Asʋ̃ Enyiaa Kyerɛwnsɛm No Mu a Wobɛhwehwɛ Daa Nɩ Zʋ Mfasʋ a?

Asʋ̃ Kyerɛwnsɛm No Mu a Wobɛhwehwɛ Daa mɔɔ ɛkɛva nɩɩ numɔ Ɛhɛlɛlɛ Ndwokɔ mɔɔ ɛkɛɣɩnga nɩ ɩkɩnla wʋ eɣile bela sunzuma ɔfʋã nu nhyɩhyɛlɩyɛ nwʋ a? Sɛ ɩ́dɩ ɔzɔ a, ɔkɔhʋla ɛkɛva ɛkɛhɩnla wʋ nhyɩhyɛlɩyɛ nwʋ a? Abiyemmɔ bɛyɛ bɛ dɩyɛ nwɔnɩ dɛkɛdɛkɛ na ama bɛahʋla bɛadwɩnɩndwɩnɩ nwʋmɔ mmɩlɩ mɔ bɛyɛɛ be egyima wɔ eɣile yɩ nu nɩ. (Dwh 1:8; Ndw 119:97) Kɛ ɛkɛyɛ na wʋanyia numɔ Ɛhɛlɛlɛ Ndwokɔ yɩ nɩ zʋ mfasʋ a? Kɩngá Bayɩbʋlʋ nu ndwokɔ mɔɔ ɩwɔ nu nɩ na wʋanwʋ mɔɔ ɩfalɩ nwʋ. Bɔ́ mmɔdɩnɩ dwɩnɩndwɩnɩ Bayɩbʋlʋ nu ndwokɔ be mɔɔ ɩtwɩ̃ adwɩnɩ isiye numɔ egyinanlɛzʋ-odwokɔ yɩ zʋ nɩ nwʋ. Akʋ̃, fá yɛ egyima wɔ wʋzawʋ wʋ ɛbɩlawɔlɛ nu. Sɛ ekyina Nyamɩnlɩ Odwokɔ yɩ zʋ esizi abɔkɔ a, ikehile ɔhʋanɩ wʋ wɔ wʋ ɛbɩlawɔlɛ nu na ekenyia ɔzʋlɔ mfasʋ baaba.​—Ndw 119:105.

Bɛtɩlɩ mmusunwa mɔɔ bɔwɔ oyuwadɩ munwala bosunzu Kyerɛwnsɛm No Mu a Wobɛhwehwɛ Daa nɩ nwʋ mmɩlɩ mɔ bedii bɔ nwɔnɩ alɩyɛ nɩ. Aɣile asã yɩ, bɛfa egyimalilɛ eyimmɔ be bokua JW Broadcasting^® zʋ wɔ PROGRAMS AND EVENTS ɔfʋã ɛkɛnɩ. Asʋ̃ ehila egyimalilɛ yɩ be kyɩ̃ a? Ebiye a, egyimalilɛ yɩ be ikeli wʋ ahyinyiadɩ nwʋ egyima. Kɛ ndianwʋ nɩ, mɩnla ɔhʋanɩ zʋ yɛ Lɔɔtʋ yɩ odwokɔ nɩ ɩkɔhʋla ɩkɛhã wʋ pɔkɔzilɛ azʋlɔtʋ a?

KILÁ VIDIYO MƆƆ ISE MÁMA BƆDƆ OYUWADƖ (1DWƆ 2:15), NA AKƲ̃ YƖ́ NDWOKƆƔIZIALƐ EYIMMƆ BO MUNWA:

• Mɩnla Bayɩbʋlʋ nu egyinanlɛzʋ-odwokɔ yɛ nɩ Nwɔnɩ Ɔzʋ̃mɩnlɛ eyi igyĩ zʋ a?

• Mɩnla ɔhʋanɩ zʋ yɛ Lɔɔtʋ yɩ odwokɔ nɩ ɩma yɛnwʋ asianɩ mɔɔ ɩwɔ oyuwadɩ anzɛnyɩɩ nninyeni mɔɔ bɔwɔ oyuwadɩ mɔɔ yɛkɔlɔ bɛ nɩ nu a?—Gyn 13:12; 14:12; 19:3, 12, 13, 24-26

• Mɩnla ɔhʋanɩ zʋ yɛ yekile kɛɛ yɛdɔ Gyehova na kɛ oyuwadɩ anzɛnyɩɩ nninyeni mɔɔ ɩwɔ numɔ nɩ a?