mmɔdɩnɩwɔlɛ na yɛahʋla yɛanwʋ abiye bʋwɔ. Naasʋ̃ wɔ intanɛtɩ zʋ mɛyɩ, sa ɔkʋla enyia “ɔhɔnwʋ” wɔ mmɩlɩ sikalɛ be nu. Iluwakɛɛ wɔ intanɛtɩ zʋ mɛyɩ, mmenii kʋla da bɔ nwʋ ali wɔ ɔhʋanɩ be zʋ mɔɔ, wʋánwʋ enii ɔkʋ̃ mɔɔ bɛdɩ ankasa. Meti, ɩsɛ kɛɛ yɛma yɛ anyɩ ɩda ɛkɛ wɔ mmenii ɔkʋ̃ mɔɔ yɛkɛva bɛ ɔhɔnwʋ wɔ intanɛtɩ zʋ nɩ nwʋ. Sɛ ézi abiye wɔ intanɛtɩ zʋ a, áma wʋ kunlu itu kɛɛ ɔkɔbʋ yɩ ɔhɔnwʋvalɛ, iluwakɛɛ ɩkɛyɛ ɛyɛkɛ yɩ ti. Iluwa asianɩ mɔɔ ɩwɔ intanɛtɩ zʋ ɔhɔnwʋvalɛ nu nɩ ti, mbiyemmɔ bezi pɔkɔ kɛɛ bɛlɛ́fa bekeli egyima kʋlaa. Naasʋ̃ sɛ esi pɔkɔ kɛɛ ɛkɛva ekeli egyima a, mɩnla yɛ ɩsɛ kɛɛ ɩbʋwa wʋ adwɩnɩ nu a?

KILÁ VIDIYO MƆƆ ISE MA WƲ ANYƖ ƖLÁ ƐKƐ WƆ INTANƐTƖ NKITANWƲLILƐ ZƲ, NA AKƲ̃ YƖ NDWOKƆƔIZIALƐ EYIMMƆ BO MUNWA:

• 

  Ansaana ekehile wʋ adwɩnɩ wɔ dɩyɛ be nwʋ anzɛnyɩɩ ɛkɛva mfonyini ekediã intanɛtɩ zʋ nɩ, mɩnla yɛ ɩsɛ kɛɛ osunzu nwʋ a?

• 

  Mɩnla ti mɔɔ ɩsɛ kɛɛ ɛma wʋ anyɩ ɩda ɛkɛnɩ wɔ intanɛtɩ zʋ ɔhɔnwʋvalɛ nwʋ a?

• 

  Mɩnla ti mɔɔ ɩsɛ kɛɛ otua ɛyɩlɛ be ɛma wʋ nwʋ wɔ mmɩlɩ dʋdʋ mɔɔ ɛkɛva ekeli egyima wɔ intanɛtɩ zʋ nɩ a?—Ɛfɩ 5:15, 16