DƖYƐZUMANLƐ 18

Má Wʋ Ediyelɛmaa Nɩ Benyia Ɔzʋlɔ Mfasʋ

1 Kɔlɛntɩmaa 9:19-23

MƆ ƖSƐ KƐƐ ƐYƐ: Adwɩnɩ mɔɔ wʋ ediyelɛmaa bɛlɛ nɩ, hyɛ́ numɔ ɛzɩzɩbɛ na ama bɛadɩ nɣanlɩ kɛɛ bozuma debe mɔɔ mfasʋ wɔ ɔzʋlɔ.

Sunzú mɔɔ wʋ ediyelɛmaa nɩ bezi yɩ daada nɩ nwʋ. Kɛ ankɩ ekezi ndwokɔ mɔ bɛdɩ yɩ kyɩ̃ nɩ zʋ dɔkʋ̃ mbɔmɩ sʋ̃maa nɩ, bʋwá bɛ ma bozunzu wʋ odwokɔtile yɩ nwʋ wɔ ɔhʋanɩ sʋnʋnkʋ̃ zʋ mfomi.

Ndwokɔ mɔɔ bezi yi daada nɩ bʋbɔ ɔzʋlɔ ndɛndɛ, naasʋ̃ sɛ ɛdaa adwɩnɩ fʋlɔ be ali a, dɩdagyɩ.
Pɩbɛlɩ́ nu na dwɩnɩndwɩnɩ nwʋmɔ. Sɛ ɩkɛyɛ bʋwɔ a, fá ndwokɔ mɔɔ bɛlɛ́tɩlɩ yɩ kyɩ̃ nɩ kilehile ndwokɔ aditili be nu. Sunzú wʋ ndɛnɩ yɩ odwokɔtile nɩ nwʋ bʋwɔ baaba, na kila kɛɛ wʋ odwokɔtile nɩ ɩ nɩɩ mɔɔ ɛpɛ kɛɛ ɛfa ɛkɩnla nwʋmɔ nɩ iyiyia a.

Mmɩlɩ mɔ ogua ɔzʋlɔ ɔdwɩnɩndwɩnɩ wʋ odwokɔtile yɩ nwʋ nɩ, biziabiziá wʋ nwʋ ndwokɔ be dɩkɛɛ ‘mɩnla a, mɩnla ti a, eɣile sina a, ɛhɩnla dɩka a, aninyia a, nɩɩ mɩnla ɔhʋanɩ zʋ a.’ Ɔzɔ ndwokɔɣizialɛ nɩɩ nwʋmɔ munwalɩyɛ mɔɔ ɛkɛma wɔ wʋ egyimalilɛ yɩ nu nɩ, ɩkɛma wʋ ehilehilelɛ ikodu mpʋnɩ.
Kilé mfasʋ mɔɔ ɩwɔ wʋ odwokɔ nɩ zʋ. Kilehilé kezimɔ Bayɩbʋlʋ yɩ nu odwokɔ be ɩkɔhʋla ɩkɔwʋwa wʋ ediyelɛmaa nɩ wɔ bɛ ɛbɩlawɔlɛ nu. Ɛ nɩɩ wʋ ediyelɛmaa nɩ bozunzu bʋwabɩlɛ pɔkyɩ̃ɩ̃ be, subanɩ, nɩɩ nyɛlɩyɛ mɔ ɩkɔhʋla ɩkɔwʋwa bɛ nɩ nwʋ.